Owesifazane othi waphendulwa isigqila socansi nguMnuz Sibusiso Gcabashe utshele iNkantolo eNkulu ukuthi washaqeka esebona lo msolwa ezibiza ngoKwakhe ‘Mgqumeni’ Khumalo.

NONTUTHUKO NGUBANE

OWESIFAZANE othi waphendulwa isigqila socansi nguMnuz Sibusiso Gcabashe utshele iNkantolo eNkulu yaseMgungundlovu ukuthi washaqeka esebona lo msolwa ezibiza ngesihlabani somculi kamasikandi, uKwakhe ‘Mgqumeni’ Khumalo.

Izolo kuvele ubufakazi obushaqisayo ngezinsolo zokudlwengulwa kuphindelelwa lona wesifazane osemncane othe wathunjwa nguGcabashe owayezibiza ngoMnuz Sphamandla Dlamini.

Ufakazi uveze ukuthi wathunjwa ephuma esikoleni ngumsolwa wamenza isigqila socansi, emdlwengula ephindelele amahlandla angaphezu kwamahlanu.

Uthe wabaleka ‘uSpha’ emuva kwalesi sigameko waze wambona emaphephandabeni esezibiza ngoMgqumeni “ovuke ekufeni”.

Lo wesifazane (18) elingeke lidalulwe igama lakhe ukumvikela utshele inkantolo ukuthi lo ozibiza ngoMgqumeni wayehamba ezibiza ngoMnuz Sphamandla Gcabashe kubantu kodwa yena wayekade emazi ngoSphamandla Dlamini, futhi eyisoka likadadewabo omdala. Uthe wamthumba kubo eXobho, wamdlwengula ngaphansi kwesihlahla. Emuva kokuba belale ubusuku bonke ngaphansi kwalesi sihlahla uthe babe sebevuka bahamba ibanga elide ngezinyawo. Uthe uGcabashe wayehamba eqamba amanga ukuthi ungunkosikazi wakhe nokuthi babanjwe inkunzi baphucwa yonke impahla.

“Wayehamba etshela abantu amanga ukuze bemdabukele. Safika komunye umuzi wabazalwane bakwaShembe basipha ukudla, sagcina ngokulala khona. Ebusuku waphinde wangidlwengula, wavuka phakathi nobusuku wangidlwengula futhi. Ngakusasa waphinde wangidlwengula ngendlela efanayo. Nami ngase ngivele ngingene ezingubeni ngingagqokile ngisaba ukuthi uzongishaya uma ngifake izimpahla. Wayengiphoqa ukuba siye ocansini, engishaya uma ngingafuni,” kusho ufakazi.

Emuva kokuhlala izinsuku ezimbili bahamba kulo muzi ababelaliswe kuwo, babhekisa amabombo eThekwini. Uthe bafika ezihlotsheni zikaGcabashe baphinde balala khona, lo wesifazane wayelokhu embiza ngonkosikazi wakhe. Uthe wayeqhubeka emdlwengula ubusuku nasemini uma amalungu alo mndeni engekho.

“Wangishiya ngelinye ilanga wathi usaya esangomeni. Ngabona zonke izinto zakhe zingekho nesikhwama sakhe. Ngasala ngatshela umnikazi womuzi ngesimo esasiletha kule ndawo. Bathinta abasekhaya basho ukuthi kade ngalahleka, ngalandwa abasekhaya,” kusho ufakazi.

Uthe akaphindange wambona umsolwa, waze wambona kwiSolezwe sekuthiwa uthi unguMgqumeni.

Uthe ukudlwengulwa kwamphazamisa umoya ngoba wayeyintombi nto.

Kusolwa umbango wamatekisi ngokufa kwephoyisa lakwaSanti eMariannhill.

MNCEDISI GOGE

KUSOLWA umbango wamatekisi ngokufa kwephoyisa lakwaSanti eMariannhill elitholwe lidindilizile eceleni komgwaqo ngeledlule eGreytown ngemuva kokuthunjwa abantu abangaziwa.

Lokhu kuhlaluke enkonzweni yomngcwabo kaConstable Xolani Khwela (26) izolo ngeSonto enkundleni yezemidlalo kule ndawo.

UKhwela obeyiphoyisa esiteshini sasePinetown watholwa enamanxeba okudutshulwa emzimbeni egcine ukubonakala ehamba nowesifazane naye owabulawa itekisi ababehamba ngayo yatholwa ipakwe kwaNdengezi erenki yamatekisi.

Udadewabo kamufi, uNkk Doris Cele obekhulumela umndeni, uthe kade ayemnxusa umufi ukuthi aphume embonini yamatekisi ngoba idume ngobungozi nezinkabi.

“Abangaziyo nabasondelene nami bayazi ukuthi kade ngangimcela uXolani ukuthi aphume ematekisini ngoba ngangingayithandi le nto ayekuyona. Ngiyamzonda umuntu obulale uXolani,” kusho udadewabo.

Kube nomunyu nosizi ngesikhathi ingane kamufi ifunda incwadi yokuvalelisa kuyise ihlaba isihluku abulawe ngaso.

“Kodwa mbulali unesihluku, ngizosala nobani ngoba usungiphuce ubaba wami ngisemncane kangaka.

“Uthi le minyaka emingaka ngizoyiphila nobani ngoba usuthathe ubaba,” ibinalawo mazwi incwadi ebibhalwe yingane.

Bekuluhlaza igceke sengathi ayaviliyela amaphoyisa abeshaya ingoma kusukume wonke umuntu etendeni.

Khonamanjalo, ngoMgqibelo kungcwatshwe elinye iphoyisa elibulawe eMlazi ekuqaleni kwesonto uConstable Gugulethu Ximba (33). UConstable Ximba obesebenzela esiteshini saseReunion udutshulwe umlisa obaleke ngezinyawo.

UKhomishana wamaphoyisa KwaZulu-Natal, uLt General Mmamonnye Ngobeni ukuhlabile ukubulawa kwamaphoyisa wathi bazobabopha abathintekayo.

Okhulumela amaphoyisa esifundazweni, uColonel Vincent Mdunge uthe sekuboshwe amaphoyisa amabili athinteka ecaleni lokubulawa kukaConstable Khwela abesebenza naye umufi esiteshini. Ayisikhombisa amaphoyisa asebulewe eKZN kulo nyaka.

Sizulelwa amanqe isikhundla somholi we-DA ePhalamende, uNksz Lindiwe Mazibuko.

SIZULELWA amanqe isikhundla somholi we-DA ePhalamende, uNksz Lindiwe Mazibuko (osesithombeni) njengoba sekukhona ozakwabo eqenjini abahlela ukuthi akhishwe ngemuva kokhetho lwangonyaka ozayo ngoba bekhononda ngendlela aphethe ngayo.

UNksz Mazibuko (33) kuthiwa usejikelwe ngisho yilabo ababemeseka ngesikhathi kukhankaselwa ukuthi athathe lesi sikhundla ayesibanga noMnuz Athol Trollip.

Ngokwemibiko yephephandaba iSunday Tribune enguzakwabo weSolezwe, kuvela ukuthi amalungu ekhokhasi yaleli qembu ePhalamende asecikekile uNksz Mazibuiko amsola ngokuthi uphethe ngendlela engagculisi futhi ubonakala kunezinto eziningi angaziqondi ngomsebenzi.

Okunye asolwa ngakho wukuthi uzithwele ufuna kugcine yena kuzo zonke izinqumo ezithathwayo.

Lokhu kuthiwa sekuholele ekutheni amanye amalungu ePhalamende kule nhlangano asabise ngokuthi angeke azifake izicelo zokubuyiselwa ezikhundleni zawo ngenxa yokushawa ngesithende okwenzeke ngesikhathi kuthatha uNksz Mazibuko.

Amalungu ekhokhasi aleli qembu abuye athukutheliswa isenzo sakhe ngezinguquko abezenza eshintsha abaholi kumakomiti abakuwo ebafaka kulawo abangakaze babe kuwo futhi abangenawo ngisho amakhono kuwo.

“Okuqaphelekayo ngaye ukuthi usemncane futhi nezinqumo azithathayo uthola ukuthi akanaso isiqiniseko ngazo nokwenza wonke umuntu agcine engasethembi ngokwenzekayo,” kusho omunye wabaholi ongadalulwanga.

UNksz Mazibuko kubhekwe ukuthi ahlangane noNkk Helen Zille maduze ukuze kuxoxwe ngale nkinga njengoba emaningi amalungu okuthiwa awaseneme ngobuholi bakhe.

Lo mholi ukhethwe ngesasasa ngo-2011 esikhundleni sokuhola le nhlangano ePhalamende waba ngowokuqala omnyama ukusithatha selokhu i-DA yabakhona.

Ngesikhathi ekhethwa kwaba nemibono ehlukene kwabanye abaseqenjini naye njengoba kunezingwevu zeqembu ezaziphikisana nalokhu abanye kungabaholi abamnyama abanjengoMnuz Masizole Mqasela oyilungu lePhalamende ababethi konke lokhu kwenzeke ngoba ethandwa uNkk Zille.

Imizamo yokumthola ukuba aziphendulele ayiphumelelanga njengoba ucingo lwakhe belukhala lungabanjwa.

Basele nabebekugqokile abakwaMaphumulo emuva kokushiselwa umuzi.

BONISWA MOHALE

BASELE nabebekugqokile abakwaMaphumulo emuva kokushiselwa umuzi kwa-F eMlazi ngabantu abasola umfana wakhona ngokuba wuhlupho emphakathini.

Kuthiwa indodana kamfowabo kaNksz Benzani Maphumulo (42) eneminyaka ewu-26 ibamba abantu inkunzi futhi yiyo efike ibulale amafastela emizini yabantu futhi ibhema izidakamizwa.

Izolo ithimba leSolezwe ebelihambele kwaMaphumulo lifice umndeni uhlezi ngaphandle ubuka intuthu ebisashunqa ophahleni lwendlu yakhona enamakamelo amane. Umndeni wakwaMaphumulo uhlala ezindlini zomxhaso ezisanda kwakhiwa.

Ngokusho kukaNksz Maphumulo, badidekile ukuthi ngubani oshise umuzi wabo kodwa-ke bayasola ukuthi ngabantu ababefuna ingane kamfowabo beyisola ngokuganga.

“NgoMeyi kwafika abantu befuna ingane kamfowethu baphihliza amawindi bamosha. Ngababika emaphoyiseni kodwa namanje abakaze baboshwe, ngiyasola ukuthi yibona abaphinde bashisa ngoba asibona abantu abashiya impahla kagesi ikhanya,” kusho uNksz Maphumulo.

Udadewabo kaNksz Maphumulo, uZenzile, ukuqinisekisile ukuthi basola ukuthi ngabantu abafike baqhumisa izibhamu abashise umuzi kadadewabo ngoba ngoMeyi baphihliza amawindi kulo muzi baphinde badlulela nakwakhe benza okufanayo.

Uthe indlela abahlukumezeke ngayo, ngisho bebika icala lokufa kwengane yabo ngokugwazwa ngoJanuwari 1 alizange lisukunyelwe.

“Siyasaba, mina sengiquba komakhelwane. ngathutha kwami ngenxa yabantu ababefuna ingane yomfowethu. Asali iyaganga kodwa thina asiyivuni futhi asingeni ekugangeni kwayo. Asazi nokuthi sizolalaphi kumanje,” kuchaza uNksz Zenzile Maphumulo.

Bathe bebehambile bevakashe emakhaya eMfume ngesikhathi bethola ucingo lokuthi kuyasha ngoMgqibelo ebusuku.

Yize umndeni wakwaMaphumulo ubusulivulilw icala ubungakayitholi inombolo yedokodo nokuthi ngabe liphenywa ngubani.

Ikhansela le ndawo, uMnuz Sthenjwa Nyawose, alitholakalanga ukuba liphawule ngalolu daba.

Abahlali basemjondolo yasePelgrim bevale imigwaqo ephuma edolobheni ngamathayi avuthayo bekhala ngokugqoza kwentuthuko.

MNCEDISI GOGE

BATHWALE kanzima abashayeli bezimoto abanqamula edolobheni eSiphingo izolo emuva kokuba abahlali basemjondolo yasePelgrim bevale imigwaqo ephuma edolobheni ngamathayi avuthayo bekhala ngokugqoza kwentuthuko nokushaywa indiva kwezikhalo zabo.

Indawo abahlala kuyo ababezibekile kuyona eminyakeni eminingi eyedlule bathi ayinawo ugesi futhi kubuye kulahlwe kuyo imfucuza.

Umgwaqo omkhulu oxhumanisa iSiphingo nezinye izindawo ubuvaliwe kushunqa amathayi kunganyakazi lutho. Omunye wababhikishi, uMnuz Mlungisi Ngcobo, uthe sebekhathele amakhansela afika kubona njalo uma sekuzovotwa abathembise izulu nomhlaba qede angazigcini izithembiso zawo uma esezikhundleni.

“Sengihlale kule ndawo iminyaka engaphezulu kuka-30. Sikhathele yikhansela elisithembisa izinto bese lingazigcini.

“Ikhansela lathi lizosenzela izinto esasizifunile kodwa kuze kube manje alikwenzi lokho. Sifuna izindlu, ugesi kanye nokuthuthwa kwemfucuza. Kufika amaloli okungasewona akamasipala lapha achithe imfucuza nezingane zethu ziyalimala kulo mgwaqo ngenxa yokuthi azikho izithiba-jubane. Yizinto ekade sazifuna lezi kodwa esikhala ngakho kakhulu wukwakhelwa izindlu,” usho kanje.

Liphendula ikhansela, uMnuz Kilicharan Soonilall, lithe alihlangene nokuhlinzekwa kwezindlu kubantu, bona mabaye emahhovisi kaMasipala weTheku.

“Ngifonelwe ekuseni ngo-4 kuthiwa kunabantu ababhikishayo. Bengingeke mina ngiye kuleya ndawo ngaphandle kokuvikeleka. Kudingeka ukuthi ngisho kusenesikhathi uma ngizoya kuleya ndawo ngoba abantu ababhikishayo bayingozi. Akukho okutheni nami engingakwenza abantu mabaye kuMasipala ngoba yiwona obhekene nokuhlinzekwa kwezindlu,” kusho uSoonilall.

Sekujwayelekile ukuthi abantu babhikishele izindlu kuleli alipheli isonto kungavalwanga imigwaqo.

Okhulumela uMasipala weTheku, uMnuz Thabo Mofokeng, uthe benza ngakho konke okusemandleni ukuthi abantu abahlala emijondolo bahlinzekwe ngezindlu.

“Siphezu kohlelo lokwenza ukwakhiwa kwezindlu kuthathe okungenani isonto elilodwa. Siyabona nathi ukuthi ziyanda iziteleka kodwa siyabathembisa abantu ukuthi sizama ngayo yonke indlela,” kusho uMofokeng.

UMnuz Nelson Mandela welulama kahle kakhulu esibhedlela ngokusho komzukulu wakhe.

intatheli yesolezwe

Owayengumengameli wokuqala wentando yabantu, uMnuz Nelson Mandela, welulama kahle kakhulu esibhedlela ngokusho komzukulu wakhe, iNkosi Mandla Mandela izolo. INkosi uMandela isho kanje kulandela ukumvakashela ngempelasonto.

“Ukumvakashela kwami kungishiye nenkulu injabulo ngoba umkhulu welulama kahle kakhulu, uya ngokuqina nsuku zonke,” kusho iNkosi uMandela.

Uthe ukwelulama kwakhe akwehli kahle kulabo abese bandise amahlebezi okuthi uMandela useyiklabishi nje esibhedlela, uselinde nje usuku lokufa ngokuthi kucishwe imishini.

“UMadiba ulwile nokufa kwafakazeleka ukuthi lokhu obese kushiwo ngabanye kungamampunge. Ukulwa kwakhe kusakhombisa amandla anawo nayenawo ngesikhathi elwela abantu ukuze baphume emaketangeni obugqila eminyakeni eminingi eyedlule,” kusho iNkosi Mandela esitatimendeni esikhishwe ngosuku lwesi-44 umkhulu wayo alaliswa esibhedlela.

UMandela walaliswa esibhedlela iMedi-Clinic Heart Hospital, ePitoli, ngoJuni 8, ngenxa yesifo samaphaphu.

Sisalokhu siqashwe ngeso lokhozi ngonogada isimo esibhedlela alaliswe kuso, kukhona namaphoyisa ombutho weSAPS aqaphe ezintubeni ezingenela esibhedlela. Zonke izimoto ezingena esibhedlela ziyaseshwa.

Bekucishe kushaye umoya izolo ngaphandle kwesibhedlela, kunedlanzana nje labantu abebethatha izithombe abanye bebeka izimbali odongweni oselugcwele izilokotho, kufiselwa uMadiba ukuthi alulame.

UMandela, ogubhe iminyaka engu-95 yokuzalwa esalaliswe kuso lesi sibhedlela, uvakashelwe ngumzukulu wakhe, iNkosi Mandela nendodakazi uZenani Mandela ngeSonto.

Uthole ukwesekwa ngabamhambelayo, abanye beshiya izimbali, amakhadi namakhandlela esangweni okungenwa kulo esibhedlela nasemzini wakhe oseHoughton, eGoli.

Ihhovisi likaMengameli nalo lithe welulama kahle uMadiba. INkosi Mandela ibihambele nomkhuleko obuhlelwe yisizwe sabaThembu eThekwini Community Church.

Ithe izwe inokujabula ngokuthola imilayezo emihle nokwesekwa ngabantu baseNingizimu Afrika nasemhlabeni jikelele. Ibonge nohulumeni waseNingizimu Afrika, i-ANC, odokotela nabo bonke ababaseke njengoba kugula uMadiba.

Uphuthunyiswe esibhedlela owesifazane okhulelwe emuva kokugwazwa ngumnakwabo.

BONGIWE ZUMA

UPHUTHUNYISWE esibhedlela owesifazane okhulelwe wasePort Shepstone emuva kokugwazwa ngumnakwabo endaweni yakwaKwaShembe, eClermont, izolo ekuseni kubangwa isoka.

Lo wesifazane elingatholakalanga igama lakhe kuthiwa ubopha kakhulu emuva kokugwazwa esiphangeni, uqale washaywa ngumnakwabo obehamba nomngani wakhe. Ngokuthola kweSolezwe, uqale wayiswa emtholampilo wendawo kodwa ngokubona isimo sakhe wase edluliselwa esibhedlela saseChatsworth, iRK Khan.

Kuthiwa ubefike KwaShembe ezovakashela isoka lakhe okuthiwa livuke laya emsebenzini ekuseni lamshiya endlini. Ekuseni kuthiwa kugasele umnakwabo, uNksz Nokulunga Galeni, ehamba nomngani wakhe uNksz Nonhlanhla Shange okunguye obevutha kakhulu ngokusho kwabazibonele kwenzeka lesi sigameko. Emuva kokuba sebemhlaselile bamgwaza, umphakathi uzwe umsindo wokukhala waphuma waphuthuma endlini ebinomsindo.

Isolezwe lithole ukuthi emuva kokuba umphakathi ufune ukwazi okwenzekile kuqale phansi omunye umsindo uNksz Galeni nomngani wakhe uNksz Shange bebhoka ngolaka bethi ngeke baze bashaywe wumphakathi.

Emuva kokuba esetitinyiwe uNksz Galeni utshele amalungu omphakathi abekhona ukuthi ubengenalwazi ngokufika kukamnakwabo kodwa uthole ucingo nokwenze wathukuthela wathatha isinqumo sokumgwaza ediniwe.

Oyilungu lekomidi lomphakathi, uMnuz Fezile Mabukela, uthe uvuswe ngamalungu omphakathi ngo-8.30 ekuseni emazisa ngalo wesifazane okhulelwe osegwazwe ngumnakwabo.

Uthe ufike amalungu omphakathi eseke abatitinya kancane laba ababili ngalesi senzo sabo ngoba bebengafuni nokuzehlisa, bedelela.

“Ngifike esephelelwa ngamandla lo wesifazane okhulelwe ogwaziwe, sazama imizamo yokuba aphuthunyiswe KwaDabeka, sabiza namaphyisa ngokushesha.

“Ngokusho kwamalungu omphakathi afike kuqala endaweni yesigameko, laba ababili basabise ngokuthi bazalwa ngamaphoyisa, ngeke benziwe lutho osikhotheni.

Lokhu kuthukuthelise amalungu omphakathi abatitinya,” kusho uMabukela.

Owesifazane ofike kuqala endaweni nongathandanga kudalulwe igama lakhe, uthe uNksz Galeni noNksz Shange badlule phambi kwakhe ewasha emnyango wanganaka yize ewubonile ummese.

Kuthiwa ubuphethwe nguNksz Shange, emuva kwalokho kwezwakala lowesifazane esekhala egwaziwe kwasiza nowesilisa obambe ummese.

“Bese izilungiselela ukuyogibela intombi ngenkathi kufika laba bezoyigwaza. Kuyethusa lokhu okwenziwe yilo wesifazane ngoba kade wahlukana nobaba wezingane zakhe ngokwazi kwethu,” kusho lo wesifazane.

Amaphoyisa abathathile laba ababili kodwa abakhulumela amaphoyisa abakuqinisekisanga ukuboshwa kwabo. Isoka alitholakalanga.

Kulokoza inhlansi yethemba ngokulungiswa kwesitamkoko esihlalise kanzima umndeni wakwaMathe.

BONISWA MOHALE

KULOKOZA inhlansi yethemba ngokulungiswa kwesitamkoko esihlalise kanzima umndeni wakwaMathe eCato Manor, eThekwini osekuphele izinyanga eziyisishiyagalolunye sixhifika indle.

Emuva kokuba udaba lukaNksz Virginia Mathe lukhishwe kwiSolezwe ngeledlule, abasebenzi bakaMasipala weTheku bagcine behambele kule ndawo beyohlola isitamkoko.

UNksz Mathe (54) ongumuntu ophila ngokugula ukufakazele ukuthi udaba lwakhe luye lwasukunyelwa yizikhulu zikaMasipala weTheku emuva kokuba luphume kuleli phephandaba ngeledlule.

“Bese ngilahlekelwe yithemba lokuthi ngizosizakala ngoba kade ngangibabikela kwaMasipala ngingalutholi usizo. Emuva kokuba udaba luphume kwiSolezwe ngoLwesithathu 17, Julayi, abakwaMasipala bafika ngokushesha. Bafike basibuka ngoLwesine kanti ngoLwesihlanu oludlule bebekhona bathi bahamba nesinye isikhulu sakhona,” kuchaza uNksz Mathe.

Uthe ngoLwesihlanu bamtshele ukuthi bazobuya bazolungisa inkinga yamapayipi angayihambisi indle okuyiwona enza isitamkoko sigcwale.

“Ngihlalele ethembeni lokuthi bazofika bazolungisa njengoba bethembisile ngoLwesihlanu. Kwafika amathimba amabili ezohlola isimo, elokugcina lafika nomhloli owathi bangase bafake amapayipi amasha,” kusho uNksz Mathe.

Ngesikhathi ithimba leSolezwe limvakashele lafica isitamkoko sixhifika indle, iphunga liqandula ikhanda.

UNksz Mathe ophathwa yisifo sofuba wathi uyesaba ukuthi sebezogula nabantwana bakhe.

Muva nje amakhosi nabefundisi e-Eastern Cape bahlele imbizo yokudingida udaba lokudonsa kwezinkonzo zomngcwabo.

ZANELE MSOMI

‘UTHULI othulini, umhlabathi emhlabathini…”

Ajwayelekile la mazwi uma sekufike emaphethelweni enkonzo yomngcwabo.

Kwesinye isikhathi abanye basuke bengasenanhliziyo ngenxa yokudonsa komngcwabo, babodwa abasuke sebekhombisana amathuna ezihlobo, abanye bedla ingevu emabhasini.

Phela kuyenzeka umngcwabo uphele emva kokudonsa amahora ayisihlanu, abantu sebejahe emakhaya.

Abasuka kude badla bemile bephuthuma ukuthi kungaze kuhlwe besezintabeni.

Ngokujwayelekile inkonzo yomngcwabo iqala ekuseni ngezithuba zabo-9, kuya ngokuhluka kwezindawo.

Uhlelo luba nezikhulumi, umculo noMfundisi athathe isikhathi eshumayela, kwamanye amabandla kuze kubizwe ngisho abafuna ukuzinikela eNkosini.

Kuyedlulela uma kungcwatshwa umuntu omdala ngoba kunenkolelo yokuthi akumele aphume ukuya emathuneni engakashayi u-2 ntambama.

Muva nje amakhosi nabefundisi e-Eastern Cape bahlele imbizo yokudingida udaba lokudonsa kwezinkonzo zomngcwabo.

UBishop Makhosi Ngcoza weFlames of Fire Ministries obengomunye wabahleli, uthe akumele imingcwabo idonse ngaphezu kwamahora amabili.

“Ngeke ulindele ukuthi umuntu angahlala emngcwabeni kusukela ngo-9 ekuseni kuya ku-3 ntambama. Kumele lufingqwe uhlelo nezikhulumi. Indlela okwenzeka ngayo manje ngathi kuyajatshulwa,” kusho uNgcoza.

USihlalo wendlu yabaholi bendabuko, iNkosi Ngangomhlaba Matanzima, ithe kudala bekuba nezikhulumi ezintathu kuphela emngcwabeni, ochaza ngokufa, oduduza umndeni nobongayo.

UMatanzima ugxeke impucuko, imfundo nenkolo athi ifaka unyawo ohlelweni lomngcwabo.

Isolezwe lixoxe nabathize ukuthola ukuthi yini ebambezela umngcwabo nokuthi singancishiswa kanjani isikhathi.

UMnuz Madoda Zungu oyisazi sezamasiko uthi kusha lokhu okwenzeka emingcwabeni yamanje.

Uveza ukuthi emandulo umuntu ubengcwatshwa ntambama ngo-6 kwezinye izindawo kungcwatshwa entathakusa.

Uthi lokhu bekugwema nezindleko ngoba bekungaphekwa, umngcwabo ube mfishane.

Uthi okushintshe lolu hlelo yimpucuko nokuqhelelana ngokuhlala.

“Kubonakele ukuthi abantu sebenezihlobo nabangani abakude. Bekungeke kuzwakale kahle ukuthi izihlobo zifike emuva kwendaba sekungcwatshiwe,” echaza.

Ngokwesintu uthi izikhathi zisabalalulekile emngcwabeni futhi kuya ngezigaba zabantu.

UZungu uthi ngokwesintu umuntu ongaganile nongaganiwe usheshe angcwatshwe ngoba kuthathwa ngokuthi akunamidanti edingekayo.

Ulinganisa ngempohlo athi kumele ingcwatshwe ngo-11 emini njengengane.

Uthi ngumnumzane okungamele asheshe angcwatshwe njengoba ezindaweni eziningi kusalindwa ihora lesibili ntambama.

“Umnumzane ungcwatshwa sekubuye izinkomo ekhaya ngoba izimpande zakhe zigxilile. Yingakho ephelezelwa nayinkomo ehlatshwa entathakusa ngoba kwehlukile okwakhe,” kuchaza uZungu.

Uthi nomama womuzi ungcwatshwa emini kodwa hhayi ntambama kakhulu njengomnuzane.

Okwenza imingcwabo yamanje iphume esandleni uZungu uthi yisikhathi sokuqala.

Uthi amadoda ambayo afika ekuseni, aze aqede umngcwabo ungakapheli.

Ugxeka nabezenkolo athi bathola ithuba lokushelana ngokwezinhlelo zezinkonzo zabo.

“Ngokomthetho kumele kube nezikhulumi ezintathu zomndeni ngoba abanye basuke belitholile ithuba emlindelweni. Ezindaweni zamakhosi kunqunywa isikhathi ngoba amadoda endawo kusuke kumele aye nakwemiye imicimbi.”

Isolezwe lithole ukuthi kwezinye izindawo zamakhosi usaqinile umthetho wesikhathi somngcwabo.

Kubikwa ukuthi kwezinye izindawo uma inkonzo ithatha undendende amadoda ambayo ayaduba, basale bezigqibela abasele.

UMfu Zeblon Nxele we-Apostolic Church of Southern Africa uyavuma uthi kwesinye isikhathi amakholwa ayasidla isikhathi ngoba asuke ethole ithuba lokushumayeza abangayi emasontweni.

Nokho uthi ngumndeni owukhiye ngoba yiwo onquma isikhathi sohlelo futhi kuhlonishwa sona.

“Umndeni ubuye wandise uhlelo sekushuthekwa abanye abebengekho ohlelweni. Ngeke ungahlonishwa umndeni uma unqume isikhathi futhi kumele kube nokuxhumana nabambayo ukuze kungagcini abanye sebehluthuka,” kufingqa uNxele.

Ngenkathi uNkk Gladys Maphumulo egcina ukubona umfowabo uNdazana Nathaniel “Nat” Nakasa, kwakungenkathi ehamba esuka eThekwini ebabele eMelika ngo-1964.

INTATHELI YESOLEZWE

NGENKATHI uNkk Gladys Maphumulo (73) egcina ukubona umfowabo uNdazana Nathaniel “Nat” Nakasa, kwakungenkathi ehamba esuka eThekwini ebabele eMelika ngo-1964.

“Ngaleso sikhathi ngangingazi lutho ngezikhumulo zezindiza, ngafika sekudlule isikhathi ukuzomvalelisa esekhwelile endizeni,” kukhumbula uNkk Maphumulo.

Akakwazanga ukuvalelisa kumfowabo, wayembonela kude esengaphakathi ebhanoyini emthathazela ngesandla ephethe neduku elimhlophe.

UNakasa owayeyintatheli eyayidumile ngezikhathi zobandlululo futhi owasungula iphephabhuku iClassic, wafulathela iNingizimu Afrika ngoba ethole umfundaze eHarvard University obizwa ngeNieman Fellowship, awuthola ngenxa yamagalelo akhe kwezobuntatheli.

“Wayebhala kahle kakhulu. Wayefuna njalo ukuvundulula izinto futhi ehlale ebhala okuyiqiniso,” kusho uNkk Maphumulo.

UNakasa wayebhalela iphephandaba Ilanga eThekwini ngaphambi kokuthi afudukele eGoli lapho ajoyina khona iPost wagcina esekwiphephabhuku iDrum waphinde wabhalela nephephandaba iRand Daily Mail.

UNkk Maphumulo uthi uNakasa wayesephothule wonke amalungiselelo akhe okulibangisa eMelika kodwa kwathi ngaphambi kokuthi ahambe, incwadi yakhe yokuhambela amazwe (passport) yangagunyazwa ukuthi ahambe.

“Uhulumeni wawusaba ukuthi uNat uzofike awumbule izinqe emazweni.”

Ngenxa yokuthi wayesephokophele ukuhamba, uNakasa wathatha isinqumo sokuqhubeka nohambo ngaphandle kwemvume.

“UNat watshela ubaba ukuthi uyobuya mhla sonke sesikhululekile.”

Kodwa akabange esabuya.

Ngonyaka olandelayo wazibulala ngoba edliwa wumzwangedwa wokukhumbula ekhaya, wayeneminyaka engu-28.

Sekuphele iminyaka engu-48 kwenzeka lokhu kepha yima uNkk Maphumulo ezokhululeka njengoba uhulumeni waKwaZulu-Natal usufake isicelo sokubuyisa amathambo akhe ukuzongcwatshelwa kulesi sifundazwe.

“Kuzokhululeka wonke umndeni futhi lokhu kuzosisiza nokupholisa izinhlungu,” kusho uNkk Maphumulo, ohlala eMlazi kodwa owakhulela eChesterville naye uNakasa.

Okhulumela uhulumeni waKwaZulu-Natal, uMnuz Cyril Madlala, uthe banethemba lokuthi bazokwazi ukubuyisa amathambo kaNakasa ungakapheli unyaka yize noma lokhu kunemicikilisho eminingi.

Iziphathimandla zaseKZN, nezehhovisi lenxusa lakuleli eMelika zahlangana neziphathimandla zaseMelika ukuqala izinhlelo zokuthola imvume yokubuyisa amathambo kaNakasa.

Esitatimendeni esikhishwe nguNdunankulu waseKZN uDkt Zweli Mkhize, uNakasa uchazwe njengentatheli ehlonishwa emhlabeni jikelele ngenxa yomsebenzi wakhe oncomekayo ngezikhathi zobandlululo, yingakho kubalulekile ukuthi abuyiswe ekhaya.

“Ukuthi washona esemncane kwaba yishwa impela okwakungamele lenzeke. Ngeke sizakwazi nokho ukubuyela kokubi okwenzeka kudala kodwa singambuyisa uNakasa ukuzophumula ekhaya.”

Uma esebuyile uzongcwatshwa emathuneni iHeroes’ Acre, eMgungundlovu.

Abantu baseHambanathi oThongathi bathi kubathusile ukuthi kuboshwe umuntu abebehlala naye endaweni ngamacala okubulawa kwabesifazane abathathu.

BAWINILE NGCOBO

ABANTU baseHambanathi oThongathi bathi kubathusile ukuthi kuboshwe umuntu abebehlala naye endaweni, futhi bemazi njengegcokama lensizwa, ngamacala okubulawa kwabesifazane abathathu izidumbu zabo ezitholwe kule ndawo namaphethelo ezinyangeni ezimbili ezedlule.

Abantu abebeze ecaleni losolwa ngokuba ngumalugaju, uMnuz Simphiwe Gift Khoza (36), eNkantolo eVerulam izolo bathi bebezitshela ukuthi umuntu wakude obenza le mihlola bashaqeka sebethola ukuthi umuntu wasendaweni abamazi njengobhuti ozithandayo.

Ilungu lomphakathi, uNksz Zanele Chili, lithe umphakathi awukakholwa ukuthi umsolwa obengcolisa indawo yabo ngala macala ubeyisakhamuzi sakuleli lokishi.

“Thina besizitshela ukuthi wumuntu wakwenye indawo obezogila imikhuba endaweni yethu,” kusho uNksz Chili.

Uthe ushaqekile ngoba umsolwa ubebonakala eyincwasimende yomuntu kungekho okusolisayo ngaye.

“Bengingasondelene naye kodwa bengijwayele ukumbona emgwaqweni engubhuti nje ozithandayo. Ngisho abantu abebemjwayele bephuza naye uma bekhuluma ematekisini bathi bayoze bakholwe ukuthi nguye ngempela uma sebembona enkantolo ngesonto elizayo,” kusho uNksz Chili.

Abantu besifazane, abanye babo abangamalungu e-ANC Womens League eNorthern Region, bebebhikisha ngaphandle kwenkantolo ngesikhathi kuvele umsolwa.

Bathi akumele anikwe ibheyili ngoba akakufanele ukuba semphakathini.

Ilungu le-ANC Womens League, uNkk Nadia Phiri, lithe bebekhathazekile ngokuthi uma engabanjwa usazolokhu eqhubeka nokubulala abantu besifazane.

“Njengoba esebanjiwe nje sizothi inkantolo ayingalinge imnike ibheyili ngoba akakufanele ukuphila phakathi kwabantu umuntu obulala abesifazane,” kusho uNkk Phiri.

Uthe ngesonto elizayo uma esebuyela enkantolo bazofika ngobuningi babo ukuzophikisana nesicelo sebheyili.

UKhoza uvele kafushane enkantolo icala lakhe lahlehliselwa uJulayi 30 nonyaka ukuze kuqhubeke uphenyo.

Ngesikhathi evela ufundelwe amacala abekwe wona okungamathathu okubulala.

Usolwa ngokubulala oNksz Phindile Ndlovu (42) noNksz Philisiwe Hlatshwayo (44) kanye nowesifazane okungakaziwa ukuthi ungubani.

Uphinde wabekwa icala lokubamba uNksz Hlatshwayo inkunzi esebenzisa isihluku wabekwa namacala amane okumebela njengoba athatha amaselula, amakhadi asebhange nemali kuyena. Umbuso uthe uyaphikisana nesicelo sebheyili.

UKhoza uboshwe ePort Elizabeth ngeSonto entathakusa emuva kokuthi amaphoyisa abesenesikhathi emfuna.

Amaphoyisa abesiqaphe ngeso lokhozi isimo ngaphakathi nangaphandle kwenkantolo ebekuvele kuyona uKhoza.

Esehamba ubefakwe ekhumbini yamaphoyisa ebigcwele amaphoyisa ehleli phakathi kwawo. Le moto ibiphelezelwa ngezinye ezintathu, eyodwa ihamba phambili ezimbili ziyilandela ngemuva.

Kuboshwe indoda emuva kokuba amaphoyisa evundulule inqwaba yensangu eBosworth Reserve, eNewcastle.

NOKUBONGWA PHENYANE

Kuboshwe indoda (31) emuva kokuba amaphoyisa evundulule inqwaba yensangu endaweni okukholakala ukuthi isiyisidleke sayo, eBosworth Reserve, eNewcastle.

Amaphoyisa akule ndawo athe kusenzima ukugagula intengo yensangu etholwe isongwe ngocwazi abancane kanti kusolwa ukuthi ibisilungele ukuyodayiswa.

Amaphoyisa alunywe indlebe ngale ndawo, afike abopha umnikazi wayo oficwe eyilungisa enye ingakafakwa kocwazi kodwa isesemabhakedeni.

Ngokuthola ngephoyisa elingagunyaziwe ukukhuluma nabezindaba, inkulu inkinga yezidakamizwa kuleya ndawo ngoba baningi abantu abadayisa ngensangu kuyo.

“Sibe sesihlangana nabantu ukuthi basisize ukuze sikwazi ukuthola umsolwa. Sitholile ukuthi ukhona sanikela khona nokuthe uma sifika sathola inqwaba okunzima ukusho ukuthi ngeyamalini kodwa bekukhona ocwazi esisola ukuthi insangu ebiphakathi kubo ilinganiselwa ku-R15 000,” kusho iphoyisa.

Okhulumela amaphoyisa KwaZulu-Natal uColonel Vincent Mdunge ukuqinisekisile ukuboshwa kwalo msolwa nathe uzovela enkantolo namhlanje ebhekene necala lokutholakala nensangu.

Khonamanjalo, kuboshwe indoda eneminyaka ewu-46 yaseNigeria eNewcastle etholwe ne-cocaine.

Kuthiwa amaphoyisa alunywe indlebe ngale ndoda obekuthiwa ibidayisa izidakamizwa isidana.

Amaphoyisa kuthiwa abe esezama ukuyilandela le ndoda ebihamba isuka eNewcastle iya eMadadeni ngetekisi iyodayisa zona izidakamizwa.

UMdunge uthe uMnuz Ajoku Emeka Mike uvelile enkantolo izolo ngecala lokutholakala nezidakamizwa.

Icala lihlehle u-Agasti 14 kanti umsolwa usagqunywe esitokisini.

U-Advocate Thuli Madonsela uzovela ekomitini mayelana nezinsolo zokuxhashazwa kwemali ehhovisi lakhe.

INTATHELI YESOLEZWE

UMVIKELI woMphakathi u-Advocate Thuli Madonsela uzovela ekomitini lePhalamende ngoLwesihlanu oluzayo mayelana nezinsolo zokuxhashazwa kwemali ehhovisi lakhe.

NgoLwesibili amalungu ePhalamende enze uhla lwezikhalo u-Adv Madonsela okumele aphekwe ngemibuzo maqondana nazo.

Ikomiti elibhekelene nobulungiswa ePhalamende selihlanganile ukudingida indlela okuzobhekwana ngayo nalezi zikhalo.

Kuthiwa uxhaxha lwezikhalo lufakwe ngamalungu ePhalamende angadalulwanga amagama.

U-Adv Madonsela kulindeleke ukuthi aphinde aphendule nangezinsolo okuthiwa zithinta uNksz Mamiki Shai obeyiphini lakhe.

USihlalo wekomiti uMnuz Llewellyn Landers uthe phakathi kwezinsolo u-Adv Madonsela okumele aphendule ngazo, kubalwa ukungalandeli imigomo yokuvakasha phesheya kwabasebenzi behhovisi lakhe.

Uthe akucaci nangemigomo yokusebenza kwezinye izikhulu ehhovisi lakhe.

Uveze nokuthi kukhalwa ngokungeneli kwezinsiza-kusebenza ehhovisi nokungaqondi kokusebenza kwemali. Incwadi enohla lwezikhalo izothunyelwa ku-Adv Madonsela kuleli sonto ukuze azilungiselele ukuvela ekomitini.

Emuva kokuvela kwezinsolo kuvele namanye amalungu nawo azwakalise ukungenami ngokusebenza kwehhovisi lika-Adv Madonsela. Elinye lawo nguNkk Debbie Schafer weDemocratic Alliance. Uthe akaze akuthakasele ukuqokwa kukaMnuz Themba Mthethwa obeyiChief Executive Officer ehhovisi lika-Adv Madonsela, okumanje uphenywa ngamaphoyisa.

Uthe uMthethwa wayexoshiwe kwaSalga kodwa akazange akuveze lokhu. U-Adv Madonsela usolwa ngokumvikela uMthethwa.

ISasco isinxuse uKhongolose ukuthi ubhukule usebenze kakhudlwana ngoba abafundi bafuna ukufunda bhusende emanyuvesi.

MHLENGI SHANGASE

INHLANGANO yabafundi, iSouth African Students’ Congress (Sasco), isinxuse uKhongolose ukuthi ubhukule usebenze kakhudlwana ngoba abafundi bafuna ukufunda bhusende emanyuvesi.

Le nhlangano edlelana ne-ANC ithi, isakujabulela ukuphathwa nguKhongolose futhi izowuvotela ngonyaka ozayo kodwa bafuna ukuthi leli phupho lemfundo yamahhala lifezeke.

Izolo abafundi bamashe ezifundazweni befuna leli phupho lifezeke. Namhlanje kunokhukhulelangoqo wemashi ebheke kuNgqongqoshe weMfundo ePhakeme, uDkt Blade Nzimande. Imashi yeSasco KwaZulu-Natal ibiseMgungundlovu.

USihlalo weSasco KwaZulu-Natal, uMnuz Mfanafuthi Ngcobo, uthe ngala mamashi bafuna lifezeke leli phupho lemfundo yamahhala.

Uthe yize i-ANC iwakhile amakolishi amasha ama-Further Education and Training, namanyuvesi amabili azokwakhiwa kuleli kodwa basafuna kuphuculwe nengqalasizinda emanyuvesi.

“Sifuna kungagcini nje ngokuba yiphupho indaba yemfundo yamahhala kodwa kube yinto ezokwenzeka. Yize umfundi owenza unyaka wesithathu ephase kahle uma efundiswa yi-NSFAS (National Students’ Financial Aid Scheme) lowo nyaka engawukhokheli kodwa sithi lokhu akwenele. Sifuna ukuthi umfundi abhekelelwe engena nje enyuvesi, kungabhekwa ngoba esephuma,” usho kanje.

Uthe nezindawo zokuhlala ziyashoda ezikhungweni zemfundo bafuna kwakhiwe ezintsha ngoba uma kungenzeki iziteleka ziyohlezi zikhona.

“Njalo uma kuqala unyaka kuba nemibhikisho ikakhulu ngezindawo zokuhlala ngoba abafundi basuke bengondingasithebeni bengazi bazohlalaphi. Sifuna ukuthi kwakhiwe ama-students’ village ukuze iphele le nkinga yokuswela indawo,” kuqhuba uNgcobo.

Uthe nendaba yokungabikhona kwemitholampilo, ukushoda kwamakhompyutha ngenye yezinto okumele ilungiswe ngokushesha.

Uqhube wathi uthola abafundi ababalelwa ku-10 000 besebenzisa amakhompuyutha angu-300 okuyinto ebalimaza kakhulu.

Okhulumela uMnyango weMfundo ePhakeme, uNksz Manana Makhanya, uthe bazwile ukuthi abafundi bamashela imfundo yamahhala wathi bazokwazi ukuphawula kahle uma sebethole uhlu lwezikhalo abazoluletha eMnyangweni.

Namhlanje ePitoli, uMengameli Jacob Zuma noNzimande banesithangami nabezindaba lapho bezokhuluma ngamanyuvesi amabili amasha azokwakhiwa eMpumalanga naseNorthern Cape.

Kufakaze udokotela ohlola izidumbu ozimele ecaleni elibhekene noNkk Thandi Maqubela lokubulawa komyeni wakhe.

KUFAKAZE udokotela ohlola izidumbu ozimele ecaleni elibhekene noNkk Thandi Maqubela lokubulawa komyeni wakhe, iJaji Patrick Maqubela. Icala liqhubeka eNkantolo eNkulu yasePitoli.

USolwazi Gert Saayman, ohola ithimba leForensic Medicine e-University of Pretoria, wethule ubufakazi emele uNkk Maqubela nosomabhizinisi asolwa naye, uMnuz Vela Mabena. Bobabili babhekene necala lokubulala.

Ngesikhathi kugcina ukulalelwa kwecala ngo-Ephreli, uSaayman wathi ngeke kuphikiswe ukuthi ijaji lashona ngendlela ejwayelekile.

“Anginawo amandla okunquma ukushiya eceleni ukuthi wazishonela. Ngeke kuzitshwe,” washo kanje uSaayman.

Nayizolo uqhubekile nokugcizelela lokho.

Ijaji latholwa lishonile embhedeni emzini walo eBantry Bay ngoJuni 5, 2009.

UNkk Maqubela nasolwa naye bayawaphika amacala.

UNkk Maqubela uphika nokuthi wakokotela ukusayi-na komyeni wakhe encwadini yamafa. – Intatheli yeSolezwe

Uchazwenjengomuntu obezithobile nothanda ukusiza abantu iJaji Pius Langa, odlule emhlabeni.

CELANI SIKHAKHANE

UCHAZWE njengomuntu obezithobile, enomoya ophansi, ohlakaniphile nothanda ukusiza abantu owayeyiNhloko yamaJaji kuleli, iJaji Pius Langa, odlule emhlabeni izolo ngemuva kokugula isikhashana.

Abangani bakhe nomndeni bamchaze njengomuntu obengaziphakamisi futhi engakukhonzile ukuzigqamisa ngomsebenzi wakhe kodwa obehlale enentshisekelo yokusiza abantu, ethanda nomndeni wakhe.

Omunye wabangani bakaLanga, iJaji uVuka Tshabalala, utshele Isolezwe ukuthi uLanga indlela abehlakaniphe ngayo yiyo emenze izikhundla zazizela kuye nokwaba yimbangela yokuthi avele aqokelwe enkantolo yoMthethosisekelo engazange asebenze eNkantolo ePhakeme. “Ngaphandle kwalokho udlale indima enkulu esiza abantu ababebhekene namacala obandlululo ezinyunyaneni nakwezinye izinhlaka zezombusazwe. Abanye babo ngu-Advocate Griffiths Mxenge owayeboshwa amaphoyisa umbuso wobandlululo ngesikhathi elwela amalungelo abantu,” kusho uTshabalala.

Uqhube wathi ukuhlakanipha kwakhe kwaba yimbangela yokuthi izinhlangano zabameli zimkhethele isikhundla sokuhola inhlangano yabammeli iNational Democratic Lawyers (NADEL).

Uthe uLanga wafikela kuye ukuzoba yi-Advocate nalapho kwakufanele asebenze izinyanga eziyisithupha engaholi kodwa wakhombisa okukhulu ukuzimisela .

IJaji, uThembile Skweyiya, lichaze uLanga njengomuntu obezithobile ekhulumela phansi kodwa ehlakaniphile futhi engakuthandi ukuphatha abanye abantu kabi.

Uthe yize ebenezikhundla eziningi ezibalulekile kodwa konke lokho ubengakubekile ekhanda, engababukeli abanye abantu phansi.

Okunye okuhlalukayo ngaye wukuthi ungumuntu obemthanda umkakhe ongasekho nokungenye yezinto okuthiwa zamhlukumeza kakhulu emoyeni ngesikhathi edlula emhlabeni ngo-2009.

Umfowabo weJaji uLanga, uMnuz Mandla Langa, uthe ubengumuntu obenokuthula nobethanda kube nobumbano emndenini.

Uthe ukuthanda kwakhe ukusiza umphakathi yikho okwaholela ekutheni agcine esengene kwezomthetho njengoba nakhona ayeneqhaza elikhulu ekusizeni laba ababebhekene namacala obandlululo.

UJaji Pius Nkonzo Langa wazalelwa eBushbuckridge, eMpumalanga, ngo-1939, ekukhuleni kwakhe wabe esefudukela e-KZN nomndeni wakhe bafike bakha eStanger nokwathi ngokuhamba kwesikhathi bathuthela KwaMashu kwa-G.

Uqede isikole ngo-1957 wasebenza efemini ethunga amahembe futhi wake waba ngutolika kanjalo ne-messenger yenkantolo ngaphambi kokuyofundela ubummeli nokwakuyiphupho lakhe esakhula.

Wayekhona ezingxoxweni zeCodesa ezaba ngaphambi kuka-1994 ezazihlanganisa amaqembu ehlukene akuleli ezombusazwe.

Usebenze nabantu abaningi abahlonishwayo kwezomthetho okubalwa iJaji Athur Chaskalson elingasekho, iJaji Ntsikelelo Poswa, Kenneth Mthiyane, Zak Yacoob namanye.

Ngo-1977 waba yi-Advocate eSupreme Court, ngo-1994 waba yiSenior Council eNatal Bar, ngawo u-1994 waqokelwa enkantolo yoMthethosisekelo namanye amaJaji bengu-10 baba abokuqala ngemuva kohulumeni wobandlululo ukuba ngamaJaji akule nkantolo .

Ngo-1997 waba yiPhini likaMengameli wamaJaji, ngo-2001 waba yiPhini leNhloko yamaJaji, ngo-2005 waqokelwa esikhundleni sokuba yiNhloko yamaJaji waze wathatha umhlalaphansi ngo-2009.

Ngemuva kwalokho uqokelwe kwesokuba nguSihlalo weKhomishini yamaJaji.

Akagcinanga lapho, ube eseqokelwa ezinhlakeni eziningi ezahlukene lapho iqhaza lakhe belilokhu libonakala yize ebesathatha umhlalaphansi.

Ushiye emhlabeni izingane eziyisithupha nenqwaba yabazukulu. Ubeneziqu ze-LLB ne-B.Juris zase-Unisa.

Akucaci ukuthi uzibulaleleni uthisha waseMqhawe Secondary.

SIMPHIWE NGUBANE

AKUCACI ukuthi uzibulaleleni uthisha waseMqhawe Secondary otholakale elenga ngentambo kubo eSikebheni, eNanda ngoLwesibili.

Izolo ithimba leSolezwe linikele kulesi sikole kodwa lihlangabezane nembibizane njengoba othisha baso bale uhasha bengayingeni eyokuphawula ngokufa kukaMnuz Nhlanhla Xulu (29).

Ngisho iphini likathishanhloko kulesi sikole elingazidalulanga igama lalo lithe umthetho olawula indlela abasebenza ngayo uyabavimbela ekutheni badalule imininingwane ngokufa kukaXulu ngoba isigameko asenzekanga esikoleni.

Abazange bafune ngisho ukusho ukuthi umufi ubehlala kuphi bethi okungenani asixhumane namaphoyisa.

Izolo ukufunda nokufundisa bekuqhubeka ngendlela eyejwayelekile kulesi sikole.

Okhulumela amaphoyisa KwaZulu-Natal uColone Vincent Mdunge, uthe kuvulwe idokodo ngokufa kukaXulu.

Uthe utholakale elenga ngentambo eplangweni lophahla lomuzi wakubo.

“Amaphoyisa aseNanda ayaqhubeka nophenyo ngalesi sigameko,” kusho uMdunge.

Unina kaXulu, uNksz Ntombi Xulu utshele intatheli ocingweni ukuthi bewumndeni kabafuni ukukhuluma ngalolu daba ngoba bona bashonelwe umntwana wabo.

Uthe akasiboni isidingo sokuba intatheli ize kwakhe ngoba abafuni udaba lushicilelwe ephephandabeni.

Izongcwatshwa ngeSonto intombazane yaseNtuzuma eyatholakala isingamathambo.

NONHLANHLA MKHABELA

IZONGCWATSHWA ngeSonto intombazane yaseNtuzuma eyatholakala isingamathambo enkundleni yezemidlalo KwaMashu esigcemeni sakwa-C ezinyangeni ezimbili ezedlule.

UThulisile Wendy Dlamini (19) owayenza izifundo zikagesi eMbilo waduka kubo ngoFebhuwari eyofunda nabangani bakhe waze watholakala ngoMeyi enkundleni yezemidlalo esengamathambo.

Unina uNkk Angela Dlamini uthe bebelokhu belinde imiphumela yokuhlolwa kwamathambo akhe ukuqinisekisa ukuthi nguyena ngempela abamthole ngesonto eledlule.

“Kubuhlungu ukuthola ukuthi nguyena, bengisenethemba lokuthi kuzothiwa akuyena siqhubeke nokufuna sigcine simtholile ephila kodwa akusenani ngoba imiphumela iyilokhu eyikhona ngeke siyishintshe,” kusho uNkk Dlamini.

Umndeni kaThulisile waze wasizwa yizingubo ayezigqokile nesikhwama ayesiphethe ukuthi umkhombe njengoba lokhu kwatholakala kuhleli eduze kwamathambo akhe .

UThulisile uzophumela ebandleni laseSheshi abekhonza kulona, iSt Saviours, eNtuzuma ayobekwa emathuneni aseTafuleni, inkonzo yokumkhipha ingo-11 ekuseni.

Unina uthe basaxhumene namaphoyisa, ukugcina kwakhe ukukhuluma nawo athe azobheka ukuthi umalugaju wasoThongathi osanda kubanjwa akathinteki yini nasekubulaweni kukaThulisile namanye amacala.

Umphakathi waKwaMashu uke waphila ngokwesaba kulandela ukutholakala kwezinye izidumbu ezintathu zabesifazane kuleli lokishi.

Usemisiwe emsebenzini umshushisi osolwa ngokugwazisa umuntu u-R1 000 emthembisa ukuthi ngeke aze athathwe izinsalela zeminwe yakhe uma eselahlwe yicala.

BAWINILE NGCOBO

USEMISIWE emsebenzini umshushisi waseThekwini ongaphandle ngebheyili osolwa ngokugwazisa umuntu u-R1 000 emthembisa ukuthi ngeke aze athathwe izinsalela zeminwe yakhe uma eselahlwe yicala.

Icala likaNksz Phumzile Msimango (33) lihlehliswe engekho eNkantolo yeMantshi eThekwini ngoba kuthiwa uhlaselwe wukugula okuhambisana nokhwantalala.

Okhulumela iNational Prosecuting Authority, uNksz Natasha Ramkisson, ukuqinisekisile ukuthi uNksz Msimango umisiwe emsebenzini ngoba kusaqhubeka uphenyo lwangaphakathi.

Enkantolo ummeli kaNksz Msimango, uMnuz Clinton Short, uthe uNksz Msimango ubekhona enkantolo ekuseni kodwa wavele waxinwa ukugula okuhambisana nokhwantalala, kwadingeka ukuthi aye kwadokotela.

Utshele inkantolo ukuthi uNksz Msimango uthe akazizwa kahle ngakho-ke uzofika nencwadi kadokotela uma icala selibuyela enkantolo.

UShort uqinisekisile ukuthi uNksz Msimango wanikwa futhi wasayina incwadi emazisa ngokumiswa kwakhe emsebenzini.

Kule nkantolo kuvele ukuthi asengeziwe amacala abhekene noNksz Msimango yize kungacaciswanga ukuthi asemangaki.

Umshushisi u-Advocate Barend Groen ucele inkantolo ukuthi yengeze imibandela yebheyili kaNksz Msimango njengoba esemisiwe nasemsebenzini.

Uthe uNksz Msimango kumele agweme ngayo yonke indlela ukugxambukela nokuphazamisa uphenyo.

Akufanele asondele ezakhiweni ze-NPA ngaphandle kwemvume futhi akavumelekile ukuxhumana nabasebenzi be-NPA.

UNksz Msimango ongaphandle ngebheyili ka-R10 000 kuvele ukuthi ubenokwesaba ukuthi angase aphinde aboshwe ngoba kunamanye amacala asengeziwe kuleli abeboshelwe lona.

Icala lihlehliselwe u-Agasti 8 nonyaka.

Inhlangano yakuleli i-Equal Education isigxeke umholi weDA ngokuncoma uNkk Angie Motshekga.

INTATHELI YESOLEZWE

INHLANGANO yakuleli i-Equal Education isigxeke umholi weDemocratic Alliance (DA), uNkk Helen Zille, ngokuncoma uNgqongqoshe wezeMfundo eyiSisekelo, uNkk Angie Motshekga.

I-Equal Education ithi amaphuzu kaZille okuncoma uMotshekga ashaya eceleni futhi adukisa umphakathi.

UZille usanda kuvikela uMotshekga emcimbini weDA eGoli. Amaphephandaba angempelasonto ashicilele umbono obhalwe nguZille echoma uphaphe uMotshekga ngomsebenzi wakhe kwezemfundo. Uthe uyifezile imisebenzi abekelwe yona futhi ubashiya kude abanye ozakwabo.

“Uyaziqonda izimo zangempela ezibhekene nezikole. Ngenxa yalokho uzama ngawo wonke amandla ukwakha imigomo nezindlela zokwenza ukuthi kusebenzeke. Lokho nje kukodwa kukhombisa inqubekela phambili eMnyangweni wezeMfundo,” kusho yena.

Inhlangano egxeka uZille ithi maningi amaphutha kulo mbono awubhalile. Iyaphika ukuthi uMnyango wezokuGcinwa kwaMafa awuzange weseke imigomo nezindlela zokuthuthukisa izingqalasizinga ezikoleni.

Esitatimendeni sakhe uZille uthe abanye bagcina ngokubeka imigomo kodwa bahluleka wukuletha izidingo ezifanele kwezengqalasizinda.

I-Equal Education izishaya isifuba ngokuthi yenza konke okusemandleni ukuletha intuthuko ezikoleni.

“Yithina esihlala sigcizelela ukuthi kube khona imitapo yolwazi, izindawo zamakhompyutha ezikoleni. Siyakugcizelela nokuba khona kwamanzi, ugesi, izindlu zangasese nokubiywa kwezikole,” kuchaza le nhlangano.

Ihhovisi likaZille lithembise ukulungisa impendulo emuva kokugxekwa kwakhe.

UMnuz Doron Isaacs onguNobhala we-Equal Education naye ubhale komunye umthombo wezindaba eveza ukuthi akamangali ukuthi uZille ancome uMotshekga.

Uthe esinye sezizathu esenze uZille ancome uMotshekga wukuthi usaba amandla nemisebenzi ekhonjiswa yi-Equal Education.

Uthe uZille uzama nokuzicoshela amaphuzu ezinyunyanyeni zothisha nakwi-ANC.

UNobhala weSouth African Democratic Teachers Union (Sadtu) akatholakalanga ukuba aphawule. Umkhulumeli wakhe, uNksz Nomusa Cembi, uthe uMaluleke uyishaye indiva inkulumo kaZille ngoba vele uzama ukuzenza muhle kuMotshekga nokuzicoshela amaphuzu ezepolitiki.

UMnuz Panyaza Lesufi okhulumela ungqongqoshe, uthe uZille akaqali ukuvikela uMotshekga.

“Lona nguyena ngqongqoshe okuqondayo ukufundisa ngoba uke waba nguthisha. Kungokokuqala ukuthi sibe nomuntu oyiqondayo impilo yasekilasini,” kusho uLesufi.

Kwenzeka lokhu nje noMengameli Jacob Zuma ngenyanga edlule uncome uMotshekga ethi uwenza kahle umsebenzi wakhe yize zikhona izingqinamba eMnyangweni wakhe.