Obeyisikhulu sakwa-Sars uMnuz Oupa Magashula usecele uxolo.

OBEYISIKHULU sakwa-South African Revenue Services (Sars) uMnuz Oupa Magashula (osesithombeni) usecele uxolo ngemuva kophenyo lokungaziphathi kahle olwenze ukuthi asule emsebenzini.

Ngokombiko weSunday Times izolo, uthe: “Ngiyayihlonipha iSars, sengimbonile uNgqongqoshe, weziMali uMnuz Pravin Gordhan ngamcela ukuba angixolele.”

Uthe ukhethe ukusula emsebenzini ngoba eluthanda lolu phiko oluqoqa intela.

Ubekhuluma esesibhedlela ngempelasonto njengoba elashelwa ingcindezi.

NgoLwesihlanu uGordhan wamemezela ukusula kukaMagashula kulandela uphenyo mayelana nokuthi wayezoqasha omunye wabacwaningi bamabhuku kwaSars.

“Ngemuva kophenyo lokuthola ubuqiniso balezi zinsolo, uMagashula usulile kusuka ngoJulayi 12, 2013,” kusho uGordhan.

Usolwa ngokuthi wayezoqasha owesifazane owayengenawo amava omsebenzi futhi okwenzeka ngayo lokhu yayingahlelekile.

“Owesifazane wayengekho ezingeni elidingwa wuSars, ngalokho ngiyaxolisa. Ngibone ukuthi ngenze into enhle ngokushiya. Kubalulekile ukuthi kuvikelwe isithunzi seSars,” usho kanje. – Intatheli yeSolezwe

Iqembu eliphikisayo iDA, alicacisi ngokuphumela obala kwenkosi yabaThembu uBuyelekhaya Dalindyebo.

NTATHELI YESOLEZWE

IQEMBU eliphikisayo iDemocratic Alliance (DA), alicacisi ngokuphumela obala kwenkosi yabaThembu uBuyelekhaya Dalindyebo othe uzojoyina leli qembu.

Engxoxweni nelinye iphephandaba lesiNgisi eliphuma ngeSonto, uMnuz Athol Trollip ongumholi we-DA e-Eastern Cape, uthe uzohlangana nenkosi yabaThembu nomholi uNkk Helen Zille kodwa wangacacisa ukuthi bayakwamukela ukujoyina kwayo iqembu.

“Ngeke ngisayinise inkosi ukuthi imele i-DA emphakathini ngoba ngeke ilunge. Sizobonana nayo sixoxe ngokujoyina iqembu nokuba yilungu eliphelele,” kusho uTrollip.

Uthe uDalindyebo useke wamthinta, wabuye waxhumana nomholi weqembu uZille ezikhathini eziningi kusukela ngo-2010.

Uthe wayekhuluma nabo ebatshela ngezifiso zakhe zokujoyina iqembu kodwa akazange enabe ngalolu daba.

“Kuthe uma enza isitatimende emphakathini sokuthi usezojoyina i-DA futhi uzimisele nangokusiza ukuthi kuphenjwe amanye amalungu endaweni yakhe, sabona kukuhle ukuthi simbone,” kugcizelela uTrollip.

UTrollip ebuzwa ukuthi iqembu alikhathazekile yini ngesithunzi salo ngokujoyinisa le nkosi, uthe sekube nokudideka okuningi ngokusayinisa kwakhe uDalidyebo eqenjini.

Uveze nokuthi akakuqinisekisi ukuthi ukumsayinisa kuzokwenzeka yini ngoba kuningi okusamele kubhungwe.

Inkosi yabaThembu ibe sematheni kulezi zinsuku ixabana nomzukulu kaDkt Nelson Mandela, iNkosi uMandla Mandela.

UDalindyebo utshele izwe ukuthi uMandla uzosuswa esikhundleni ngoba akumele abe yinkosi yaseMvezo.

Uphinde wakhwela wadilika kuMengameli uMnuz Jacob Zuma emgxeka ngobuholi bakhe emsola nokuthi ufuna ukumketula ebukhosini bakhe.

Indlu yobukhosi babaThembu iziqhelelanisile nezinkulumo zikaDalindyebo yaxolisa nasekuhudulekeni kwegama likaMengameli. Umkhulumeli wayo inkosi uDaludumo Mtirara, ithe baphoxeke kakhulu ngokushiwo nguDalindyebo.

Iveze ukuthi selokhu eveze lezi zinkulumo umndeni uyaziqhelelanisa naye.

Utshele abezindaba ukuthi balinde uhulumeni ngodaba lokususwa kukaDalindyebo kwesobukhosi.

Kunosizi nomunyu emndenini wephoyisa elitholakale lidindilizile eceleni komgwaqo ngoMsombuluko odlule.

MNCEDISI GOGE

KUNOSIZI nomunyu emndenini wephoyisa elitholakale lidindilizile eceleni komgwaqo ngoMsombuluko odlule.

Umndeni uthe ufe olwembiza ngokudlula emhlabeni kukaConstable Xolani Cele (26), wakwaSanti obeyiphoyisa esiteshini sasePinetown notholakele enamanxeba okudutshulwa ngaseGreytown ngemuva kokuthi ethunjwe abantu abangaziwa ngeledlule.

Ngokusho kukaNksz Doris Cele, udadewabo kamufi, “uCurrent” obeteketiswa kanjalo, ubengumuntu ohloniphayo nodumile endaweni.

“Ubengumuntu odumile endaweni futhi ewusizo kakhulu emphakathini. Asazi nje ukuthi ubesengaze abulawe kabuhlungu kanje ngobani.

Ngokwazi kwethu ubengenazitha futhi wonke umuntu ubemthanda,” kusho uNksz Cele obehluleka nokuzibamba izinyembezi.

Uthe umufi ubengasebenzi ngelanga aduke ngalo yingakho athatha itekisi yakubo wazisebenzela ngayo.

“Wavuka ekuseni wathatha imoto wayongena emgwaqweni. Ngabona engabuyi ebusuku ngase ngizama ukumshayela ucingo ekuseni kodwa lwangangena. Ngibe sengiyombheka lapho esebenza khona ngathola ukuthi kabamazi ukuthi ulaphi.

Ngibe sengimbika emaphoyiseni njengomuntu olahlekile ngaya nasenkampanini elandela umkhondo wezimoto ezilahlekile. bangichazele yonke into mayelana nokuthi imoto abehamba ngayo ihambe kuphi nakuphi,” kulandisa uNksz Cele.

Uveze ukuthi imoto abehamba ngayo umufi ngelanga lesigameko ike yaya eGreytown lapho etholwe khona edindilizile ngoLwesithathu.

Uthe abazi ukuthi bazothathani bahlanganise nani ngoba umufi bekuwuyena owondlayo ekhaya.

Uqhube wathi umufi ushiye emhlabeni izingane ezimbili zamantombazane.

Umkhuzi wamaphoyisa KwaZulu-Natal, uLt General Mmamonnye Ngobeni, uthe yisenzo sobulwane ukubulawa kukaCele.

Uthe sekuboshwe abasolwa ababili okubalwa kubo iphoyisa abatholwe nezibhamu ezingekho emthethweni.

Uthe bonke abathintekayo bazobhekana nengalo yomthetho.

Ngesikhathi ithimba leSolezwe lihambele umndeni ngempelasonto, omakhelwane nezihlobo bekungena kudedelana ukuzokhalisa umndeni ngalesi sigameko.

Umqhino oyisitayela uqhathe umfundi wasoPhindo High, eNsingweni, eGingindlovu, nothisha.

MHLENGI SHANGASE

UMQHINO oyisitayela uqhathe umfundi wasoPhindo High, eNsingweni, eGingindlovu, nothisha abamxoshile bethi uhlose ukufensa othisha besilisa ngawo.

UNtombenhle Nzuza, owenza uGrade 10 kulesi sikole, uthe ubengazi ngesikhathi ezilukela ukuthi uzoziqhatha nothisha ababili besifazane athi bamhlambalaze phambi kwabanye othisha bathi akahambe ayogunda ngoba unezinhloso “zokuzifunela” ukunakwa ngothisha besilisa.

Lo mqhino wenze ukuthi angazibhali nezivivinyo zeMaths, iSiZulu, Agriculture ne-Computer ngoJuni.

Inkinga uthe yasuka ngoJuni 14 nonyaka ngemuva komthandazo wasekuseni lapho abizwa khona othisha bambuza ukuthi uyiqhineleni i-dread.

“Bangibuza ukuthi kungani ngiluke ngale ndlela ngabatshela ukuthi yizinwele zami angifakile ngisho i-wool bathi angiqaqe, ngigunde. Bangixosha bathi angingabhali kodwa nganyenya ngabhala izivivinyo,” kusho lo mfundi.

Uthe ngemuva kwalokho akaphindanga walubhada esikoleni ngoba ethi bamtshela kwezikabhoqo ukuthi uzenza ngcono kunezinye izingane.

“Yizinwele zami lezi akusona nesitayela ngoba ngiyazi awukwazi ukwenza izitayela ekhanda usengumfundi nokuzidedela izinwele okunalokho uyaqhina. Akukho nemithetho ebekiwe esikoleni eshoyo ukuthi yikuphi okulukwayo nokungalukwa. Ngakhuluma nomengameli wabafundi owathi alikho icala engilenzile ngokuluka ngale ndlela ngoba nabanye abafundi bayakwenza,” kuqhuba lo mfundi ohlala nezihlobo.

Uthe uqale ukuba nyamanambana koyedwa wothisha abamxosha kuqala unyaka owathi akamfuni ekilasini leMaths alifundisayo.

“Uthisha owathi ngifensa othisha, ngoJanuwari wayengafuni ngingene ekilasini lakhe ngenze iMaths kodwa ngaqinisela ngoba ngiyasithanda lesi sifundo. Ngiyabona ukuthi vele akangiphiwe yingakho nje esengixoshe nasesikoleni,” kusho uNtombenhle.

Uthe uyafisa ukuqhubeka afunde kodwa akazi ukuthi uzokwenzenjani ngoba ngokwakhe awukho umthetho wesikole awuphulile.

“Ngagcina ukubhala izifundo ezine, okuyisiNgisi, Life Sciences, Life Orientation neSayensi. Kuyacaca ukuthi ngifeyilile ngoJuni ngoba uma ufeyile iSiZulu usuke usukhale ngaphansi.”

Njengoba kuvulwa izikole namhlanje uthe ngeke alubhade esikoleni ngoba othisha bazomxosha.

UDkt Nkosinathi Sishi, oyiNhloko yoMnyango wezeMfundo, uthe indaba yomeluko ezikoleni yinto eyingxenye yenyufomu yesikole wathi ngabazali okumele banqume ukuthi izinwele kumele zime kanjani ngoba umnyango awunayo imithetho oyibekile.

“Asivumi ukuthi kuxoshwe umfundi esikoleni uma kukhona into ayenzile ngoba izivivinyo akuzona ezesikole kodwa ezomnyango. Akumele umfundi angabhali aphucwe nelungelo lakhe lokufunda,” kusho uSishi.

Uthe abaxosha umfundi baxhaphaza uhlelo lwezivivinyo bethi basebenzisa imigomo yesikole.

Usenkingeni ugogo wengane enesifo se-Autism, athi inqatshwe esikoleni sabakhubazekile ngoba igqoka inabukeni.

ZANELE MSOMI

USENKINGENI ugogo wengane yaseNewlands East enesifo se-Autism, athi inqatshwe esikoleni sabakhubazekile ngoba igqoka inabukeni.

UNksz Sibongile Ndlovu (43) uqale ukuhlala nomzukulu uLindokuhle (7) eshonelwe unina eminyakeni emibili edlule.

Bekucaca ukuthi umzukulu unenkinga ngoba ubenza okwehlukile kunontanga.

“Sekushone unina ngithe angimsukumele ngamyisa emtholampilo ngonyaka odlule. Bathole ukuthi une-Autism bathi ayilapheki kodwa kumele sihambe ikilasi ukuze sifundiswe ngayo,” kusho yena.

I-Autism yisifo esiphatha izingane esimataniswa nokukhubazeka kodwa okungekho emzimbeni.

Sibonakala ngezenzo ezingajwayelekile enganeni njengokuba nomdlandla ngokweqile, ukucasuka nokuba nodlame.

UNksz Ndlovu uthe inkinga kaLindokuhle ngukusheshe acasuke futhi ubejwayele nokudlala ngezinto eziyingozi.

Okwenze amfunele isikole wukuthi ngokweminyaka sekufanele afunde.

Yize enale nkinga kodwa uthe utsheliwe ukuthi ingane kumele iye esikoleni ngoba nabakhubazekile bayafundiswa.

Useze waqasha umuntu ozomnakekela ekhaya ngoba yena uyasebenza.

“Ngiye eNanda Special School ekuqaleni konyaka ngabuzwa ukuthi ingane iyakwazi yini ukusebenzisa ithoyilethi. Ngithe ifaka inabukeni bathi angiphindele nayo emuva ibuye isikwazi ukuzisebenzisela ithoyilethi,” kuchaza uNksz Ndlovu.

Udlulele kwesinye isikole sabakhubazekile eDurban North bangaba nankinga kodwa kwaba nguye onenkinga yemoto ezohambisa ingane ngoba kukude.

Bameluleke ngokuthi abuyele eNanda ngoba isikole siseduze nasekhaya futhi ikhona nebhasi ethutha izingane.

Uthe uphindele eNanda Special School baphinda banqaba ukwamukela ingane bambhalela incwadi ethi uzofakwa ohlwini lwabalindile.

Uthishanhloko uMnuz Sipho Nkosi unqabile ukuphawula wacela kuthintwe uMnyango wezeMfundo.

UMnuz Sihle Mlotshwa okhulumela umnyango uthe ayikho ingane okumele incishwe ilungelo lokufunda ngenxa yesimo sayo.

Uthe nyakenye bebenengqu-ngquthela ye-Autism bathola ukuthi izingane ezinalesi sifo zisacwaswa. Uthembise ukuthi bazoxhumana nesikole baqinisekise ukuthi ingane iyasizakala.

INkosi yabaThembu yamukelwe ngokusemthethweni njengelungu eliphelele leDA.

INTATHELI YESOLEZWE

INKOSI yabaThembu yamukelwe ngokusemthethweni izolo njengelungu eliphelele leDA emuva kokuphumela obala kwabezindaba ukuthi izojoyina leli qembu.

Umholi weDA e-Eastern Cape, uMnuz Athol Trollip, ukuqinisekisile ukuthi inkosi Buyelekhaya Dalindyebo ijoyine iDA emuva komhlangano odonse cishe usuku lonke izolo.

Uthe emhlanganweni bebedingida imigomo nomthethosisekelo weDA.

Phakathi kwabakhulume ngakho kubalwa umthetho ohlongozwayo wezendabuko iDA ethi ezinye iziphakamiso zawo kayihambisani nazo.

“Inkosi uDalindyebo ikucacisile ukuthi njengoba umthethosisekelo ugqamisa ubuholi bendabuko, namakhosi kumele awuhloniphe. Iveze nokuthi kudingeka ukuthi kubhekisiswe nezobulili kulo mthetho ohlongozwayo,” kusho yena.

UTrollip uthe inkosi iyakholelwa emigomeni yeDA egqugquzela uhulumeni oletha izidingo kubantu. Uveze nokuthi bakhulumile nangokuba sezindabeni ngezitatimende ezilumelayo zikaDalindyebo.

“Ngikucacisile ukuthi iDA ifuna amalungu ayo aziphathe kahle futhi ahambisane nemigomo yeqembu. Emuva kwakho konke lokhu inkosi ijoyine ngokusemthethweni.”

UDalindyebo usafake isicelo sokudlulisa amacala abhekene nawo angamenza adonse iminyaka ewu-15 ejele, kuwo kukhona nelokuzama ukubulala.

Ngenyanga edlule ube sematheni egxeka uhulumeni noMengameli Jacob Zuma ambize ngesikhohlakali, wathi uyoyeka ukubhema insangu mhla uZuma wayeka ukukhohlakala.

UDalindyebo ukusho lokhu emthandazweni obuseQunu, wokufisela uDkt Nelson Mandela ukululama.

Utshele abezindaba ukuthi ukujoyina kwakhe iDA ukuthatha njengesipho sikaMandela ozohlanganisa iminyaka engu-95 ngoLwesine, osekuyisonto lesihlanu esesibhedlela ePitoli.

Abendlu yobukhosi bamaThembu ngoMgqibelo baziqhelelanisile nezitatimende zenkosi baveza nokuthi abakasiphothuli isinqumo sokuyisusa esikhundleni.

NgoSepthemba nyakenye kwaba nesiphakamiso sokuthi inkosi uDalindyebo isuswe esikhundleni.

Ukukhiywa kwamasango kugcine kuholele ekutheni kuphazamiseke ukufunda izolo.

MLUNGISI GUMEDE

SIPHUME sesigadwe ngamaphoyisa isithunywa ebesijutshwe ngumnikazi wendawo okwakhiwe kuso isikole, i-Oakford Primary, eVerulam, sisaba ulaka lwabazali abavuke umbhejazae bagqekeza amasango esikole ngemuva kokukhiyelwa kwezingane zabo ngaphandle izolo.

Ukukhiywa kwamasango kugcine kuholele ekutheni kuphazamiseke ukufunda izolo.

Ngesikhathi ithimba leSolezwe lifika kulesi sikole, izingane bezigcwele ngaphandle kwesikole zihleli nabazali abebehlome ngezimvubu, izagila nocelemba, bala ukhasha bengafuni lutho okungena ngaphakathi esikoleni.

Ngaleso sikhathi bekuqhubeka umhlangano phakathi kothisha, amalungu esigungu esilawula isikole nezikhulu zoMnyango.

Abazali bagcine sebecikeka wukulinda ngaphandle bekhala ngokuthi umhlangano wezikhulu awusapheli, bafuna ukwazi ukuthi kuqhubekani, baqala bagqekeza amasango bafaka izingane ngaphakathi esikoleni, bona bahamba bayoshaya itoyitoyi ngaphandle kwalapho bekuqhubeka khona umhlangano.

Lesi sikole esisembangweni kuthiwa sakhiwa ngamaNtaliyane ngeminyaka yama-40’s, kwathi esehamba asinika amasistela wona asidayisela umnikazi wale ndawo, uSolwazi Marias Mariz.

UMariz kuthiwa akafuni ukuthi le ndawo ibe yisikole, uhlela ukuyiphendula isakhiwo samagugu.

Leli phephandaba lithole ukuthi uMariz noMnyango sebenze isivumelwano sokudayiselana le ndawo.

UMariz kuthiwa yena uthi udayise izikole kuphela njengoba kule ndawo kukhona ne-Oakford High, akazange awudayise umgwaqo, ufuna izingane zihambe ehlathini okutshalwe kulo umoba zingahambi emgwaqweni wakhe.

Ilungu lomphakathi eliphinde libe ngumzali, uMnuz Sanele Ngcobo, lithe isithanda ukubama emphinjeni indaba kaMariz yokuhlale evala isikole.

“Sekuphele iminyaka emine kuhlale kwenzeka into efanayo njalo uma kuvulwa izikole, manje siyabona ukuthi sekufanele simxoshe kwaphela endaweni yethu,” kusho uNgcobo.

IPhini likaSihlalo wesigungu sesikole, uMnuz Zethembe Mngadi, lithe lolu hlelo lokudayiselana kwale ndawo lonakala ekuqaleni, yingakho kunezinkinga manje.

“Le ndawo ayizange ikhangiswe ukuthi iyadayisa kunikezwe bonke abantu ithuba abayifunayo, sezwa sekuthiwa isidayiselwe uMariz. Nathi singamalungu omphakathi sasizimisele ngokuyithenga,” kusho uMngadi.

UNobhala we-ANCYL kuwadi-59, uMnuz Simamisa Mkhize, ugxeke uMnyango wathi usuthathe isikhathi eside ukuxazulula le nkinga.

Ikhansela le-ANC kule wadi, uNksz Nondumiso Ndlovu, lithe benza konke okusemandleni abo ukuxazulula isimo ukuze izingane zibuyele esikoleni.

“Sizoqhubeka nokuba nezingxoxo yize ezanamuhla (izolo) zifinyelele kwangqingetshe. UMariz uthe liyana, alini, ngeke aze azivumela izingane ukuba zingene esikoleni,” kusho uNksz Ndlovu.

Okhulumela uMnyango wezeMfundo KwaZulu-Natal, uMnuz Sihle Mlotshwa, uthe kuyabaphazamisa ukuzwa ukuthi uMariz uphinde wavala amasango kube sekuhanjwe ibanga elide mayelana nezingxoxo zokulungisa isimo.

“Sizothumela abahloli besiyingi bayohlola isimo baphinde benze isiqiniseko sokuthi ngesikhathi kuqhubeka izingxoxo ukufunda kuyaqhubeka,” usho kanje.

Imizamo yokuthola uMariz izolo ayiphumelelanga, ucingo lwakhe belukhala lungabanjwa.

Kwesinye isigameko esehlukene, kuphazamisekile ukufunda eSiphosabadletshe High, KwaNompondo, eHluhluwe, ngemuva kokuthi abafundi bevale imigwaqo ngamathayi avuthayo bekhala ngokuxoshwa kothisha ababili abaxabana esikoleni.

Abafundi bakhala ngokuthi labo thisha abaxoshwayo bebekhuthele emsebenzini wabo.

Omunye walabo thisha kuthiwa uyiphini likathishanhloko futhi ufundisa isifundo esibalulekile iSayensi.

Isizathu sokuxabana kwabo kasicacanga.

Banengekile omakhelwane bowesifazane okuthiwa ukhiyela endlini ingane yakhe enezinyanga ezingu-18 ngoba eya esokeni.

LUNGI LANGA

BANENGEKILE omakhelwane bowesifazane waseMlazi okuthiwa ukhiyela endlini ingane yakhe enezinyanga ezingu-18 ngoba eya esokeni.

Omakhelwane bakaNksz Thembekile ‘Nunu’ Mphefu olinganiselwa eminyakeni engu-25 bathi sebekhathele yisenzo sakhe sokushiya indodana yakhe ayivalele endlini kungekho muntu.

Isolezwe lifice le ngane ihleli kumakhelwane othe ikhishwe endlini yakubo ebivalelwe kuyo kusukela ngoMgqibelo.

UNksz Nonhlanhla Makhathini (40), omunye womakhelwane, uthe bayikhiphile ingane ngeSonto emuva kokuyizwa ikhala.

“Unina wengane ulokhu ehambe ngoMgqibelo kuze kube manje akabuyile. Ingane beyisele yodwa endlini, size saya komunye umngani wakhe onokhiye bendlu sacela ukuthi asiboleke ukhiye ukuze sivulele ingane,” kusho uNksz Makhathini.

Kuthiwa akaqali ukuyishiya ingane yakhe yodwa eyikhiyele.

Omakhelwane bathe ngelinye ilanga wayivalela baze bathinta abafowabo bayithatha ingane bayiyisa kunina ePort Shepstone.

Bathi batshelwe ukuthi wahamba wayolanda ingane waze wathuka nonina.

Kumanje ingane ihleli emzini kaNkk Lungani Khwela (71) ocelwe ngamalungu omphakathi ngeSonto ukuthi ahlale nengane ngesikhathi besalungisa udaba lokuyiyisa kosonhlalakahle.

“Sengididekile ngokuthi ngizohlala isikhathi esingakanani nengane ngoba sithinte amaphoyisa ngeSonto athi asibuye ngoMsombuluko. Uma sibuyela kuwo athe asiye kosonhlalakahle. Sekufanele siye kubo manje,” kusho uNkk Khwela.

Yize ethi ngeke akwazi ukuhlala nale ngane njengoba ehlala nabazukulu bakhe abondla ngempesheni kodwa uthe akaboni ukuthi kufanele ibuyiselwe kunina wayo.

UNksz Mphefu kuthiwa unazo ezinye izingane ezimbili ezihlala kubo kwazo. Omakhelwane bathe abazi ukuthi kwenziwa yini aphathe lena ngalendlela.

Bathe bake bezwe kuthiwa uma ehambile usuke evakashele isoka lakhe eMzinto.

UNksz Dumisile Nala weChildline kuzwelonke uthe impela kuwukuhlukumeza ingane lokhu okwenziwe.

“Kufanele lolu daba lubikwe kosonhlalakahle nasemaphoyiseni ukuze ingane ithole usizo. Izingane eziningi zivame ukulimala ngenxa yakho ukushiywa zodwa kungekho umuntu ozigadile,” kusho uNksz Nala.

Uthe ziyabikwa izigameko zokushiwa kwezingane zivalelwe ezindlini, isikhathi esiningi kwenzeka ezinganeni ezikhubazekile.

Kokunye kuba ngomama abasebancane abacwila ezinkambeni nalabo abanezinkinga abavame ukwenza lokhu.

Uthembise ukuthi nabo bazozama ukulandela lolu daba.

Okhulumela amaphoyisa KwaZulu-Natal, uCol Jay Naicker, uthe amaphoyisa kufanele asize ukuze ingane ihlolwe bese ibekwa ekhaya eligcina abantwana ngesikhathi kusaphenywa.

Imizamo yokuthola uNksz Mphefu ayiphumelelanga ngoba inombolo yocingo okuthiwe ngeyakhe beyivaliwe.

Obekuzwakala nje umyalezo othi “Hello, hello angikuzwa yazi. Ngiyadlala yi-voicemail. Uphinde ungifonele uyezwa.”

Basenga ezimithiyo osomabhizinisi abathi bazophelelwa ngumsebenzi uma kuqiniswa imithetho yokubhema kuleli.

LUNGI LANGA

BASENGA ezimithiyo osomabhizinisi abathi bazophelelwa ngumsebenzi uma kuqiniswa imithetho yokubhema kuleli.

Lokhu kuvezwe nguDkt Yussuf Saloojee wenhlangano elwa nokusetshenziswa kukagwayi iNational Council Against Smoking kulandela izikhalo zezinhlangano zabadayisa utshwala ezithi azolimala amabhizinisi azo uma ziphoqeleka ukuthi zivimbele amakhasimende azo ukuthi angabhemi kulezi zindawo.

“Ngesikhathi kufika umthetho owaphoqa abadayisi bokudla notshwala ukuthi babe nezindawo zokubhema ezihlelelwe ababhemayo, baningi abakhala. Babesho into efanayo bethi abantu ngeke beze ezindaweni zabo zokudla kodwa lokhu akuzange kwenzeke,” kusho uDkt Saloojee.

Ukhuluma kanjena nje izinhlangano okubalwa kuzo iTownship Liquor Industry Association (Tolia) zithi ukuqiniswa komthetho kuzoxabanisa uhulumeni namalungu omphakathi.

UMnuz Gus Ntlokwana wophiko lwale nhlangano eWestern Cape uthe lokhu kuzoqeda amathuba omsebenzi.

“Besilindele ukubona uhulumeni eseka amabhizinisi nemizamo esiyenzayo yokwakha amathuba omsebenzi,” kusho uNtlokwana.

Uhulumeni usemizameni yokuqinisa imithetho evimbela abantu ukuthi bangabhemi emphakathini.

USaloojee uthe lokhu kungenzeka kuholele ekutheni izindawo ezidayisa ukudla notshwala zingavumeleki ukuthi zibe nezindawo zokubhema. Kuzongabhenywa nje kwaphela.

“Kukhona ucwaningo oluveze ukuthi abantu besifazane abasebenza ezindaweni zokudla baba nomdlavuza. Kumele sibacabangele nabantu abasebenza lapho kubhenywa khona ngoba basengcupheni yokuguliswa yintuthu kagwayi abayihogela bethatha ama-oda noma beletha ukudla.”

UMnuz Joe Maila okhulumela uMnyango wezeMpilo kuzwelonke uthe kuwumsebenzi wabo ukuvikela abantu abangabhemi bangabulawa yizifo ezidalwa wukuhogela intuthu kagwayi.

“Ngeke siyeke ukuqinisa umthetho ukuze sivikele abantu abangabhemi. Kuyaxaka ukuthi abantu sebeqalile baphikisana nalo mthetho bengakazi ukuthi ushintshwe kangakanani,” kusho uMaila.

uNgqongqoshe weziMali eKZN uNkk Ina Cronje ukhwele wadilika emabhange ngokunika abafundi ama-credit card.

MHLENGI SHANGASE

IZITOLO zezingubo namabhange ezinika abafundi amakhadi ezikweletu yizona ezibalinga bagcine sebesebenzisa la makhadi bekhithiza izingubo ekubeni bengenayo imali yokukhokha.

Lokhu kushiwo nguNgqongqoshe weziMali kwaZulu-Natal, uNkk Ina Cronje. Izolo ukhwele wadilika emabhange ngokunika abafundi ama-credit cards ekubeni azi kahle ukuthi akukho mali engenayo ngoba abasebenzi. Ubekhuluma nabafundi base-Durban University of Technology (DUT) njengoba besemkhankasweni wokuhambela izikhungo zemfundo ephakeme befundisa ngokonga imali.

Usho lokhu nje ngeledlule umbiko wocwaningo lwe-Student Village, obelubheka ukusebenzisa imali kwabafundi luveze ukuthi abafundi bachitha enkulu imali bethenga izinto eziwubukhazikhazi.

Lolu cwaningo luveze ukuthi abafundi bonga imali ukuze bathenge izinto ezifana nomakhalekhukhwini.

Luveze nokuthi umfundi ngamunye ngonyaka uchitha u-R3 510 ngenyanga iningi layo eya ekudleni. Imali abasuke beyibekile bathenga ngayo amaselula aphambili njengoba iBlackberry kuthiwa yiyo esahamba phambili kubona.

UNkk Cronje uxwayise abafundi ukuthi bangenzi izikweletu ngoba basuke bengenayo imali yokukhokha.

“Ikota yabafundi kuleli ibhukuda ezikweletini. Yisimo esibi kabi lesi ngoba abafundi uthola ukuthi banezikweletu zezingubo zokugqoka ekubeni bengenayo imali yokuzikhokhela. Sengike ngalwa nezitolo zezingubo namabhange ngokunika abafundi izikweletu ekubeni bengasebenzi,” usho kanje.

Uthe ucwaningo luveza nokuthi umfundi ngayedwa usebenzisa u-R42 000 ngonyaka okuyimali enkulu kakhulu.

“Uma unegama elibi lezikweletu ulahlekelwa ngisho nayithuba lokuqashwa njengoba thina kuMgcinimafa singakuthinti uma unezikweletu. Ngeke siqashe umuntu ongakwazi ukuphatha imali yakhe bese silindela ukuthi uzophatha imali yabakhokhi bentela,” usho kanje.

UMnuz Mandla Cele, oyisikhulu esibhekele ukuxhasa abafundi ngemifundaze esikhwameni iNational Students’ Financial Aid Scheme, uthe bakhathazekile ngendlela abafundi abasebenzisa ngayo imali.

Unxuse abafundi ukuthi basebenzise ngendlela imali abasuke bexhaswe ngayo ngoba bayibuyisa isinenzalo.

“Uma uthole imali enkulu wangayisebenzisa yonke kuyasiza kakhulu lokho ngomuso ngoba awukweleti imali enkulu.

Yize sikuxhasa ngemali yokufunda kodwa usuke uyibolekile kuthina uyikhokha isinenzalo yingakho kungcono ungayisebenzisi yonke le ongayidingi ukuze ungakweleti kakhulu,” usho kanje.

UThandeka Xaba (20) waseNanda owenza iziqu ze-Retail Business Management e-DUT, uthe njengoba efunda ngomfundaze nje imali ayitholayo uthenga ngayo izincwadi nokudla.

Uthe akazithandi izinto eziwubukhazikhazi ngoba uyazi ufunani empilweni wathi kodwa kunengcindezi uma ufunda emanyuvesi.

USiphamandla Lushaba naye owenza lezi ziqu, uthe ingcindezi yabangani yamenza washiya phansi iziqu zePolitical Science e-UKZN.

“Kwakunzima kakhulu. Kuyadliswa laphaya. Kugqokwa enye into futhi kuphathwa nama-Ipad wena ube usabhala ngepeni. Ngashiya phansi ngenxa yengcindezi ngeza e-DUT,” usho kanje.

Ucwaningo lweStudent Village luveze nokuthi abafundi abamhlophe bachitha imali ekudleni, ukuvakasha notshwala kuthi abamnyama ezintweni zokuzicwala nezokugcoba, ukudla kwasezitolo, izinto ezibizayo nasemculweni. Amakhaladi wona ayichitha kugwayi, amabhuku, izingubo nezinto eziwubukhazikhazi.

Usehlala evale izicabha namawindi emzini wakhe uNksz Virginia Mathe onomuzi obhekene nesitamkoko esiqhumile.

BONISWA MOHALE

USEHLALA evale izicabha namawindi emzini wakhe uNksz Virginia Mathe (54) waseCato Manor ngaseMayville onomuzi obhekene nesitamkoko esiqhumile osekuphele izinyanga eziyisishiyagalolunye singalungiswa nguMasipala weTheku.

UNksz Mathe onesifo sofuba unovalo lokuthi isitamkoko singamgulisa kakhulu sibhebhethekise nezifo endaweni.

Isitamkoko, esisemzini, sihambisa inyubathi esuka kuyo yonke imizi esemgwaqeni ahlala kuwo uDweba Bar kanti siyaxhifika njengoba udoti uphuma unjengoba unjalo kuso kanti sesize savuleka kwenye ingxenye.

“Ngiqale ngoSepthemba ukubikela uMasipala ukuthi nginenkinga yesitamkoko esiqhumile esinukayo. Bafika bazohlola bangitshela ukuthi indle ayihambi ngoba amapayipi avimbekile. Bafaka olunye udonga ukuze basinyuse kodwa saphinde saqhuma. Ngiyafona ngibacele ukuthi bazomoma indle ngoba lesi sitamkoko sithatha inyubathi yayo yonke le mizi engiyakhele bese sinukela mina nezingane zami,” kusho uNksz Mathe.

Uthe isisebenzi sakwaMasipala esihlolayo safika ngoNovemba sizohlola kodwa akukho esakushintsha kanti kwathi efona ebuza ukuthi kwenzenjani watshelwa ukuthi akekho usaye phesheya.

“Angazi-ke noma kufanele ngilinde umhloli ongaziwa ukuthi uzobuya nini phesheya ukuze ngisizakale. Ngikhathele wukuhlala nokunuka, izingane zami zizogula kanti nami vele ngiziphathelwa yisifuba somoya (asthma),” kusho uNksz Mathe.

Akusiye yedwa okhala ngesitamkoko njengoba nomakhelwane wakhe ethe bayaphoqeleka ukuba bavale amawindi neminyango imini nobusuku ngenxa yokunuka kwesitamkoko.

Abantu balapha bathi bafisa sengathi uMasipala angasiqala kabusha lesiya sitamkoko afake namapayipi azokwazi ukuhambisa indle, ahambe ngaphansi komhlaba ukuze angangenwa kalula yinhlabathi.

Esitatimendeni esithunyelwe kwabezindaba, uMnuz Aaron Mfunda, oyiPhini leNhloko yakwa-Water & Sanitation kuMasipala weTheku, uthe zonke izikhalo ezabikwa nguNksz Mathe zaphenywa kodwa-ke bazophenya ukuthi ngabe kukhona yini ipayipi elivalekile ngoba kungenzeka ukuthi yilona elidala le nkinga.

Ukugcizelele ukuthi izigameko ezibikiwe zilungisiwe yize ithimba leSolezwe lifike labona ukuthi isitamkoko siyaxhifika, inyubathi ayihambi.

Usale ushaqekile umndeni wephoyisa lesifazane laseMlazi kwa-J lidutshulwa ngesihluku.

BAWINILE NGCOBO

USALE ushaqekile umndeni wephoyisa lesifazane laseMlazi kwa-J lidutshulwa ngesihluku ngesikhathi lingena esangweni lakubo liphuma emsebenzini ngoMsombuluko.

UConstable Gugulethu Ximba (33) obesebenza esiteshini samaphoyisa eReunion udutshulwe ngumuntu ongaziwa amahlandla amahlanu esemotweni yakhe elinde obezomvulela isango.

UConstable Ximba uphuthunyiswe esibhedlela ngemoto kodwa umndeni waziswa ukuthi ufike naye evele engasekho. Kulesi sigameko kuthathwe isibhamu sakhe somsebenzi.

Udadewabo uNksz Simphiwe Ximba uthe udadewabo ufike ngezithuba zokugamanxa kwehora lesithupha washaya ihuthi njengokujwayelekile uma efika ebazisa ukuthi ucela ukuvulelwa.

“Umzala wethu uphumile eyovula, kuthe engakafiki esangweni kwaqhuma isibhamu wabuya ngejubane ethi usisi uyadutshulwa,” kusho uNksz Ximba.

Uthe ngaleso sikhathi babe sebephuma bonke, imoto kadadewabo iKia Picanto, isizihambele yabhajwa ezihlahleni eziseduze.

Uthe umuntu omdubulile ubonakele ebaleka kanti omunye umakhelwane obezihambela ozwe kumenyezwa kuthiwa akavimbe uzamile ukumbamba kodwa lo muntu wakhipha izibhamu ezimbili wamsabisa.

Kuthiwa uyise kaNksz Ximba nomfowabo bajahe lo muntu ngezinyawo kwaqhamuka imoto iBMW ebomvu bacela ukuthi bagibele ukuze bajahe umuntu kodwa umnikazi wayo wacela ukuthi behle uma ezwa ukuthi banesibhamu ebebejahwa.

UConstable Ximba kuthiwa udubuleke emqaleni, engalweni, ezimbanjweni nasebeleni.

Okwamanje ayikacaci imbangela yokubulawa kukaNksz Ximba njengoba kuthathwe nesibhamu somsebenzi.

UConstable Ximba ushiye indodakazi eneminyaka eyisishiyagalombili.

Omunye udadewabo, uNksz Thobile Ximba, uthe bafisa ukuthi amaphoyisa athole lo owenze lokhu.

Omakhelwane bakwaXimba bathi yize le ndawo icashile kodwa akukaze kuhlaselwe muntu, bayakweshwama okwenzeke endodakazini yakwaXimba futhi kubathusile.

Ngokuthola kweSolezwe kukhona indoda ebilokhu izulazula emgwaqweni ongakwaXimba ngezikhathi zokubuya kukaConstable Ximba.

Okhulumela amaphoyisa KwaZulu-Natal, uColonel Jay Naicker, uthe icala lokubulawa kukaConstable Ximba liphenywa ngamaphoyisa ophiko lwamaHawks.

Uthe uKhomishana wamaPhoyisa KwaZulu-Natal, uLt General Mmamonnye Ngobeni, udlulise amazwi enduduzo emndenini wethembisa ukuthi bazokwenza okusemandleni ukubamba ababulali.

UNgqongqoshe wezekuPhepha KwaZulu-Natal, uMnuz Willies Mchunu, uthe uhulumeni nomphakathi ngeke uzivumele lezi zigameko zokubulawa kwamaphoyisa.

Uthe amaphoyisa ayazinikela ekwenzeni isiqiniseko sokuthi umphakathi uphephile kodwa asephenduke izisulu zokubulawa ngabantu abangenanembeza.

Kubulawa uConstable Ximba nje ngesonto eledlule kutholwe isidumbu sikaConstable Xolani Cele (26) obesebenza ePinetown, nesomunye wesifazane uNksz Sindisiwe Ngcobo.

Lezi zidumbu zitholwe eGreytown zinamanxeba okudutshulwa kanti sekuboshwe ababili okubalwa kubo nephoyisa ngalesi sigameko.

Kusolwa izingane ezihlala emgwaqweni ngomlilo oqubu-ke ngaphandle kwebhilidi iStrollers.

MCEBO MPUNGOSE

KUSOLWA izingane ezihlala emgwaqweni ngomlilo oqubu-ke ngaphandle kwebhilidi iStrollers elingaseDurban Station izolo ekuseni.

Kusize ukusheshe kufike abezicishamlilo kungakabi bikho monakalo omkhulu kade kuqubuka umlilo njengoba bebike ukuthi akekho olimalile kulesi sigameko.

UMnuz Jaquas Pringle, ofike kuqala kulesi sigameko uthe usola izingane ezihlala emgwaqweni ezijwayele ukuhlala kule ndawo ukuthi yizo eziqale umlilo ekuseni.

“Ngithe ngiphuma egunjini lami lokulala ngabona umlilo usaqala kancane, ngaphuthuma ngeza nebhakede elinamanzi ngithi ngizama ukuwucisha kodwa ngithe ngifika ubusumkhulu kakhulu,” kusho uPringle.

Okhulumela abezicishamlilo uMnuz Owen Singh, uthe kule ndawo kujwayele ukugcwala abantu abangondingasithebeni.

“Sisola ukuthi umlilo uqalwe ngamakopi eziqholo abegcwele kule ndawo, nokunye ukungcola,” kusho uSingh ngamafuphi.

Unogada webhilidi elakhelene nalapho okushe khona uMnuz Thembinkosi Hlophe uthe ufike umlilo usuqalile futhi akukho akubonile okusolisayo ngaphandle kokuthi emasontweni edlule kukhona abese beyenze ikhaya labo indawo yesehlakalo kodwa wabaxosha. Usola ukuthi babuye babuya ngenjoba sekuqubuka umlilo.

Indawo eshisiwe ibisetshenziselwa ukuwasha izimpahla nokuzikhulula.

Akasakutholi ukuphumula umzali wengane enezinyanga eziyishumi ezalwe nesifo esixakile sokuvuvukalelwa yikhanda.

ZANELE MSOMI

AKASAKUTHOLI ukuphumula umzali wengane enezinyanga eziyishumi ezalwe nesifo esixakile sokuvuvukalelwa yikhanda. UNksz Zama Mhlongo (25), waseNtuzuma akasakwazi ukujabula ngoba kumele anake indodana yakhe uMpendulo.

Kwayena usexakekile ukuthi athatheni ahlanganise nani ngoba uyaqala ukuhlangabezana nale nkinga enganeni yakhe yesithathu.

Uthi useqala ukulahlekelwa yithemba ngoba nodokotela sengathi bayahluleka yile nkinga.

Isifo esiphethe uMpendulo sibizwa nge-Hydrocephalus, okukhukhumala ikhanda libe usayizi ophindeke kathathu kunelengane ejwayelekile.

“Odokotela bathe ugcwele amanzi ekhanda, adinga ukumpompwa. Uma bezama kuvele kubambeke amapayipi ekhanda,” kusho yena.

Uthi isimo sendodana yakhe simdonsela amehlo ngoba noma kuphi kubukwa yena.

Uthi akasakwazi ukuhamba ngokukhululeka nokuya esontweni ngoba abantu bayambuza bamdabukele ngengane abayibiza ngesiphiwo.

Abanye bamtshele kwezikabhoqo ukuthi akavele akhohlwe yile ngane ayibeke kwabezenhlalakahle ayofuna umsebenzi. Lokhu kumphathe kabi ngoba uthi usazimisele ukunakekela ingane yakhe ize ithole usizo.

Isifo sikaMpendulo simenze wasalela nakwabanye ontanga, kumanje akakwazi ngisho ukuzihlalela.

Uyagonywa noma alale kuhle kwengane esanda kuzalwa.

Yize edla kodwa isimo somzimba sakhe asikhombisi impilo futhi uhlala ngokukhala.

UNksz Mhlongo uthi uMpendulo welashwa esibhedlela e-Addington, eThekwini.

Unikezwa izinsuku zokubuya azobonana nodokotela emuva kwezinyanga ezimbili.

Bekumele aphindele khona ngo-Agasti kodwa wabona kukude ngenxa yokubona isimo sengane siqhubeka.

NgoLwesibili uye emtholampilo wezingane khona e-Addington yalaliswa.

UDkt Portia Kheswa-Masinga ozimele wasePinetown uthi kunzima ukwelapha lesi sifo futhi zehlukene nezizathu ezisidalayo. Uthi wonke umuntu unamanzi ebuchosheni kodwa uma esemaningi aya nasemgogodleni kudaleke lesi sifo.

“Kuyenzeka ibonakale umama esakhulelwe bese ingane izalwa nayo. Ayikho indlela esheshayo yokuyelapha ngaphandle kokufaka ipayipi elihlala ekhanda limpompe amanzi. Uma nalo lihluleka odokotela bazama ezinye izindlela. Kwesinye isikhathi ukuhlinzwa akusona isisombululo,” kusho yena.

Uthe akuyena noma umuphi udokotela ongakwazi ukulapha lesi sifo kodwa kufuneka oyi-Neurosurgeon ofundiswe kabanzi ngaso.

Yize izinhliziyo zabaningi zibalisa ngokugula kukaDkt Nelson Mandela, kunezigameko ezibuyisa injabulo ngaleli qhawe.

ZANELE MSOMI

YIZE izinhliziyo zabaningi zibalisa ngokugula kukaDkt Nelson Mandela owaba ngumengameli wokuqala wentando yabantu, kunezigameko ezibuyisa injabulo ngaleli qhawe.

Ngaphandle kokuba yingcithabuchopho kwezombusazwe, uMandela ubenogazi kuwo wonke umuntu.

Ukumamatheka kwakhe, amahlaya nothando lwabantu, kuyohlala ezinhlizweni zabaningi.

Ube nesiphiwo sokuxhumana nabantu abahlukene ngaphandle kokubheka izinga abakulona. Ngisho uthando lwezingane lugqamile, okwenze zingasali uma kugujwa usuku lwakhe lokuzalwa.

Wenze nomengameli abamlandelayo bakhululeka ngoba ukhombisile ukuthi ukuhola izwe akusho ukuthi kumele uthothobale.

Akekho ongayikhohlwa iMadiba Jive, umdanso ogcine ungenisile ngisho kubaculi bakuleli.

Lo mdanso waqala ukuwukhombisa engqungqutheleni eyayiseGrand Parade, eCape Town, ngo-1990.

Kwakusaphele amahora ambalwa ephume ejele emuva kokugqunywa iminyaka ewu-27.

Ingoma eyabhalwa nguJohn Pretorius waseCape Town ethi Ke Nako- Now Is The Time, kuthiwa yiyo eyenza uMadiba wahluleka wukuzibamba wasukuma washaya iMadiba Jive.

Kusukela lapho, kuyo yonke imicimbi ubeshaya wona umdanso wakhe.

Le ngoma kaPretorius kumanje iqoshwe kwi-albhamu yeNdebe yoMhlaba ka-2010.

Emgubheni wosuku lokuzalwa lukaTata ngo-2003 eSandton, eGoli, usuku lwaphenduka kwaba olweMadiba Jive.

Kulo mcimbi owawunezihambeli ezilinganiselwa ku-2 000 waphetha ngokuthi kusukume ngisho esinedolo silekelela uTata ngomdanso wakhe.

Umculi wakuleli, uYvonne Chaka Chaka, wahlanganyela nabanye abaculi engomeni yokuhalalisela uMadiba.

U-Oprah Winfrey waseMelika, u-Arch Bishop Desmond Tutu, uMnuz Bill Clinton owayenguMengameli waseMelika, bangezinye zezicukuthwane ezagcina zishaya iMadiba Jive.

Ukuduma kweMadiba Jive kuholele ekutheni iqembu le-kwaito kuleli, iTribe, libhale ingoma ethi Diba Diba.

Noma ebebonakala ewukhonzile umdanso kodwa uMandela kukhona okunye akuveze obala ukuthi akahambisani nako. Ngeminyaka yama-90’s yaba sematheni indaba yokugxeka iBoom Shaka eyayishisa izikhotha.

Leli qembu lalingaconsi phansi kubalandeli njengoba lalinemidanso efequzayo, engehlanga kahle kuMandela.

UTheo Nhlengethwa owayeyilungu leBoom Shaka uthi lokhu akusho ukuthi uMadiba wayeyizonda iBoom Shaka kodwa wayebeluleka njengezingane zakhe.

Kumanje isizwe sisakhala ngeMadiba Magic okukholelwa ekutheni ibilethwa wukuba khona kwakhe ezinkundleni zemidlalo.

Yabonakala iMadiba Magic emdlalweni weNdebe yoMhlaba webhola lombhoxo, lapho kwakutholene phezulu iqembu lakuleli ama-Springbok ne-All Blacks yaseNew Zealand ngoJuni 24, 1995 enkundleni i-Ellis Park.

UMandela wangena enkundleni egqoke ijezi likakaputeni uFrancois Pienaar kwachwaza inkundla.

Namanje uPienaar akawukhohlwa lowo mzuzu athi yiwo owaholela ekutheni baguqise ama-All Blacks ngo-15-12. Usanda kuvela kuthelevishini ethi ngesikhathi exhawulana noMadiba akakholwanga.

“Ngangifisa ngisho ukumwola, ngimgone kodwa kwakumele ngimhloniphe njengomengameli,” usho kanje uPienaar.

Lo mdlalo wahlanganisa izinhlanga okokuqala njengoba ibhola lombhoxo lalithathwa njengelabamhlophe.

Yaphinda iMadiba Magic ngoFebruwari 3, 1996 e-FNB Stadium kudlala iBafana Bafana neTunisia kwifayineli ye-Africa Cup of Nations.

Nakhona uTata wafika egqoke ijezi likakaputeni uNeil Tovey, iBafana Bafana yanqoba ngo 2-0.

Isizwe siyalila nje ngokugula kukaMdiba kufanele ngoba umlando obhalwe nguye ezinhlizweni zabantu, kunzima ukuthi ufiphale.

Usufake isicelo sokuthi kumbiwe isidumbu sendodana yawo umndeni osuthole ukuthi yashayiswa yimoto yashonela eMshiyeni.

BAWINILE NGCOBO

USUFAKE isicelo sokuthi kumbiwe isidumbu sendodana yawo eyalahleka ngo-2011 umndeni waseMlazi osuthole ukuthi yashayiswa yimoto yashonela esibhedlela eMshiyeni yagcina ingcwatshwe ngohlelo lukahulumeni ngawo unyaka eyalahleka ngawo.

UMnuz Sfiso Mdlalose walahleka ngo-Ephreli 15, 2011 eyobheka unina wengane yakhe eMbumbulu kodwa akaphindanga wabonwa ngumndeni wakhe.

Unina uNkk Nolwandle Mdlalose uthe ubesegula engazi ukuthi kwenzekani endodaneni yakhe kodwa emuva kokuthola ukuthi yafihlwa eMolweni uzizwa engcono yize kubuhlungu ukuthola ukuthi seyaze yathunwa engazi lutho.

“Bengiyolanda amaphilisi eMshiyeni ngoLwesihlanu ngasheshe ngaqeda. Kwathi uma ngibona ukuthi kusekahle ngaya emakhazeni ngiyobheka ukuthi awukho yini umkhondo engingawuthola. Ngithe uma ngifika khona bathi angiye kwelinye ihhovisi,” kusho uNkk Mdlalose.

Uthe kuleli hhovisi baqale bambhekela kusukela ngosuku eyanyamalala ngalo indodana yakhe.

“Intombazane yapheqa yathi iyalithola igama, kuthe uma ngibuza iwadi akuyo ibheka omunye esebenza naye. Bathi indodana yami ayisekho emhlabeni yangena esibhedlela ngo-Ephreli 17, 2011 ishayiswe yimoto futhi ayizange ilale yashonela lapho kufikela khona iziguli,” kusho uNkk Mdlalose.

Uthe unikele emakhazeni kuGale Street babheka bangathola mininingwane.

“Bangibuzile ukuthi ngabika yini ngokuduka kwakhe ngasho ukuthi ngabika ngaze ngakhipha udaba ephepheni ngibakhombisa neSolezwe aphuma kulo ngoba ngiligcinile esikhwameni, ngihlale ngiliphethe,” kusho uNkk Mdlalose.

Uthe ugcine ethole ukuthi indodana yakhe yathuthwa eMshiyeni yayiswa emakhazeni eSiphingo emuva kokushona, yangcwatshwa ngoJuni 20, 2011 emathuneni aseMolweni.

“NgoMsombuluko siye esiteshini samaphoyisa eFolweni sadlulela eNkantolo eNsimbini siyofaka isicelo sokuthi kumbiwe isidumbu ukuze ngizifihlele,” kusho uNkk Mdlalose.

Uthe uselinde ucingo oluzomazisa ukuthi isicelo sakhe siyemukeleka yini.

UNkk Mdlalose uthe okumxakayo wukuthi akukaze kumenyezelwe ngisho emsakazweni ukuthi indodana yakhe ishonile awaziwa umndeni wayo.

“Asikho isibhedlela engingasihambile, uma ngizwa nje ukuthi kukhona olimele ongaziwa bengiya kodwa ngingatholi lutho. Ngisho nakuGale Street bese ngiya okwesine,” kusho uNkk Mdlalose.

Uthukuthele uyaveva umphakathi ufuna nokuthi adingiswe endaweni owesifazane onguthisha osebizwa ngebhoklolo ngokushaya abantu.

MLUNGISI GUMEDE

UTHUKUTHELE uyaveva umphakathi waKwaNdengezi ufuna nokuthi adingiswe endaweni owesifazane ongithisha osebizwa ngebhoklolo ngokushaya abantu.

Ngendlela umphakathi onganeme ngayo ngokuziphatha kukaNksz Zandile Mvuyane iminyaka yakhe elinganiselwa phakathi kuka-30 no-35, usuze wambhikishela ngemuva kokuthi eshaye kanzima owesifazane osekhulile ezinyangeni ezintathu ezedlule.

UNksz Mvuyane kuthiwa washaya lona wesifazane ngoba emsola ngokuthi ubehamba ehleba ngaye.

Esehlakalweni sakamuva uNksz Mvuyane kuthiwa ushaye kanzima ingane yentombazane eneminyaka eyisikhombisa, u-Owami Ngcobo, ngoba eyisola ngokuthi imchaphe ngenhlamba.

Kuthiwa u-Owami wayedlala emgwaqweni nomngane wakhe ngesikhathi ebizelwa kwaNksz Mvuyane wafike wathelwa isibhaxu ngumsolwa waze waklinywa.

Unina ka-Owami, uNksz Dolly Ngcobo, uthe into emdidayo wukuthi izingane zamthuka kanjani uNksz Mvuyane ngoba zazidlala emgwaqweni yena ehleli kwakhe endlini.

“Ayikho le nto ayishayele yona ingane, wuchuku kuphela lolu alwenzayo ngoba vele akazwani namuntu endaweni kanti futhi uyibhoklolo elikhonze ukushaya abantu,” usho kanje.

UNksz Ngcobo uthe ulivulile icala kodwa unovalo lokuthi lolu daba lungashabalala lungayi enkantolo ngoba uNksz Mvuyane wabatshela emehlweni ukuthi badlala ngesikhathi sabo ngokumbopha.

Ilungu lomphakathi, uNksz Thoko Mdlalose, lithe bakhathele wukuziphatha kakuNksz Mvuyane, abasamdingi endaweni.

“Lo sisi kusukela afika lapha ngo-2011, usexabane nenqwaba yabantu futhi nguyena obasukelayo,” usho kanje.

Ethintwa ngalezi zinsolo uNksz Mvuyane, uvumile ukuthi wamshaya u-Owami ngemuva kokuthi emthukile ngenhlamba engeke ishicilelwe.

“Into engingayisho wukuthi abantu balapha bayangizonda ngoba ngingcono kunabo, bacikwa wukuthi umuzi wami muhle futhi ngifake namakhamera okuyinto abangayijwayele,” usho kanje.

UNksz Mvuyane uthe njalo uma uhlala nabantu abangekho ezingeni lakho bahlale bekuhlukumeza ngenhloso yokukuthuthisa.

Uthe uyazi ukuthi kukhona abahlela ukumhlasela bamshise nendlu ngemuva kokushaya ingane yakwaNgcobo.

“Nami ngiwabikele amaphoyisa mayelana nezinsolo zokusongelwa,” usho kanje.

Okhulumela amaphoyisa KwaZulu-Natal, uColonel Jay Naicker, uthe likhona icala lokushaya elivulwe esiteshini samaphoyisa KwaNdengezi ngemuva kokuthi ingane yentombazane yaklinywa.

UNaicker uthe umsolwa utshele amaphoyisa ukuthi ingane yamthuka kodwa yona iyakuphika lokho. “Okwamanje akekho umuntu osaboshiwe, amaphoyisa asaqhubeka nophenyo,” usho kanje.

UNaicker uvumile ukuthi umsolwa ecaleni lokushaya usanda kubika emaphoyiseni ngezinsolo zokusongelwa.

Izikhulu zamatekisi ngaphansi kososeshini abahlukene eNingizimu yeTheku zike zakhohlwa wukugada umsebenzi kodwa zasebenzisa usuku lokuzalwa kukaDkt Nelson Mandela ukusiza umphakathi ongabagibeli bamatekisi.

MCEBO MPUNGOSE

IZIKHULU zamatekisi ngaphansi kososeshini abahlukene eNingizimu yeTheku zike zakhohlwa wukugada umsebenzi kodwa zasebenzisa usuku lwayizolo lokuzalwa kukaDkt Nelson Mandela ukusiza umphakathi ongabagibeli bamatekisi.

Labo somatekisi abaphuma ngaphansi kukasoseshini waKwaMakhutha, Winkelspruit, Adams Mission, Amanzimtoti naseBhekulwandle bahlangane nomphakathi ehholo laKwaMakhutha lapho kudluliselwe khona igilosa emindenini edonsa kanzima.

Abanye bomphakathi abebezokwamukela ukudla balandwe ngosizo lwabo osomatekisi baphinde babuyiselwa emakhaya.

Umgqugquzeli walo mcimbi, uMnuz Musa Ntuli, uthe bekungokokuqala ukuthi benze into enjengalena futhi wethemba ukuthi ngeke bagcine nje ngosuku lukaMandela kuphela kodwa bazoqhubeka.

“Namhlanje kunabantu abaningi abangasebenzi, izingane ezidla izidakwamizwa nobhubhane lwengculazi, ngakho ngokwenza lokhu ngalolu suku nathi sikhombisa ukuthi njengosomatekisi siyafuna ukuhlanganyela sisize emphakathini.

UDkt Zweli Mkhize upende isikole iDuze Primary njengokunikela kugujwa usuku lokuzalwa kukaMandela izolo ephelezelwa ngozakwabo kuhulumeni namakhansela endawo.

Kube nenhlokomo esibhedlela okulele kuso uDkt Nelson Mandela kutheleka unozinti weKaizer Chiefs.

KUBE nenhlokomo esibhedlela okulele kuso uDkt Nelson Mandela, iMediclinic esePitoli, izolo kutheleka unozinti weKaizer Chiefs obezofisela uMandela izilokotho ezinhle.

U-Itumeleng Khune obuye abe ngukaputeni weBafana Bafana ubekwababuthane phambi kwalesi sibhedlela bezofisela uMadiba usuku oluhle nokusheshe alulame.

Kube yisidumo eqhamuka, abantu bakhipha amaselula abo, bamthatha izithombe abanye beqopha nama-video.

“Ngize lapha ukuzomela iBafana Bafana neKaizer Chiefs, ngizofisela uMandela usuku oluhle lokuzalwa njengoba namhlanje eseneminyaka engu-95. Ngizizwa ngikhethekile futhi ngihloniphekile ukuba lapha futhi ngiyanibonga nonke ngokuphuma nibe baningi kangaka ukuzotshengisa uthando nokweseka umholi wethu uMandela. Uyohlale ehlonishwa futhi ethandwa emhlabeni jikelele,” kusho uKhune.

Esehamba uKhune, kuze kwadingeka kungenelele amaphoyisa ngoba abantu bavele bathi bhu kuyena bemjabulela bezama nokumthatha izithombe.

Isitatimende esikhishwe yihhovisi likamengameli izolo sithe sesingcono isimo kuMadiba esibhedlela. – Intatheli yeSolezwe

Ukungaxhaswa kwabafundi ngemali ezikhungweni ezimbili zemfundo ephakeme kubenze babhikisha.

MBALI KHANYILE noMHLENGI SHANGASE

UKUNGAXHASWA kwabafundi ngemali ezikhungweni ezimbili zemfundo ephakeme kubenze babhikisha bekhala ngokungaqondakali kohlelo lokukhishwa kwemali yoxhaso yisikhwama iNational Students’ Financial Aid Scheme (Nsfas).

Abafundi baseThekwini College, bavuke umbhejazane izolo bekhala ngokugqoza kohlelo lokukhishwa kwemali njengoba bethi basalinde umnyama ongenafu, abazi ukuthi bazoxhaswa nini.

Ekomkhulu le-Unisa ePitoli nakhona kube yileso abafundi bebhikisha ngaphandle kwehholo okubhaliselwa kulona ngoba le nyuvesi imemezele ngeledlule ukuthi abafundi abazame ezinye izindlela zokuthola imali ngoba iphelile imali kulesi sikhwama.

UNksz Lungisile Silwanyana (19) waseKokstad, owenza unyaka wokuqala ezifundweni zeTransport and Logistics, eThekwini College, uthe naye akazange anikwe amafomu athunyelwa ehhovisi lakwa-Nsfas njalo ngonyaka.

“Okwami kunzima kakhulu ngoba negama lami alikho ohlwini lwabafundi okumele bathole uxhaso lwemali. Sekuphele isonto lonke ngigqigqa ehhovisini bengangicaciseli ukuthi ngizosizakala kanjani njengoba ngibhekene nale nkinga,” kuzikhalela uNksz Silwanyana.

Uthe okumphatha kabi wukuthi maningi amathuba okungaqhubeki nezifundo zakhe njengoba engakwazi ukubhalisa kule kota yonyaka.

UMnuz Zwelakhe Khoza onguMengameli womkhandlu wabafundi kuleli kolishi, uthe ziningi izinto ezingaqondakali kulesi sikhungo ezidinga ukuphenyisiswa kabanzi.

“Ngesonto eledlule sixhumane nehhovisi elikhulu le-Nsfas sathola ukuthi akukho mafomu athunyelwa yiThekwini College ngesicelo soxhaso lwemali yokufunda. Sisalindele izimpendulo njengoba singakaze sikuthole ukuphenduleka mayelana nokungahanjiswa kwamafomu ethu,” kusho uKhoza.

UNksz Lindiwe Bhengu, wezokuxhumana eThekwini College uthe abaphathi besikole bamatasa nokulungisa izinkinga ezikhona.

“Kutholakale ukuthi kube namaphutha enziwe ngabafundi kumafomu okubhalisela ukufunda, okuyikho okuholele ekutheni ingangeni imali yoxhaso kuma-akhawunti abo asemabhange. Kodwa-ke zizophela izinkinga njengoba abafundi sebekhiphe uhlu lwezikhalo abanazo,” usho kanje.

Okhulumela i-Unisa KwaZulu-Natal, uNksz Gcina Nhleko uthe bebezwile ukuthi kuzoba nombhikisho mayelana nokungaxhaswa kwabafundi.

Uthe ukuphela kwemali kwenza ukuthi kuhlehliswe izinsuku zokubhalisa nezokukhokhela izifundo kuze kube isekupheleni kwale nyanga ukuze abafundi bazame ezinye izindlela zoxhaso.

Isikhulu esibhekele imifundaze kwa-Nsfas, uMnuz Mandla Cele, sathi imali iyakhishwa iye emanyuvesi angu-23 nasema-FET angu-50 kuleli bese kuba iwona ayicazela abafundi.