Ukhala uyazithulisa owesilisa waseNewlands West ngenkampani yabadayisi bezindlu iNationwide Agents.

ZAMANDOSI CELE

UKHALA uyazithulisa owesilisa waseNewlands West, eThekwini, ngenkampani yabadayisi bezindlu iNationwide Agents athi imqole u-R200 000 imthembise ukumdayisela umuzi kanti ushaywa ngemfe iphindiwe.

UMnuz Fano Ngubane (51) utshele Isolezwe ukuthi ukhokhele abakwaNationwide Agents u-R200 000 ngoba elandela umyalelo wabo wokuthenga indlu ahlala kuyo nomndeni wakhe khona eNewlands West, ku-Earlsfield. Uthe wahlangana nalaba badayisi bezindlu ngoba ezimisele ngokuthenga le ndlu enamagumbi okulala amathathu eyayibiza uR800 000.

“Saxhumana noyinhloko yabadayisi emuva kokubona isikhangiso sabo base behlangana nathi bayosikhombisa umuzi,” kuchaza uNgubane.

Uthe ngenxa yokuthi izinto zazingahambi kahle ekutheni athole ibhondi ngaleso sikhathi, umdayisi wendlu abadluliselwa kuye wabeluleka ngokuthi bangayiqasha indlu kodwa kuzomele bafake u-R10 000 ku-akhawunti yakwaNationwide Agents bese kuthi njalo ngenyanga bakhokhe irenti ka-R6000.

“Ngokuhamba kwesikhathi sesibonile ukuthi umuzi siyawuthanda satshelwa ukuthi kumele sikhokhe imali engu-R200 000 ukukhombisa ukuthi sizimisele ngokuwuthenga,” kusho uNgubane othe nebala bayikhokha leyo mali kwaNationwide Agents.

UNgubane, uthe ngoSepthemba nyakenye bahamba bayobhalisela ukuthola ibhondi ka-R600 000 ukuze bezowuthenga ngokuphelele nokuyilapho baqala ukuhlangabezana nezinkinga.

“Umdayisi wendlu wakwaNational Agents obesisiza wasijikela esesitshela ukuthi kuzomele sixhumane nomphathi wenkampani ukuze kube uyena oqedela izinhlelo zokudayiswa komuzi,” kuchaza uNgubane.

Uthe bazama izikhathi eziningi ukuxhumana nomphathi wakwaNationwide Agents kodwa kungaphumeleli. Uthe wayelokhu etshelwa ukuthi uzoxhumana nomphathi uma eseseThekwini.

Uqhube wathi bekuthi njalo uma sekufika isikhathi okumele bahlangane ngaso asho amanangananga abe ngumuntu omatasa.

UNgubane uthe ngokuhamba kwesikhathi behleli kulo muzi babona sekufika abanikazi bawo abashaqeka ukuthola ukuthi umuzi uqashisiwe ngoba bona babenze isivumelwano nabakwaNationwide Agents ukuthi babatholele abantu abazowuthenga.

“Abanikazi bomuzi baveza ukuthi bathola u-R75 000 uphuma kwaNationwide Agents futhi bona indlu babeyibize u-R750 000,” kusho uNgubane.

Uthe abanikazi bomuzi babathumela kubameli babo ukuzama ukubadayisela indlu ngokusemthethweni ngoba abakwa Nationwide Agent bengasatholakali.

Uthe ummeli wabanikazi wenza isivumelwano esisha sokudayiselana ngoba abanikazi bawo babesazimisele ngokuwudayisa futhi sebewutholile no-R75 000.

UNgubane uthe abameli babe sebemluleka ngokuthi avule icala lokuqolwa kwemali emaphoyiseni kodwa ngesikhathi ezama ukulivula esiteshini samaphoyisa watshelwa ukuthi akusilo icala lobugebengu.

“Sifuna ukuxwayisa abantu ukuthi bangalutheki ngalaba badayisi bezindlu, sesidinga noma yiluphi usizo ukuze kubuye imali yethu,” kuzikhalela uNgubane.

Kuthintwa uNkk Ngidi obesebenzela le nkampani futhi esiza umndeni wakwaNgubane, uthe akasasebenzi kwaNationwide Agents.

“Ngagcina ngoFebhuwari ukusebenza khona. Anginalo ulwazi ukuthi kwenzekani,” kusho uNkk Ngidi maqede waluvala ucingo.

Isolezwe lizame izikhathi eziningi ukuxhumana noNkk Princess Ntshangase Mseleku ongumphathi wale nkampani yabadayisi bezindlu iNationwide Agents kodwa imizamo yonke ingaphumeleli.

Kamuva kuvele ukuthi le nkampani isiyathutha KwaZulu-Natal kodwa isisebenzela eGauteng.

Umndeni wentombazane yaseNdwedwe edlwengulwe yase iyabulawa uthi kaweneme ngokudedelwa kwabasolwa kulesi sigameko.

MCEBO MPUNGOSE

UMNDENI wentombazane yaseMolokohlo eNdwedwe edlwengulwe yase iyabulawa emuva kokuba yehle ebhasini ikade ihambe nesikole uthi kaweneme ngokudedelwa kwabasolwa kulesi sigameko.

Izolo umndeni wakwaCele ufihle uLungile Cele (14) obefunda uGrade 9 eMashiyamahle Secondary okwatholwa isidumbu sakhe ngeSonto eledlule emuva kokuthi engabuyanga ekade ehambe nesikole beye eThekwini.

Emva kokutholwa kwesidumbu sakhe amaphoyisa abopha amadoda amathathu ayesolwa ngokuthinteka kulesi sigameko. Omunye wawo walanyulelwa amaphoyisa umphakathi usho ukumqeda ngesibhaxu. Ilungu lomndeni elikhulume neSolezwe uNkk Makhosazane Cele (47), uninakhulu kaLungile, uthe umndeni usashaqekile ngokudlula kwakhe ngalesi sihluku njengoba kubikwa nokuthi wanukubezwa. Uthe ufuna bonke abathintekayo babhekane nomthetho.

“Sifuna ukubona beboshwa abantu abenza le nto. Singathanda ukubona bejeziswa bathole isigwebo ngomntwana omncane kangaka obesazokhula enze okuningi okuhle emndenini wakhe ikakhulukazi njengomntwana okhule ehlukumezekile elahlekelwa abazali bakhe esemncane wakhula wakwamukela,” usho kanje.

Uthe okumphatha kabi kakhulu wukuthi uLungile nguye owayenakekela kakhulu unina ngenkathi egula kwathi noma eseshona wakwamukela lokho.

“Ngeke esakwazi nokukhula avune izithelo zokunakekela unina. ubenekusasa eliqhakazile ngoba ngisho nasesikoleni othisha bakhuluma okuhle kuphela ngaye,” usho kanje.

Ikhansela lendawo, uMnuz Mxolisi Ngcobo, uthe abaholi, ngokubambisana nomasipala balule isandla ukuze umngcwabo uhambe kahle izolo.

Uthe bazimisele ukubambisana namaphoyisa ukuze uphenyo luhambe kahle.

“Sisazoxhumana nawo kahle sithole ukuthi yini edale ukuthi abasolwa badedelwe,” usho kanje. Ngaphandle komndeni namalungu omphakathi lo mngcwabo ubuhanjelwe abafundi abefunda nabo eMashiyamahle.

Ukhala ezimathonsi obezitshela ukuthi useyinjinga emuva kokufakelwa isheke lika-R500 000.

BAWINILE NGCOBO

UKHALA ezimathonsi obezitshela ukuthi useyinjinga emuva kokufakelwa isheke lika-R500 000 eliwumbombayi kade ethole umqhafazo wokuthi uwinile.

UMnuz Bongani Sibisi waseMlazi, uthe ubesembe ngisho isiza ethi uzokwakha isithabathaba somuzi ngoba ubezobe esenemali kanti akabuzanga elangeni ushaywe ngemfe iphindiwe.

Uthi ulahlekelwe imali elinganiselwa ku-R14 000 abelokhu eyifakela abantu ababemthumelele umqhafazo othi uwine u-R200 000 abese bathi akahlangabeze umklomelo wakhe ngemali.

USibisi uthe wathola umqhafazo othi useziwinele u-R200 000 akafonele inombolo eyayibhaliwe.

“Ngafona wathi lo Mrs Precious engangikhuluma naye angibuye ngifone emuva kwemizuzu emihlanu usafuna ukubheka kuthi ngiwine ngempela yini. Ngibe sengibuye ngifona wathi angifake i-airtime ka-R275 ngimbizele izinombolo zayo. Ngaphuma emsebenzini ngayo yithenga ngamnika izinombolo,” kusho uSibisi.

Uthe wabe esemkhulumisa nomunye owathi uyimenenja wathi imali izongena kwi-akhawunti yakhe emuva kwemizuzu engu-48.

“Ngakusasa bathi le mali ngoba inkulu kumele iqale eReserve Bank kumele ngifake u-R3 550 wokuyihlangabeza. Ngayifaka le mali eFNB eMega City. Sengiwufakile bathi angifake u-R5 600 ukuze imali engiyiwinile ingene manje kwi-akhawunti,” kuchaza uSibisi.

Uthe imali ayingenanga bathi manje akafake u-R3 000 ngoba le mali inkulu kakhulu ngeke ize ikwazi ukuthi bayifake ngale mali aseyifakile.

USibisi uthe wabatshela ukuthi akasenayo imali, bathi akafake lo R3 000, sebezomhlangabeza ngalena enye imali eshodayo.

“Kube sekungena imali engu-R500 000 kwi-akhawunti yami yakwa-FNB ababethe angiyivule. Ngagijima ngaya kwi-ATM yakwa-Standard Bank nangempela isiliphu sikhombisa ukuthi ungenile lo R500 000,” kusho uSibisi.

Uthe ubesezitshela ukuthi uzokwakha isithabathaba sendlu ngale mali kubonakale ukuthi usengumacaphuna kusale.

“Ngakusasa kungene le mali kube sekufona usisi wakwa-FNB engibuza ngayo wangitshela ukuthi leli sheke elingenile lingumkokotelo,” kusho uSibisi.

Uthe uma efona efuna imali yakhe kulaba bantu bamtshela ukuthi ngeke ibuye ngoba isingene kwintela yeBhange loMbuso.

Uthe ubeqala ukuthola umqhafazo ofana nalo yikho asukumela phezulu ezitshela ukuthi ubhekwe ngabakubo.

Okhulumela amaphoyisa eThekwini uCaptain Khephu Ndlovu, uthe amaphoyisa aphenya icala lokweba ngokukhohlisa umuntu.

Uthe basagcizelela kubantu ukuthi umuntu akawini engangenelanga mncintiswano futhi uma uwinile uyafonelwa yile nkampani owine kuyo isho ukuthi umklomelo uwulanda kanjani noma ufika kanjani kuwe.

“Uma uwinile ayikho imali oyikhiphayo. Njengoba sekuzoba isikhathi samaholidi abantu kumele baqaphele kakhulu ngoba lobu bugebengu buyanda.”

INFP ibhekene nenkinga yemali yokukhankasela ukhetho lohulumeni basekhaya oluzoba ngo-2016.

CELANI SIKHAKHANE

INFP ibhekene nenkinga yemali yokukhankasela ukhetho lohulumeni basekhaya oluzoba ngo-2016 nokuyinto esidale uvalo emalungwini lokuthi leli qembu lingagcina lingenzanga kahle uma kuqhathaniswa nokhetho lwango-2011.

Lokhu kuvezwe wuMengameli wale nhlangano, uNkk Zanele Magwaza-Msibi, ePort Shepstone lapho ebehlangene khona namalungu eqembu lakhe eyoxoxisana nawo ngezinhlelo zeqembu.

“Inkinga enkulu esibhekene nayo kulolu khetho oluzayo wukuthi asinayo imali eyanele yokukhankasa nokuzophazamisa izinhlelo zethu zokukhulisa iqembu nephupho esinalo lokuthi senze kangcono ngo-2016 ukwedlula u-2011,” kusho uNkk Msibi.

Leli qembu kumanje lisabhekene nomqansa wokukhokha isikweletu sika-R7 million okuyimali ababeyisebenzisa ukukhankasa nokuchoma amabhodi amakhulu abegcwele emadolobheni amaningi akuleli abenobuso bukaNkk Magwaza-Msibi.

Ubuye waxwayisa amalungu eqembu ngoqhekeko wathi kumele kube nobumbano balugweme uqhekeko ngoba luzobafaka enkingeni efana nawo wonke amaqembu asanda kusungulwa babonakale beshabalala.

“Uqhekeko nokungezwani kuzosilimaza, sibonile amanye amaqembu eba nezingxabano kuze kufike ekutheni ayashabalala ngakho ngicela sibumbane singayivumeli le nto ngoba ingasiholela esimeni esifanayo nesala maqembu esesiwabonile,” kusho uNkk Msibi.

kuke kwavela ukuthi kukhona abaholi abafuna achithwe lo mholi esikhundleni kanti abanye abeneme nangendaba yakhe yokuba yiphini likaNgqongqoshe wezeSayensi nobuChwepheshe.

Uthe ngesikhathi bekhankasela ukhetho ngo-2011 bazikhombisa kubantu baseNingizimu Afrika ukuthi bakulungele ukuhola izwe njengoba bathola izibalo ezabenza kwaba nomasipala ababaphatha ngokubambisana ne-ANC.

Leli qembu okugqamayo ngalo wukuthi selokhu lisunguliwe kusewumqansa ukuthi linqobe uma kunokhetho lokuchibiyela.

Izikhathi eziningi kuvamise ukuthi kunqobe i-IFP noma i-ANC kanti kwezinye izifundazwe kuba yi-ANC noma iDA lona lisale emuva. Uthe nakuba benenkinga yemali kodwa bangawenza umehluko ngokuthi wonke umuntu akwenze kube wumsebenzi wakhe ukusebenzela iqembu.

Ayelulama amakholwa ebandla lamaWeseli alimale kuhlasele isiphepho esinamandla sawisa itende elikhulukazi abehlanganele kulo.

CELANI SIKHAKHANE

AYELULAMA amakholwa ebandla lamaWeseli alimale kuhlasele isiphepho esinamandla sawisa itende elikhulukazi abehlanganele kulo enkonzweni yesifundazwe ebiseNanda Newtown A ngempelasonto.

Enkonzweni ethathe impelasonto yonke bekubuthene amakhulu ngamakhulu entsha, iWesley Guild, abevela ezindaweni ezehlukene zesifundazwe saKwaZulu-Natal.

ngoMgqibelo ekuseni kusuke isiphepho esinamandla saphazamisa inkonzo.

“Baphume sebebaleka abazalwane abaningi bebona ingozi ebizokwenzeka ngenxa yomoya obunamandla ovunguze kwanyakaza netende kwawa nezinsimbi.

“Kuthe abanye besaqhubeka besacula kwawa izinsimbi zashaya amanye amakholwa kwase kuyabhuduzelwa abantu bebaleka kwalandela ngokuwa kwetende,” kusho omunye ozibonele kwenzeka lokhu.

Ngesikhathi kuhlasela isiphepho bekubuthene intsha ebisenkonzweni yayo yasekuseni ihuba ingazibekile phansi kanti abanye kuthiwa ngesikhathi kuqala kunyakaza itende bebengayizwa eyokuphuma beziculela.

UMfu Thulani Dimaza uthe amakholwa aphumile kodwa abantu abalimele babili – owesifazane waseVryheid nowesilisa waseThekwini kodwa kabalaliswanga esibhedlela ngoba isimo sabo besingesibi.

“Omunye uphuke ingalo omunye walimala nje kodwa bobabili sithintene nabo ngathola ukuthi isimo sabo siyathembisa emakhaya,” kusho uDimaza.

Uthe inkonzo iqhubekile kodwa bayenzele ehholo elisesikoleni sendawo abebeseduze kwaso nalapho abangazange bephazamiseke khona.

NgeSonto amalungu ebandla nabaholi balo bahambele emzini oseduze kwalapho abebekhonzela khona eNanda bakhuleka banikelela nabaswele ngezidingo nokudla bakhulekela nokuthi kwehle izinga lobugebengu kule ndawo.

Osomatekisi nabashayeli benhlangano iQina Mshayeli sebenxuse uhulumeni ukuba ubakhombise umqulu okusozetshenzwa ngawo uma sekuqala uhlelo olusha lwamabhasi iGo Durban.

NOKUBONGWA PHENYANE

OSOMATEKISI nabashayeli benhlangano iQina Mshayeli sebenxuse uhulumeni waKwaZulu-Natal ukuba ubakhombise umqulu okusozetshenzwa ngawo uma sekuqala uhlelo olusha lwamabhasi iGo Durban eThekwini, okuyimanje sekuqaliwe ukwakhiwa kwemizila yalo.

Izolo emini kuke kwaphazamiseka ukusebenza kwamatekisi ngemuva kwemashi yosomatekisi nabashayeli beDurban West enkabeni yeTheku ebibheke emahhovisi kaMasipala weTheku beyonxusa iMeya uMnuz James Nxumalo ukuthi ibachazele ngokuthi lolu hlelo lwezokuthutha luzosebenza kanjani.

Bathe bakhathele ukuzwa ngamahemuhemu ngokuqukethwe emqulwini walolu hlelo lwezokuthutha kodwa bona bengakaze bawubone.

UMnuz Jabulani Mazibuko, obekhulumela osomatekisi, uthe uma bezwa kuthiwa lolu hlelo olusha olwamabhasi yingakho befuna ukubona umqulu oqukethe konke ngokusebenza kwalo.

“Nathi kuyilungelo lethu ukubona ukuthi ngempela yini ephethwe yilo mqulu njengoba sinamatekisi nje. Sisebenza kabi manje asebewubonile bayasho ukuthi umsebenzi wamatekisi uzolimala uma amabhasi amasha okuthiwa azosebenza eqala,” kusho uMazibuko.

Uthe bebethembe inhlangano yabo iSantaco ukuthi yiyo ezobasiza ekubatsheleni ngokuphethwe yilo mqulu kodwa nayo ayisho lutho.

“Imihlangano ekuqaleni ibibanjwa uhulumeni, umasipala, neSantaco ngokuqukethwe yilo mqulu kodwa iSantaco ibingabuyi ukuzositshela ukuthi kuzosetshenzwa kanjani,” kuchaza yena.

Uthe yingakho sebenqume ukuthi bazisukumele bakhulume ngalokhu.

“Ngisho udaba lwamaphemithi ethu sifuna lulungiswe kubuyiswe amadala esasikwazi ukuthi siphile ngesikhathi sinawo sikwazi ukuyidayisa.

Lawa amasha asikwazi kwenza lutho ngawo ngoba kukhona la afike asivimbe khona. Sizoqhubeka simashe kuze kube iMeya uNxumalo uza kithi azosilalela njengoba sesimashe kaningi kodwa engasiphenduli,” kuchaza yena.

UMnuz Jimmy Maphumulo, naye okhona kule mboni, uthe kusuka izolo banikeze umasipala weTheku izinsuku eziyisikhombisa ukuthi ubaphendule kungenjalo bazomisa wonke amatekisi.

“Sobanika izinsuku eziyisikhombisa baphendule. Kungenjalo akukho lutho oluzohamba sifuna okungokwethu njengoba kubonakala ukuthi abazimisele ngalokhu esikufunayo,” kuchaza yena.

Ngesikhathi befika eCity Hall bafune uNxumalo kodwa batshelwa ukuthi akekho kwaqhamuka uMnuz Joe Nene osebenza nemeya kodwa bamyalela ukuthi akahambe.

Kusuke umsindo betshela uNene ukuthi ngeke bamnike uhla lwabo ngoba bafuna uNxumalo.

Basuke lapho bayovala umgwaqo u-Anton Lembede (Smith Street), bathi bazodala isinyokotho uma engaqhamuki.

Ekugcineni bagcine behlise umoya baphindela emuva.

Okhulumela umasipala uMnuz Thabo Mofokeng ukuqinisekisile ukuthi abebemasha benqabile ukushiya uhlu lwabo lwezikhalazo.

“IMeya isibambe imihlangano eminingi nabamele abamatekisi, kubandakanya nabo laba abangenelisekile.

Kwavumelwana ngokuthi kuzobanjwa omunye umhlangano ngaphambi kokuba kuphele le nyanga,” kusho uMofokeng.

UMnuz Bheki Mbambo, weSantaco eThekwini, uthe kuyabadumaza bona njengobuholi ukubona abamatekisi behlukana phakathi.

“Kwathina simangele uma sesibona kumbiwa imigwaqo singatshelwe lutho.

Kodwa sesibanxusile kumasipala ukuthi bahlangane nathi basitshele ngempela ukuthi njengoba sebeqala nje ukwakha thina njengabantu bamatekisi sizosebenza kanjani,” kusho uMbambo.

Unxuse abakule mboni ukuthi babumbane ukuze uma kukhona izikhalazo bakwazi ukuthi bazikhulume bebonke bangahlukani. Ukwakhiwa kwemigwaqo sekuqalile izingxenyeni ezithile zeTheku.

Ukhomishana wamaphoyisa KwaZulu-Natal uLt General Mmamonnye Ngobeni uthi bazobuyekeza imithetho yezokuphepha kwamaphoyisa.

BAWINILE NGCOBO

UKHOMISHANA wamaphoyisa KwaZulu-Natal uLt General Mmamonnye Ngobeni uthi bazobuyekeza imithetho yezokuphepha kwamaphoyisa ukuze kunqandeke izigameko zokubulawa kwawo ezifuze esenzeke esiteshini samaphoyisa ePinetown ngempelasonto.

ULt General Ngobeni ubekhuluma enkonzweni yokufihla uWarrant Officer Norman John izolo, obulawe yisiboshwa ngesibhamu sakhe esitokisini sakulesi siteshi entathakusa ngoMgqibelo.

Le nkonzo ibisesontweni eRedemption Point, e-Ashley ngasePinetown.

Kulesi sigameko kwalimala amaphoyisa amabili nalesi siboshwa sabulawa.

ULt General Ngobeni uthe usexoxisene noKhomishana wamaPhoyisa kuzwelonke uGeneral Riah Phiyega bavumelene ukuthi babuyekeze imithetho yezokuphepha. Uthe uzojuba abazokwenza uphenyo ngalesi sigameko ukuze kutholakale ukuthi kwenzekeni.

Kuthiwa uJohn ubulawe ezama ukuhlukanisa iziboshwa ebezilwa esitokisini.

Esinye salezi ziboshwa simhlule ngamandla, samphuca isibhamu samdubula esifubeni washona, sadubula nesinye besilwa naso sabe sesidubula amaphoyisa amabili abezolekelela.

Lesi siboshwa naso sigcine sidutshulwe sashona.

ULt General Ngobeni uthe uJohn ungomunye wamaphoyisa ayivela kancane ngoba akukho nechashazi kwifayela lakhe.

Uthe usebenzele umbutho ngokuzinikela iminyaka engu-22.

Uthe abakhathazekile ngokubulawa kwamalungu omphakathi kuphela kodwa nokubulawa kwamaphoyisa kuyabakhathaza.

“Besingalindele ukuthi kusanda kukhishwa izibalo eziphezulu zokubulawa kwabantu ukuthi kuzoba nephoyisa eselizobulawa,” kusho uLt General Ngobeni.

Okhulumela umndeni uPastor Christopher Joseph uthe kuJohn isigebengu bekuyisigebengu, ezonda kakhulu abantu abebezihlanganisa nezidakamizwa.

Uthe egcina ukukhuluma naye wayekade ethi usefuna ukusula emaphoyiseni azivulele ibhizinisi, wamcela ukuthi ambhekele ukuthi angaphuma namalini uma eyeka.

“Ngamfonela ngathi akalinde kancane. Ngamtshela ukuthi into engingamsiza ngayo ukumkhulekela,” kusho uJoseph.

Uthe uma kushona iphoyisa kusho ukuthi kusuke sekumele abasele baqhubeke nomsebenzi.

UNKK Winnie Madikizela-Mandela uzohlinzwa futhi, indodakazi yakhe uZindzi Mandela ibhale lokhu ku-twitter.

UNKK Winnie Madikizela-Mandela uzohlinzwa futhi, indodakazi yakhe uZindzi Mandela ibhale lokhu ku-twitter izolo.

“Ngifisela umama ukuthi alulame ngokushesha futhi nenhlanhla njengoba ezohlinzwa. Ngimthanda njalo,” kubhala uZindzi ku-twitter.

Akucaci ukuthi uNkk Madikizela-Mandela uzobe ehlinzelwani.

NgoNovemba 2011, uNkk Madikizela-Mandela wangeniswa esibhedlela iMilpark, eJohannesburg nalapho ayelashelwa isifo sikashukela.

NgoSepthemba wonyaka ofanayo, wangeniswa eLife Brenthurst Clinic eParktown ukuzohlinzwa eqakaleni.

NgoJuni 2012, uNkk Madikizela-Mandela wangeniswa esibhedlela nalapho ahlinzwa khona emuva kokuthi ewile waphuka isihlakala sangakwesokudla. – Sapa

U-Oscar Pistorius wabe ehlela ukuthatha umhlalaphansi ngo- 2017.

SAPA

U-oscar Pistorius wabe ehlela ukuthatha umhlalaphansi ngo- 2017 kodwa walahlekelwa yiyo yonke imihlomulo yokuba yinxusa lezinkampani ayezimele emuva kokudubula abulale intombi yakhe uReeva Steenkamp, kusho imenenja yakhe itshela iNkantolo eNkulu ePitoli izolo.

“Ngalesi sikhathi zonke izinkontileka abe nazo zaqedwa ngokusemthethweni,” kusho uPetrus van Zyl.

“Izinkampani zakubeka obala ukuthi konke obekuzihlanganisa noMnuz Pistorius sekuphelile.”

Uthe ngaphambi kwalesi sigameko sokudubula intombi yakhe ngoSuku lweziThandani ngonyaka odlule lo msubathi wayeseke washo ukuthi uzotha-tha umhlalaphansi ngo-2017.

UVan Zyl uthe wayematasa ehlanganisela uPistorius izinkontileka ezintsha kuze kube ngu-2017 futhi bagcina ukuxoxa ngoFebhuwari 7, 2013 esikhathini esingangeviki ngaphambi kokubulawa kukaSteenkamp.

“Sabe silindele ukuthola imali eningi ngalezi zinkontileka,” kusho uVan Zyl.

Ekhuluma ngekusasa likaPistorius ngaphambi kwesigameko sokudubula, uVan Zyl uthe: “Uma ngingasebenzisa igama lokuthi labe ‘liqhakazile’ ngabe angikacacisi kahle.”

Uthe ngoFebhuwari 2013 uPistorius wabe ezomenyezelwa njengenxusa lenkampani ethile, kuthi ngoMashi amenyezelwe njengenxusa lenye futhi.

UPistorius noVan Zyl bebengakakudingidi ukubuyela kwakhe kwezokusubatha kusukela uSteenkamp adutshulwa wabulawa futhi bebesalinde isinqumo secala.

UBarry Roux, ummeli kaPistorius, uthe usenofakazi oyedwa osele. – Sapa

Kusolwa umbango wamatekisi ophakathi kwemindeni emibili ngezigameko zokudubula ezenzeke eZakheni.

BAWINILE NGCOBO

KUSOLWA umbango wamatekisi ophakathi kwemindeni emibili ngezigameko zokudubula ezenzeke eZakheni, eMnambithi, ngoMgqibeko kwashona abangu-15.

Izolo uNgqongqoshe wezokuThutha nokuPhepha koMphakathi KwaZulu-Natal, uMnuz Willies Mchunu, uthe okwamanje kusasolwa ukuthi udlame lwamatekisi oluqale eGoli selukapakele nakule ndawo kanti kukholakala ukuthi umbango uphakathi kwemindeni emibili, owakwaMabaso nowakwaGamede enamatekisi eGoli nasePitoli.

Esehlakalweni sokuqala imoto eyiMercedes Benz okuthiwa ibinabesifazane abahlanu abebephuma emshadweni beya eGoli idutshulwe ngabantu abangabonakalanga abebehamba ngePolo ku-Pieters Road eZakheni kwa-E.

Kuthiwa itekisi ebilayishe abantu izame ukugwema lokhu kanti isizozithela elolini.

Kushone abantu abayisishiyagalolunye abebesetekisini, kwashona oyedwa obekwi-Mercedes. Abanye abahlanu badutshulelwe endaweni yokuwasha izimoto.

Kuthiwa abantu abebehamba ngeMercedes badubuleke ngephutha. kunezinsolo zokuthi abebedubula bebeyifanisa nenye abebekade beyihlosile.

Izolo kuvele ukuthi amaphoyisa aphenya ngezinye izigameko zokubulawa kwabantu abawu-15 asebebulewe ngenxa yombango.

Ngokuthola kweSolezwe kunombango wakudala wemindeni emibili yaseSdakeni okuthiwa umsuka wawo useGoli kanti kunezinsolo zokuthi zombili izigameko zokudubula zihlobene nawo yize singekho isiqiniseko sokuthi zenziwe ngabantu ababodwa.

Izolo uMchunu uhambele abalimele ezibhedlela, indawo yesigameko sengozi nabashonelwe.

UMchunu uphinde wahlangana nabakasosesheni wamatekisi endaweni.

Okhulumela uMchunu, uMnuz Kwanele Ncalane, uthe unxuse amalungu omphakathi nemindeni eshonelwe ukuthi ehlise umoya kuzothi uma sekudlule imingcwabo bese ephindela kule ndawo eyohlangana nomphakathi nabaholi.

Khonamanjalo, sekujutshwe ithimba lamaphoyisa ophiko lwe-National Intervention Unit kule ndawo ukuze kube nozinzo.

UKhomishana wamaphoyisa esifundazweni, uLt General Mmamonnye Ngobeni ujube ithimba elakhiwe ngabaphenyi, uphiko lwama-Hawks namaphoyisa ophiko lwe-Crime Intelligence ukuthi bayophenya ngalezi zigameko.

Kuzobuyiselwa ithimba le-NIU ebelikade livele lisebenza kule ndawo kodwa ebese lihambile.

Okhulumela uLt General Ngobeni, Colonel Jay Naicker, uthe kucelwa umphakathi ukuthi wehlise umoya, uyekele amaphoyisa aphenye ngalezi zehlakalo ngaphandle kokuphazanyiswa.

Basale beqhinqe ngaphandle kwamasango esikole abafundi nothisha besikole iJG Zuma High neKuthuleni Primary School eNanda.

MCEBO MPUNGOSE

BASALE beqhinqe ngaphandle kwamasango esikole abafundi nothisha besikole iJ G Zuma High neKuthuleni Primary School eNanda izolo ekuseni befica amasango evaliwe.

Kusolwa ukuthi lokhu kwenziwe ngabazibiza ngabanikazi bomhlaba okwakhiwe kuwo lezi zikole ngenxa yokungaboni ngaso linye phakathi kwabo noMnyango wezeMfundo esifundazweni.

Abafundi ababalelwa ku-3 000 balezi zikole bagcine betshelwe ukuthi abaphindele emakhaya ngoba kusheshe kwabacacela othisha ukuthi abanamandla okuphoqa ukuthi izikole zivulwe.

Abafundi bebeyizixongololo ngaphandle kanti omunye waseKuthuleni uze washayiswa yimoto njengoba lezi zikole ziseduze nomgwaqo omkhulu.

Usihlalo wesigungu esengamele iKuthuleni Primary uNkk Fikile Mavundla uthe isimo sayizolo sokuvalwa kwesikole singaphezu kwamandla ngoba yinto ethinta uMnyango wezeMfundo KwaZulu-Natal nabaphathi bomhlaba.

“Thina esingakucela ukuthi umnyango usheshise izingxoxo nabaphathi bomhlaba ukuze kuqhubeke ukufunda. Kusiphatha kabi ukubona abafundi behlezi emgwaqweni ngesikhathi sokufunda. Besingathanda ukubabona befunda kwakusasa noma ngoLwesithathu,” kusho uNkk Mavundla.

Ilungu lesigungu esengamele iJ G Zuma High, uMnuz Peter Manukuza, lihambe emazwini kaNkk Mavundla lithi akukho ezandleni zabo ukuqhubeka kokufunda esikoleni.

“Kuyasiphoxa ukubona isimo esifana nalesi ngoba izingane zethu ziphume emakhaya ziyofunda. Sithemba ukuthi kuzoba nesixazululo maduze ,” usho kanje.

UNgqongqoshe wezeMfundo KwaZulu-Natal uNkk Peggy Nkonyeni uzwakalise ukujabha ngesinqumo sabavale izikole okuthiwa bangamalungu enhlangano iNanda Community Development Trust.

“SiwuMnyango sinesivumelwano nebhodi lesikhwama esiphethe lo mhlaba nokugunyazwe ngaphansi kuka-section 14 okumthethosisekelo. Ngaphandle kwalokho sibe nokukhathazeka ngokusebenza kwabo okuhlanganisa ukuphatha imali ngendlela engahambisani nemigomo yomthetho olawula ukusingathwa kwezimali zomphakathi ngoba sibona ukuthi kungagcina kuholele ekutheni kube nokungaboni ngaso linye phakathi koMnyango nalesi sikhwama. Kuze kube manje lesi sikhwama siyehluleka ukuhambisana nezigaba zomthetho olawula ukuphathwa kwemali yomphakathi,” kusho uNkk Nkonyeni

Izolo uNkk Nkonyeni uthe bathumele ithimba loMnyango ebelizohlangana namalungu ebhodi lesikhwama ukuze kutholakale isixazululo. Imizamo yokuthola owesikhwama aphawule ngalolu daba ayiphumelelanga izolo.

UNkonyeni uthe uma begcina behluleka sebeyophoqelelaka ukuthi udaba balufake enkantolo enkulu ukuze kube yiyo ekhipha isinqumo ngokushesha.

Kuvalwa lesi sikole nje abafundi bakwa- matric basesontweni labo lokugcina lokuzicijela izivivinyo zokuphela konyaka.

USihlalo wenhlangano yabafundi e-J G, uSandile Buthelezi (19) ofunda umatric, uthe kuzophazamisa umgqigqo wabo wokulungiselela izivivinyo ukuvalwa kwesikole.

“Silahlekelwe yisikhathi sokufunda ngenxa yokuvalwa kwesikole. NgoMsombuluko siyaqala ukubhala, sibhala izifundo zekhompyutha i-CAT bese kulandela i-I.T. Okokuqala yenzeka le nto nonyaka, yenzeke ngesikhathi esibi. Sicela uhulumeni angenelele ukuze kuqhubeke ukufunda,” kusho yena.

Mkhulu umsindo kwamanye amagatsha e-ANC eThekwini ngamaphoyisa kamasipala aqapha imihlangano ethile okusuke kudingidwa kuyo izindaba zobuholi.

CELANI SIKHAKHANE

MKHULU umsindo kwamanye amagatsha e-ANC eThekwini ngamaphoyisa kamasipala aqapha imihlangano ethile okusuke kudingidwa kuyo izindaba zobuholi njengoba kubhekwe engqungqutheleni yesifunda nosekwenze kwasolwa abanye babaholi abagaqele izikhundla ngokuxhaphaza izinsiza zomkhandlu.

Umholi okhonjwa ngenjumbane kulokhu nguMgcinimafa we-ANC uNkk Zandile Gumede okuthiwa ufake isicelo ezikhulwini zamaphoyisa kamasipala ukuthi aqaphe amakhansela angu-13 uma eyosebenza kodwa amaphoyisa asebonakala nasemihlanganweni ye-ANC esuke ihanjelwe yila makhansela.

UNkk Gumede ethintwa uthe akahlangene nokujutshwa kwamaphoyisa emihlanganweni ngakho abanobufakazi balokho ababulethe.

Omunye wabaholi obecasukile uthe: “Asikaze kwa-ANC sibe namaphoyisa kamasipala uma kukhethwa noma sizixoxela izindaba zangaphakathi, kodwa uma isimo singesihle kuye kubizwe amaphoyisa lawa ombutho wezokuphepha okuyiwona asuke eqeqeshiwe ukulawula uthuthuva hhayi lawa kamasipala. Okunye okusithusayo ne-DA okuyiyona evamise ukubanga umsindo siyibona ithule asisazi ukuthi kanti kwenzakalani ngempela ngoba siyabona ukuthi kukhona abaholi abaxhaphaza izimoto zombuso ukufeza izinhloso zabo ukuze bakhethwe engqungqutheleni.”

UMnuz Bheki Ntshangase onguNobhala weTheku nobhekele ukujutshwa kwabaholi emagatsheni uthe isimo sezokuphepha yiso esibaphoqayo ukuthi bagcine benamaphoyisa emihlanganweni yize kuyinto abangayithandi.

“Kuba yikho ukuthi amaphoyisa kamasipala yiwo aba seduze uma sidinga amaphoyisa, ngikhuluma nje kade kunomhlangano kwelinye lamagatsha okugwazane abantu kulo nokuphoqe ukuthi sibize amaphoyisa.

“Ngaphandle kwalokho uNkk Gumede namanye amakhansela agadwayo ngeke kuthi uma ngiwathuma njengonobhala emhlanganweni ekubeni esuka emsebenzini kamasipala namaphoyisa omkhandlu asuke ehamba nawo, bese ewashiya endleleni aye emihlanganweni.

“Okunye kuyaziwa ukuthi uNkk Gumede uyagadwa futhi lokho kwenziwa ngemuva kokuhlolwa kwesimo akuvelanga nje wabonakala esenamaphoyisa amqaphayo,” kusho uNtshangase.

Phakathi kwamagatsha osekuke kwabonakala kuwona amaphoyisa kubalwa u-ward 100 nokuyilapho okuphakanyiswe khona igama likaNkk Gumede ukuthi abe nguSihlalo, ward 14 eDassenhoek naseMpola ku-ward 15.

Kwenye yama-ward kuthiwa kwaze kwaya ikhansela layowacela ukuthi awahambe ngoba abantu bengawafuni bewasola ngokuthi asebenzela uNkk Gumede kodwa anqaba ukushiya umhlangano.

Labo abeseka uMnuz Bheki Cele (osesithombeni) abafuni nokuyizwa indaba yamaphoyisa kamasipala njengoba kuthiwa uma bewabona emihlanganweni bafuna axoshwe futhi sebakhe isithombe sokuthi awohlangothi oluthile kuKhongolose.

Kutholwe amabhokisi anezidakamizwa esibizwa nge-Khat eshiywe eposini eliku-MNR.

KUTHOLWE amabhokisi anezidakamizwa esibizwa nge-Khat eshiywe eposini eliku-MNR ngaseDurban Station izolo emini.

Okhulumela amaphoyisa eThekwini, uCaptain Khephu Ndlovu, uthe amaphoyisa ophiko lwe-Durban Central Cluster Task Team athole umbiko ngabo-12 emini izolo ngamaphasela abekwe eposini iDurmail obekungacaci ukuthi abekwe ngubani.

UNdlovu uthe ngesikhathi amaphoyisa efika athole amabhokisi ayisishiyagalombili abenesinda 18 kilograms endaweni okufika kuyo izimpahla eziphuma kwamanye amazwe.

“Ngesikhathi amaphoyisa ewavula amabhokisi athole ukuthi kukhona izidakamiza i-Khat,” kusho uNdlovu.

Uhlobo lwezidakamizwa kuthiwa luququdwa luthi alufane neKuber lutholakala emazweni afana noPakistan.

UNdlovu uthe akuboshwanga muntu ngokutholwa kwezidakamizwa ngoba azitholwanga muntu kodwa bezibekiwe nje. “Izidakamizwa zizocekelwa phansi ngokohlelo lwamaphoyisa,” kusho uNdlovu.

Sihlangabezane nembibizane isiphakamiso se-ANC esifundeni i-Harry Gwala sokuthi kuhlonishwe uDkt Nkosazana Dlamini Zuma.

CELANI SIKHAKHANE

SIHLANGABEZANE nembibizane isiphakamiso se-ANC esifundeni i-Harry Gwala sokuthi kuhlonishwe uSihlalo weKhomishana yamazwe ase-Afrika, uDkt Nkosazana Dlamini Zuma, ngokuqanjwa kabusha komasipala ababili ngegama lakhe uma sebehlanganiswe benziwe umkhandlu owodwa.

Ubuholi be-ANC eHarry Gwala buphakamise ukuthi kufanele umasipala Ingwe noSanti baqanjwe ngokuthi iDkt Nkosazana Dlamini-Zuma Municipality ngenhloso yokuhlonipha iqhaza lakhe emzabalazweni waseNingizimu Afrika nokusebenzela kwakhe abantu ngokuzikhandla.

Umholi we-IFP eSishayamthetho saseKZN, uMnuz Blessed Gwala, uthe bayakuchitha lokhu ngoba babona i-ANC iqhubeka nomkhuba wokufuna ukuqhakambisa abaholi bayo bodwa ezintweni zesifundazwe ekubeni bekhona abanye abantu ababaneqhaza bemikhakha engahlangene nezombusazwe.

“Sekuphenduke umkhuba omubi ku-ANC ukuthi bafunze abantu ngamagama abaholi babo bebe bengazange baxhumane nabo. Baqale eMvoti bakhipha igama lomholi we-IFP ngoba befuna ukufaka awabaholi babo, basuka lapho baya eThekwini bafuna ukuguqula uMangosuthu Highway eMlazi. Sithe uma sikubuza lokho bathi yingoba uMntwana usaphila ngakho kuphambene nomgomo ukuqamba isakhiwo noma isikhungo ngomuntu osaphila kodwa bagcine sebekwenza lokho. Esisonke bavele basukeleka bengakhulumanga nabantu baqamba kabusha indawo bayibiza ngokuthi yiHarry Gwala ekubeni uGwala engeyena ngisho owakhona eSisonke engowaseMgungundlovu,” kusho uGwala.

Usihlalo we-ANC eHarry Gwala, uMnuz Mluleki Ndobe, ukubeke kwacaca ukuthi bafuna ukuthi uDkt Dlamini Zuma ahlonishwe ngalabo masipala uma sebehlanganiswe ngoba likhulu iqhaza alikhombisile nasekusebenzeleni abantu kanzima edela impilo yakhe ngomzabalazo.

UGwala uthe kufanele kuthintwe abantu bazisholo bona amagama okufanele kukhethwe kuwona okuzoqanjwa ngawo labo masipala.

Uthe kwakhona lokhu kungukuxhaphaza imali yomphakathi ngoba ukushintshwa kwegama kudla imali eshisiwe ngoba kuguqulwa nezinto eziningi.

Kubuyele esimweni esijwayelekile ukufunda nokufundisa ezikoleni ezimbili zaseNanda.

MCEBO MPUNGOSE

KUBUYELE esimweni esijwayelekile ukufunda nokufundisa ezikoleni ezimbili zaseNanda izolo kulandela ukuvalwa kwazo abesikhwama esiphethe umhlaba ezakhiwe kuwo.

Abafundi baseJG Zuma High naseKuthuleni Primary ngoMsombuluko baphoqeleke ukuthi babuyele emakhaya njengoba bekuvulelwa amaholidi ka-Okthoba kulandele ukufica amasango evaliwe ngoba kubangwa indaba yokukhokhelwa komhlaba.

Omunye uthisha ofundisa eKuthuleni, ocele ukungadalulwa ngoba engagunyaziwe ukukhuluma nabezindaba, uthe konke kubuyele esimweni izolo kodwa izingxoxo zisaqhubeka.

Nabafundi ngokunjalo bazwakalise ukukujabulela ukuvulwa kwesikole izolo njengoba sivalwe esontweni lokugcina ngaphambi kokuthi kuqale izivivinyo zokuphela konyaka. Njengoba zingakaphothulwa izingxoxo phakathi komnyango nebhodi lesikhwama esiphethe umhlaba wesikole, akukacaci noma sesikhona yini isixazululo esitholiwe ngodaba lokukhokhwa kwemali ukuze ziqhubeke nokusebenza lezi zikole. Esitatimendeni esikhishwe uMnyango wezeMfundo KwaZulu-Natal, uNgqongqoshe walo mnyango, uNkk Peggy Nkonyeni uthe abagculisekile ngendlela isikhwama, Inanda Community Development Trust, esiphethe ngayo imali.

“SiwuMnyango sinesivumelwano nebhodi lesikhwama esiphethe lo mhlaba okugunyazwe ngaphansi kwesigatshana uSection 14 okumthethosisekelo. Ngaphandle kwalokho sibe nokukhathazeka ngokusebenza kwabo okuhlanganisa ukuphatha imali ngendlela engahambisani nemigomo yomthetho olawula ukuphathwa kwemali yomphakathi ngoba sibona ukuthi kungagcina kuholele ekutheni kube nokungaboni ngaso linye phakathi koMnyango nalesi sikhwama. Kuze kube yimanje lesi sikhwama siyehluleka ukuhambisana nezigaba zomthetho olawula ukuphathwa kwemali yomphakathi,” kusho uNkk Nkonyeni. Uthe bathumele ithimba loMnyango ebelizohlangana namalungu ebhodi lesikhwama ukuze kutholakale isixazululo kuqhubeke ukufunda kulezi zikole. Umlando ngalezi zikole uveza ukuthi zakhiwa ngo-1997 kuseyisikole esisodwa iKuthuleni Combined ngaphambi kokuhlukana sekuvulwa esinye. Isikole samabanga aphansi saqhubeka negama elithi eKuthuleni, esamabanga aphezulu saqanjwa ngomengameli uMnuz Jacob Zuma.

IJG Zuma yaziwa ngamagalelo ayo kwezomculo nemiphumela emihle kwa-matric.

Imizamo yokuthola abebhodi elengamele umhlaba okwakhiwe kuwo lezi zikole ayiphumelelanga izolo.

UNkk Ellen Tshabalala wenqabile ukwesula engalwanga ePhalamande.

BABALO NDENZE

USIHLALO webhodi ye-SABC osamisiwe nobhekene nengcindezi ngesikhundla sakhe uNkk Ellen Tshabalala, wenqabile ukwesula engalwanga izolo ePhalamande njengoba ephinde waxabana nekomidi lezokuxhumana ngemuva kokuba ecele ukuthi kuphinde kuhlehliswe ukuphenywa kwakhe ngokuthi waqamba amanga ngeziqu zakhe zemfundo.

UTshabalala uphinde wehluleka ukuqinisekisa ukuthi unazo iziqu athi wazithola e-Unisa njengoba kubhalwe kwi-CV yakhe. Esikhundleni sokuveza ubufakazi usole amalungu ekomidi ngokumehlulela lingakaqulwa necala nokungamphathi ngendlela.

UTshabalala uvele kuleli komidi izolo ehamba nethimba lakhe labameli okungoMnuz Michael Tinley no-Advocate Norman Arendse SC.

Ekhulunyelwa ngu-Arendse, uTshabalala utshele leli komidi ukuthi akakakulungeli ukubhekana nalolu phenyo wathi usadinga amasonto amabili ukuthi aveze izimpendulo ngamacala amabili abhekene nawo.

Kodwa ngaphambi kokuba kuhlehliswe lolu daba, amalungu ePhalamende abedinwe eqhuma ahlasele uTshabalala no-Arendse, ebasola ngokubambezela lolu daba nokubathatha njengabantu abangakwazi abakwenzayo.

UTshabalala utshele abezindaba ukuthi akafuni ukuphawula ngalolu daba ngoba lusesezithebeni.

“Angifuni ukuphefumula okwamanje njengoba lungakaqedwa lolu daba,” kusho uTshabalala.

Uphinde waba nemibuzo ngesigcawu sasePhalamende abizelwe kuso ethi sibukeka njengaleso sokuqondiswa ubugwegwe kunokuthi kube ngesiphenyayo.

“Sebengehlulele, lokhu kubhalwe phansi emaphepheni (amacala abekwe wona). Ngabe yisigcawu sokuqondiswa ubugwegwe lesi noma ngesophenyo? Abakwazi namanje ukuthi bangitshele ukuthi ngesani. Kuyangikhathaza lokho. Angikwazi ukuzakhela (iziqu). Uma isikhungo singaxhumani nabameli bami kodwa iPhalamende linokuthile elikwaziyo, kuyakhathaza lokho,” kusho uTshabalala.

UTshabalala wehlulekile ukuthi aphendule ngokucacile ukuthi kukhona yini angakwenzanga kahle.

“Ngisebenza lolu daba nabameli bami. Ngike ngafaka imibuzo ezikhungweni mayelana neziqu zami. Angikayitholi impendulo. Ngingazikhandela kanjani iziqu? Angikwazi ukwenza lokho,” kusho uTshabalala.

U-Arendse uphinde wabuza ngelungu leDA uMnuz Gavin Davis ukuthi uyingxenye yalolu phenyo yize kunguye owafaka isikhalazo sokuqala.

Ilungu le-EFF ebelicikekile uMnuz Mbuyiseni Ndlozi utshele u-Arendse ukuthi “azehlise” kuleli komidi angazami ukulifundisa ngokumele likwenze ukubhekena nalolu daba.

Uthe uTshabalala ubaphendule opopayi wabuye waphendula iPhalamende indawo yokudlala.

Elinye ilungu lePhalamende uMnuz Maesela Kekana uthe akayithandi indlela u-Arendse akhulume ngayo nabo.

“Kumele atshelwe ukuthi asikho enkantolo lapha. Bengicabanga ukuthi into ayizele lapha ukuzositshela ukuthi zikhona iziqu. Uma zikhona lezi ziqu kungani bedinga ukuthi luhlehliswe lolu daba?” kubuza uKekana.

UKekana uthe uma uTshabalala iziqu zakhe zamlahlekela ngo 2001 esethole iminyaka engu 13 ukulungisa lokho kungani engenabo ubufakazi bazo manje.

UDavis uthe iDA icikekile ukubambezela okwenziwa nguTshabalala nethimba lakhe labameli.

Usihlalo waleli komidi uNkk Joyce Moloi-Moropa, uthe ayibachazanga indaba yesinye isicelo sokuthi luhlehliswe lolu daba.

“Yize sinezinto eziningi okumele sizenze siluhlehlisile kanti usuku okuzoqhubeka ngalo lusazonqunywa yikomidi,” kusho uMoloi-Moropa.

Yize uhulumeni eyifaka imali yokuxhasa abafundi emanyuvesi kodwa cishe uhhafu wabasuke benza unyaka wokuqala bayawufeyila.

MHLENGI SHANGASE

YIZE uhulumeni eyifaka imali yokuxhasa abafundi emanyuvesi kodwa cishe uhhafu wabasuke benza unyaka wokuqala bayawufeyila.

Ikota yabafundi ayiziqedi iziqu zayo ngesikhathi esibekiwe kanti abanye bathatha iminyaka eminingi ukuphothula iziqu.

Lezi zibalo zivezwe nguNgqongqoshe weMfundo ePhakeme, uDkt Blade Nzimande izolo engqungqutheleni yesikhombisa i-Annual International South African Technology Network (SATN) ebiseZimbali.

UNzimande uthe ziyabakhathaza lezi zibalo wathi abasongile izandla benza okuthile.

“Ngokwezibalo zesikhwama esixhasa abafundi ngemali iNational Students’ Financial Aid Scheme (NSFAS) u-40% wabafundi abenza unyaka wokuqala uyafeyila. Abanye kubathatha iminyaka emihlanu kuya phezulu ukuphothula iziqu zeminyaka emithathu. Indaba yendawo yokuhlala ngenye yezinto ezinomthelela noma kungeyona kuphela eyenza abafundi bafeyile. Sesiyalele amanyuvesi ukuthi abafundi abenza unyaka wokuqala akube yibona abaseqhulwini lokuthola izindawo zokuhlala,” kusho uNzimande.

Uthe abanye abafundi basuke bephuma emakhaya lapho benakekelwa abazali bafike emanyuvesi abanye bahlale emjondolo bese beyahluleka ukufunda.

“Uma bengasakwazi ukufunda ngenxa yezimo abasuke bebhekene nazo kuba yinkinga ngoba kubaphazamisa ezifundweni zabo bese beshiya phakathi bengasaqedanga noma bafeyile ngoba bengajwayele,” usho kanje.

Uthe okunye umnyango wakhe okwenzayo wukuthi abafundi abasuke benza unyaka wokugcina bafundisa abasuke bezokwenza unyaka wokuqala.

“Kunemali esiyibeke eceleni esiyinika abasuke befundisa abanye ozakwabo. Amanye amanyuvesi ayakwenza amanye awayenzi indaba yokuthi labo bafundi bafundise ozakwabo ukuze kuphuculwe izinga lokuphasa kwabenza unyaka wokuqala,” usho kanje.

Umphathi waseMangosuthu University of Technology (MUT), uSolwazi Mashupye Kgaphola onguSihlalo we-SATN okuyinhlanganisela yamanyuvesi ezobuchwepheshe, uthe banalo lolu hlelo lokufundisa abafundi abenza unyaka wokuqala.

“Lolu hlelo lusiza kakhulu ngoba abafundi abasha bayakwazi ukuthola ulwazi kozakwabo abadala. Siyabakhokhela kanti lolu hlelo lunomthelela omuhle ngoba siyabona imiphumela iyathuthuka,” usho kanje.

UNzimande unxuse amanyuvesi ezobuchwepheshe ukuthi angashintshi azame ukuzenza amanyuvesi ngoba bayadingeka ochwepheshe.

Uthe lezi zikhungo kumele ziqhubeke nalezi ziqu zingajahi ukwenzisa iziqu zobudokotela nezoSolwazi.

“Ningajahi, yimani ngoba siyawadinga amakhono akhiqizwa amanyuvesi ezobuchwepheshe. Angisho ukuthi ningazikhiqizi iziqu zodokotela, ezama-masters nezosolwazi kodwa ngithi ningajahi ngoba siyawadinga amakhono,” kusho uNzimande.

Uthe kubalulekile ukuthi kube nokusebenzisana phakathi kwalezi zikhungo namakolishi ama-Technical and Vocational Education and Training (TVET) abaziwa ngama-Further Education and Training.

“Umfundi uthola ukuthi wenze ezobunjiniyela kuma-TVET Colleges abe no-N6 kuthi uma sekumele aye emanyuvesi ezobuchwepheshe kuthiwe akaqale phansi. Lo mfundi usuke efundile yingakho sithi akube nokusebenzisana kulezi zikhungo zikahulumeni,” usho kanje.

Babanjwe oqotsheni abesifazane abane abebezenza abakhubazekile bebhalisa imali yesibonelelo sikahulumeni kwaSassa.

NONTUTHUKO NGUBANE

BABANJWE oqotsheni abesifazane abane abebezenza abakhubazekile bebhalisa imali yesibonelelo sikahulumeni kwaSouth African Social Security Agency (Sassa) eMgungundlovu.

Omunye wababoshiwe ubefake isicathulo sabantu abakhubazeke onyaweni edondolozela nangenduku yabakhubazekile.

Isicathulo sabakhubazekile nenduku yokudondolozela kukhishwa ngudokotela emuva kokuba ehlole umuntu wabona isimo sokukhubazeka kwakhe.

Laba besifazane bebephethe nezincwadi zodokotela okuthiwa zenziwe esibhedlela iKing Edward, eThekwini kodwa kamuva okuvele ukuthi ziwumkokotelo.

Okhulumela iSassa KwaZulu-Natal, uMnuz Mbizeni Mdlalose uthe emuva kokuhlolwa kwesimo sabo kube khona okusolisayo ngezicelo zabo bagcina bebanjiwe ukuthi bayazenzisa base bevulelwa amacala baboshwa.

“Abasolwa bafike nezincwadi zikadokotela okuvela ukuthi zenziwe eKing Edward Hospital. Kube sekuba nezinsolo ngazo nokwenze abasebenzi baqala uphenyo. Kuvele ukuthi ziningi kakhulu izincwadi zodokotela ezenziwa eKing Edward eziqinisekisa ukukhubazeka kwabasuke befuna isibonelelo kuhulumeni. Ekuhambeni kwesikhathi kuvele ukuthi lezi zincwadi zenziwa ngodokotela mbumbulu abangaqashiwe nhlobo esibhedlela,” kusho uMdlalose.

Abasolwa kuvele ukuthi bakhokhela abasuke bebasiza emahhovisi akwaSassa imali engu-R500 ukuze kusheshiswe izicelo zabo.

“Omunye oboshiwe ubefake isicathulo sabantu abakhubazekile ehamba nangezinduku. Uma esephonswa imibuzo uvumile ukuthi lezi zinto uyaziqasha kowenza lo msebenzi, aphinde abanikeze namaphilisi ezifo ezihlukene. Baveze ukuthi bakhokha u-R500 ukuze bathole usizo lokufaka isicelo esikokotelwe bezenza abantu abakhubazekile,” kucacisa uMdlalose.

Okhulumela amaphoyisa KwaZulu-Natal uCaptain Thulani Zwane uthe laba besifazane bavulelwe icala lenkohlakalo kulandela ukusebenzisa izincwadi ezingafanele kwaSassa.

Isikhulu esiphezulu kwaSassa eKZN, uNkk Pearl Bengu, sithe bayakwamukela ukuboshwa kwalaba besifazane bafisa umphakathi ufunde ngalesi sigameko.

“Kubalulekile ukuba abantu bazi ukuthi iSassa isiza abantu mahhala ayikho imali ekhishwayo ukuze abantu bathole usizo. Ngeke simelane nhlobo nokukhwabanisa nokukokotela, abenza lokhu bazojeza,” kuxwayisa uNkk Bengu.

Abameli baNkk Winnie Madikizela-Mandela sebekuqinisekisile ukuthi sebefake izincwadi enkantolo ukuphikisa ifa likaMnuz Nelson Mandela.

INTATHELI YESOLEZWE

ABAMELI baNkk Winnie Madikizela-Mandela sebekuqinisekisile ukuthi sebefake izincwadi enkantolo ukuphikisa ifa lowayengu-mengameli uMnuz Nelson Mandela.

Ummeli kaNkk Madikizela-Mandela uMnuz Mvuzo Notyesi uthe bazofuna amagunya omuzi kaMadiba oseQunu, e-Eastern Cape.

“Amaphepha asefakiwe eNkantolo eNkulu eMthatha,” kusho uNotyesi.

Uthe asethunyelwe kummangalelwa kodwa wathi ngeke akhipha eminye imininingwane.

Kuthiwa ngo-Agasti uNotyesi ubhalele iphini likamengameli wamajaji iJaji uDikgang Moseneke ongomunye wabameli ababhekene nokwabiwa kwefa likaMadiba.

Encwadini uNotyesi wakhala ngokuthi umthetho wabaThembu uthi uNkk Madikizela-Mandela nesizukulwane sakhe yibo abanamagunya ezindlini zikaMadiba.

“Lokhu kulandelwa unkosikazi esashadile noma esehlukanisile,” kuloba uNotyesi encwadini.

Uthe kukulo muzi kuphela lapho izingane nabazukulu bakaNkk Madikizela Mandela bengenza khona amasiko abo.

UNkk Madikizela-Mandela owayeshade iminyaka engu-38 noMadiba engunkosikazi wakhe wesibili washiywa ngaphandle kwefa lakhe ngesikhathi lethulwa ngoFebhuwari kulo nyaka. UMadiba washona ngoDisemba 5 ngonyaka odlule eshade noNkk Graca Machel angenazo izingane naye.

Ngesikhathi kwabiwa amafa kaMandela emuva kokushona kwakhe umuzi wakhe ashone esehlala kuwo eHoughton wanikwa uNkk Machel owaba nelungelo lokuthi angathatha noma yini kuwo kodwa ezinye izinto kuwona zadluliselwa esikhwameni iNelsona Mandela Childrens Fund, ezinye zabelwa izingane zakhe.

Ifa likaMandela labelwa ngisho nowayesesebenza endlini kwakhe iminyaka eminingi. Emuva komngcwabo uMadikizela Mandela wakubeka kwacaca ukuthi unalo ilungelo lomuzi waseQunu ngoba wakhiwa bengakahlukanisi.

UDkt Blade Nzimande usenxuse izikhungo zemfundo ephakeme ukuthi zibe nozwelo uma kukhona umfundi ozobika noma yini engamphathanga kahle.

MHLENGI SHANGASE

UNGQONGQOSHE weMfundo ePhakeme, uDkt Blade Nzimande (osesithombeni), usenxuse izikhungo zemfundo ephakeme ukuthi zibe nozwelo uma kukhona umfundi ozobika noma yini engamphathanga kahle.

UNzimande uthe kusekhona izikhawu lapho uma umuntu ezobika ukuthi uhlukumezekile bese abanye bayithathe njengehlaya abanye baze bambuze ukuthi yena ubeyigqokelani into emfishane.

“Abanye baze bamhleke bambuze ukuthi yena kungani ebegqoke isiketi esifishane? Bathi nguyena obezibizela ukuthi ahlukunyezwe,” usho kanje.

Ukusho lokhu nje lo mnyango usanda kuphendula umbuzo we-DA ePhalemende ngamacala angu-247 abikiwe okuhlukunyezwa ngokocansi, ukuhlukumezeka kwasekhaya namanye.

Impendulo yombuzo kaSolwazi Belinda Bozzoli we-DA, uveze ukuthi emacaleni angu-247 okuhlukumezeka kwabafundi abikiwe emanyuvesi angu-15 angu-60 kuphela okwagcina kuthathwe izinyathelo zangaphakathi.

USolwazi Bozzoli uthe mabili kuphela amacala abikiwe emaphoyiseni wathi uzofuna umhlangano nabaphathi bamanyuvesi ukuze abhunge nabo mayelana nohlelo lokuqinisekisa ukuthi la macala ayabikwa futhi axazululwe ngokushesha.

“Sizosebenzisana nozakwethu wekomiti lezamaphoyisa ukuze la macala asheshiswe namanyuvesi aphephe ngoba emacaleni angu-30 abikwa ayisishiyagalombili kuphela okwafinyelelwa esiphethweni. Yize kwamanye amanyuvesi ebikwa amacala kodwa iningi lawo liphelela ezeni nje,” usho kanje.

Uthe kumele kube nezinkundla lapho abafundi bengabika khona bangadalulwa, namanyuvesi athathe izinyathelo ezinqala kulabo abenza la macala.

UNzimande uthe kunomqulu abawukhiphele umphakathi ukuze uphawule ngawo othinta izinto eziningi emanyuvesi.

“Lo mqulu ubheka indaba yamacala okuhlukumeza, abaphila negciwane lengculazi, abakhubazekile nokunye. Lo somqulu ubalula izinto okumele zenziwe emanyuvesi.”

Ubuye waphawula ngobandlululo olusadla lubi emanyuvesi wathi abanye babafundisi bakhuluma kahle ngoMandela bese bebhebhezela ukucwasa.

“Ubandlululo lusadla lubi kunabantu abasasibiza ngamaKhafula esikhathini samanje. Abanye bafundisa ngabaholi bethu kodwa emakhoneni bajike babhebhezele ukucwasana ngokwebala. Yinto ekhona le okudinga isuswe nezimpande zayo,” usho kanje.

Uthe amanye amanyuvesi aze athi afuna umnyango uhloniphe ukuzimela kwawo ngoba asuke azi ukuthi afihle okuthile.

“Ngize ngipendwe njengomuntu othanda ukuhlakaza imikhandlu yamanyuvesi bese yenganyelwa umuntu osuke ezolungisa isimo. Lokhu kusichithela isikhathi ukufaka inyuvesi ngaphansi komuntu ozoyilawula futhi akuyona into esiyithandayo kodwa siyenza ngoba sisuke sifuna ukuthi kube nozinzo.”