‘Ubaba ubejwayele ukumshaya umama. Bese kunesikhathi lokhu kwenzeka kodwa besingazi ukuthi usengagcina ngokumbulala ngale ndlela.”

NONTUTHUKO NGUBANE

‘UBABA ubejwayele ukumshaya umama. Bese kunesikhathi lokhu kwenzeka kodwa besingazi ukuthi usengagcina ngokumbulala ngale ndlela.”

Lawa ngamagama ashiwo yindodana yephoyisa likaMasipala weTheku elingqokloze ngenhlamvu unina maqede nalo lazidubula ngeSonto ebusuku, eMkhumbane kulandela ingxabano okuthiwa ibithinta umjolo.

UCaptain Sipho Nkwanyana (39) nenkosikazi yakhe uConstable Sibongile Smangele Nkwanyana (38), izidumbu zabo bezidindilize egcekeni emzini wabo okuBowood Crescent ngeSonto phakathi kwamabili.

Indodana yabo eneminyaka engu-12 ebihlezi nodadewabo oneminyaka engu-15, yibona abashayele amaphoyisa ucingo bewabikela ukuthi abazali babo badubulene emuva kokuba indodana izibonele lesi sigameko.

Indodana yalezi zithandani, igama layo engeke silidalule ngenxa yeminyaka yayo, itshele Isolezwe ukuthi abazali babo bebehlala ngokuklwebhana kodwa akubonile akasoze akukhohlwa.

“Ngivule umnyango ngabona umama ehayiza ephuma emotweni abebehlezi kuyo. Umama ungimemezile ethi angivale umnyango, ubebaleka ezama ukuphuma ngesango.

“Ubaba ubemjaha ngesibhamu. Umficile, wamdubula kathathu. Bengibukela, kuthe uma eselele phansi umama igazi ligcwele phansi, wazidubula naye ubaba,” kusho indodana yabo.

Ithe ngaleso sikhathi yona ibilunguza ngewindi ngoba kade ekhiyile emnyango, elandela umyalelo kanina.

Yena nodadewabo obekwelinye ikamelo babe sebethinta amaphoyisa ngoba sebebona abazali babo bedindilizile phansi bengasanyakazi.

Lo mfana ofunda uGrade 7 uthe bebesaba, bekhala, bengazi ukuthi kumele benzenjani.

“Ngithinte amaphoyisa ngawatshela ukuthi ubaba nomama sengathi bashonile, bagcwele igazi futhi balele phansi. Ubaba nguyena umuntu obethintwa ngomakhelwane uma bezizwa bengaphephile ngoba bebazi ukuthi uyiphoyisa, kodwa ngeSonto bekumele ngithinte amaphoyisa ngoba nakhu yena esebulele umama. Ngosuku nje olulodwa abazali bami bobabili bashonile, sengiyintandane,” kusho yena ekhala.

Lo mfana ubebuye achiphize izinyembezi kubonakala ukuthi ubone lukhulu kodwa ubexoxa konke akubeke kucace.

Isolezwe lithole ukuthi lezi zithandani zaxabana kulandela ukuthi uNkk Nkwanyana ebone umyeni wakhe ezikhiphile nomunye wesifazane.

Kuthiwa uNkk Nkwanyana ube eseya ekhaya kubo eyopholisa ikhanda.

Esebuya kusuke umsindo, uNkwanyana esola unkosikazi wakhe ngokuthi naye uyajola njengoba ebengakwazi ukumthola ocingweni (ngesikhathi ekubo).

Lifika kulo muzi izolo, Isolezwe libingelelwe yingqumba yenhlabathi egcekeni, kugcwele izimoto okubalwa nezamaphoyisa kamasipala, kucaca ukuthi lukhulu oluvelile.

Ngemuva kwendlu bekupakwe izimoto ezintathu zalezi zithandani, iToyota Fortuner, iTazz ne-Audi.

Bekuyaluza abantu, kusobala ukuthi lukhulu olwehlile.

UMnuz Musa Nkwanyana, ongumfowabo omdala kaNkwanyana, uthe nabo bakhungathekile ngalesi sigameko esibavelele.

“Ngithintwe ngumama eseVerulam engitshela ukuthi uthintwa amaphoyisa amtshela ukuthi umfowethu nomakoti sebeshonile, umfowethu umdubulile. Uma sithola umfowethu ubecikwe wukuthi umakoti uhambile waya kubo (eNtuzuma) kusukela ngoLwesihlanu, uma emshayela ucingo ubengamtholi.

“Kuthe esebuya umakoti ngeSonto baxabana. Umcele ukuba bayoxoxa emotweni nokuyilapho emkhiphele khona isibhamu. Umakoti uphume wabaleka. Umjahile wamdubula egcekeni wabe esezidubula naye. Bobabili bashonele endaweni yesigameko,” kusho uMusa.

Esinye isihlobo esikhulume neSolezwe, sithe yize uNkwanyana ebeshaya kodwa bebengakulindele lokhu.

“Ubabomncane besazi impela ukuthi uyashaya kodwa besingazi ukuthi angaze ambulale unkosikazi wakhe. Ubengumuntu othulayo futhi nguyena obehlale esikhuza uma senza izinto ezingasile. Sishaqekile ngokwenzekile,” kusho isihlobo.

UNkwanyana ubechazwa njengomuntu othulayo.

Amalungiselelo omgcwabo abengakaphothulwa.

Okhulumelama amaphoyisa KwaZulu-Natal uLieutenant Nqobile Gwala uthe amaphoyisa aseCato Manor avule icala lokubulala nedokodo ngokushona kwalezi zithandani ezashada ngo-2001.

LONA ngunyaka wokuqala uNkk Samkelisiwe Mdunge ehlala ngaphandle kwendodakazi yakhe uFisa (13).

ZANELE MTHETHWA

LONA ngunyaka wokuqala uNkk Samkelisiwe Mdunge ehlala ngaphandle kwendodakazi yakhe uFisa (13).

Yize ecabange kaningi ngaphambi kokufaka uFisa eMpangeni High School, okuhlalwa kuyo ngaphakathi, unethemba lokuthi kukhona okuhle azokufunda.

UNkk Mdunge naye owafunda ezikoleni ebezidume ngama-boarding school, uthi izimo zasekhaya yizona ezibenze bavumelana nendodakazi yakhe ukuthi iyoqala uGrade 9 kulesi sikole.

Phambilini baningi abazali abebefisa izingane zifunde ezikoleni okuhlalwa ngaphakathi kuzo, ebezithathwa njengezinemfundo engcono.

Ngenxa yokushintsha kwezikhathi abanye sekuthi noma befisa kodwa bacabange kaningi njengoba bethi akuselona isu elihle ukuqhelelana nengane.

Ngonyaka odlule lwaba sematheni udaba lwe-video eyaputshuka, yasabalaliswa nasezinkundleni zokuxhumana, eveza abafundi baseVukuzakhe High School, eMlazi, behlukumeza enye intombazane.

Lesi sigameko senzeka endaweni okuhlala kuyo abafundi, beshaya omunye bemsola ngokukhipha izindaba zabo.

Le video yafaka itwetwe kubazali abanye ababengazi ukuthi injani impilo yase-boarding school.

Nokho abazali abafundisa izingane kulezi zikole bathi kuningi okuhle okungafundwa kuzo.

UNksz Mdunge uthe okwenze kwaba lula ukuthatha isinqumo sokufaka ingane eboarding school wukuthi naye wafunda kuyona.

“Osekuyinselelo enkulu esikhathini samanje wukuthola iboarding school ezokwanelisa ngoba kumele uqinisekise ukuthi ingane isezandleni ezifanele.

“Impilo yesimanje ayisafani nakuqala, kuningi osekufanele kucatshangwe ngumzali. Mina ngikhethe isikole esixube ubulili, ngoba kwesinobulili obubodwa kunezinselelo esikhathini samanje.

Bengingafuni ingane yami ifunde namantombazane kuphela ekubeni izophumela emphakathini oxubile,” kusho yena.

Uthe akubanga lula ukucabanga ukuthi sekuzomele ingane yakhe ibe kude naye kodwa ubefuna ifunde ngokuzimela.

“Akumnandi ukuhlala kude nengane yakho kodwa ngakolunye uhlangothi kuyayisiza, isheshe ikwazi ukuzimela.

“Kuyilungiselela nokuthi ingaxwayi uma sekufanele iyongena enyuvesi. Kungisizile ukuthi isikole engisitholile siyabavumela ukuthi babuye ngezimpelasonto, okwenza singadukelani kakhulu. Okuningi sikuxoxa ngocingo phakathi nesonto ukuze angabuyi ekhaya sesiqhelelene kakhulu,” usho kanje.

UNkk Simphiwe Hlengwa, ongumeluleki wemindeni kwaFamsa, uthi ngenxa yokushintsha kwezikhathi izingane sezisidinga eduze isandla somzali.

“Ingane kuyenzeka ingaphatheki kahle e-boarding school kodwa umzali engazi ngoba ifika ekhaya sekuvalwe izikole nangezimpelasonto. Sikhuthaza ukuthi umzali athole ulwazi ngesikole ayisa kuso ingane, futhi naye abambe iqhaza angathembeli ku-matron esikoleni.

“Umzali akabe nobudlelwano obuqinile nengane nesikole sayo, ayeseke ukuze nayo ingaziboni sengathi ilahliwe,” kusho yena.

Kuthiwa abanye basenomqondo wokuthi iboarding school indawo yokulahla noma ukujezisa ingane, okwenza bangalandeli nokwenzeka kuyo.

UMNDENI wowesifazane owadutshulwa emotweni yomsebenzi wesoka lakhe, uthi awukakulungeli ukuxolela ababulali.

ZANELE MTHETHWA

UMNDENI wowesifazane owadutshulwa emotweni yomsebenzi wesoka lakhe elingunogada eHibberdene ngoDisemba, uthi awukakulungeli ukuxolela ababulali omunye wabo ogwetshwe izolo eNkantolo eNkulu eMgungundlovu.

UNksz Ntombifuthi “Ntame” Luthuli (29), wadutshulwa ngababezobamba inkunzi eMathulini, eHibberdene ngoDisemba 3. UKhuphukani Siphamandla Hadebe nomunye umsolwa baze baboshwa ngoJanuwari 15.

UHadebe ugwetshelwe icala lokubamba inkunzi, elokuzama ukubulala nelokubulala uNksz Luthuli owayehleli nesoka lakhe elingunogada emotweni yomsebenzi.

NgoLwesihlanu uHadebe walivuma icala, izolo wagwetshwa udilikajele kwelokubulala, iminyaka eyishumi kwelokuzama ukubulala nengu-15 kwelokubamba inkunzi kuhlonyiwe.

UMnuz Nhlonipho Majola aboshwa naye uyaliphika icala, elakhe lizoqulwa eceleni.

Ngesikhathi befaka isicelo sebheyili uHadebe wayinqaba, uMajola wathola eka-R1000.

UHadebe nomunye umsolwa kuthiwa bagasela emotweni okwakuhleli kuyo umufi nesoka eduze kwakubo, bazama ukuthatha isibhamu sikanogada kwadubuleka uNksz Luthuli.

Babaleka nozankosi, iselula nethoshi elisetshenziswa ngonogada.

Ngaphambi kokugwetshwa uHadebe unikwe ithuba lokukhuluma nomndeni kamufi nokuyilapho ecele khona intethelelo.

UNksz Lindiwe Luthuli (60), ongunina omncane kamufi uthe bakhulumile nombulali ezixolisela.

“Ngicabanga ukuthi kusekusha ukuthi singakwazi ukuxolela ababulali, imiqondo isadidekile futhi sihlukumezekile. Kusenzima ukususa isithombe emqondweni ngimbona uNtame eseshonile, ubuchopho bucoshwa emotweni adutshulwa kuyo. Namanje kusenzima ukuchazela izingane uma zibuza ukuthi washonaphi,” kusho yena.

Yize uNksz Luthuli ebonga amaphoyisa ngokusheshe abophe abasolwa kuphume nesigwebo kuHadebe athi sibanelisile, uthi kepha lokhu ngeke kubususe ubuhlungu ababuzwayo.

Uthe bebesondelene nomufi njengoba bese kunguye unina emuva kokushonelwa ngabazali esemncane.

Uveze ukuthi ubewusizo ondla ngisho izingane zikadadewabo, enakekela nogogo wakhe oneminyaka engu-86.

Ngosuku lwesigameko umndeni wawungazi ukuthi akekho ekhaya ngoba kwase kusebusuku.

“Bengingalazi isoka lakhe ngoba ubesihlonipha engafuni sibone izinto azenzayo. Ngicabanga ukuthi yingakho aphuma ebusuku eya emotweni yesoka ngoba bengingalazi,” usho kanje.

Uthe wezwa kuqhuma isibhamu emgwaqweni esilandelwe wucingo lumtshela ukuthi uNtame uselimele.

“Sathi sifika sekugcwele amaphoyisa saphambana ne-ambulensi kanti vele yafika eseshonile. Namanje akuvumi ngikhohlwe yilesi sithombe sakhe eseshonile emotweni,” kusho yena.

BAFUNDISA bejeqeza othisha abasatshiswayo eMatshitsholo High, eDenny Dalton ngasoNdini.

MHLENGI SHANGASE

BAFUNDISA bejeqeza othisha abasatshiswayo eMatshitsholo High, eDenny Dalton ngasoNdini osekwakhiwe namabhokisi omngcwabo abhalwe amagama abo.

Labo thisha basaba ukusocongwa njengoba kuthiwa isimo sishubile umphakathi awusabafuni esikoleni.

Lesi sikole senze kabi nyakenye kwamatric njengoba sithole u-2.6% kwaphasa abafundi abane kwabangu-151 ababhalile.

Umphakathi kuthiwa awuneme ngendlela lesi sikole esenze ngayo yingakho sekugxekwa abanye othisha ngokwenza kabi kwabafundi.

Izolo uNgqongqoshe wezeMfundo esifundazweni, uNkk Peggy Nkonyeni, obekumele athamele umhlangano kulesi sikole wokuxazulula isimo ujube izikhulu zomnyango u-Advocate Bheki Masuku obhekele ukuqasha noNksz Thembelihle Gumede obhekele ukusebenza kwezifunda.

UMnuz Allen Thompson, oyiPhini likaMengameli weNatu, uthe amalungu abo ayasatshiswa kulesi sikole nguthishanhloko amsole ngokuhlohla umphakathi ukuthi ubavukele ngoba kufeyiliwe. Uthe lesi sikole sike sathinteka ekukopeleni kwabafundi ngo-2014 wathi nyakenye kwatshalwa abasebenzi bomnyango ababeqaphe ngelokhozi izivivinyo yingakho besola ukuthi lehla izinga lokuphasa.

“Uthishanhloko uhambe ehlohla umphakathi ukuthi ngothisha abangamalungu ethu abahlaba umkhosi ngokokupela yingakho kufeyiliwe ngo-2015 kwaphasa abafundi abane kuphela. Sifuna athathelwe izinyathelo ngoba uhlohla umphakathi omasha uthwele amabhokisi anamagama amalungu ethu. Akukho ukusatshiswa okufuze lokhu esengake ngakubona ngoba lokhu kukhomba ukuthi kukhona abacabanga ukuthi uma ningaboni ngaso linye kungcono ufe,” usho kanje.

Uthe bafuna uNkk Nkonyeni nozakwabo wezokuPhepha uMnuz Willies Mchunu balusukumele ngokushesha lolu daba.

“Indaba yokufa kothisha isavusa amanxeba kuthina siyiNatu. Kunothisha ababulawa kwaMhlabuyalingana okwaboshwa uthishanhloko naye owayehlohla umphakathi ukuthi ubenzakalise. Kubi ukuthi uma uthishanhloko ehluleka ukuphatha isikole aphasise abafundi bese kusolwa othisha abambalwa kuthiwe yibona okumele basuswe ngoba bayizimpimpi. Amalungu ethu avule namacala emaphoyiseni ngoba asethuka izanya kulandela lesi sehlakalo samabhokisi,” usho kanje.

Kulesi sikole kuke kwashiswa indlu kanogada ijikijelwa ngebhomu likaphethroli.

Okhulumela umnyango wezemfundo, uMnuz Sihle Mlotshwa uthe kube nomhlangano nomphakathi bavumelana nabazali ukuthi izingane zibuyele esikoleni namhlanje.

Ukugxekile ukuzithathela umthetho kwabazali wathi uma kukhona abangeneme ngakho kumele baxhumane nomnyango.

“Akufundwanga ngoMsombuluko nayizolo ngoba bekunomhlangano. Sivumelene nabazali ukuthi bazobuyisa izingane zabo kusasa (namhlanje) ukuze kuqalwe kufundwe.”

Okhulumela amaphoyisa uLt Nqobile Gwala ukuqinisekisile ukuthi amaphoyisa aseMpungamhlophe aphenya amacala athinta lesi sikole wathi akukaboshwa muntu.

SEKUQUBUKE umbango ngomuzi waseMzinyathi, eNanda, okwashona kuwo abathathu bedutshulwa ngusibali wabo ngonyaka odlule.

NONTUTHUKO NGUBANE

SEKUQUBUKE umbango ngomuzi waseMzinyathi, eNanda, okwashona kuwo abathathu bedutshulwa ngusibali wabo ngonyaka odlule.

Isolezwe lithole ukuthi kukhulu ukudonsisana phakathi komndeni wakwaNtuli nowakwaNdwandwe kulandela isigameko esaba ngundabamlonyeni ngo-Okthoba 2015.

Umthombo ongashayi eceleni uveze ukuthi le mindeni iyisane enkantolo yesizwe eMzinyathi ngoba kukhona ofuna ukudayisa umuzi abanye befuna ukuhlala kuwo.

Lokhu kulandela isigameko okwashona kuso uNksz Nompumelelo Ndwandwe (45), Nkk Zandile Molefe (48) nomyeni wakhe uMnuz Siphokuhle Molefe (55).

Laba babekade bephelezela udadewabo uNksz Nonhlanhla Ndwandwe (43) eyolanda izimpahla zakhe, ngoba engasazwani nomyeni wakhe owayesemlobolile.

Umyeni kaNonhlanhla uMnuz Master Ntuli, obhekene namacala amathathu okubulala, kuthiwa wavulela ngenhlamvu kosibali bakhe, uNonhlanhla wakwazi ukuphunyuka wabaleka.

Lo muzi oseMzinyathi kuthiwa bese behlale kuwo iminyaka engaphezu kuka-10 nengane yabo yomfana. Njengoba uNtuli eboshiwe uNksz Ndwandwe uqashe umuntu ozohlala khona ukuwugada. Umdonsiswano kuthiwa ususwe wukuthi abakubo kaNtuli sebefuna ukuhlala kulo muzi, kanti uNksz Ndwandwe yena usefuna ukuwudayisa.

“Ngikhuluma nawe nje abakwaNtuli bahlezi kulo muzi. Kwenzeka lokho nje uNonhlanhla ubefuna udayiswe ngoba usebenze kanzima ewakha nomyeni wakhe. Kunefenisha okuthiwa uNonhlanhla wayithatha ngoba ayithenga, abakwaNtuli bafuna ayibuyise,” kuveza umthombo.

Inkosi uMqoqi Ngcobo, okubikwe kuye lolu daba, ithe iyalwazi.

“Kufike owesifazane ozibize ngengoduso yomnikazi womuzi wathi ufuna ukudayisa umuzi. Lo muzi ngokolwazi esinalo, noluvela ezinduneni, kwabekwa uMaster Ntuli, ngakho umuzi ngowakhe. Ngabe senginqaba ukuthi kudayiswe umuzi ngoba umnikazi engekho. Kusenjalo kufike enye intombazane yathi eyakwaNtuli futhi isizohlala kulo muzi. Nalokho ngakunqaba. Ukuze kube nokuthula ngithe akungahlali muntu kulo muzi. Ngize nganxusa amaphoyisa ukuba awugade,” kusho Inkosi uNgcobo.

Isolezwe lithole ukuthi kukhona nemiNyango kahulumeni eze yangenelela kulolu daba, kwagcina kuvunwe umndeni wakwaNtuli ukuba uqhubeke nokuhlala kule ndlu.

UNgcobo uthe uma kwenzeka kuba khona abalimalayo kule ndlu, kuyomele bazimele ngoba ubesezamile ukuxazulula le ndaba. “Asifuni kuphinde kube nesigameko esifanayo kule ndlu, sifuna ukuthula kule ndawo,” kusho uNgcobo.

Icala elibhekene noMaster Ntuli, izolo lihlehliselwe usuku olungakaziwa ngenxa yokuthi umphenyi akafikanga ngoba kuthiwa ubanjwe wukugula.

UNtuli usatokile okwamanje ejele eWestville.

Ushaqekile umphakathi wasoSuthu ngokubulawa kwendoda nomkayo.

NONTUTHUKO NGUBANE

USHAQEKILE umphakathi wasoSuthu, eHambuma, KwaNongoma, ngokubulawa kwendoda nomkayo abadutshulwe ngemvula yezinhlamvu ngabantu abangaziwa belele ngoMsombuluko ebusuku.

Kulesi sigameko kushone uMnuz Mabhungu Bazendoda Ntuli (34) nonkosikazi wakhe uMagagasi Ntshapheka abashade ngoJuni ngonyaka odlule.

Isolezwe lithole ukuthi uNtuli baphinde bambhunyela ngophethroli kodwa bangamshisa.

Umthombo othembekile uthe bekunezinsolo eziqinile zokuthi uNtuli ubeyinkabi yize umndeni wakhe uthe awazi lutho ngalezo zinsolo.

Kuvele ukuthi ubethinteka kwelinye icala lokuzama ukubulala omunye usomatekisi kodwa lokhu akuzange kuqinisekiswe ngamaphoyisa.

Okhulumela amaphoyisa KwaZulu-Natal, uMajor Thulani Zwane, ukuqinisekisile ukuthi laba ababulewe bebesendlini belele.

“NgoMsombuluko ebusuku eHambuma, kwaNtuli kungene abantu abangaziwa bafike bavulela ngenhlamvu. Kulesi sigameko kushone uNtuli nonkosikazi wakhe. Abasolwa bangenele laba abashadile kade belele base bayabadubula. Imbangela yokuhlaselwa kwabo ayaziwa. Kuvulwe amacala amabili okubulala. Amaphoyisa aKwaNongoma ayaphenya. Akekho osaboshiwe, uphenyo luyaqhubeka,” kusho uZwane.

Amaphoyisa acele abanolwazi ukuthi bawathinte ngokushesha ukuze kuboshwe abasolwa.

Udadewabo kamufi, uNksz Cebi Ntuli, utshele Isolezwe ukuthi umfowabo nomakoti ubafice endlini abebelele kuyo sebeshonile.

“Bengilele ekhaya elikhulu umfowethu elele emzini kababa omncane. Kuyibangana elincane. Ngizwe kuqhuma isibhamu, ngivuse amanye amalungu omndeni. Ngibe sengiya emzini kababa omncane ngiyobheka isimo. Ngifike unkosikazi kababa omncane ezivalele nezingane kwenye indlu. Ngithe uma sengiyobheka lapho bekulele khona umfowethu ngahlangatshezwa yisidumbu sikamakoti ngasemnyango. Ngaphakathi bekukhona esikamfowethu, ubethelwe ngophethroli emzimbeni, nesigubhu sashiywa eduze kwakhe,” kusho uNksz Ntuli.

Uthe uvele waqhumisa isililo ebona igazi ligobhoza endlini.

Uthe umfowabo ubesanda kuthatha bengakabi ngisho nezingane. “Umfowethu ushadelwe ngonyaka odlule ngoJuni. Besingazi ukuthi banezitha. Sisamangele nathi, asazi ukuthi ngubani ofike wababulala. Sinemibuzo eminingi kodwa azikho izimpendulo. Esikusolayo wukuthi obabulele ubazi kahle ukuthi balala lapha. Umfowethu uhlala ekhaya kuze kushone ilanga bese ezolala emzini kababa omncane ebusuku,” kusho uNksz Ntuli.

Ebuzwa ngokusebenza kamfowabo uthe ngokwazi kwakhe ubengasebenzi ndawo.

Isolezwe lithole ngomthombo ongathandanga ukudalulwa ukuthi umphakathi wakule ndawo uthukile ngokubulawa kwalaba ngoba kungenzeka kube khona ofuna ukuziphindiselela.

“UNtuli bekuhlezi kunamahlebezi okuthi uyinkabi, ubengeyena umuntu otholakala noma yikanjani. Asazi ukuthi laba abamhlasele bebazi kanjani ukuthi bazomthola emzini kayise omncane.

“Umphakathi uthukile ngoba awazi ukuthi kuzokwenzekani njengoba kuhlaselwe yena, wonke umuntu uthukile,” kusho umthombo.

SEBEZIKHULULA emahlathini abantu bakwa-J, KwaDabeka.

BONISWA MOHALE

SEBEZIKHULULA emahlathini abantu bakwa-J, KwaDabeka, abakhala ngokuthi amathoyilethi abo omgodi abawakhelwa ngo-1992 asegcwele ayaphuphuma.

Laba bantu babe nombhikisho, bavala imigwaqo, befuna ukwakhelwa amathoyilethi ashawayo.

Batshele Isolezwe ukuthi bazovala ipayipi elithwala indle elinqamula emizini yabo ukuze abantu bakoWyebank, nezinye izigceme zaKwaDabeka, bezobuzwa ubunzima ababhekene nabo ngokugcwalelwa ngamathoyilethi.

Ngokusho kukaMnuz Mxolisi Ndlovu, abantu bakulesi sigceme bathenga iziza ngo-1992 base bakhelwa amathoyilethi omgodi.

Kuthe uma sekungena intuthuko bacela ukuthi bakhelwe amathoyilethe ashaywayo nezitamkoko ezizohambisa indle.

“Kudala silukhuluma udaba lokungabi namathoyilethi, kwathi ngo-2014 saluhambisa kwaboPhiko lwaManzi neNhlanzeko kuMasipala weTheku, sasho ukuthi sicela amathoyilethi ashawayo njengakwezinye izindawo. Udaba lwethu lwabhekwa kwase kuthiwa sizokwakhelwa amathoyilethi ngoJuni. Kwathi ngoJuni sesingasakhelwa sadlulela ehhovisini leMeya. Satshelwa yiyona ukuthi ngoJulayi 2015 kuzoqala uhlelo lokuthi sakhelwe amathoyilethi. Okubuhlungu wukuthi amathoyilethi agcwele, izimoto ezimoma indlela azikwazi ukungena ngenxa yokuthi amapayipi awafinyeleli kweminye imizi. Sizikhulula emahlathini ngoba asisakwazi ukungena emathoyilethi ethu,” kusho uNdlovu.

Amazwi akhe enanelwe nguMnuz Wiseman Ntuli (34), othe ucela uMasipala abakhele amathoyilethi ashaywayo ngoba vele likhona ipayipi elihambisa indle linqamula phakathi kwezindlu zabo okusho ukuthi kuzoba lula ukuwakha izindlu zangasese.

“Kudala sibhikisha, sishisa amathayi sivala nomgwaqo manje sibona kungcono ukuthi sivale ipayipi elithutha indle ukuze wonke umuntu ezobona ukuthi sibhekene nobunzima obunjani. Mhlawumbe uMasipala weTheku uzosilalela uma sonke sesinenkinga yokuzikhulula. Abanye bazikhulula ehlathini kanti abanye bagcina ngokuya endlini yangasese uma besemisebenzini,” kusho uNtuli.

UMnuz Mandla Mkhize (56) uthe abasenayo ngisho indawo yokumba imigodi emisha ukuze bazenzele izindlu zangasese.

UMnuz Ayanda Mgwaba uthe uma kufika izimoto ezimoma amathoyilethi eminye imindeni kuye kucelwe ukuthi iqale ikhe indle ngamabhakede ukuze izosondela emgwaqeni kanti lokho kuyingozi ngoba kwandisa izifo endaweni.

Unxuse iMeya ukuba ingenelele ngoba nekhansela le ndawo laku-ward 19 liyalwazi udaba lwabo, kodwa alibachazeli ukuthi kungani bengakhelwanga amathoyilethe ashaywayo.

Imizamo yokuthola ukuphawula kukaMasipala weTheku ayiphumelelanga njengoba abophiko lwezokuxhumana bengayiphendulanga imibuzo abathunyelelwe yona yiSolezwe.

Ukufa komshini wokuqopha eNkantolo yeMantshi yaseNquthu kuphoqe ukuba kuhlehle ukuqulwa kwecala lamadoda amathathu asolwa ngokushisa nge-ayina uthisha.

MLUNGISI GUMEDE

UKUFA komshini wokuqopha eNkantolo yeMantshi yaseNquthu kuphoqe ukuba kuhlehle ukuqulwa kwecala lamadoda amathathu asolwa ngokushisa nge-ayina uthisha wesikole samabanga aphansi ngesikhathi egqekeza emzini wakhe ngo-2014.

Icala likaMnuz Sipho Buthelezi, Mnuz Siyanda Ngobese noMnuz Phumlani Buthelezi ababhekene nelokugqekeza, ukuntshontsha, ukuthumba, nokuzama ukubulala lihlehliselwe uFebhruwari 29.

La madoda asolwa ngokugqekeza emzini kaNkk Thembi Mthembu ofundisa eSlindekahle Primary, eNquthu ngo-2014, amshaya amshisa nge-ayina lixhunywe kugesi, isikhathi esingaphezu kwehora ezama ukumphoqa ukuba akhiphe imali.

Isolezwe labika ngalesi sigameko ngo-2014.

Abasolwa bathatha imoto kaNkk Mthembu, bahamba ngayo naye ephakathi baphuma kuyona ihamba, bamshiya phakathi yedwa yahamba yacishe yangena emfuleni.

NgoMsombuluko bekulindeleke ukuba kuqale ukuqulwa kwecala eselidonse isikhathi eside kodwa kwahlehla ngenxa yokufa komshini.

Abasolwa ababili uNgobese noButhelezi (Sipho) bangaphakathi ezitokisini kusukela baboshwa ngo-2014 kanti uPhumlani ungaphandle ngebheyili. AbakwaButhelezi akubona abandawonye.

UPhumlani kuthiwa uyise uyisikhulu emaphoyiseni eGlencoe, kusolwa ukuthi nguyena owangenela wadedelwa ngebheyili, laba abanye ayeboshwe nabo basala ngaphakathi.

Engxoxweni neSolezwe izolo, uNkk Mthembu uthe ukhathazekile ngokuhamba kancane kwecala.

“Ngifuna ukubona abasolwa bejeza ngesenzo sokungizwisa ubuhlungu bengishisa nge-ayina emzini wami isikhathi esingaphezu kwehora,” usho kanje.

“Ngifuna nabo bezwe ubuhlungu bagqunywe ejele noma bengeke basaba nezibazi engasala nazo mina,” kusho uNkk Mthembu.

Uthe abasolwa bacishe bambulala bemshiya emotweni ihamba yacishe yangena emfuleni.

Usinde kukubi umakhenikha obebambe itoho, uMnuz Sibusiso Thusi wakwa-V eMlazi.

S’MANGELE ZUMA

USINDE kukubi umakhenikha obebambe itoho, uMnuz Sibusiso Thusi (37) wakwa-V eMlazi ngesikhathi imoto abeyikhanda igqamuka amalangabi esazama ukuxhuma izintambo zayo e-scrapyard esisondelene nakubo.

Usizwe wukuqunga isibindi aphushe isicabha ebesimbozwe ngamalangabi aphume ngaphambi kokuthi imoto iPeugeot 407 ishe ingqongqe.

Kuthiwa umnikazi wale ndawo yokukhanda izimoto, uMnuz Tony Musani (32) uvele wasangana njengoba le moto ibisanda kulethwa ngumnikazi wayo ukuthi izolungiswa i-pump ka-petrol.

Ngenhlanhla abezicishamlilo bakwazile ukuwunqanda umlilo ungakabhebhethekeli kwezinye izimoto zabantu ebezigcwele igceke zilinde ukukhandwa.

Isolezwe lifice uThusi obebonakala ukuthi umlilo umhwangule intshebe nezinwele ekhanda, egquma ngenxa yezinhlungu abezizwa engalweni yakhe eshile.

“Bengingaphakathi emotweni ngizama ukuxhuma izintambo zemoto ngesikhathi imoto ivele igqamuka umlilo ngaphambili. Ngiphoqeleke ukuthi ngiphushe isicabha ngiphume ngokushesha. Ngishile engalweni ngesikhathi ngiphusha isicabha ebesesingavuleki. Ngibonga nje ukuthi izicabha azikhiyekanga icentral lock ngesikhathi kusha ngoba bengizosha ngibe wumlotha. Angazi ngempela kwenzakaleni ngaphakathi ngoba mina konke ebengikwenza ngikwenze ngendlela,” kusho uThusi. Uthe usola ukuthi le moto ibivele izozishela noma ubengazange ayithinte.

“Mina ngingumkhandi wakudala. Ngijwayele ukubamba itoho kule ndawo. Abezimo eziphuthumayo banqabile ukungithatha bathi bajahe kwezinye izindawo. Lokhu kungiphathe kabi ngoba ngishile ngempela engalweni. Ngisathukile ngoba kusale kancane ukuthi ngife, ngicishe ngavaleleka phakathi kwimoto eshayo. Le moto icishe yaqhuma nami phakathi,” kusho uThusi.

Umnikazi wale ndawo uMusani uthe umyalile umakhenikha obebambe itoho ngoba sekumele akhokhe imoto yabantu eshile.

“Umakhenikha uphambanise izintambo zemoto okwenze ukuthi imoto iqhume, ishe ingqongqe sibuka. Ibingekho nendlela yokucima ngoba ivele yaqhuma, yakhipha ifu lentuthu elimnyama. Ngibonga abezicishamlilo abafike ngokushesha, ngoba mhlawumbe ngabe ziningi izimoto ezishile. Ngimthintile umnikazi wemoto ngamchazela ngesimo. Sisazohlala phansi sixoxe ukuthi singamkhokhela kanjani imoto yakhe. Okubi wukuthi le moto ibisayintsha kodwa ayisekho ngenxa yobudedengu balo muntu obezobamba itoho,” kusho uMusani.

Amalungu omphakathi abesegcwele ngaphandle ebambe umoya, abashayele ihlombe abezicishamlilo ngokusheshe banqande umlilo obuzogcina udale umonakalo omkhulu.

Imizamo yokuthola umnikazi wemoto ayiphumelelanga njengoba uMusani enqabile ukukhipha izinombolo zocingo lwakhe.

Bahleli ekhaya abafana ababili basoSizweni ngemuva kokuxoshwa esikoleni ngenxa yokunqaba ukugunda amakhanda abo.

S’MANGELE ZUMA

BAHLELI ekhaya abafana ababili uNkululeko Nene (17) noLindokuhle Mhlambi (18) basoSizweni, eNewcastle ngemuva kokuxoshwa esikoleni ngenxa yokunqaba ukugunda amakhanda abo.

Laba bafana abafunda uGrade 7, Osizweni High bathe bazame kaningi ukuchazela othisha ukuthi ukugunda izinwele akuhambisani nenkolo yabo yamaNazaretha.

Bathe bagcine esikoleni ngoLwesine olwedlule ngesikhathi omunye wothisha obafundisayo nothishomkhulu bebabizele ehhovisi bathi abaphume baphele esikoleni.

“Kusukela kuqale unyaka besinenkinga nothisha oyedwa obelokhu esinakile ngokuthi kumele sigunde amakhanda. Into exakayo wukuthi ngonyaka odlule besifunda kuso lesi sikole kodwa asizange sihlangabezane nenkinga. Uthisha u... (emgagula ngegama) nguyena obenathi shaqa. Ubevele asikhiphe ekilasini uma sekungena yena athi ngeke afundise abafana abanezihluthu emakhanda. Lokhu bekusiphatha kabi ngoba asenzi ngamabomu kodwa silandela imiyalelo yenkolo yethu,” kusho uLindokuhle.

Uthe baze babikela umshumayeli wabo, uMnuz Siboniso Masondo ngalolu daba ngoba nabazali babo sebehlulekile ukuluxazulula.

“Zikhona ezinye izingane ezinezinwele esikoleni kodwa u... ulokhu enakene nathi. Sibona sengathi ulwisana nenkolo yethu. Asazi ukuthi kanti kufundwa izinwele yini esikoleni. Sihlezi siqikelele ukuthi izinwele zethu zisesimeni esihle ngoba senzela ukuthi bangaphiki ngalokho ukufeza izifiso zabo,” kusho uLindokuhle.

Unina kaLindokuhle, uNkk Nontobeko Mhlambi (42), uthe uzame kaningi ukuncenga uthishomkhulu ukuthi avumele indodana yakhe ukuthi ifunde esikoleni ngaphandle kokugunda ikhanda.

“Uthishomkhulu ubevuma ukuthi akeze esikoleni inqobo nje uma izinwele zakhe zihlanzekile futhi zikameke kahle. Uthisha u... ongezwa mshini, uyena lo osenze ukuthi uthishomkhulu ashintshe umqondo. Ngikhathazekile ngengane yami ehleli ekhaya ekubeni ezinye izingane ziqhubeka nokufunda. Asazi noma yingoba uthisha u... emdala kunothishomkhulu, okwenza ukuthi kulalelwe yena,” kusho uNkk Mhlambi.

Uthe babona sengathi inkolo yabo ibukelwa phansi esikoleni.

Imizamo yokuthola uNkululeko nomndeni wakhe ayiphumelelanga.

Umshumayeli uMasondo, uthe baphatheke kabi ngokuxoshwa kwabafana kodwa bazimisele nokuyilwa lendaba.

“Lokhu okwenziwa yisikole kungukudelela ilungelo lalaba bafana lokukholwa enkolweni abayithandayo. Ngiyile esikoleni ukuyokhuluma nalabo thisha kwangathi siyavumelana ukuthi kumele zihlale zihlanzekile izinwele zabo. Ngithukile ngemuva kwezinsukwana sezixoshwa,” kusho uMasondo.

Okhulumela uMnyango wezeMfundo, uMnuz Muzi Mahlambi, uthe umnyango uzothumela umhloli esikoleni ukuze angenelele kulolu daba.

“Abantwana kumele babuyele esikoleni. Umthethosisekelo wezwe ugqugquzela ukubekezelelana ngokwenkolo futhi njengoMnyango siyawahlonipha amalungelo abantu. Ukugwema lokhu sicela abazali basheshe beze phambili esikoleni bachaze ngezingane zabo kusaqalwa. Abazali bangaya nasehhovisi lomhloli ukuze kube nguye oxhumana nesikole uma bona sebehlulekile ukukhulumisana naso.”

Owayeyikhansela le-ANC kuMasipala weTheku ushiye angalazi kwabakwaGcaba.

CELANI SIKHAKHANE noBONISWA MOHALE

OWAYEYIKHANSELA le-ANC kuMasipala weTheku ushiye angalazi kwabakwaGcaba ebasola ngokuthi banikezwa umsebenzi wokuphatha amabhasi kamasipala ngoba baziwa ukuthi basondelene noMengameli wezwe uMnuz Jacob Zuma futhi izinto bazenza ngenkani.

UMnuz Vusi Khoza osehola i-EFF esiShayamthetho saKwaZulu-Natal, ubekusho lokhu ekhuluma ohlelweni lwezindaba iThe Forum @8 esiteshini sakwa-SABC, i-SAFM.

Kodwa ongumkhulumeli wenkampani ephethwe abakwaGcaba, iTansnat, uMnuz Vuyo Mkhize ngesikhathi ethintwa Isolezwe uthe ngeke bakwazi ukuphawula ngezinsolo zikaMnuz Khoza ngoba uhlelo lweSAFM alwenziwanga kahle futhi abanikezwanga ithuba lokuziphendulela.

“Besingekho e-studio ngesikhathi uKhoza enza lezi zinsolo kodwa sesithathe isinqumo sokumangalela uhlelo lukaSakina Kamwendo enhlanganweni ebheke ukuziphatha kwemisakazo, iBroadcasting Complains Commission of South Africa (BCCSA),” kusho uMkhize.

UKhoza uthe abantu bakwaGcaba ayikho into abangayitholi uma beyifuna, kangangokuthi udaba lwabo uma lungalandelwa lusuka kude kubaholi be-ANC esifundazweni.

“Udaba lwalaba bantu lunzima ukuba lulungiswe ngoba bayaziwa ukuthi bafaka izimali kubaholi abathile be-ANC KwaZulu-Natal naseThekwini. Okunye bayizihlobo zikaMengameli Zuma futhi banamatekisi, yibo abalawula imboni. Uma ubuza indaba yabo kwa-ANC, uvele utshelwe ukuthi ubuholi sebusithathile isinqumo ngakho kumele uthule. Yikho ngithi indaba yabo isuka kude uma kubhekwa le nto yamabhasi ngakho abantu okumele baphendule kabanzi oMnuz Sihle Zikalala noMnuz Bheki Cele. Nginabo bonke ubufakazi balokhu engikukhulumayo angisho into engiyizwayo,” kusho uKhoza.

Uthe ngesikhathi kuqala kukhishwa amabhasi ngaphansi komkhandlu weTheku edayiselwa iRamant Alton, abantu ababesekhaleni laleso sinqumo kwakunguMnuz Bheki Cele owayenguSihlalo we-ANC eThekwini nowayeyiphini lakhe ongasekho uMnuz John Mchunu.

Uthe ngaleso sikhathi yena wayeseyikhansela le-ANC, waveza nokuthi uma yena nabanye ozakwabo bebuza indaba yokudayiswa kwamabhasi batshelwa ukuthi abathule ngoba abaholi sebesithathile isinqumo.

Umkhulumeli kaCele, uNksz Nonkululeko Mbatha ucele ukuba athunyelelwe umyalezo ukuze awudlulisele kuCele bese beyaphendula kodwa kushaye isikhathi sokushicilela bengakaphenduli.

Okhulumela i-ANC KwaZulu-Natal uMnuz Mdumseni Ntuli, uthe kungani uKhoza engayi emaphoyiseni akhiphe ubufakazi obubambekayo njengoba ebeka kabi uSihlalo uZikalala nelungu lesigungu sikazwelonke uCele.

Uthe akusizi ukuthi ahambe ekhuluma emisakazweni, uma ekhuluma amanga uzobanjwa ngoba lokhu akwenzayo udicilela phansi isithunzi salaba baholi.

Kuphazamiseke ukufunda esikoleni iThabela High, KwaNyuswa uthisha eshaqwa amaphoyisa ngecala lokushaya uthishanhloko.

NONTUTHUKO NGUBANE

KUPHAZAMISEKE ukufunda esikoleni iThabela High, KwaNyuswa izolo uthisha eshaqwa amaphoyisa ngecala lokushaya uthishanhloko.

Kusuke isidumo abanye othisha beduba ukufundisa kulesi sikole kulandela ukulethwa kwezincwadi ezivimbela othisha abathathu bakulesi sikole ukuba basondele eduze kukathishanhloko walesi sikole.

Omunye uthisha wesifazane yena uvulelwe icala lokushaya uthishanhloko.

Isolezwe lithole ukuthi kumapeketwane kulesi sikole njengoba othisha behlukene phakathi. Othisha besilisa ababili nababili besifazane kuthiwa sekunesikhathi bengazwani nothishanhloko njengoba bebone sekumemfuka amaphoyisa nezincwadi necala lokushaya.

Uthishanhloko Isolezwe elinalo igama lakhe, kuthiwa uye esiteshini samaphoyisa saseNtshanga wavula icala lokushaywa nguthisha wesifazane.

Amaphoyisa kuthiwa ngesikhathi efika esikoleni, athathe omunye uthisha efuna ukumfaka evenini. Kuthiwa kugcinwe kuxoxisenwe wathatha imoto yakhe.

Umthombo ongathandanga ukudalulwa uthe izingane nothisha bebebukela ngesikhathi kwenzeka lokho.

“Amaphoyisa aqhube omunye uthisha emsusa ekilasini eyomfaka evenini yamaphoyisa. Ubenqaba, bagcine bemqhuba bemyisa emotweni yakhe bahamba naye baya esiteshini samaphoyisa. Konke lokhu bekwenzeka phambi kwezingane. Abanye othisha abanikezwe izincwadi bona baphume ngaso leso sikhathi bahamba. Izingane zisale zodwa zingafundi. Empeleni akekho oqhubeke nokufundisa,” kusho umthombo.

Okhulumela amaphoyisa KwaZulu-Natal u-Lieutenant Nqobile Gwala ukuqinisekisile ukuthi uthisha oneminyaka engu-49 uboshelwe icala lokushaya.

“Uboshwe izolo owesifazane oneminyaka engu-49 ngecala lokushaya. Udedelwe khona izolo ngesixwayiso, uzovela enkantolo yasePinetown kusasa (namhlanje),” kusho uGwala.

Isolezwe lithole ukuthi uthisha udedelwe esiteshini kwathiwa akabuye enkantolo esezobhekana necala.

Okhulumela uMnyango wezeMfundo KwaZulu-Natal uMnuz Scelo Khuzwayo usiqinisekisile isigameko wathi namhlanje kuzoba nomhlangano.

“Kube khona isimo esithinta ukubophana kothisha esikoleni. Abahloli nabasebenzi boMnyango bazoba nomhlangano kusasa (namhlanje) ukuze kuxazululwe isimo nezinkinga ezibhekene nalesiya sikole,” kusho uKhuzwayo.

Kwenzeka lokhu nje ukuphasa kwabafundi kaGrade 12 kulesi sikole kulokhu kwehla ngenxa yalokhu kuhlukana phakathi kothisha.

Kuthiwa impi yothisha kulesi sikole isukela kudala.

Kuthintwa uthishanhhloko ngezinsolo ezithi nguye ubhongoza, uphike wama ngentaba wathi uyasukelwa.

“Akukho engingakukhuluma nabezindaba. Angivumelekile. Labo abathi ngiwubhongoza abakutshelanga ukuthi yingani besho njalo,” kusho uthishanhloko.

Kuthintwa uSihlalo wesigungu sabazali odalulwe ngelikaMnuz Shangase uthe; “Angeke ngikwazi ukukhuluma ngalolu daba okwamanje, ubuye ungithinte,” kusho yena.

Esethintwa ucingo lwaphendulwa owesifazane wathi: “Mina ngiwumfazi kaShangase, ufunani kuyena. Akekho ushiye iselula. Noma ungalokhu ushaya ucingo nje ngizolokhu ngikutshela ukuthi iselula uyishiye kumfazi wakhe. Angazi uzobuya nini. Angazi nokuthi uyi-SGB, uyobuza yena lokho uma ebuya.”

Othisha abathintekayo kulolu daba abazange batholakale.

Usezoganwa okwesithathu umholi wenkolo odume ngokudayisa amanzi okuthiwa ayaphilisa.

ZANELE MTHETHWA

USEZOGANWA okwesithathu umholi wenkolo odume ngokudayisa amanzi okuthiwa ayaphilisa, obe sematheni ngonyaka odlule eganwa ngunkosikazi wesibili.

UDkt Hamilton Qhoshangokwakhe Nala osebizwa ngenkosi yamaNala, ukusho lokhu ngoLwesibili evele phambi kweKhomishini evikela iNkolo, uLimi noMphakathi eThekwini.

UNala ongafunanga ukwanda ngamaningi, utshele ikhomishini ukuthi isithembu sivumelekile enkolweni yakhe angafuni ibizwe ngebandla.

Ubecacisa ngokubuzwe nguSihlalo wekhomishini uNkk Thoko Mkhwanazi-Xaluva obebuza ngokubhalwe yiphephabhuku iDrum, uNala acashunwe ethi akahlali kakhulu namakhosikazi akhe abizwa ngeziNdlovukazi okunguNtombifuthi MaMbatha Nala noNobuhle MaShezi Nala ngoba uyacikeka.

Yize ethe iphephabhuku alimcaphunanga kahle, uvumile ukuthi akakukhuthazi ukuba nonkosikazi oyedwa.

“Abantu badivosa kangaka yingoba basuke sebecikene, kuyacika ukuhlala nomuntu oyedwa isikhathi eside. Nami ngangixabana nomkami esayedwa ngoba besichitha isikhathi esiningi ndawonye,” usho kanje.

Ubuye wathi akashadisi futhi akakhokhelwa emishadweni yamaKrestu athe ingamanga, ngisho izifungo zayo.

Uthe ukholelwa ekutheni umshado uhlanganiswa nguNkulunkulu ngemimoya yababili abashadayo.

Ngo-Ephreli odlule uNala waphumela obala ngokuthatha uMaShezi obevele esebandleni lakhe futhi ocula ekhwayeni nonkosikazi omdala uMaMbatha.

Lokhu kushaqise abanye abefundisi abathe akwenzayo kuphambene nenkolo yobuKrestu.

Yilapho uNala ecacise khona ukuthi akayena umKrestu nakwikhomishini aphinde wakugcizelela kodwa wathi uyakholelwa kuJesu Krestu.

Kwikhomishini ubehamba noMnuz Xolani Mabaso ongomunye asebenzisana nabo ebuholini nommeli wakhe uMnuz Shamin Rampersad.

Ubephelezelwa ngonogada.

Ubevele okokuqala kule khomishini emuva kokuhluleka izikhawu ezimbili, obesekuthiwe uzothathelwa izinyathelo zomthetho.

Ikhomishini ibigxile ekuphenyeni ngenzuzo eyenziwa yiNala Mandate International nokudayiswa kwemikhiqizo okuthiwa iyelapha. UNala uthe unezinhlelo kuthelevishini lapho abantu befakaza ngokusizwa yimikhiqizo yakhe, uNkk Mkhwanazi-Xaluva akubize ngokukhangisa.

UNkk Mkhwanazi-Xaluva utshele Isolezwe ukuthi bazokucubungula konke okushiwo nguNala kodwa sebexhumene nenhlangano ebheka izikhangiso i-Advertisiting Standards Authority abazosebenza nayo ukucubungula izikhangiso.

“Sizocela amakhasethi ohlelo lwakhe sibheke ukuthi akuzona yini izikhangiso azenzayo. Ngokomthetho wakuleli uma uthi umkhiqizo uyaphilisa kumele ukukhombise lokho ngokwesayensi, uma kungenjalo ukhohlisa abantu,” usho kanje.

UMabaso, uthe akukho abangakusho ngonkosikazi wesithathu kodwa bayokhipha isitatimende uma sekufike isikhathi.

Ukungcwaba abantu ethuneni elilodwa kuwukwethuka isiko futhi kungenza umonakalo omkhulu.

ZANELE MTHETHWA

UKUNGCWABA abantu ethuneni elilodwa kuwukwethuka isiko futhi kungenza umonakalo omkhulu.

Lokhu ngukuphawula kwesazi samasiko esingumengameli weTraditional Healers Association KwaZulu-Natal, uMnuz Sazi Mhlongo, osishayele ihlombe isiphakamiso seKhomishini eVikela iNkolo, Izilimi noMphakathi, sokuthi uMasipala weTheku uyeke ukusebenzisa amathuna amadala ukungcwaba imindeni eyahlukene.

Le khomishini ithe izophoqeleka ukufaka umasipala enkantolo uma ungaqhamuki ngokushesha nohlelo lokuvimbela ukungcwatshwa kwabantu bemindeni ehlukene ethuneni elilodwa.

UMasipala uphumele obala ngengwadla yokwentula umhlaba ongawusebenzisela ukungcwaba njengoba amathuna amaningi eThekwini esegcwele amanye esezogcwala.

IMeya uMnuz James Nxumalo, itshele le khomishini ukuthi le ngwadla isiholele ekutheni kube nezigameko lapho kungcwatshwa khona phezu kwabanye abantu.

UMhlongo uthe kuwukwethuka isiko ukungcwaba ndawonye ethuneni elilodwa futhi bangajabula ikhomishini iqinise isandla.

NgoLwesibili ikhomishini iphonse imibuzo uNxumalo ukuthi kungani kumele kungcwatshwe ndawonye ethuneni elilodwa, okuthiwe kubukela phansi isiko nenkolo.

UNxumalo, obephelezelwa nguMnuz Thembinkosi Ngcobo oyiNhloko yezamaPaki, ezokuNgcebeleka namaSiko noDkt Musa Gumede, ukhale ngokushoda komhlaba.

USihlalo wekhomishini, uNkk Thoko Mkhwanazi-Xaluva, uthe kumele umasipala ubuyekeze ngokushesha imithetho ngale kwalokho bazowufakwa enkantolo.

Uthe bayavuma ukuthi umhlaba awukho, kodwa abalwa nakho yindlela esetshenziswa yiTheku ukuxazulula inkinga.

Ulinganise ngeCape Town, athe ibuza emindenini ukuthi ifuna amanye amalungu ashonile angcwatshwe kuphi.

Uphakamise ukuthi okungenani ethuneni elilodwa kungcwatshwe umndeni owodwa, kunokuthi kubhangqwe izidumbu ezingazani.

“Siyavuma ukuthi amathuna amadala kumele kuphinde kungcwatshwe kuwo kodwa hhayi ngale ndlela. Abantu bayakhala ngoba amadlozi adiniwe. Ngisho uyogcina isiko ethuneni ngeke wazi nokuthi ukhuluma nobani njengoba sekungcwatshwa imindeni ehlukene. Abantu bazogcina bebuyisa umoya okungewona ekhaya. Ubuhlungu obuphindiwe wukuhlala nomoya okungewona emzini wakho,” usho kanje.

UMhlongo uthe uyavumelana nekhomishini ngoba bayazi kudala umonakalo ongakanani ukukhuluma nomoya womuntu okungeyena.

“Ngisho ingane ayingcwatshwa nomunye umuntu, umzimba kumele ube nethuna lawo. Ngeke ngivume ethuneni likababa kungcwatshwe olunye uhalakasha lwendoda engingayazi. Lokhu kungaphambanisa nemisamo, enye indoda igcine ithathe izinhlanhla okungezona ezayo,” kusho yena.

Imeya ithe okwamanje kunezindawo zokungcwaba ezingu-17 nazo ezizogcwala maduze ngoba ezinye sezavalwa ngenxa yokugcwala.

“Siyawahlonipha amasiko nenkolo yabantu yingakho sixhumana nomndeni uma ithuna lawo selineminyaka elishumi. Uma ungafuni kungcwatshwe phezu kwalo, umndeni ukhokhe enye imali yokuvuselela ubunikazi bethuna. Ethuneni elidala siyamba ekujuleni ukuqinisekisa ukuthi akusekho zinsalela zesidumbu, amathambo siwamboze ngenhlabathi ngaphansi ngaphambi kokungcwaba omunye,” kusho uNxumalo.

Ikhomishini ithe kwakona ukuthi abantu bavuselele ubunikazi bethuna kuwukungawahloniphi amalungelo ngoba abahlwempu abanako ukwenza ngokunye, kumele bavume kungcwatshwe phezu kwethuna labo.

Kwasuka umsindo ngo-2000 umasipala umemezela ukuthi ziyaphela izindawo, wakhuthaza nokuthi abantu bashiswe.

Kwaphinde kwenziwa nengqungquthela yokufundisa ngenkinga yamathuna ngo-2004.

UNxumalo nethimba lakhe bavumile ukuthi bazozicubungula ngokushesha iziphakamiso zekhomishini.

Kwenzeka lokhu nje Isolezwe lake lalandela udaba lomndeni wakwaNcobela eThekwini, owathola ukuthi ethuneni likanina sekwangcwatshwa ilungu lomndeni wakwaDoorasamy, kwafakwa netshe.

AbakwaNcobela bayilwa ngabameli le ndaba bagcina benqobile. Umasipala wavuma ukuthi kumbiwe ithuna ukulungisa isimo.

UNgcobo wathi umndeni wakwaNcobela ube yisisulu sokudayiswa kwemigodi, othe kuhambisana nenkohlakalo kubasebenzi.

Ukhala ngokuhlukunyezwa ngamaphoyisa owesilisa waseHlokozi, eHighflats.

NONTUTHUKO NGUBANE

UKHALA ngokuhlukunyezwa ngamaphoyisa owesilisa waseHlokozi, eHighflats, othi amshaye kwathinteka nobuchopho ngesikhathi ezofuna indodana yakhe emzini wakhe.

UMnuz Bhekokwakhe Phungula (55) utshele Isolezwe ukuthi akasakwazi nokulala kulandela lesi sigameko esenzeke ngeSonto ebusuku.

Uthe kusukela ngelanga lesigameko ikhanda liyazula njengoba odokotela bemtshele ukuthi uthinteke ebuchosheni.

“Amaphoyisa amane afika ngezintatha ngeSonto, kwaze kwashaya u-2 ekuseni engishaya. Ayengishaya ngezinsimbi nezinye izinto eziqinile. Angitshela ukuthi afuna indodana yami, ngabatshela ukuthi kayikho. Abazange basho ukuthi kungani beyifuna. Angikwazanga nokubona ukuthi amaphoyisa akephi ngenxa yendlela engahlukumezeka ngayo. Esehambile amaphoyisa ngaya esibhedlela, bangitshela ukuthi ngishayeke kanzima ekhanda ngathinteka nobuchopho,” kusho uPhungula.

Uthe indodana yakhe, enemi-nyaka engu-30, wahamba nayo ngoMsombuluko eseyovula icala.

“Ngiyaxakeka ukuthi kungani amaphoyisa abefuna indodana yami ngoba ngithe sengiya nayo esiteshini bathi ayidingeki. Angikwazi engishayelwe khona. Ngifuna ukuba amaphoyisa enze lokhu ajeze,” kusho uPhungula.

Kwenzeka lesi sigameko nje uthe kunombango oqhubekayo epulazini othinta elinye lamaphoyisa ahlala kule ndawo, nasola ukuthi bahlose ukumvala umlomo.

“Uma ngiya esiteshini bathi awekho amaphoyisa angishayile kodwa sibe siwabonile efika emzini wami. Amaphoyisa afike angqongqoza, efake imifaniswano. Ayememeza indodana yami ethi ayivule. Inkinga uma ngivula icala bayenqaba. Angisazi ukuthi kumele ngenze njani,” kusho uPhungula.

Izincwadi zikadokotela ezibonwe Isolezwe ziveza ukuthi uPhungula ushaywe kanzima.

Okhulumela amaphoyisa KwaZulu-Natal, u-Brigadier Jay Naicker, uthe likhona icala elivulwe ngothe ushaywe ngabebefake umfaniswano wamaphoyisa.

Akacaci ukuthi azovulwa nini amathuna aseSeventini eMlazi, osekuphele izinyanga eziyisithupha avalwa.

ZANELE MTHETHWA

AKUCACI ukuthi azovulwa nini amathuna aseSeventini eMlazi, osekuphele izinyanga eziyisithupha avalwa ngenxa yokuhlaselwa kwabasebenzi bakaMasipala weTheku, okusolwa ukuthi kwenziwe umphakathi ofuna ukuqashwa ngenkani.

Phezu kokuba umasipala ukhala ngengwadla yokushoda kwezindawo zokungcwaba, eSeventini kusalokhu kumile ukungcwaba ngoba abasebenzi bashaya phansi ngonyawo bathi ngeke baqale kungaqinisekiswanga ukuphepha kwabo.

Ngonyaka odlule abasebenzi bahlaselwa ngabantu abebehlomile okusolwa ukuthi ngamalungu omphakathi. Kuthiwa basabisa abasebenzi bakamasipala befuna ukuqashwa ngenkani.

La mathuna amadala eThekwini abesetshenziswa umphakathi waseMlazi namaphethelo, okuyilokishi elikhulu esifundazweni. Kusukela avalwa umphakathi waseMlazi nomakhelwane bawo, uphoqeleka ukuyongcwaba kwezinye izindawo, ezikude.

Kuwona la mathuna ngonyaka odlule kwaphinde kwavela izinsolo zokuthi kunomkhonyovu wokudayiswa kwemigodi nokumbiwa kwamabhokisi. Ngesikhathi umasipala uthatha isinqumo sokuwavala, uMnuz Thembinkosi Ngcobo oyiNhloko yemaPaki, ezokuNgcebeleka namaSiko kumasipala, wathi bazozama ukuqinisa ezokuphepha ukuze abasebenzi babuyele sebekhululekile. NgoSepthemba wonyaka odlule waveza ukuthi uphakamise ukuthi kubekwe eceleni ibhajethi ka-R5 million ezosiza ukuqinisa ezokuphepha nokwandisa onogada namakhamera ezindaweni zikamasipala, okubalwa namathuna. Uthe kuzoqalwa ezindaweni ezidlange kakhulu ngobugebengu okuyiseMlazi naseRedhill lapho kuhlaselwa khona abasebenzi babo.

Izolo ukuqinisekisile kuleli phephandaba ukuthi amathuna asavaliwe futhi akukacaci ukuthi azovulwa nini.

“Amathuna aseSeventini asavaliwe ngenxa yokusatshiswa kwabasebenzi. Siphezu kwalo udaba lokulungisa lesi simo ukuze abasebenzi bethu baphephe. Kumanje batshalwe kwamanye amathuna ahlukene kusukela bashiya eSeventini. Amathuna makhulu okuyingakho kumele kuhlelwe kahle ezokuphepha ngoba abahlaseli basuke behlome bephelele,” kusho uNgcobo.

Ubuzwe ukuthi njengoba amathuna evaliwe, imindeni efuna ukuzovakashela amathuna ivunyelwe yini.

“Imindeni ivumelekile ukuvakashela amathuna kodwa nakhona kumele abantu bazi ukuthi uma beya, bazithathela bona amashansi ngoba akuphephile,” usho kanje. UNgcobo ubengomunye wabaphelezele iMeya yeTheku uMnuz James Nxumalo ngoLwesibili, evele phambi kweKhomishini eVikela iNkolo, Izilimi noMphakathi eThekwini. UNxumalo ubezochaza ukuthi kungani umasipala kumele ungcwabe emathuneni osekuvele kungcwatshwe kuwo.

Utshele ikhomishini ukuthi umasipala ubhekene nengwadla yokushoda kwezindawo zokungcwaba, osekwenze ukuthi kuphinde kungcwatshwe kwaseneminyaka elishumi kwangcwatshwa kuwo.

UNxumalo uthe sekuvalwe izindawo zamathuna ezingu-48 ngenxa yokugcwala sekusele ezingu 17 nazo ezizogcwala maduze.

UkhalaA ngesihluku umndeni wowesilisa, uMnuz Msizi Mtolo, ongenelwe ngomakhelwane bakhe ababili bambhokoda ngomkhonto.

S’MANGELE ZUMA

UKHALA ngesihluku umndeni wowesilisa, uMnuz Msizi Mtolo (35), ongenelwe ngomakhelwane bakhe ababili bambhokoda ngomkhonto washona emzini wakubo KwaSanti ngoMsombuluko emini.

Kuthiwa ingxabano iqale ngesonto eledlule ngemuva kokuthi abasolwa, okuthiwa badla iwunga, bentshontshe amafoni amabili kaMtolo ayewakhohlwe odongeni oluseduze kwesango lakubo.

Umfowabo kaMtolo, uMnuz Mbongeni Mtolo (43), uthe umfowabo wathi eqambe ebuyela ukuyolanda amafoni akhe wathola engasekho kodwa wabona abasolwa behamba emgwaqeni.

“Utshele abasolwa ukuthi ucela babuyise amafoni akhe ngoba uyazi ukuthi yibona abawathathile. Ngemuva kwezingxabano ekwaze kwangenelela nemindeni, bagcina sebewabuyisile amafoni. Kusho ukuthi lokhu kwabacasula ukuthi ubakhiphise amafoni akhe ngenkani,” kusho uMnuz Mtolo (Mbongeni).

Uthe ngosuku afe ngalo uMsizi yena wayelele endlini kubo ngesikhathi emuzwa ekhala egcekeni.

“Ngamthola esesendlini opha kakhulu. Wathi bangigwazile osibanibani. Ngathi ngilunguza ngewindi ngababona bephuma ngesango. Ngithe ngibuyela kuyena ngamthola esedindilizile eseshonile. Into esiphatha kabi ukuthi laba bafana bamngenele layikhaya bambulala. Lokhu abakwenzile kungukudelela okukhulu ngoba kubonakalisa ukuthi abawuhloniphi umuzi wakithi. UMsizi bebevele bengazwani nabo ngoba ecikwa yilezi zingqondo zabo zokubhema iwunga mase behlupha umphakathi,” kusho uMtolo.

U-Anti kaMsizi, uNkk Janet Mseleku (76) uthe babonga ukuthi umndeni wabasolwa ukwazile ukuqunga isibindi uzokhalisana nabo.

“Umndeni ufikile wazoxolisa ngesenzo sezingane zabo. Baphatheke kabi ngokwenziwe ngabantwana babo sibe singomakhelwane sisondelene. Sibonga nokuthi bakhombise ubuzali ngokusiza amaphoyisa ekutheni athole lapho abebecashe khona abasolwa. Sifuna umthetho udlale indawo yawo, bajeze labafana. Banesibindi sokubulalela umuntu kubo,” kusho uNkk Mseleku.

Omunye womakhelwane ongathandanga ukudalulwa uthe uMtolo ubulawelwe ukumela iqiniso.

“Ubengumfana obengahambisani nento ebhedayo. Laba bafana ubebatshela njalo ukuthi lento yabo yokubhema iwunga ngeke ibayise ndawo. Kusho ukuthi babone ukuthi uyabanaka, babona kungcono ukuthi bamgudluze,” kusho umakhelwane

Okhulumela amaphoyisa KwaZulu-Natal uMajor Thulani Zwane uthe amaphoyisa aseMarianhill aphenya icala lokubulala.

I-EFF ngeke lizibandakanye nezivumelwano mayelana nodaba oluthinta umuzi kaMengameli wezwe, uMnuz Jacob Zuma, oseNkandla.

INTATHELI YESOLEZWE

iQEMBU I-Economic Freedom Fighters (EFF) ngeke lizibandakanye nezivumelwano mayelana nodaba oluthinta umuzi kaMengameli wezwe, uMnuz Jacob Zuma, oseNkandla, uma kuwukuthi isivumelwano asiqinisekisi ukuhlonishwa kwamandla ehhovisi loMvikeli woMphakathi, u-Adv Thuli Madonsela nomthethosisekelo wezwe. Lokhu kushiwo wumholi waleli qembu, uMnuz Julius Malema izolo.

“Ngeke size sivumelane nanoma yisiphi isivumelwano esibukela phansi ukusebenza kwehhovisi lokuVikelwa koMphakathi futhi okuzoba yisivumelwano esibukela phansi izinqumo ezithathwe nguyena uMadonsela.

Kumele bazi ukuthi izinqumo ezithathwe yiHhovisi lokuVikelwa koMphakathi ziyalandelwa,” uMalema utshele izintatheli kanjena eGoli .

Uqhube wathi: “Akukho esiyovumelana ngakho ngaphandle uma lezi zinto esizifunayo zilandeliwe kwavunyelwana ngazo.”

UMalema uthe iHhovisi lokuVikelwa koMphakathi lithole okukhulu ukuphoxeka nokubukelwa phansi ngenxa yodaba lwaseNkandla. Ihhovisi likaMadonsela yizithole lingasahloniphekile neze,” kusho uMalema.

Wengeze ngokuthi uZuma uzame ukuchitha isikhathi ngokulokhu ebhalela amaqembu aphikisayo izincwadi neNkantolo eNkulu yoMthethosisekelo, enza iziphakamiso ngemali azoyikhokha ngokuthuthukiswa umuzi wakhe oseNkandla, KwaZulu-Natal.

“UZuma udicilele phansi isithunzi sePhalamende. Manje useyaqhamuka usethi usezoyikhokha imali. Ngokusho lokho ucabanga ukuthi kusazoqhuba isikhathi futhi,” kusho uMalema.

UMalema unxuse abantu baseNingizimu Afrika ukuba bahlanganyele nabo bajoyine iqembu lakhe i-EFF emkhankasweni bamashe baqonde eNkantolo yoMthethosisekelo ngoLwesibili ngesonto elizayo, uma icala selingena.

Uhulumeni usebenzise imali elinganiselwa ezigidini ezingu-R250 kuthuthukiswa ezokuphepha emzini kaZuma eNkandla.

Kodwa uMvikeli woMphakathi wathola ukuthi okunye kwakho kwakungahlangene nokuphepha. Kwatholakala nokuthi uZuma nomndeni wakhe bahlomula ngokweqile.

UMalema uphethe ngokuthi idamu lokubhukuda kanye nesibaya sezinkomo akuhlangene nakancane nezokuphepha.

I-EFF neDemocratic Alliance abahambisani nokushiwo wuZuma. Icala lalibekelwe uFebhuwari 9. – ANA

Kusolwa umnyango wezempilo KwaZulu-Natal ngokungabibiko kwemishini yokuthatha izithombe (x-ray) emakhazeni asePort Shepstone nasePark Rynie.

LUNGI LANGA

KUSOLWA umnyango wezempilo KwaZulu-Natal ngokungabibiko kwemishini yokuthatha izithombe (x-ray) emakhazeni asePort Shepstone nasePark Rynie.

Izidumbu ezisuke zidinga ukuthathwa izithombe ePort Shepstone nasePark Rynie zithuthelwa emakhazeni asesibhedlela, Inkosi Albert Luthuli Central, kuGale Street naseShowe.

Lokhu kungenxa yokufa komshini wokuthatha izithombe emakhazeni asePort Shepstone nokungabibikho kwalo mshini ePark Rynie.

Izithombe zidingeka uma kukhona isidumbu somuntu oshone ngokudutshulwa edutshulwe amahlandla amaningi noma kungabonakali ukuthi inhlamvu iphume ngakuphi nokunye. Le mininingwane iyabaluleka uma kwenziwa uphenyo ngokufa kwalowo muntu futhi kuyasiza nasenkantolo uma icala lokufa kwakhe selithethwa.

Lezi yizigameko ezivamile ukwenzeka nezidinga ukuthi zihlolisiswe.

Imithombo engaphakathi kula makhaza iveze ukuthi sekuneminyaka bephoqeleka ukuthi baziyise eThekwini izidumbu ezisuke zidinga ukuthathwa izithombe.

Umthombo ongaphakathi emakhazeni asePark Rynie uthe umshini wokuthatha izithombe wawukhona kodwa batshelwa ukuthi uthathiwe kwangacaciswa nokuthi uyiswe kuphi.

Uthe basola ukuthi kukhona umkhonyovu owenziwa ekuthengweni kwawo kodwa lokhu akukaze kuqinisekiswe.

Ngokusho komthombo osebenza emakhazeni asePort Shepstone, umshini banawo kodwa sekuphele izinyanga ungasebenzi.

Inyunyana yabasebenzi basemakhazeni, iPublic and Allied Workers Union of South Africa (Pawusa), isole umnyango wezempilo ngokungabi bikho kwemishini esebenzayo kula makhaza.

UMnuz Halalisani Gumede okhulumela iPawusa uthe umnyango wakha amakhaza anezindlu zokuthatha izithombe kodwa wangazihlupha ngokuqasha abantu abazokwenza lo msebenzi.

Uthe umshini wasePort Shepstone ubulawa wukuthi awusetshenziswa nangabantu abakuqeqeshelwe ukushutha.

“EPark Rynie awukho umshini futhi sekuneminyaka ungekho. EPort Shepstone noma ukhona akekho umuntu oqeqeshelwe ukuwusebenzisa. Umnyango uzifaka enkingeni ngokuthi uvumele isimo sokuthi umshini usetshenziswe abantu abangaqeqeshelwe ukuwusebenzisa,” kusho uGumede.

Uthe udaba lokungabi bikho kwemishini luyinkinga kodwa okuyinkinga kakhulu ukuthi kungatholwa abantu abazokwazi ukwenza umsebenzi wokuthatha izithombe uma imishini seyikhona.

IDA nayo izwakalise ukukhathazeka ngesimo semishini yokushaya izithombe.

UDkt Imran Keeka, oyilungu leDA esiShayamthetho eKZN, uthe bathole ngokufa komshini wokuthatha izithombe wasemakhazeni asePort Shepstone ngoLwesibili ngesikhathi begasele kula makhaza bengazelele.

Uthe bathole ukuthi uphuke emuva kokuthi ukade ubolekiswe amakhaza akuGale Street.

UKeeka uthe kuyabakhathaza ukuthi umnyango wezempilo uthi uzolubheka lolu daba ngesikhathi ucelwa ukuthi wenze uphenyo ngalo.

Uthe abakutholile ukuthi amakhaza asePort Shepstone asingethwe ngendlela eyiyo ngaphandle nje kwenkinga yalo mshini.

Okhulumela uMnyango wezeMpilo KwaZulu-Natal, uMnuz Sam Mkhwanazi, uthe: “UMnyango ucela ukunikwa isikhathi esanele sokuqoqa yonke imininingwane mayelana nalolu daba ukuze ukwazi ukuphendula.”

Kuqhume inganono kwaba ncane indawo erenki, kubulawa abanikazi bamatekisi ababili eMolweni, eThekwini.

NONTUTHUKO NGUBANE

KUQHUME inganono kwaba ncane indawo erenki, kubulawa abanikazi bamatekisi ababili eMolweni, eThekwini izolo.

Kushube isimo embonini yamatekisi eMolweni ngemuva kwesigameko sayizolo sokubulawa kukaMnuz Maza Hadebe noMnuz Siya Gwamanda abalinganiselwa eminyakeni engu-30.

Laba banikazi bamatekisi kuvele ukuthi bebezoqoqa imali ngesikhathi kufika i-Hyundai i20, yehlisa umsolwa, ofike wangqokloza ngenhlamvu laba ababili.

Abazibonele lesi sigameko bathe bekungathi babukela ifilimu ngendlela umsolwa avulele ngayo ngenhlamvu ebhekise kulaba banikazi bomsebenzi.

Kwenzeka lokhu nje ngoLwesibili kubulawe uMnuz Thamsanqa Gumbi naye ongumnikazi wamatekisi khona eMolweni.

NgoDisemba ngonyaka odlule kubulewe abanye abanikazi bamatekisi ababili bakule ndawo.

Isolezwe lithole ngomthombo othembekile ukuthi sengathi kunohlu lwabanikazi bamatekisi baseMolweni abahlaselwayo.

Okhulumela amaphoyisa KwaZulu-Natal u-Lieutenant Nqobile Gwala ukuqinisekisile ukubulawa kwabanikazi bamatekisi ababili izolo.

“Ngo-10 ekuseni erenki yaseMolweni, ngokophenyo olusenziwe kuthiwa kufike i-Hyundai i20, kwehla umsolwa ongaziwa wadubula abesilisa ababili abebemile. Abadutshuliwe bashone kuyo indawo yesigameko. Imbangela yokubulawa kwabo ayaziwa. Akekho oboshiwe, uphenyo lusaqhubeka. Kuvulwe amacala amabili okubulala esiteshini sase-illcrest,” kusho uGwala.

Usihlalo weMolweni Taxi Association uMnuz Vavo Nyanda, uthe nabo basashaqekile ngalesi sigameko.

“Sididekile sonke ngokwenzekayo, abanikazi bamatekisi bayadutshulwa bayaphela kule ndawo. Asazi ukuthi yini ebangwayo. UMaza noSiya babulewe erenki kugcwele umphakathi. Laba abashonile balandela omunye onamatekisi lapha obulewe ngoLwesibili. Kuyacaca ukuthi ababulewe bekuhloswe bona,” kusho yena.

Umthombo weSolezwe ozibonele isigameko, uthe kube nobumayemaye erenki abanye bebaleka.

“Ubungathi kudlalwa ifilimu ngendlela ekwenzeke ngayo. Ukufika kwale moto nje yehlisa omncane umfana oqonde ngqo kulaba ababulewe wafika wafayela nje ebadubula. Ngaleso sikhathi nabebesematekisini baphumile bebaleka. Akekho umuntu ongabalekanga ngoba besingazi ukuthi uzophinde adubule abhekise ngakephi,” kusho umthombo.

Igazi kuthiwa lisale ligobhoza phansi khona erenki.

Omunye umthombo osondelene nalolu daba uthe omunye obulewe ubevele ethenjiswe ukubulawa.

“Kunzima kakhulu lapha eMolweni ngoba kuthiwa kunohlu labantu abazobulawa. Konke lokhu kuqale ngoDisemba uqala ngesikhathi kushone omunye umnikazi wetekisi. Abanye bathi beya emngcwabeni batshelwa ukuthi bazolandela. Kulabo kwakukhona noSandile Madlala obulewe ngoDisemba 14 noMava obulewe namhlanje (izolo) wayethenjiswe ukubulawa. Akwaziwa nokho ukuthi kungani behlaselwa laba banikazi bamatekisi. Sifisa amaphoyisa angenelele ukuze kuzoboshwa abasolwa,” kusho umthombo.

Omunye umthombo okumanje usekubhaceni uthe baphila ngokusaba kule renki njengoba igazi ligobhoza.

“Ubona nje mina angisahlali ekhaya ngoba ngisaba ukubulawa. Baningi kakhulu asebebulewe, asazi ukuthi kuzolandela bani,” kusho yena.

Amaphoyisa athe asaphenya ngalokhu kuhlaselwa kwabanikazi bamatekisi.