Ikhansela le-ANC laseNtshangwe ku-ward 4 lishiye elingalazi kubaholi bamaKhomanisi elibachaze njengabantu abagula ngamakhanda.

CELANI SIKHAKHANE

IKHANSELA le-ANC laseNtshangwe ku-ward 4, elisolwa ngokuhlukumeza amalungu eSACP, lishiye elingalazi kubaholi bamaKhomanisi elibachaze njengabantu abagula ngamakhanda ngoba bethi bazofaka ingcindezi ku-ANC ukuze lixoshwe.

UMnuz Boy Shozi uthe uphoxekile ngendlela abaholi be-SACP abaphendule ngayo umngcwabo kaMnuz Phillip Dlamini inkundla yokudicilela phansi isithunzi sakhe.

“Okungiphoxe kakhulu ukuthi uSolly Mapaila, ongumholi kazwelonke we-SACP, akangazi kangako kodwa ufunzwe izinto oMeya uJames Nxumalo. Ngokwezinga lakhe bekumele ahlangane nami angibuze ngalezi zinto engisolwa ngazo kunalokho uthi angixoshwe ku-ANC ngoba yimi engithinteka ekuhlaselweni kwe-SACP. Yingakho ngithi bonke laba baholi be-SACP abakhuluma indaba yaseNtshangwe bagula ngamakhanda. Umuntu ogula kakhulu uNxumalo ngoba selokhu ehlulwe yisikhundla sokuba uSihlalo weTheku kwaphinde kwahlulwa noMnuz Senzo Mchunu esifundazweni, uvele wagula kakhulu ngekhanda. Okokuqala uphake impi kuloya mngcwabo ngoba azi ukuthi yena uyagadwa, futhi ngabantu abazolimala uma sekuliwa,” kusho uShozi.

Uveze nokuthi konke lokhu okushiwo ngaye yingoba uzondwa nguNxumalo ngenxa yokuthi wayehola amagatsha aseMatthews Meyiwa (Outer West) ukuba aseke uNkk Zandile Gumede.

Uthe ufisa ukwazi ukuthi uNxumalo ubeqondise kubani uma etshela abantu ukuthi kunenkabi esibaqedile abantu ecashe kuKhongolose.

“Okunye mina angigadwa, ngakho lonogada owashonela emhlanganweni we-SACP wayezoqapha umhlangano wegatsha le-ANC wokukhetha amakhansela. Nalowo mhlangano wawungabiziwe yimi kodwa wawubizwe abaholi begatsha lami,” kusho uShozi.

Babemanaphanapha inhlamba abaholi be-ANC KwaZulu-Natal ngesikhathi behambele eNtshangwe.

CELANI SIKHAKHANE

BABEMANAPHANAPHA inhlamba abaholi be-ANC KwaZulu-Natal ngesikhathi behambele eNtshangwe izolo beyokhalisana nomndeni kaMnuz Phillip Dlamini, owabulawa emhlanganweni we-SACP nokusolwa kuwo abaholi begatsha likaKhongolose ku-ward 4.

USihlalo we-ANC esifundazweni uMnuz Sihle Zikalala noNobhala uMnuz Super Zuma, babuzwe ukuthi bebehlaleleni bengezi njengoba sekuphela isonto lesibili kwashona uDlamini.

Laba baholi bafike eNtshangwe ekuseni ngo-8 bephelezelwa abaholi be-SACP, okunguNobhala uMnuz Themba Mthembu noMgcinimafa uNksz Nomarashiya Caluza.

Baqale emndenini kaMnuz Bongani Dladla owabulawa ngoLwesine ebusuku ngoJanuwari 28, okuwusuku olwalandulela olwangeSonto lomhlaka 31 okwabulawa ngalo uDlamini esemhlanganweni we-SACP.

Kuthathe cishe imizuzu engaphezulu kwengu-20 belinde ngaphandle kwaDlamini, umama wakhona uNkk Ntombi Dlamini ezikhiyele ngaphakathi kuhleli inja emnyango.

Kuze kwathi ngemuva kwesikhathi eside sekungqongqozwe ngisho emafasteleni, wagcina esebavulela bangena bakhalisana naye kodwa akangathanda ukukhuluma ngoba ethi usasebunzimeni.

Kuthe uma bephuma lapho bazithela kubaholi begatsha le-SACP abesebefonelene bevutha ngaphandle kwaDlamini bebuza ukuthi bafunani ngoba abakaze beze.

UMnuz Lucky Dlamini ofike kuqala ubhoke ngolaka nomngani wakhe abehamba naye babuza ukuthi ubani ovumele uZikalala noZuma ukuba bangene eNtshangwe ngoba ababafuni.

Kuze kwaba nowesifazane omncengayo emnikeza nocingo obeluvela kuMnuz James Nxumalo kodwa yena ongabonwanga nangokhalo.

UNkk Nonsikelelo Blose onguSihlalo we-SACP eNtshangwe, uvele washo phambi kwakhe uZikalala ukuthi akahambe ngoba abazi uzofunani benoZuma.

“Angithi nihlangana ngathi nidle ama-burger eMcDonald ninoNkk Zandile Gumede. Ngakho asinifuni lapha lemikhovu lena engotikoloshe sicela nihambe niye ezinkabini zenu. Okokuqala ubani onivumele ukuba ningene lapha kwababa uDlamini. Nizohlekisa ngomndeni wakhe ngoba anizange nifike eshonile. Asinifuni lapha eNtshangwe. Ukube besitsheliwe ukuthi niyeza besizovala imigwaqo ningangeni lapha. Sicela nisihambele le mikhovu yotikoloshe,” kusho uNkk Blose.

UNksz Caluza uzamile ukudambisa umoya kodwa wehluleka wagcina esemi nabo labo abebethuka ebukela.

Ngesikhathi kwenzeka lokhu unobhala we-SACP, uMthembu uthe isimo basiqaphile emalungwini abo kodwa inhlamba ibilokhu iqhuma phezulu phambi kwakhe.

Sidinga usizo isalukazi sakwaFelekisi, eManzimtoti, esondla abazukulu abayisithupha.

NONTUTHUKO NGUBANE

SIDINGA usizo isalukazi esineminyaka engu-72 sakwaFelekisi, eManzimtoti, esondla abazukulu abayisithupha ngoba indodakazi yaso eneminyaka engu-35 isebenzisa yonke imali yesondlo sezingane otshwaleni.

UNkk Doris Mseleku (72) utshele Isolezwe ukuthi indodakazi yakhe uNksz Dumazile “Masider” Mseleku (35) iyehluleka wukunakekela izingane zayo njengoba ezinye sezize zaxoshwa esikoleni.

UNkk Mseleku uthi indodakazi yayinezingane eziyisikhombisa, kwashona eyodwa njengoba ziyisithupha eziphilayo.

Izingane zakhe zineminyaka ephakathi kuka-14 nezinyanga eziyisithupha.

Izolo evakashelwe yiSolezwe emzini wakhe, uninakhulu wezingane uthe kumanje ezintathu zixoshiwe esikoleni ngoba zingenawo umfaniswano osesimweni esifanele nezicathulo zesikole zingabonwa.

Izingane zikaDumazile ezifunda uGrade 5 nefunda uGrade 1 e-Dr Made Primary zigcine ngoMsombuluko esikoleni ngenxa yenkinga yomfaniswano nezicathulo ngoba bezifaka amateku anezimbobo.

“Izingane eziphilayo zendodakazi yami ziyisithupha, ezinhlanu zihlala nami zondliwa yimina ngenxa yokuthi yena uyahluleka ukuzondla. Endala ihlala ezihlobeni. Ezinye zidla lapha ekhaya. Okungixakayo wukuthi indodakazi yami iyayithola imali yesibonelelo sikahulumeni, sezingane ezintathu. Ayikho imali anginikeza yona ukuze ngithenge ukudla. Namanje njengoba izingane zixoshiwe esikoleni ngenxa yokungabi nazo izicathulo, asazi ukuthi zizothengwa ubani. Ngihola impesheni nami, anginayo imali eyenele ukondla abazukulu. Ngidinga usizo ngoba indodakazi yami ayizinaki izingane zayo,” kusho uNkk Mseleku.

Uthe enye yezingane zakhe ike yahlala esibhedlela izinyanga ezintathu engasayibheki.

“Ngangizitshela ukuthi ingane uyayibheka esibhedlela ngoba ubephuma endlini ethi uya kuyona. Ngafika ingane isihlale cishe izinyanga ezintathu, isinesikhathi isindile. Izingane akazinaki. Uma ngikhuluma ngemali yesibonelelo uvele axabane nami,” kusho uNkk Mseleku.

UDumazile ofike Isolezwe lixoxa nonina uvumile ukuthi unenkinga yophuzo oludakayo.

“Ngiyaphuza impela kodwa angisabufuni ngoba uma ngiphuzile angenzi kahle. Izingane zami ngiyazama ukuzinakekela. Inkinga ukuthi noyise akafuni ukuzondla, udelela kabi uma ethole imali. Ngiyafisa ukuthola noma iphilisi elingenza ngiyeke utshwala ukuze ngizogxila ezinganeni zami,” kusho uDumazile.

Uthe uhlala emjondolo oyikamelo elilodwa ngakubo. Uthe yingakho izingane zakhe zihlale zikubo.

“Ngihlala emjondolo owodwa naye uyise walezi zingane. Ngiyakuthenga ukudla, ziyadla bese ziyolala kumama ekhaya. Ngiyazinaka izingane zami, ikakhulukazi le encane, angisayishiyi kumama ngihambe ebusuku,” kusho yena.

UDumazile wayeka isikole kaGrade 7 ngoba esengene shi ophuzweni.

UNkk Mseleku uthe indodakazi yakhe ayifuni ukutshelwa ikakhulukazi uma isiphuzile.

“Ngaqala ukumbona ukuthi uyaphuza ngoba wayeshiya ingane yakhe yokuqala encane ubusuku bonke eyophuza. Ngiye ngimkhuze kodwa akalaleli,” kuzikhalela uNkk Mseleku.

UDumazile uthe okwenza wangabhalisela isibonelelo semali kahulumeni sezingane ezintathu yingoba umasizi wakhe wathathwa wumashonisa kulandela ukutsheleka imali kuyena.

“Kuneminyaka umazisi ngingenawo, ngiwuthole kuleli viki. Yingakho ngingazange ngikwazi ukubhalisela izingane zami ukuba zihole,” kusho yena.

Uthe impilo inzima kakhulu njengoba engasebenzi noyise wezingane engalekeleli.

Okhulumela uMnyango wezokuThuthukiswa koMphakathi uMnuz Vukani Mbhele ukhuze umhlola ngalesi sigameko wathi bazothumela osonhlalakahle.

“Umama owenza lokho akumele athole isondlo sezingane kuhulumeni ngoba akazondli. Umuntu okumele athole imali ngugogo wezingane. Sizothumela osonhlalakahle ukuze bangenelele sizame nokulungisa indaba yezingane ezingasitholi isibonelelo sikahulumeni,” kusho uMbhele.

UMnuz Scelo Khuzwayo okhulumela uMnyango wezeMfundo KwaZulu-Natal uthe asikho isikole esinemvume yokuxosha ingane.

Uselobole amakhosikazi amabili ngemali ayinikelelwa ngabantu owesilisa ongaboni.

ZANELE MTHETHWA

USELOBOLE amakhosikazi amabili ngemali ayinikelelwa ngabantu owesilisa ongaboni, oseneminyaka engu-30 ecula enxanxatheleni yezitolo i-City View (Game City), eThekwini.

UMnuz Michael Sangweni (73), ohlala eMhlabeni, eMlazi akakuvumelanga ukugula okwamvala amehlo eneminyaka emine ezelwe, kufiphalise ikusasa lakhe. USangweni osenguthisha womculo esikhungweni sabangaboni i-KZN Society for the Blind, akawufundelanga umculo nokushaya isigingci adume ngaso.

Ikhono lokudlala izinhlobo eziningi zezinsimbi yikona okumvulele amathuba.

Abajwayele ukuyothenga eCity View bayalazi izwi lakhe elimtoti aliphelezela ngomnkenenezo wesigingci. Abadlulayo bamfakela imali athi yiyona eyafundisa izingane eziyisishiyagalolunye, walobola ngayo amakhosikazi amabili, enye eshone ngonyaka odlule.

Isigingci asisebenzisayo wasithengelwa wumndeni ojwayele ukumbona eCity View, athi wamnika sona njengesipho sikaKhisimusi ngo-2013.

“Iningi labangaboni liyawuthanda umculo njengobo noStevie Wonder ezidlalela upiyano. Nginesiphiwo somculo futhi nokudlala isigingci ngazifundisa. Ngiyayidlala ne-keyboard, trumpet ne-saxophone kodwa inkinga sengakhinyabezwa ukuphuma kwamazinyo,” ehleka.

Ngesikhathi ekhula KwayiPhathe, KwaNongoma wayefana nazo zonke izingane kodwa impilo yashintshwa ukungaboni.

Namanje akaqondi ukuthi yini eyayimgulisa ngoba akukho okwakungamphathi ngisho izindlebe.

Kwaba nzima ukwamukela ukuthi ngeke esakwazi ukugibela imbongolo, akhale azibhuquze efuna nokuyokwelusa nabanye abafana.

Uthe sasingekho isikole sabangaboni KwaZulu-Natal okwamphoqa ukuthi ayofunda e-Athlone School for the Blind eCape Town watholana noBabsy Mlangeni naye osengumculi.

Wagcina kuStandard 6 (Grade 8) befundiswa amakhono nokubhala ngeBraile okuwumshini osetshenziswa ngabangaboni.

USangweni uthe yayingekho imisebenzi yabakhubazekile, beziphilisa ngemisebenzi yezandla kuphela.

Ngo-1961 waqala ukusebenza e-KZN for the Blind ehola u-R3 ngenyanga benza umsebenzi wezandla.

Ugcine esengumkhulumeli wabasebenzi ngenxa yobuhlakani bakhe, athi ubenethonya lokwenza abelungu bamlalele.

Mayelana nomculo uthe wayeneqembu i-African Blind Brothers becula emakhonsathini e-YMCA bazama nokuqopha kwangaphumelela.

“Ngigcine ngizocula eGame City, ngaqala ngomaskandi ezinye izinhlanga zakhononda okwenze ngadlala kakhulu i-pop ne-classic.

“Akufani ngemali engiyenza eGame City ikakhulukazi ngezimpelasonto. Ngo-2010 abaphathi bangenzela isihlalo ngoba sengifana nomndeni wabo,” usho kanje.

USangweni oyiNazaretha ufisa ukuba ne-keyboard ayidlale esontweni.

Ukwazi ukuzenzela nemisebenzi yasendlini kanti emgwaqweni usizwa yinduku yabangaboni.

UMnuz Senzo Mchunu, usenxuse uNkk Peggy Nkonyeni ukuthi ame kancane ukufunda kulo nyaka.

Mhlengi Shangase

UNDUNANKULU waKwaZulu-Natal, uMnuz Senzo Mchunu, usenxuse uNgqongqoshe wezeMfundo, uNkk Peggy Nkonyeni, ukuthi ame kancane ukufunda kulo nyaka ukuze abhekane nokuphucula izinga lemiphumela kamatric.

UMchunu utshele uNgqongqoshe kazwelonke wezemfundo, uNkk Angie Motshekga, ukuthi selokhu amqoka uNkk Nkonyeni uthanda ukufunda. “Selokhu aqokwa uthanda ukufunda, akuyona into embi yinhle ngoba uyavuleka umqondo. Uhamba isonto lonke eseWits efunda. Awuthi ukuma kancane ukufunda ubhekane nalo msebenzi,” usho kanje.

Ukusho lokhu engqungqutheleni yezemfundo ebibizwe yihhovisi lakhe eSibaya Casino. Inhloso yengqungquthela bekuwukuqhamuka nezinhlelo zokuphucula imiphumela kamatric eyehle iminyaka ilandelana.

UNkk Nkonyeni uthe uthukile ethola ukuthi imiphumela yehle ngo-9% yafinyelela ku-60.7%. Uthe uthathe izintambo kuMchunu wajabula uma isifundazwe sithola ngaphezulu kuka-80% okwakuyimizamo kaMacingwane.

“Kuthe sekuphuma eyango-2014 okwakungeyesikhathi sami ngashaqeka uma yehla. Neyangonyaka odlule imane yehla ngadumala kakhulu,” usho kanje.

Uthe uMchunu wamtshela ukuthi kumele ngabe uyakwazi ukufanekisela ukuthi imiphumela izoma kanjani yize isuke ingakadedelwa ngokusemthethweni.

“Asikho isizathu esiqinile esingazithethelela ngaso sokwehla kwemiphumela. Zikhona izinkinga kwezinye izifunda ezenze ukuthi kwehle imiphumela kamatric esifundazweni. Ezinye zezifunda ziyahluleka ukuheha othisha abaneziqu ukuzofundisa. Esifundeni Ugu neLembe kwaba neziteleka ezaziphazamisa ukufunda,” usho kanje.

Ugxeke kakhulu izikhulu ezehluleka ukuqinisekisa ukuthi izikole zihambise imiphumela yabafundi yonyaka yonke, i-school based assessment.

“Ninesibindi nina zikhulu eningazange niyihambise imiphumela yonyaka yabafundi. Imiphumela yenza u-25% wemaki lo mfundi. Sizoqikelela kulokhu ukuthi imiphumela yabafundi ihanjisiwe,” usho kanje.

Usho lokhu nje esifundeni uMgungundlovu nezinye kube nenkinga yokuthi ama-SBA awahanjiswanga kwezinye izikole.Uma ingahanjiswanga umfundi uba sengcupheni yokufeyila.

UMchunu unxuse izinyunyana zothisha ukuthi zibambisane nomnyango. “Ngiyacela nje bafowethu ukuthi kubanjiswane kulungiswe zonke izinkinga ezikhona. Anike nikhulume namalungu enu ikakhulu lawa athole o-0% ukuthi lokho akwamukelekile. Awukwazi ukuthi ungalokhu uvikelwa ekubeni wehlisa izinga lokuphasa,” usho kanje.

Uthe akumele isifundazwe siphenduke inhlekisa ngokwehla kwemiphumela kamatric. “Uma kungukuthi aniguquli isimo nizophenduka inhlekisa,” usho kanje.

Belingase lenyuselwe esikhundleni iphoyisa likaMasipala weTheku elizidubule nomkalo, naye obeyiphoyisa emuva kwengxabano.

ZANELE MTHETHWA

BELINGASE lenyuselwe esikhundleni iphoyisa likaMasipala weTheku elizidubule nomkalo, naye obeyiphoyisa emuva kwengxabano okusolwa ukuthi isuswe yizinsolo zokujola ngeSonto eledlule.

Lokhu kuvele izolo emngcwabeni kaSergeant Sipho Christopher Nkwanyana (39) nomkakhe uConstable Sibongile Smangele Nkwanyana (38), abangcwatshwe ekhaya eNdwedwe.

Bonke abakade bekhuluma bathe bashaqekile ngesenzo sikaNkwanyana abathe asifani naye, kuthiwa ubenamagalelo aziwayo emsebenzini obekwenza kucace ukuthi ikusasa lakhe liqhakazile.

USenior Superintendent Mandla Khuzwayo obekhulumela abasebenzi, uthe uNkwanyana ubenezinkomba zokuthi maduze angase anyuswe esikhundleni.

Umufi okuthiwa ubesebenza ophikweni lobugebengu, kuthiwa ubedume ngokuba yiphoyisa elingadlali, ebelibopha kwasani kwabaphula umthetho.

“USipho ubekhuthele emsebenzini wakhe, eya ngisho ezizindeni okungezona ezakhe. Ubehola amaphoyisa ophikweni lwakhe ngendlela abethembeke ngayo ekubeni emaphoyiseni awubeki noma ngubani. Bekuseduze ukuthi anyuswe ngoba ubesanda kuthola ezinye iziqu eTshwane University of Technology,” kusho uKhuzwayo.

Uthe balahlekelwe ngokushona kwakhe ngoba kuthatha unyaka ukuqeqesha iphoyisa okusazoba nzima ukuvala isikhala sakhe.

UKhuzwayo obebazi bobabili uNkwanyana nomkakhe, uthe akekho owake wacabanga ukuthi bayoshona ngale ndlela. Uchaze uNkwanyana njengendoda ebikhonze isonto futhi ehola nekhwaya yamaphoyisa.

“Besijwayele ukuhamba naye uma siyoduduza la kushone khona ozakwethu. Sake saya kwabanye nabo abebezibulele, sisigxeka naye isenzo sabo yingakho ngingakholwanga uma naye eshone ngale ndlela,” usho kanje.

UNkwanyana kuthiwa wangena kwamasipala ngo-1998 kwathi umkakhe obesebenzela ehhovisi elixazulula izinkinga zomphakathi, wajoyina ngo-2007.

Isigameko sangeSonto esenzeka emzini wabo eMkhumbane sashaqisa ozakwabo njengoba izidumbu zabo zatholakala zidindilizile egcekeni.

Kuthiwa uNkwanyana wasebenzisa isibhamu somsebenzi ukudubula umkakhe, ingxabano yabo eyaqala emotweni.

Bahlukunyezwa baze baphoqwa ukuthi bavume ukuthi bayayazi imali ababesolwa ngokuyeba abangani ababili baseMlazi.

LUNGI LANGA

BAHLUKUNYEZWA baze baphoqwa ukuthi bavume ukuthi bayayazi imali ababesolwa ngokuyeba abangani ababili baseMlazi ababulawe maqede izidumbu zabo zalaxazwa ngaphandle kwesibhedlela iPrince Mshiyeni Memorial.

Enkonzweni yomngcwabo kaMnuz Sibusiso Dlamini (28) noMnuz Nhlakanipho Ngobese (27) kuvele ukuthi izidumbu zabo zazimbobo mbobo ngokubholwa ngama-drill futhi zishisiwe, bashaywa baze bashona ngaphambi kokuba zilaxazwe ngaphandle kwesibhedlela yimoto emhlophe i-VW Polo.

Laba bobabili babesolwa yizelamani ezingomakhelwane babo ngokuthi bantshontshe u-R5000 wazo.

Umfowabo kaSibusiso uMnuz Musa Dlamini, uthe umfowabo nomngani wakhe bashaywa kakhulu baze bavunyiswa ukuthi bayebile le mali. Kuphinde kwavela phakathi nesonto izinsolo zokuthi le mali igcine itholakele ngaphansi kwamatrasi.

“Laba bafana babegwazwa, baze babholwa nge-drill, bashiswa. Banezibazi zokushiswa. Uma bengaphuma la banichazele bangasho ukuthi bahlukumezeka kangakanani. Babengasaboni nokubona ngesikhathi beshaywa. Umuntu base bemuzwa ngezwi ukuthi usibanibani lona okhulumayo. Bayiphika baze bayivuma baphinde bayiphika le mali ngoba bethi bazama ukuqhuba isikhathi. Nathi sazama ukuthi sifike kubona kodwa sahluleka,” kusho uDlamini.

Ukusho lokhu emngcwabeni wabo bobabili ehholo lakwaM, eMlazi. Uthe okubaphatha kabi ukuthi abantu abenze lesi sehlo abantu ababaziyo futhi abakhule nabo oSibusiso noNhlakanipho. UDlamini uthe abasolwa abantu abebekhula nazo izisulu kulesi sigameko.

Uthe bekungabantu abebehlala baxoxe nabo, bebengazitsheli ukuthi kungayibo abagcina ngokubabulala ngesihluku.

Uthe okubuhlungu kakhulu ukuthi ngesikhathi kwenzeka yonke le nto unina wabasolwa wayekhona kodwa wangakhuza kunalokho kwaba nguye obagqugquzela ukuba babulale.

UDlamini uthe bekungelula ukuthi bathi bazoziphindiselela ngoba laba abantu nabo abakhule nabo abanye babo bebefunda nabo.

Izolo Isolezwe ngeSonto libike ukuthi sekuboshwe abane ngokubulawa kukaSibusiso noNhlakanipho.

Ngokusho kwamaphoyisa kuboshwe abasolwa abane abaphakathi kweminyaka engu-18 kuya kwengu-29. Kuthiwa baboshwe ngoLwesine ebusuku emuva kokutholakala kwe-VW Polo emhlophe okusolwa ukuthi yasetshenziswa ukulaxaza izidumbu.

Ukhala ngothi uthenge umuzi wakubo umlisa ophila nokukhubazeka waKwaMashu.

LUNGI LANGA

UKHALA ngothi uthenge umuzi wakubo umlisa (42) ophila nokukhubazeka waKwaMashu othi useke walala izinsuku ezintathu emotweni evalelwe indlu yilo mlisa ngoba ethi uyithengile.

UMnuz Stanely Mgobhozi wakwa-D uthi akasazi enzeni njengoba kukhona lo mlisa ommise kabi othi uthenge indlu kamfowabo osashona uMnuz Sibusiso Mgobhozi.

UMgobhozi uthe umfowabo ushone ngo-2008 washiya lo muzi ahlala kuwo njengoba umfowabo athi kufanele kuhlale kuwona wonke umndeni.

Uthe ubelokhu ehlala kuwona umfowabo esaphila futhi yena nodadewabo abasele naye ongahlali kulo muzi bebengakaze bazimisele ngokuwudayisa ikakhulu njengoba umfowabo ebenezingane ezisencane azishiyile.

“Ngimangele nje uma kuqala kufika enye inkampani edayisa izindlu ithi iyawudayisa ngo-2014. Ngalulandela lolu daba kwaze kwaba iyanyamalala njengoba babethi bazama ukuwufaka endalini. Nakuthe sekuvela lo muntu esengifonela ethi umuzi uwuthengile ngonyaka odlule,” kuchaza uMgobhozi.

Uthe lo mlisa othi unguMnuz Pathizwe Mchunu ubemfonela athi akaphume aphele kulo muzi ngoba yena usewuthengile futhi ufuna ukungena kuwona.

UMgobhozi uthe okusanda kummangaza ukuthi ukufika kwabalisa ababili abebehamba ngeveni bethi bathunywe nguye kuyena ngoba ekhala ngokuthi izingcingo zakhe akazibambi.

Uthe uhambe wayoxoxela omunye umzala wakhe ngalesi simo. Ngesikhathi esasendleleni ebuyayo wathintwa ngomunye womakhelwane bakhe bemtshela ukuthi kunabantu abakhipha impahla endlini.

“Ngafika impahla ingaphandle, lo muntu esike izingidi zasesangweni wase efaka amaketango nezakhe izingidi. Bathathe nemali ebengiyibeke phakathi kombhede. Ngilale emotweni izinsuku ezintathu ngoba ngingazi ukuthi ngingangena kanjani endlini,” kusho uMgobhozi.

Uthe kuze kwalamula ikhansela nokuyilo elifonele lo mlisa embuza ngokwenzekile. Uthe lo mlisa ube esefika ezovula izingidi wahamba namaketango akhe.

“Okungixakayo ukuthi sengilandelile kuyo yonke iminyango lapho engiya khona bavele bamangale uma ngibabikela ukuthi lo muzi uyadayiswa nokuthi sekukhona nomuntu othi uwuthengile. Sengithole nokuthi kumadokodo akhona kuvela ukuthi uwudayiselwe ngumuntu othi unguPatrick Mgobhozi okungumuntu esingenaye thina emndenini. Angazi ukuthi lo mkhonyovu bawenze kanjani ngempela,” kusho uMgobhozi.

Ethintwa ngalolu daba uMchunu utshele intatheli ukuthi yena akaze akhulume nabamaphephandaba.

“Lalela sisi wami angikubambe nje ungakayi kude. Mina angikaze ngikhulume ne-media futhi angizimisele ngokukhuluma nayo,” usho kanje.

UMnuz Dumisani Ngema oyikhansela lakuleya ndawo, uthe akazi kangako ngodaba lokudayiswa komuzi wakwaMgobhozi. Uthe ungenelele ngoba efuna ukwazi ukuthi lo mlisa ulandele yonke imigudu efanele ngesikhathi ekhipha uMgobhozi endlini.

Okhulumela amaphoyisa uLt Nqobile Gwala ukuqinisekisile ukuthi amaphoyisa aphenya icala lokugqekeza nokweba njengoba kusolwa nokuthi kukhona imali eyebiwe. Akekho osaboshiwe.

ZISATHUKA izanya izelamani ezikhubazekile uma zichaza ngokuzehlele ngeledlule.

PHUMLILE NTSELE

ZISATHUKA izanya izelamani ezikhubazekile uma zichaza ngokuzehlele ngeledlule zisinda sekuvalwe amehlo izinja zizama ukuzinephuza ngesikhathi zitotobela esikhungweni sempesheni kule ndawo.

UNksz Ntombifuthi Mkhithi (47) okhuluphele ngokweqile futhi onesifo sokuwa nomfowabo uMnuz Anele Mkhithi (22) baseziNqoleni yena oseyinto yombhede ngenxa yokuthi umzimba wakhe ukhonkobele nomgogodla kawusebenzi, babonga izingane zesikole ezibaphungele izinja zinabo shaqa.

UNksz Mkhithi uthe: “Sinomfowethu sikhubazekile, asikwazi ukuzenzela lutho. Ngokujwayelekile umama uyasikhapha futhi nguye osenzela konke nasekhaya kodwa kulokhu sithe asimphumuze ngoba kwayena usexhwalile.”

Kuvela ukuthi izinja ezisolwayo kazaziwa endaweni kodwa kwakubonakala sengathi ngezokuzingela ngoba zinyamalale zangabonakala.

UNksz Mkhithi uthi inkinga yakhe usindwa wumzimba futhi unesifo sokuwa kodwa nokho uyazama ukuzenzela izinto.

Uthe akazi kahle ukuthi isimo sokuvuvukala komzimba sasuswa yini kodwa odokotela bamtshela ukuthi ngamanzi ame ngaphansi kwenhliziyo amdalela khona.

Uthi ugqigqa isibhedlela eyodonswa la manzi nokumshiya ekhathele eqaqanjelwa nayiqolo.

Nomfowabo unesimo sokugoqana komzimba osegcine ngokonda waba yinkubela. Lesi sifo saqala ngemuva kokuthi esakhula wamane wavuvukalelwa yikhanda esibhedlela bamfaka okuthile kokudonsa amanzi ekhanda okwafakwa emgogodleni, kwaqala izinkinga.

Unina walezi zelamani, uNkk Irene Mkhithi (67) ubevele achiphize izinyembezi abuye abheke phansi kucace ukuthi lesi simo simumi ngenhla.

“Angazi ngingaqala kuphi mntanami njengoba nawe uyasibona isimo. Kwamina sengaze ngaklunyuka iqolo ngenxa yokuthwala lezi zingane zami ezinjena. Kwesinye isikhathi nami akuvumi nhlobo umzimba ubuhlungu unkenketha ngigcine ngingabanakekelanga,” kuzikhalela yena.

Uthi isifiso sakhe wukuthi lezi zingane zakhe zakhelwe indlu yomxhaso enezinsiza ezilungele abakhubazekile njengethoyilethi elishaywayo, amakhabethe amafishane nokunye.

Lo mndeni uthi izihlalo ezinamasondo ngeke zisize ngalutho ngenxa yokuthi bobabili kabangeni kuzona ngenxa yesimo sokukhubazeka kwabo.

Okhulumela uMnyango wokuThuthukiswa koMphakathi KwaZulu-Natal, uMnuz Vukani Mbhele, ucele ukuthunyelelwa imininingwane yomndeni.

“Sizocela usixhumanise nalo mndeni ukuze osonhlalakahle bethu bezoya kobheka isimo uma kukhona isidingo esiphuthumayo sokuba bayohlaliswa ezikhungweni zethu ezigcina abasezimeni ezifuze lezi basizakale. Kuyothi uma kubonakala isidingo sokuthi bakhelwe sixhumane nezinhlaka ezifanele bakhelwe,” kusho uMbhele.

UDkt Sibongiseni Dhlomo unxuse abafundi ukuthi baqale bahlole ngaphambi kokuzibandakanya nocansi.

MHLENGI SHANGASE

NJENGOBA kuhlale kushunyayelwa ivangeli lokuzithiba entsheni, uNgqongqoshe wezeMpilo KwaZulu-Natal uDkt Sibongiseni Dhlomo unxuse abafundi ukuthi baqale bahlole ngaphambi kokuzibandakanya nocansi, ngoba ngokocwaningo olwenziwa, abafundi besifazane abaningi yibona abafika emanyuvesi behaqwe yingculazi.

UDhlomo uthe ngokocwaningo abesilisa basuke bengahaqekile kodwa bahaqeka uma sebefunda emanyuvesi.

“Amantombazane asulelwa ngegciwane lengculazi ngo-sugar daddy besafunda ezikoleni zamabanga aphezulu. Bafika emanyuvesi bese beshintsha babayeke o-sugar daddy, bajole nontanga yabo bese bebasulela ngaleli gciwane,” usho kanje.

Uthe laba besifazane bathi beba neminyaka engu-32 sebesebenza bese beshona ngoba basuke sebephile naleli gciwane isikhathi eside.

“Uma behaqeke ena-16 weminyaka, bafa kuqala ngoba basuke sebehlale nalo isikhathi eside. Umfana uthola ukuthi yena ulithole esenyuvesi bese ehlala isikhathi eside. Yingakho sigqugquzela ukuzithiba noma-ke nihlole ngaphambi kokuzibandakanya nocansi,” usho kanje.

Ukusho lokhu izolo ngesikhathi kwethulwa umkhankaso wokuhlola nokuzithiba kwabafundi eMangosuthu University of Technology, eMlazi.

Uthe uma uya ezindaweni okuhlala kuzo abafundi besifazane emanyuvesi ufica ebusuku kupake izimoto zikanokusho.

“Lezi zimoto akuzona ezabafundi kodwa ngezo-sugar daddy. Uma nginengane yentombazane efunda enyuvesi angiyibheki ebusuku ngo-12, ngoba ngisho ekhaya angingeni ekamelweni layo ngemuva kuka-10 ebusuku. Ngakho ngeke-ke ngithi laba abasuke behamba ngezimoto ezinhle basuke beyobheka izingane zabo ebusuku ngo-12,” usho kanje.

Unxuse abesilisa ukuthi basoke baphinde basebenzise amakhondomu ukuzivikela.

Ululeke nabesifazane ukuthi bangayi ezindaweni ezingagunyaziwe bayohushula izisu, ngoba lokhu kungaba nomthelela omubi uma sebelinyalelwa yizibeletho.

UMengameli womkhandlu wabafundi, uRonnie Madlala, unxuse abafundi ukuthi baziphathe kahle, bazazi bazeleni enyuvesi.

Uthe zikhona izindawo zokuhlolela ingculazi, wathi baningi abafundi ahlale ebabona beyohlola.

“Ayiphele eyo-sugar daddy ngoba nizothola ingculazi. Siyafisa futhi ukuthi eminyakeni eyishumi ezayo sibe nesikhungo sokufundisa odokotela eMangosuthu,” usho kanje.

UMnuz Thami Mchunu, ophethe abafundi kule nyuvesi, uthe abafundi abangacekeli ikusasa labo ngezinto ezingathi shu.

Uthe kwethulwe uphawu lwengculazi ukuze nsuku zonke bakhumbuze abafundi ngendlela okumele baziphathe ngayo.

IGift of the Givers izonikela ngamanzi emphakathini waseXobho.

INTATHELI YESOLEZWE

INHLANGANO esiza abantu iGift of the Givers izonikela ngamanzi emphakathini waseXobho ibuye isize abalimi ngokudla kwemfuyo emizameni yayo yokusiza labo abakhahlanyezwe yisomiso eNingizimu Afrika.

AbeGift of the Givers baveze ukuthi baqale ukulekelela imiphakathi ekhahlanyezwe yisomiso ngo-Agasti ngonyaka odlule ngesikhathi bevakashele eNorth West lapho bafike bashumeka khona umshini wokumoma ngaphansi komhlaba eBodibe, Zeerust naseLichtenburg.

NgoNovemba baphinde basiza imindeni ewu-4 000 ngamanzi besizwa ngumnikelo kaMnuz Imraan Mahomed wenkampani iSai Group.

Isikhulu sale nkampani, uDkt Imtiaz Sooliman, uthe banohlelo oluhlukaniswe izigaba eziyisishiyagalolunye lokusiza abantu abangenamanzi.

n abantu bazonikezwa amanzi afakwe emabhodleleni.

n ukulungiswa kwengqalasizinda ekhipha amanzi ngaphansi komhlaba.

n ukumbiwa kwamanzi ngaphansi komhlaba ezindaweni ezithile.

n ukwakhiwa kwezindawo zokugcina amanzi ezikoleni, ezibhedlela nakwezinye izindawo zasemakhaya.

n ukuhambisa amanzi ngamaloli.

n ukunikela ngokudla kwezilwane.

n ukulekelela abalimi abancane ngakho konke abakudingayo, amanzi nokudla kwemfuyo.

n ukuqinisekisa ukuthi amanzi aphathwa kahle ukuze kungaqubuki izifo.

n ukusiza imiphakathi ekhahlanyezwe yisomiso ngokudla, amajusi, oncamnce bezingane, izincwadi nemifaniswano yesikole.

IGift of the Givers isiza abantu baKwaZulu-Natal, Free State, North West, Limpopo, Northern Cape, Eastern Cape naseWestern Cape.

UDkt Sooliman ugqugquzele abantu ukuba banikele balivakashele nekhasi labo kuFacebook ne-website yabo ekhelini elithi www.giftofthegivers.org.

Uthe uma umphakathi ungalekeleli izinkampani zizovalwa bese imindeni ilamba. wenze isibonelo ngenkampani eseVryheid okuwukuthi uma ingenawo amanzi imindeni ewu-700 ngeke ibe nokudla ngenxa yokuthi amalungu ayo asebenzela yona.

Livulelwe icala lokushaya ikhansela le-ANC ku-ward 59, eVerulam ngemuva kokuvulela isibhaxu kuzakwabo ongunobhala.

MLUNGISI GUMEDE

LIVULELWE icala lokushaya ikhansela le-ANC ku-ward 59, eVerulam ngemuva kokuvulela isibhaxu kuzakwabo ongunobhala izolo limsola ngokuba yingxenye yabantu abashintshe ukhiye wasehhovisi lalo.

UNksz Ncediwe Mfenqa (51) onguNobhala we-ANC kule-ward uthe ubezihambela ngasehhovisi likamasipala iSizakala izolo ngesikhathi ikhansela uNksz Nondumiso Ndlovu limbiza ngaphansi kweziteki limsola ngokushintsha okhiye basehhovisi lalo.

“Ikhansela lize kimina lihamba nabantu balo ababalelwa ku-30, bafike bangishaya kubuka amalungu omphakathi,” usho kanje.

Uthe isigameko sokushaywa kwakhe usibikile esiteshini samaphoyisa saseVerulam.

Okhulumela amaphoyisa aKwaZulu-Natal uMajor Thulani Zwane uthe icala lokushaya liyaphenywa amaphoyisa aseVerulam kodwa okwamanje bekungakaboshwa muntu.

Ethintwa izolo, uNksz Ndlovu uphikile ukuthi yena nabalandeli bakhe bashaye uNksz Mfenqa.

“Bengizihlalele phansi mina ngaphakathi emagcekeni asehhovisi iSizakala, ngimbonile uMamu Mfenqa kodwa asizange sikhulume naye, uqamba amanga uma ethi ngimshayile. Sebenza le nto yabo yokuhamba beqamba amanga ngami emaphepheni,” usho kanje.

Uthe sibe khona isixakaxaka esisukile eSizakala kodwa akekho umuntu oshayiwe.

“Abantu bebegcwele eSizakala kukhona nabazofuna izincwadi kodwa bengakwazi ukuzithola ngenxa yokuthi isigungu esihola i-ward sishintshe okhiye basehhovisi lami,” usho kanje.

Uthe kube nokuthukana phakathi kwamalungu omphakathi namalungu esigungu esihola igatsha ngoba umphakathi ubudinwa wukuthi awusakwazi ukuthola izidingo ngenxa yokuvalwa kwehhovisi.

UNksz Ndlovu uthe uNksz Mfenqa uma ekhala ngokuthi ushayiwe kumele ayobikela amaphoyisa, wengeza ngokuthi naye unabo ofakazi abangamaphoyisa abebekhona eSizakala ababonile ukuthi akazange ashaye muntu. Uthe wasihoxisa isicelo sakhe sokuhlaba ikhefu ngoba efuna ukubuyela emsebenzini.

Ilungu le-ANC elikhulume neSolezwe kodwa lacela ukuthi lingadalulwa lithe wumkhandlu weTheku oshintshe okhiye basehhovisi lekhansela ngoba kade linqaba ukuphuma khona kungene ikhansela elibambile (PR) uNksz Nelly Nyaniso.

“Umkhandlu unike ikhansela ikhefu lezinyanga ezine njengoba lacela lithi liyothwasa manje kumele kusebenze iPR kodwa ayikwazi ngenxa yokuthi ikhansela alifuni nehhovisi,” usho kanje.

USomlomo emkhandlwini weTheku, uMnuz Logie Naidoo, uthe ngokwazi kwabo uNksz Ndlovu usekhefini njengoba azicelela yena ukunikwa isikhashana ethi kukhona izinto ezithinta isiko okumele azenze.

Usinde ngokulambisa umndeni wakwaNtshangase kwa-K, eMlazi, kusha umjondolo.

LUNGI LANGA

USINDE ngokulambisa umndeni wakwaNtshangase kwa-K, eMlazi, kusha umjondolo ngenxa yengxabano equbuke emhlanganweni obusehholo lomphakathi phakathi kwamalungu e-ANC abebanga ukukhethwa kwabazomela inhlangano ebukhanseleni.

Kuthiwa umsindo usuke ngesikhathi kukhona abebefuna ukungena ngenkani emhlanganweni wobuholi begatsha obungeSonto, ngenhloso yokuphakamisa igama lalowo abebefuna ukuba abe yikhansela.

Amalungu abehlangene ehholo laKwa-K eliseceleni komjondolo wakwaNtshangase.

UNksz Bonisiwe Ntshangase (32) uthe namanje abakakholwa yisigameko esibehlele.

UNksz Ntshangase uhlala nodadewabo ababili, oyedwa oneminyaka engu-22 noneminyaka engu-23, nengane kadadewabo enezinyanga eziyishiyagalombili.

Uthe basola ukuthi indlu ishe ngesikhathi amaphoyisa ephonsa iziqhumane zokuhlakaza isixuku (stun grenades) ebesingalawuleki.

Uthe bebehleli endlini ngesikhathi kusuka ingxabano phakathi kwamalungu aleli qembu emhlanganweni obulokhu uqale emini ngezithuba zawo-12, kwaze kwaba yisebusuku nalapho uphethe khona ngengxabano edalwe wukungenami kwabathile ngekhansela lakuleya ndawo, uNksz Melta Zuma.

“Besilokhu sibezwa bethethisana kucaca ukuthi kukhona abanganeme ngakho. Abanye bebesho ukuthi ngeke kuze kuhambe muntu ehholo. Sibone kungcono sihambe siye endlini ngoba vele uma kunemihlangano yabo bavame ukuphetha ngokulwa. Eminyakeni emibili edlule kwasuka ingxabano kwakhona odubulayo, inhlamvu yashaya odongeni (kwaNtshangase) yaphuma ngophahla,” kuchaza uNksz Ntshangase.

Uthe baphume begijima endlini ngeSonto ngoba bezwa kuqhuma isibhamu babalekela kwamfowabo ohlala bude buduze nakhona.

Uthe bese beqala ukuxhoshwa yintuthu yesisi esikhalisa unyembezi ngesikhathi behamba.

Kuphele imizuzwana behambile batshelwa ukuthi indlu yabo iyasha.

Isolezwe lifika kulo muzi izolo bekumapeketwane.

Kushe ikamelo okulala kulo odadewabo bakaNksz Ntshangase nengane.

Izimpahla ezishile bezisabonakala ngaphandle, kuzona bekukhona umbhede, izimpahla zengane okukhona kuzo namanabukeni, izimpahla zokugqoka nenye impahla yasendlini.

Uthe ezinye zikhishwe yibo labo abebekulo mhlangano ngesikhathi kusha njengoba bebezitshela ukuthi kukhona abakhona endlini.

Bekukhona namalungu e-ANC okuthiwa abeyingxenye yalo mhlangano, elokhu ebuka ngamawindi isimo ngaphakathi endlini ebabaza.

Bafike babuka base beya ehholo nalo ebeliphihlizwe amawindi nezicabha yiqulu ebelivuke umbhejazane.

UNksz Ntshangase uthe ukusha kwendlu kwenzeke phambi kwalo ikhansela uNksz Zuma, kodwa akazange azihluphe ngokufika azobona umonakalo kwale noma befika bezombikela.

Ubatshele ukuthi abayokwenza incwadi efungelwe esiteshini samaphoyisa.

Kuthiwa ikhansela izolo lifikile ehholo lizobheka umonakalo, lase lima isikhashana eduze kwemoto yalo, lase lihamba ngaphandle kokuzobheka lo mndeni.

UNksz Zuma ebuzwa uthe akukho okungako akwaziyo.

Uthe uzwe abantu bethi indlu ishiswe ngomunye ovame ukushisa izigubhu zikagesi. Ebuzwa ngokuhambela umndeni uthe: “Abangadlali ipolitiki bona ngoba bengizama ukubasiza,” kusho uNksz Zuma.

Ucingo lwakhe lunqamukile kwathi uma esephinde ezanywa lwangena ku-voicemail kwaze kwashaya isikhathi sokushicilela engatholakali.

Umndeni wakwaNtshangase ube sewuthola umbiko othi ikhansela ngeke lisabasiza ngoba sebekhulume nabezindaba.

Usephila ngokudla emgqonyeni uMnuz Mduduzi Makhaphela othi sekuphele unyaka yavaleka impesheni yakhe yokugula.

S’MANGELE ZUMA

USEPHILA ngokudla emgqonyeni uMnuz Mduduzi Makhaphela (28) wakwa-F, KwaMashu, othi sekuphele unyaka yavaleka impesheni yakhe yokugula ngenxa yokufeyiliswa wudokotela njalo uma eyoyivuselela. UMakhaphela, ophila nesifo sokuwa, uthe kuyamxaka okwenziwa ngudokotela ukungamgunyazi ukuthi ahole impesheni kodwa ebe eqhubeka nokumnikeza amaphilisi okwelapha isifo sakhe.

“Into engixakayo nguyena lo dokotela owangitshela ukuthi ngeke ngisakwazi ukusebenza umsebenzi onzima ngenxa yokugula kwami. Inyanga nenyanga unginikeza intahantaha yamaphilisi kodwa lutho ukuvuma ukuthi ngisadinga impesheni.

“Konakala ngokuthi ngihlale KwaMashu ngoba ngangingasakwazi ukuya kudokotela wasesibhedlela i-Addington obese kuphele iminyaka engisayinela incwadi yokuthi kumele ngihole impesheni.

“Lo dokotela wasemtholampilo waKwaMashu uyangichitha ngaso sonke isikhathi. Angazi ukuthi ngamdlelani ngoba le mali ngiyayidinga ngempela,” kusho uMakhaphela. Uthe useze aphoqeleke ukuthi adle emgqonyeni edolobheni ngoba usuke eselambe kakhulu.

“Ngiziphilisa ngokuxhuma amatende abantu abadayisayo edolobheni, banginike lawo masentshana amancane. Imali yabo iphelela ekugibeleni nasekuthengeni isishebo sakusihlwa. Emini ngizula iTheku lonke ngihambe ngiqalaza emgqonyeni, lapho ngisuke sengifa yindlala ngenxa yala maphilisi engiwadla njalo. Angikwazi ukusebenza ngoba ngivele ngivukwe yilesi sifo ngifumbuke phansi. Ave sibukisa ngami lesi sifo sami, uma ngiphambi komqashi sivele singivuke phambi kwakhe ngingakawuqali nomsebenzi,” kusho uMakhaphela.

Uthe usephoqeleke ukuphila impilo yomuntu ohlala emgwaqweni ngoba nakubo uhlala noyise omncane ongasebenzi. Owesifazane odayisa edolobheni, uNksz Thoko Duma (40) uthe sekuphele iminyaka engu-10 emazi uMakhaphela ephila nalesi sifo.

“Ufanelwe ukuyihola impesheni ngoba lesi sifo sakhe asimvumeli ukuthi asebenze. Uma eke wasebenza ngokuzikhandla, noma wasebenza kakhulu elangeni, uvele adlikize aquleke. Ngimazi esahlala emgwaqweni ngaze ngahambe ngifuna umndeni wakhe, ngawuthola ngoba ngikhathazekile ngempilo yakhe. Uvele adlikize bese eyaquleka,” kusho uNksz Duma. Okhulumela ezezimpesheni kwaSassa, uMnuz Vusi Mahaye, uthe impesheni yokugula kuba yinkontileka yesikhashana ngesikhathi besabona kusenesidingo.

“Miningi imigomo elandelwayo ukuze umuntu athole impesheni yokugula. Asibheki imiphumela kadokotela kuphela. Inkinga wukuthi baningi abantu abangasebenzi ezweni lethu okugcina kubenze babambelele kule mali yempesheni. Umuntu othola le mali ngumuntu ogula kakhulu ongeke esakwazi ukusebenza futhi nakhona akubi unomphelo, silokhu sisibheka isimo sakhe ukuthi sesinjani,” kusho uMahaye.

Sisathukile isikhulu esibhekele izikole emnyangweni wezemfundo KwaZulu-Natal ogejwe yinhlamvu ehlaselwa esemgwaqweni u-M13 ngaseHillcrest.

MHLENGI SHANGASE

SISATHUKILE isikhulu esibhekele izikole emnyangweni wezemfundo KwaZulu-Natal, uNkk Judy Dlamini, ogejwe yinhlamvu ehlaselwa esemgwaqweni u-M13 ngaseHillcrest, ngoMsombuluko ekuseni.

UNkk Dlamini, oyi-Senior General Manager, ophikweni i-Institutional Development Support ubeya emhlanganweni obuzobhunga ngohlelo lokuphucula imiphumela kamatric eThekwini obekuzobakhona kuwo noNgqongqoshe wezemfundo uNkk Peggy Nkonyeni. Uthi ubonga uNkulunkulu ngokumsindisa.

Uthe uphume ekhaya eMgungundlovu ngo-6 ekuseni elibangise kulo mhlangano kodwa limtshela igazi ngoba ubengabaza ukuhamba yedwa.

“Ngize ngakhuluma nenye inkokheli ngayitshela ukuthi angizizwa kahle ngiyanqena ukuhamba ngedwa kodwa ngaqhubeka. Ngithe ngidlula eHammarsdale ku-N3 ngibheke eThekwini ngabona le moto iBMW emhlophe ebingenazo izinombolo ingilandela. Ibilokhu ishintsha umzila uma nami ngiya komunye ngaze ngabona ukuthi ingiqondile. Ngingene ngo-M13 ngoba ngithi ngifuna ukuyibona ukuthi izongilandela kanti nempela iyangilandela,” usho kanje.

Uthe ibe isimdlula wezwa kuqhuma isibhamu kanye yashaya iwindi langemuva yashaya yachitha.

“Ngithukile, nganyukelwa nawumfutho wegazi, ngaya kodokotela ngathinta nabanye ozakwethu. Ngibe sengiya esibhedlela ngafike ngahlala khona amahora ambalwa. Udokotela ungidedelile wanginika izinsukwana zokuphumula ekhaya,” usho kanje.

Isolezwe lifike emzini kaNkk Dlamini kungena kuphuma abebezombona, kulandela ukuhlaselwa kwakhe.

UNkk Dlamini akagadwa, kodwa eminyakeni embalwa edlule wake wagadwa kulandela ukusatshiswa njengoba ayephethe uhlelo lwezokudla.

“Ngangena esikhundleni somuntu owayegadwa kodwa bahoxiswa abaqaphi. Akukho engikusolayo ngoba akekho nosake wangisabisa ngokuthi uzongenza isilo sengubo. Angazi lokhu kuhlaselwa kumayelana nani. Ngizoqhubeka nomsebenzi wami, ngeke ngisatshiswe. Ngiyabonga kulabo abangesekayo selokhu kwenzekile, uNggqongqoshe Nkonyeni ungithinta ihora nehora angibheke ukuthi nginjani,” usho kanje.

Uthe inhlamvu ingene ewindini langemuva yayobhajwa esihlalweni esingaphambili.

“Ukube bengihamba nomunye umuntu ehleli ngaphambili ngabe sikhuluma okunye. Ukube ibingadimile ngabe iwindi lifile.”

Okhulumela umnyango, uMnuz Muzi Mahlambi, uthe bathukile ngokuhlaselwa kukaNkk Dlamini, wathi ayikaziwa imbangela yokuhlaselwa kwakhe.

Unxuse amaphoyisa ukuthi asheshise uphenyo kuboshwe abathintekayo, wathi babonga uNkulunkulu ukuthi usindile.

Amaphoyisa aseHillcrest ayaphenya.

Kushube umoya phakathi komkhulumeli weNumsa nomsakazi woKhozi FM.

CELANI SIKHAKHANE

KUSHUBE umoya izolo phakathi komkhulumeli wenyunyana yabasebenzi bokusansimbi, iNumsa nomsakazi woKhozi FM ngesikhathi beqagulisana bebanga ukuqokwa kukaDkt Mangosuthu Buthelezi ukuba athule isifundo ngengqalabutho yomzabalazo nezemfundo, uSolwazi Zachariah Keodirelang (ZK) Matthews.

Lesi sifundo ebesethulwa nguButhelezi ngoMsombuluko, besihambisana neminyaka engu-100 kwasungulwa iNyuvesi yaseFort Hare edume ngabaholi abaningi abamnyama abafunda kuyo abavelele emhlabeni.

Indaba iqale ngesikhathi uMnuz Castro Ngobese ongumkhulumeli weNumsa ebhala ebuza ukuthi kungani kungaqokwanga omunye umuntu ukuba ethule isifundo ngoMatthews ngoba uButhelezi akafanelekile.

Abantu bamphendulile bathi uButhelezi ungomunye wabafundi abakhiqizwa yiFort Hare futhi waphinde wafundiswa nguMatthews, yingakho kuqokwe yena. Ubhale kuTwitter ukuthi akaboni kube wumqondo omuhle ukuba kukhethwe uButhelezi ukuthi “athule lesi sifundo ngoba babemele izinto ezingahlangani benoMatthews. UButhelezi wayevimbe inkululeko kanti uMatthews wayefuna izwe likhululeke”.

Umsakazi woKhozi uNkosinathi Mshengu ungenele kule nkulumo wathi kungaba ngcono uNgobese afunde kabanzi ipolitiki ukuze aqonde ukuba khona kukaButhelezi kulo mcimbi obuseFort Hare.

“Kuyingozi ukungazi mfo kaNgobese! Uke walwenza kodwa ucwaningo ngaphambi kokuba ubhale le nkulumo yakho? Ngabe uke wazinika isikhathi wabuka inkulumo kaButhelezi ngaphambi kokuba ubhadluluke ubhale le nto? Indlela obuka ngayo izinto iyihlazo, zama ukufunda wandise ulwazi bhuti ngoba uzozihlekisa nezwe. Okokuqala bekukhona nabaholi be-ANC kulo mcimbi,” kusho uMshengu. Ethintwa uMshengu uthe udumele ukuzwa ukuthi uNgobese ungumkhulumeli wenyunyana enkulu kangaka, wathi ungumuntu ongafanelwe ukuba ngumholi ngoba uyingozi emphakathini. Uthe uyameluleka ukuba afunde noma afake isicelo sokuyofunda eFort Hare ukuze akwazi ukuhlukanisa umcimbi wepolitiki nalona obekukhuluma kuwo uButhelezi.

Uthe abaholi be-ANC kabazona izithutha ngendlela yokuthi bebengavele baye kulowa mcimbi ekubeni bekungowe-IFP ngakho uNgobese umbona eshaye isikhala.

UNgobese uphendule uMshengu kuTwitter ngokumbuza ukuthi uyiNkatha yini, esho nokuthi uma ethanda uMshengu akahambe ayobikela uButhelezi ngakushilo.

“Wena njengesitaki esiqavile, ungazincishi ulwazi kodwa funda kabanzi... Ingozi enkulu esizweni yilobu butaki bakho obugcwele ikhanda lakho. Mina angilona ilungu leNkatha futhi ngeke ngamlalela ... ihlazo iziqhaza ezifana nawe ezingalifuni iqiniso. Ngeke sikhohlwe wudlame olwalubizwa nge-7 Days War eMgungundlovu...” kusho uNgobese. Esekhuluma neSolezwe uthe usamile ekutheni uButhelezi ubengafanelwe wumcimbi omkhulu kangaka ngoba ukuthi umuntu abekhuluma ngaye wamfundisa, lokho akusho lutho.

Uveze nokuthi abantu abahlukumezeka ngobandlululo bavukwe yiminjunju bembona ekhuluma eFort Hare futhi okubaphathe kabi ngukubona abaholi be-ANC betetemuka naye.

Uthe uyadumala ukuthi abantu abafana noMshengu abafuni ukulazi iqiniso yikho benozwelo noButhelezi.

KuTwitter abantu bebetshela uNgobese ukuthi indodana kaMatthews, uMnuz Joe Matthews, ongubaba kaNkk Naledi Pandor we-ANC, wayesesigungwini esiphezulu ebuholini be-IFP kangangokuthi ohlwini olwaluya ePhalamende wayengowesibili.

Umphathi weNyuvesi yaseFort Hare uMnuz Tom Mvuyane, uphawule kuRadio 702 ngoButhelezi wathi baqoke yena ngoba ungomunye wabafundi abaqavile abakhiqizwa yiFort Hare.

UMatthews, waba umfundi wokuqala omnyama ukuthweswa iziqu kule nyuvesi ngo-1923 kanti waphinde wafundisa kuso lesi sikhungo abafundi okubalwa kubo uButhelezi nabanye.

Ukhala ngokuhlaselwa amagundane alingana namakati umphakathi wakwa-M, eMlazi.

NONTUTHUKO NGUBANE

UKHALA ngokuhlaselwa amagundane alingana namakati umphakathi wakwa-M, eMlazi, njengoba esanda kuluma izingane ezimbili kule ndawo.

Bathi bahlezi ngesinqe esisodwa omakhelwane bakule ndawo njengoba bethi bahlaselwe ngamagundane aqeda ukudla, angenelele ifenisha agcine eluma ngisho nezingane.

Isolezwe lithole nokuthi ezinye izingane ezincane sezijwayele ukuhlala endlini zingaphumeli emnyango ngoba amagundane ‘adlala’ egcekeni emini kabha. Ingane yakwaMkhwanazi eneminyaka emine ize yaphuthunyiswa esibhedlela ngeledlule kusolwa ukuthi ilunywe yilo igundane ilele.

Enye ingane eneminyaka eyisikhombisa yakwaNgwane nayo kusolwa ukuthi ilunywe yigundane onyaweni kade ilele.

UNksz Zama Mabizela uthe le nkinga isingaphezu kwamandla njengoba amagundane ebabelesele ebaququda ngisho noma belele.

“Sithwele kanzima kule ndawo ngenxa yamagundane alingana namakati. Sesiyasaba ukuthi sizogula ngoba angena ekudleni kwethu, adla izimpahla zethu ngisho nefenisha impela awayibheki. Akukho esingakwenzi ukuwaqeda, siyathela imithi yokuwabulala kodwa avele ande kakhulu. Ngathenga nonoxhaka kodwa avele awuwise phansi. Sizamile nokubika kwikhansela ngale nkinga kodwa lutho usizo. Okwenza sisukume manje ukuthi siyabona nezingane zethu azisaphephile njengoba sezilunywa yiwo amagundane,” kusho uNksz Mabizela.

Isinkwa kuthiwa sesifihlwa emafrijini nakwi-microwave ngenxa yalesi simo.

UNksz Delisile Ngwane uthe kumanje akazi uzoshonaphi nomndeni wakhe ngoba amagundane abakhathazile.

“Angisazi kumele ngenze njani noma sishonephi ukuze siqeda lamagundane. Ingane yami kumanje iyaxhuga ngoba ilunywe amagundane emasontweni amabili adlule. Kumanje ingane yami ayisakwazi ukulala yodwa iyesaba. Angiphathi izimpahla zami, ziphelile. Izolo nje kade ngizilahla ngoba zidliwe amagundane. Noma uzihlalele ubukela ithelevishini kuvele kube sengathi wumcimbi eyaluza endlini engenandaba nabantu,” kusho uNksz Ngwane.

Elandisa uthe ingane yakhe yavuka ikhala ithi idliwa yinto ehambayo.

Uthe wawezwa amagundane eyaluza endlini, wabe esebona ukugubheka kwesikhumba kuveza ukuthi ubeququdwa amagundane. Uthe kuvuleke imbobo onyaweni lwengane.

Isolezwe kade lisaxoxa nomphakathi ngayo le nkinga, izinkuzimalanga zamagundane bezibonakala ziyaluza ngokushesha zilandelana kule ndawo.

UMnuz Sbonelo Zikalala naye uthe isimo sibi impela kule ndawo ngenxa yamagundane.

“Saletha amakati nawo abaleka ngoba ebona amagundane angaphezu kwawo. Ingane yami enezinyanga eziyisithupha ihlale isesandleni ngoba ngisaba ukuthi amagundane azoyidla. Uma kulalwa senza isiqiniseko ukuthi siyayigona ngoba amagundane angayidla uma ilele,” kusho uZikalala.

Umphakathi uthe usuzamile ukuhlanza le ndawo nokusebenzisa ubuthi ukuqeda lamagundane kodwa kungalungi.

Isolezwe libone izindawo eziyisikhotha nobunye ubunuku kule ndawo.

Isolezwe lithinte ikhansela lendawo ngesikhalazo somphakathi, ucingo belukhala lungabanjwa. Kuthunyelwe umasipala weTheku imibuzo ngalesi sikhalo, nawo ubungakaphenduli.

Kunzima nokulala ebusuku kunina wosana obekungukuphela kwalo elishe langqongqa emjondolo wakubo osehostela KwaMashu.

S’MANGELE ZUMA

KUNZIMA nokulala ebusuku kunina wosana obekungukuphela kwalo, uBandile Ntshapheka ebelinezinyanga ezinhlanu, elishe langqongqa emjondolo wakubo osehostela KwaMashu ngesikhathi lushiywe lodwa ngeSonto emini.

Unina wosana, uNksz Thandi Dunge (28) uthe umlilo oqubuke ngemuva kwesikhashana esanda kuphuma ephuthuma ukuyothenga izinto ezincane esitolo ngoba esalibona lisazunywe wubuthongo.

“Yinto ebengijwayele ukuyenza ukuyishiya yodwa endlini ingane yami ngoba ngisuke ngazi ukuthi ngokwesikhashana. Kusukela esemncane bengimshiya elele, ngihambe ngiyowasha emnyango. Angazi kulokhu konakelephi, angikwazi ngisho nokukhuluma ngayo le nto. Ebusuku sisabuya isithombe sengane yami isishile, angikwazi nokulala,” kusho uNksz Dunge.

Uyise kaBandile, uMnuz Thulani Ntshapheka (40) uthe wayevakashele abangani bakhe khona endaweni ngesikhathi kuqubuka umlilo abasola ukuthi wadalwa wugesi wezinyokanyoka.

“Ngezwa sengibizwa kamngani wami sekuthiwa angiphuthume indlu yami iyasha. Ngafika kuqala kunina womntwana. Ngafika sekuvimbanise intuthu namalangabi.

Ngathi ngiyangena ekamelweni ngavinjwa amalangabi athungekela ezingutsheni engangizigqokile. Angikwazanga ukufinyelela kumfana wami.

Sazama ngosizo lomakhelwane ukucima umlilo kodwa kwasho ukuthi usumkhulu kakhulu. Yaze yasha yangqongqa ingane yami phakathi,” kusho uNtshapheka.

Uthe basadidekile ukuthi yini imbangela yomlilo ngoba bona akukho okusebenza ngogesi ababekushiye kukhanya.

“Kunzima uma kunje ukulokhu usola abantu ngokwenzekile. Asazi noma kwathintana izintambo zikagesi kamakhelwane ngoba umlilo waqala ngakulolu donga esincikene ngalo. Kwakungenamuntu kwamakhelwane ngesikhathi kuqubuka umlilo, okwenza sidideke wukuthi umlilo waqhamuka kuphi. Siphithene amakhanda ngoba kula magumbi amabili omjondolo ebesinawo akukho okubalulekile esakwazi ukukuhlenga. Kuyimanje sicuphe kamakhelwane,” kusho uNtshapheka.

Omunye womakhelwane owafika sekucishwa umlilo uthi yaba buhlungu into abayibona ingane ishe ingqongqe izilalele kubo.

“Uyadela ongayibonanga leyanto. Sazama ukucisha umlilo sahluleka. Unina wengane wayesefuna ukuziphonsa phakathi indlela ayesangene ngayo. Cabanga ukuhamba isikhashana ubuya ingane yakho isife ngesihluku esingaka.

“Nginesiqiniseko sokuthi uyazisola ukuthi wayengahambi ngani nayo kodwa kuzomele aqine ngoba okwenzekile kufana nokudaliwe,” kusho umakhelwane.

Okhulumela amaphoyisa KwaZulu-Natal, uMajor Thulani Zwane, uthe amaphoyisa aKwaMashu avule icala lokufa komuntu ngemuva kokuthi ingane ishe yangqongqa ilele.

“Okwamanje ayikaziwa imbangela yomlilo, amaphoyisa asaphenya,” kusho uZwane.

Umphakathi ushaqekile ngesigameko sokuboshwa kwabafana abane ngecala lokuphoqa abanye abangu-10 ukuba badlwengulane.

NONTUTHUKO NGUBANE

UMPHAKATHI waseMkhobosa, eSikhaleni ushaqekile ngesigameko sokuboshwa kwabafana abane ngecala lokuphoqa abanye abangu-10 ukuba badlwengulane.

Abasolwa abane abaneminyaka ephakathi kuka-15 no-19, kulindeleke ukuba bavele kuleli sonto eNkantolo yaseSikhaleni ukufaka isicelo sebheyili, ngecala okuthiwa lenzeke ngoJanuwari 31 nonyaka.

Isolezwe lithole ukuthi laba bafana abangu-10 babekade bebhukuda edamini elibizwa ngokuthi yiNjunga, ngesikhathi kufika abafana abangabasolwa babashaya base bebaphoqa ukuba badlwengulane bababuke.

Kuthiwa laba bafanyana benqaba kodwa lamabhoklolo aqhubeka nokubashaya ngezinduku nangezagila, bebaphoqa.

Ngokuthola kweSolezwe, abasolwa babekhomba ukuthi ngubani okumele adlwengule bani. Kuthiwa lokhu kwenzeka abafanyana bebodwa edamini.

Bagcina bekwazile ukuphunyuka babaleka, bayobika udaba emakhaya.

Abazali babafana abathintekayo bavula icala esiteshini samaphoyisa.

Okhulumela amaphoyisa KwaZulu-Natal, uLieutenant Nqobile Gwala, uqinisekisile ukuthi kunecala lokudlwengulwa kwabafana eliphenywa amaphoyisa.

“Amaphoyisa aseSikhawini aphenya icala lokuphoqa abanye ukuba bedlwengulane nelinye lokushaya ngenhloso yokulimaza. Ngokophenyo olusenziwe, abafana abathintekayo babedlala edamini khona eMkhobosa ngesikhathi behlaselwa abasolwa. Kwavulwa icala amaphoyisa ophiko lamacala ocansi eMpangeni abopha abasolwa abane, abaneminyaka ephakathi kuka-15 no-19. Abasolwa bavele okokuqala enkantolo ngoFebhuwari 5 njengoba bezobuya enkantolo maduzane,” kusho uGwala.

Isolezwe lithole ngelungu lomphakathi ukuthi isimo sishubile emphakathini njengoba kunokuhlukana kwemibono ngale ndaba.

Umthombo ongathandanga ukudalulwa, ngenxa yokusabela impilo uthe kumanje isimo zimanzonzo emphakathini.

“Selokhu kwenzeka lesi sigameko isimo asisihle. Abazali bezingane basashaqekile ngokwenzeke ezinganeni zabo. Izingane kumanje zigcinwe emakhaya, azisadedelwa noma yikanjani ukuze ziyodlala ngoba abazali abazi noma lesi sigameko sizophinda yini. Okwenza isimo sibe nzima wukuthi abasolwa bayaziwa futhi bangomakhelwane bezingane ezihlukumezekile. Abanye bathi abasolwa babedlala njengabo bonke abafana ngakho akumele baboshwe kodwa abanye bafuna bajeze kanzima. Lokhu kwenze kwaba nokuhlukana phakathi emphakathini,” kusho umthombo.

Omunye umthombo osondelene nalolu daba uthe kuvele ukuthi ngesikhathi laba basolwa bephoqa lezi zingane ukuba zidlwengulane, bona babecula.

“Asikaze siyibzwe into efana nalena. Asazi ukuthi abasolwa babengenwe yini njengoba bephoqe lezi zingane ukuba zenze lento (zidlwengulane), ekubeni bona babecula. Onqabayo ubethola induku. Asazi ukuthi yini eyenze laba basolwa benze lokhu ngoba izingane zijwayele ukudlala edamini. Abasolwa bebejwayele ukuzibhukudela nabo bagade nabafana abancane,” kusho umthombo.

Isolezwe lithole ukuthi kunabanye abasolwa okulindeleke ukuba baboshwe njengoba kusolwa ukuthi babengu-8 behlasela laba bafanyana.

Imizamo yokuthola abazali bezingane ayizange itholakale izolo, kwaze kwashaya isikhathi sokushicilela.

Kuzogqugquzelwa abantu baseNingizimu Afrika bazo zonke izinhlanga ukuba ngamunye babambe iqhaza ekulweni nokucwasa ngokobuhlanga.

KUZOGQUGQUZELWA abantu baseNingizimu Afrika bazo zonke izinhlanga ukuba ngamunye babambe iqhaza ekulweni nokucwasa ngokobuhlanga.

Izolo inkampani eshicilela amaphephandaba i-Independent Media, isolezwe elingaphansi kwayo nezinye izinhlaka, bethule umkhankaso wabo eKapa obizwa ngokuthi; “Racism Stops With Me”, okungukuthi; “Ukucwasa Ngokobuhlanga Angikwenzi mina”.

“Ukucwasa ngokobuhlanga kuyisiqalekiso eNingizimu Afrika,” kusho uDkt Iqbal Survé ongusihlalo we-Independent Media neSekunjalo Investment Holdings.

Kwethulwa umkhankaso kwabezindaba, uDkt Survé uthe kubalulekile ukuqonda ukucwasana ngokobuhlanga okuyinhloso yawo. Ngomkhankaso kuhloswe ukulalela izimvo zabo bonke abantu, ngale kokunaka iminyaka yabo, ubuhlanga, imfundo, noma izinga lempilo yabo.

Umkhankaso uzotholakala emithonjeni eyehlukene okuzokwenza ufinyelele kubo bonke abantu kuleli. Emithonjeni yayo, i-Independent Media izoshicilela ukuhlaziya kanye nemibono yongoti nabaholi bakuleli nabasemazweni angaphandle. Kwenziwe ne-website yawo umkhankaso etholakala ku: stopracism.iol.co.za, lapho abafundi bezothola izeluleko zokuthi umelana kanjani nomuntu onemibono eyehlukile kweyakho. Abasebenzisa izinkundla zokuxhumana bazokwazi ukuba yingxenye yenkulumo-ngxoxo ngokusebenzisa i-hashtag ethi #RacismStopsWithMe.

Ukubaluleka kwawo emphakathini kugcizelelwe nayinyunyana yabasebenzi bokusandwangu i-South African Clothing and Textile Workers Union (SACTWU), nayo ebambe iqhaza kuwo.

Usihlalo-jikele wale nyunyana, uMnuz Andre Kriel, uthe umkhankaso uzosiza ukubhekana nenselelo eyadalwa wububha, ukungalingani ngokwezinga nokwentuleka kwemisebenzi.

Ukwethulwa komkhankaso kuqondane nosuku lapho kugujwa iminyaka engu-50 kwasuswa ngendluzula abantu baseDistrict Six, eKapa nguhulumeni wobandlululo. Kuqondane futhi nokuphela kweminyaka engu-26 kwakhululwa owayelwa nokucwasana, owaba nguMengameli wokuqala wentando yabantu uNelson Mandela ejele iVictor Verster.

Lo mkhankaso uzokwethulwa ngokusemthethweni eCape Town namuhla. – ANA