UMnuz Zwelinzima Vavi uhlabe ikhwelo lokuba uMengameli Jacob Zuma athathe isinqumo esizwela ikusasa lezingane ezisakhula sokushenxa.

INTATHELI YESOLEZWE

OWAYENGUNOBHALA Jikelele weCosatu, uMnuz Zwelinzima Vavi uhlabe ikhwelo lokuba uMengameli Jacob Zuma athathe isinqumo esizwela ikusasa lezingane ezisakhula sokushenxa esikhundleni sokuhola iNingizimu Afrika ngoba kuningi osekonakele.

UVavi ubekhuluma nezinkumbi zabantu ebezimashela ukuba kukhishwe uZuma esikhundleni embuthanweni obuseNelson Mandela Bridge, eGoli izolo.

“Sikhathele uZuma nenkohlakalo eyenzeke embusweni wakhe, uhlulekile ukuhola izwe ngobuqotho ngakho akaphume esihlalweni ukuze agcine le lizwe liphephile ezinkingeni. Sicela asenzele umusa acabangele ikusasa lezingane zethu ezisakhulayo ngokuthi ashenxe esikhundleni. Okunye esifisa kucace ukuthi sikhethe lolu Suku lokuBuyisana ukuze sithumele umyalezo kubona bonke abantu bakuleli nasemhlabeni jikelele nakulabo abayizimpisi ezigcwele inkohlakalo ukuthi sesikhathele,” kusho uVavi.

Uthe uZuma uhluleke wancama ukubhekela abantu abampofu, abasebenzi nezakhamuzi zaseNingizimu Afrika ezihlakaniphile futhi ezikwazi ukucabanga ngokuzimela ngendlela eya phambili.

I-ANC ithe abebemasha bebephikisana nomoya wokubuyisana ezweni. Ithe yona ikholwa wukuthi iNingizimu Afrika idinga kubanjiswane kusuka kwizakhamizi nasemaqenjini aphikisayo ukuze kube nenqubekela phambili.

Abanye abaholi abebekule mashi ngowake waba nguNgqongqoshe wezeMpilo, uNkk Barbara Hogan nabanye.

Umkhulumeli we-ANC uMnuz Keith Khoza uthe inkinga ekhona wukuthi ngesikhathi kunemizamo yokubuyisana kukhona abavele badonse babhekise eceleni bangahambisani nombono wokubumbana.

Amamashi okuphoqa ukuba kuxoshwe uZuma esikhundleni abeseKapa, Port Elizabeth, ePitoli naseGoli kwasekuba nedlanzana ebeliseMgungundlovu KwaZulu-Natal.

Abahlaziyi bezepolitiki bayihlabe bayihlikiza indaba yale mashi yokuxosha uZuma bathi ifana nehlaya futhi ishiya imibuzo ukuthi kungani abebala elimhlophe bebephume kangaka ekubeni uma kunemigubho edinga zonke izinhlanga ababonwa nangokhalo.

UDkt Bheki Mngomezulu wesikhungo iMzala Nxumalo uthe bekungukuchitha isikhathi ukubakhona kwala mamashi ngoba awukho umthelela azoba nawo esinqumeni esithathwe yi-ANC sokungamxoshi uZuma.

“Kwabebemasha akukho noyedwa onamandla okususa uZuma esikhundleni ngoba abekho esigungwini esithatha izinqumo ku-ANC. UKhongolose usithathile isinqumo sokumeseka uZuma ngakho ukumashela ukuba asuswe esikhundleni bekufana nomdlalo.

“Akuqali ukuthi kube khona abalwela ukuthi uZuma axoshwe esikhundleni kodwa bonke abakaze baphumelele yingakho ngithi nale mashi ngeke ibe namthelela ku-ANC,” kusho uMngomezulu.

Umhlaziyi ozimele, uMnuz Thabani Khumalo, uthe imashi bekungeyabantu abebenezinhloso zabo ezingahlangene nokuzwelana nezwe. “Uma ubheka kahle kubonakale abamhlophe nabamnyama abangongxowa bephume ngobuningi ngoba bezovikela umnotho wabo osesezandleni zabambalwa. Okunye laba bantu ngeke ubabone uma kunemicimbi yokubuyisana ehlale yenziwa wuhulumeni kodwa sibone bephume ngobuningi kucaca ukuthi basafuna konke kume ngendlela evuna idlanzana ngakwezomnotho kuleli. Okunye amaqembu aphikisayo abesebenzisa ithuba lokuziveza kanti laba abaxabana ne-ANC bebezoveza intukuthelo yabo,” kusho uKhumalo.

Ususwe esikhundleni obengumxhumanisi weNFP nekhomishini ebhekele ukhetho i-IEC, uMnuz Bonga Nzuza.

MLUNGISI GUMEDE

USUSWE esikhundleni obengumxhumanisi weNFP nekhomishini ebhekele ukhetho i-Independent Electoral Commission (IEC), uMnuz Bonga Nzuza ngoba amalungu eqembu engasabuthembi ubuholi bakhe.

UNzuza oyilungu leNFP esiShayamthetho KwaZulu-Natal ususwe kulesi sikhundla nguMengameli weqembu uNkk Zanele Magwaza-Msibi kanti kuthiwa uhamba nohlangothi olusemkhankasweni wokuzama ukuketula uNkk Magwaza-Msibi esihlalweni sakhe njengomengameli.

Esikhundleni sikaNzuza kufakwe uMntwana uMzonjani Zulu othathwa njengesithenjwa sikaNkk Magwaza-Msibi.

Okhulumela uNkk Magwaza-Msibi, uMnuz Cannan Mdletshe ukuqinisekisile ukuthi uMengameli umsusile uNzuza esikhundleni sokuba umxhunanisi weqembu ne-IEC wafaka uZulu.

“UMengameli ubabikele abakwa-IEC ukuthi usemsusile uNzuza njengomxhumanisi weqembu wafaka uZulu,” kusho uMdletshe.

Isolezwe linayo ikhophi yencwadi kaNkk Magwaza-Msibi ayibhalele abakwa-IEC lapho ebebabikela khona ukuthi useyamsusa uNzuza.

Le ncwadi ithi: “Mina Zanele Magwaza-Msibi njengomuntu onamandla ukuletha futhi osayina imiqulu eqenjini leNFP, umuntu manje osezoletha imiqulu aphinde asayine egameni leNFP sekuzoba nguMzonjani Zulu. Ngiyamnika futhi igunya lokuthi athumele amanye amalungu eNFP uma efuna ukuletha imiqulu.”

UNkk Magwaza-Msibi uthatha lesi sinqumo nje, sokususa uNzuza esikhundleni, iqembu lakhe like langakwazi ukungenela ukhetho lokuchibiyela eMshwathi emva kokuthi inhlangano yahluleka ukukhipha isheke ukuze ibhalisele ukhetho.

UNzuza kuthiwa ususwe esikhundleni ngoba kunezikhalo ezivela kwamanye amalungu.

“UMengameli uthathe lesi sinqumo ngenxa yezikhalo ebezivela kumalungu eqembu ethi awamthembi uNzuza njengomxhumanisi weqembu, ikakhulukazi njengoba kubhekwe okhethweni lohulumeni basekhaya,” kusho uMdletshe.

UMdletshe uthe amanye amalungu asola ukuthi ngeke ibe khona intando yeningi kuhlu lwamagama azohanjiswa kwa-IEC alabo abazongenela okhetho uma kusekhona uNzuza.

Ethintwa uZulu mayelana nomsebenzi omusha asenikwe wona, uthe uzizwa ekhethekile ukuthi uMengameli amthembe ngalo msebenzi.

“Ngizimisele ngokusebenzela iqembu ngokuthembeka ukuze likhule liye phambili,” usho kanje

UZulu unxuse bonke abese beshiyile eqenjini ukuba babuye bezosebenza ngokubambisana.

UNzuza uthe ngokwesikhundla akuso akakhulumi nabezindaba.

Ithukuthele inyunyana emele amaphoyisa iPopcru, ngesinqumo sokujutshwa kwamathwasa ayo angavumelekile nokuphatha izibhamu.

ZANELE MTHETHWA

ITHUKUTHELE inyunyana emele amaphoyisa iPrisons Civil Rights Union (Popcru), ngesinqumo sokujutshwa kwamathwasa ayo angavumelekile nokuphatha izibhamu, okuthiwa azotshalwa ezinxanxatheleni zezitolo ukunciphisa ubugebengu ngamaholidi kaKhisimusi.

Esitatimendeni esikhishwe ngomlomo kaMnuz Richard Mamabolo okhulumela inyunyana, amaphoyisa asaqeqeshwa bekulindeleke ayophumula emakhaya ngamaholidi kodwa abaphathi bamaphoyisa bashaya ingwijikhwebu ngomzuzu wokugcina. UMamabolo uthi ukutshalwa kwala maphoyisa angakakulungeli ukubhekana nobugebengu emphakathini, kwenyusa amathuba okuthi abe sengcupheni njengoba kuvele kubulawa amaphoyisa.

“Amaphoyisa angabafundi abelungiselela ukubuyela emakhaya ayochitha izinsuku ezilishumi ngamaholidi. Lokhu bekuyisivumelwano esenziwe nabaphathi bamaphoyisa ukuthi abafundi abakuwo wonke amakolishi badedelwe. Kuthe sebelungise ngisho imali yokugibela batshelwa ukuthi ngeke besaya emaholidini sekumele batshalwe ezitolo ezahlukene,” kusho uMamabolo.

UMamabolo uthi ngokomthetho wamaphoyisa, amathwasa awavumelekile ukuhlanganyela emikhankasweni ethinta ubugebengu ngoba awakaqeqeshwa ngokwanele. Uthe azoqeda ngoFebhuwari ukuqeqeshwa nokuyilapho azobe esengamaphoyisa ngokugcwele.

“Sekubulawe amaphoyisa ngu-82 kuleli, abeqeqeshwe ngokwanele. Kuyethusa ke ukuthi kungatshalwa abafundi abangakatholi ngisho isitifiketi, abangeke banikwe nezibhamu kodwa bazophatha amathoshi bagqokiswe namavesti okuzivikela kuphela. Ngeke sithule amaphoyisa enikelwa ezigebengwini ngamabomu,” usho kanje.

Uveze ukuthi bazamile ukukhuluma nabaphathi bamaphoyisa ngalolu daba abangazigqizanga qakala izikhalo zabo.

UMamabolo uthe abaphathi bamaphoyisa bayazenzisa uma bethi bayazwelana nokubulawa kwawo ngoba lesi senzo sokunikela ngamathwasa ezigebengwini ngamaholidi kaKhisimusi sisho okunye. Uthe la maphoyisa awakaqeqeshelwa ngisho ukuphumela ngaphandle emphakathini njengoba esafundiswa kuphela okusezincwadini. Ngokusho kwakhe abaphathi bayazazi izinkinga ezibhekene namaphoyisa aqeqeshiwe okumele ngabe kulungiswa zona ukulwa nobugebengu kunokuthi kunikelwe ngabafundi bawo.

UKhomishana obambile kuzwelonke, uLieutenant-General Khomotso Phahlane, (osesithombeni) izolo utshele Isolezwe ukuthi bazoqhubeka nalolu hlelo phezu kwezikhalo zePopcru. Uthe kuyihaba okushiwo yile nyunyana ngoba laba bafundi sebeqeqesheke ngokwanele futhi bazothola nesipiliyoni kulolu hlelo.

“Ukutshalwa kwabo kuzobe kwenzelwa ukuthi kwandiswe ubuningi bamaphoyisa ezindaweni ezimatasa ngezikhathi zamaholidi. Indaba yokuthi ngeke baphathe izibhamu ayisho lutho ngoba okubalulekile ukuthi abonakale emaningi amaphoyisa. Laba bafundi sebeqeqeshwe izinyanga eziyisishiyagalombili, kusele izinyanga ezimbili baqede, okusho ukuthi sebenolwazi olwanele ngomsebenzi,” usho kanje ukhomishana.

Uthe abafundi bazodedelwa ngaphambi kukaKhisimusi banikwe nekhefu ngaphambi kokubuyela ezifundweni emakolishi ngoJanuwari.

Kuvele nokuthi sekuqashwe amaphoyisa angu-548 abesethathe umhlalaphansi ukulwa nobugebengu. Kuthiwa zingu-1 105 izikhala okusamele zigcwaliswe kanti sekunezicelo ezingu-3 152.

Bagcine bekwazile ukugoba uphondo lwabaqashi abasebenzi bakwa-Just Flour abathe ngeke babuyele emsebenzini bengakamzileli uzakwabo.

S’MANGELE ZUMA

BAGCINE bekwazile ukugoba uphondo lwabaqashi abasebenzi bakwa-Just Flour, ePhoenix, abathe ngeke babuyele emsebenzini izolo bengakamzileli uzakwabo uMnuz Zamokuhle Masilela (32) ogaywe umshini ngoLwesibili ekuseni.

Bafike emsebenzini ngobuningi babo kodwa banqaba ukusebenza, bathi ngeke baqhubeke nomsebenzi engathi akwenzekanga lutho.

Bathi abaphathi bagcine ngovumelana nabo, bathi abagoduke baze babuye ngoMsombuluko.

Omunye wabasebenzi, ojabule ngesinqumo sabaphathi, uthe yize bebezimisele ngokubuyela emsebenzini eselandiwe ngehlahla uMasilela, basamukelile isinqumo sabaphathi.

“Lezi zinsuku ezincane abasinike zona zizowenza umehluko. Besingeke sibuyele emsebenzini ngokushesha kangaka engathi kwenzeke into encane. Okokuqala sisathukile ngalokhu okwenzekile. Umuntu ebesisebenza naye simbona nsuku zonke ufe ngesihluku. Siphatheke kabi ngoba namanje sisazibuza ukuthi kungani abaqashi bamthuma ukuthi ahlanze lomshini oyingozi kodwa bengaqikelelanga ukuthi uphephile,” kusho lomsebenzi.

Umfowabo kamufi uMfaniseni Masilela (29), naye obesebenza kulenkampani, uthe kuzoba nzima ukubuyela emsebenzini ngemuva kwalesi sehlakalo.

“UZamokuhle besisebenza ndawonye sibonana njalo ekuseni, uma sifika siqale ngokuxoxa njengoba besihlala ngokuhlukana.

Ngosuku afe ngalo sabonana wangitshela ukuthi akanayo imali yokudla, ngathembisa ukumphathela mengibuya ukuyodiliva. Kepha akuzange kusenzeka njengoba ngajikiswa endleleni sengibikelwa ngokulimala kwakhe. Angazi ngizosebenza kanjani futhi kuleya ndawo ngoba uma ngingena sizobuya isithombe sokufa kwakhe,” kusho uMfaniseni.

Uthe yize besalindele izimpendulo kubaphathi babo ngokufa komfowabo okwamanje basabheke ukulungiselela umngcwabo.

Unina kamufi, uNks Singaphi Zulu (56), uthe ulimele kakhulu ngokufa kwendodana yakhe ebimthembise ukuthi izomakhela umuzi. “Ukube bebengasamdingi emsebenzini bekumele bamxoshe, hhayi ukuthi bambulale ngalolu hlobo. Lezi zingane zami ngizikhulise kanzima ngivuka ekuseni ngovivi ukuyosebenza eplazini lomoba ngizizamela impilo engcono. Bengisalindele lukhulu kuyena, angazi ngisho abaphathi bakhe ngiyobabhekelwa ngubani,” kusho uNksz Zulu.

Okhulumela inkampani iJust Flour, Mills uNksz Dominique Deana, uthe abaphathi benkampani babe nomhlangano nabasebenzi nenyunyana yabo lapho bevumelane ngokuthi badinga isikhathi esanele ukubuyela emsebenzini.

“Banikezwe ithuba lokuthi babuyele ngoMsombuluko, Disemba 21. Umngcwabo kaZamokuhle “Shorty” Masilela uzoba kwaNongoma ngoDisemba 27, inkampani iyona ezokhokha izindleko zomngcwabo iphinde ithuthe abasebenzi abafisa ukuya emngcwabeni. Sisahlela inkonzo yesikhumbuzo kaShorty ezoba khona maduze. Akulona iqiniso ukuthi umndeni usola abaphathi ngobudedengu ngoba ubudlelwano phakathi kwabaqashi nabo buhle kakhulu. Kungamanga futhi ukuthi umshini ubukhanyiswa lapho ekuhlala khona abaphathi,” kusho uNksz Deana.

IKwaZulu-Natal, iSadtu eshaya amaphiko kuyo, ngesinye sezifundazwe okuvele ukuthi udla lubi umkhonyovu wokudayiswa kwezikhundla zothishanhloko nezothisha okwenziwa yiyo.

MHLENGI SHANGASE

IKWAZULU-Natal, iSadtu eshaya amaphiko kuyo, ngesinye sezifundazwe okuvele ukuthi udla lubi umkhonyovu wokudayiswa kwezikhundla zothishanhloko nezothisha okwenziwa yiyo.

Lokhu kuvezwe ngumbiko wethimba eliholwa nguSolwazi John Volmink odalule nokuthi abanye othishanhloko basaba ngisho ukubamba izikhala zabasuke behambile ngoba besaba ukubulawa.

Umbiko kaVolmink uveze ukuthi izikhala bezidayiswa kusuka ku-R1 000 kuya ku-R50 000.

Esithangamini sabezindaba ePitoli izolo, uNgqongqoshe weMfundo eyisiSekelo, uNkk Angie Motshekga, uveze ukuthi akuyona iKZN kuphela ehamba phambili ngenkohlakalo ethinta ukudayiswa kwezikhala kodwa ne-Eastern Cape, North West naseLimpopo. Ingconywana inkohlakalo kwezinye izifundazwe.

“IKwaZulu-Natal ngesinye sezifundazwe esihamba phambili ngenkohlakalo. Abanye othishanhloko basaba ngisho ukubamba izikhundla ngoba besaba ukubulawa. Abantu eKZN bayesaba nje ukubamba ngoba bengafuni ukubandakanyeka ezintweni ezingalungile ezithinta iSadtu,” kusho uNkk Motshekga.

Ngesikhathi zivela okokuqala izinsolo zomkhonyovu iKZN neNorth West zazazihamba phambili kulokhu.

Inhloko yomnyango wezemfundo eKZN, uDkt Nkosinathi Sishi, yanquma nokumisa ukuqasha ezikhaleni zothishanhloko noma ezothisha uma kuke kwaba nezinsolo zokusabisa.

USishi wathatha isinqumo emuva kokubulawa kothishanhloko namaphini abo abevile kwabahlanu selokhu kuqale unyaka.

Omunye wabo nguthishanhloko waseVilla Maria, eMgungundlovu, owabulawa ngemuva kokusatshiswa ngokubulawa uma engafuni ukuphuma esikhundleni.

EKZN bekunomkhankaso obushaywa udede owaziwa nge- “phuma ngena” lapho kuthiwa isikhala uma sesidayisiwe ubesatshiswa loyo osiphethe ukuze asheshe azishiyele.

UNkk Motshekga uthe abanye abasebenzi bomnyango bazibona bephoqiwe ukwenza izimfuno zezinyunyana ngoba bethole umsebenzi ngazo. “Labo abathola umsebenzi ngezinyunyana bazibona bephoqelekile ukufeza umsebenzi wenyunyana ngokulalela yona. Ezinye izikhulu zezinyunyana zinezikhundla emnyangweni okuyinto ephambene nomthetho,” kusho uNkk Motshekga.

Umbiko wesikhashana wophenyo ngokudayiswa kwezikhala zothisha nothishanhloko ezikoleni zakuleli ukhomba amalungu enyunyana yothisha iSadtu njengehamba phambili ekwenzeni lo mkhonyovu.

MHLENGI SHANGASE

UMBIKO wesikhashana wophenyo ngokudayiswa kwezikhala zothisha nothishanhloko ezikoleni zakuleli ukhomba amalungu enyunyana yothisha iSadtu njengehamba phambili ekwenzeni lo mkhonyovu.

UNgqongqoshe weMfundo eyisiSekelo, uNkk Angie Motshekga, uthe iminwe eminingi ikhomba iSadtu ekudayisweni kwezikhala zothisha nothishanhloko.

Uthe ezinye izinyunyana nazo ziyathinteka kodwa iSadtu iyona ehamba phambili.

“Mhlawumbe yingoba beyinyunyana enkulu yingakho nje iminwe ikhomba bona. Umbiko uveza ukuthi akuyona kuphela (iSadtu) nezinye izinyunyana ziyathinteka kulokhu. Le nyunyana ibisebenzisana nethimba eliqokiwe ebeliholwa nguSolwazi Volmink (John),” kusho uNkk Motshekga.

Uthe iNatu yakubeka kwacaca ukuthi ngeke ibe yingxenye yalolu phenyo.

Ukhale nangokuthi iSadtu ibambe umnyango ngobhongwane njengoba kuyiyo eshaya amaphiko emnyangweni.

“Lokhu kubukela phansi imizamo kahulumeni yokuhlinzeka imfundo ngokuvumela inyunyana ukuthi ibambe uhulumeni ngobhongwane. Umbiko uveze ukuthi iyona eshaya amaphiko emnyangweni idonsa uhulumeni ngekhala okungahlomulisi abafundi. Lokhu akumele sikuyeke kuqhubeke,” usho kanje.

Okhulumela iSadtu, uNksz Nomusa Cembi, uthe bona abakaze bathume muntu ukuthi akadayise izikhala zemisebenzi esebenzisa inyunyana.

Uthe bayaziqhelelanisa nabantu abenza lokhu wathi bebehlale beshumayela ivangeli lokuthi labo abathintekayo ababanjwe, baboshwe.

“Sizobathathela izinyathelo zangaphakathi labo abathintekayo kulokhu ngoba asikaze sithume muntu. Siyakugxeka okushiwo ngumnyango ukuthi thina siwubambe ngobhongwane ngoba lokhu kuveza iSadtu njengabantu abahlukumeza abanye,” usho kanje.

UNksz Cembi, uthe ziningi izinkundla abahlangana kuzo nomnyango babhunge ngezinto eziningi ngakho akazi kungani uveza abaholi beSadtu njengabantu abayizindlavini.

Umengameli weNatu, uMnuz Siphosethu Ngcobo, ubuze ukuthi kungani zingadalulwanga lezi ezinye izinyunyana okuthiwa ziyingxenye yalokhu kudayiswa kwezikhala.

UNgcobo uhlabe isenzo sikaNkk Motshekga ngokudalula okutholwe yithimba ebeliphenya kwabezindaba engakaxhumani nezinyunyana zothisha.

“Ngesikhathi kuqala uphenyo saya kuleli thimba salibuza ukuthi lizophenya kanjani lingabazisanga othisha abathintekayo. Sasifuna ukwazi ukuthi labo abazofakaza bazovikelwa kanjani ngoba kwakumele kukhishwe isekhula okuyindlela umnyango oxhumana ngayo nothisha. Lo mbiko nje imfeketho yomdlalo ezophelela ezeni njengoba sekukhishwe umbiko wesikhashana akekho ozolandelela umbiko wokugcina ngoba kuzobe kuthiwa waphuma owokuqala,” kusho uNgcobo.

UNkk Motshekga uthe kumele kushintshwe indlela okuqashwa ngayo othishanhloko ngoba lo mkhonyovu uthinta nezikhulu zomnyango nezigungu ezilawula izikole.

“Kumele kuvikelwe abafakazile nokuthi kudingeka siqinise izinhlelo zokuqoka othishanhloko. Sizokumisa ukuqasha okwesikhashana ezikhaleni ezikhona. Kanti ngizohlangana noNgqongqoshe bezemfundo ngoJanuwari ukuxoxa nabo ngalokhu ngoba mina angiqashi kodwa lowo msebenzi wenziwa yiminyango yezifundazwe. Ezinye izifundazwe kuzomele zingichazele ukuthi kungani kungamele ngimise uhlelo lokuqasha ngoba inkohlakalo idla lubi,” kusho uNkk Motshekga.

UMengameli Jacob Zuma uthathe isinqumo sokuba ahloniphe insika ye-IFP engasekho, uDkt Lionel Mtshali ngomngcwabo okhethekile kahulumeni.

CELANI SIKHAKHANE

UMENGAMELI Jacob Zuma uthathe isinqumo sokuba ahloniphe insika ye-IFP engasekho, uDkt Lionel Mtshali ngomngcwabo okhethekile kahulumeni ozoba se-Nyuvesi yaKwazulu-Natal e-Edgewood Campus, kusasa, ngemuva kwemisebenzi yakhe ebatshazwa nxa zonke ayenze esahola isifundazwe.

Umholi we-IFP uDkt Mangosuthu Buthelezi wenze lesi simemezelo izolo enkonzweni yokukhumbula uMtshali, ebisePinetown Civic Centre.

UMtshali washona ngeSonto esibhedlela saseWestville.

“Ngithi angisho ukuthi uMengameli wezwe, umhlonishwa uJacob Zuma usekhiphe umyalelo wokuba uMantshinga ahlonishwe ngomngcwabo kahulumeni,” kusho uButhelezi.

Lolu hlobo lomngcwabo seluke lwasusa umsindo kumalungu e-ANC ekhala ngokuthi kukhethwa iphela emasini ngawo ngoba kunabaholi abafana noMnuz Mtholephi Mthimkhulu abangazange bahlonishwe ngawo.

UButhelezi ubuye wavezela izihambeli ukuthi ngaphambi kokuba uMtshali abe ku-IFP , wayeyilungu lokuqina le-ANCYL esafunda eFort Hare University.

Ubuye wababaza ukuthembeka kukaMtshali, wathi indlela abeqotho ngayo eqenjini ubengafani nalabo abasho izinto bese bebuye bajike. “Ubethembekile uMantshinga ku-IFP nakimi engafani nalabo ababethi bayomfela uZuma kodwa namhlanje sebeyamthuka. UMantshinga ubezinikele emsebenzini wakhe kangangokuthi wanqaba ngisho ukuthatha umhlalaphansi encengwa wumndeni wakhe ngoba ubona isimo sempilo. Ubevele avuthe ngolaka uma ukhuluma indaba yokuthi kumele athathe umhlalaphansi,” kusho uButhelezi. Uveze nokuthi uMtshali wakwazi ukufaka ngempumelelo enkantolo yoMthethosisekelo uhulumeni kaMnuz Thabo Mbeki ukuze awuphoqe ukuba usabalalise imishanguzo yokuvikela omama abazithwele ekutheni bathelele izingane zabo ngegciwane.

Uthe ngendlela uMbeki ayengakholelwa ngayo ukuthi igciwane lengculazi liyinkinga kanjani, kwala noma esemchazela ukuthi eMahlabathini kungcwatshwa imihla namalanga ngenxa yalesi sifo.

Uthi kunalokho uMbeki wambuza ukuthi unabo yini ubufakazi bokuthi labo bantu basuke bebulawa yigciwane lengculazi.

Kule nkonzo kuhlale obala ukungezwani kwabaholi beDA okunguMnuz Zwakele Mncwango noSizwe Mchunu abafike ngokuhlukana, kwathi noma sebexhawulana uMchunu wabonakala echiza ebheka eceleni. Ngisho sekumele kubizwe ozokhulumela leli qembu kube nesidididi kwangacaca noma kuzoba uMncwango noma uMchunu kodwa kugcine sekubizwa uMncwango. Uthe uMtshali ube yisifundo ngokuthi abe nguNdunankulu ongakaze alandelwe ngoKlebe ngenxa yenkohlakalo futhi ukhombisile ukuthi ungaba usopolitiki kodwa ungayenzi inkohlakalo. UMnuz Ericson Zungu weNFP uthe uMtshali bekungeyena umuntu obungavele ukhulume naye ungazi ukuthi uzothini ngoba ubengumuntu omayo entweni. UNkk Nomusa Dube Ncube we-ANC uthe balahlekelwe ngumholi obeyinsika yezombusazwe futhi ekhuthele nasemihlanganweni yasesiShayamthetho engaphuthi.

ULieutenant-General Mmamonnye Ngobeni uthi banelisekile ngokungenela kwamaphoyisa odabeni lokubulawa kwabantu eGlebelands.

ZANELE MTHETHWA noLUNGI LANGA

UKHOMISHANA wamaPhoyisa KwaZulu-Natal uLieutenant-General Mmamonnye Ngobeni uthi banelisekile ngokungenela kwamaphoyisa odabeni lokubulawa kwabantu ehostela eGlebelands, eMlazi.

Phezu kokuba isibalo sababulewe sesifinyelele ku-56, uKhomishana uthi amaphoyisa alusingethe kahle lolu daba njengoba esebenza nabezobunhloli.

Ubecacisa ngalolu daba osekufake itwetwe kubahlali basehostela, esithangamini nabezindaba ngoLwesibili eThekwini.

Uveze ukuthi usehlala ewulindele umbuzo othinta leli hostela uma kunesithangami nabezindaba futhi uyaqonda ukuthi luthinta umphakathi.

“Akumele udaba lokubulawa kwabantu eGlebe silubheke lodwa eceleni ngoba ngisho kungashona abantu abangaki, ubugebengu buyefana. Nalo olwaseGlebe luyefana nobugebengu obusixakile ezweni, noma ngabe kushona oyedwa noma ababili,” usho kanje.

UNgobeni obehambisana nezinye izikhulu zamaphoyisa neNhloko yoKlebe uMajor-General Mthandazo Ntlemeza, uthe udaba lwasehostela akuselona olwamaphoyisa kuphela kodwa olukahulumeni nomphakathi.

Uthe wanelisekile nangokungenelela kukaNgqongqoshe woMnyango wezokuThutha nokuPhepha koMphakathi esifundazweni uMnuz Willies Mchunu athe unezinhlelo zokulungisa lesi simo.

Uthe ihhovisi likaMchunu liphezu kwalo udaba lwasehostela njengoba livukuza nomphakathi ukuthi ulekelele.

“Uma indaba yaseGlebe sisayibheka ngokuthi ngeyamaphoyisa kuphela kuzoba yinkinga. Emahostela kunezimenenja ezazi konke okwenzekayo okumele zilekelele amaphoyisa. Ngisho abahlali basehostela bayabazi ababulali kodwa akekho ofuna ukuphumela obala atshele amaphoyisa,” kusho yena.

Ebuzwa ukuthi akumele yini ngabe sekufakwa amasosha ehostela ukuqinisa ezokuphepha, uthe leso sinqumo ngeke sithathwe noma yikanjani.

Uthe kulandelwa imigomo ethize futhi kube ngamaphoyisa abona sekunesidingo sokulekelelwa kwamasosha, okuyinto engakabi khona ezinhlelweni.

Izolo uKhomishana oBambile wamaPhoyisa kuzwelonke uLieutenant-General Khomotso Phahlane uhambe emazwini kaNgobeni ethi udaba lwasehostela luseqhulwini.

Uthe yize engayanga emahostela akhungethwe yizinkinga kodwa uyamethemba uNgobeni okunguye osebenza lolu daba esifundazweni. Ukhuluma kanjena nje uKhomishana, abahlali basehostela sebelala obenyoni ngoba ukuthula akusekho.

Kwavela ukuthi ababulawayo abanye basuke sebazi njengoba kusuke kuhleliwe ukubulawa kwabo.

Abanye sebebulawa ngisho ngaphandle kwehostela, belandelwa nasemgwaqweni ngenxa yokushuba kwesimo.

Abahlali bakhala nangokuthi amaphoyisa ahudula izinyawo.

UKhomishana uthe bathathe isinqumo sokuthi basebenze nezinhlangano ezizimele nezishoshovu ezilwela amalungelo abantu ukuze kuxazululwe udaba lwasehostela.

Ngo-Agasti nonyaka kwavela ukuthi esinye sezishoshovu esilwa nokubulawa kwabantu eGlebelands, uNkk Vanessa Burger useyasatshiswa.

Kuthiwa wathola umyalezo kaWhatsApp ocingweni lwakhe umxwayisa ukuthi akavale umlomo uma engafuni ukufa.

UNkk Burger owayalelwa ukuthi avule icala, waveza ukuthi akasawethembi amaphoyisa.

Amalungu emindeni yabantu ababulewe ehostela azwakalise ukungakwenameli okukhulunywa nguNgobeni. Esinye sezihlobo esicele ukuthi igama laso ligodlwe, sithe akukwazi ukuthi udaba lwaseGlebelands lungathathwa njengobugengu kuphela njengoba sekufe inqwaba yabantu.

“Udaba lwaseGlebelands ludinga ukuthi lubhekwe lodwa ngoba aluthinti ubugebengu nje. Udaba lwalapha luthinta ipolitiki. Akulindelekile ukuthi umuntu ofana naye angakhuluma kanje,” kusho lesi sihlobo. Esinye isihlobo sithe izinkulumo zikaNgobeni zibenza babone ukuthi uhulumeni namaphoyisa abazimisele ukusilungisa isimo sakuleliya hostela. Siveze nokuthi akulula abantu beze nolwazi abanalo ngokubulawa kwabantu ngoba basabela impilo yabo futhi abaziboni ukuthi bangaphepha kanjani ngoba amaphoyisa nawo asolwa ngokuvikela abenzi bobubi.

Uzowudlela ehlane uKhisimusi umndeni wakwaKhumalo, eNtuzuma.

BONISWA MOHALE

UZOWUDLELA ehlane uKhisimusi umndeni wakwaKhumalo, eNtuzuma njengoba umuzi wakhona owashayiswa yibhasi kaMasipala weTheku ungakalungiswa.

Isolezwe labika ngodaba lakwaKhumalo ngoDisemba 2 lathola ukuthi ibhasi lingene ekamelweni obekulele kulo umama wekhaya nezingane.

Ibhasi yayisuka edepho eNtuzuma ngo-4 ekuseni isayolayisha. Umshayeli wehluleka wukuyilawula ngesikhathi ejika ikhona, yaphaphalaza yayongena emzini wakwaKhumalo.

NgoMgqibelo Isolezwe lifice abakwaKhumalo bezohlola ukuthi kwenzekani emzini wabo njengoba abenkampani ephethe amabhasi kaMasipala iTansnat Africa ijube unogada oqaphe isimo.

Ngokusho kukaNkk Thoko Khumalo (58) ongumnikazi womuzi, abakwaTansnat bamtshele ukuthi udaba lokulungiswa kwendlu yakhe seluphethwe ngumshwalense wabo.

“Besihlele umcimbi njengoba kungamaholidi kodwa ngeke sikwazi ukuwenza njengoba umuzi ungakalungiswa. Bathumele unogada oqaphe izimpahla kodwa kunzima ngoba sihleli emzini womuntu njengoba kungakalungiswa lapha ekhaya. UKhisimusi uzoba muncu asazi sizowudlela kuphi sesithemba bona abasicuphisile. Izimpahla zami zimoshekile ngoba yize kukhona unogada kodwa akuvalwe ngalutho la kubhodloke khona,” kusho uNkk Khumalo.

UNkk Khumalo utshele Isolezwe ukuthi emuva kokulimala waphuthunyiswa emtholampilo kahulumeni kodwa akalutholanga usizo aludingayo waze washintshelwa esibhedlela esizimele lapho ekhokhelwe ngudadewabo khona.

“Impilo iyangihlupha, kube kubi kakhulu sengicindezelwe yizitini ngaze ngayiswa esibhedlela esizimele. Angazi noma bazozikhokha yini izindleko zami ngoba abafuni ukungibhalela phansi okuzokwenzeka. Bengifisa ukuwudlela emzini wami uKhisimusi kodwa ngoba ngathi akwenzeki bengingathanda ukuba kwami ngonyaka ozayo,” kusho uNkk Khumalo.

Imizamo yokuthola uMnuz Vuyo Mkhize okhulumela abakwaTansnat Africa ayiphumelelanga njengoba engayiphendulanga imibuzo athunyelelwe yona.

Bahlukene phakathi abesifazane beNFP ngezinsolo ezisanda kubikwa zokungaphathwa kahle kwabo eqenjini.

CELANI SIKHAKHANE

BAHLUKENE phakathi abesifazane beNFP ngezinsolo ezisanda kubikwa zokungaphathwa kahle kwabo eqenjini osekudale ukuthi kube nokujikijelana ngamazwi phakathi kukaMengameli walolu phiko nephini likaNobhala ngoba bengaboni ngasolinye ngalokhu.

Lokhu kulandela ukuthi uMengameli weNFP Women’s Movement (NFPWM) uNkk Sindi Mashinini, edalule ukuthi sebehlukumezeke kwanele kuleli qembu ngenxa yabaholi besilisa abazibeke bona phambili.

Wayekhala nangokuthi ePhalamende kugcwele isiqhoqho samadoda amele iNFP kanti uyedwa owesifazane kanjalo nasesiShayamthetho saKwaZulu-Natal kunesimo esifanayo.

Wathi abanye besifazane abahlukumezekile sebeze baba nezifo ezidalwa yingcindezi.

UNkk Benarie Ngema, oyiphini likaNobhala weNFPWM, uthe kungamampunge lokhu okushiwo nguNkk Mashinini ngoba bona abakaze bakubone lokhu kuhlukunyezwa akhuluma ngakho.

“Isigungu seNFPWM siyazihlangula kokushiwo nguMengamli wabesifazane umama uSindi Mashinini. Isigungu sabesifazane beNFP sifisa ukucacisa ukuthi abekho abesimame abagulayo ngenxa yokuhlukumezeka. UMengameli wabesifazane ubengakasibikeli ngalezi zinkinga asekhuluma ngazo. Kwayena ukuthi uyahlukumezeka siyakweshwama ngoba ubengakaze asibikele njengekomiti lakhe,” kusho uNkk Ngema.

Uthe ngisho indaba kaNkk Zanele Magwaza Msibi yokuthi ubehlukumezeka eqenjini iyabaxaka ngoba njengabantu besifazane abahlalayo esigungwini esithatha izinqumo seqembu, bekumele bamvikele.

UNkk Ngema uqhube wathi bamangazwa ngisho yindaba yokuthi kunabesifazane abaxoshwayo kuNFP okuyinto abangayazi.

Ubuye wathi ukumeleleka kwabesifazane beqembu ezikhundleni kuseyinselelo okumele bayisukumele kodwa abantu kumele baqonde ukuthi iNFP ayilona ikhishi kodwa yiqembu lezepolitiki.

UNkk Mashinini eziphendulela uthe uyamangala ukuthi uNkk Ngema uvukaphi ngoba selokhu agcina ukubonakala emihlanganweni yalolu phiko ngo-2013.

“Ngiyashaqeka ukuthi usevukaphi kwabafileyo uNkk Ngema ngoba ngizame kaningi ukumbizela emihlanganweni ukuze silungise isimo esibhekene nabesifazane kuNFP kodwa akezi. Kuze kwala ngisho sesinomcimbi kazwelonke wabesifazane KwaNongoma kodwa akazange eze. Kunalokho wavele wenza owakhe oPhongolo. Uyangixaka uma ephika ukuhlushwa kwabesifazane eqenjini nokuxoshwa kwabo ngoba kumanje uSomlomo waseMthonjaneni, uNkk Ntombi Jiyane obuye abe nguNobhala wethu, waxoshwa yiqembu kumasipala lamhlukumeza. ENtambanana nakhona kunesifanayo, kuhlukunyezwa umholi wesifazane omele iNFP okuyizinto engilwa nazo. Nokho ngiyaqonda ukuthi udadewethu ukhuluma kanje ngoba ethunywe yiwo lawa madoda aseqenjini ahlukumeza abesifazane,” kusho uNkk Mashinini.

Uthe useyafisa ukuthi kubuye uNkk Magwaza Msibi ukuze kulunge izinto eqenjini ngoba isimo asisihle kuze kube manje.

Bekukuhle kudelile ngesikhathi umfundi weSolezwe ophume phambili emncintiswaneni wokuwina inkomo eshadelwa ngokwesintu

S’MANGELE ZUMA

BEKUKUHLE kudelile ngesikhathi umfundi weSolezwe ophume phambili emncintiswaneni wokuwina inkomo, uMnuz Jabulani Mthethwa (45) waseMahlabathini, eBhamshela eshadelwa ngokwesintu ngoLwesihlanu.

Injabulo ibibhalwe ebusweni kuMthethwa othe Isolezwe uyolikhohlwa efile ngokumlekelela afeze izifiso zikayise owashona ngo-2005 emyalezile ukuthi ingapheli iminyaka emihlanu engashadelwanga.

Ungomunye wabafundi ababili ababe nenhlanhla yokuwina inkomo, imbuzi negilosa ka-R5000 ngamunye emncintiswaneni weSolezwe obusudonse amasonto ayisithupha.

Ubethi uma ebuka ‘isidudula’ sakhe uNkk Ncamisile MaSibiya Mthethwa (36) waseNewlands West, eThekwini amoyizele kubonakale ukuthi lolu suku kade alulangazelela.

Uthe uMaSibiya, ongunina wezingane zakhe ezimbili, umqambe igama elithi “Umbala wethemba” ngoba uma ebona yena inhliziyo yakhe ivele ithi cosololo akhohlwe yizona zonke izinsizi ake wabhekana nazo.

“UMaSibiya ngaqala ukuthandana naye ngo-2001 ngemuva kokuthi sibonane esontweni iHoly Voice of God. Ngokuhamba kwesikhathi saba nezinkinga othandweni lwethu, nami ngaqala ngathatheka ezinye izintokazi ezazivele zimbangisa. Ngo-2010 kukhona engamlobola sengizimisele ukuthi ngizomshada kanti ngizothola imbibizane. Wangigila lowo muntu wesifazane, wangula zonke izinto zami wabaleka nelinye isoka. Ngabona ukuthi kungcono ngibuyele emuva kuMaSibiya wami ngoba naye wayenezinkomba zokuthi usangithanda,” kusho uMthethwa.

Uthe uyethemba ukuthi noyise lapho elele khona ujabule kakhulu ebona umakoti enyathela emagcekeni akwakhe.

“Ngaphatheka kabuhlungu ngo-2010 kubhuntsha umshado wami ngemuva kokuthi ingoduso yami ingibalekele yayogana kwenye indawo. Yilowo nyaka ubaba ayengibekele wona ukuthi ungadluli ngingakashadelwa. Ngithe ngibona lo mncintiswano kwiSolezwe ngabona ukuthi yiwona ongangisiza ukuthi ngifeze iphupho lami. Ngiwungenele kaningi ngithi uma ngifaka ifomu ebhokisini lakhona ngiqale ngibize ubaba ongizalayo ngicele inhlanhla. Ngifisa le nhlanhla engehlele yehlele nabanye abaswele njengami,” kuqhuba uMthethwa.

UMaSibiya uthe uswele amazwi okubonga njengoba isifiso sabo sokuba nendumezulu yomshado sigcine sifezekile.

“NgoLwesine siqale saba nomshado omhlophe oThongathi. Ngonyaka odlule sahamba sayobhala Kwandabazabantu sisaqongelela imali yomshado omkhulu. Ngesikhathi engitshela ukuthi uzongenela umncintiswano wenkomo ngabona sengathi udlala ngesikhathi, angikholwanga engishayela ucingo esethi uwinile. Kwaqondana kahle abeSolezwe bamthinta sesicacamezela ngemadlana encane ebesinayo sithi siyobheka inkomo yomshado. Bavele basethula umthwalo, siyabonga kakhulu,” kusho uMaSibiya.

Uthe kuyacaca ukuthi babedalelwene noMthethwa njengoba babuyelana ngemuva kweminyaka behlukana.

“Uthando lwethu luqale phansi, luvutha amalangabi. Kulesi sigaba esesingena kuso sithandazela ukuthi uNkulunkulu abe nathi sihlukaniswe wukufa,” kusho uMaSibiya.

Izihlobo nabangani bebengawuvali umlomo ngobukhulu benkomo yeSolezwe bengananazi bethi bayilindele ngabomvu inyama yayo.

Babanjwe eNquthu abesilisa abane abadune iVW GTi ebihamba izithandani ezisencane eVosloorus, eGoli.

S’MANGELE ZUMA

BABANJWE eNquthu abesilisa abane abadune iVW GTi ebihamba izithandani ezisencane eVosloorus, eGoli, badubula umnikazi wemoto (26), bamlaxaza phansi ngaphambi kokushaya bachithe nentombi yakhe abayidlwengule beshintshana ngayo, ngoMgqibelo.

Kuthiwa babanjwe sebegibelise abangani babo abathathu behamba ngemoto ebingakakhishwa nezinombolo zayo.

Iphoyisa elingagunyaziwe ukuphawula kwabezindaba lithe owesifazane (20) ofunda enyuvesi yaseTshwane uthe ubebuka ngesikhathi abasolwa bekhumula isoka lakhe laba nqunu ngaphambi kokulidubula, balilaxaze eceleni komgwaqo eBalfour, khona eGoli.

“Lo sisi uthe bebezihambela nesoka lakhe ngesikhathi bevinjwa ngabalisa abane erobhothini eVosloorus babaphuca imoto. Uthe babe sebebafaka ngemuva emotweni bebakhombe ngesibhamu. Kuthe uma bebona imoto yamaphoyisa ebidlula bathuka badubulana namaphoyisa, kwadubuleka elilodwa. Uthe babe sebedubula isoka lakhe kabili esifubeni ngaphambi kokulilaxaza eceleni komgwaqo. Bakhombe intombazane ngesibhamu bayiphoqa ukuthi ikhiphe imali kwi-ATM,” kulandisa lo mthombo.

Kuthiwa bamise imoto esikhotheni bashintshana bedlwengula intombazane bahamba nayo baya eNquthu.

“Kuthe sebefika nayo eNquthu bayiyisa ematekisini aya eGoli bayinikeza u-R210 kule mali ebibanikeze yona bathi ayigibele ibuyele kubo. Bame eduze kwetekisi balilinda laze lahamba bayitshela ukuthi ingatsheli muntu ngoba bazoyifuna baze bayithole ukuze baqede ngayo. Etekisini lo sisi ucele iselula kowesilisa obehleli eceleni kwakhe wathumela umyalezo emndenini wakhe. Umndeni ube usuthinta amaphoyisa aseNquthu itekisi lavinjwa eBlood River lapho kuthathwe khona intombazane ukuthi ikhombe ukuthi bebehamba ngakuphi ngemoto,” kusho lo mthombo.

Uthe ngenhlanhla usisi ukhumbulile ukuthi kukhona umuzi abame kuwona oyedwa wabasolwa wangena wabingelela okuyilapho abathole khona umkhondo wabo.

“Amaphoyisa abathole bengazelele begibelise nabanye abangani babo ubona ukuthi kumnandi. Bebezitshela ukuthi babaleke baqedile kanti abazi ukuthi ingalo yomthetho yinde,” kusho umthombo.

Laba balisa kulindeleke ukuthi bavele namhlanje eNkantolo yeMantshi eNquthu.

Okhulumela amaphoyisa KwaZulu-Natal uMajor Thulani Zwane ukuqinisekisile ukuthi amaphoyisa aseNquthu abophe abalisa abayisikhombisa abatholwe nemoto ebidunwe eGoli nesibhamu esingekho emthethweni.

“Kulindeleke ukuthi bavele enkantolo yaseNquthu kusasa (namuhla) bebhekene necala lokutholakala nempahla entshontshiwe, nelokutholakala nesibhamu esingekho emthethweni. Enkantolo bazophinde babhekane nalamacala amanye abawenze eGoli ngemuva kokuduna imoto,” kusho uZwane.

Usazibuza namanje umndeni wakwaShusha, kwa-G, eMlazi ukuthi usinde kanjani ngesikhathi amatshe avikela ukududuleka kwesihlabathi kwamakhelwane wabo edilikele phezu kwabo ezintathakusa.

S’MANGELE ZUMA

USAZIBUZA namanje umndeni wakwaShusha, kwa-G, eMlazi ukuthi usinde kanjani ngesikhathi amatshe avikela ukududuleka kwesihlabathi kwamakhelwane wabo edilikele phezu kwabo ezintathakusa zangoLwesihlanu.

Lokhu kubashiye bethukile ngoba bebengalindele ukuthi lolu donga elinonyaka lakhiwe lungadilika ngemuva kwemvulana ebe khona ngesonto eledlule.

Umama wekhaya uNkk Margaret Shusha (53), uthe benomyeni wakhe bebelele nomzukulu oneminyaka emibili ekamelweni labo ngesikhathi bedilikelwa yindlu.

“Sizwe nje ngomsindo omkhulu sathi siyaphaphama sazithola sesicindezelwe wuphahla lwendlu nezintini zodonga lakwamakhelwane. Ngenhlanhla asilimalanga kakhulu ngoba yimina ngedwa onikezwe izinduku zokuhamba esibhedlela. Umzukulu washayeka kancane ekhanda kepha esibhedlela bathi akanalutho, kangangoba usekhohliwe okwenzeka, kuyimanje uyagijima la egcekeni. Akulula nokuthi sisole umakhelwane ngokwenzekile ngoba la matshe ayefakwa ngabantu abakha imixhaso,” kusho uNkk Shusha.

Uthe kuyimanje baphoqeleke ukuthi babuyele endlini yomxhaso esegcekeni abebesaba ukuyisebenzisa njengoba kukhona isikhulu esabatshela ukuthi umuzi wabo ufeyilisiwe awukho esimeni esifanele ukuhlala abantu.

“Angazi ukube lo muzi womxhaso awukho ngabe senzenjani. Besilindele nekhansela lethu (uMnuz Sithenjwa Nyawose) ukuthi lizofika ukuzobona umonakalo.

“Ikhansela alikaze lifike kepha kukhona usisi ofikile wathi uthunyelwe yilona. Engikuzwile wukuthi ikhansela lithe kuzomele siwudilize wonke lo muzi sisebenzise le ndlu yomxhaso. Asazi nalo muzi sizowuvusa ngani njengoba noKhisimusi ususemnyango. Ingiphatha kabuhlungu le nto ngoba angazi ukuthi ngizothi webani kusabele bani uma kunje,” kubalisa uNkk Shusha.

Indodana yakhe uMnuz Mthokozi Shusha (25), ithe ibonga uNkulunkulu ngokubasindisi ngesikhathi somonakalo.

“Siyacela kubantu abangasisiza sivuse umuzi wakwethu njengoba manje sesimpintshene sonke kulo mxhaso omncane nakangaka. Le mvula eyayinetha yayibukeka incane kodwa umonakalo ewudalile mukhulu. Mina ngethuka kakhulu ngivuka sebepitshizwe yizitini. Bengiqala ukubona into enje kepha sibonga ukuthi basindile,” kusho uShusha.

Ayiphumelelanga imizamo yokuxhumana nekhansela uNyawose.

UMnuz Thokozani Mdluli uwabize ngezidomu nezinto ezingasazi isiNgisi amakhansela e-IFP amabili.

MTHOKOZISI MANQELE

EseJozini

IPHINI leMeya yeNFP kuMasipala waseJozini uMnuz Thokozani Mdluli uwabize ngezidomu nezinto ezingasazi isiNgisi amakhansela e-IFP amabili abebhale incwadi yokuthi awasabethembi ubuholi bakhe kulo mkhandlu.

Le ncwadi ebinamaphutha amaningi esiNgisi kuthiwa iphenduke ihlaya losuku emhlanganweni obungeledlule, ne-IFP yawaphoqa ukuba ayihoxise le ncwadi isishaywa amahloni.

Kuthiwa amakhansela anikwe yona ukuba ayifunde ashaywa amahloni bewahleka. Ibibhalwe ukuthi “The acting Municipality, beqonde ukuthi The Acting Municipal Manager. Kwenye indawo ibhede nesipelingi se-Inkatha Freedom Party kodwa bathi Inkatha Freedom Part.

“Ubudomu engingakaze ngibubone lobu. Siwanikile ukuthi ayifunde le ncwadi amakhansela kodwa ahluleka ngoba abebhale isiNgisi esibolile,” kusho uMdluli.

Uthe ngisho nemithetho ecashunwe kule ncwadi ibhediwe. “Bacaphune umthetho olawula ukuphathwa komasipala bawuphambanisa. Basho into engekho uma becaphuna umthetho abathi ngiwuphulile bathi uChapter 2 section 56 yinto engekho leyo. Kukhona uChapter 4 section 56 hhayi le nto abayibhale la. Ukuthi ngisebenzisa isikhundla sami ukuzicebisa mina kungamanga nokuthi ngiphikisa kwasani emkhandlwini njengoba bebeke encwadini,” kuchaza uMdluli.

“Ngiyazi ukuthi icala lami wukuthi ngiphikise izinto ezifanele ukuphikiswa. Nganqaba bethi asilule inkontileka yokuqashwa kweMenenja uMnuz Manda ngoba umthetho ubusungavumi ngoba zase ziphelile izinyanga ezintathu ebibekelwe zona. Okunye engizondelwa khona wukuthi ngikhuze umkhuba wokuqalwa kwezinhlelo zentuthuko bese zingaqedwa ngenxa yokuthi sekukhwa-tshaniswe imali yadliwa yaphela,” kucacisa yena.

Incwadi yokushaywa kukaMdluli ngevoti lokungathenjwa yabhalwa uMnuz Scelo Macwele yesekelwa uMnuz John Siyaya bathi bakwenza lokhu njengekhokhasi ye-IFP.

USiyaya wakusho kwacaca kuleli phephandaba ukuthi bazoyimisa kancane kodwa ngeke bayihoxise incwadi bazoqhubeka nayo ngoba bamfuna ephumile uMdluli.

Okhulumela i-IFP eJozini uMnuz Jabulani Buthelezi uthe abakaze bawagunyaze la makhansela ukuba abhale incwadi.

“UMacwele ugcine eyihoxisile incwadi waxolisa kodwa uSiyaya wangafika emhlanganweni owawumayelana nokubhalwa kwencwadi,” kusho uButhelezi.

Akuqali ukuthi bungathenjwa ubuholi bukaMdluli njengoba ngo-2013 wachithwa amakhansela eqembu lakhe kwafakwa uMnuz Pele Mngomezulu kodwa isinqumo sabuya saguqulwa sekungenelele ubuholi obuphezulu beNFP.

Baqhinqe ngaphandle kwamahhovisi enkampani eyakha izindlu zomxhaso abasebenzi befuna umholo wabo.

S’MANGELE ZUMA

BAQHINQE ngaphandle kwamahhovisi enkampani eyakha izindlu zomxhaso, iKusasa Construction, eMagabheni, izolo abasebenzi befuna umholo wabo abathi kwakumele bawuthole ngeledlule.

Abasebenzi, abebethukuthele begane unwabu, bathe sebekhathele wumphathi wabo, uMnuz Khulekani “Barman” Mthiyane, ohlale ebaholela imali engaphelele njalo sekudlule isikhathi. Bathe bazokumisa ukusebenza kule nkampani kuze kube bayaholelwa bonke.

UMnuz Simlindile Jiba (35) uthe uze waqoka ukungabuyeli ngoNovemba emsebenzini ngoba uMthiyane emkweleta imali yezinyanga ezimbili.

“Ngavele ngabona kungcono ukuthi ngiyeke kunokusebenzela amahhala. Selokhu ngayeka ngigqigqa emahhovisi ngifuna imali yami kodwa uMthiyane angishonise le nale. Ngeledlule enye yayo uyikhokhile kwathi abasebenzi abalinganiselwa ku-20 wangabanika wathi uzobuye abanike. Sekusele izinsuku ezimbalwa kube wuKhisimusi kodwa thina asikathengi lutho ngoba asinamali. Amakhosikazi axabana nathi emakhaya nezingane zifuna izingubo zikaKhisimusi,” kubhoka uJiba.

Elinye ilungu lithe uMthiyane ungumuntu ofuna ukucebisa yena nomndeni wakhe kuphela.

“Yena ngabe usiphatha kahle singabasebenzi bakhe ngoba uma singaduba umsebenzi nguyena oyogcina engena enkingeni. Lo muntu uyahluleka wukusibonga sisebenza kanzima kangaka. Into ayenzayo wukudlala ngathi asibambele izimali emholweni athi ezokukhokhela amathuluzi antshontshwayo. Uvele athi zifa ngamvunye sizokhokha sonke. Kuyenzeka abambe u-R200 nangaphezulu. Sicela uMnyango wezabaSebenzi ukuthi ungenelele ngoba sikhathele ukudlala lesi sigebengu,” kusho umsebenzi.

Ilungu lekomiti lezokuphepha emphakathini, uMnuz Stanley Ncayiyana, lithe bazamile ukwehlisa umoya abasebenzi abebefuna nokucekela amahhovisi phansi.

“Sithinte namaphoyisa ukuthi azosisiza ngoba sibona ukuthi isimo sesingaphezu kwethu. Siyakuqonda ukucasuka kwabantu, akekho umuntu ofuna kulanjwe emzini wakhe ngoKhisimusi ebe esebenza. Siyanxusa ukuba abantu bezinkontileka zokwakha bayeke ukudlala ngabantu ngoba bazi ukuthi bahluphekile,” kusho uNcayiyana.

UMthiyane uthe uyakweshwama ukuthi kunabantu abangaholelwe enkampanini yakhe.

“Kungenzeka ukuthi ukhulume nabantu abebezidakelwe. Namhlanje abasebenzi bebegcwele emahhovisi belinde impahla yokusebenza. Kumanje ngisuka khona kuyasetshenzwa,” kusho uMthiyane.

Kepha abasebenzi bathe uhubhuza amanga “usaqhuba khona ukuba yisigebengu.”

Kuqopheke umlando kulo nyaka emanyuvesi amaningi kuleli.

KUQOPHEKE umlando kulo nyaka emanyuvesi amaningi kuleli, abafundi babumbana bamashela ePhalamende, ezindlini zoMbuso nasemahhovisi eqembu elibusayo i-ANC eGoli, befuna imfundo yamahhala.

Lo mnyakazo othathwe njengohambe phambili kulo nyaka, unyakazise uMengameli wezwe uMnuz Jacob Zuma wamemezela ukuthi ngonyaka ozayo ngeke inyuswe imali yokufunda.

Okwenza wathathwa njengohambe phambili wubumbano olwatshengiswa ngabafundi bazo zonke izinhlanga, abanye babo abanayo imali yokukhokha kodwa ababezwelana nozakwabo abangakwazi ukukhokha.

Cishe minyaka yonke ihlale iba khona imikhankaso efuze le emanyuvesi njengoba sekuyinsakavukela ukuthi abafundi bayabhikisha bekhala ngokunyuswa kwemali yokufunda, izindawo zokuhlala, ukungaxhaswa kwabanye abafundi nokushoda kwezinsiza.

Amanyuvesi abeyinyusa imali yize kucekelwe phansi impahla kodwa kulo nyaka agobe uphondo njengoba ingeke inyuswe.

Uhulumeni umatasa wenza izaba ukuze uhlangabezane nokunganyuswa kwemali yokufunda emanyuvesi njengoba udinga u-R2.3billion wokuxhasa ukunganyuswa kwemali yokufunda.

Amanyuvesi ayalelwe ukuba ahlwaye imali kuleyo ayigcinile ukuze kuxhaswe lokhu kunganyuswa kwemali.

UMnyango weMfundo ePhakeme, oholwa uDkt Blade Nzimande iwona ozwa ukushisa njengoba kudingeka uthole cishe ngaphezulu kuka-R2billion ukuxhasa lokhu kunganyuswa kwemali.

Kuzokhumbuleka ukuthi le mali uZuma wamemezela ukuthi ngeke inyuswe ngoba yayingekho enye impendulo eyayinganelisa abafundi abase bevuke indlobane bengezwa mshini.

Ngaphambi kokuba uZuma ahlangane nabaphathi bamanyuvesi, uNzimande wahlangana nalaba baphathi bavumelana ngokuthi imali okungenani inyuswe ngo-6%.

Lokhu bakuchitha abafundi aqhubeka amamashi, kwasha amanye amanyuvesi abafundi bethi lutho abafune lutho oluthinta ukunyuswa kwemali.

Amanyuvesi nawo abhekene nengwadla yokuthi kumele angaqashi abasebenzi, angamukeli abafundi abaningi ngoba imali yokubhekana nalokhu ayikho.

Yize inqotshiwe impi yokunganyuswa kwemali yokufunda ngonyaka ozayo, abafundi bathi kabanendaba nalokhu kepha abasafuni kwanhlobo ukukhokha imali yokufunda.

Isikhwama esixhasa abafundi ngezimali iNational Students’ Financial Aid Scheme sihlale sikhala ngokuthi incane imali esinayo njengoba sabelwe u-R9.5billion kulo nyaka wezimali wokuxhasa abafundi.

Abafundi bona bathi bafuna imfundo yamahhala njengoba nengqungquthela ye-ANC yango-2007 yanquma ukuthi kube nemfundo yamahhala kuze kufinyelelwe emazingeni aphezulu.

Okhulumela uMnyango weMfundo ePhakeme, uMnuz Khaye Nkwanyana, uthe utholakele u-R2.3billion wokungayuswa kwemali yokufunda ngonyaka ozayo.

Uthe balinde uZuma enze isimemezelo ngeKhomishini ezobheka indaba yemfundo yamahhala.

“Le khomishana silinde ukuthi isho ukuthi le mali yemfundo yamahhala izoqhamukaphi noma kumele kwenziweni ukuze kufezeka leli phupho lemfundo yamahhala. Eyokunyuswa kwemali ngonyaka ozayo isixazululiwe, imali isikhona izofakwa emanyuvesi.

“Ukuze sibe nemfundo yamahhala sidinga cishe ngaphezulu kuka-R50billion ngonyaka. Amanyuvesi siwanika cishe u-R22billion ngonyaka ekubeni wona ngokwezidingo zawo adinga u-R40billion,” kusho uNkwanyana.

Indaba yokunyuswa kwemali akuyona ebe indaba egudwini kulo nyaka njengoba abafundi baseNyuvesi yaseKapa, eRhodes naseNyuvesi yaKwaZulu-Natal bacekela phansi imifuziselo yabaholi abamhlophe befuna imifuziselo yabaholi abalwela inkululeko.

EKapa abafundi balwa kwaze kwasuswa umfuziselo kaCecil John Rhodes kanti eRhodes khona babefuna kushintshwe igama okuqanjwe ngalo le nyuvesi.

E-UKZN khona bacekela umfuziselo kaKing George V befuna ususwe kufakwe owabaholi abafana noMandela, Steve Biko nabanye.

Enyuvesi iStellenbosch abafundi banqobe impi yokufundiswa ngesiNgisi njengoba ulimi lokufunda nokufundisa kule nyuvesi bekuyisiBhunu.

Lokhu kushayelwe elikhulu ihlombe njengoba noNzimande ehlale eyikhuluma eyezinguquko ezikhungweni zemfundo efaka nendaba yolimi lokufunda nokufundisa.

Ingqungquthela ebibheka imfundo ephakeme ebiseThekwini ngenye okubhungwe kuyo eyokuxhaswa kwabafundi njengoba kuphakanyiswe nokuthi amabhange anxenxwe ukuthi axhase abafundi ngemali yokufunda kodwa ngenzalo ephansi.

Inhlanzeko nokuphepha emabhishi yikhona okuhlale kubuyisa izinkumbi zabantu eThekwini, usho kanje uNkk Nobelungu Thela.

BONISWA MOHALE

INHLANZEKO nokuphepha emabhishi yikhona okuhlale kubuyisa izinkumbi zabantu eThekwini, usho kanje uNkk Nobelungu Thela waseBronkhorstspruit, eGauteng oseholidini nabazukulu bakhe abathathu.

UNkk Thela utshele Isolezwe ukuthi ngonyaka odlule wayeseMozambique kodwa okwashesha kwambuyisa wukuthi abekho abagada ababhukudi futhi awamaningi amaphoyisa njengoba kwenzeka eThekwini.

“Siyakujabulela ukuba lana nabazukulu bami ngoba kuphephile futhi kukhona nabasitshela ukuthi sibhukude kuphi uma sifuna ukuphepha. Ngizobuya nangonyaka ozayo ngoba kuphephile akufani nakwamanye amazwe esengike ngawahambela. Ngonyaka odlule ngangiseMozambique kwakumnandi kodwa babengekho abasigadayo, besiluleka ukuthi sibhukude ngakuphi. Uwena owawuzibonela ukuthi amagagasi ashaya ngakuphi,” kusho uNkk Thela.

AbakaMasipala weTheku baveze ukuthi izinhlelo zamaholidi zisahamba kahle kwazise phakathi kukaDisemba 18 no-20 kufike izivakashi ezingu-313 066 emabhishi aseThekwini.

UMnuz Sbusiso Mkhwanazi onguSihlalo wekomiti elibhekele izinhlelo zamaholidi kuMasipala weTheku unxuse abazali ukuba bagade izingane.

Ubuye wakhumbuza umphakathi ukuthi ukosa kuvumeleke eSunkist nase-Blue Lagoon kanti kwamanye akuvumelekile.

Uthe kubalulekile ukuthi abantu balalele abasiza ababhukudayo uma bebaxwayisa ngokuthi kubhukudwa kuphi.

“Izindawo zokubhukuda ziphakathi kwama-flegi abomvu naphuzi futhi kuqala ukubhukuda ngo-6 ekuseni kuqedwe ngo-6.30 ntambama. Abantu abavumelekile ukubhukuda ebusuku nasemabhishi angenabo abasiza ababhukudayo. Utshwala abuvumelekile olwandle. Uthe ngempelasonto ababhekele izingane bakhiphe amabhande angu-13 354 anemininingwane yabazali bezingane,” kusho uMkhwanazi.

Uveze ukuthi basize abantu abangu-84 akade sebegwiliza kanti abangu-253 banikwe usizo oluphuthumayo ngemuva kokulunywa ngama-blue bottles.

Kushone owesifazane oneminyaka engu-27 ominze lapho kuhlangana khona umfula i-Illovo nolwandle, isidumbu sakhe sitakulwe ngabasiza ababhukudayo ngoLwesihlanu.

Ulwandle lusaqhubeka nokuhlanzwa ukuqinisekisa ukuthi kalinamfucuza. UMkhwanazi uthe baqoqe amathani angu-302 202.19 emfucuza. Abaqoqa imfucuza baqala ukusebenza ngo-6 ekuseni kuya ku-2.30 ntambama baqhubeke ngo-3 ntambama kuze kube ngu-11 ebusuku, kuphinde kungene abanye abaphuma ngo-5.30 ekuseni.

Kuqashwe abantu abangu-144 abaqinisekisa ukuthi amabhishi ahlanzekile kanti bangena amashifu.

Uphethe ngokukhumbuza abantu ukuba balahle imfucuza emigqonyeni efanele.

Bakhiphele usizi lwabo ku-Advocate Thuli Madonsela abahlali basehostela eGlebelands, eMlazi.

ZANELE MTHETHWA

BAKHIPHELE usizi lwabo kuMvikeli woMphakathi u-Advocate Thuli Madonsela izolo abahlali basehostela eGlebelands, eMlazi, bekhala ngoku”dayiswa” ngamaphoyisa abathi awabasizi ukwehlisa izigameko zokubulawa kwabo.

UMadonsela ubehambele kuleli hostela ukuzohlola isimo njengoba sekubulawe abangu-53 kusuka ngonyaka odlule.

Yize ekucacisile ukuthi akezile ukuzothatha umsebenzi wamaphoyisa, abahlali bathole ithuba lokuzwakalisa intukuthelo yabo ngokungalawuleki kwalolu dlame.

Abaningi abebengazisho amagama abo bathe sebelahle ithemba emaphoyiseni.

Bakhale ngokuthi ukubulawa kwabantu kuyaqhubeka futhi amaphoyisa ayabikelwa kodwa akukho okuthembisayo.

“Amaphoyisa siwabikela mihla namalanga ngempilo esiyiphila la futhi namacala ayabikwa kodwa akwenzeki lutho. Kwesinye isikhathi uma uyobika akutshela ukuthi usahlaleleni ehostela engabe uphindela emakhaya,” usho kanje omunye umhlali.

Omunye uthe amaphoyisa yiwona abuye abahlukumeze ngokugasela ezindlini ngodlame, aphule nezicabha.

Lo wesilisa oveze ukuthi uhlala nezingane ezimbili, uthe uzizwa engaphephile nomndeni wakhe.

Abahlali bebekhuluma phambi kwawo amaphoyisa abephume ngobuningi ezoqapha isimo izolo.

Bakhona nabebekhala ngokugqoza kohlelo lokuthola izindlu zomxhaso abathe kwenza bampintshane.

UMadonsela unxuse umphakathi ukuthi uqhubeke nokuwabika amacala ngoba yena umsebenzi wakhe ngukubheka ukuthi konke kwenziwa ngendlela yini.

Emuva kokukhuluma nabahlali ubuye wabheka izakhiwo, wakhala ngokuvuza kwamanzi athe uzokudlulisela kuNgqongqoshe wezaManzi nokuHlanzeka uNkk Nomvula Mokonyane.

Uthe yize abahlali bekhombisa ukulahla ithemba emaphoyiseni, wanelisekile ngokuthi uphenyo luyenziwa futhi kukhona nababoshiwe.

“Okwami bekuwukubheka inhlalo yomphakathi kuleli hostela nokuthi uhulumeni wenza okufanele yini.

“Izimo engizibonile azigculisi ukuthi kungahlala imindeni. Ngithole ukuthi abanye abakazibhaliseli ngisho izindlu zomxhaso kanti bahleli ngokuminyana, okungezinye zezizathu ezingadala kube nzima ukulawula udlame,” kusho yena.

UMadonsela uthwale kanzima ezama ukukhuluma nabahlali abanye bebengafuni ukukhuluma ngoba besaba ukulandelwa.

UMadonsela uthe uzokhuluma namaphoyisa ukuqinisekisa ukuthi labo abavumile ukukhuluma izolo, bayavikeleka.

Kwenzeka lokhu nje ngeledlule uKhomishana wamaPhoyisa KwaZulu-Natal uLieutenant-General Mmamonnye Ngobeni uthe ibambe ngakho odabeni lokubulawa kwabantu ehostela ngoba banelisekile ngendlela amaphoyisa asebenza ngayo.

Ufakazelwa nawuKhomishana oBambile kuzwelonke uLieutenant-General Khomotso Phahlane othe wudaba oluseqhulwini emaphoyiseni.

UNkk Vanessa Burger oyisishoshovu esilwela amalungelo abantu uthe kuyihlazo okushiwo uKhomishana ngoba amaphoyisa ayahluleka.

Uthe akusamele udaba lwaseGlebe luthathwe njengobugebengu njengoba kusho uNgobeni.

Kube yinjabulo yodwa ngesikhathi izintombi nezinsizwa ezindala zigixabezwa ngenyama nemifino ekhiqizwe yizo iziboshwa ngaphakathi emajele.

S’MANGELE ZUMA

‘AZANGE kube nje laph’ekhaya, azange kube nje laph’ekhaya!”Bezicula kanje zishona phansi izalukazi namakhehla ekhaya labadala iKwaMashu Christian Care Society ZamaZulu ngesikhathi iziboshwa zasemajele ahlukene KwaZulu-Natal nabaphathi bazo bebapha izipho zikaKhisimusi izolo.

Umcimbi ubuhanjelwe wuKhomishana wezokuHlunyeliswa kweziMilo KwaZulu-Natal, uMnuz Mnikelwa Nxele.

Kube yinjabulo yodwa ngesikhathi izintombi nezinsizwa ezindala zigixabezwa ngenyama nemifino ekhiqizwe yizo iziboshwa ngaphakathi emajele.

USihlalo webhodi leKhaya, uMnuz Jabulani Maluleka, uthe bazizwa bebaluleke kakhulu ngokuthi izikhulu zomnyango neziboshwa zishiye konke zakhetha ukuzobajabulisa.

“Sibonga ukuthi nikwazile ukuthatha ithuba nizokwenza ogogo nomkhulu nabo bazizwa bebalulekile. Lokhu enikwenzile kubaluleke kakhulu ngoba ningabantu abasebenza ngokulungisa izimilo zeziboshwa. Zizofunda kinina ukuthi isimilo sisetshenziswa kuphi, zikwazi ukuthi noma sezibuyela emakhaya zibe yisibonelo esihle emphakathini,” kusho uMaluleka.

UNxele uthe ubudlelwano nekhaya labadala babuqale ngo-2012 ngemuva kokuyalelwa ngowayenguNgqongqoshe woMnyango wabo, uMnuz Sibusiso Ndebele.

“Sabe sesiyazibophezela ukuthi siyosebenzisana nalo. Sinikeza ithuba odadewethu nabafowethu abangaphakathi emajele ukuthi bathathe imisebenzi yabo yezandla bayenze izipho zikaKhisimusi. Senzela ukuthi nomphakathi uqonde ukuthi uma beboshiwe basuke bengalahlwanga kodwa basuke belungiswa izimilo. Sinakho ukuthi baningi abahlukumeza umphakathi abangakaboshwa. lo ongaphakathi angakwazi ukushumayeza ivangeli lokuthi ubugebengu abubuyiseli,” kusho uNxele.

Uthe owayengumengameli wezwe, uMnuz Nelson Mandela, wathi impucuzeko yesizwe ayingabukwa kubantu abanezimali, kumele ibonakale ngokuthi isizwe sibaphethe kanjani abadala nezingane.

“Abantu abadala babaluleke kakhulu. silapha nje yingenxa yobude bendlela asebeyihambile. Yibona abenza izwe lifinyelele lapho likhona manje. Nginifisela uKhisimusi omuhle, ngithandazela ukuthi uNkulunkulu angenza abantu abaninakekelayo babe nothando olungapheli ukuze nihlale kahle ngaso sonke isikhathi,” kuqhuba uNxele.

Isalukazi uNksz Theresa Duma (83) uthe indlela ajabule ngayo sengathi umcimbi wabo ungalokhu uqhubekile, ungapheli.

“Kwaze kwamnandi ukuthandwa nokunakekelwa. Sijabule kakhulu, siswele amaphiko okundiza,” kusho uNksz Duma.

Ikhehla eliyincwasimende uMnuz Fana Ntuli (84) obefake nezibuko zelanga ungomunye oyigqamisile injabulo yakhe ngokudansa kakhulu aze ashone phansi.

Iqembu lesicathamiya leziboshwa iHappy Boys likhumbuze abadala ebusheni babo kwadanswa kwamnandi, kwanjeyaya.

Abesitebele sikaDJ Tira i-Afrotainment bona baqoke ukuvakashela ikhaya lezingane i-Ekusizeni KwaMashu izolo.

“Zibe ziningi izigameko zokuhlukunyezwa kwezingane kulo nyaka, zibulawa ezinye bezama ukuzidayisa. Yingakho sibone ukuthi sidinga ukuzinikeza uthando,” kusho uLorrentia Mqwebu we-Afrotainment.

IDA isishayele ihlombe isinqumo sikaNgqongqoshe wezeziMali uMnuz Pravin Gordhan sokwenqabela isiphakamiso sikaNksz Dudu Myeni.

IDEMOCRATIC Alliance (DA) isishayele ihlombe isinqumo sikaNgqongqoshe wezeziMali uMnuz Pravin Gordhan sokwenqabela isiphakamiso sikaSihlalo weSouth African Airways (SAA) uNksz Dudu Myeni (osesithombeni) mayelana nokuthengwa kwamabhanoyi, yaphakamisa nokuthi uMyeni asuswe esikhundleni.

Esitatimendeni asikhiphile uNatasha Mazzone, omele iDA emnyangweni wezamabhizinisi kahulumeni, uthe “lezi yizindaba ezinhle kwiNingizimu Afrika, kodwa ezimbi kusihlalo uDudu Myeni.”

Isivumelwano sokuthi kube nomxhumanisi ekuthengweni kwala mabhanoyi sasayinwa owayenguNgqo-ngqoshe wezeziMali uMnuz Nhlanhla Nene ngoJulayi walo nyaka.

“UNgqongqoshe uGordhan wenze kahle ukuvimbela uMyeni ekufezeni izinhloso zakhe zepolitiki,” kusho uMazzone.

Isitatimende siphinde saveza ukuthi isinqumo sikaGordhan sehlise ingcindezi yezezimali kwaSAA.