Uvukwe umunyu wahluleka ukuqhubeka nokufakaza, wakhala owesifazane oshade noyise wentombazane eyahushulwa amathumbu.

BAWINILE NGCOBO

UVUKWE umunyu wahluleka ukuqhubeka nokufakaza, wakhala owesifazane oshade noyise wentombazane eyahushulwa amathumbu ngesitho sangasese yizihlobo zayo zithi ziyikhipha amadimoni, eMlazi kwa-J ngo-2012.

UNkk Nonhlanhla Faku oshade noyise kaSnethemba Dlamini (14) owashona emuva kokuhushulwa amathumbu ngesitho sangasese ubefakaza eNkantolo ePhakeme eThekwini izolo.

UNksz Fundiswa Faku noNkk Lindelwa Jalubane okungo-anti bakaSnethemba nabazala bakhe uNksz Nokubonga noMinenhle Jalubane babhekene necala lokumbulala ngoMashi 2012.

Ngesikhathi ethula ubufakazi uNkk Faku uveze ukuthi ezinsukwini ezimbili ngaphambi kokwabulawa ngalo uSnethemba wayeqale ukukhulekelwa ngoba ethe unamadimoni.

Ngesikhathi ethula ubufakazi uveze izinto ezishaqisayo ezenzeka ngesikhathi kukhulekelwa le ntombazane.

Echaza ngosuku lwangoLwesihlanu okwahushulwa ngalo amathumbu kaSnethemba uthe ngayizolo kwakukade kufike amakholwa amkhulekela waze wathi naye uzizwa engcono ngakusasa waya esikoleni.

Uchaze izinto eziningi ezishaqisayo athe zenzeka ngaphambi kokuthi ahushulwe amathumbu.

Phakathi kwezinto aziballile kube wukushiswa kwamakhadi okudlala nama-sim card ngoba kuthiwa anezinombolo amadimoni ayesebenza ngazo.

USnethemba kuvele ukuthi wake wazama nokubaleka kodwa wafica kukhiyiwe emnyango wasekhishini, uNksz Faku noNkk Jalubane bamjaha bambuyisela ekamelweni.

Uthe uNksz Faku wabuza uSnethemba ukuthi ikuphi i-code wabuza ukuthi enze njani. USnethemba kuvele ukuthi wayikhomba kuye ngaphakathi i-code wathi kumele bakhumule noNksz Faku base bedansa, uSnethemba ecula into engazwakali.

Uthe kwaqala kwashuba uNksz Faku ethi usezokhipha amadimoni kumufi, wamcela i-code ayisebenzisa emkhathini. Uthi kwathi uma engasho lutho wamshaya ephindelela ngento yoku-ayina okhola bamashethi embamba izingubo zaze zadabuka.

Uthe ngesikhathi uNksz Faku esethi ukhipha uSnethemba amadimoni waqale wamshaya ngezimpama nange-aerial ye-TV, uSnethemba waphindisela balwa kodwa umufi wagcina ekhathele walala ngesisu.

Uthe uNksz Faku watshela abanye abasolwa ukuthi ababambe uSnethemba yena ebe eguqile eduze kwakhe ebheke ngasezinyaweni.

“Wacela ummese wabe esebuzwa ngusisi wakhe ukuthi uzowakhipha kanjani amadimoni ngommese kodwa wangaphendula wafaka izandla zakhe zombili phakathi kwasesithweni sangasese nendawo yokulahla itshe lentaba wadonsa ehlukanisa. Ngezwa kuqhuma kwavuleka kwabonakala ngaphakathi,” kuchaza uNkk Faku.

Uthe ngalesi sikhathi uSnethemba wayekhala ethi angawakhiphi kanjalo amadimoni.

Utshele iNkantolo ukuthi uNksz Faku akalalelanga ukukhala kukaSnethemba waqhubeka wafaka isandla kule ndawo eyayisivulekile, wadonsa wabuya namathumbu.

Uthe ithumbu uma liphuma ubelibopha ifindo aphinde adonse, abophe ifindo.

UNksz Faku akakwazanga ukuqhubeka ngenxa yokukhala. Ijaji uMnuz Phillip Nkosi liphoqeleke ukuba lilihlehlisele olwanamuhla icala. Ijaji lithe yize kubuhlungu kodwa inkantolo ifuna ukuzwa okwenzeka.

Basagcwele amathafa abasolwa ababili abadle phansi ngeveni yamaphoyisa emini kabha besuka lapho kade bebamba khona inkunzi.

BAWINILE NGCOBO

BASAGCWELE amathafa abasolwa ababili abadle phansi ngeveni yamaphoyisa emini kabha besuka lapho kade bebamba khona inkunzi emuva kokuthi amaphoyisa eyishiyile ajaha ngezinyawo abanye abebebamba inkunzi e-Overport ngoLwesibili.

Akucaci ukuthi abasolwa bazithole kanjani izikhiye zokudumisa le veni, noma amaphoyisa abezishiye phakathi evenini yini izigilamkhuba zase zibona ithuba zabaleka ngayo.

Kuthiwa ngoLwesibili ngezithuba zawo-12 emini amaphoyisa aseMayville abizwe emzini othile emgwaqweni uHarbottle e-Overport ngoba kubanjwa inkunzi.

Ngesikhathi amaphoyisa efika kule ndawo azithele phezu kwabasolwa ababili bephuma endlini obekubanjwa kuyo inkunzi, akwazi ukubamba umsolwa oyedwa.

Isalukazi esineminyaka engu-84 kanye nendodakazi yaso bahlangulwe amaphoyisa basinda kubahlaseli. Amaphoyisa ehlelwe yilo mshophi ngoSergeant Rajendra Seetha nozakwabo uConstable Emmanuel Sosibo.

Okhulumela amaphoyisa KwaZulu-Natal uMajor Thulani Zwane, uthe abasolwa badubule babhekisa ngasemaphoyiseni ngaphambi kokuthi babaleke ngezinyawo bashiye imoto iMercedes Benz abebehamba ngayo.

Uthe ngesikhathi amaphoyisa ejaha laba basolwa ngezinyawo abanye ababili abebesengaphakathi endlini kuthiwa baphumile bangena evenini yamaphoyisa ebisemnyango bashaya bathicha ngayo ngaphandle kokubuza.

“Amaphoyisa athole le moto isishiywe kanjalo eValley View, eMorningside, eThekwini lapho kuthiwa laba basolwa badune imoto i-Opel Corsa,” kusho uZwane.

Uthe umsolwa oyedwa oboshiwe uzobekwa icala lokubamba inkunzi, ukuzama ukubulala nokweba imoto njengoba kutholakale ukuthi imoto abebezobamba ngayo inkunzi ibidunwe eMorningside.

Emotweni yabasolwa kuthiwa kutholakale ama-TV amabili okusolwa ukuthi bebewebe eMbilo phambilini. Enye i-TV abebeyithathe eMayville nayo itholakele.

Kuphinde kwatholwa amathuluzi okugqekeza emotweni yabo okukholakala ukuthi yiwo asetshenziswayo uma kugqekezwa emizini yabantu nokugqekeza izimoto.

UZwane uthe amaphoyisa asezithendeni zabasolwa abasagcwele amathafa.

UKhomishana wamaphoyisa KwaZulu-Natal uLt General Mmamonnye Ngobeni uthe lo msolwa oboshiwe kuzobhekwa ukuthi akathinteki yini kwamanye amacala okubamba inkunzi ezindaweni eziseThekwini.

Uthe banethemba lokuthi bazobabamba maduze abasolwa ababalekile. Indodakazi yomuzi obuhlaselwa eneminyaka engu-35 ecele ukungadalulwa ithe sekungokwesibili umuzi wakubo ungenelwa izigebengu kulo nyaka. Uthe isigameko sangoLwesibili senzeke ngokuphazima kweso.

Bamisiwe abafundi abathathu baseVukuzakhe High eMlazi ababonakala kwi-video esabalele kuFacebook betitinya omunye umfundi.

MHLENGI SHANGASE noBONISWA MOHALE

BAMISIWE abafundi abathathu baseVukuzakhe High, kwa-L eMlazi ababonakala kwi-video esabalele ezinkundleni zokuxhumana uFacebook betitinya omunye umfundi ezindlini okuhlala kuzona abafundi kulesi sikole.

Lesi sehlakalo okuthiwa senzeke nyakenye ngoSepthemba siqoshwe kwi-video eveza umfundi eshaywa ngezimpama ezevile ku-10.

Umfundi wakwa-Grade 8 owayeqhunyiswa ngezimpama ngumfundi wakwaGrade 10, usathuthumela ngenxa yalesi sehlakalo.

Izolo i-video isabalele kule nkundla abantu bezwakalisa ukushaqeka ngayo. Abanye bebefunga begomela bethi izingane zabo ngeke besaziyisa kuma-boarding school.

Kule video edlala imizuzu emibili, kuvela umfundi eshaywa ngomunye, omunye ogqoke izingubo zokulala eme eceleni. Umfundi ubeshaywa ngoyaba lwezimpama alandeliswe ngonyawo esiswini kanti ubelokhu echiphize njalo.

Isolezwe lilalele le video kanti umfundi obeshaya ubelokhu embuza ukuthi kungani engezanga ngesikhathi embiza.

“Awuzanga ngani ngikubiza, ngimbize u-Anathi azosho ukuthi wathini wena. Angithi wathi “whee”. Ngifuna uziphendulele usho ukuthi wathini,” kusho umfundi oshaya omunye ngempama.

Oshuthayo unanela ngokuthi “ngabe sengikhulumile mina, ngeke izimpama ezingaka,” bese eyahleka abuze ukuthi ashuthe kanjani njengoba sekumnyama.

Ngesikhathi Isolezwe liye eVukuzakhe High School izolo, uthishomkhulu ubesemhlanganweni nabazali, akucaci noma bekudingidwa lolu daba noma ezinye izinkinga zakhona njengoba kuthiwa othisha abangu-20 ababeqhinqe emahhovisi omhloli ngonyaka odlule bafudukele kwezinye izikole kwase kulethwa abasha.

Abanye abangathandanga ukudalulwa bathe kushayisa amakhala ukuputshuka kwe-video manje ekubeni isigameko senzeka ngonyaka odlule.

UMnuz Isaac Luthuli okhulumela uNgqongqoshe wezeMfundo KwaZulu-Natal, uNkk Peggy Nkonyeni, uthe lusezithebeni zabo udaba lwe-video kangangoba ngoLwesibili kube nomhlangano wabazali noMnyango.

Kube neziphakamiso ezizodingidwa namhlanje yisigungu esengamele isikole, abazali naboMnyango wezeMfundo KwaZulu-Natal ezizocacisa ngesijeziso sabafundi.

“Sinxusa abazali ukuba babike izigameko zokuhlukunyezwa kwabafundi ezikoleni ngoba umfundi oshayiwe ubengakalutholi usizo lokwelulekwa ngokwengqondo kanti ukube sisheshe saziswa ngalo ngabe silusukumele. UNgqongqoshe uyayizonda le nto eyenzekile, uyethemba ukuthi ngeke iphinde yenzeke,”kusho uLuthuli.

Uthe nabezindaba kufanele babike ngezigameko zokuhlukunyezwa kwabafundi ukuze siphele isihlava esibi.

UMnuz Nhlanhla Nene wehlise amaphaphu kubasebenzi bahulumeni abashiya emsebenzini ngoba befuna ukuthatha imali yabo yempesheni.

MHLENGI SHANGASE

UNGQONGQOSHE weziMali, uMnuz Nhlanhla Nene, (osesithombeni) wehlise amaphaphu kubasebenzi bahulumeni abashiya emsebenzini ngoba befuna ukuthatha imali yabo yempesheni wathi izinguquko eziphakanyiswayo ngeke zibathinte.

UNene uthe abasebenzi bayeka ngoba behaqwe yizikweletu bese bethatha imali abanye basuke besatshiswa ngezinguquko okuthiwa ziza nohlelo olusha lwezempesheni kahulumeni iGovernment Employees Pension Fund. Kusukela kube nezinkulumo zokuthi abasebenzi ngeke bayithole yonke impesheni yabo uma beshiya emsebenzini emuva kukaMashi 1, iningi labo okungabakahulumeni okuhlanganisa othisha namaphoyisa bayasula ukuze bathole yonke impesheni yabo.

Lesi simo sigcina sesikhinyabeza uhulumeni ngoba kwezinye izikole izikhala zothisha abashiya azikavalwa kokunye kuthatha isikhathi ukuba zivalwe. Kwezinye iziteshi zamaphoyisa njengaseManzimtoti kushiye inqwaba yamaphoyisa izikhala zawo ezingakavalwa ngenxa yokusaba ukuthi uma kushaya uMashi 1 ngeke ayithole yonke imali yawo yempesheni. Nasemnyangweni wezeMpilo yiso leso abahlengikazi nabasebenzi bashiya mihla namalanga.

“Ngifuna ukuqinisekisa abasebenzi ukuthi iziphakamiso ezikhona ezimpeshenini ngeke zize zibachaphazele. Ngiyaphinda futhi ngiyaxwayisa ngalesi simo esingaba nomthelela ongemuhle futhi ngiyagcizelela ukuthi akukho nakancane okusina kujeqeza izimpesheni zabasebenzi ikakhulu abahulumeni. Siyazi abantu abaningi bakithi bacindezelwe yizikweletu,” usho kanje.

UMnuz Allen Thompson, oyiPhini likaMengameli weNatu, uthe baphakamisa kuNene ukuthi abasebenzi banikwe ingxenye yemali yabo yempesheni ukuze bakhokhele izikweletu.

Uthe sebembhalele uNene ngalesi siphakamiso ngoba abasebenzi bayaqhubeka nokushiya emsebenzini.

“Siyajabula uma uNgqongqoshe ethi phansi amaphaphu kubasebenzi bahulumeni abashiya ngoba bezwa kuthiwa ngeke besayithola yonke imali yabo uma bethatha umhlalaphansi. Ukunikwa imali kungabasiza kodwa labo ababhekene nezikweletu bangaze bashiye umsebenzi,” usho kanje.

Imizamo yokuthola oweSadtu ukuze aphawule ayiphumelelanga izolo.

UNene umemezele izinguquko ezinqala kwezemfundo kusuka ngonyaka ozayo njengoba zonke izincwadi zizothengwa ndawonye.

Uthe kusuka ngoMeyi izinhlelo zokwakha izikole zizokwenziwa yihhovisi lobhekela ukuthenga kuhulumeni.

“Besikhokha imali enkulu ekwakheni izikole ngakho lezi zinguquko zizosiza. Kusuka ngo-Ephreli nonyaka bonke abafuna ukwenza umsebenzi nohulumeni kuzomele babhalise futhi bazobhekwa nawuphiko oluqoqa intela ukuze sibone labo basebenzi abenza imisebenzi nohulumeni,” usho kanje.

Ezemfundo uNene uzabele u-R265.7 billion, isikhwama esixhasa abafundi ngezimali emanyuvesi iNational Students’ Financial Aid Scheme yabelwa u-R10 billion.

Kubekwe u-R7.4 billion wokulungisa izikole ezingakhiwanga kahle ezibalelwa ku-500 kanti u-R4.1 billion owokwakha imitapo yolwazi. Umfundaze wokufundisa abafuna ukuba ngothisha iFunza Lushaka yabelwe u-R3.1 billion eminyakeni emithathu ezayo. Umnyango wezemfundo uzosabalalisa ama-workbooks angu-170 million kanti umfundi ngamunye uzothola izincwadi ezimbili esifundweni ngasinye.

Kuhlukanise phakathi umndeni ukunyamalala kwengane eneminyaka ewu-12.

ZANELE MSOMI

KUHLUKANISE phakathi umndeni ukunyamalala kwengane eneminyaka ewu-12 okuthiwa yagcina ukubonakala iphuma esikoleni ngoMsombuluko odlule.

Umndeni usolana wodwa ngokunyamalala kukaZiyanda Cibane (12) wakwa-AA eMlazi ofunda uGrade 5 eSukuma Primary School. Sekuyinkombankombane phakathi kukanina kaZiyanda ongahlali naye noninakhulu uNkk Makhosazana Sindane okuthiwa wanikezwa yena ngosonhlalakahle.

UNksz Cibane ozifikele emahhovisi aleli phephandaba uthe ukhathazekile ngokulahleka kwengane yakhe osekuphele isonto ingabonwa. Uthe okwenza asole ugogo wengane wukuthi akazange ambikele ngesikhathi ingane isanda kulahleka.

“KwakuyiSonto ngigcina ukukhuluma noZiyanda ngiyombona ekhaya emuva kokutshelwa umama ukuthi ufuna ukungibona. Ngafika wacela uR100 obufuneka esikoleni ngamnika ngahamba. Ngamangala ngitshelwa udadewethu ngoLwesihlanu ukuthi uZiyanda selokhu anyamalala ngoMsombuluko kodwa mina ngingatshelwa,” kuchaza yena.

UNksz Cibane, othi wahamba ekhaya ngenxa yezinkinga zomndeni, uthe ngisho indodakazi yakhe ayikwazi lapho ehlala khona. Uthe waya kubo ngoLwesihlanu eyobuza unina ukuthi kungani engambikelanga ngokulahleka kwengane.

“Ngambuza nokuthi usewabikelile yini amaphoyisa wathi akayanga. Saze saya naye emaphoyiseni siyobika ngalo uLwesihlanu. Saya kobheka nasesikoleni bathi wafika ngoMsombuluko kodwa nabangani bakhe bamgcina sekugodukwa,” kusho yena.

Kuthiwa ingane inalo ucingo kodwa kusukela ngosuku eyanyamalala ngalo luvaliwe. Ibhekiwe nakumngani ejwayele ukuvakasha kuyena kodwa kwalandulwa. Kuvele nokuthi uZiyanda uyaqala ukunyamalala engaziwa ekhaya ngoba bekuthi uma bethusene nogogo abalekele kunina omncane. Unina usenovalo lokuthi kukhona okwehlele ingane njengoba sekunomkhuba wokuthunjwa kwamantombazane, adlwengulwe noma abulawe.

Amaphoyisa akuqinisekisile ukuthi kubikiwe ukuduka kwengane ngesonto eledlule.

Kuthintwa uninakhulu uthe kuningi okuyizinkinga emndenini, wasola nonina wengane ethi yizo izinkinga ezenza angahlali nayo. UNksz Cibane ubesetshele Isolezwe ukuthi ugogo wengane uboshelwe ubudedengu ngenxa yokuphuza ukubikela amaphoyisa ngokulahleka kwengane. UNkk Sindane ukuchithile lokhu namaphoyisa athi akukho cala elivuliwe.

“Yimina enganikezwa ingane ngosohlalakahle ngenxa yezinkinga zikanina. Kuyiphutha ukuthi anginakanga ngokulahleka kwayo. NangoMsombuluko sihambe namaphoyisa siyofuna yona, angikwazi okokuthi ngiboshiwe,” kusho uNkk Sindane.

Bucishe bachitheka bugayiwe emndenini wakwaNxumalo kugwazwa indodakazi yakhona ngumfana obefuna imali yomemulo.

BONISWA MOHALE

BUCISHE bachitheka bugayiwe emndenini wakwaNxumalo KwaNdengezi kugwazwa indodakazi yakhona amanxeba amane ngumfana obefuna imali yomemulo.

Kuthiwa umfana wathi kuNksz Nokuthula Nxumalo (21) uzitshela ukuthi usengcono ngoba enemali wase emjijimeza ngommese egcekeni, kwathi uma ewa wagibela phezu kwakhe wamgwaza amanxeba amane, elesihlanu langena kumfowabo owayezama ukulamula.

UNksz Nxumalo usale enamanxeba ebusweni, ekhanda, entanyeni, emva kwendlebe nasengalweni.

Utshele Isolezwe ukuthi ngoFebhuwari 14 abazali bakhe babememulisa, kwafika abantu bezombungaza kukhona nomfana oyindodana yowesifazane ozwana nobabomncane wakhe okunguyena owamgwaza.

“Ngangingazi ukuthi umcimbi wami uzophela kabuhlungu. ngangisuka esigcwawini sengizoshintsha ngesikhathi (u-emgagula ngegama) ethi kimi ngizitshela ukuthi ngingcono ngoba ngichonywe imali ekhanda. Ngangingazitsheli ukuthi uzongigwaza ngoba wayehilizisana nonina ngaphambi kokuthi eze kimi nommese athi ngizitshela ukuthi ngingcono. Emva kwalokho wangikhomba ngommese ngabaleka, waqhubeka nokungijaha ngazungeza umuzi ngase ngiwa. lapho-ke wavele wangigwaza ngaze ngalanyulelwa wumfowethu ogwazeke esandleni,” kusho uNksz Nxumalo.

Uthe imali wahamba nayo futhi ufisa avalelwe ejele ngokumgwaza ngoba kumanje uyesaba ukuphumela ngaphandle.

Umfowabo, uScelo Nxumalo, uthe abangakuthandi wukuzwa izindaba ezehlukene emgwaqweni njengoba kukhona abathi udadewabo wagwazelwa ukuthi akawufakile umhlwehlwe ngakho abadala babafulathele ngoba abawahlabeli amadlozi.

“Ingane yasekhaya icishe yashona kodwa abantu balokhu bandisa indaba yokuthi yingoba asiwahlabeli amadlozi. Siyakholwa thina la ekhaya asiyingeni indaba yamadlozi nokunye okushiwoyo. Kusiphatha kabi ukuthi abantu bangathi bebonile ukuthi uNokuthula uhlaselwe ngumuntu bathi kwenzeke ngoba asihlabi,” kusho uScelo.

UMnuz Sbusiso Nxumalo ongubaba wekhaya uthe yena wayezitshela ukuthi izingane zakhe zishonile ngoba zazopha ngesikhathi ziphuthunyiswa esibhedlela.

“Singiphethe kabi lesi simo nanokuthi sekunamahlebezi okuthi izingane zami zigwazwe ngoba singakwenzi okuthinta amadlozi la ekhaya. Uyazi umcimbi wavele wonakala, akubange kusaqhubeka lutho, ngisho inkonzo esasizoba nayo ayibange isaba khona ngabuya ngabo-2.30 ezintatha esibhedlela. Ngifisa ajeze ogwaze izingane zami,”kusho uNxumalo.

Indodakazi yakhe ayifundi njengoba isanda kubuya esibhedlela namanxeba esavulekile.

UColonel Jay Naicker wamaphoyisa KwaZulu-Natal, uthe kuphenywa icala lokushaya ngenhloso yokulimaza emuva kokuthi intombazane ena-21 igwaziwe kuKhawula Road, KwaNdengezi.

Okwamanje bekungakaboshwa muntu ngoba uphenyo lwamaphoyisa lusaqhubeka.

Abafundi abagcini nje ngokufundela emnyango kodwa baphuza amanzi emvula asemathangini uma lomisile bawalanda emfuleni.

MHLENGI SHANGASE

YIZE izikhulu zomnyango wezeMfundo KwaZulu-Natal zihlale zifunga zigomela ukuthi akekho umfundi osafundela ngaphansi kwesihlahla kulesi sifundazwe kodwa eMgangeni Secondary, eThenjane eMfume yinto yemihla ngemihla ukufundela emnyango.

Abafundi abagcini nje ngokufundela emnyango kodwa baphuza amanzi emvula asemathangini uma lomisile bawalanda emfuleni.

Isikole sinamakilasi ayisikhombisa kodwa kusebenza amane kuphela njengoba amanye apheshukelwa uphahla ngo-Ephreli nyakenye.

Uma uzongena ukhangwa wuphahla olubhodlokile nabafundi behleli ngaphansi kwesihlahla ngasesangweni befunda.

Ehhovisi lothisha ubona imifantu ophahleni kwamanye amagumbi amabili akhiwa ngo-2009 nguMnyango wezemiSebenzi yoMphakathi kunemifantu odongeni kanti uphahla lokhethe lungaphephuka noma yinini uma kufika umoya omkhulu.

Phezulu kulolu khethe kubekwe izitini ukuze lungahambi nomoya. Amathoyilethi amane asetshenziswa ngothisha nabafundi abangu-155.

Nyakenye isikole sithole 22% kwa-matric okuyimiphumela engemihle njengoba kubafundi abayishumi ababhala kwaphasa ababili.

Abafundi kuthiwa bashiya minyaka yonke bayofunda esikoleni esisentabeni esiqhele cishe ngamakhilomitha ayisikhombisa.

Umnyango uhlale ukuchitha ukuthi kunesikole esisafundela emnyango kulesi sifundazwe.

USihlalo wesigungu esilawula lesi sikole, uNkk Cabangeni Mkhize, uthe sebebhale izincwadi baze bakhathala bebhalela uMnyango wezeMfundo befuna usizo kodwa kunhlanga zimuka nomoya.

Uthe bavulela amaholidi ka-Ephreli sekuphephukile wathi babhalela ihhovisi lesifunda uGu kwafika ababhekele ukwakhiwa kwezikole bazobheka umonakalo bathatha nezithombe bahamba esejuba likaNowa.

“Selokhu bahamba ngo-Ephreli nyakenye abakaze babuye. Sesicela noma nje amakilasi angomahamba nendlwana ukuze izingane zethu ziqube kuwona. Uma lina akufundwa ngoba amakilasi ayanetha, uma lishisa baphumela emnyango bayofundela ngaphansi kwemithi ngasesangweni ukuze kuqhubeke usuku,” usho kanje.

Lesi sikole sinothisha abayisithupha ngenxa yesibalo esincane sabafundi futhi senzisa umkhakha owodwa wezifundo one-Economics, Business Studies, Life Sciences, Maths Literacy, Life Orientation nezilimi.

Omunye wothisha ongagunyaziwe ukukhuluma nabezindaba uthe basebenzisa amathoyilethi angumgodi nabafundi. Uthe amanye awanayo neminyango kudingeka baphelezelane uma beyozikhulula.

“Kunzima sifundisela endaweni engaphephile nomnyango uhlale usisabisa ngokuthi uzosivala ngoba sehlelwa isibalo sabafundi minyaka yonke.”

Umphakathi wakha amagumbi amabili ngo-2002 ngemuva kokubona abafundi ababehamba amabanga amade beya ezikoleni ezikude.

Omunye wabafundi, uNzuzo Shangase, uthe bafundela emnyango ngoba iyona ndawo ephephile yokufundela.

“Kuba manzi yonke into uma like lana ngakho siyaphuma sifundele emnyango ngoba mancane kakhulu amakilasi aphilayo. Sicela usizo kunoma ngubani ngoba silinde into esingayazi,” kusho uNzuzo.

Umnyango nyakenye wamisa zonke izinhlelo zokwakha izikole ngenxa yokushoda kwemali.

Okhulumela umnyango, uMnuz Sihle Mlotshwa, uthe izikole ezacekelwa yisiphepho bazozilungisa uma kuqala unyaka omusha wezimali.

“Sizohambisa amagumbi angomahamba nendlwana okwesikhashana kuze kulungiswe izikole ezonakala.”

Ukhungathekile umfundi okhishwe ekilasini kwaGrade 12, othisha bakhe bathi akaphinde uGrade 11.

MLUNGISI GUMEDE

UKHUNGATHEKILE umfundi waseLugoba High School, eNkinyane, eMbumbululu okhishwe ekilasini kwaGrade 12, othisha bakhe bathi akaphinde uGrade 11 ngoba wafeyila yize yena azi ukuthi waphasa ngokweripoti alithole ngonyaka odlule.

USilungile Mbambo (16) kumanje ujika nelanga kubo akalubhadi esikoleni kusukela ngoMsombuluko ngemuva kokuthi uthishanhloko emtshele ukuthi kumele aphinde uGrade 11.

Kuqala lo nyaka uSilungile ubesekilasini lakwaGrade 12 kodwa kuthe ngoJanuwari 23, uthisha wakhe uNksz Zandile Dubazane wamtshela ukuthi akumele ukuba kuleli kilasi kufanele aye kwaGrade 11.

Unina kaSilungile, uNksz Rejoyce Biyase, uthe badidekile ukuthi kwenzekani ngoba ngonyaka odlule kuthiwe ingane iphasile manje sekuthiwa ifeyilile.

“Sinenkinga lapha umntwana sazi ukuthi uphasile kodwa sekuthiwa akaphinde ikilasi abelenza ngonyaka odlule. Okungikhathaza kakhulu ukuthi uphatheke kabi akasafuni nokuya esikoleni,” usho kanje.

Uthe basaba nokuthi angase azibulale njengezinye izingane ezisuke zinezinkinga esikoleni.

“Sidinga uMnyango wezeMfundo ukuba ungenelele kulolu daba usichazele kabanzi ukuthi ngempela kwenzekani, kuyenzeka yini umuntu kuthiwe uphasile kubuye kuthiwe ufeyilile,” usho kanje.

USilungile uthe ulindele ukubuyela esikoleni ayoqhubeka no-Grade 12, akazimisele ngokuphinda uGrade 11.

“Ngaphasa mina ngonyaka odlule kumele ngabe ngiyafunda. Ngiyaphazamiseka njengoba ngihleli ekhaya,” usho kanje.

Isolezwe linayo ikhophi yeripoti likaSilungile libhalwe ukuthi not promoted. U-not kuyabonakala ukuthi ushuthekiwe ayikho indawo yawo, kanti nezandla ezibhalile azifani.

USilungile ufunda izifunda eziyisishiyagalombili, wafeyila ezintathu, iPhysics, Geography ne-Visual art.

Okhulumela uNgqongqoshe woMnyango wezeMfundo KwaZulu-Natal uMnuz Isaac Luthuli, uthe kuyacaca ukuthi kukhona umkhonyovu owenziwe eripotini likaSilungile wathi bazophenya bathole ukuthi kwenzekeni.

Uthe uma bethola ukuthi ukhona umkhonyovu abathintekayo bazothathelwa izinyathelo njengoba umnyango ungeke uyibekezelele inkohlakalo.

ULuthuli unxuse umfundi ukuba angazibulali ngoba udaba lwakhe luyaphenywa.

Umphakathi usishayele ihlombe isabelo-mali sikaNgqongqoshe wezeziMali uMnuz Nhlanhla Nene.

BONISWA MOHALE

UMPHAKATHI usishayele ihlombe isabelo-mali sikaNgqongqoshe wezeziMali uMnuz Nhlanhla Nene, uncoma ukufakwa kwemali eningi KwaZulu-Natal ukudlula ezinye izifundazwe. Abanye baphawula kakhulu ngokufakwa kwemali kwezemfundo kanjalo nokuncoma ukunyuswa kukagwayi notshwala ngoba bethi lezi zinto azilungile emzimbeni womuntu.

UMandla Zindela (23) wasePort Shepstone

Uthi uyajabula ukuthi kutshalwe imali esikhwameni sabafundi i-NSFAS ngoba baningi abangenayo imali yokufunda ezikhungweni zeMfundo ePhakeme kanti angajabula uma uNgqongqoshe engandisa intela ekhokhwa otshwaleni nakugwayi ukuze kunciphe abantu abaphuzayo namaxhwele.

“Uma kwandiswa imali ye-NSFAS neziteleka zingancipha ngoba kuthi kuqala unyaka, sibe sesiteleka ayilungile leyonto. Utshwala nogwayi noma kunganyuka ngamalini vele akulungile kubantu,” kusho uMandla.

Nkanyiso “Sinkwa” Dlamini (23) waseDurban North

“Wenze kahle uNgqongqoshe wanyusa imali yempesheni ngoba ogogo nomkhulu bayasiza. Kumele anyuse ugwayi kodwa lena yentela kawoyela izozwela ngoba ngeke sisazula ngokukhululeka noma sekunyuka uphethroli. Asijabule neze ngogesi kungakuhle abakwa-Eskom basebenzise u-R23 billion abawutholile ukulungisa izinkinga zabo. Siyathemba ukuthi imali ayitshale kwezokuphepha izosiza kutshalwe amaphoyisa amaningi ePhoyinti siyafa amaphara asithathela amaselula,”

U-Ayanda Ngidi (27) waseNanda, onguMengameli we-SRC e-DUT

Uthi abajabule ngokunyuswa kwesabelo-mali salo nyaka ngoba yize ezemfundo zithole imali eningi kodwa iqiniso lithi ababaningi abafundi abazohlomula ngoba namanyuvesi enyusa imali yokufunda.

“Thina siyojabula uma bonke abafundi sebethola imfundo yamahhala isabelo-mali sikahulumeni sesisiza ukubakhokhela bonke. Okwamanje izikhungo zemfundo ePhakeme ziyazilawula akuhlomuli abafundi abaningi. Abanye banezikweletu ngenxa yokuthi u-NSFAS awukhokhanga,” kusho u-Ayanda.

UNhlakanipho Kunene (26) waseMpolweni, eMgungundlovu

“Isabelomali kumele sibhekelele nabafundi abanezikweletu zika-NSFAS asebehleli emakhaya ngoba esamanje sibhekelele abasazofunda,”

Uthi uhulumeni kumele ahlukanise imali yezempilo akubeke kucace ukuthi le eyemithi neminye imishanguzo bese enye kuba ngeyokuthuthukisa ingqalasizinda ukuze abantu bengeke baphoqeleke ukuya ezibhedlela ezizimele ezimba eqolo ngoba bebalekela impatho kwezikahulumeni.

UNksz Phumzile Nxumalo (39) waseRichards Bay

Uthi bayajabula ngokuthi ezempilo zithole imali eningi ngoba ziningi izifo okumele kuliwe nazo ikakhulukazi i-HIV/Aids.

“Kuhle ukuthi ezempilo zisathola imali eningi futhi kugxilwe kwi-HIV/Aids. Siyajabula uma kutshalwa kakhulu imali kwezempilo ngoba kubalulekile ukuthi abantu baphile isikhathi eside bangahlushwa yizifo,” kusho uNksz Nxumalo.

UNksz Mbali Zungu (30) wase-Hillcrest

“Ungqongqoshe wenze kahle wenyusela ogogo impesheni futhi bengingajabula kakhulu uma uhulumeni engayibheka ngeso lokhozi imali ukuthi emazingeni aphansi yenza lokho eyabelwe kona ngoba abantu abangu-50 million bakuleli bayayidinga intuthuko nempilo engcono.

Ayibona ngenye indlela amanye amaqembu aphikisayo KwaZulu-Natal indaba yokuqhubeka nomcimbi weSilo wokuvula isiShayamthetho.

CELANI SIKHAKHANE

AYIBONA ngenye indlela amanye amaqembu aphikisayo KwaZulu-Natal indaba yokuqhubeka nomcimbi weSilo wokuvula isiShayamthetho njengoba kukhona afuna uvalwe.

Ngaphandle kwe-ANC ne-IFP amanye amaqembu njenge-EFF, MF, DA neNFP abona kungcono kwenziwe umcimbi owodwa ozovulwa yiSilo bese uNdunankulu eqala inkulumo yesifundazwe ezobe ichaza kabanzi ngezinhlelo zikahulumeni.

UMnuz Vusi Khoza we-EFF uthe ngenxa yezindleko ezibonakala zanda kungcono umcimbi ususwe eRoyal Show Grounds uyokwenzelwa ezindlini zesiShayamthetho. “Kuyabiza ukuqasha le ndawo nokuhlukanisa umcimbi weSilo nokaNdunankulu, ngakho sibona kungcono kuthuthwe la kuyiwe ezindlini zesiShayamthetho bese kuba umcimbi wosuku olulodwa kukhulume iSilo kuqala bese kulandela uNdunankulu,” kusho uKhoza.

UNkk Shameen Thakur-Rajbansi weMF uthe nakuba bese kuwusiko ukuthi i-KZN iyenze izinsuku ezimbili le micimbi kodwa inkinga yemali idinga ukuthi kuphinde kubuyekezwe lesi sinqumo.

“Ukuthi iSilo sibe nosuku lwaso bekukuhle ngoba bekuqhakambisa ezokuvakasha eKZN kugqamisa nokwehluka kwethu kwezinye izifundazwe ngokuba neNdlunkulu. Nokho siyadinga manje ukuthi sikubuyekeze lokhu ukuze le micimbi ihlanganiswe kodwa iqhaza leNgonyama lingalahleki iqhubeke nokuthi kube yiyo evula umcimbi bese kulandela uNdunankulu,” kusho uNkk Rajbansi.

Umholi we-NFP uMnuz Vikizitha Mlotshwa uthe nabo banombono ofanayo futhi bakholwa wukuthi imali esetshenziswa kuqashwa ubukhazikhazi baseRoyal Show Grounds ingasebenza ezidingweni zentuthuko.

“Isimo semali sibi kuhulumeni ngoba nathi singamalungu esiShayamthetho siyalelwe ukuthi sinciphise ukulala emahhotela. Umcimbi wokuvula isiShayamthetho awenziwe ezindlini zalesi sakhiwo uhlanganiswe nokaNdunankulu bese umphakathi ufakelwa amathelevishini ezakhiweni zikahulumeni njengasemahholo ukuze ubuke inkulumo kunokuba kuchithwe izigidi.

Okunye kunganqandwa nendaba yabantu abaningi abamenywayo abagcina bedle imali yabakhokhi bentela eningi ngoba basuke beqashelwe amahhotela abazolala kuwona,” kusho uMlotshwa.

I-DA nayo ibihlale ikhala ngokuthi ukuhlukaniswa kwale micimbi kudla kakhulu imali kuhulumeni. USotswebhu we-ANC uNksz Nontembeko Boyce uthe bona abakayiboni inkinga ngomcimbi weSilo.

“Okwamanje asinankinga ngokuthi iSilo sibe nosuku lwaso lokuvula isiShayamthetho ngakho usazoqhubeka ube khona,” kusho uNksz Boyce.

I-IFP nayo ayiyiboni inkinga ngalo mcimbi kodwa ifuna kubhekisiswe izinkampani eziqashelwa ukuhlela umcimbi ngoba isola ukuthi kukhona abakokotela amanani bese kugcina kuchithwe inqwaba yezigidi kuwo. Namhlanje uNdunankulu uzobe ethula inkulumo yesifundazwe ezocacisa ukuthi zithini izinhlelo zikahulumeni kwezentuthuko.

Sigcine sililandile ithikithi laso lomgwaqo lenhlawulo ka-R1 500 isilomo somdlalo owuchungechunge kuthelevishini Isibaya.

NONTUTHUKO NGUBANE

SIGCINE sililandile ithikithi laso lomgwaqo lenhlawulo ka-R1 500 isilomo somdlalo owuchungechunge kuthelevishini Isibaya kulandela ukushaya sichithe emgwaqweni ngesikhathi amaphoyisa esinika ithikithi lokuhamba ngesivinini esingaphezulu kwesisemthethweni.

Kushone elayizolo uSiyabonga Twala odlala indawo kaMpiyakhe Zungu kwiSibaya, eseyilungisile indaba yakhe nabakwasidlodlo.

Kuthiwa uTwala ubonakale eshwibeka ngesivinini sika153km/h emgwaqweni u-N2 North Bound eBallito ngoLwesibili. Indawo abehamba kuyo kuthiwa ijubane lakhona wu-120km/h.

Kuvele ukuthi umiswe yiphoyisa lomgwaqo ngoba ephule umthetho womgwaqo lamnikeza ithikithi lika-R1 500 kodwa wavele washaya wachitha ngemoto ngaphandle kokuthatha ithikithi.

Kuthiwa utshele iphoyisa lomgwaqo ukuthi kunomhlangano aphuthuma kuwo nesikhulu salo mnyango (wezokuThutha) ngakho uzobuye alithathe ithikithi.

Okhulumela amaphoyisa omgwaqo, uZinhle Mngomezulu, ukuqinisekisile ukuthi izolo uTwala uthumele umuntu walanda ithikithi lakhe.

“Ngikhuluma nawe nje uselilandile ithikithi lakhe ukuze alikhokhele. Akazifikelanga yena emahhovisi lethu kodwa uthumele umuntu ukuba alilande,” kusho uMngomezulu.

Kuthintwa uTwala izolo emini uthe, “Ngicela ukhulume noZinhle Mngomezulu ngalolu daba. Uyena onolwazi ngalo, akukho engizokukhuluma ngalo. Kumanje kukhona engimatasa ngakho.”

Kube muncu umfana oneminyaka emine ethanqazeka esitezi sesishiyagalombili eflethini e-Albert Park washona.

NONTUTHUKO NGUBANE

KUBE muncu umfana oneminyaka emine ethanqazeka esitezi sesishiyagalombili eflethini e-Albert Park, eThekwini washona izolo ekuseni ekade eshiywe abomndeni wakhe bemkhiyele ngaphakathi kanti uzozama ukuphuma ngewindi wase ewela phansi.

USheloon James kuthiwa ubehlala noyisemkhulu nogogo wakhe abadabuka eZimbabwe.

Kuthiwa bebemshiye elele eflethini baya emsebenzini, bekhiye umnyango babeka ukhiye kamakhelwane abamcele ukuba amvulele uma esevukile.

Isolezwe lihambele le ndawo izolo ekuseni isidumbu sengane sisambozwe ngethawula elimhlophe, uyisemkhulu uvele wasikhihla isililo ngesikhathi abezimo eziphuthumayo sebefaka ucwazi ocwebezelayo obekufakazela ukuthi ingane isishonile.

Okhulumela amaphoyisa KwaZulu-Natal uColonel Jay Naicker, uthe: “Amaphoyisa aseDurban Central avule icala lokushona komuntu kulandela ukuwa komfana eflethini. Kusaphenywa ukuthi bekwenzenjani kulesi sigameko.”

Lo mfana kuthiwa ulimele umgogodla nasekhanda.

Isolezwe liphinde lathola ngabasondelene nalolu daba ukuthi ingane ibishiywe yodwa endlini ngesikhathi kwenzeka lesi sigameko.

“Ugogo nomkhulu bebekhiyile endlini bashiya ukhiye kamakhelwane abamcele ukuba avulele ingane uma ivuka. Kukholakala ukuthi ingane ivukile yabona umnyango ungavuleki yabe isizama ukuphuma ngewindi isuka esitezi sesishiyagalombili yathanqazeka phansi,” kusho umthombo.

Omunye ohlala kuleli flethi ozibize ngoSiya (isibongo akasidalulanga), uthe ubone kunento ethi pheshe ngewindi nokulandelwe umsindo wokuthanqazeka kwento phansi.

“Bengisendlini yami ngesikhathi ngibona into ithi pheshe ngewindi nokulandele umsindo okhale kanye. Ngiphumile endlini ngafica ingane isilele phansi ilimele, ibingasanyakazi. Cishe wumuntu wesine kuleli flethi ewa ngale ndlela. Bathathu eseke bashona oyedwa wasinda. Kubuhlungu impela okwenzekile,” kusho uSiya.

Okhulumela abezimo eziphuthumayo KwaZulu-Natal uMnuz Robert McKenzie uveze ukuthi bazamile ukuhlenga impilo kaSheloon kodwa kwangalunga.

“Ngezithuba zehora lesishiyagalolunye ekuseni abezimo eziphuthumayo baphuthume emaflethini aseduze nase-Albert Park lapho bekulimele khona ingane. Ngesikhathi sifika sizamile ukuyifaka imishini yokuyisiza ukuthi iphefumule okuqhubeke imizuzu engu-20. Imizamo yethu ayizange iphumelele, ngeshwa ingane yashonela endaweni yesigameko,” kusho uMckenzie.

Okhulumela uMnyango wezokuThuthukiswa koMphakathi KwaZulu-Natal uMnuz Vukani Mbhele, uthe bakhathazekile ngokwenzekile wanxusa abazali ukuba bezinakekele izingane.

“Sikhathazekile ngalesi sigameko njengoba sekushone umuntu, konke sizokubeka ezandleni zamaphoyisa. Ngaso sonke isikhathi kumele abazali beqikelele ukuthi izingane bayazibona ukuze zizophepha,” kusho Mbhele. Umndeni kamufi awuthandanga ukukhuluma nabezindaba.

Unina kaSheloon kuvele ukuthi wabuyela eZimbabwe wamshiya nabazali bakhe ukuba bemnakekele.

Sekuqubuke izinsolo ngomunye wothisha waseSifunimfundo Primary okuthiwa useziqedile izingane zamantombazane ezipotoza.

MHLENGI SHANGASE

SEKUQUBUKE izinsolo ngomunye wothisha waseSifunimfundo Primary, eNanda Newton okuthiwa useziqedile izingane zamantombazane ezipotoza.

Lo thisha okuthiwa ufundisa uGrade 7 kulesi sikole, kuthiwa wumkhuba wakhe omdala ukupotoza abafundi.

Yize le ndaba kuthiwa isiyaziwa esikoleni njengoba kuthiwa kubizwe bonke othisha bachazelwa ngayo kuleli sonto kodwa kuthiwa ayikafinyeleli kubazali bengane.

Isehlakalo sokugcina senzeke ngeledlule lapho lo thisha kuthiwa ubizele lo mfundi e-staffroom wambuza ukuthi kungani ebelovile.

Umthombo weSolezwe ocele ukungadalulwa, uthe sebekhathele nothisha besifazane ngalo mkhuba walo thisha okuthiwa uneminyaka engaphezulu kuka-50 kodwa ongaganiwe.

Lo mthombo uthe lo thisha ubizelwe emhlanganweni wothisha nguthishanhloko wafike wazivumela ukuthi le nto uyenzile.

“Kuze kwalinganiswa ukuthi wenze njani. Ngemuva kwalokhu uyitshele ukuthi uyayithanda wayanga wase eyinukubeza. Wenze lokhu wase eyivala ngo-R10. Okwesibili uyibizile wazama futhi ukuyinukubeza kodwa yagxuma yayobikela omunye uthisha wesifazane oyicebise ngokuthi iyotshela uthishanhloko,” usho kanje.

Lo mthombo uqhube wathi yindaba eyaziwayo lena esikoleni ngoba kuze kwavela nezinye izingane ezithi zenziwe okufanayo.

“Kuvele nabanye abafundi bakwaGrade 6 abashilo ukuthi le nto uyayenza nakubona. Abazali abaziswanga futhi awekho amacala avuliwe mayelana nalezi zehlakalo,” usho kanje.

Uthe lo thisha uke wamiswa phambilini ngamacala athinta khona ukupotoza kodwa wabuye wabuyiselwa esikoleni.

“Kwamanje besazi ukuthi kuthiwe akake ahlale estaffroom angayi ekilasini ayofundisa ngenxa yalesi sehlakalo. Kodwa yena uyaya kofundisa.

Naphambilini kuthiwa wake wafunelwa usizo lokululekwa ngoba le nto uthanda ukuyenza kubafundi bakwaGrade 6 no-7,” kusho umthombo.

Okhulumela umnyango wezemfundo, uMnuz Sihle Mlotshwa, uthe abantu abenza izinto ezifuze lezi abanandawo emnyangweni.

“Uma kutholakala ukuthi lezi zinsolo ziyiqiniso uyothathelwa izinyathelo ezinzima ngoba asibafuni abantu abanjengaye kwezemfundo,” usho kanje.

Uthisha okutholakala ukuthi uhlukumeza abafundi uyaxoshwa ekufundiseni afakwe nasohlwini lwabantu abangasavumelekile ukuthi bafundise kuleli.

Umkhandlu olawula othisha iSouth African Council for Educators (Sace) uphenya kakhulu amacala okuhlukumeza ngokocansi kwabafundi ngothisha.

Nyakenye lo mkhandlu uphenye amacala abalelwa kwawu-346 okubalwa okushaya ngenduku, ukushaya balimaze abafundi nokubahlukumeza ngokocansi.

Kulesi sibalo bangu-31 abasuliwe ohlwini lokufundisa okusho ukuthi ngeke baphinde bafundise kuleli nakwamanye amazwe.

Zisagcwele amathafa iziboshwa ezintathu ebezilindele ukuthethwa kwamacala azo ezeqe ejele laseDundee.

BAWINILE NGCOBO

ZISAGCWELE amathafa iziboshwa ezintathu ebezilindele ukuthethwa kwamacala azo ezeqe ejele laseDundee ngesonto eledlule.

Sekumiswe nojele ababesebenza kule ndawo okwakugcinwe kuyo iziboshwa.

Iziboshwa kuthiwa zihlule ojele ngamandla zabe sezeqa kanti kuze kube yimanje akwaziwa ukuthi zikuziphi izinkalo.

Amaphoyisa aseDundee ayaphenya ngokweqa kwazo.

Kulesi sigameko kweqe uRichard Frank Male (32) ongowokudabuka eCongo obeboshelwe icala lokubamba inkunzi, amane okuthumba namahlanu okushaya ngenhloso yokulimaza.

Wonke amacala kuthiwa ubewenze eDanhauser.

UThemba Ndlovu noJabu Ncube okuthiwa ngabaseGoli bebeboshelwe icala lokubamba inkunzi amabhizinisi okuthiwa balenza eDundee ngonyaka owedlule.

Okhulumela amajele KwaZulu-Natal uMnuz Thulani Mdluli uthe kumiswe ojele abane ababesebenza lapho kwakugcinwe khona lezi ziboshwa.

“Bamiswe ngenxa yophenyo olusaqhubeka ngalesi sigameko senzela ukuthi lolu phenyo luphothulwe kahle,” kusho uMdluli.

Iziboshwa ezeqile kuthiwa zazihleli zontathu endlini ebezitoke kuyo engxenyeni yejele egcina iziboshwa ezisalinde ukuqulwa kwamacala azo.

Okhulumela amaphoyisa KwaZulu-Natal uMajor Thulani Zwane uthe namanje iziboshwa bezingakatholwa kodwa amaphoyisa ayaqhubeka nophenyo.

Abangaba nolwazi olungalekelela ukuthi zibanjwe bayanxuswa ukuthi bathinte umphenyi wecala uWarrant Officer Khadu Nkabini ku-071 386 5684 noma inombolo ye-Crime Stop u-08600 10111.

Umsebenzi wasezindlini uvume icala lokuphihliza umnakwabo ngetshe washona ‘ekhwelezela’ umyeni wakhe athi wayengasamnakile.

NONTUTHUKO NGUBANE

UMSEBENZI wasezindlini uvume icala lokuphihliza umnakwabo ngetshe washona ‘ekhwelezela’ umyeni wakhe athi wayengasamnakile.

UNksz Hleli Linah Sibiya (40) waseSikhaleni, eNgome, uvume icala lokuphihliza umnakwabo uNksz Nosiphiwe Patricia Mashaya (45) ngo-Agasti 3 ngonyaka odlule.

UNksz Sibiya wayeshade ngokwesintu noMnuz Gcinokwakhe Ndwandwe (44) benezingane ezintathu. Umyeni wakhe ubesebenza eGoli ezimayini.

Evuma icala uthe ngo-2013 umyeni wakhe wafika nomnakwabo waseGoli esenengane eyodwa wamtshela ukuthi kumele bahlalisane ngoba bamganile bobabili.

UNksz Sibiya uthe umnakwabo wabe esemenza inhlekisa emphakathini ethi umthathele indoda nemali ihlala kuyena yonke.

“Umnakwethu ubehlala engipiklela ethi yingane yakhe eyodla lonke ifa lomyeni wami, lokho bekungicasula.

Ngashayela umyeni wami ucingo ngicela isondlo sezingane wangitshela ukuthi ngeke anginikeze ngoba ngihlukumeza unkosikazi wakhe. Ngatshela izingane zami ukuthi kumele zimqole umnakwethu ngoba inikezwa yena imali. Ngelanga lesigameko umnakwethu wangithinta ngocingo ngehora lesishiyagalombili ebusuku ecela ngimhlangabeze esitobhini ngoba kuhlwile evela edolobheni. Ngathumela izingane phambili ukuba zifike zimbambe inkunzi. Ngazilandela ngemuva.

“Wazama ukubaleka ngesikhathi zimvimbezela izingane wawa phansi. Ngathatha iselula yakhe ngayinikeza izingane zabaleka nayo.

Ngamtshela ukuthi ngifuna imali saphikisana saqala ukulwa. Wangitshela ukuthi imali isebhange.

“Ngathola enye imali kuyena ngayithatha. Ngabe sengiyamklinya ngesikhafu sami, wangiluma isandla, nami ngamluma isiphongo. Ngathatha itshe ngamphihliza ngalo ekhanda kaningi maqede ngasukuma ngamshiya lapho,” kusho uNksz Sibiya.

Waboshwa amaphoyisa ngalo ilanga lesigameko.

Uthe uyazisola kakhulu ngesenzo sakhe asenziswa yisikhwele nokudinwa.

Icala lihlehliselwe u-Ephreli 7 nonyaka ukuze agwetshwe.

Kusalindwe umbiko wosonhlalakahle ngokuthi izingane zakhe zizogadwa ubani kwazise zineminyaka engu-18, 12 nomagcino oneminyaka eyisishiyagalolunye.

Kulamule ukungenelela kwamaphoyisa nabefundisi ngesikhathi amalungu e-NFP evukela uMnuz Maliyakhe Shelembe bemxosha esteji.

CELANI SIKHAKHANE

KULAMULE ukungenelela kwamaphoyisa nabefundisi ngesikhathi amalungu e-NFP evukela uSihlalo waleli qembu uMnuz Maliyakhe Shelembe bemxosha esteji eshawa nangezigubhu zamanzi ngoba bemsola ngokuthi uhlela itulo lokuthi kuchithwe uNkk Zanele Magwaza-Msibi ekuholeni iqembu.

Lokhu kwenzeke emcimbini wokugubha iminyaka emine kwasungulwa iNFP obuseCecil Emmert Rugby Stadium, eVryheid.

Amaphoyisa nonogada abebehlomile kuphoqeleke ukuthi bazovimba abantu abebezama ukufohla ngenkani ocingweni obeluhlukanise bona nezikhulu befuna ukumudla luhlaza uShelembe bethi akaphume aphele kulo mcimbi.

Indlela abantu abebethukuthele ngayo bebengayizwa ngisho imvula ebiyidliva bethuka inhlamba bethi akuxoshwe uShelembe kodwa ovele wahlala ngenkani waqhubeka nokuphatha uhlelo kunzima ethukwa.

Kuze kwangenelela abefundisi abebezobusisa lo mcimbi bakhuza abantu bacela ukuthi kukhulekwe kwehliswe imimoya ebisiphezulu kubantu.

Kuke kwathuleka abantu behlisa imimoya sekuthandazwa, bonke abaholi bama ngezinyawo kwavalwa amehlo kodwa uShelembe ubebonakala ukuthi akasathembi lutho akazange awavale ubelokhu eqalaza emuva naphambi kwakhe.

Ugcine esehluleka ukuthula wabatshela emehlweni wathi uyazi ukuthi bathengiwe ngakho ngeke balunge kulokhu abazama ukukwenza.

“Nithengiwe ukuthi nizokwenza le nto eniyizamayo. Lokhu enikwenzayo anginandaba nakho ngoba niyangidumisa nenza ngithandwe kakhulu futhi ngidume kakhulu kunakuqala njengoba nibathathu nizama ukubanga umsindo ongayindawo,” kusho uShelembe obekhuluma ngenkani esteji engafuni ukusuka.

Kuleli qembu uqhekeko nokungathembani kuhlale obala kangangokuthi ngisho inkulumo kaNkk Magwaza-Msibi ebibhalwe phansi yomyalezo walo mcimbi ubeyinikeze indodakazi yakhe uNksz Gugu Gumede nayo efike yacela umengameli wophiko lwabafundi baleli qembu iNasmo uMnuz Sboniso Majola ukuthi ayifunde.

Ngisho abaholi abebekhona bekucaca ukuthi abasathembani bebodwa njengoba iningi labo beliphelezelwa inqwaba yonogada abazimele abebephethe izibhamu bebaningi ukudlula amaphoyisa.

Kukhona omunye wesilisa obanjwe ezama ukukhipha isibhamu ngesikhathi abaholi besakhuluma nabezindaba kodwa wabanjwa kabi ngonogada bamhudulela phansi befuna ukumshaya bebuza ukuthi umeleni emva kwabaholi futhi usukhiphelani isibhamu.

Lo mlisa ovele waxolisa maqede wayohlala kwi-BMW 3 Series azivalele kuyo wadlala umaskandi kodwa ethukile njengoba ebehudulwa ngezinyawo njengengane encane isibhamu sivele enqulwini.

Kubuye kwasuka esinye isidumo ngesikhathi kufika udadewabo kaNkk Magwaza-Msibi okuthe uma eqhamuka kwaqhuma isililo abantu bezitshela ukuthi ngukaMagwaza-Msibi nabanye abaholi bagijima bazithanqaza kuye bekhala.

Abantu bebememeza bethi “nangu umama, nangu umama,” besho abanye bekhala kodwa batshelwa ekugcineni ukuthi empeleni ngudadewabo.

UNkk Magwaza-Msibi enkulumeni yakhe ebibhalwe phansi uthe ngesikhathi besungula leli qembu baba neshwa lokuthi kwangena nabantu abanezinhliziyo ezimbi abathanda izikhundla nabanomona ababengazimisele ngokwakha inhlangano eya phambili yabantu.

Nendodakazi yakhe ithe labo asebezitshela ukuthi ufile ngoba befuna isikhundla sakhe abakhohlwe ngoba kusenguye umholi.

UMengameli Jacob Zuma ube nomcimbi wokwamukela amathambo amaqhawe omzabalazo oMnuz Moses Kotane nakaMnuz JB Marks.

IZOLO uMengameli Jacob Zuma ube nomcimbi wokwamukela amathambo amaqhawe omzabalazo oMnuz Moses Kotane nakaMnuz JB Marks abelandwe eRussia lapho bashonela khona.

“Ukubuyiswa kwamathambo abo kuchaza ukuthi sekuqalwa isahluko esisha,’’ kusho uZuma ethula inkulumo yakhe eWaterkloof Airforce Base, ePitoli.

“Kusenza silithokozele igalelo ababanalo emzabalazweni futhi sazise nezakhamuzi zethu, ikakhulukazi intsha, ngeqhaza la maqhawe amabili alibamba ezweni lethu.’’

UMnuz John Beaver (JB) Marks owayeyisishoshovu somzabalazo waba ngumengameli wegatsha le-ANC eTransvaal waphinde wakhethwa njengoSihlalo we-SACP ngo-1962.

Ngo-1963 wathunywa kwi-ANC eyayiseTanzania.

Ngo-1971 waxinwa wukugula waphikelela eRussia.

Kwathi ngonyaka olandelayo wabulawa yisifo senhliziyo eMoscow.

UKotane waba nguNobhala-Jikelele weSACP kusukela ngo-1939 kwaze waba uyashona ngo- 1978. Wakhethwa ukuba ayofunda esikoleni samaKhomanisi eMoscow iLenin School.

UKotane washaywa yisifo sohlangothi ngo-1968 wahamba wayolashwa eRussia lapho ashonela khona ngo-1978.

Bobabili bangcwatshwa emathuneni aseNovodevichy eMoscow.

UZuma uthe kubuyiswe amathambo ezinsizwa ezahamba iNingizimu Afrika ingakabi nje.

“Namuhla sibabuyisele ekhaya, ezweni elikhululekile.

“Namuhla iNingizimu Afrika ibuswa ngokwentando yabantu esekelwe yimithetho, okubalwa neyoluntu. Futhi nokuzinikela koMoses Kotane, JB Marks nabanye abaholi bangezikhathi zabo namuhla kuthele izithelo.’’

UZuma ube esebonga uMengameli waseRussia, uVladimir Putin, nohulumeni wakhona ngokunakekela amaqhawe aseNingizimu Afrika ngesikhathi esaphila nangesikhathi esedlula emhlabeni. UKotane uzongcwatshwa kabusha Mashi 14, uMarks ngoMashi 22.

Sekuqubuke umsindo ngethenda yomngcwabo kaSenzo Meyiwa, owadla R3m wabakhokhi bentela okunezinsolo zokuthi akulandelwanga imigudu efanele ngethenda yawo.

CELANI SIKHAKHANE

SEKUQUBUKE umsindo ngethenda yomngcwabo kanozinti weBafana Bafana uSenzo Meyiwa, owadla R3 million wabakhokhi bentela okunezinsolo zokuthi akulandelwanga imigudu efanele ngethenda yawo futhi kwakokotelwa amanani okuwuhlela kwahlomula nosopolitiki abathile.

I-IFP esiShayamthetho saKwaZulu-Natal iveze izinsolo ezishaqisayo zokuthi kukhona osopolitiki nezikhulu zikahulumeni ezazicebisa ngalo mngcwabo kwangalandelwa imigudu yokukhipha imisebenzi ethinta uhulumeni.

Ezinye izinto ezidale umsindo wukuthi nemali eyasetshenziswa kwenziwa izindleko kukholakala ukuthi kwakubizwa amanani angekho emthethweni.

Phakathi kwezinto ezishiye imibuzo kuleli qembu kwaba ngukuqashwa kwenkampani yokudla abathi yabiza R1.2 million, kwaba u-R599 405 owakhokhelwa inkampani eyayifaka amatende, izipikha nesteji nokunye kokunandisa, kwaba u-R190 500 owakhokhela inkampani eyayifaka izikhangiso ezazisho ukuthi ngobani abaxhasi balo mngcwabo.

Umholi we-IFP esiShayamthetho uMnuz Blessed Gwala uthe abanankinga nesithunzi esakhonjiswa nguhulumeni ukuhlonipha umndeni kaMeyiwa kodwa abakhala ngakho wukuthi kukhona ababona ithuba lokwenza inkohlakalo ngokuzicebisa ngalo mngcwabo.

“Sibona ukuthi kukhona ababona ithuba lokuzicebisa ngezinyembezi zakwaMeyiwa kwaqashwa izinkampani ngaphandle kokulandela imigudu ukuze kuhlomule osopolitiki abathize. Sifuna ukuthi uNdunankulu (uSenzo Mchunu) asinikeze uhla lwezinkampani ezazifake izicelo zokuhlela umngcwabo ukuthi zingaki nokuthi ngabe zona zazibiza kangakanani. Akugcini lapho sifuna ukwazi ukuthi yimiphi imigomo eyalandelwa ngokukhishwa kwalo msebenzi ngoba kuyacaca ukuthi izinto azenziwanga ngendlela njengoba sibona ukuthi kwagcina kusebenze u-R3 million ngalo mngcwabo,” kusho uGwala.

Uthe uma uNdunankulu enolwazi lokuthi ayikho inkohlakalo eyenziwa akunekelwe izwe kucaciswe ukuthi kwalandelwa luphi uhlelo ngesikhathi kuqalwa kuze kuyophothulwa umsebenzi wokufihla lo nozinti.

UMeyiwa wahlonishwa ngomngcwabo kahulumeni osezingeni lezikhulu ezihlonishwayo nosuke ugunyazwe uMengameli wezwe ngemuva kwesicelo esisuke sifakwe uNdunankulu wesifundazwe.

Umngcwabo owawungeminye emikhulu kwesike yaba khona eNingizimu Afrika, wawusenkundleni yemidlalo eThekwini, iMoses Mabhida.

UGwala uthe bafuna nencazelo mayelana nesikhungo esasizoqanjwa ngoMeyiwa ukuthi umsebenzi waso usuhambe wafikaphi.

Uthe kubi lokhu ngoba umndeni kaMeyiwa awuhlomulanga lutho ngaphandle kwezimbali ezazilethwa yizikhulu ezazizobhonga emswanini.

Okhulumela uNdunankulu uMnuz Sibusiso Magwaza utshele Isolezwe ukuthi ngeke bakwazi ukuyiphendula imibuzo ngoba konke okubuzwayo kuqondene nohulumeni wesifundazwe hhayi ihhovisi likaNdunankulu.

“Imibuzo siyidlulisele kwabezokuxhumana kuhulumeni abazophendula,” kusho uMagwaza.

Kushone umfana oneminyaka engu-14 okuthiwa udutshulwe yiphoyisa erenki eNanda.

BAWINILE NGCOBO

KUSHONE umfana oneminyaka engu-14 okuthiwa udutshulwe yiphoyisa erenki eMtshebheni eNanda ngesikhathi amaphoyisa ehlakaza isixuku ebesibuka izimoto ebezincintisana ngokushaya izidudla nejubane, ngempelasonto.

Kulesi sigameko kushone uSiphokuhle Sikhakhane (14) waseCongo okuthiwa udubuleke esihlathini ngesikhathi elinye lamaphoyisa amathathu okuthiwa afike ezozama ukuhlakaza lesi sixuku, likhiphe isibhamu ladubula.

Unina kaSiphokuhle, uNksz Bonakele Sikhakhane, uthe kufike abafowabo baSiphokuhle ababili abehambe nabo sebegijima bethukile bezobika ngobesekwenzekile ngezithuba zawo-3.30 ntambama.

Uthe indodana yakhe ihambe nabafowabo ababili oneminyaka engu-16 no 18, beyothenga amaphilisi eMtshebheni, bafika kunalo mbukiso wezimoto ebezishaya izidudla, abantu bemi isixuku bebuka nabo base bema bebuka.

“Laba abehambe nabo bathi kube sekuqhamuka amaphoyisa amathathu, amabili ehlehlisa abantu ngezandla ukuthi basuke kule ndawo kanti elinye iphoyisa likhiphe isibhamu ladubula,” kusho uNksz Sikhakhane.

Uthe babatshele ukuthi bezwe kuqhuma isibhamu babaleka, babuye ngoba sebebizwa ngabantu bethi kudubuleke ingane yakubo.

“Babe sebephuthuma la ekhaya bezosibikela saphikelela khona safika sekuvele konakele, kukhona i-ambulensi ingane isimboziwe,” kulandisa uNksz Sikhakhane.

Abalo mndeni bathi bathwale kanzima esiteshini samaphoyisa eMtshebheni bezama ukuthola okwenzekile nokuthi kumele benzeni njengoba sekunale nhlekelele.

Bathi bafike endaweni yesigameko kwaphela imizuzu elinganiselwa ku-40 kungekho phoyisa elikhona, kukhona awomgwaqo abelawula isiminyaminya sezimoto.

Bebona kungekho phoyisa banyukela esiteshini ngoba le renki ayikude naso, bathola iphoyisa elibabizele elinye abathi alibaphathanga kahle.

Bathi leli phoyisa libuze kuthi bona bazosiza ngani ngoba abazi noma ingane ishayiswe yimoto yini lathi abenze abakubonayo.

Amaphoyisa kuthiwa aze afika ngo-5 ntambama kanti kuze kwaba khona okhuluma nabo ngoba sekufike abashutha izithombe.

UNksz Sikhakhane uthe amaphoyisa abengakaze afike ukuzobachazela ngokwenzekile.

Uthe umakhelwane wakhe owehle etekisini eyobheka ingane ebisilele phansi erenki uboshwe ubusuku bonke washaywa ngamaphoyisa aze amdedela ekuseni izolo.

Ngesikhathi lifika Isolezwe lo makhelwane ubesaye kwadokotela.

USiphokuhle ubefunda eMandlakayise kodwa kwenzeka lesi sigameko nje ubengasafundi ubesalinde ukutholelwa isikhala esikoleni sabakhethekile njengoba enenkinga yokufunda abese ekhohlwa akufundile.

Okhulumela amaphoyisa KwaZulu-Natal uColonel Jay Naicker uthe amaphoyisa ahlaselwe ngabantu abalinganiselwa kwabangu-200 kwabe sekuba nokudubula kwashona umfana oneminyaka engu-14.

Uthe uphiko lwamacala athinta amaphoyisa i-Independent Police Investigative Directorate (Ipid) lubiziwe lwafika endaweni yesigameko.

Uthe amaphoyisa ophiko lwe-POP abizelwe kule ndawo ezoqapha isimo ngoMgqibelo ebusuku ngoba isimo besishubile.

Seziphenduke ondingasithebeni izingane ezashonelwa nguyise.

THEMBA NTSHINGILA

SEZIPHENDUKE ondingasithebeni izingane ezashonelwa nguyise ezikhishwe endlini ngunina ongazizali ngoba ethi ufuna ukudayisa umuzi phezu kokuthi incwadi yefa ivuna zona izingane njengabanikazi bomuzi.

UMnuz Nathi Dladla obehlala nezingane zikamfowabo ezintathu kulo muzi osePhoenix, uthe bakhishwe emzini kamfowabo okule ndawo phezu kokuba ubufakazi bukhona encwadini yefa bokuthi izingane zikamfowabo yizona ezinelungelo njengabanikazi bomuzi.

Ngenkathi Isolezwe lifika kule ndawo bekunemibhede, amafriji nenye impahla yasendlini ebisemnyango okuthiwa yakhishwa yisikhonzi senkantolo.

Ngokusho kwakhe, emva kokushona kukamfowabo owayeyisosha ngo-2008, unkosikazi kamfowabo wahamba sengathi uyabuya kanti useyothenga omunye umuzi eMlazi ngemali kamfowabo eyaphuma emsebenzini.

Uthe yonke le minyaka kade kuhlala yena nezingane zikamfowabo kulo muzi kwaze kwaba yilo nyaka.

Uthe unkosikazi kamfowabo ufike esehamba nabantu angabazi bezobakhiphela ngaphandle komuzi nezimpahla zabo.

“Le nto isihlukumeze kakhulu kangangoba enye yezingane zikamfowethu eyintombazane, yavele yaduka emva kokuba sikhishiwe kulo muzi kamfowethu. Kuyimanje asiyazi ukuthi ikuziphi izinkalo,” kuchaza uDladla othe usola ukuthi ingane yahluleka wukumelana nenhlalo yokulala ngaphandle kwesango nokuhamba ucela emizini yabantu.

Uthe kuyimanje akukhathaleki ukuthi liyana noma cha, balala kumatrasi ongaphandle kwesango bazimboze ngoseyili ngoba akubona bonke abantu abazwelana nabo ngosizi ababhekene nalo.

Kuyimanje uthe kukhona onogada abaqaphe umuzi abenza isiqiniseko sokuthi akekho ongena ngaphakathi.

“Nomfana kamfowethu njengoba ekhala nje uhlukumezekile ngenxa yalesi simo. Bekumele ngabe usesikoleni kodwa akakwazi ukuya ngoba ayikho indawo ehlelekile angahlala kuyona njengoba siphinde sicele ukulala emizini yabantu,” uzikhalele kanje.

Kuyimanje uthe bagqigqa ezinkantolo nasemaphoyiseni benza izincwadi ezifungelwe eziqinisekisa ukuthi incwadi yefa abanayo isemthethweni.

UNkk Zandile Dladla okuthiwa ukhiphe izingane kulo muzi ucele ukuba kukhulunywe nommeli wakhe.

“Cha mina bhuti ngeke ngikwazi ukukhuluma ngalolu daba. Kungcono uthinte ummeli wami.”

UMnuz Anesh Maharaj uthe yinkantolo eyakhipha isinqumo sokuba bakhishwe abasendlini ngoba behluleka ukukhombisa incwadi yefa yangempela.

“Ngabatshela ukuthi abalethe incwadi yefa yangempela kimina noma bayihambise enkantolo. Kuze kube manje abazange bakwenze lokho. Njengamanje akuhlali muntu endlini kuze kube kuvela leyo ncwadi engeyona ifothokhophi,” kusho uMaharaj.