Kusuke isidumo kwaphazamiseka izitolo eziningi emuva kwesigameko sokuqhunyiswa kwemishini yokukhipha imali eyisithupha, kwadutshulwa nephoyisa.

ZANELE MTHETHWA

KUSUKE isidumo kwaphazamiseka izitolo eziningi namabhange izolo, kwavalwa nenkantolo yeMantshi KwaDukuza emuva kwesigameko sokuqhunyiswa kwemishini yokukhipha imali eyisithupha, kwadutshulwa nephoyisa.

Kuze kwashaya u-12 emini ezinye izitolo zisavaliwe emgwaqweni omkhulu edolobheni KwaDukuza, amaphoyisa nabaphenya ngezigameko zobugebengu besaqoqa ubufakazi.

Umphakathi obuzothenga ezitolo ezisemgwaqweni uKing Shaka, ufike wakhungatheka njengoba bekume nse ukusebenza kulo mgwaqo onezitolo ezinkulu zezingubo namabhange.

Isigameko esishiye umphakathi usovalweni senzeke ngezithuba zabo-1 entathakusa lapho kuthiwa kugasele abasolwa abangaphezu kuka-20 abebehlomile behamba ngezimoto ezahlukene.

Abasolwa okuthiwa bebehamba nge-Audi, Avanza, BMW neMercedez Benz, bavale zonke izintuba zalo mgwaqo bagasela eStandard Bank.

Onogada abanye abebehamba ngemoto beqaphe isimo kuleli dolobha baphucwe izibhamu no-ova, bashaywa kanzima.

Labo nogada beG4 Security neK9 Security kuthiwa abasolwa bebefuna nokuthi babakhombise lapho kucushwe khona i-alamu.

Amaphoyisa okuthiwa ashayelwe ucingo ngonogada, afike abasolwa besekhona endaweni yesigameko.

Abasolwa abebehlome ngama-AK47, R5 namavolovolo bavulele ngenhlamvu emaphoyiseni kwadubuleka elesifazane eligodliwe igama ukulivikela.

Isolezwe lithole ngozakwabo ukuthi belikade lisebenza ebusuku sekusele amahora ambalwa liphume ekuseni.

Leli phoyisa elisebenzela KwaDukuza kuthiwa izolo bekuwusuku lwalo lokuzalwa.

Lidubuleke ohlangothini ngasesiswini kodwa isimo salo kuthiwa siyagculisa esibhedlela.

Okhulumela amaphoyisa KwaZulu-Natal, uMajor Thulani Zwane, uthe abasolwa bebengakayithathi imali ngesikhathi kufika amaphoyisa kodwa bese bewuqhumisile nomnyango wensimbi ongenela ngaphakathi.

“Kuyabonakala ukuthi wubugebengu obebuhleliwe ngoba abasolwa basebenzise ubuchule. Bathathe izibhamu ezine zonogada kanti kusolwa ukuthi bathathe nocingo olusetshenziswa ngamaphoyisa ukuxhumana emoyeni obekwenza bezwe okuhlelwa ngamaphoyisa. Akekho osaboshiwe kulesi sigameko kodwa kuphenywa icala lokucekela phansi impahla, ukuduna nokugqekeza,” kusho uZwane.

Uthe kusolwa ukuthi izibhamu bezibolekiwe, kusaphenywa nokuthi izimoto akuzona yini ezokwebiwa.

Kwenzeka lesi sigameko nje kusaphele amasonto amabili kuqhunyiswe amabhomu ePinetown lapho abasolwa bebalekele khona no-R500 000.

UZwane uthe yize lezi zigameko zenzeke ngendlela ecishe ifane kodwa abakazokuqi-nisekisa ukuthi zihlobene ngoba kusaphenywa.

Uthe bahlele ezinye izindlela zokuqinisa ezokuphepha njengoba sekusondele amaholidi kaKhisimusi ajwayele ukuhambisana nalezi zigameko.

Bazivumele amacala okubulala izihlobo zabo abasolwa ababili ababhekene necala lokuqotha amalungu omndeni ayisishiyagalombili.

SHERLISSA PETERS noZANELE MTHETHWA

BAZIVUMELE amacala okubulala izihlobo zabo abasolwa ababili ababhekene necala lokuqotha amalungu omndeni ayisishiyagalombili, eMabheleni, eMthwalume, ngeledlule.

Izolo laba basolwa uMnuz Thulani Donatus Mncwabe (28) noMnuz Sibonelo Eric Mncwabe (26) batshele inkantolo ukuthi babulala izihlobo zabo ngoba besola ukuthi ziyabathakatha ngemuva kokushona kwabakubo.

Kube nengwijikhwebu izolo ngenkathi laba basolwa obekulindekele bavele enkantolo yeMantshi eMzumbe, beshushumbiselwa enkantolo eNkulu eMgungundlovu lapho bevume khona ukubulala uninalume uMnuz Mantinga Mncwabe (70) noNkk Shonisile Mncwabe (60), uPhindile (35), Philasande (1), Amahle (3), Amanda (15), Aphiwe (3) no-Andile (1).

Bavumile ukuthi ngo-Okthoba 20 bagenca babulala izihlobo zabo ngoba bezisola ngokuthakatha.

Izolo umphakathi waseMsinsini eMthwalume uphume ngobuningi ubhikisha ngaphandle kwenkantolo eMzumbe ngenhloso yokufaka ingcindezi yokuthi abasolwa banganikezwa ibheyili.

Abasolwa abavele okokuqala kule nkantolo ngoLwesihlanu olwedlule, bekulindeleke ukuthi bafake isicelo sebheyili kodwa oKlebe abebephenya icala bashaya ingwiji babayisa eMgungundlovu.

Umphakathi ubhikishe kusukela ekuseni ucula amaculo omzabalazo kodwa kwaze kwashaya izikhathi zasemini bengabonwa abasolwa.

Akekho obazi emphakathini nakumalungu omndeni ukuthi abasolwa sebeyiswe eMgungundlovu.

Abasolwa bavume amacala phambi kweJaji uJacqui Henriques enkantolo ebiqashwe ngamaphoyisa kukhona nedlanzana labezindaba.

Laba basolwa okulindeleke bagwetshwe namuhla khona eMgungundlovu, bangene begqoke amajini namajakhethi anezigqoko begobise amakhanda.

Batshele inkantolo ukuthi uMantinga bebemsola ngokuthakatha umfowabo uMthokozisi oshone ngoMeyi nodadewabo omncane oshone kule nyanga.

Bathi emuva kokushona kukamfowabo uMantinga wathi kukhona ozolandela yingakho besole yena uma sekulandela udadewabo omncane. “Ngabona ukuthi kusho ukuthi umalume uyathakatha ngoba udadewethu obeneminyaka engu-10 eshone ngo-Okthoba 3,” kuchaza uThulani.

Abasolwa bathi ngobusuku besigameko babexoxa ngokushonelwa emndenini wabo basaba, ukuthi kukhona ozolandela uma bengenzi lutho ngokuthakatha kukaninalume.

“Safika emzini kamalume salunguza sathola elele yedwa endlini engaphandle, kukhiyiwe. Sashisa indlu ukuze aphume kodwa wangawuvula umnyango uma ebona thina,” kusho uThulani.

Uthe walandelwa wumfowabo bamgenca kabili ngobhushu uMantinga. “Wakhala ecela ukulekelelwa kwaphuma abazukulu ababili sekusha endlini okuthe uma besibona basibiza ngamagama, babaleka bangena kwenye indlu,” kusho uThulani.

Uthe balandela abazukulu uSibonelo wama ngasemnyango ngesikhathi yena egenca kwasani ngobhushu.

UMshushisi uMbongeni Mthembu uthe abasolwa bakhombisa unya nobuqaba bebulala ngisho izingane ezingenacala. Uthe akasiboni isigwebo esibafanele ngaphandle kukadilikajele. Kulesi sigameko kwasinda uXolani (16) osesibhedlela, uSphelele okhubazekile (23) noMinenhle (18) owahlaba umkhosi.

Ummeli wabasolwa u-Advocate Tricia Moonsamy uthe ngenxa yokukhulela emakhaya abasolwa bayakholelwa ekuthakatheni.

Uthe uyakuqonda ubucayi bamacala kodwa abasolwa bayondla emndenini futhi bayazisola.

UMnuz Sbu Mncwabe okhulumela umndeni uthe bebengazi lutho ngokuvuma icala kwabasolwa.

Abashona bazongcwatshwa ngoMgqibelo emathuneni asemaRomeni emuva kwenkonzo ezoba senkundleni yezemidlalo kwaBiyase eMthwalume.

Uhlukene phakathi umphakathi waseMsinsini, eMthwalume ngokulawulwa kwesikole samabanga aphansi.

ZANELE MTHETHWA

UHLUKENE phakathi umphakathi waseMsinsini, eMthwalume ngokulawulwa kwesikole samabanga aphansi, esivalwe izinsuku ezimbili ngenxa yokugqekezwa kwamakotishi othisha.

Kusolwa nokugxambukela kwepolitiki odabeni lwaseThulubheke Primary, osekusolwa nokuthi ikhansela lizama ukuzicoshela amaphuzu ngokungenela.

Kubikwa ukuthi phakathi kwale nyanga othisha abahlala emakotishini esikole bangenelwe yizigebengu zeba impahla, zagqashula izigubhu nezintambo zikagesi.

Isigameko sokwebiwa siphinde kabili, okwenze othisha bakhale ngokuthi kabaphephile.

Kwabizwa umhlangano womphakathi kwanqunywa ukuthi kuphenywe abasolwa okuthiwa bayaziwa endaweni ngokuntshontsha ugesi wezinyokanyoka.

Ilungu lomphakathi elicele ukungadalulwa ngenxa yokusaba ukuba nyamanambana kwabanye lithe lolu daba seluwuhlukanise phakathi umphakathi.

Liveze ukuthi nabo othisha basolwa ngokuba budedengu emakotishini abo okuthiwa kungena ngisho abangani abangafundisi kulesi sikole.

“Ngelinye ilanga kwatholakala ukuthi kukhona ongena ngaphakathi ageze, okusolwa ukuthi unokhiye wangaphakathi. Lokhu kwenza kungabe kusacaca nokuthi ngobani abathinteka ezigamekweni zokweba” kusho ilingu lomphakathi.

Kusukela ngomhla ka-15 kule nyanga kuthiwa isikole savalwa izinsuku ezimbili emuva kokufika komhloli okhiphe lowo myalelo.

Lo mhloli okuthiwa uyise waba nesandla ekwakhiweni kwesikole, usolwa ngokufaka udaba lomndeni uma ethatha izinqumo zokulawulwa kwesikole.

Emuva komhlangano wekhansela namalungu esigungu sesikole sabazali kuthiwa isikole sivuliwe kodwa kungekho okwenziwe ukuqinisekisa ukuthi zizoqiniswa kanjani ezokuphepha.

Savulwa ngeledlule nothisha baqhubeka bahlala emakotishini.

Amalungu omphakathi kuthiwa aphakamisa ukuthi ashintshane ngokugada emakotishini noma othisha baqashe ngaphandle kodwa kwangavunyelwana.

Amanye amalungu omphakathi akhala ngokuthi isikole sisengaphinde sivalwe uma kuqhubeka nokugqekezwa.

UMnuz Phiwokuhle Zamisa oyikhansela uvumile ukuthi kunenkinga yokugqekezwa esikoleni kodwa konke sekubuyele esimweni.

Okhulumela amaphoyisa KwaZulu-Natal uMajor Thulani Zwane uthe kuphenywa icala lokugqekezwa elenzeke ngo-Okthoba 12.

Kuthathwe nesibhamu sephoyisa elidutshulwe esigamekweni sokuzama ukubamba inkunzi ebhange edolobheni KwaDukuza.

ZANELE MTHETHWA

KUTHATHWE nesibhamu sephoyisa elidutshulwe ngoLwesithathu esigamekweni sokuzama ukubamba inkunzi ebhange edolobheni KwaDukuza.

Kulesi sigameko okugasele khona abasolwa abangaphezu kuka-20 behamba ngezimoto ezihlukukene, kugcine kuntshontshwe izibhamu eziyisihlanu okubalwa nezine eziphucwe onogada.

Okhulumela amaphoyisa KwaZulu-Natal uMajor Thulani Zwane ukuqinisekisile ukuthi akukaboshwa muntu futhi nezibhamu azitholakalanga.

Icala selidluliselwe koKlebe okuyibona abazophenya.

“Kuthathwe izibhamu ezine konogada abebehlola isimo kuleli dolobha ngesikhathi kugasela abasolwa. Isibhamu sephoyisa elidutshulwe lalimala kulesi sigameko naso sithathiwe. Sicela noma ubani onolwazi olungaholela ekuboshweni kwabasolwa axhumane namaphoyisa ngoba laba basolwa bayingozi kakhulu,” kusho uZwane.

Ngesikhathi kwenzeka lesi sigameko abaphenyi abebesendaweni yesigameko baveze ukuthi kuqhunyiswe imishini eyisithupha yokukhipha imali kodwa izolo isitatimende samaphoyisa sithe ayiqhunyiswanga.

Kuthiwa abasolwa bazamile ukukhipha imali komunye umshini kodwa bahluleka.

Kuqhunyiswe nomnyango oyinsimbi ongenela ebhange lapho kunemishini yokukhipha imali.

Amaphoyisa athe akhathazekile ngesibalo sabasolwa nangokudutshulwa kwephoyisa kodwa athembisa ukuthi asezithendeni zabo.

Kulesi sigameko kudutshulwe iphoyisa lesifazane okuthiwa belizophuma ekuseni emsebenzini liyogubha usuku lwalo lokuzalwa.

Kuthiwa liyelulama esibhedlela njengoba odokotela bekwazile ukukhipha inhlamvu ohlangothini ngasesiswini.

Abasolwa bagasele ngezithuba zabo 1 entathakusa bavala zonke izintuba ezingenela kuKing Shaka Street onoxhaxha lwezitolo namabhange. Kume nse ukusebenza kulo mgwaqo emuva kwalesi sigameko, umphakathi uphindiswa emuva izitolo zivaliwe. Kuphazamiseke nokusebenza kwenkantolo nayo ekulo mgwaqo, engazange ivulwe ngoLwesithathu. Izolo konke kubuyele esimeni kuleli dolobha yize umphakathi usathukile ngenxa yalesi sigameko esisematheni.

UMkhuzi wamaPhoyisa esifundazweni uLieutenant General Mmamonnye Ngobeni uncome ukushesha kwamaphoyisa ukufika kulesi sigameko okuphazamise abasolwa abangakwazanga ukuthatha imali.

“OKlebe bazosebenza kanzima ukubamba lezi zigebengu ukuze zibhekane nomthetho,” kusho yena.

Kuvele nokuthi amaphoyisa azoqinisa ezokuphepha njengoba kusondele amaholide kaKhisimusi ajwayele ukuhambisana nalezi zigameko.

Emasontweni amabili edlule kwaqhunyiswa imishini yemali ePinetown abasolwa bahamba no-R500 000.

Kusaphenywa ukuthi lezi zigameko kazihlobene yini njengoba kusetshenziswe indlela efanayo kuzona.

Kubhuntshe umcimbi wokwethulwa kwezidingo zentuthuko eNkandla ngesikhathi osomabhizinisi bakhona bevuka umbhejazane.

CELANI SIKHAKHANE

KUBHUNTSHE umcimbi wokwethulwa kwezidingo zentuthuko eNkandla ngesikhathi osomabhizinisi bakhona bevuka umbhejazane bexosha izinkampani ebeziqashelwe ukuzofaka itende nezinye izinsiza zokuqhuba lo mcimbi obuzoba ngoLwesithathu, bethi sebekhathele ukudlelwa umsebenzi yizinkampani zangaphandle.

Umcimbi obuhlelwe nguMasipala woThungulu ubuzoba sesigodini saKwaDhlomo lapho iMeya uNkk Thembeka Mchunu nesigungu sayo, bebezokwethula khona uhlelo lwentuthuko edidiyelwe yomphakathi waseNkandla.

UMnuz Alpha Nxumalo onguSihlalo weNkandla Business Chamber, uthe sekufike lapho behluleka khona ukubekezela ngoba bakhathele ukuthi njalo umasipala noma uhulumeni uma enomcimbi eNkandla babone kuphithiza izinkampani zaseThekwini naseRichard’s Bay.

“Kulo mcimbi besishaywe ngesithende singanikwe ngisho owodwa umsebenzi. Ngenxa yalokho sivele sabona ukuthi ukuze silalelwe kuzomele siwuphazamise lo mcimbi obuzoba ngoLwesithathu. Siqale sakhuluma nezinduna sicela ukuthi ungavunyelwa lo mcimbi ukuba uhlale kodwa zisichithile zathi ngeke kulunge ngoba sekuze kwahlelwa yonke into. Sivele sasuka kuzo saqonda enkantolo yesizwe lapho bese kuqala kugxunyekwa khona amatende, safike sabatshela laba banikazi bawo ukuthi sicela bashaye bachithe ngoba asibadingi kule ndawo futhi abangabe besaqala nokugxumeka ngoba lo mcimbi sifuna ungabi bikho,” kusho uNxumalo.

Uthe nangesikhathi kufike uNdunankulu uSenzo Mchunu ngokohlelo i-Operation Sukuma Sakhe abazange bahlomule kunalokho kwakugqame izinkampani zaseMgungundlovu, eThekwini naseRichard’s Bay zipheka, ezinye zifake iSound System kodwa bona beshiwe ngaphandle.

Uthe ayikho imicimbi abazoyivumela kahulumeni ukuba ibe seNkandla uma kungaqashwanga bona ngoba bakhathele ukubukelwa phansi ngenxa yokuthi bangabasemakhaya.

Uveze ukuthi okunye okubaphathe kabi wukuthi ngesikhathi befuna umhlangano nomasipala bathunyelelwe uSomlomo uNkk Alice Mthembu ekubeni bona bebefuna iMeya neMenenja kamasipala.

UNkk Mchunu oyiMeya uthe ibaphathe kabi lento eyenziwe yilabo somabhizinisi ngoba kulahleke imali eningi ngalo mcimbi.

“Okubuhlungu wukuthi basebenzisa ipolitiki ngokuhlukumeza umphakathi njengoba umcimbi wentuthuko ugcine ungekho. Uma senza imicimbi senza isiqiniseko sokuthi kulezo zinkampani eziku-database yomkhandlu sithatha ezakuleyo ndawo. Lokho sikwenza ngokuqinisekisa ukuthi ngisho ikheli lazo libiza lezo zindawo esisuke sizoya kuzo. Lokhu kwaseNkandla kubi ngoba osomabhizinisi abebehlomulile bekungabakhona kangangokuthi umuntu obeqashelwe ukupheka ubengowakhona futhi ubephekela kubo. Esikubonayo wukuthi laba balwa ngoba osomabhizinisi abathole umsebenzi bengewona amalungu enhlangano yabo iNkandla Business Chamber. Mayelana netende, sibe nenkinga yokuthi eNkandla akekho usomabhizinisi osaqashisa ngamatende yingakho kuphoqeleke ukuthi siqashe umuntu okungeyena owendawo. Kuward 9 besihlangene nomphakathi wakhona kanti besiqashe amatekisi namaveni aseNkandla ukuthutha abantu okuyinto esiyenza kubantu bendawo ngokubanika amathuba,” kusho uNkk Mchunu.

Uveze nokuthi yena ubezoba khona emhlanganweni kodwa ubematasa ebhala izivivinyo zakhe okuholele ekutheni bajube uSomlomo ukuthi ahlangane nalabo somabhizinisi.

I-ANC KwaZulu-Natal isole amanye amalungu ayo ngokudukisa umphakathi ezinkundleni zokuxhumana.

CELANI SIKHAKHANE

I-ANC KwaZulu-Natal isole amanye amalungu ayo ngokudukisa umphakathi ezinkundleni zokuxhumana ngokuthi ingqungquthela yayo yesifundazwe ezoba eRoyal Show Ground, eMgungundlovu, kusuka ngomhla ka-5 kuya ku-8 Novemba, isizohlehliswa ngenxa yezinkinga.

UNobhala we-ANC esifundazweni uMnuz Sihle Zikalala, esitatimendeni asikhiphe izolo, uthe sekunabantu abakhuluma amanga ngale ngqungquthela ekubeni konke sekumi ngomumo.

NgoLwesibili ucacise indaba yeTheku, wathi nakuba ligcine lihlulekile ukuhlalisa ingqungquthela yalo kodwa amagatsha akhona azoba negunya lokuba yingxenye yengqungquthela yokukhetha ubuholi besifundazwe ezoba ngesonto elizayo eMgungundlovu.

“Empeleni ngokomthethosisekelo akukho okuzovimba amagatsha aseThekwini ukuba abe yingxenye yengqungquthela yesifundazwe ngoba lawo magatsha asehlalile futhi akwazile ukuhlangabezana nemigudu efanele. Azokwazi ukuba sengqungqutheleni yesifundazwe.

“Okunye esingakucacisa wukuthi nengqungquthela yesifundazwe ngeke iphazanyiswe yindaba yokungahlali kwengqungquthela yeTheku.

“Okuchaza ukuthi njengoba iTheku lingahlalile, lisazokwazi ukuba nengqungquthela yalo ngemuva kweyesifundazwe.

“Uhlelo lwamagatsha athinta isifundazwe luphothulwe ngeledlule kanti konke sekumi ngomumo. Okunye ukuthi iTheku namanje liseyisifunda esikhulu ku-ANC,” kusho uZikalala.

Uveze ukuthi ngomhlaka 5 kuqala ukubhaliswa kwezithunywa bese kuthi kusuka ngomhla ka 6 kuyobe kuqala umongo wengqungquthela kuze kuyoshaya uNovemba 8 lapho eyobe isivalwa khona.

Ubuholi obukhona njengamanje bukhethwe engqungqutheleni eyayiseNewcastle, okwakhethwa kuyo uDkt Zweli Mkhize ukuba nguSihlalo.

UMkhize ushiye ngo-2013 kwase kufakwa uMnuz Senzo Mchunu engqungqutheleni eyayiseWestville.

Kumanje kukhona abafuna uZikalala abe nguSihlalo, bese esekwa nguMnuz Willies Mchunu, uNobhala kube uMnuz Supa Zuma, iphini lakhe kube uMnuz Mluleki Ndobe bese uMgcinimafa kube uNkk Nomusa Dube-Ncube.

Ohlangothini lukaMchunu bafuna iphini lakhe kube uNkk Peggy Nkonyeni, uNobhala uMnuz Nhlakanipho Ntombela, iphini lakhe kube uNkk Mbali Myeni, bese uMgcinimafa kube uMnuz Mike Mabuyakhulu.

Kumanje eThekwini kusaliwa indaba kaNkk Zandile Gumede noMnuz James Nxumalo okusabangwa indaba yokuthi ubani okufanele akhethwe phakathi kwabo ukuze kuhlale ingqungquthela.

Laba abaseka uNxumalo bahlangane ePinetown Civic Centre emhlanganweni obuwethulwa nguMnuz Sthenjwa Nyawose ngoLwesibili, osekhaleni lemikhankaso kaNxumalo, lapho bethe ngeke bayiphazamise ingqungquthela yesifundazwe.

Kunalokho bahlela ukubhalela ubuholi bukazwelonke incwadi babucele ukuthi bugudluze uZikalala ohlelweni oluthinta amagatsha.

“Asigculisekile neze ngoZikalala ngoba sikhuluma nje amagatsha afana no-ward 5 eMpumalanga, kube u-ward 43 eLindelani, ward 78 no-80 eMlazi kube u-72 eWelbedacht kunezinkinga ezidalwe uZikalala.

“Silinde ukuba ubuholi besifundazwe bufike eCity Hall, eThekwini ngoMsombuluko buzosichazela ngezinkinga esinazo. Uma bungafiki kuzoshunqa uthuli,” kusho uNyawose.

UZikalala uyaziphika izinsolo zokugxambukela emagatsheni njengoba ethi ngumsebenzi lowo owenziwa abanye abantu.

Ku-ward 30, labo abaphambili emkhankasweni kaNkk Gumede basola ukuthi bayathakathwa ngoba kuthe bephuma emhlanganweni wegatsha ekuqaleni kwenyanga bagula bacishe bafa. Bathi kunento eyinhlabathi abayizwa ibashaya emehlweni ngesikhathi bephuma kulo mhlangano bagula baze balaliswa ezibhedlela.

Nakuba iTheku linezinkinga kodwa izifunda ezifana neMusa Dladla, abaQulusi, Far North, Malahleni, Ukhahlamba, Inkosi Bhambatha, Harry Gwala, Moses Mabhida neLowers South Coast neGreater KwaDukuza konke sekumi ngomumo ngengqungquthela yesifundazwe.

IKwaZulu-Natal isikhonjwe njengendawo ekhungethwe yisomiso kakhulu.

MHLENGI SHANGASE noMLUNGISI GUMEDE

IKWAZULU-Natal isikhonjwe njengendawo ekhungethwe yisomiso kakhulu njengoba siya ngokuba sibi isimo sokuntuleka kwamanzi esifundazweni osekuphazamisa nomnotho.

UNgqongqoshe wezokuBusa ngokuBambisana nezoMdabu KwaZulu-Natal, uNkk Nomusa Dube-Ncube, izolo usamukele isinyathelo sikahulumeni kazwelonke sokukhomba isifundazwe njengendawo exakekile ngenxa yesomiso esihlalise lubhojozi izakhamizi ezindaweni ezahlukene.

“Ukukhonjwa kwesifundazwe sethu njengendawo ebhekene nenkinga kuletha ithemba emiphakathini nasemnothweni njengoba isifundazwe kuzomele silwe nale nhlekelele ngokubambisana nohulumeni kazwelonke, lokhu kuzosiza ekuqiniseni imizamo yethu yokulungisa isimo sokuntuleka kwamanzi,” kusho uNkk Dube-Ncube.

UNkk Dube-Ncube uthe yize bezothola usizo kuhulumeni kazwelonke kodwa usanxusa ukuthi abantu bonge amanzi.

Ukukhonjwa kweKwaZulu-Natal njengendawo eyehlelwe yinkinga kulandele ukumenyezelwa komkhandlu waseHarry Gwala njengendawo yokugcina ekhahlanyezwe yisomiso.

Idamu laseXobho eliseHarry Gwala kuthiwa amanzi khona asengaphansi kuka-30%.

Izindawo eziphazamisekile eXobho, kubalwa iMorningside, neFairview.

Kubikwa ukuthi ngisho nezibhedlela kule ndawo azisakwazi ukusebenza kahle.

UNkk Dube-Ncube uthe kwezinye izifunda sekuqaliwe ukunqanyulwa kwamanzi izikhawu eziningi ukuze kongiwe amancane asele.

Uthe le nkinga izoqhubeka njengoba isomiso siqhubeka nokuhlasela isifundazwe.

“Siyanxusa ukuthi kongiwe iziphethu njengoba isomiso sihlasele. Sizohlangana maduzane nobuholi bukazwelonke njengoba sekuzoba nenhlekelele,” usho kanje.

Uthe ziyaqhubeka nezinhlelo zokuthi kuhlanzwe amanzi olwandle ukuze kuphuzwe wona njengoba le nkinga iqhubeka.

“Siyaqhubeka sikhuluma noMgcinimafa mayelana nendaba yokuthi kutholakale imali ukuze kuhlanzwe amanzi olwandle aphuzeke. Siyanxusa ukuthi amanzi ongiwe ngoba eBallito, Mvoti nakwezinye izindawo amanzi aseyanqanyulwa njalo ngosuku,” usho kanje.

Kwezinye izindawo kuthiwa amanzi anqanyulwa kusuka ekuseni kuze kube intambama.

Kuphoqeleka ukuthi kungenelele uNdunankulu waKwaZulu-Natal uSenzo Mchunu emphakathini waseMbabazane.

CELANI SIKHAKHANE

KUPHOQELEKE ukuthi kungenelele uNdunankulu waKwaZulu-Natal uSenzo Mchunu emphakathini waseMbabazane ovuke umbhejazana wavimba ongqongqoshe besifundazwe abebehambele khona ngokohlelo i-Operation Sukuma Sakhe.

Ongqongqoshe kuthiwa bangene kanzima kuleya ndawo ngemuva kokuthi kugcine sekulandwa amaphoyisa abhekene nokulawula udweshu aseMgungundlovu nawaseMnambithi.

Lo mbhikisho uqale ngeledlule lapho umphakathi uphazamise ukuhambela kwamalungu ekomiti lezokuBusa nokuBambisana neziNdaba zoMdabu ePhalamende, abehambele eMbabazane ngenxa yolaka kukhalwa ngokuthi sekuphele isikhathi eside amanzi engafakwa.

NangoLwesithathu kuvele ukuthi bekusakhalwa ngawo amanzi nezindlu zomxhaso okuthiwa kade kwathenjiswa kodwa kwagcina sekuphuma umyalelo wokuthi ngeke zisakhiwa.

“Abantu bavale umgwaqo omkhulu eMbabazane okuyiwona ongenela kuzona zonke izindawo ezahlukene kubalwa nakwamasipala. Bebevale behlukene izigaba ezintathu okwenze kwaba nzima ukuthi izimoto zongqongqoshe zingene. Kusize ukufika kwamaphoyisa abesebiziwe ukuba azolawula isixuku ukuze ithimba longqongqoshe likwazi ukungena. Kuthe uma sebedlulile kwase kuqhamuka izimoto zeMeya uNkk Phindile Strydom nezikaNdunankulu uMchunu. Ulaka lwabantu lube seluqala phansi kwasiza khona ukuthi undunankulu ehle emotweni akhulume nabo,” kusho omunye wabaholi obebukela.

Okhulumela uNdunankulu uMnuz Sibusiso Magwaza, uthe nakuba ulaka belukhona ebantwini kodwa bamlalelile uMchunu wabathembisa nokuthi uzozibophezela ekutheni abuye ngoNovemba 20, ezobheka isimo ukuthi izikhalo zabo ziyalungiswa yini.

“Okunye esifisa kucace wukuthi abekho abantu abalimalile laphaya njengoba sekukhona amahlebezi anjalo kodwa abantu bebevale umgwaqo okuyiwona wodwa osuka eMtshezi uyongenela eMbabazane. Ngenxa yokuthi isimo besishubile, kuphoqeleke ukuthi uhlelo lukaNdunankulu i-Operation Sukuma Sakhe obekumele luphothulwe ngehora lokuqala, lugcine seluphothulwa ngehora lesihlanu ntambama,” kusho uMagwaza.

Okhulumela amaphoyisa KwaZulu-Natal uMajor Thulani Zwane ukuqinisekisile ukuthi kube nombhikisho kwaze kwajutshwa amaphoyisa ukuba ayoqapha isimo eMbabazane.

Abantu baseMbabazane bakhononda ngokuthi amanzi ababethenjiswe wona nompompi awakaze angene emzini yabo kodwa kade kwaphothulwa ukufakwa kwamapayipi.

Isilo samaBandla sesikhale ngokuxhaphaka kwamathaveni emphakathini sathi abulala isizwe samaZulu.

MHLENGI SHANGASE

ISILO samaBandla sesikhale ngokuxhaphaka kwamathaveni emphakathini sathi abulala isizwe samaZulu.

IMbube ithe kusamele libizwe ibhodi elilawula utshwala ukuze kubhungwe ngendaba yokwakhiwa kwesizwe.

“Ake nihlukane nezidakamizwa, niyabona amathaveni, eyi, ubani lo ngqongqoshe umnyango wakhe okhipha la mathaveni? Kukhona ibhodi yotshwala, kusadinga ukuthi kuxoxiswane nayo. Makhosi, madodana ami kuzomele sihlangane siyikhulume le ndaba, ke siyibize le bhodi yotshwala sizokhuluma nayo ukuthi ingabe isakha sona isizwe samaZulu noma iyasibulala. Angikaze ngiwabone amathaveni angangemiphumela ka-matric. Angikaze ngiwabone selokhu ngazalwa impela,” kusho iSilo.

IMbube ikusho lokhu izolo ngesikhathi igcoba Inkosi yamaQadi uMqoqi Bernard Ngcobo eMzinyathi.

“Noma kunomncintiswano mhlawumbe bayabalelwa ukuthi kumele baqede abantu abangaka, babulale abantu abangaka ezigodlweni ngoba isizwe siyabulawa uma kuphuzwa utshwala ngokungahlelekile ngoba sizongena ezidakamizweni. Kukhona abantu abaphuza kula mathaveni ebusuku, baphihlizwe zimoto abanye bagwazwe awufici amakhehla ufica izingane laphaya kumathaveni,” kuqhuba iSilo.

Sithe yize kunentando yabantu kodwa akungenziwa lokho ukuqeda isizwe samaZulu. Sithe ngonyaka ozayo kuzoba nochungechunge lwemigubho yeminyaka engu-200 iLembe labumba isizwe samaZulu.

Sinxuse amabutho ukuthi avunule, athenge izihlangu atshengise umhlaba eviliyela ukuthi isizwe sibumbene.

“Sizophuma siviliyele sigcwale zonke izinkalo sigubha le minyaka engu-200 kwabunjwa isizwe. Akuhlaselwa muntu kodwa sifuna ukutshengisa umhlaba ukuthi isizwe samaZulu sibumbene. Nezintombi siyazidinga ukuthi zihlobe zeseke lo mgubho,” kuqhuba iMbube.

Sinxuse ubumbano esizweni sathi uZulu kumele uphume ngobuningi weseke neminye imigubho efana nowaseSandlwana ongoJanuwari 22 ngonyaka ozayo noMkhosi woSelwa ongoDisemba 24 nonyaka.

Sibalule nokuthi imicimbi kaZulu kumele ibe sezingeni lobukhosi.

Inkosi yesizwe sakwaButhelezi, uMangosuthu income iqhaza lenkosi uNgcobo ekulweleni isithunzi sobuholi bomdabu.

UNgqongqoshe wezokuBusa ngokuBambisana neziNdaba zoMdabu, uNkk Nomusa Dube-Ncube, uthe kulo nyaka kugujwa iminyaka engu-15 kwaba nesakhiwo sobuholi bomdabu ngaphansi kukahulumeni wentando yabantu.

Inkosi Ngcobo ithathe izintambo zobukhosi ngo-2003 kanti ibonge iSilo yasixoshisa ngesilwane.

Baphelezelwe ngenhlamba namagama alumelayo ababili abagwetshwe odilikajele abayisikhombisa neminyaka engu-20.

NONTUTHUKO NGUBANE

BAPHELEZELWE ngenhlamba namagama alumelayo ababili abagwetshwe odilikajele abayisikhombisa neminyaka engu-20 ngamacala okuqotha amalungu omndeni ayisishiyagalombili eMsinsini, eMthwalume.

UThulani Donatus Mncwabe (28) noSibonelo Eric Mncwabe (26) abazange bakhombise imizwa yabo ngesikhathi begwetshwa enkantolo eNkulu yaseMgungundlovu izolo.

Bazivumele amacala okubulala umndeni kayise wabo omdala bewusola ngokuthakatha.

Emuva kokuba ijaji uJacqui Henriques ehlise isigwebo, bavele basuka ebhokisini labasolwa baqonda esitokisini.

Amalungu omndeni owabulawa nomphakathi obuthamele icala ahlulekile ukuthula abachapha ngenhlamba abanye bebuza ukuthi kungani benze lokhu.

“Hhawu Thulani! Hhawu Sbo, kodwa mzala, usungaze ubabulale bonke pho, kungani?”Abanye bathe: “Hambani niyofa zinja ndini”.

Abasolwa bebezimboze ubuso ngamajakhethi abebewagqokile, bengafuni ukushuthwa ngabezindaba.

Ngesikhathi kwehliswa isigwebo bebelokhu befake amakhanda phansi bahluleka nawukubuka ijaji nomphakathi obugcwele inkantolo.

Bahlanza konke ngokwenzeke ngo-Okthoba 20 nonyaka kwaMncwabe. Bevuma icala ngoLwesithathu batshele inkantolo ukuthi umfowabo kayise omdala, uMnuz Mantinga Mncwabe (70), babona ukuthi uyathakatha emva kokuba ebatshele ukuthi abangalivali ithuna kushone umfowabo uMthokozisi ngoMeyi nonyaka.

Emva kwalokho kwashona ilungu lomndeni elineminyaka engu-10 babona ukuthi uMantinga nomkakhe uShonisile (60) bathakatha umndeni.

Bathi mhla behlasela babehlome ngocelemba. Bafica indlu kaMantinga ikhiyiwe bayishisa ukuze aphume. Kwathi uma evula umnyango bamgenca. Kwabe sekuqhamuka abazukulu bakaMantinga bamemeza amagama ababulali.

Lokhu kwaholela ekutheni babalandele abazukulu ababengene kwenye indlu okwakulele kuyona amanye amalungu omndeni babagenca.

Kulesi sehlakalo kwagcina kubulewe uPhindile (35), Philasande (1), Amahle (3), Amanda (15), Aphiwe (3) no-Andile (1). Oyedwa wabaleka, omunye usesimeni esibucayi esibhedlela kanti omunye wasinda wahlala nezidumbu kwaze kwafika amaphoyisa.

Ijaji uHenriques ekhipha izigwebo uthe babulale abantu abangenacala ngenxa yenkolelo yabo ngokuthakatha.

“Naba nesihluku esimangalisayo nibulala abantu abangenacala. Uma nanisola uMantinga ngokuthakatha kungani amalungu ayisikhombisa angenacala nangangene kulokhu nawabulala ngesihluku esingaka. Kumele sithumele umyalezo ocacileyo emphakathini ukuze nabanye abasacabanga ukubulala abantu bebasola ngokuthakatha bangakwenzi lokhu ngoba bazojeziswa kanzima,” kusho uHenriques.

Ijaji liphinde lachaza ngesimo sezidumbu zababulawa.

“Umbiko kadokotela uveza ngokusobala ukuthi babulawa ngesikhulu isihluku. UMantinga wayefakwe kuplastiki ngoba sonke esingezansi sasingekho. UShonisile nezingane bagencwa kanzima emakhanda,” kusho uJaji Henriques.

Uthe uzobagweba iminyaka engu-20 ecaleni lokubulala uMantinga ngoba babemsola ngokuthakatha kodwa ngeke abaxolele kudilikajele kwamanye amalungu omndeni abulewe ngaphandle kwesizathu. Isigwebo seminyaka engu-20 sizohambisana nodilikajele.

Useqashwe osonhlalakahle owesifazane ozame ukuzibulala emva kokusabalala kwe-video enqunu ebhaxabulwa abasebenzi basesitolo ababemsola ngokweba.

MLUNGISI GUMEDE

USEQASHWE osonhlalakahle owesifazane waseNkongolwane eVryheid ozame ukuzibulala emva kokusabalala kwe-video enqunu ebhaxabulwa abasebenzi basesitolo ababemsola ngokweba eminyakeni emithathu edlule. UNksz Siphesihle Khoza (21) washaywa abasebenzi basesitolo ngo-2012, emva kokubanjwa eba kodwa i-video eyaqoshwa ngomakhalekhu-khwini ngesikhathi eshaywa isatshalaliswe ezinkundleni kufacebook ngenyanga edlule.

Lena yivideo yesithathu eqoshwe eNquthu egcina isisabalala ezinkundleni zokuxhumana lapho kusuke kushaywa khona abantu ngesihluku.

Ngonyaka odlule, owesifazane wakule ndawo wabhaxabula umfundi kanzima ngoba emsola ngokujola nesoka lakhe.

Ngenyanga edlule, omunye futhi wesifazane wakule ndawo, ubonakale enkundleni yezokuxhumana ebophele owesilisa esigxobeni emxebula ngenduku, umsolwa ubonakala efake isibhamu enqulwini.

Kulesi sehlakalo sakamuva, kubonakala abasebenzi basesitolo bexebula ngebhande uNksz Khoza bemgijimisa isitolo sonke kukhona abathengi.

Engxoxweni neSolezwe, uNksz Khoza ukuqinisekisile ukuthi uqashwe osonhlalakahle kulandela ukuzama ukuzibulala emva kokubona ivideo enqunu eshaywa esitolo ngo 2012.

Uthe usephenduke inhlekisa ngakubo abantu uma bembona bavele bahleke kusukela kuphume i-video ekuqaleni kuka-Okthoba.

Isolezwe linayo le-video ekhombisa uNksz Khoza ebhushuzela eshaywa ekhala ubumaye esitolo.

UNksz Khoza uyavuma ukuthi weba esitolo, wengeza ngokuthi ubejwayele ukuntshontsha esemncane benosisi wakhe. Uthe wayeno 17, ngesikhathi eshaywa.

“Ngiqale ukubona le-video ngo-Okthoba 6, ngabe sengiyovula icala emaphoyiseni,” kusho uNksz Khoza.

Uthe abantu abaningi ngakubo banayo i-video.

Unina kaNksz Khoza, uNkk Fakazile Khoza uthe lumphethe kabi udaba lokufakwa kwendodakazi yakhe kuFacebook ishaywa inqunu njengoba isifuna ukuzibulala.

“Ingane ithathwe osonhlalakahle emva kokuzama ukuzibulala, kulandela ukuvela kwe-video inqunu ishaywa,” usho kanje.

UNkk Khoza uthe bafuna bajeze abasolwa ngesenzo sabo.

Okhulumela amaphoyisa KwaZulu-Natal uMajor Thulani Zwane uthe sikhona isigameko esenzeka ngoSepthemba ngo-2012, lapho owesifazane washaywa esitolo emva kokubanjwa entshontsha.

“Washaywa wakhunyuliswa, uthukile esebona ivideo. Kuboshwe abasolwa abahlanu,” kusho uZwane.

Ukuba nezindaba ezinohlonze ephephandabeni Isolezwe kwenza owesifazane waseClermont waqambe ingane yakhe ngalo isesesiswini.

ZANELE MTHETHWA

UKUBA nezindaba ezinohlonze ephephandabeni Isolezwe kwenza owesifazane waseClermont waqambe ingane yakhe ngalo isesesiswini, ayikhulelwa kusungulwa leli phephandaba.

UNkk Nonkongozelo Jikazi (37), ngoLwesihlanu wenzele indodakazi yakhe uSolezwe Jikazi (13) umcimbi wokugubha usuku lokuzalwa. Ubehlele ukumenzela umcimbi esikoleni sakhe eZakhele Primary School kodwa kwakhinyabeza wukuthi sekuqalile ukubhalwa kokuphela konyaka.

NgoLwesihlanu othisha bakaSolezwe basheshe bamdedela ukuze ayogubha usuku lokuzalwa ekhaya. Umndeni wakhe wehluleka nokufihla injabulo ngokuvakashelwa yileli phephandaba.

UNkk Jikazi uthi kade kwaba yisifiso sakhe ukuthi indodakazi ivakashele emahhovisi ephephandaba athi ungumlandeli omkhulu walo. Ngenxa yokungatholi isikhathi ubone kuyithuba elihle ukuthi alimemele emcimbini wosuku lokuzalwa kwendodakazi yakhe njengoba naleli phephandaba lineminyaka engu-13 nonyaka.

“Ngangikhulelwe Isolezwe lisungulwa wonke umuntu ekhuluma ngalo. Belingangiphuthi iphepha kube yimina engixoxela nabanye ngezindaba ezibhalwe kulona. Bekuthi noma kwenzeke isigameko ngigijime kuqala ngiyozwa ngaso ngixoxele nabanye,” usho kanje.

Uthi ngenxa yokuthanda izindaba omakhelwane bagcine bembiza ngoSolezwe.

“Ngasho ngisakhulelwe ngathi indlela engilithanda ngayo leli phephandaba, ingane yami ngizoyiqamba ngoSolezwe. Ayekhona amanye amagama kodwa ngakhetha lona futhi lachuma ngoba ulisebenzisa ngokusemthethweni. Engikujabulelayo wukuthi wuyena yedwa onaleli gama ngisho kule ndawo bamazi ngalo,” usho kanje.

UNkk Jikazi uthi ngesikhathi eyobeletha udokotela wahleka emtshela igama lengane afika esibhedlela evele esenalo emqondweni. Uthi udokotela wathi akobuya azomkhombisa indodakazi yakhe uma isikhulile abone ukuthi izobe isalithanda yini leli gama.

USolezwe unguzinyo bulala kulo mndeni njengoba unina ethi indodana yakhe yashona ngo-2007 yona eyiqambe ngoDaily News.

USolezwe ofunda uGrade 8 uthi abangani abambiza ngoSo, bahlale bembuza ukuthi lisho ukuthini igama lakhe elingajwayelekile.

“Umama wangichazela ngokungiqamba kwakhe ngaleli gama futhi ngiyalithanda,” kusho yena.

Ithimba laleli phephandaba beliphethe izipho okuyisikibha nekepisi okubhalwe Isolezwe, umndeni wabonga wanconcoza.

UMengameli we-IFP inkosi Mangosuthu Buthelezi uthi uhulumeni we-ANC kumele uzisole wona ngokubhikishelwa nxazonke.

MLUNGISI GUMEDE

UMENGAMELI we-IFP inkosi Mangosuthu Buthelezi uthi uhulumeni we-ANC kumele uzisole wona ngokubhikishelwa nxazonke ngenxa yokwenza izethembiso ungazigcini.

Ekhuluma emcimbini obusenkundleni yezemidlalo eRockville, eSoweto lapho iqembu lakhe belisonga khona uchungechunge lwemigubho yalo yeminyaka engu engu-40 lasungulwa, uButhelezi uthe ukungathe-mbeki kwayo i-ANC okwenza ukuthi ibhikishelwe kangaka.

“Uhulumeni we-ANC wathembisa abafundi imfundo yamahhala, manje abafundi sebefuna ukuthi kwenzeke lokho abathenjiswa kona. Abafundi abakhulumi iphupho uma bekhuluma ngemfundo yamahhala kodwa bathenjiswa yona, uma sebebhikisha akumele bagxekwe,” kusho uButhelezi.

Uphinde wakhala ngenkohlakalo wathi iwubuyisela emuva uhulumeni.

Ukhale nangombango wezikhundla eqenjini elibusayo wathi lokho kugcina sekuphazamisa ukuhanjiswa kwezidingo ebantwini.

“Emkhandlwini waseThekwini kunezinhlelo eziningi zentuthuko eziphazamisekayo khona ngenxa yombango okhona wesikhundla sikaSihlalo we-ANC eThekwini ophakathi kweMeya uJames Nxumalo noNkk Zandile Gumede,” usho kanje.

Uthe iqembu lakhe liyadlondlobala, lokhu kufakazelwa imiphumela yokhetho yakamuva okubalwa nelokuchibiyela obeluKwaZulu-Natal.

UButhelezi ubonge abalandeli beqembu lakhe ngokuhamba naye lonke leli banga kusukela i-IFP yasungulwa ngo-1975.

“Kusukela i-IFP yasungulwa ilokhu iyikhaya elinemfudumalo eliheha bonke abadinga nabathanda ukuthula,” usho kanje.

UButhelezi ubonge uDkt Kenneth Kaunda owayengumengameli waseZambia ngokumgqugquzela ukuba asungule le nhlangano.

Uthe akangabazi ukuthi i-IFP izoqhubeka ibambe iqhaza kuhulumeni wentando yeningi, wengeza ngokuthi ikusasa leqembu lakhe lizokwakhiwa lisuselwa esisekelweni esiqinile.

“Akekho ongazi ukuthi simi endaweni yempi, iNingizimu Afrika ibhekene nomzabalazo wokulwa nobubha, ukungalingani, ukuntuleka kwamathuba omsebenzi nenkohlakalo. Konke lokhu kuyizitha zempumelelo yethu,” usho kanje.

Umholi wekhokhasi ye-IFP eGoli uMnuz Bonginkosi Dhlamini uthe bajabule futhi bayaziqhenya beyiGauteng ngokuthi kukhethwe indawo yabo kuzosongelwa kuyo imigubho yeminyaka engu-40 iqembu labo lasungulwa futhi bebungaza nempilo yomholi wabo.

“Kuningi okuyimpumelelo i-IFP eziqhenyayo ngakho, i-IFP ilokhe imile njengethuluzi ekwakheni umphakathi waseNingizimu Afrika,” kusho uDhlamini.

I-IFP isungulwe ngo 1975, KwaNzimela eNyakatho neKwaZulu-Natal uButhelezi nabanye abaholi, iningi labo elingasekho emhlabeni.

Umndeni wakwaMncwabe obungcwaba amalungu ayisishiyagalombili aqothwa yizihlobo, uzothutha kule ndawo.

ZANELE MTHETHWA

UMNDENI wakwaMncwabe ngoMgqibelo obungcwaba amalungu ayisishiyagalombili aqothwa yizihlobo eMsinsini eMthwalume, uzothutha kule ndawo ngenxa yokwesaba.

Lo mndeni ungcwabe amalungu agencwa ngo-Okthoba 20 yizihlobo ebeziwasola ngokuthakatha, ezigwetshwe odilikajele abayisikhombisa eNkantolo eNkulu eMgungungundlovu ngoLwesine.

Abangcwatshwe ngoMgqibelo nguMnuz Mantinga Mncwabe (70), umkakhe uNkk Shonisile Mncwabe (60), indodakazi uPhindile (35) abazukulu okunguNothando (15), Thobisile (12), Amahle (3), Philasande (1) noSonqoba (1).

Inkonzo obekugcwele kuyo namalungu omphakathi ezinkundleni zemidlalo kwaBiyase ibinomunyu njengoba izihlobo bezike ziqhumise isililo kuqume wonke umuntu obesetendeni. Abahlengikazi abebethunyelwe nguhulumeni bathwale kanzima betatamisa ezinye izihlobo obekubonakala seziphelelwa ngamandla ngenxa yokukhala. Omunye wesifazane ukhale waze wahlengwa wayofakwa kwi-ambulensi engasakwazi nokuzihambela.

Beziqinisiwe ezokuphepha amaphoyisa ephume ngobuningi.

Yize kugwetshwe uThulani Mncwabe (28) noSibonelo Mncwabe (26) abazivumele icala lokuqotha lo mndeni, kodwa abashonelwe bathi lokho akwenele.

Lokhu kuqinisekiswe nanguNgqongqoshe wezeMpilo KwaZulu-Natal uDkt Sibongiseni Dhlomo obemele uNdunankulu uMnuz Senzo Mchunu emngcwabeni.

UDhlomo ongomunye wabavakashela umndeni kusanda kwenzeka isigameko, uthe ubatshele ukuthi usufuna ukuthutha kule ndawo.

“Siyaweseka umndeni ekutheni usuke kule ndawo ukuze kusheshe kuphole izilonda. Sizobona ukuthi sisiza kanjani ukufeza isifiso sawo, siwuxhase nangezimpahla zokwakha,” kusho yena.

Uthe umndeni usazoqhubeka nokwelulekwa ngosonhlalakahle abakhishwe wuMnyango wezokuThuthukiswa koMphakathi oholwa nguNkk Weziwe Thusi.

“Ngeke siyeke kanje kodwa sizoqhubeka nokuba nezingxoxo nomphakathi ukuzama ukudala inhlalakahle nokuthula. Sikholwa wukuthi lesi sigameko sihambisana nenzondo ejulile okuyingakho sizothumela nosonhlalakahle bavakashele ababoshiwe ejele ukuze siqonde ukuthi isihluku esingaka sisukaphi,” usho kanje.

UMlungisi Mncwabe (32) oyindodana kaMantinga, ukuqinisekisile ukuthi inxiwa lizosala lodwa ngenxa yokwesaba.

Okhulumela umndeni uMnuz Sbu Mncwabe uthe babhekene nomthwalo onzima wokuzama ukudala uxolo emndenini ukuze kungasali inzondo nomlando omubi emndenini. Uvumile ukuthi umndeni usele nesilonda ngoba ababoshiwe basheshe bavuma amacala bengazange babhoboke.

Amalungu asondelene nababoshiwe awabonakalanga nangokhalo emngcwabeni kanti nomakhelwane bathe emzini wakhona kukhala ibhungezi.

Kuthiwa umphakathi wawufuna ukugadla kuwona ngoLwesithathu ngesikhathi kulindwe ukuthi abasolwa bavele enkantolo yeMantshi eMzumbe.

Kuthiwa uXolani owasinda kulesi sigameko uyelulama esibhedlela.

UNkk Nomusa Dube-Ncube usenxuse osomabhizinisi ukuba balekelele uhulumeni ukulwa nesomiso.

BONISWA MOHALE

UNGQONGQOSHE wezokuBusa ngokuBambisana neziNdaba zoMdabu KwaZulu-Natal, uNkk Nomusa Dube-Ncube, usenxuse osomabhizinisi ukuba balekelele uhulumeni ukulwa nesomiso.

UNkk Dube-Ncube ukusho lokhu ngomlomo womkhulumeli wakhe uMnuz Lennox Mabaso izolo egcizelela ukuthi sekusele amanzi angaphansi kuka-30% emadamini amaningi KwaZulu-Natal futhi uma imvula ingani isimo sizoqhubeka nokubheda.

Uthe yize uhulumeni kazwelonke ekhiphe u-R350million wokulwa nenkinga yesomiso KwaZulu-Natal naseFree State kodwa le mali ayenele ngoba baningi abantu abadinga amanzi.

“Kuqala ubuthola ukuthi iloli elithwala amanzi liwahambisa kubantu basemakhaya kuphela kodwa isomiso senza ngisho nezindawo zabadla izambane likapondo zintule amanzi. Imali esiyabelwe nguMnyango wezaManzi neNhlanzeko sizoyisebenzisela ukutholela abantu amanzi. Sigubha amanzi ngaphansi komhlaba (boreholes) ngoba imifula ishile, amadamu ancishelwa ngamanzi nsukuzonke,” kusho uMabaso.

Uthe uma izinkampani ezizimele zisebenzisana nohulumeni zingaqala ngokusabalalisa umyalezo wokuthi kongiwe amanzi kubasebenzi bazo nasemphakathini.

Zithwale izindleko zamaloli athumela amanzi, zisize uhulumeni ukumba amanzi ngaphansi komhlaba. Wenze isibonelo ukuthi i-borehole eyodwa ikwazi ukuhlinzeka abantu abangu-3000 ngamanzi ahlanzekile kanti ukuyimba kubiza u-R80 000.

Uphethe ngokugqugquzela abantu ukuba babike amanzi avuzayo ukuze oMasipala abahlukahlukene bezoshesha bawavale.

IMeya kaMasipala weLembe uMnuz Welcome Mdabe uthe sebesebenzise ngaphezu kuka-R15million beqasha amaloli athutha amanzi.

Ngosuku bakhokha u-R6000 kanti badinga u-R300million ukuze bazithengele ezabo.

Uthe okubakhathazayo wukuthi umfula uThukela nawo uncishelwa amanzi kanjalo neHazelmere Dam inamanzi angaphansi kuka-30% njengoba ihlinzeka izindawo ezingaphansi kweLembe nezaseThekwini.

UNgqongqoshe woMnyango wezaManzi neNhlanzeko eNingizimu Afrika uNkk Nomvula Mokonyane unxuse abantu ukuba bonge amanzi baphinde bakhuleke ukuze imvula ine wathi ngisho abelaphi bomdabu kumele baqale beze nemizamo yokubiza imvula.

Uthe bazoqhubeka nokuxoxisana namazwe angomakhelwane abale kuwo iLesotho ukuze ezoqinisekisa ukuthi iNingizimu Afrika inamanzi enele. Izolo iphephandaba i-The Mercury libike ukuthi abantu baseNingizimu Afrika sebezokhokha imali ethe xaxa uma bethenga ukudla kwazise isomiso senze ukuthi kungatshaleki ezinye izitshalo.

UMnuz Christo Joubert weNational Agricultural Markerting uthe bajwayele ukukhiqiza amathani angu-9 kuya ku-10 million ombila kodwa ngenxa yesomiso sincane kakhulu isivuno salo nyaka.

Uthe amanani okudla azonyuka ngenxa yokuthi abalimi kabanawo amanzi.

Uveze ukuthi kunombila owenele ozohlala kuze kube nguJulayi kodwa kuzocaca kahle uma sebevunile ngoJanuwari.

UMnyango wezoLimo, amaHlathi nokuDoba uveze ukuthi abalimi bazotshala kancane izitshalo zemali okubalwa umbila omhlophe, sunflower, soya beans, ground nuts, amabele nobhontshisi owomile.

Abazifela ngewayini nabo kumele balindele ukuthi amanani alo azonyuka kwazise abe-AgriSA babika ukuthi amagrebhisi athikamezekile ngenxa yesomiso.

Babhodla umlilo abahlali basemijondolo esePuntan’s Hill, eSpringfield, eThekwini ngekhansela abathi libaqashisa imijondolo.

S’MANGELE ZUMA

BABHODLA umlilo abahlali basemijondolo esePuntan’s Hill, eSpringfield, eThekwini ngekhansela abathi libaqashisa imijondolo.

Laba bahlali bavuke umbhejazane ngeSonto ngenkathi bevinjwa ngonogada bakamasipala ukwakha ngenkani imijondolo kule ndawo.

Yize bebevinjwa kepha izolo babhushe ihlathi, bamba neziza zokwakha ngenkani kule ndawo.

Laba bathi sebekhathele yikhansela labo, uMnuz Bhekisisa Ngcobo, abalisola ngokuthi seliphenduke umasitende ngokubaqashisela imijondolo.

Bathi bakhathele wukuhlala ngokuminyana nokukhokha irenti ekubeni kukhona umhlaba ongasebenzile.

Izolo umholi womphakathi uMnuz Themba Mkhize (41) uthe akukho okuzobavimba ekutheni bakhe ehlathini ngoba sebekhathele wumasipala osubabambise udonga iminyaka engaphezu kweshumi.

“Onogada bakwamasipala abajabule ngoba sisababalekela uma sibabona kodwa mabazi ukuthi asizimisele ngokubaleka unomphelo. Ikhansela uNgcobo ngelokugcina nje ukuhamba likhuluma ngathi kwabezindaba lithi sidla umhlaba kamasipala ngoba nalo linezindaba zalo. Kweminye imijondolo eseduze eBurnwood, usanda kuvula indawo entsha yokwakha kodwa thina ngalana uthule nje,” usho kanje.

Ngesikhathi Isolezwe liye kule ndawo izolo, laba bahlali abebematasa bemba iziza bathe okubathukuthelisa kakhulu wukuthi uNgcobo akaphumeli obala ngokuthi izindlu bazokwakhelwa nini kepha ulokhu ethatha imali ngokubaqashisa imijondolo.

UMnuz Mazwi Mqadi (35) obematasa nepiki emba isiza sakhe uthe usekhathele wukukhokha irenti yingakho evume ngo-elethu uma kuqhamuka isiphakamiso sokuthi makumbiwe ehlathini, kwakhiwe ngenkani.

“Angisebenzi, okwenza ukuthi ngibikelwe njalo uma sekuzophela inyanga ngoba ngisuke ngazi ukuthi umasitende wami uzoyifuna la imali yakhe. Kade sasivinjwa ukuthi singakhi imijondolo ngoba kuthiwa kuzovimba intuthuko. Laba abadla izambane likapondo esakhe eduze kwabo mabayeke ukuthi sehlisa intengo yezindlu zabo ngoba ukwakha kwethu akuhlangene nabo. Uma benenkinga mabathuthe kule ndawo,” kusho uMqadi.

Ngesikhathi ethintwa uNgcobo uphikile ukuthi uqashisa ngemijondolo.

“Bangiqambela amanga nje laba bantu. Uyazi njengoba isimo sesisibi kangaka kuleya ndawo abantu sebezokhuluma noma yini. Ikhona imixhaso endaweni kodwa ayisabonakali ngenxa yabanikazi bezindlu abagcwalise imijondolo abaqashisa ngayo emagcekeni abo. Abaqashi abalona utaku lwethu. Sinezinhlelo zokwakhela abasala. NgoMgqibelo sizoba nomhlangano, sichazele umphakathi ngezinhlelo,” kusho uNgcobo.

Okhulumela umasipala weTheku uNksz Tozi Mthethwa uthe ngeke bakubekezelele ukudliwa komhlaba kamasipala.

“Ukukhishwa kwabantu kusuke sekuyisisombululo sokugcina esigunyazwe yinkantolo. Abasebenzi bethu bahlaseliwe bashaywa ngamatshe bezama ukususa abebakha ngokungemthetho,” kuchaza uNksz Mthethwa.

Owesilisa oshe wangqongqa ngesikhathi kuqubuka umlilo emijondolo, kuthiwa ubesephumile kodwa wabuye wabuyela ngaphakathi emjondolo ephuthuma umazisi wakhe.

BONISWA MOHALE

OWESILISA (43) oshe wangqongqa ngesikhathi kuqubuka umlilo emijondolo ekuMhlongo Road, eLamontville, eThekwini izolo ekuseni, kuthiwa ubesephumile kodwa wabuye wabuyela ngaphakathi emjondolo ephuthuma umazisi wakhe nokamasihlalisane kanti usezovaleleka wagcina ngokushona.

Kusolakala ukuthi umlilo uqalwe ngumuntu obebhema wase usha ubuhanguhangu ngenxa yomoya obuvunguza ngamandla wanabela nakweminye imijondolo eyisikhombisa kwagcina sekushone uMnuz Moses Mbambo.

Ngokusho kukaNksz Sibongile Mthimkhulu (57) obengumasihlalisane kaMbambo, uphaphanyiswe wukufudumala obese kucinanise indlu wavusa isithandwa sakhe.

“Siphume naye sekusha, asazi ukuthi umlilo uqalwe yini. Ubuye waphindela endlini ethi uyothatha omazisi bethu wangabe esaphuma ngoba amalangabi abesegqamuka kakhulu. Uphelele khona emlilweni. Angazi ukuthi ngizothathani ngiyihlanganise nani ngoba besihlala sobabili, mina ngasuka ekhaya eFikeni, kwesaKwaMthethwa ngizofuna amatoho ngapha naye wasuka le KwaQokololo ezozama impilo,” kusho uNksz Mthimkhulu.

Uthe udinga noma yiluphi usizo angaluthola ngoba usele nakugqokile, kumanje uzulelwa yikhanda ngoba ushonelwe yisithandwa sakhe abesehlale naso iminyaka emithathu.

Omunye oshelwe wumjondolo nguNksz Jabu Gasa (36) othe izingane zomfowabo azikwazanga ukuya esikoleni ngenxa yokuthi zishelwe yikho konke, kuhambe eyakhe ebiyobhala.

Uthe okwenze ukuthi kushe imijondolo eyisikhombisa wukuthi ibixhumene futhi usola ukuthi umlilo uqale kwaMbambo.

Ngesikhathi Isolezwe lifika kule ndawo omakhelwane bebemi izixongololo bebabaza isimanga abasibonile, abangani baNksz Mthimkhulu bebethwele izandla ekhanda, omunye ubekhala ethi akazi nokuthi uzomduduza athini.

Ikhansela lendawo uNksz Nolubabalo Mthembu neMeya yeTheku uMnuz James Nxumalo bazifikele mathupha ukuzobona umonakalo owenzekile.

UNxumalo uthembise ukuthi uzofihlwa ngesizotha uMbambo ngoba uMasipala unohlelo lokubhekelela izinhlekelele ezifuze lena.

“Siphatheke kabi ngokwehlele umndeni wakwaMbambo, sithi umndeni mawududuzeke uJehova awuqinise. Iminyango ehlukahlukene, owezinhlekelele nowezindlu izobheka ukuthi ibasiza kanjani abashelwe kodwa okokuqala kuzoba wusizo lwesikhashana okungukudla, izipontshi nendawo yokufihla ikhanda. Kuzothi uma kuhamba isonto abezezindlu babone ukuthi bangenelela kanjani,” kuthembisa uNxumalo.

Uthe bayazama ukwakha izindlu kodwa isibalo sabahlala emijondolo sikhulu ukudlula izindlu ngakho ucela abantu babekezele ngoba abakwazi ukwakhela wonke umuntu ngesikhathi esisodwa.

UNksz Hlengiwe Mbambo (50) ongudadewabo kamufi uthe bayabonga ukuthi uzofihlwa ngesizotha ngoba bebedidekile futhi uyethemba ukuthi nezindlu zizovuswa njengoba sekungenelele neMeya yeTheku. Amaphoyisa asaphenya ngembangela yomlilo.

Kuboshwe abasolwa abathathu omunye wabo okunezinsolo zokuthi uyiphoyisa, mayelana nesigameko sokubulawa kosomatekisi ababili.

MLUNGISI GUMEDE

KUBOSHWE abasolwa abathathu omunye wabo okunezinsolo zokuthi uyiphoyisa eGoli, mayelana nesigameko sokubulawa kosomatekisi ababili kwathi owesithathu wasinda ngokulambisa eBergville izolo, ekuseni.

Laba basolwa baboshwe nezibhamu izinombolo zazo ezixikiziwe okukhona kuzo ne-R5 emva kwemizuzu embalwa kuqhume inganono erenki eseduze nesikole iZikhali High, eSandlwana, eBergville lapho kudutshulwe khona uMnuz Simon Mcijwa Hlongwane (58) noMnuz Phiwe Kheswa (24) kwathi uNkk Tatile Zondo wasinda ngokulambisa.

UHlongwane, uKheswa noNkk Zondo kuthiwa bebehleli evenini kukhona nezinye izimoto zabalingani babo begade umsebenzi ngesikhathi kuqhamuka amadoda amabili abehamba ngezinyawo afike avulele ngenhlamvu ebhekise kubo.

Umfowabo kaHlongwane, uMnuz Bhekizwi Hlongwane naye ongusomatekisi uthe abasolwa baqale badlula nge-Corolla yabaqathaza ndawana thize kwase kubuya ababili abavele baqonda emotweni yomfowabo bafike badubula abebekuyo.

“Kuyacaca ukuthi abasolwa bebevele beqonde kubo ngoba besibaningi sigade umsebenzi sihleli ezimotweni ngoba bekubanda kodwa bavele baya emotweni yabo futhi badubule kuyona kuphela base beyabaleka,” usho kanje.

Uthe bayasola ukuthi abasolwa bebeyaleliwe ukuthi ngobani okumele babadubule.

“Into esheshe yababambisa wukuthi umphakathi uyibonile imoto abebehamba ngayo wabikela amaphoyisa ababamba athola nezibhamu kuzo okubalwa ne-R5. Lona omunye wabasolwa sizwa kuthiwa uyiphoyisa eGoli kodwa ungowaseMnambithi,” kusho uHlongwane.

UHlongwane uthe bathole ukuthi bonke abasolwa ngabaseMnambithi.

“Imoto abebehamba ngayo ibinenombolo yaseMnambithi i-NKR, ngaphakathi emotweni kukhona enye inombolo yaseGoli, siyabona ukuthi bebezama ukulahla umkhondo,” usho kanje.

Uthe usoseshini wabo ohambela ngaphakathi eBergville awunazo izinkinga ezingako ezingaze zidale ukuthi kuchitheke igazi, wengeza ngokuthi umsindo okhona ukulayini wamabanga amade oya emadolobheni ehlukene kubalwa naseGoli.

Unina kaKheswa, uNkk Melta Kheswa uthe indodana yakhe ibingesiye usomatekisi kodwa ibiserenki igade umsebenzi ngoba imele yena.

Uthe nguyena oyilungu likasoseshini waseBergville naye wangena endaweni yomyeni wakhe uMnuz Mduduzi Kheswa obulawe ngo-2013.

UColonel Jay Naicker wamaphoyisa KwaZulu-Natal uthe ukushesha kwamaphoyisa kuholele ekutheni kuboshwe abasolwa abathathu kubalwa nosolwa ngokuba yiphoyisa eGoli mayelana namacala amabili okubulala nelilodwa lokuzama ukubulala.

UNaicker uthe abantu abathathu bebehleli evenini ngesikhathi amadoda amathathu abahamba nge-Corolla evulela ngenhlamvu ebhekise kubo.

“Abesilisa ababili abebesevenini babulewe kwathi owesifazane obenabo walimala kanzima,” usho kanje.

Uthe amalungu omphakathi abikele amaphoyisa aphendule ngokushesha, emva kwemizuzu imoto yabasolwa yabonakala, kwabe sekuboshwa abathathu iminyaka yabo ephakathi kuka 23 no-27,” kusho uNaicker.

Uthe bathole izibhamu okubalwa kuzo i-9mm ne-R5 izinombolo zazo ebezixikiziwe. UNaicker uthe omunye wabasolwa ngathi uyiphoyisa eGoli.

IMeya kamasipala wasoKhahlamba uMnuz Thulani Sibeko ibonge umphakathi ngokubikela amaphoyisa asukuma ngokushesha babanjwa abasolwa.

“Lokhu ukusebenzisana okuhle phakathi komphakathi namaphoyisa esigqugquzela ukuthi kuqhubeke ukuze kuqedwe ubugebengu,” usho kanje.

Ubucabanga ukuthi kuqhuma ibhomu ngesikhathi umoya obuvunguza ngamandla ohlasele eThekwini uphephula uphahla lomuzi umndeni wakwaMabaso.

BONISWA MOHALE

UBUCABANGA ukuthi kuqhuma ibhomu ngesikhathi umoya obuvunguza ngamandla ohlasele eThekwini uphephula uphahla lomuzi umndeni wakwaMabaso, eMayville.

UMnuz Mandla Mabaso (65) uthi bebezihlalele nowakwakhe uNkk Ruth Mabaso (58) ngesikhathi bezwa umsindo omkhulu kanti sekuphephuka uphahla ngabo-4.30 ntambama ngoMsombuluko.

“Besizihlalele ntambama ngesikhathi sizwa umsindo omkhulu kungathi kuqhuma ibhomu. Besingazi ukuthi kuphephuka uphahla. Kubhodloke uphahla kwawa izitini zalimaza unkosikazi engalweni nasemlenzeni. Simphuthumise esibhedlela ngenhlanhla kwatholakala ukuthi akaphukile kodwa ube nemihuzuko bamnika namaphilisi okudambisa izinhlungu. Siqube esihlotsheni sethu ngezansi ngoba njengoba kubhodloke uphahla asinayo indawo yokulala, impahla ingaphandle sithandazela ukuthi lingani ngoba impahla yethu izokonakala,” kusho uMabaso izolo.

Uthe lifikile ikhansela lendawo lizobona umonakalo owenzekile.

Ucele ababhekelele izinhlekelele kwaMasipala weTheku ukuba babalekelele nomkakhe.

UNkk Mabaso uthe kabazi bazolalaphi izolo ngoba nesihlobo sabo sinenkosikazi nezingane besibaqubise ngoMsombuluko ngoba bexakekile.

Ikhansela lendawo uMnuz Bhekisisa Mngadi lithe lizifikele mathupha kwaMabaso emuva kokuzwa ngokwenzekile futhi libazisile abophiko lwezinhlekelele ngoba umsebenzi walo wukuhambisa umbiko emkhandlwini okuyiwona okhipha okuthile uma kwehle izigameko ezifuze lezi.

Umoya wangoMsombuluko ntambama ushiye kukhalwa eThekwini njengoba izihlahla ezindala ziwele ezimotweni, amagagasi abediniwe imikhumbi yokungcebeleka ingakwazi ukuhamba.

Nakwezinye izindawo ezingaphandle kweTheku besisibi isimo sezulu njengoba eMhlathuze umoya uphephule uphahla lwemizi engu-10, ngokusho kukaMnuz Mdu Ncalane obhekele ezokuxhumana kuMasipala waseMhlathuze.

Umoya ushiye kukhalwa eNgwelezane kwazise wone imizi nesihlahla sawela ophahleni lwesikole iSt Catherines, eMpangeni kodwa akulimalanga muntu.

Uthe izicishamlilo zihambele izigameko ezine zomlilo ngenxa yomoya obuvunguza ngamandla.

Khona manjalo ihlaliswe ehholo laseLamontville imindeni eyisikhombisa eshelwe yimijondolo ezintatha zangoMsombuluko.

Umoya obuvunguza ngamandla kuthiwa wenze kwaba nzima komakhelwane abebezama ukucisha umlilo ogcine udlule nomphefumulo kaMnuz Moses Mbambo.

Izolo umndeni kaMbambo ubuhleli ehholo nabanye abashelwe kanti iMeya yeTheku uMnuz James Nxumalo ithembise ukuthi uMasipala uzozithwala izindleko zomngcwabo.

Kuthiwa uMbambo ubeyolanda umazisi wakhe nowesithandwa sakhe ngesikhathi ehlulwa wukuphuma emlilweni washa wangqongqa kangangokuthi isidumbu sakhe sithathwe ngamaphoyisa singasabonakali.

UNksz Thandiwe Gumede oyisangoma sezulu uthe namhlanje umoya uzovunguza kodwa hhayi ngamandla amakhulu kanti ntambama uzoshintsha indlela ohamba ngayo.

Uthe ntambama umoya uzokuba namandla usuka eMargate uze uyofika eThekwini nakwezinye izindawo ezingasenyakatho.

Uphethe ngokuthi izinsiza kusebenza zabo zikhombisa ukuthi umoya uzokube unamandla kusuka namhlanje kuze kube yimpelasonto.

ULindelani Mkhize uthe empeleni uMasipala usabakweleta imali owathenga ngayo amathikithi angu-220 omcimbi abebenawo ngonyaka odlule.

FANELESIBONGE BENGU noCELANI SIKHAKHANE

IQEMBU elihamba phambili kuleli lowokholo, iJoyous Celebration, likhala ngokuthi alikaze liluthole uxhaso luka-R512 000 umbiko kaMasipala weTheku othi izoluthola ngomcimbi wokuqopha iDVD yayo eMoses Mabhida Stadium ngoDisemba 19.

Omunye wabasunguli beqembu, uLindelani Mkhize, uthe empeleni uMasipala usabakweleta imali owathenga ngayo amathikithi angu-220 omcimbi abebenawo ngonyaka odlule.

UMkhize uthe sekunesikhathi bexhumana nomasipala ngenhloso yokusebenzisana uma beza kuleli dolobha njengengxenye yemijikelezo abayenza ezindaweni ezahlukene eNingizimu Afrika. Uthe ekuqaleni konyaka bayile kumasipala ukuyocela uxhaso kodwa ubengakabuyeli kubo mayelana nokuthi uzobaxhasa yini yize sekusele isikhathi esingaphansi kwezinyanga ezimbili kube nomcimbi wabo.

“Sesikuqaphelile kusukela eminyakeni edlule ukuthi iTheku liyixhasa kanjani eminye imicimbi futhi noma lingaphoqelekile ukusixhasa, siyakholelwa wukuthi sesikwenze konke ukwakha iqembu elingakwazi ukuthi lixhaswe yiTheku. Hhayi ngoba izimpande zethu ziseKZN kodwa ngoba eThekwini sidayise wonke amathikithi angu-5 000 e-ICC izinsuku ezimbili kule minyaka emihlanu edlule, siheha izinkulungwane zabantu bakulesi sifundazwe nakwezinye izindawo kuleli,” kusho uMkhize.

Uqhube wathi: “Ngo-2014 kwaba ngathi siba nokuvumelana nomasipala ngesikhathi bebambisana nathi. Nokho baqhamuka ngomzuzu wokugcina bakhokha ingxenye yemali esaqasha ngayo i-ICC base bethembisa nokuthenga amathikithi angu-220 ngaphezu kwalawa esasizobapha wona. Yize yakhokhelwa imali yase-ICC kodwa kuze kube yimanje sisalindele inkokhelo ngamathikithi angu-220 angoJulayi ka-2014,” kusho uMkhize.

UMkhize ukhulume kanje ngemuva kokuvela kokuthi uMnuz Phillip Sithole, owengamele ezokuVakasha kuMasipala, uphakamise ukuthi umcimbi wokuqoshwa kweDVD ka-Andile KaMajola eMoses Mabhida Stadium ngempelasonto kumele uxhaswe ngo-R1.5 million.

Kuvele nokuthi i-INK Hop Festival ebiKwaMashu ngempelasonto lapho kufike khona idlanzana labantu ixhaswe ngo-R300 000, iLadysmith Black Mambazo yona inikezwe u-R150 000 njengoba izobe igubha iminyaka yasungulwa ngoDisemba 3 kuthi iDurban Underground kaDJ Sox izonikwa u-R100 000 neminye imicimbi.

Ngokombiko kamasipala iJoyous Celebrations nayo ezobe iqopha iDVD yayo neCD , endaweni efanayo nekaMajola, kuphakanyiswe ukuthi ixhaswe ngo-R512 000.

Umcimbi weJoyous Celebrations uzobe usakazwa bukhoma ku-SABC1.

USithole phambilini wathi angeke bawuqhathanise umcimbi kaMajola noweJoyous.

“Kufana nokuthi lapho ubuza umasipala ukuthi kungani exhase umdlalo wamanqamu weKaizer Chiefs ne-Orlando Pirates ekubeni amanye amaqembu abenomdlalo ofanayo enikwe imali encane. Okunye uma sixhasa umuntu sibheka umlando njengoba sibonile ukuthi iJoyous Celebration sike sayixhasa phambilini ngesikhathi icula e-ICC,” washo kanje uSithole.

Kuleli sonto uSithole uphendule wathi uxhumene noMkhize ngoMsombuluko nge-email baxoxisana ngalolu daba .

“Besingeke sikwazi ukubuyela kuye ngaphandle kwesinqumo somkhandlu. Njengoba wazi isinqumo sithathwe ngoLwesithathu olwedlule. Angeke ngingene kwisamba semali singakabi nomhlangano nabaphathi bomcimbi. Mayelana namathikithi angonyaka odlule ngizokwenza uphenyo ukuthi kungani engakhokhelwe. UMasipala weTheku uyakuthokozela ukuba khona komcimbi yingakho uthathe isinqumo esibavunayo kulolu daba. Khona maduze sizokhipha isitatimende esiphelele ngokuhlanganyela nabo abadidiyeli bomcimbi,” kusho uSithole.