Abagxeka uMnuz Pravin Gordhan ngokufaka u-R167.5 billion wesabelo mali sakhe kwezempesheni kumele bahlale phansi bavale umlomo.

BONISWA MOHALE

ABAGXEKA uNgqongqoshe wezeziMali uMnuz Pravin Gordhan ngokufaka u-R167.5 billion wesabelo mali sakhe kwezempesheni kumele bahlale phansi bavale umlomo.

Zisho kanje izazi zomnotho izolo ngesikhathi kucutshungulwa isabelo mali sikaGordhan emcimbini wakwa-PricewaterhouseCoopers (PwC) obuse-Mhlanga Ridge, eThekwini.

UDkt Roelof Botha oyisazi somnotho esizimele utshele ithimba leSolezwe ukuthi uhulumeni kumele abanike imali abantu abangasebenzi ngoba iyabasiza ukuba baphile futhi ngaphandle kwezibonelelo zakhe miningi imindeni ebizolala ilambile.

“Ngiyisazi somnotho, ngiye ngixakeke uma abantu begxeka ukunyuswa kwesibolelo sezingane (iqolo). Le mali ayigqugquzeli ukukhulelwa kwamantombazane kodwa isiza imindeni eminingi ukuba ilale idlile nezingane zikwazi ukuya esikoleni. Abantu abagxeka uhulumeni basuke bengalwenzanga ucwaningo ngoba u-60% wabafundi abaphase u-matric ngonyaka odlule bebesizwa yisibonelelo sikahulumeni esidume ngokuthi yiqolo,” kusho uBotha.

Amazwi akhe enanelwe nguMnuz Isaac Matshego oyisazi somnotho sakwa-Nedbank othe abangakwazi ukusebenza kumele bazithole izibonelelo zikahulumeni ngoba akumele kube nemindeni elala ingadlile.

UDkt Botha uthe iNingizimu Afrika akumele ikleliswe kabi emuva kwesabelo mali sangoLwesithathu ngoba kukhombisa ngokusobala ukuthi izwe lizimisele ngokuthuthukisa umnotho.

“Uma izinhlangano eziklelisa amazwe ngokomnotho zike zehlisa iNingizimu Afrika emsileni ngizozibhalela ngizibuze ukuthi ziwenza kanjani umsebenzi wazo. Asifani ne-Greece thina, sinezinhlelo zokukhokha izikweletu nokunciphisa imali esiyimoshayo. Uma sikwazi ukuba no-R1.4 trillion lokhu kukhombisa ngokusobala ukuthi siyakwazi ukuhlela umnotho wethu. Okudingekayo manje wukuthi uhulumeni ubophe izifociya, uyeke ukubhubhudla imali emaholweni abasebenzi,”kusho uBotha.

Mayelana nenkampani yamabhanoyi ehlale itakulwa njalo i-South African Airways (SAA) uBotha uthe uyajabula ukuthi uhulumeni ukucacisile ukuthi ngeke kusebenzeka lokhu kunalokho kumele izikhulu zayo zakhe ubudlelwano nezinkampani ezizimele uma zidinga imali.

Ugqugquzele abantu ukuba bangaphatheki kabi ngokuwa kweRandi kwazise izimayini ziyahlomula uma liphansi.

“Uma iRandi liphansi izimbiwa zethu zithengwa ngemali eshisiwe emazweni aphesheya kanti uma linamandla kusho ukuthi isuke ishibhile. Izivakashi ezisuka kwamanye amazwe ziyakwazi ukuchitha imali eningi eSA uma iRandi lethu liphansi ngoba kuyashibha ukuza eNingizimu Afrika. Ukuwa kweRandi akukubi kuyo yonke imikhakha, okwamanje kumele samukele lokhu okwenzekayo,” kusho uDkt Botha.

UMnuz Sizwe Nxedlana ongusomnotho wakwa-FNB uthe balindele ukuthi umnotho ukhule ngo-1.7% kulo nyaka, bayethemba ukuthi iNingizimu Afrika ngeke ikleliswe kabi njengo-Brazil asebeyibambe emsileni kumazwe aziphethe kahle kwezomnotho.

Iyashuba eyesiteleka sabasebenzi baseNyuvesi yaKwaZulu-Natal (UKZN) okuthe izolo babhekisa phezulu imoto yonogada befuna kuqedwe eyokuqashwa kwabasebenzi betoho.

MHLENGI SHANGASE

IYASHUBA eyesiteleka sabasebenzi baseNyuvesi yaKwaZulu-Natal (UKZN) okuthe izolo babhekisa phezulu imoto yonogada befuna kuqedwe eyokuqashwa kwabasebenzi betoho.

Bekungangeneki emgwaqweni oya ophikweni lwaseWestville kwadingeka ukuthi abasebenzi nabafundi basebenzise ezinye izintuba.

Ukufunda kuyaqhubeka kule nyuvesi esithole incwadi yokugcina yenkantolo evimbela abasebenzi ukuthi bateleke.

Okhulumela inyuvesi, uMnuz Lesiba Seshoka, uthe isiteleka esingekho emthethweni sibe nodlame eWestville.

Uthe omunye wabasebenzi benkampani yonogada obekumele aphume izolo ekuseni emsebenzini ungenele lesi siteleka wavimbela abanye abasebenzi abebezongena.

“Kucekelwe phansi enye yezimoto zonogada kwalimala ababili abagcine ngokwelashwa. Isimo sishubile kodwa siyalawuleka. Ukufunda kuyaqhubeka kwezinye izikhungo akukho kuphazamiseka okubikiwe. Inyuvesi ithole incwadi yenkantolo enkulu yokugcina evimbela ukuthi kutelekwe,” usho kanje.

Uthe le ncwadi ivimbela ukucekelwa phansi kwempahla iphinde ibalule ezokuphepha kwabasebenzi nabafundi.

“Siyalihlonipha ilungelo lokuteleka kodwa akumele kuthunazwe ilungelo lalabo abangafuni ukuzibandakanya nombhikisho abafuna ukufunda nokusebenza. Sisiqaphile isimo, sitshale nonogada abazimele ukuze kuqinisekiswe ukuthi kunokuthula,” usho kanje.

Abasebenzi abahlanza inyuvesi, abenza ingadi, onogada abayitoho nalabo abangaqashiwe bangenele umbhikisho befuna ukuqashwa ngokugcwele.

Bafuna ukuqashwa ngokugcwele njengabanye ozakwabo kanti bakhala ngokuthi inyuvesi ichitha enkulu imali ekubeni izinkampani ezibaqashile zibanika amakinati.

Umbhikisho wabasebenzi abayitoho emanyuvesi ukapakele nakwamanye amanyuvesi kuleli.

Okhulumela amaphoyisa, uMajor Thulani Zwane, uthe amaphoyisa ophiko olubhekela udlame emphakathini asiqaphile isimo kule nyuvesi.

Uthe akukaboshwa muntu kulandela lo mbhikisho.

Kuzophela izinyanga ezintathu sekukhona akukhiphayo mayelana nophenyo ngehostela laseMlazi iGlebelends, uMvikeli woMphakathi u-Advocate Thuli Madonsela.

LUNGI LANGA

KUZOPHELA izinyanga ezintathu sekukhona akukhiphayo mayelana nophenyo ngehostela laseMlazi iGlebelends, uMvikeli woMphakathi u-Advocate Thuli Madonsela.

Izolo utshele abezindaba ukuthi kuzophela izinyanga ezintathu sekukhona imininingwane abakwazi ukuyikhipha mayelana nophenyo ngendlela okwenzeke ngayo izinto eGlebelands.

U-Adv Madonsela nethimba lakhe okukhona kulo nephini lakhe u-Adv Sifiso Malunga, bavakashele kuleliya hostela izolo ukuyoxoxisana namalungu omphakathi.

Bese bebuyela okwesibili kuleliya hostela kwazise ngonyaka odlule baya khona ngemuva kokuthi ihhovisi lakhe lathola isicelo kwiCommonwealth Legal Education Association (Clea), eholwa nguSolwazi David McQuoid Mason.

Bekulindeleke ukuthi axoxisane namaqembu amabili abhekene ngeziqu zamehlo.

Bese kufanele ayoxoxisana nelakwaBlock 52 lapho obekuhlala khona uMnuz Bonga Hlophe naye obulawe ngonyaka odlule.

“Sizobonana nawo wonke amaqembu sizwe kuwona. Sesikhulumile neqembu elilodwa lakwaBlock R. Sizobe sesikhuluma nelakwaBlock 52. Uma senza uphenyo asijwayele ukuthi sikhiphe imininingwane yesikutholayo sisaphenya, ngakho akukuningi engingakusho (okwamanje),” kusho u-Adv Madonsela.

Ngesikhathi ekhuluma nabezindaba ubesakhulume nelilodwa leli lwakwaBlock R obekuhlala kulo uMnuz Bongani Mthembu obulawe ngonyaka odlule.

Uveze ukuthi leli qembu limbikele ukuthi kunohlu lwabantu abangu-21 okuthiwa bazobulawa.

“Siqale sabikelwa ngu(Nkk) Vanessa Burger ngohlu olunabantu abangu-21 okuthiwa bazobulawa. Labo esihlangane nabo kwaBlock R nabo basibikelile ngalokhu. Sicele amaphoyisa ukuthi kube nokwenziwayo ukuvikela labo abakulolu hlu,” kusho u-Adv Madonsela.

Uthe ezinye zezinto abakhale ngazo wukungasebenzi ngendlela kwamaphoyisa.

Uqhube wathi bekunezikhalo ngokususwa kophiko lwamaphoyisa iNational Intervention Unit (NIU). Uthe lolu phiko lubuye lwabuyiselwa kodwa kuhle abantu baqonde ukuthi ngeke luhlezi lukhona ngoba lusuke lubekwe endaweni isikhashana ukuqapha isimo kusanodweshu.

Uthe uma sekubonakala kunozinzo abe eseyasuswa.

U-Adv Madonsela uthe abakufuna kakhulu kuleliya hostela wukuthi kube nokuthula.

Iphini lakhe u-Adv Malunga, lithe bafuna izinhlaka zikahulumeni ziziphendulele ngokwenzeka kuleliya hostela.

Ubale uMasipala weTheku noMnyango wezokuThuthukiswa koMphakathi njengezinye zezinhlaka abangafisa ziphendule.

Uthe uma abantu bephila ngaphansi kwezimo ezinzima bagcina sebebanga ngisho izinto ezingabukeka zingelutho kwabanye abantu.

Leli thimba lishaqekile ukubona isimo okuphila kuso abahlali bakuleli hostela ngesikhahi bevakashele khona ngonyaka odlule.

Uthe ziningi izinto abazitholile nokufanele bazibhekisise, ezinye zazo kube yizinsolo zokucwasana ngokobuzwe.

Sisehlazweni lokuhlukunyezwa kwabasebenzi baze bahanjiswe nqunu isibhedlela saseMseleni, KwaMhlabuyalingana.

MTHOKOZISI MANQELE

EseMseleni

SISEHLAZWENI lokuhlukunyezwa kwabasebenzi baze bahanjiswe nqunu isibhedlela saseMseleni, KwaMhlabuyalingana esihlale sithola izindondo ezingeni lesifundazwe nelikazwelonke zokuthi senza kahle kakhulu emgomeni wokubeka phambili umphakathi.

Ngisho nezikhulu zoMnyango wezeMpilo zivumile ukuthi nazo ziphoxeke kakhulu zithola ubufakazi bokuthi iningi inkohlakalo kulesi sibhedlela kuhlanganisa nokuhlukunyezwa kwabasebenzi. Umphakathi wale ndawo uthi ubuthule ngamabomu ungasibiki lesi bhedlela kodwa manje sekufike ekugcineni.

Lo mphakathi uhlangane nezikhulu zoMnyango wezeMpilo zaseMkhanyakude nebezivela ehhovisi likaNgqongqoshe wezeMpilo uDkt Sibongiseni Dhlomo ehholo lomphakathi eVuka Mabaso izolo. Amalungu omphakathi abethukuthele egane unwabu atshele emehlweni lezi khulu ukuthi bazinqumela ugwayi katiki wezinsuku ezintathu zokuthi baxoshe ngokushesha izimenenja zesibhedlela ezithinteka esehlakalweni sokuhambisa nqunu abasebenzi besibhedlela kungenjalo bazosivala lesi sibhedlela ngoba kugcwele ukukhohlakala.

Isolezwe beliyingxenye yalo mhlangano obuthanyelwe amalungu omphakathi abebalelwa ngaphezu kuka-700.

USihlalo wekomidi lomphakathi okhathazekile uMnuz Moses Mthembu uthe izimenenja zesibhedlela zihlangene nonogada besibhedlela zahlasela abasebenzi abasebenza endaweni yokuwasha izimpahla zesibhedlela.

“Kwalahleka incwadi yobufakazi bendawo yokuhlala yomunye umsebenzi waseThekwini owayeqashwe ngaphandle komthetho. Kwase kuphele izinsuku eziningi engaholi kufuneka le ncwadi kwase kusolwa labo mama wathi bayifihlile. Bakhunyuliswe izimpahla zokugqoka bahanjiswa nqunu babuye bathunjwa ehhovisi bephoqwa izimenenja zesilisa nezesifazane ukuthi abakhiphe le ncwadi kodwa bengayazi,” kubhoka uMthembu.

Uthe kuningi okunye ukukhohlakala okukhona.

“Kunabantu okungebona abendawo abaqashiwe kodwa isikhala somsebenzi sakhangiselwa abantu bendawo, endaweni okujimela kuyo abantu abagulayo sekwajima kuphela abelungu, iziguli zabamnyama azisabonwa khona uma ziyile azisizwa. Sibanikeze izinsuku ezintathu ukuthi balungise isimo kungenjalo sizosivala isibhedlela,” kusho yena.

UMqondisi eMnyangweni wezeMpilo esiFundeni UMkhanyakude uNksz Makhosazane Themba uthe sibashaqile isenzo sokuhlunyezwa kwabasebenzi.

“Yihlazo namanyala lento engiyizwayo yokuthi abesifazane bakhunyuliswe baba nqunu. Esesikwenzile njengamanje sesibamisile labo basebenzi abathathu abanye sisabaphenya sizobamisa maduze ngoba ngeke siyimele lento. Eyabantu abaqashwe ngokungemthetho nayo siyayiphenya kodwa sisaqala ngale ebucayi,” kusho uNksz Themba eshayelwa ihlombe.

Noma kunjalo umphakathi uvuke ngendlobane wathi awenelisekile yizimpendulo zikaNksz Themba. Omunye ozichaze njengosindisiwe uMnuz Zenzele Ngubane uvele wabhoka wathi kunabasebenzi abaxoshwa ngoba kuthiwa akubona abendawo.

“Kungani ningabaxoshi abanye ngoba basekhona niphenya into ebhekephi? Sicela nisixoshele nomphathi wesibhedlela uDkt Frudlund benoMatron Fakude ngoba yibo kanye abakhohlakele baqasha abantu okungebona abendawo uma bebuzwa bese bethi yibo abaphethe,” kubhoka uNgubane.

IMeya yaKwaMhlabuyalingana uMnuz Solo Mkhombo inxuse amalungu omphakathi ukuba azwele iziguli ngoba azikwazi ukuzisiza ukuvala kwabo isibhedlela kuzokona okuningi.

Izoshaya ngolonwabu intuthuko KwaZulu-Natal ngenxa yesimo esingesihle somnotho. Lokhu kuvezwe uMnuz Senzo Mchunu.

CELANI SIKHAKHANE

IZOSHAYA ngolonwabu intuthuko KwaZulu-Natal ngenxa yesimo esingesihle somnotho, esiphoqe uhulumeni ukuba ahoxise imali engu-R1billion yezidingo zesifundazwe ukuze kongiwe imali.

Lokhu kuvezwe uNdunankulu waKwaZulu-Natal, uMnuz Senzo Mchunu, izolo ngesikhathi ethula inkulumo yesifundazwe e-Agricultural Show Ground, eMgungundlovu.

Uthe nakuba kungeke kumiswe ukuyiswa kwezidingo kubantu kodwa kumele bazi ukuthi kusuka manje ukulethwa kwengqalasizinda angeke kusagijima ngendlela ebekwenzeka ngayo ngenxa yokuthi uhulumeni unqume ukonga.

“Nakuba isabelo-mali sethu sizokwehliswa ngemali engaphezulu kuka-R1 billion, kodwa likhona ithemba ngoba izidingo zomphakathi kuhlanganisa nengqalasizinda kuzoqhubeka. Nokho akusezukuqhubeka ngendlela obekuhlelwe ngayo njengokuthi; ukwakhiwa komgwaqo othile bekumele kuphuthunyiswe ngamaphesenti angu-100, kodwa manje sekuzoba ngamaphesenti angu-70,” kusho uMchunu.

Nakuba uMchunu eqwashisa ngesimo somnotho esishaya uhulumeni, kodwa wethembise izinhlelo eziningana zokuzama ukudala amathuba emisebenzi emphakathini.

Okunye kwakho kube wuhlelo lokuqala isikhungo sokuqeqesha osomabhizinisi abancane ukuze bakwazi ukungena ezimakethe ezinkulu ezingadala ukufukuleka komnotho.

UMchunu ubuye waveza ukuthi okunye abakuhlelayo wukuqinisa ukuhanjiswa kwengqalasizinda ezindaweni zasemakhaya njengoba bezofakela imizi engu-24 000 ugesi ngemali engu-R600 million abayibeke eceleni.

UMchunu ubuye wathinta udaba lwesomiso, wathi lubalimaza kakhulu emnothweni wesifundazwe kangangokuthi manje sebezama izindlela zokuba bawambe phansi amanzi, ikakhulukazi ezindaweni zaseZululand ezishayeke kakhulu.

UMchunu ukhaliswe yimibango ekhona phakathi kwamaTrust omphakathi asuke enikezwe umhlaba nezinduna ezingawafuni.

“Silo samabandla, kunenkinga ekhona lapha yokubanga phakathi kwamaTrust neziNduna ngemihlaba. Angiqondi ukuthi lokhu kwenzeka kanjani ngoba bonke laba bantu bamnyama ngakho kumele babambisane uma sekutholakele umhlaba ukuze bawusebenzise ngokuzithuthukisa. Okunye okusilimazayo wukuthi abantu bakithi uma sebenikezwe umhlaba abasuke befake izicelo zawo, bayalwa noma abanye bagiye baqephuze bese kuthi ngemuva kwesikhathi bawubuyisele emuva ngoba bengasazi ukuthi bazowenzani,” kusho uMchunu.

Ubuye wakhala ngokunyuka kobugebengu bokwebiwa kwemfuyo, ukubulawa kwabantu nokugqekeza.

UMchunu ukhulume kafushane ngodaba lokudala amathuba emisebenzi, ikakhulukazi entsheni ephuma ezikhungweni zemfundo ephakeme, ekutheni ibhekelelwe ezinhlakeni ezahlukene zikahulumeni ukuba iqeqeshwe isikhathi esithile futhi ibe nemihlomulo eyitholayo.

Ukhulume nangezinga eliphezulu lokufeyila kukamatric esifundazweni, wathi kumele kubanjiswane ukuze le nkinga ilungiseke.

UMchunu umemezele nokuthi uhulumeni wakhe usufake isicelo kuzwelonke sokuba kuxegiswe intela kubafelokazi, ngoba bagcina bethwele kanzima ngenxa yokuthi bangabazali abangabodwana, kuhlanganisa namafa abasuke bewashiyelwe abayeni babo.

Okunye bafuna nokuthi kuxegiswe intela ekudleni kwezingane ezincane ukuze kunqandwe ububha emindenini empofu.

Sekuphele isonto umphakathi waseFolweni ku-ward 95 ubhekene ngeziqu zamehlo namaphoyisa.

S’MANGELE ZUMA

SEKUPHELE isonto umphakathi waseFolweni ku-ward 95 ubhekene ngeziqu zamehlo namaphoyisa, ngenxa yombhikisho wabo onodlame abahlose ngawo ukubonakalisa ulaka lwabo ngokuqokwa kukaNobhala wegatsha le-ANC uMnuz Thokozani Xulu, ukuthi angenele ukhetho lokuba yikhansela lendawo.

Lo mbhikisho bathe bawuqale emasontweni amathathu edlule kodwa babuye bama ngoba benethemba lokuthi ubuholi be-ANC buzolusukumela udaba lwabo.

Ngokubona kuhamba isikhathi kungenamnyakazo, izolo umphakathi olinganiselwa kubantu abawu-3 000 uqoke ukuthi uvale thanqa umgwaqo u-M35 ngezinguzunga zamatshe namathayi avuthayo, ngaphambi kokushisa imoto kamasipala namahhovisi ekhansela.

Kuphazamiseke nokufunda ezikoleni njengoba onke amalungu omphakathi ephoqeleke ukuthi abe yingxenye yombhikisho.

Izimoto ebeziphoqa ukuhamba ngenkani bezishaywa ngamatshe, betshelwa abashayeli ukuthi akusiwo umdlalo lo abawenzayo.

Ilungu lomphakathi, uMnuz Nkosinathi Cele, (49) lithe bazimisele ngokuqhubeka nalo mbhikisho uma i-ANC ingalihoxisi igama likaXulu.

“Okokuqala uXulu asimazi, akasiye owalapha eFolweni. Asazi nokuthi waqokwa kanjani ngoba thina sasingekho kulowo mhlangano.

“Njengoba engunobhala, wenze isiqiniseko sokuthi umhlangano ubanjelwa ngaphandle kwaseFolweni lapho esingakwazanga ukufinyelela khona. Siqala umbhikisho sibe nomhlangano nobuholi bendawo, kepha uXulu wasitshela ukuthi asithathe lo muntu esifuna ukumfaka esikhundleni sakhe siye naye kwi-IFP,” kusho uCele.

Elinye ilungu lomphakathi, uMnuz Nhlakanipho Nxumalo (28), uthe bazwile ukuthi abaholi be-ANC bathe basusa uthuthuva ngoba behlohlwa ngabantu abahambisana neMeya yeTheku uMnuz James Nxumalo.

“Thina asicheme namuntu kodwa sifuna ukuthi kulandelwe imigomo efanele yokuqokwa komuntu ozoba yikhansela endaweni. Ukube uXulu uyikhathalele le nhlangano ngabe uyahoxa ngoba uyazi ukuthi i-ANC ngeyentando yabantu.

“Asikwazi ukuvuma ukufunzwa umuntu ongesiye ngisho owasendaweni. Sifuna uSulu Nhlumayo okhulele la endaweni ngoba uziqonda kahle izinkinga zethu.

“Enye into esidina ngoXulu wukuthi uziphethe budlabha, usanda kuphelezela umngani wakhe owayeyoshaya ingane esikoleni ngesidunu sesibhamu,” kusho uNxumalo.

Amaphoyisa abehlomile aphoqeleke ukuthi asebenzise izinhlamvu zenjoloba nesisi esikhalisa unyembezi ukuhlakaza umphakathi obusazimisele ngokuqhubeka nokucekela phansi impahla.

Basabise ngokuthi ngeke bavote okhethweni lohulumeni basekhaya oluzoqala ukubhaliselwa ngoMashi 5-6 kulo nyaka.

Ethintwa uXulu uthe iyamdida indaba yokuthi umphakathi ubhikisha ngenxa yakhe ngoba abe-ANC bebengayi emphakathini ukuveza amagama aqokelwe esobukhansela.

Uthe okwamanje ngeke akwazi ukusho ukuthi uzohoxa yini ngoba usalinde i-ANC iqhube uhlelo lwayo.

UNobhala we-ANC eThekwini, uMnuz Bheki Ntuli, uthe umuntu ongenela ukhetho lobukhansela uqokwa ngamalungu e-ANC ngaphambi kokuthi ethulwe emphakathini.

“Besisazoya emphakathini ukuthula amalungu aqokiwe ebese sizwa uvo lwabo ngawo. Sithintene nabantu abathintekayo embhikisho sahlela umhlangano nabo kusasa (namhlanje) ukuze silalele izikhalazo zabo. Akekho umuntu ofunzwa umphakathi, oqokiwe usuke ekhethwe ngabantu baku-ward yakhe,” kusho uNtuli.

Okhulumela amaphoyisa KwaZulu-Natal, uMajor Thulani Zwane, uthe amaphoyisa aseFolweni avule icala lokucekelwa phansi kwempahla ngemuva kokuthi umphakathi ushise imoto kamasipala ngebhomu likapetrol, wacekela phansi namahhovisi.

“Akukaboshwa muntu, amaphoyisa asendaweni yesigameko ukuqapha isimo,” kusho uZwane.

Kugobhoze igazi emgwaqweni eNanda kudutshulwa usomatekisi wakhona ngenqwaba yezinhlamvu kubuka umphakathi.

NONTUTHUKO NGUBANE

KUGOBHOZE igazi emgwaqweni eNanda kudutshulwa usomatekisi wakhona ngenqwaba yezinhlamvu kubuka umphakathi izolo ekuseni.

UMnuz Themba Dlamini (66) kuthiwa ubekade ehamba ngezinyawo ebabele emhlanganweni wabanikazi bamatekisi oba serenki yaseNanda ngesikhathi kuqhamuka abantu ababili bamchela ngoyaba lwezinhlamvu maqede babaleka ngemoto emhlophe.

Isidumbu sikaDlamini silale sadindiliza ngaphambi kwesitolo esidayisa amathayi ezimoto eStop 8, okuseduze nendawo yobumnandi i-Under The Moon.

Usomatekisi, onomuzi eRedhill, kuthiwa kusukela ngama-90s aqala ukusebenza embonini yamatekisi.

Kuvele ukuthi unamatekisi amahlanu ahambela eNanda adume ngokuthi ama-Rise and Shine.

Ngokuthola kweSolezwe, uDlamini kade esuka ethaveni yakhe ekule ndawo, esakhuluma nomunye wabashayeli bakhe ngesikhathi ehlaselwa ngabasolwa abangabonakalanga.

Ithaveni kaDlamini iseduzane nerenki okuthiwa bekumele abe nomhlangano kuyo.

Kuthiwa ukhethe ukungasebenzisi imoto yakhe ngoba efuna ukulula izinyawo.

Ozibonele uthe ngendlela okwenzeke ngayo kubukeka sengathi abadubuli bebevele bemlindile.

“Namanje angikukholwa engikubonile, nomphakathi ubuka. UDlamini ubesanda kudlula nje, esaxoxa nomunye umshayeli wakhe. Sizwe sekuqhuma isibhamu. Abesilisa ababili abebegqoke njengabasebenzi bakamasipala yibona abebephethe izibhamu bembelesele ngazo. Ngibalekile ngacasha. Ngizwe umsindo wesibhamu usuthule ngaphuma lapho bengicashe khona. Ngibone omunye wabasolwa esehla emotweni ebuyela kumufi, wafike wamdubula futhi ephindelela eseseduze naye. Abasolwa bake babonakala ngayo le moto bezulazula kule ndawo, okusho khona ukuthi bebemlindile uDlamini,” kusho ozibonele.

Uthe uphindele wayocasha waze wavela imoto emhlophe ebihamba abasolwa isihambile.

Okhulumela amaphoyisa, uMajor Thulani Zwane, uthe basathungatha abasolwa kodwa akukaboshwa muntu.

“Amaphoyisa aseNanda aphenya icala lokubulawa kowesilisa osekhulile. Imbangela yokubulawa kwakhe ibingakaziwa okwamanje. Akekho obesaboshiwe ngesigameko kodwa uphenyo lwamaphoyisa lusaqhubeka,” kusho uZwane.

Amaphoyisa aseNanda anxuse ongaba nolwazi ukuthi awathinte ngokushesha ukuze kubanjwe abasolwa.

Ngesikhathi Isolezwe lifika endaweni bese kusulwa igazi ebeligcwele phansi.

Iqulu lamadoda lifike lathela inhlabathi phezu kwalo, laligugula kwabe sekuthelwa amanzi.

Umndeni kamufi ubusufikile nawo.

Inkosikazi yakhe, ebigqoke umfaniswano wabahlengikazi, ibilokhu ichiphiza izinyembezi, kukhona abesifazane abebemduduza.

Ngaleso sikhathi umndeni uthe ngeke uphawule ngakho ucele ukuba ubuye uthintwe. Ekuhambeni kosuku izolo indodakazi kamufi, uNksz Nomcebo Dlamini, ithe basashaqekile ngokwenzekile.

“Asikholwa wukuthi ubaba ubulawe ngesihluku kanjena. Besihlezi naye izolo ebusuku sincokola kahle njengomndeni. Manje akasekho. Asazi kwenzekani. sitshelwe ukuthi ubeya emhlanganweni. Sisazididekele,” kusho uNksz Dlamini.

Umndeni wakhe uthe ngokwazi kwawo uDlamini ubengenazo izitha noma abantu abamsabisayo.

Ethaveni kamufi khona abantu bebefika bededelana bezokuzwa ngokwenzekile izolo.

Omunye ongathandanga ukudalulwa uthe usola ukuthi ukubulawa kwakhe kungenxa yomona.

“Mina ngisola umona wasematekisini ngokubulawa kwakhe. UDlamini ngumuntu wabantu ubengaxabani nabantu. Abekwenza nje wukudeze engeza amatekisi akhe ngokuthenga amasha. Ubeyindoda okuthi noma usuxakekile uze uzokhala kuyo akuzwele. ubephila. Ngumona nje kubantu owenze wabulawa,” kusho osondelene nalo somatekisi.

UMnuz Mandla Mzelemu weSantaco uthe kuyabamangaza ukuthi osomatekisi namanje basahlaselwa ekubeni benza konke okusemandleni ukukhuza umsindo.

“Sisebenza kanzima ukunqanda ukubulalana embonini. Kuyaphoxa ukuthi kukhona abantu abasabulawa ngale ndlela. Sihambela yonke imizila esuke inezinkinga sizame ukuzixazulula. Sihlezi sishumayela ukuthi ukubulalana akusona isisombuluko ezinkingeni abanazo. Siyazwelana kakhulu nomndeni wobulewe,” kusho uMzelemu.

Lizoqulwa ngoLwesithathu oluzayo icala labafundi abahlanu abasolwa ngokushaya babulale omunye umfundi emagcekeni esikole.

SIBUSISO MDLALOSE

LIZOQULWA ngoLwesithathu oluzayo (Mashi 9) icala labafundi abahlanu abasolwa ngokushaya

babulale omunye umfundi owayenza uGrade 11 emagcekeni esikole, eSizimele High, eNelly Valley, eDannhauser, eminyakeni emithathu eyedlule.

USimon Mazibuko (24), Thabani Langa (23), Sbongiseni Ndaba (23), Bhekani Mazibuko (24), noSandile Shoba (21), basolwa ngokushaya babulale uBongani Nkabinde (18) emagcekeni esikole ngo-Okthoba 28 2013, ngemva kwengxabano okukholakala ukuthi kwakungeyombango wamaqembu engoma kamaskandi.

Isolezwe neminye imithombo yezindaba babika ngalolu daba olwaba ngundabuzekwayo lwasabalala nasezinkundleni zokuxhumana.

Abasolwa abahlanu, ababefunda nomufi, bavele kafushane eNkantolo yesiFunda yaseNewcastle ngoLwesihlanu icala lahlehlela uMashi 9.

Bangaphandle ngebheyili ka-R1000 emunye kanti banecala lokubulala nokuphatha izikhali eziyingozi.

Kuvelile enkantolo ukuthi umbango owaqubula impi eyaholela ekushayweni kubulawe uBongani wawuphakathi kwamaqembu amabili kamaskandi amaBananas nabaPhumeleli. Kwakusolwa abamaBananas ngokweba ingoma yabaPhumeleli.

Kuvele ukuthi uBongani washaywa ekhanda ngesagila sensimbi esemthandazweni esikoleni.

Ngelanga okwabulawa ngalo uBongani kwakuwusuku lokuqala lokubhalwa kwezivivinyo zika-matric zokuphela konyaka, nokho phezu kwalesi sigameko akuphazamisekanga ukuqhubeka kwezivivinyo.

Uninalume kamufi, uMnuz Simon Nkabinde, uthe ufisa sengathi ngabe leli cala seliphelile ngoba selidonse isikhathi eside. Uchaze umshana wakhe njengomuntu owayengenalo udlame futhi owayezithobile.

Kuvela ukuthi abafundi abasolwa ngokubulala bangena nezikhali emagcekeni esikole ngokuthi basike ufenisi wesikole ngenxa yokuthi babengeke bakwazi ukungena nazo esangweni lesikole ngoba kukhona unogada owayezobasesha.

Kuphinde kwavela kule nkantolo ukuthi ngosuku olwalwandulela ukubulawa kukaBongani othisha bakulesi sikole babeke bangenelela bayikhuza le mpi yabafundi eyagcina idlule nomphefumulo ngosuku olwalandela.

La maqembu engoma kamaskandi ayebanga ayeqhamuka ezigodini ezimbili ezahlukene okuyi-Allen neMbabane, eDannhauser.

Kule mpelasonto ngike ngahambela umcimbi wamaMetro FM Awards e-ICC Arena.

KULE mpelasonto ngike ngahambela umcimbi wamaMetro FM Awards e-ICC Arena. Kuzomele ngikusho ukuthi nangonyaka owedlule miningi engiyihambelile, ikakhulu eyobumnandi.

Phambilini osopolitiki noma bebefika kodwa bebefikela ukuzijabulisa njengawo wonke umuntu.

Kulokhu njengoba kuza ukhetho lohulumeni basekhaya bonke bayaye bathande ukugibela esiteji babingelele abantu.

Iningi labo belize lisho ukuthi lifuna ukubingelela nje kuphela.

Abanye bebebingelela kodwa bagcine sebekhuluma isikhathi eside, abantu bagcine bebhoreka.

Osopolitiki babuye babe nento yokunganaki ukuthi bakhuluma embuthweni wepolitiki noma ebumnandini.

Bayathanda futhi ukungena sekugcwele abantu umcimbi sewumnandi, bathi bazobingelela.

Baqaleke lesi sifo sabo sokubala amagama uma bekhuluma, uvele uzibuze ukuthi lo muntu konje uzoqeda nini njengoba esenkanta nje.

Kumele engabe uhambisana nesimo asificile yena aqale phansi azobala amagama, kukhona nje lo sopolitiki okhuluma ngale ndlela, bonke-ke manje sebebona ukuthi iyona ndlela yokukhuluma uma ungusopolitiki.

Abanye bachazwa nayile nto yokungathi ubanjwe yisikhwehlela uma ukhuluma bese enza sengathi uqaqa umphimbo.

Lezi zinto azinasidingo, kungenzeka ukuthi lona abazama ukumlingisa wayenenkinga ngempela yomphimbo.

Iphuzu lami lithi abake bazame ukuqaqeka uma bekhuluma nabantu, ikakhulukazi emicimbini, bayeke futhi ukukhuluma ngento noma bebona ukuthi ayingeni ngoba lokho kugcina kubadalela isigcwagcwa.

Isiphi nje isidingo sale nto eshiwo uNgqongqoshe wezeMidlalo uFikile Mbalula kuma-MMA 15 ngoMgqibelo. Usezokhuluma ngendaba yo#FeesHaveFallen. Abantu abebekhona bavele babona ukuthi useyahhema bavele bambuka nje, bamgqolozela kwazise uvele waphuma esipolweni.

Osopolitiki kuyomele bakuqonde ukuthi into kwesinye isikhathi ekuyisa endaweni yobumnandi ukuthi ufuna ukuyopholisa ikhanda, hhayi okunye.

Phela osopolitiki banenkinga yokuthi bayathanda ukuthi kugqame ukuthi kukhona bona. Okubuhlungu babuye basebenzise izindawo okungesiyizo.

Iphini likaNgqongqoshe wezeMfundo uMduduzi Manana umuntu osemusha, bewulindele ukuthi uzokuveza lokhu kuma-MMA 15 kodwa kuvele kwangathi uzothula inkulumo ePhalamende, kwangathi lapha akuziwe ngenjabulo, laba abanomsindo yingoba bephapha.

Cha angazi ukuthi kungani iMetro FM icele yena.

Bakhona obekucaca ukuthi kumele noma ikanjani ubabekeze-lele, njenge-Meya yeTheku uJames Nxumalo ogibela esiteji engazi nokuthi uzokwethula yiphi i-award, yena uphoqwa yisikhundla sakhe.

Omunye, wuNgqongqoshe wezokuXhamana uNksz Faith Muthambi, yena uze waqeda engazwakali nokuthi uthini.

Ubhore waze waqeda, kuyacaca ukuthi ungumuntu wepolitiki ovele wafuhlelwa kubantu bobumnandi iningi labo obekucaca ukuthi alimazi.

Le nto yobumnandi ifuna bona abantu abafana nesikhulu sakwa-SABC uHlaudi Motsoeneng.

Uma iMetro FM beyinesifiso sokulanda usopolitiki bekumele ilande uNomvula Monkonyane, akubuzwa uMama Action uziqaqekela ungamfaka noma yikumuphi umcimbi abantu bazophuma bejabulile futhi bengabhorekanga.

Ngisho noMengameli uJacob Zuma ubengabashiya kubuhlungu izisu insini ngoba unayo le nto yokukwazi ukuhlekisa, noma bazilandele uMbuyiseni Ndlozi abantu besifazane bajabule.

Akubona kodwa bonke abantu bepolitiki bakuleli ababhorayo.

Umuntu onjengo Ngqongqoshe weMfundo ephakeme uDkt Blade Nzimande ungomunye wosopolitiki engaziyo ukuthi akabhori futhi uyakwazi ukufunda isimo, nabantu bayamthanda, bebengakuthokozela ukuba khona kwakhe esiteji samaMetro FM Awards.

Abeze babingelele kodwa bangagcini beqandisa imicimbi yabantu.

Izulu lidume ladlula nomzukulu wakhe uNkk Mavis Shandu wakwa-K, KwaMashu eqeda kuzibuza ukuthi ngabe liwenze kuphi umonakalo.

S’MANGELE ZUMA

IZULU lidume ladlula nomzukulu wakhe uNkk Mavis Shandu wakwa-K, KwaMashu eqeda kuzibuza ukuthi ngabe liwenze kuphi umonakalo.

UMnuz Nkosingiphile Shandu (32) nomngani wakhe uMnuz Lindokuhle Ntsibanyoni (26) bashone kade bekhosele esambuleleni. UNkk Shandu (66) ubekade ezitshela ukuthi baphephile ngoba baselokishini lapho izulu lingavamile ukudlalela khona njengasemakhaya.

“Ngesikhathi liduma lishaya nemibani ngazibuza ukuthi ngabe uNkosingiphile ukuziphi izinkalo. Ngafisa ukuthi abuye eze ekhaya. Ngezwa indlela eladuma ngayo ukuthi lizoshiya kukhalwa emizini yabantu kodwa ngingazitsheli ukuthi kungagcina kukhala mina. Ngezwa kungqongqoza umfana wakwamakhelwane ezobika ngomonakalo. Ngathumela udadewabo ukuthi ayombheka kanti uzobathola sebeshonile,” kusho uNkk Shandu.

Uthe umzukulu wakhe ubengahlukani nomngani wakhe njengoba beze bashona bobabili.

“Ngesikhathi sesehlakalo babephuma ukuyoshiya impahla abebeyiphethe emqashweni kaLindokuhle. Kuthiwa labashaya behamba endleleni yesizulu bephethe isambulela. Ibuhlungu inhliziyo yami ngomzukulu wami engazikhulisela yena esemncane ngemuva kokushona kukanina. Sesivele sehlisa umoya sazitshela ukuthi ukufa kwabo bekuyicebo likaNkulunkulu. Ngididekile nokuthi ngizokwenzenjani njengoba ngingenamali ngiziholela impesheni,” kuqhuba uNkk Shandu.

Udadewabo kaShandu, uNksz Nobuhle Shandu (25), uthe ngemuva kokuthola umbiko uphuthume endaweni yesehlakalo enethemba lokuthi uzobafica besaphila.

“Izingubo ayezigqokile uNkosingiphile zazidabukile eshile esifubeni. ULindokuhle yena ubeshe ezinyaweni. Safika sebeshonile. Lapho elabashayela khona kwakugqobhokile phansi kubonakala ukuthi belinamandla. Kwaba buhlungu ukubabona bedindilize ngaloluya hlobo. Bebengeve bezwana sibabiza ngobaba nendodana njengoba bebeshiyana ngeminyaka futhi uLindokuhle emncanyana ngomzimba. Sithinte abakubo eNewcastle sibabikela ngesehlakalo ngenhlanhla umalume wakhe ohlala khona la eduze washeshe wafika,” kusho uNksz Shandu.

UNgqongqoshe uNomusa Dube-Ncube uxwayise abantu ngokubaluleka kokuhlonipha izulu. UMnyango wakhe uhambela abakhahlamezekile ngenxa yezulu. Kuthiwa naseCato Crest kushone uMnuz Xolani Mdlalose (29) ngemuva kokushaywa wumbani.

Okhulumela amaphoyisa KwaZulu-Natal uMajor Thulani Zwane uthe amaphoyisa aKwaMashu aphenya icala lokufa kwabalisa ababili okuthiwa bashaywe yizulu bezihambela endleleni. Ukuphatha isambulela uma kubanika nokuhamba endleleni yesizulu kungezinye zezinto okuxwayiswa abantu ngazo ukuba bazigweme.

“Baphuthunyiswe emtholampilo lapho kutholwe ukuthi sebeshonile. NaseCato Crest amaphoyisa aphenya icala lokufa ngemuva kokuthi umlisa ona-29 eshaywe wumbani evakashele umngani wakhe,” kusho uZwane.

Amalungu e-ANC aphazamise inkulumo kaSihlalo weTheku, uNkk Zandile Gumede eshayana wodwa.

CELANI SIKHAKHANE

AMALUNGU e-ANC aphazamise inkulumo kaSihlalo weTheku, uNkk Zandile Gumede eshayana wodwa kwaba khona ogqenywa ingozi emcimbini wale nhlangano wokugubha iminyaka engu-104, kubangwa ukukhethwa komuntu ozongenela ubukhansela ku-ward 21 waseClermont.

Lokhu kwenzeke izolo enkundleni yemidlalo, iSugar Ray Xulu lapho esinye isishoshovu seSACP uMnuz Skhosiphi Mthethwa, egqenywe ingozi igazi lagcwala isikibha esibomvu seSACP abesiqgokile.

Lesi sigameko senzeke ngemuva komzuzwana uNkk Gumede eqale inkulumo yakhe yosuku egcine ingasezwakali abantu bebanga umsindo abanye bephuma behamba bethi bayabona ukuthi iSACP ayifunwa.

Kukhona nomunye wesifazane oshayiwe kulesi sigameko waku-ward 21 ngemuva kokungenelela kwamasosha oMkhonto weSizwe abenolaka ekhahlela labo abebebonakala bephazamisa becula.

Ilungu le-ANC elicele ukungadalulwa igama lalo liveze ukuthi badinwe wukuthi ubuholi be-ANC bubathumelele ngamasosha eMK lapho bekuhleli khona amalungu aku-ward 21 ukuze bashaywe ngoba bengahambisani nomuntu abathi bafunzwa yena ukuze abeyikhansela.

UNobhala we-ANC eThekwini, uMnuz Bheki Ntuli uzwakale etshela onogada wathi abakhahlele kwasani kulaba abaphazamisa inkulumo kaSihlalo babakhiphele ngaphandle.

Abantu abasalile yilabo abebehleli ezitendeni phezulu kodwa phansi enkundleni bese kushaya umoya sekunedlanzana ebelingaphambili.

Kuphoqeleke ukuba inkulumo kaNkk Gumede imiswe imizuzu cishe emihlanu abanye abaholi bezama ukudambisa isimo ngesikhathi amanye amalungu ebecula ezama ukumphazamisa ukuze angezwakali.

UMgcinimafa Jikelele we-ANC, uDkt Zweli Mkhize utshele amalungu abesesele enkundleni ukuthi kumele abamukele ubuholi obukhona baseThekwini ngoba isigungu sikazwelonke sibuthatha njengobusemthethweni.

“Sikhathazekile ngale nto yokulwa ekhona lapha yokulwa kwe-SACP ne-ANC. Sicela sibumbane kuphele lokhu kulwa okukhona kuKhongolose. Ubuholi obukhona obakhethwa eThekwini asibeseke sibambisane nabo bese buqinisekisa ukuthi busihola sonke ngaphandle kokuthi ubani wayeseka bani. Ngisho lokhu okwenzeke eNtshangwe akufanele kuphinde kwenzeke,” kusho uMkhize.

Zonke izikhulumi zikugcizelele ukubumbana eThekwini kangangokuthi nendaba yamakhansela ebangwayo emagatsheni ayisalanga ngaphandle.

UNkk Gumede esekhuluma, uthe kumele amadlelandawonye okuyi-ANC, SACP neCosatu abumbane kusetshenziswane kungabi sengathi kukhona okungeyakhe le mibutho ngoba izizukulwane zayifica ikhona.

Bekungumbuthano wokuqala omkhulu we-ANC ukuba uNkk Gumede awusingathe njengoSihlalo.

Indaba yokuphazanyiswa kwakhe uyishaye indiva wangayithinta kodwa wagxila enkulumeni yakhe ebibhalwe phansi.

Ukhulume nangamathenda ukuthi bazowamisa kancane ukuze njenge-ANC babhekisise imigomo esetshenziswayo ukuthi ngabe ibahlomulisa bonke yini abantu.

Imbangi yakhe okunguMnuz James Nxumalo ibikhona kanti kuthe uma kubizwa igama layo kwaduma inkundla abantu bejabula beshaya namavuvuzela.

UNxumalo onguSihlalo weSACP akazange akhulume kulo mcimbi kodwa kukhulume uMgcinimafa, uNksz Nomarashiya Caluza.

USihlalo we-ANCWL uNkk Nondumiso Cele uphonse inselelo kuNkk Gumede wathi kumele ayiqede indaba yokusatshiswa kwabesifazane emagatsheni ngoba besuke bengenele izikhundla zobukhansela. UNkk Caluza, uthe kukhona abenza ubugebengu ngoba befuna ukufeza izinhloso zabo.

Usihlalo we-ANC KwaZulu-Natal uMnuz Sihle Zikalala usephinde wahlaba ikhwelo kumholi we-IFP uDkt Mangosuthu Buthelezi.

CELANI SIKHAKHANE

USIHLALO we-ANC KwaZulu-Natal uMnuz Sihle Zikalala usephinde wahlaba ikhwelo kumholi we-IFP uDkt Mangosuthu Buthelezi wathi sekuyisikhathi sokuba abuyele ku-ANC ngoba bayamdinga ekhaya.

UZikalala ukusho lokhu emcimbini we-ANC wokugubha iminyaka engu-104 obuseClermont, eThekwini, nokuyilapho ebehlasela abaholi bamaqembu aphikisayo ahlubuka ku-ANC okunguMnuz Mosiuoa Lekota weCope noMnuz Julius Malema we-EFF.

“Bonke laba bathakathi abahamba bashiya i-ANC abanye baxoshwa bayosungula amaqembu ngoba bethi bazonqoba ukhetho lohulumeni basekhaya. Kukhona le ndoda ehlale ithukuthele okuthiwa uLekota ayisoze iwanuke amavoti KwaZulu-Natal. Le midlwembe ye-EFF engosomathuba ayinandawo lapha esifundazweni sethu. Okokugcina sithumela umyalezo kunkosi uMangosuthu Buthelezi ukuthi akabuyele ekhaya kwa-ANC ngoba indawo yakhe isekhona. Akabuye ilanga lingakashoni ngoba isikhathi siyahamba njengoba sizonqoba ukhetho eThekwini naseZululand nakuyona yonke iKZN,” kusho uZikalala.

Ngesikhathi esho lokhu kube nenhlokomo enkundleni iSugar Ray Xulu abantu beshaya amavuvuzela.

Bekungekhona okokuqala uZikalala ekhuluma kanje ngoButhelezi njengoba nango-2014, ngesikhathi ayesengqungqutheleni ye-ANC eNkosi Bhambatha Region, wathi kumele baqale umkhankaso wokubuyisa uButhelezi ku-ANC.

Wathi mhla ebuya bayomhlabela izinkomo babungaze ukubuya kwendodana yolahleko. UButhelezi washiya i-ANC ngemuva kokusungula i-IFP ngo-1975 kanti uLekota wasungula iCope ngo-2008 ngemuva kokushiya i-ANC ngo-2007.

UMalema waxoshwa ku-ANC ngo-2012 wasungula i-EFF ngoJuni 2013.

USihlalo we-IFP uMnuz Blessed Gwala ephendula uthe njalo uma uZikalala enesizungu sezepolitiki ucabanga ukudelela uButhelezi.

“Kuyaxaka ukuthi yini uZikalala uma enesizungu agcwanekele kuMntwana ngoba akayena untanga yakhe. Okokuqala kufanele engabe ukhuluma ngezinkinga zokuhlephuka kwe-ANC esifundazweni. Siyazi ukuthi kumanje ufuna ukungena ngopotsho esikhundleni sokuba nguNdunankulu KwaZulu-Natal. Kwangathi iyanona bo ingulube. Akakhuzwe uZikalala ngoba usendizela phezulu. Siyazi abafuna ukugqama bakhuphuka ngegama likaMntwana wakwaPhindangene bese beyaduma ezweni. Sithi yehla Zakewu emthini,” kusho uGwala.

Lisihoxisile isicelo sebheyili iphoyisa elisolwa ngokubamba iqhaza ekubulaweni kukasomatekisi waseMadadeni.

SIBUSISO MDLALOSE

LISIHOXISILE isicelo sebheyili iphoyisa elisolwa ngokubamba iqhaza ekubulaweni kukasomatekisi waseMadadeni, uMnuz Khuzimpi Khumalo, owadutshulwa wafa esemzini wakhe eMadadeni, eNewcastle, ngoMeyi nyakenye.

UCaptain Skhumbuzo “Malava” Khumalo osebenzela esiteshini samaphoyisa saseNewcastle, ubhekene namacala amaningi, okubalwa kuwo elokuzama ukubulala, nokubulala, ubevele eNkantolo yeMantshi yaseMadadeni ngoLwesihlanu.

Ushaqise abebezothamela icala lakhe enkantolo, ehoxisa isicelo sebheyili obekulindeleke ukuba aqhubeke ayifune.

Kumanje uCaptain Khumalo ugcinwe ejele laseWaterval, e-Utrecht.

Leli phoyisa nabasolwa abayisishiyagalombili ababandakanyeka ekubulaweni kukaKhumalo, bazophinde bavele enkantolo ePhakeme yaseVryheid ngoJulayi 25.

Nakuba ebesebuthulile ubufakazi bakhe uKhumalo kodwa uphinde wavuma ukuthi uyabazi abanye abasolwa.

Uphinde wavezela inkantolo nokuthi abasolwa ubazela endaweni yaseMeadowlands, eMadadeni, okuyindawo okwaboshwa kuyo itulo lokusocongwa osomatekisi ababesohlwini lokubulawa, waphinde wazivumela yena ukuthi unamatekisi.

UCaptain Khumalo ungene enkantolo elindelwe ngamehlo abomvu njengoba bekulindeleke ukuthi angene ebhokisini lofakazi aqhubeke nokufaka isicelo sebheyili.

Nabantu abebehambele icala bazwakalise ukuphoxeka ngenkathi

ummeli kaKhumalo eveza ukuthi umsolwa akazimisele ngokuqhubeka nokufaka isicelo sebheyili kodwa wangazibeka izizathu.

Icala laleli phoyisa eliboshwe ngasekuqaleni kwenyanga eyedlule, selidonse amehlo abaningi. Lokho kufakazelwa wukuphuma ngobuningi kosomatekisi basezindaweni ezahlukene enhla nesifundazwe iKwaZulu-Natal. Abanye babo baphume bencifa, abanye bekhalela isikhathi sabo njengoba uKhumalo egcine engasaqhubekanga nokufaka isicelo sebheyili.

Kwababethamele icala, babodwa abebethi umsolwa wenze kahle ukuze ezophephisa impilo yakhe ngoba ukuba uke wayithola ibheyili ukuphepha kwakhe bekuzoba sengcupheni ngenxa yalo leli cala abhekene nalo.

Ngenkathi ethula ubufakazi eNkantolo yeMantshi yaseMadadeni ngasekupheleni konyaka owedlule, uLt. Sibusiso Zungu wophiko loKlebe okunguyena umphenyi waleli cala, wakuveza ukuthi basebaningi abantu abasazoboshwa ngaleli cala, okubalwa kubo nabanikazi bamatekisi endaweni yaseNewcastle namaphethelo.

Lifuna ukulobola intombi yalo eneminyaka engu-37 ikhehla elineminyaka engu-102 lidla anhlamvana.

MBONGISENI BUTHELEZI

EseGoli

LIFUNA ukulobola intombi yalo eneminyaka engu-37 ikhehla elineminyaka engu-102 lidla anhlamvana.

Okufuqa uMnuz Japan Mfeka ozalwa eXobho, KwaZulu-Natal kodwa osezinze eThokoza, eGoli, ukuthi afune ukuthatha uNksz Nhlanhla Nkosi, wukuthi uthi usazizwa njengebhungu uma behlangene enkonzweni yasekameleni nesithandwa sakhe.

Ngesikhathi exoxa ekwakhe eThokoza ngempelasonto, uthe sekwahluleka ngisho abafowabo abaseHarding bemtshela ukuthi akahlukane noNksz Nkosi, bekhala ngobudala bakhe.

Uma ufika emzini wale nsizwa endala uyabona ukuthi akukho ukuxakeka njengoba nomuzi wayo abahlala kuwo nesinqandamathe sakhe ubukeka.

“UNhlanhla ngiyamthanda ngifuna ukumshada. Uma abazali bakhe bengavuma ngingamthatha abe ngumkami. Uyangilalela futhi siyathandana. Anginandaba ukuthi abafowethu abasekhaya nabantwana bami bathini,” kusho uMfeka.

Unezingane ezine, ezimbili ezihlala eGoli ezinye ziseHarding. Ngokujwayelekile ubegoduka njalo ngoKhisimusi kodwa uthi sekuphele iminyaka emibili engayi ngoba ecikwa ngabafuna ukumhlukanisa noNksz Nkosi.

Uthe uzizwa esemusha noma beya ocansini nesithandwa sakhe njengoba enembiza okuyiyona emnikeza umfutho.

“Ngizidlela imbiza, engisiza kakhulu ekutheni induku yami ihlale imile nomzimba wami uqine,” kusho uMfeka.

Uveze ukuthi imfihlo yokuphila iminyaka engaphezulu kwekhulu, wukuhlonipha abazali bakhe futhi akaze aphuze noma abheme.

“Mina angiphuzi angibhemi. Ngizidlela imithi yesintu. Ngiyaphalaza, ngiyagquma ngiphinde ngichathe. Angikaze ngiye esibhedlela ngilale khona futhi bengibahlonipha abazali bami nabantu abadala.”

Yize ezishaya isifuba ngokuhlonipha kodwa akazange akufihle ukuthi wayeyisoka ebusheni bakhe. Usashadelwa kathathu njengoba esefuna ukuthatha inkosikazi yesine. “Ngashada nowokuqala ngamxosha, nowesibili ngenza kanjalo. Owesithathu ngihlale naye waze wadlula emhlabeni. Benginezintombi mina. Angikaze ngibe yisishimane. Ngake ngaba nezintombi ezingu-87 ngesikhathi ngiseyibhungu ngineminyaka engu-17, 18 nengu-19. Emva kwalokho ngabe sengiyama ukuzibala izintombi zami,” kusho uMfeka. UNksz Nkosi uthe ujabulile ngesoka lakhe athi lihle futhi angathanda ukushada nalo.

“Ngijabulile uyangenelisa nasembhedeni yize ngingathandi ukuthi ngikhulume ngezindaba zasekamelweni lami nabantu. Ngingajabula uma engangilobola ngoba ngingathanda ukubopha elikasofasilahlane naye. Bekungelula ukuthi imindeni yethu yamukele ubudlelwane bethu kuqala ngoba ngangiseneminyaka engu-23 uma sisaqala ukuthandana. Kodwa manje sebekwamukelile ukuthi siyathandana,” kusho uNkosi. UMfeka akahambi ngenduku futhi usakwazi ukuziqobela imithi yesintu njengoba eyinyanga.

Unabantwana abane nabazukulu abane nezikulwana ezintathu. Oyilungu lomndeni wakwaMfeka, uMnuz Fanifani Mtolo obekhona ngenkathi Isolezwe livakashele kwaMfeka, uthe sebagcina bemamukela uNksz Nkosi kubo.

“Kwakungelula ukwamukela lobu budlelwane ngenkathi besaqala. Kwasuka nobaba lena ekhaya beza lapha eGoli bezomtshela lo ntombazane ukuthi ahlukane nomuntu omdala ngoba bebethi wenza ngoba efuna ifa lendlu. Kodwa sigcine sibona ukuthi laba bantu bayathandana ngempela. Sesigcina ngokubabuka nje kuphela,” kusho owomndeni.

Impilo yabafundi baseNsimbini Combined kwaParafini ingafaniswa nosizi – isikole kubona wumjondolo onamakilasi amabili kuphela.

NONTUTHUKO NGUBANE

Impilo yabafundi baseNsimbini Combined kwaParafini, ngaseTugela Ferry, eMsinga, ingafaniswa nosizi – isikole kubona wumjondolo onamakilasi amabili kuphela.

Abafundi, abangaphezu kuka-30, kuyaphoqeleka ukuba bampintshane kuwo lama kilasi esikoleni esiqala kuGrade R size sigcine kuGrade 4.

Isikole saphasiswa njengesisemthethweni ngo-1990 kodwa kuze kube manje asikaze sakhiwe.

Ikilasi elilodwa linabafundi bakaGrade R kuya ku-Grade 2, elinye lifundela uGrade 3, kuthi ngaphansi kwesihlahla kufunde uGrade 4.

Uma ungena emagcekeni esikole esingabiyelwe ungaze uzitshele ukuthi ngumuzi womuntu.

Emakilasini kunezihlalo zabafundi, okokubhala, okokufunda nokuyikho okwenza kubonakale ukuthi yisikole.

Esihlahleni kunamatshe asibiyele ukuze kubonakale ukuthi kunabantu abafundela ngaphansi kwaso.

Kunomunye umjondolo omncane eduzane nokuyilapho kuphekelwa khona abafundi ukudla. Eceleni kwalo mjondolo kubekwe ibhodi elibhalwe igama lesikole.

Kunamathoyilethi akhiwe ngezitini, wona angconywana kunamakilasi.

Egcekeni kunepitsi okuphuza kulo abafundi, elakhiwa yinhlangano engenzi nzuzo.

Kuqala abafundi kuthiwa bebezikhulula endle bese bekha amanzi emfuleni okude nesikole.

Omunye womzali Isolezwe elimvakashele ekhaya ngemuva kokuphuma kwesikole ngo-12.30 ngoLwesihlanu, uthe zithwele kanzima izingane zakhe ezimbili ezifunda eNsimbini.

UMnuz Fisokuhle Khanyile, izingane zakhe ezifunda uGrade R noGrade 3, uthe uma kungavalwa isikole kungaphoqeleka ukuba izingane zakhe zihlale ekhaya.

“Asikho esinye isikole esiseduzane nathi yingakho nje sizivumela izingane zethu ukuthi zifunde emkhukhwini.

Sesiside isikhathi sicela ukuba sakhelwe isikole kodwa akwenzeki.

Kwakhiwa ithoyilethi elihle ngaphezu kwamakilasi. Esikukhalela kakhulu wukuba namakilasi amabili asezingeni,” kusho uKhanyile.

“Izingane zifunda zimbondelene ndawonye. Kuyashisa kakhulu kulo mkhukhu kanti uma kubanda, kubanda ngokweqile. Izingane ezinye zifundela esihlahleni. Lesi simo asisihle ezinganeni zethu. Kumele zilinde ezinye ziqede ukufunda. Esikucelayo eMnyangweni wezeMfundo wukuba usakhele isikole ukuze izingane zethu zizothola imfundo efanele,” kusho uKhanyile.

USihlalo wesigungu sabazali, uMnuz Moses Khanyile, uthe sekuneminyaka bekhononda emnyangweni ukuba ubakhele.

“Sesiyihambe yonke iminyango sizama ukuba kwakhiwe isikole.

Kusukela ngo-1990 sasungulwa asikaze sakhelwe.

Saqala siwudaka abazali besiphahleka njengoba manje sesiwumkhukhu. Uma sicela ukwakhelwa isikole kuthiwa izingane zincane kakhulu kulesi sikole njengoba zingaphezu kuka-30.

Sihlezi sibatshela ukuthi abazali bayazikhipha izingane zabo ngoba isikole asikho,” kusho uKhanyile.

Isikole sinothisha abane nothishanhloko, abanye bayitoho.

Kukhona nomsebenzi oyedwa ophekayo.

Isikole kuthiwa siyabelwa imali nguhulumeni njengazo zonke izikole ezingaphansi kukahulumeni.

Izincwadi zokufunda nokokufundisa kuthiwa kukhona, okushodayo nje yisakhiwo.

Kuthintwa okhulumela uMnyango KwaZulu-Natal, uMnuz Scelo Khuzwayo, uthe basabhekene nenselelo yokuqeda izikole ezifuze lesi.

“Kusezinhlelweni zethu ukuba sithuthukise zonke izikole, siziqede lezi ezingekho esimeni. Zikhona eziningi esezivele zakhiwe ngendlela, nazo zazisesimeni esifana nakulezi zikole okufundelwa kuzo phansi kwezihlahla.

Sizolulandelela lolu daba ukuze sithole ukuthi lesi sikole singasizakala kanjani noma sithole amakilasi esikhashana,” kusho uKhuzwayo.

Iyashuba eyesiteleka sabasebenzi baseNyuvesi yaKwaZulu-Natal (UKZN) okuthe izolo babhekisa phezulu imoto yonogada befuna kuqedwe eyokuqashwa kwabasebenzi betoho.

MHLENGI SHANGASE

IYASHUBA eyesiteleka sabasebenzi baseNyuvesi yaKwaZulu-Natal (UKZN) okuthe izolo babhekisa phezulu imoto yonogada befuna kuqedwe eyokuqashwa kwabasebenzi betoho.

Bekungangeneki emgwaqweni oya ophikweni lwaseWestville kwadingeka ukuthi abasebenzi nabafundi basebenzise ezinye izintuba.

Ukufunda kuyaqhubeka kule nyuvesi esithole incwadi yokugcina yenkantolo evimbela abasebenzi ukuthi bateleke.

Okhulumela inyuvesi, uMnuz Lesiba Seshoka, uthe isiteleka esingekho emthethweni sibe nodlame eWestville.

Uthe omunye wabasebenzi benkampani yonogada obekumele aphume izolo ekuseni emsebenzini ungenele lesi siteleka wavimbela abanye abasebenzi abebezongena.

“Kucekelwe phansi enye yezimoto zonogada kwalimala ababili abagcine ngokwelashwa. Isimo sishubile kodwa siyalawuleka. Ukufunda kuyaqhubeka kwezinye izikhungo akukho kuphazamiseka okubikiwe. Inyuvesi ithole incwadi yenkantolo enkulu yokugcina evimbela ukuthi kutelekwe,” usho kanje.

Uthe le ncwadi ivimbela ukucekelwa phansi kwempahla iphinde ibalule ezokuphepha kwabasebenzi nabafundi.

“Siyalihlonipha ilungelo lokuteleka kodwa akumele kuthunazwe ilungelo lalabo abangafuni ukuzibandakanya nombhikisho abafuna ukufunda nokusebenza. Sisiqaphile isimo, sitshale nonogada abazimele ukuze kuqinisekiswe ukuthi kunokuthula,” usho kanje.

Abasebenzi abahlanza inyuvesi, abenza ingadi, onogada abayitoho nalabo abangaqashiwe bangenele umbhikisho befuna ukuqashwa ngokugcwele.

Bafuna ukuqashwa ngokugcwele njengabanye ozakwabo kanti bakhala ngokuthi inyuvesi ichitha enkulu imali ekubeni izinkampani ezibaqashile zibanika amakinati.

Umbhikisho wabasebenzi abayitoho emanyuvesi ukapakele nakwamanye amanyuvesi kuleli.

Okhulumela amaphoyisa, uMajor Thulani Zwane, uthe amaphoyisa ophiko olubhekela udlame emphakathini asiqaphile isimo kule nyuvesi.

Uthe akukaboshwa muntu kulandela lo mbhikisho.

Kuzophela izinyanga ezintathu sekukhona akukhiphayo mayelana nophenyo ngehostela laseMlazi iGlebelends, uMvikeli woMphakathi u-Advocate Thuli Madonsela.

LUNGI LANGA

KUZOPHELA izinyanga ezintathu sekukhona akukhiphayo mayelana nophenyo ngehostela laseMlazi iGlebelends, uMvikeli woMphakathi u-Advocate Thuli Madonsela.

Izolo utshele abezindaba ukuthi kuzophela izinyanga ezintathu sekukhona imininingwane abakwazi ukuyikhipha mayelana nophenyo ngendlela okwenzeke ngayo izinto eGlebelands.

U-Adv Madonsela nethimba lakhe okukhona kulo nephini lakhe u-Adv Sifiso Malunga, bavakashele kuleliya hostela izolo ukuyoxoxisana namalungu omphakathi.

Bese bebuyela okwesibili kuleliya hostela kwazise ngonyaka odlule baya khona ngemuva kokuthi ihhovisi lakhe lathola isicelo kwiCommonwealth Legal Education Association (Clea), eholwa nguSolwazi David McQuoid Mason.

Bekulindeleke ukuthi axoxisane namaqembu amabili abhekene ngeziqu zamehlo.

Bese kufanele ayoxoxisana nelakwaBlock 52 lapho obekuhlala khona uMnuz Bonga Hlophe naye obulawe ngonyaka odlule.

“Sizobonana nawo wonke amaqembu sizwe kuwona. Sesikhulumile neqembu elilodwa lakwaBlock R. Sizobe sesikhuluma nelakwaBlock 52. Uma senza uphenyo asijwayele ukuthi sikhiphe imininingwane yesikutholayo sisaphenya, ngakho akukuningi engingakusho (okwamanje),” kusho u-Adv Madonsela.

Ngesikhathi ekhuluma nabezindaba ubesakhulume nelilodwa leli lwakwaBlock R obekuhlala kulo uMnuz Bongani Mthembu obulawe ngonyaka odlule.

Uveze ukuthi leli qembu limbikele ukuthi kunohlu lwabantu abangu-21 okuthiwa bazobulawa.

“Siqale sabikelwa ngu(Nkk) Vanessa Burger ngohlu olunabantu abangu-21 okuthiwa bazobulawa. Labo esihlangane nabo kwaBlock R nabo basibikelile ngalokhu. Sicele amaphoyisa ukuthi kube nokwenziwayo ukuvikela labo abakulolu hlu,” kusho u-Adv Madonsela.

Uthe ezinye zezinto abakhale ngazo wukungasebenzi ngendlela kwamaphoyisa.

Uqhube wathi bekunezikhalo ngokususwa kophiko lwamaphoyisa iNational Intervention Unit (NIU). Uthe lolu phiko lubuye lwabuyiselwa kodwa kuhle abantu baqonde ukuthi ngeke luhlezi lukhona ngoba lusuke lubekwe endaweni isikhashana ukuqapha isimo kusanodweshu.

Uthe uma sekubonakala kunozinzo abe eseyasuswa.

U-Adv Madonsela uthe abakufuna kakhulu kuleliya hostela wukuthi kube nokuthula.

Iphini lakhe u-Adv Malunga, lithe bafuna izinhlaka zikahulumeni ziziphendulele ngokwenzeka kuleliya hostela.

Ubale uMasipala weTheku noMnyango wezokuThuthukiswa koMphakathi njengezinye zezinhlaka abangafisa ziphendule.

Uthe uma abantu bephila ngaphansi kwezimo ezinzima bagcina sebebanga ngisho izinto ezingabukeka zingelutho kwabanye abantu.

Leli thimba lishaqekile ukubona isimo okuphila kuso abahlali bakuleli hostela ngesikhahi bevakashele khona ngonyaka odlule.

Uthe ziningi izinto abazitholile nokufanele bazibhekisise, ezinye zazo kube yizinsolo zokucwasana ngokobuzwe.

Sisehlazweni lokuhlukunyezwa kwabasebenzi baze bahanjiswe nqunu isibhedlela saseMseleni, KwaMhlabuyalingana.

MTHOKOZISI MANQELE

EseMseleni

SISEHLAZWENI lokuhlukunyezwa kwabasebenzi baze bahanjiswe nqunu isibhedlela saseMseleni, KwaMhlabuyalingana esihlale sithola izindondo ezingeni lesifundazwe nelikazwelonke zokuthi senza kahle kakhulu emgomeni wokubeka phambili umphakathi.

Ngisho nezikhulu zoMnyango wezeMpilo zivumile ukuthi nazo ziphoxeke kakhulu zithola ubufakazi bokuthi iningi inkohlakalo kulesi sibhedlela kuhlanganisa nokuhlukunyezwa kwabasebenzi. Umphakathi wale ndawo uthi ubuthule ngamabomu ungasibiki lesi bhedlela kodwa manje sekufike ekugcineni.

Lo mphakathi uhlangane nezikhulu zoMnyango wezeMpilo zaseMkhanyakude nebezivela ehhovisi likaNgqongqoshe wezeMpilo uDkt Sibongiseni Dhlomo ehholo lomphakathi eVuka Mabaso izolo. Amalungu omphakathi abethukuthele egane unwabu atshele emehlweni lezi khulu ukuthi bazinqumela ugwayi katiki wezinsuku ezintathu zokuthi baxoshe ngokushesha izimenenja zesibhedlela ezithinteka esehlakalweni sokuhambisa nqunu abasebenzi besibhedlela kungenjalo bazosivala lesi sibhedlela ngoba kugcwele ukukhohlakala.

Isolezwe beliyingxenye yalo mhlangano obuthanyelwe amalungu omphakathi abebalelwa ngaphezu kuka-700.

USihlalo wekomidi lomphakathi okhathazekile uMnuz Moses Mthembu uthe izimenenja zesibhedlela zihlangene nonogada besibhedlela zahlasela abasebenzi abasebenza endaweni yokuwasha izimpahla zesibhedlela.

“Kwalahleka incwadi yobufakazi bendawo yokuhlala yomunye umsebenzi waseThekwini owayeqashwe ngaphandle komthetho. Kwase kuphele izinsuku eziningi engaholi kufuneka le ncwadi kwase kusolwa labo mama wathi bayifihlile. Bakhunyuliswe izimpahla zokugqoka bahanjiswa nqunu babuye bathunjwa ehhovisi bephoqwa izimenenja zesilisa nezesifazane ukuthi abakhiphe le ncwadi kodwa bengayazi,” kubhoka uMthembu.

Uthe kuningi okunye ukukhohlakala okukhona.

“Kunabantu okungebona abendawo abaqashiwe kodwa isikhala somsebenzi sakhangiselwa abantu bendawo, endaweni okujimela kuyo abantu abagulayo sekwajima kuphela abelungu, iziguli zabamnyama azisabonwa khona uma ziyile azisizwa. Sibanikeze izinsuku ezintathu ukuthi balungise isimo kungenjalo sizosivala isibhedlela,” kusho yena.

UMqondisi eMnyangweni wezeMpilo esiFundeni UMkhanyakude uNksz Makhosazane Themba uthe sibashaqile isenzo sokuhlunyezwa kwabasebenzi.

“Yihlazo namanyala lento engiyizwayo yokuthi abesifazane bakhunyuliswe baba nqunu. Esesikwenzile njengamanje sesibamisile labo basebenzi abathathu abanye sisabaphenya sizobamisa maduze ngoba ngeke siyimele lento. Eyabantu abaqashwe ngokungemthetho nayo siyayiphenya kodwa sisaqala ngale ebucayi,” kusho uNksz Themba eshayelwa ihlombe.

Noma kunjalo umphakathi uvuke ngendlobane wathi awenelisekile yizimpendulo zikaNksz Themba. Omunye ozichaze njengosindisiwe uMnuz Zenzele Ngubane uvele wabhoka wathi kunabasebenzi abaxoshwa ngoba kuthiwa akubona abendawo.

“Kungani ningabaxoshi abanye ngoba basekhona niphenya into ebhekephi? Sicela nisixoshele nomphathi wesibhedlela uDkt Frudlund benoMatron Fakude ngoba yibo kanye abakhohlakele baqasha abantu okungebona abendawo uma bebuzwa bese bethi yibo abaphethe,” kubhoka uNgubane.

IMeya yaKwaMhlabuyalingana uMnuz Solo Mkhombo inxuse amalungu omphakathi ukuba azwele iziguli ngoba azikwazi ukuzisiza ukuvala kwabo isibhedlela kuzokona okuningi.

Izoshaya ngolonwabu intuthuko KwaZulu-Natal ngenxa yesimo esingesihle somnotho. Lokhu kuvezwe uMnuz Senzo Mchunu.

CELANI SIKHAKHANE

IZOSHAYA ngolonwabu intuthuko KwaZulu-Natal ngenxa yesimo esingesihle somnotho, esiphoqe uhulumeni ukuba ahoxise imali engu-R1billion yezidingo zesifundazwe ukuze kongiwe imali.

Lokhu kuvezwe uNdunankulu waKwaZulu-Natal, uMnuz Senzo Mchunu, izolo ngesikhathi ethula inkulumo yesifundazwe e-Agricultural Show Ground, eMgungundlovu.

Uthe nakuba kungeke kumiswe ukuyiswa kwezidingo kubantu kodwa kumele bazi ukuthi kusuka manje ukulethwa kwengqalasizinda angeke kusagijima ngendlela ebekwenzeka ngayo ngenxa yokuthi uhulumeni unqume ukonga.

“Nakuba isabelo-mali sethu sizokwehliswa ngemali engaphezulu kuka-R1 billion, kodwa likhona ithemba ngoba izidingo zomphakathi kuhlanganisa nengqalasizinda kuzoqhubeka. Nokho akusezukuqhubeka ngendlela obekuhlelwe ngayo njengokuthi; ukwakhiwa komgwaqo othile bekumele kuphuthunyiswe ngamaphesenti angu-100, kodwa manje sekuzoba ngamaphesenti angu-70,” kusho uMchunu.

Nakuba uMchunu eqwashisa ngesimo somnotho esishaya uhulumeni, kodwa wethembise izinhlelo eziningana zokuzama ukudala amathuba emisebenzi emphakathini.

Okunye kwakho kube wuhlelo lokuqala isikhungo sokuqeqesha osomabhizinisi abancane ukuze bakwazi ukungena ezimakethe ezinkulu ezingadala ukufukuleka komnotho.

UMchunu ubuye waveza ukuthi okunye abakuhlelayo wukuqinisa ukuhanjiswa kwengqalasizinda ezindaweni zasemakhaya njengoba bezofakela imizi engu-24 000 ugesi ngemali engu-R600 million abayibeke eceleni.

UMchunu ubuye wathinta udaba lwesomiso, wathi lubalimaza kakhulu emnothweni wesifundazwe kangangokuthi manje sebezama izindlela zokuba bawambe phansi amanzi, ikakhulukazi ezindaweni zaseZululand ezishayeke kakhulu.

UMchunu ukhaliswe yimibango ekhona phakathi kwamaTrust omphakathi asuke enikezwe umhlaba nezinduna ezingawafuni.

“Silo samabandla, kunenkinga ekhona lapha yokubanga phakathi kwamaTrust neziNduna ngemihlaba. Angiqondi ukuthi lokhu kwenzeka kanjani ngoba bonke laba bantu bamnyama ngakho kumele babambisane uma sekutholakele umhlaba ukuze bawusebenzise ngokuzithuthukisa. Okunye okusilimazayo wukuthi abantu bakithi uma sebenikezwe umhlaba abasuke befake izicelo zawo, bayalwa noma abanye bagiye baqephuze bese kuthi ngemuva kwesikhathi bawubuyisele emuva ngoba bengasazi ukuthi bazowenzani,” kusho uMchunu.

Ubuye wakhala ngokunyuka kobugebengu bokwebiwa kwemfuyo, ukubulawa kwabantu nokugqekeza.

UMchunu ukhulume kafushane ngodaba lokudala amathuba emisebenzi, ikakhulukazi entsheni ephuma ezikhungweni zemfundo ephakeme, ekutheni ibhekelelwe ezinhlakeni ezahlukene zikahulumeni ukuba iqeqeshwe isikhathi esithile futhi ibe nemihlomulo eyitholayo.

Ukhulume nangezinga eliphezulu lokufeyila kukamatric esifundazweni, wathi kumele kubanjiswane ukuze le nkinga ilungiseke.

UMchunu umemezele nokuthi uhulumeni wakhe usufake isicelo kuzwelonke sokuba kuxegiswe intela kubafelokazi, ngoba bagcina bethwele kanzima ngenxa yokuthi bangabazali abangabodwana, kuhlanganisa namafa abasuke bewashiyelwe abayeni babo.

Okunye bafuna nokuthi kuxegiswe intela ekudleni kwezingane ezincane ukuze kunqandwe ububha emindenini empofu.

Inyanga uNhlolannja seyethiwa inyanga yothando. Kuhle kakhulu lokho. Okubuhlungu nje wukuba inyanga yonke ize iqanjwe ngothando olukhetha amabala nemibala.

INYANGA uNhlolannja seyethiwa inyanga yothando. Kuhle kakhulu lokho. Okubuhlungu nje wukuba inyanga yonke ize iqanjwe ngothando olukhetha amabala nemibala. Angiyihlabi le nyanga yothando kepha ngiyithanda ngoba ingikhumbuza uthando lwakithi olusabalele. EsiZulwini le nyanga ibizwa ngoNhlolanja ngoba kusuke kulandelana izinja ziphingana. Kusewuthando nalolo. Uthando lwezinja nokho lwenziwa esithe. Izinja zisuke zilandela injakazi eyodwa edunjelwe.

Lolu thando okuphithenwe ngalo kule nyanga, kaNhlolanja, lusuka esiLungwini. Nakhona ingxenyana nje yabeLungu. Siyathanda thina ukuduma nezinto zabantu sengathi asinazo ezethu. Lokhu kuduma nezinto zabezizwe sekudale omkhulu umonakalo noqhekeko. Izehlukaniso eziningi zidalwa yikona lokhu kuduma nezinto zakweminye imizi. Uthando lwesiLungu lungumsweswana wothando lokubukana emehlweni phakathi kwababili abathandana njengamajuba. Olwakithi uthando olwamahlokohloko; akha inxuluma ongaze udideke uthi umuntu akakwazi kwabo, kulesiya sidlidli.

Olwakithi uthando lusabalele. Lwakhelwe phezu kwesisekelo sobuntu, hhayi izinja. Ngisho uthando lwensizwa nentombi lwakhelwe phezu kwesisekelo seningi. Luqala insizwa iseshela. Iphumela obala qekelele, ishele esigangeleni kubuka noma ubani. Intombi inezesheli eziningi, ezingabangisani nokho, eziyixinayo. Uma kwenzeka zificana entombini eziyeshelayo ziyadedelana. Ukudedelana kwazo kukhombisa ukuthi uthando alunambango futhi alufihlwa.

Alufihlwa uthando komakhelwane. Yikho lokho okudala ukuba umakhelwane ofikayo asiselwe inkomo yokusenga ukuze angalambi. Yikho lokhu okudala kunanelwane ukuze kumbozeke ihlazo likamakhelwane. Uthando olungenamngcele nasigaba. Uthando olungabheki ubuhlobo nobungani kepha olwakhelwe phezu kwesisekelo sobuntu. Uthando lobuZulu olujulile oluthi akuphathwe kahle izihambi, zinikwe indawo simahla.

Uthando lobuzwe yilolo oluqala ekhaya. Uthando olungenasikhwele. Sikhuluma ngothando lwesithembu lapho amakhosikazi ehlangene endodeni engakhwelezelani kepha ebizana ngawozakwethu. Lokho kubizana kusho ukuthi ningabandawonye. Ukudedelana kwala makhosikazi, ondla umyeni kwakha ukubambisana nokuqhudelana. Lolu thando lukapakela ngisho ezinganeni zidle ndawonye ngalukhezo lunye. Izingane zikhula zibizana ngabafowethu nawodadewethu egcekeni.

Uthando lobuzwe luqala enhloniphweni yokwazisa umuntu. Izingane zifundiswa ukuhlonipha noma yimuphi umuntu omdala. Nomuntu omdala naye uhlonipha omncane ngoba kuhlonishwana kabili. Uthando lwawomakhelwane lubonakala ngokuthi abadala bafundise abancane ngisho bengabazali. Uma indoda ibona izingane zenza iphutha, kayibuzi ukuthi izingane ezakwabani. Hhawu lafa izwe sibhekile! Awusakwazi manje ukusola ingane oyaziyo nongayazi ngoba izokubopha. Abantu baboshwe izandla, abasakwazi ukusabalalisa uthando bakhuliselane izingane.

Sikhuluma ngothando olugcwele ukwesaba ukwenza ihlazo. Lolu valo umZulu ubekhula nalo aze alukhombise ezizweni ngenkonzo enhle yasemzini. Lafa elihle kakhulu lapho ukonakala kwamakhosikazi sekusemthethweni. Inkosikazi ingagcini ngokuhambaze kepha yembulele nabangafanele umzimba wayo. Sisesikhathini lapho umuntu engesabi ukuthela omunye ngehlazo. Esikhathini lapho kufe khona unembeza.

Uthando lokwazisana nobunye lubonakala ngokuthi umuntu angambulali omunye. Uma kuphela uthando kuqubuka inzondo enukayo.