Ngokwencwadi efungelwe eyenziwa emaphoyiseni, kuvela ukuthi uLebese wathola ucingo luphuma kwenye intombi yakhe.

MINENHLE MKHIZE

ISILOMO somdlali weKaizer Chiefs uGeorge Lebese, esisematheni kulezi zinsuku ngamacala amabili esibekwe wona yintombi yaso uSizakele Manonga, sibonakale okokuqala ngempelasonto enkundleni ngemuva kokuphuthwa ngumdlalo wezaso we-Absa Premiership neBloemfontein Celtic ngoLwesithathu.

ULebese oyibamba ngakwesokunxele kuMakhosi akazange adlale ezakhe zibanjwa yiPhunya Sele Sele ngo 0-0 eFree State Stadium ngoLwesithathu ngoba ngosuku olufanayo wayevele enkantolo ePitoli.

Icala lakhe lihlehlele uMashi 9.

NgoLwesibili Isolezwe libike ngodaba lukaLebese obanjwe ngamaphoyisa ngezinsolo zokushaya alimaze intombi yakhe.

ULebese uboshelwe esiteshini samaphoyisa eSilverton ngoLwesibili kodwa wabuye wadedelwa ngebheyili ka-R1 000.

Uboshelwe amacala amabili elokucekela impahla ngenhloso nelokushaya.

NgoMgqibelo uwuqalile umdlalo womlenze wokuqala weCaf Champions League lapho ezakhe zishaye khona iTownship Rollers ngomcacamezelo ka 2-1 eFNB Stadium, eGoli.

ULebese akazange awuqede umdlalo kwazise ngomzuzu ka 56 ukhishiwe indawo yakhe yathathwa nguMandla Masango.

Ngokombiko weCity Press kuvele ukuthi uLebese nesinqandamathe sakhe baxabana bekade beye endaweni yokuzijuxuza edumile ePitoli, iJack Budha.

Ngokwencwadi efungelwe eyenziwa emaphoyiseni, kuvela ukuthi uLebese wathola ucingo luphuma kwenye intombi yakhe.

ULebese akaqali ukutholakala esematheni ngezindaba ezithinta abesifazane kwazise ngonyaka odlule basusana nozakwabo uMorgan Gould bebanga isilomo somculi we-house ne-R& B, uBucie Nqwiliso.

UGould wagcina ethembise uLebese induku emsola ngokuhamba nesithandwa sakhe uBucie ngesikhathi Amakhosi eklomelisa abadlali abashaye into ecokeme ngonyaka odlule.

Ugubuzelwe yifu elimnyama umphakathi waseMthonjaneni, oHiyeni izulu libulala abantu abayisikhombisa.

BAWINILE NGCOBO

UGUBUZELWE yifu elimnyama umphakathi waseMthonjaneni, oHiyeni, KwaNongoma, izulu libulala abantu abayisikhombisa, kwalimala abangu-18 ngempelasonto.

Lesi sibhicongo senzeke emzini wakwaKhoza lapho bekunokhamba lotshwala wesizulu khona kwase kubizwa omakhelwane kuthi bezobusa.

Kulesi sigameko kushone omakhelwane okuwuMfundisi webandla labaPhostoli oMnuz Mboneni Thwalofu Khoza (48), Hlanganani Ntshangase (32), Mfaniseni Ntshangase (32), Thembinkosi Zulu (21), Mqondisi Zulu (28), Mfaniseni Nene (36) noThemba Andreas Zulu (55).

UMnuz Mduduzi Khoza okwehle kubo lesi sigameko, uthe ufike ngoLwesihlanu ephuma e-Alexander, eGoli lapho ehleli khona ngokwetoho wabe esebiza omakhelwane ukuthi ezobajabulisa ngokhamba lwesizulu ngoba bamgadela abantwana.

“Belulodwa nje lolu khamba kanti ngike ngathi ukuhlala nabo kancane kodwa ngoba angiphuzi ngibe sengiphuma ngoba kukhona abesebebhema,” kuchaza uKhoza.

Elandisa uthe uye endlini yakhe engenhla kwase kuqala kuba nomkhizo wezulu.

Uthe kube nenkungu emnyama, kwashaya amathonsi anamandla, lawisa namatshe.

“Kushaye umbani obomvu, ngabe sengivala amawindi nomnyango, endlini kwaba mnyama bhuqe. Indlu ayivuzi kodwa kuvele kwamanzi phansi. Kuqhume isitswebhu sombani kanye. Ngizwe sekungqongqoza uSibiya emnyango ekhafula intuthu ngomlomo wathi ucela ikhandlela, walandelwa uMadondo wathi sekonakele,” kuchaza uKhoza.

Uthe umfowabo omdala obehleli ngasemnyango nabanye abayisithupha baphelele lapho.

Uthe usaqhaqhazela uma ecabanga ngalokhu okwenzekile ngoba izulu like langena kwenye indlu yotshani eyayakhiwe lapho kukhona le okwenzeke kuyo umonakalo.

“Kuleso sigameko ngalimala kwasha indlu kodwa alibulalanga,” kuchaza uKhoza.

UNgqongqoshe wezokuBusa ngokuBambisana neziNdaba zoMdabu KwaZulu-Natal uNkk Nomusa Dune-Ncube, uthe bashaqekile ngesigameko nathe benza konke okusemandleni ukulekelela umphakathi othintekayo.

“Sishaqekile futhi sidumele ngalesi sigameko esilandela esinye esisanda kwenzeka esadlula nabantu abayisithupha eColenso, ePaulpietersburg. Besisazikhotha amanxeba ngaso sekwenzeka enye inhlekelele. Sizwelana kakhulu nemindeni ethintekayo nomphakathi olokhu uba yisisulu sesimo sezulu esingesihle. Kuthunyelwe ithimba lethu kuleya ndawo ukuze lilekelele,” kusho uNkk Dube-Ncube.

Izolo ubehambele kuleya ndawo ukuyoduduza imindeni ekhahlamezekile.

UNgqongqoshe wezekoPhepha KwaZulu-Natal uMnuz Willies Mchunu benoNdunankulu uMnuz Senzo Mchunu nabo badlulise amazwi enduduzo ngalesi sigameko bathembisa ngokweseka imindeni ngakho konke ekudingayo ngalesi sikhathi esinzima.

Uthwele kanzima owesifazane waseMariannhill osebhaliswe njengomuntu osashona.

LUNGI LANGA

UTHWELE kanzima owesifazane waseMariannhill osebhaliswe njengomuntu osashona okuyinto ayithole ngesikhathi ezama ukushaya kabusha umazisi.

UNksz Pretty Khumalo (49) wakwaMamdekazi osanda kuthola ukuthi ubhaliswe njengongasekho wuMnyango wezaseKhaya, uthi akasakwazi nokuthola umsebenzi ngoba kuthiwa akasekho.

Uthe inkinga yakhe iqale emuva kokuthi ezame ukwenza kabusha umazisi wakhe.

“Ngangibona sewugugile futhi nabantu bekhala ngokuthi kwasithombe asisacacile kahle. Angizitshelanga ukuthi kungathatha isikhathi eside nokuthi kungaze kufinyelele ekutheni ngigcine ngitshelwe ukuthi ngibhaliswe njengofile,” kusho uNksz Khumalo.

Uthe uqale ukuzama ukwenza kabusha umazisi ngoMashi 2011. Uhambele emahhovisi oMnyango wezaseKhaya wagcwalisa wonke amafomu wagingqa nezithupha. UNksz Khumalo uthe udlulise isikhashana waya kobheka umazisi wakhe wafike watshelwa ukuthi awukalungi.

Uthe sekuphele iminyaka emine egqigqa emahhovisi alo mnyango ethenjiswa ukuthi umazisi wakhe uzolungiswa.

Ngo-2013 utshelwe ukuthi kukhona omunye umuntu onenombolo kamazisi namagama afana nawakhe oseChiawelo, Soweto.

Uthe utshelwe ukuthi kufanele alethe izincwadi eziqinisekisa ukuthi ngempela uyena uNksz Khumalo futhi usadla anhlamvana.

Uze wadinga ukuthi alethe ikhadi lakhe lomgomo, isitifiketi somshado sabazali bakhe.

Uthenjiswe ukuthi lesi simo sizolungiswa. Umangele ngesikhathi efika ngoJulayi nyakenye esetshelwa ukuthi usebhalwe kwabangasekho.

Lesi simo sesimdalele izinkinga ngoba akasawutholi umsebenzi futhi akakwazi nokuvuselela imali yesibonelelo sengane ayikhulisayo eyashonelwa nguyise.

Uthe ukhathazekile ngoba ngisho kungathiwa uyashona umndeni wakhe uzoba nenkinga ngoba umasingcwabisane ngeke ukhokhele umuntu okuthiwa usashona kudala. AboMnyango wezaseKhaya bebengakaphenduli ngalolu daba emuva kokuthunyelelwa imibuzo.

Lishabalele iphupho lomfana lokuba yiphoyisa emuva kokubanjwa wugesi obuxhunywe ngokungemthetho.

INTATHELI YESOLEZWE

LISHABALELE iphupho lomfana (5) lokuba yiphoyisa emuva kokubanjwa wugesi obuxhunywe ngokungemthetho emijondolo yase Shallcross ngaseChatsworth.

UMhlengi Bright Mhlongo ubehamba ngezinyawo ngesikhathi ebanjwa wugesi ephuma ehlathini eliseduze komfula uMhlatuzana eyozikhulula ngoMgqibelo.

Ngesikhathi enqamula ematsheni asemfuleni ube esebanjwa ugesi obuxhunywe ngokungemthetho. Unina uNksz Tholakele Hlophe uthe indodana yakhe izamile ukweqa amakhebuli kodwa unyawo lwayo lagaxela. “Abangani bakhe abebengaphandle emfuleni bashaqekile bembona ebanjwa wugesi base bengithinta. Ngiphume endlini ngaphuthuma ngambona elele ebheke phansi emfuleni unyawo lwakhe lusabambekile kwikhebuli. Ngizamile ukumfukula kodwa ngezwa ugesi ungishoka,” kuchaza uNksz Hlophe.

Uthe uthathe ipulangwe waphusha umlenze wakhe ewususa ezintanjeni zikagesi. Umthwalile eya naye lapho behlala khona kodwa bese lidume ledlula kuMhlengi. Amakhebuli ezintambo zikagesi wezinyokanyoka anqamula emfuleni ase egaxwa ezihlahleni nasematsheni ukwenzela ukuthi angahlangani namanzi. Izintambo ziyaqhubeka zize ziyoshaya ezindlini eziyimijondolo.

Emuva kwalesi sigameko abasebenzi bakamasipala bazinqamule zonke izintambo zikagesi kule ndawo.

Ugogo kaMhlengi, uNkk Fikile Hlophe, uthe kusukela ngo-1994 bebelindele ukwakhelwa izindlu. “Umzukulu wami ushonile ngenxa yezethembiso ezingafezeki. Sifuna izindlu ezisesimeni esikahle futhi sikwazi nokukhokhela ugesi kodwa izikhulu zenza izethembiso nakwezinye izindawo,” kusho uNkk Hlophe.

Uthe akukhona ukuthi izikhulu aziyazi inhlalo yabo kule ndawo kodwa naphezu kwalokho abakalilahli ithemba.

Ilungu lekomidi laku ward 63, uNksz Ntombi Ngidi, lithe umndeni uthole ukululekwa ngokwengqondo emuva kwesehlo.

Uthe bebengazi ngezintambo zikagesi ezinqamula emfuleni.

Okhulumela uMnyango wezokuBusa ngokuBambisana nezindaba zoMdabu, uMnuz Lennox Mabaso, uthe umnyango weluleka omasipala ngokuthi kuqalwe umkhankaso wokwazisa abantu ngengozi yokuxhuma ugesi ngokungemthetho.

“Kumele kube ngumphakathi, hhayi abaholi abafundiseka ngokuxhunywa ngokungemthetho kukagesi. Umphakathi uyazibona lezi zinto kodwa uthule. Kugcina ngokufa abantu abangenacala nezingane,” kusho uMabaso.

Okhulumela umasipala weTheku, uMnuz Thabo Mofokeng, uthe bathola imibiko ngabantu ababanjwa ugesi wezinyokanyoka zinsuku zonke.

Uthe abahambisani nalokhu ngoba kuyingozi emphakathini.

Usizi belubhalwe ebusweni kubantu bendawo. UMnuz Mduduzi Khoza obenze ukhamba bekungavumi nokuthi akhulume ethi kunzima.

BAWINILE NGCOBO

UMA uqhamukela endaweni yaseMthonjaneni, oHiyeni KwaNongoma, uhlangatshezwa ujenge lwezimoto zabethimba lezinhlekelele abahamba bengena umuzi nomuzi olahlekelwe ngesikhathi kugadla izulu emzini wakwaKhoza kwashona abayisikhombisa.

Kwesinye isigameko esenzeke eBhanganomo ngoMgqibelo kushone ababili okuthiwa bashaywe ngumbani ngesikhathi begibele iveni.

EMthonjaneni, kwaKhoza ngeSonto bekuthule kodwa kukhona abebesegcekeni nemoto yababhalisa amagama abebekhona endlini eshaywe ngumbani.

Abanye bakulo mndeni basemzini wendodana yakhona endala eshone ngesikhathi kungena izulu eliyifice ihleli ngasemnyango. Indlu okwenzeke kuyo isigameko isale ineminkenke ngaphandle lapho kuthiwa kungene khona ibhola elibomvu. Ngaphakathi awudingi kubuza ukuthi kwenzekeni kodwa izindonga zixoxa indaba.

Ngasohlangothini olungaphesheya, lapho kuthiwa liphume khona, kunembobo. Phansi kunezinsalela zodonga olugqebhukile. Amacansi obekuhleli kuwo abebekule ndlu amapeketwane kuyakhombisa ukuthi kuhlukwane sekonakele. Ukhamba obeluhlanganise abantu lusahleli ocansini, obunye utshwala obebuphakathi busaphazeke phansi. Eduze kokhamba kukhona ibhakede elimhlophe elivaliwe. Eduze kwakwaKhoza abantu baphuma bayangena emzini wakaNtshangase lapho kushone khona ababili abanye ababili balimala kulesi sigameko. Emizini eshonelwe sekukhanyiswe amakhandlela kanti uma kuqhamuka abasindile bayajatshulelwa kubongwe ukusinda kwabo. Imizi eshonelwe isondelene kanti ayikho indaba ekhulunywayo kule ndawo ngaphandle kweyalesi sibhicongo.

Usizi belubhalwe ebusweni kubantu bendawo. UMnuz Mduduzi Khoza obenze ukhamba bekungavumi nokuthi akhulume ethi kunzima.

UNgqongqoshe wezokuBusa ngokuBambisana nobuHoli boMdabu uNkk Nomusa Dube-Ncube uhambele imindeni ethintekayo ngeSonto.

Uthe uhulumeni wesifundazwe uzolekelela imindeni ngamalungiselelo okungcwaba.

Uthe kuzofakwa izikhonkwane zokuvimba izulu emizini okushonwe kuyo kule nhlekelele.

Kuzonikwa nosizo lokweluleka ngokomqondo imindeni nezingane ezibone lesi sigameko.

UNkk Dube-Ncube usenxuse imiphakathi ukuthi izilalele izeluleko zokuba kufakwe izikhonkwane ezivimba umbani ngoba lokhu kungasiza ukuyivikela ezigamekweni ezinje.

Kulindeleke ukuthi kuphinde kushube namuhla ePhalamende.

sapa

KULINDELEKE ukuthi kuphinde kushube namuhla ePhalamende njengoba kuzobe kunenkulumo-mpikiswano ngenkulumo kaMengameli Jacob Zuma ayithule esizweni ngesonto eledlule. Izolo kube nomhlangano wosotswebhu bamaqembu ukulungiselela inamuhla. Amaqembu aphikisayo asola ukuthi isimo sizoshuba kakhulu namuhla.

“Akujwayelekile ukuthi kube nomhlangano ofuze lo ngoMsombuluko. Imihlangano yosotswebhu ijwayele ukuba ngoLwesithathu futhi kuzongimangaza uma singeke sikhulume ngokwenzeka ngoLwesine olwedlule,’’ kusho uSotswebhu weDA uMnuz John Steenhuisen.

USotswebhu we-EFF uMnuz Floyd Shivambu akatholakanga ukuthi aphawule ngombono weqembu lakhe kulolu daba.

Lo mhlangano ulandela okwenzeka ngoLwesine olwedlule ngesikhathi uMengameli Zuma ethula inkulumo yakhe yesizwe waphazanyiswa yi-EFF eyayibuza ukuthi uzoyikhokha nini ingxenye yemali eyasebenza ngesikhathi kuqiniswa ezokuphepha emzini wakhe eNkandla.

Ngemuva kokuthi amaphoyisa abizwa yizikhulu zePhalamende ukuthi akhiphe amalungu e-EFF, nabe-DA babonakala sebephuma besola i-ANC ngokuthi yenzisa okukahulumeni wangesikhathi sobandlululo.

Abe-DA nabe- EFF basabonisana nabameli babo njengoba befuna ukumangalela iPhalamende ngesenzo sangesonto eledlule emuva kokubizwa kwamaphoyisa.

Nokuvalwa kukalayini wezincingo okwenzeka ePhalamende ngeledlule nakho bekulindeleke ukuthi kuxoxwe ngakho emhlanganweni wayizolo.

Abe-DA nabeFreedom Front Plus bazama ukuphosa imibuzo uZuma ngaphambi kokuthi ethule inkulumo yakhe.

Basola iPhalamende ngokunqamuka kukalayini njengoba nabezindaba babezoba nenkinga yokubika bengaphakathi ePhalamende.

Ngaleso sikhathi uSomlomo wePhalamende uNkk Baleka Mbete wathi uzocela ihhovisi lakhe ukuthi lenze uphenyo ngalesi sigameko.

Sigwetshwe iminyaka engu-12 isitabane esizivumele icala lokubulala isoka laso esalibamba oqotsheni liwotawotana nomunye emgwaqweni.

BAWINILE NGCOBO

SIGWETSHWE iminyaka engu-12 isitabane esizivumele icala lokubulala isoka laso esalibamba oqotsheni liwotawotana nomunye emgwaqweni eThekwini, ngesonto eledlule.

UNkosinathi Emmanuel Mbatha (23) ugwetshwe yiNkantolo yesiFunda eThekwini izolo emuva kokuthi evume icala lokugwaza isoka lakhe uMnuz Melusi Khumbule ngoLwesithathu olwedlule.

Encwadini efungelwe avume ngayo icala efundwe enkantolo ngummeli wakhe u-Advocate Donald Somo, uMbatha uthe ngoLwesithathu olwedlule ngezithuba zawo-8 ebusuku wafica isoka lakhe uKhumbule liwotawotana nomunye umngani wabo emgwaqweni uMansel, eThekwini.

Uthe waqonda esokeni lakhe eyolibuza ngalokhu, baba nengxabano, wabe eseligwaza ngommese esifubeni, wabaleka. Kule ncwadi uMbatha uveze ukuthi uyazisola wacela inkantolo ukuthi imzwele.

Enkantolo kuvele ukuthi uMbatha akanawo amanye amacala aseke amlahla ngaphambilini.

USomo emcelela ukuthi inkantolo imzwele uthe usimelile isenzo sakhe ngokuthi avele alivume icala.

Uthe ukhombisa ukuzisola kanti lokhu akwenza kwakungenxa yokudinwa.

Uthe uMbatha usengalungiseka isimilo ngakho inkantolo kumele imcabangele uma isimnika isigcwebo.

UMshushisi uMnuz Calvin Govender uthe icala lokubulala libucayi kanti uMbatha akangabazanga ngaphambi kokuthi abulale uKhumbule.

Uthe akamnikanga ithuba lesibili uKhumbule wavele wambulala.

Umshushisi uthe umphakathi usukhathele ilezi zigameko zabantu abavele bathathe ummese bagwaze abanye.

IMantshi uNkk Fariedha Mohamed ithe sekunamacala amaningi afana nalawa lapho abantu bavele bagadle ngommese kushone abanye.

Uthe abantu babheke ezinkantolo ukuthi zibasize ukuze kunciphe lo mkhuba futhi isigwebo ngeke simbuyise umufi.

Kusolwa umbango embonini yamatekisi ngokubulawa komunye usomatekisi wakwaSwayimane.

NONTUTHUKO NGUBANE

KUSOLWA umbango embonini yamatekisi ngokubulawa komunye usomatekisi wakwaSwayimane ohlaselwe ekwakhe wabulawa phambi kwezingane zakhe ngabantu okusolwa ukuthi bebemcuthele.

UMnuz Mpikayipheli “Ntshebe” Mbeje (55) ubengumnikazi wamatekisi anombhalo othi So Victim ahambela kwaSwayimane ngaseMgungundlovu naseMayville eThekwini.

UMbeje obebuye asebenze kuMasipala waseThekwini kuthiwa udutshulwe ngezinhlamvu ezingu 16 esendlini yakhe.

Umfowabo kamufi uMnuz Mtitinywa Mbeje uthe bebehlezi bonke endlini enkulu kwathi umfowabo eseyolala endlini yakhe bezwa kuqhuma isibhamu.

“Umfowethu uvalelisile eseya endlini yakhe eseyolala ngo-11 ebusuku. Nathi sihambile saya ezindlini zethu. Sizwe ukuqhuma kwesibhamu kaningi kuvela endlini yakhe. Sithe uma siphuthuma siya khona samfica edutshulwe ngenqwaba yezinhlavu esethule. Konke lokhu kwenzeke phambi kwezingane zakhe ebezibukela zisendlini edutshulwa ngesihluku esimangalisayo. Enye yezingane zakhe encane eneminyaka engu-15 ibizitshela ukuthi kuqhuma ugesi kanti uyise uyadutshulwa. Siyasola ukuthi abantu bebemlalele unyendle eduze kwendlu yakhe,” kusho umfowabo.

Uthe amalungu omndeni asathukile ngokwenzekile.

Umthombo osondelene nalo mndeni ongathandanga negama ngenxa yesimo endaweni uthe basola umbango wamatekisi ngokubulawa kukamufi.

“UNtshebe ubengumuntu wabantu akakaze axabane namuntu. Ubethanda ukusiza abantu engenakho ukuphakama ngoba enemali noma amatekisi. Uma kufika umphakathi ucela imoto ngokuphuthuma ubengabuzi izinto eziningi ubevele ayikhiphe. Kuyasicacela ukuthi ukubulawa kwakhe kuhlangene nombango wamatekisi oqhubekayo lapha,” kusho umthombo.

Umufi kuvele ukuthi ubenamatekisi ayisishiyagalombili.

Okhulumela amaphoyisa KwaZulu-Natal uMajor Thulani Zwane uthe akukaboshwa muntu ngalesi sigameko.

“Amaphoyisa aseMsunduzi aphenya icala lokubulawa komuntu kulandela ukudutshulwa kowesilisa oneminyaka engu-55 emzini wakhe. Ayaziwa imbangela yokubulawa kwakhe. Uphenyo lusaqhubeka,” kusho uZwane.

UNtshebe uchazwe umndeni wakhe njengomuntu onobubele obehlezi eqhulula amahlaya.

“Silahlekelwe kakhulu emndenini ngoba kuningi abesenzela khona. Ubengakhombisi ukuthi ungumuntu onemali ubehlezi efaka isandla ukuthuthukisa umndeni. Asazi ukuthi isikhala asishiyile sizovalwa ngubani,” kusho uMbeje.

Umufi wayenamakhosikazi amabili, uMaNgcobo noMaNdwandwe, uMaNgcobo usashona. Ushiye izingane zakhe eziyisithupha, abafowabo abayisihlanu nodadewabo oyedwa. Uzofihlwa ngoMgqibelo khona kwaSwayimane.

Kubashubele abahlala ngokungemthetho ehostela labesifazane iThokoza eThekwini.

MLUNGISI GUMEDE

KUBASHUBELE abahlala ngokungemthetho ehostela labesifazane iThokoza eThekwini ngemuva kwesinyathelo sikaMasipala weTheku sokubaxosha nezingane zabo ezizalelwe khona.

Abantu abaxoshwayo kakhulu kuleli hostela yizingane, iningi lazo okungabafundi ezikhungweni zemfundo ephakeme eThekwini, kanye nabadala abangenazo izimvume zokuhlala khona.

NgoMsombuluko izingane nabantu abangenazo izimvume zokuhlala kule ndawo zicishe zalala emnyango onogada benqaba ukuthi zingene ngaphakathi kusize ukufika kobuholi boBumbano lwamahostela.

Izolo izingane eziningi nabantu abadala abahleli ngokungemthetho azizange zikwazi ukuphuma kuleli hostela ziye esikoleni ngoba zisaba ukuthi ngeke zisakwazi ukubuyela ngaphakathi.

NgoLwesine olwedlule umasipala ukhiphe umnqamulajuqu wezinsuku eziyisikhombisa ophele ngoMsombuluko lapho uthe awusadinge ngane ngaphakathi kuleli hostela.

Okhulumela umasipala weTheku, uMnuz Thabo Mofokeng, uthe sebenesikhathi bexoxisana nomphakathi waseThokoza bewucela ukuthi uhambise izingane emakhaya kodwa kunhlanga zimuka nomoya.

“Umasipala uze wagcina usubanika umnqamulajuqu wezinsuku eziyisikhombisa, sesiqalile ukuzixosha izingane nalabo abadala abangenazo izimvume zokuhlala kule ndawo,” usho kanje.

UMofokeng uthe ihostela laseThokoza alikathuthukiswa lafika esimeni sokuthi sekungahlala imindeni kulona.

“Uhlelo lokuthuthukiswa kwamahostela luyaqhubeka naseThokoza siyabanxusa abantu bakhona ukuba bahloniphe imigomo yangaphakathi,” usho kanje.

Uthe okunye abakwenzayo wukubhalisa abantu ukuze bathole ngempela ukuthi ngobani abanikazi bezindawo, wengeza ngokuthi lolu hlelo lusiza ekunciphiseni ubugebengu nokugcwala ngendlela eyeqile.

Okhulumela uBumbano lwamahostela KwaZulu-Natal, uMnuz Mthembiseni Thusi, uthe bazosiphikisa lesi sinyathelo sikamasipala sokuxosha izingane eThokoza.

“Sesifake incwadi enkantolo evimba umasipala ukuthi uqhubeke nesinqumo sawo,” usho kanje.

UThusi uthe abahambisani nalesi sinqumo ngoba sasisetshenziswa ngesikhathi sobandlululo.

“Kwakukudala lapho kwakuthiwa emahostela izingane azifuneki manje sesiphila ngesikhathi sentando yabantu asikwazi ukuhlukanisa izingane nabazali bazo,” usho kanje.

Uthe uma umkhandlu uzixosha izingane kumele uzihlinzeke ngenye indawo yokuhlala ngoba uma uzixosha ngale ndlela zizophenduka ondingasithebeni zigcine sezidlala osikhotheni bewunga abagcwele imigwaqo yeTheku.

Sesifinyelele kwabayisishiyagalombili isibalo sabafundi baseFezokuhle Primary ababulawe yingozi yeveni.

NONTUTHUKO NGUBANE

SESIFINYELELE kwabayisishiyagalombili isibalo sabafundi baseFezokuhle Primary ababulawe yingozi yeveni elaphaphalaza lakhalakatheka emzini womuntu ngenyanga edlule eMbali eMgungundlovu.

UNonzuzo Zuma (11) obefunda uGrade 7 ushonele esibhedlela e-Edendale ngoMsombuluko ebusuku kulandela ukuhlala egunjini lababangwa nezibi kusukela ngelanga lengozi ngoJanuwari 28.

Lo mfundi kuvele ukuthi akakaze avuke noma akhulume selokhu kwenzeka le ngozi. Kuthiwa washayeka kanzima ekhanda wophela ngaphakathi.

Uyise uMnuz Sipho Zuma uthe ngabe kungcono ukube wakhala kwaba kanye ngendodakazi yakhe ebisezinhlungwini.

“Ukubona ingane yami isezinhlungwini ezimangalisayo selokhu kwenzeka ingozi bekungenza ngithi ngabe ukube ngakhala kwaba kanye njengabanye abazali izingane zabo ezashona ngelanga lengozi. Selokhu alimala akakaze avuke. Ngelanga lengozi ngaya esibhedlela ngamfica elimele kakhulu igazi liphuma ngezindlebe nangamakhala. Odokotela bangitshela ukuthi ubuchopho bakhe bulimele kakhulu ngoba ufahlake ukhakhayi.

“Ubesehlinzwe kathathu, ubuchopho bakhe buvuvukala. Bengiyivakashela zonke izinsuku ingane yami ngifice ixhunywe amapayipi eshuthekwe emlonyeni, ingakwazi ukuphefumula kahle ubona ukuthi ithwele kanzima,” kusho uZuma obecweba izinyembezi.

Lo mfundi waphuthunyiswa e-Inkosi Albert Luthuli Hospital nakhona isimo sakhe sangaba ngcono base bambuyisela e-Edendale lapho eshonele khona.

“Ngizwe ubuhlungu kakhulu ngale ngane ngoba benginethemba lokuthi ingahle ilulame, bengingasalali ngicabanga. Odokotela babengitshelile ukuthi yize engalulama kodwa useyokhubazeka impilo yakhe yonke ngoba ngeke esakwazi ukuhamba nokuzifunza,” kusho uMnuz Zuma.

Uthe uNonzuzo ubesegibele iminyaka emibili kule veni.

Isikole nesigungu sabazali (SGB) sidlulise amazwi enduduzo kulo mndeni ngokushona kwalo mfundi oyingane yesithathu kwezine zakaZuma.

NgoFebhuwari 1 nonyaka ehholo lo mphakathi eLay Centre, e-Edendale kwaba nenkonzo yomngcwabo yabafundi abayisikhombisa abashona kule ngozi.

Umshayeli weveni naye wayelaliswe esibhedlela kodwa waphuma ngeledlule. Ugcine esekhonjwa izihlobo zakhe eThekwini kanti amaphoyisa akakaze ambeke icala njengoba atshela leli phephandaba ukuthi asaphenya.

Kucasuke abezindaba ngesikhathi uMnuz Rasereti Tau evimbela uNkk Baleka Mbete ekutheni aphendule mayelana nokubiza uMnuz Julius Malema ngekokoroshe.

INTATHELI YESOLEZWE

KUCASUKE abezindaba ngesikhathi iphini likaSihlalo woMkhandlu wezifundazwe, uMnuz Rasereti Tau, livimbela uSomlomo wephalamende, uNkk Baleka Mbete (osesithombeni), ekutheni aphendule mayelana nokubiza umholi we-EFF, uMnuz Julius Malema, ngekokoroshe.

Lokhu kwenzeke izolo esithangamini nabezindaba ebesihlanganisa uSomlomo, uNkk Baleka Mbete, iphini lakhe, uMnuz Lechesa Tsenoli, uSihlalo woMkhandlu weziFundazwe, uNkk Thandi Modise nephini uTau.

Abezindaba babuze uNkk Mbete ukuthi ngabe wayeqonde ukuthini uma ebiza uMalema ngekokoroshe ngoba i-ANC iyakuchitha ukuthi wayeqonde okubi ngalokhu.

Lo mbuzo uNkk Mbete akazange awuphendule kodwa umuntu ogxume wahlala kuwo ewuphendula kube nguTau othe okwenzeke engqungqutheleni ye-ANC lapho uNkk Mbete ebize khona uMalema ngekokoroshe akuhlangene nephalamende.

“UNkk Mbete ubeseNorth West ngokuthunywa yiLuthuli House ngakho akusho khona bekungahlangene nezinto zasephalamende,” kusho uTau.

Uthe esephakathi nenkulumo yakhe izintatheli zakhombisa ukungenami enye yaze yamthulisa imbuza ukuthi uwuphendula ngaliphi lo mbuzo ngoba uqondene noNkk Mbete okunguye okufanele aphendule.

UTau ugcine esethi ubephendula ngoba naye uyingxenye yesithangami esihlanganisa bonke abaholi ngakho unelungelo lokuphendula imibuzo.

UNkk Modise uthe uma kungabhekwana nezinto ezenzeka ngaphandle kwephalamende kusho ukuthi kuzogcina kungasetshenzwa kulitshelwe yizo.

UNkk Mbete ugxekwe kakhulu ngokusebenzisa ikokoroshe kangangokuthi abanye balichaza ngokuthi ligqugquzela udlame. Bathe emazweni ase-Afrika kunezindawo okwasuka kuzo umbhedukazwe kwafa abantu ngenxa yokufaniswa kwabaholi abathile nezilwane.

Izolo uthe konke okusuke kwenzeka enkundleni yezepolitiki kumele kugcine lapho njengoba bonke bengosopolitiki kodwa kungafakwa ephalamende.

Abaholi bamaqembu aphikisayo bashiye abangalazi benaphaza uMengameli Jacob Zuma behlaziya inkulumo yakhe yesizwe.

CELANI SIKHAKHANE

ABAHOLI bamaqembu aphikisayo bashiye abangalazi benaphaza uMengameli Jacob Zuma izolo behlaziya inkulumo yakhe yesizwe ayenze ngoLwesine bemchaza njengoMengameli oyisehluleki ohola neqembu lezehluleki. UZuma ubehleli ethule elalele kwezinye izikhathi ahleke ngesikhathi abamaqembu aphikisayo bengazibekile phansi bemgxeka.

Ngaphandle kokugxekwa kukaMengameli Zuma kube nokusetshenziswa kwamagama alumelayo abaholi abebewasebenzisa bethula izinkulumo.

Umholi we-DA uMnuz Mmusi Maimane ube ngowokuqala ukushiya angalazi kuZuma nohulumeni wakhe.

UMaimane uthe ngesikhathi isizwe silila ngeledlule ePhalamende uZuma ubelibele ukuhleka engenandaba nobuhlungu obebubonwa abantu ngenxa yezwe labo elicekeleka phansi.

“Ungumholi oyisahluleki Mengameli futhi akukho ukuhlonipheka ngawe kodwa osekusele ukuthi uphume uphele emandleni okuphatha izwe. Ngesonto eledlule usethulele inkulumo yesizwe engathi shu. Akugcini lapho Mengameli kodwa ezinsukwini ezinhlanu ezedlule ufake leli Phalamende ehlazweni kwangena amaphoyisa ashaya amalungu akhethwe umphakathi kodwa wavele wazihlekela wangakunaka lokho. Wehlule futhi udlula ngisho izikhathi zobandlululo, uyindoda eyisehluleki engenakho nakancane ukuhlonipheka,” kusho uMaimane.

Akugcinanga lapho kodwa nelungu le-NFP ePhalamende uMnuz Maliyakhe Shelembe likhwele ladilika kuZuma lathi inkulumo yakhe ibingenalutho kodwa ibisagcwele izethembiso ezingekho.

Uthe uZuma uzizungeze ngabangani bakhe abahlose ukuzicebisa ngohulumeni nokuthi bamvikele.

UGeneral Bantu Holomisa we-UDM uthe baphoxekile ngoZuma nangezinto ezenzeke phambi kwakhe ngesonto eledlule.

“Kutshalwe amaphoyisa abebekwe sengathi abantu abangabasebenzi balapha ePhalamende abangoweta abalethe amanzi noma ukudla njengoba abegqokiswe izimpahla ezimhlophe. Ngakho ngithi nina bantu bakhe be-ANC mthatheni uMengameli nihambe naye aye ekhaya ayophumula,” kusho uHolomisa .

Umholi we-EFF uMnuz Julius Malema wenze okungejwayelekile wazama ukuzibamba wazehlisa wagxila enkulumeni yakhe eyala i-ANC noZuma ukuthi ngokwakhe inkulumo yesizwe ubefisa ime kanjani futhi ibhekane ngqo nezindaba ezithinta umphakathi ikakhulukazi lezo ezibalulwa kuFreedom Charter.

“Namhlanje ngeke ngigxile odabeni lwaseNkandla njengoba ngesonto eledlule sashaywa amaphoyisa amanye angibamba kabuhlungu ubuntu bami. Nokho siyethemba ukuthi ngenyanga ezayo uzosicacisela ukuthi uzoyikhokha nini ingxenye yamali eyasebenza kungafanele kuqiniswa ezokuphepha kwakho,” kusho uMalema.

UDkt Mangosuthu Buthelezi we-IFP uqale ngokuncoma uZuma wathi uhulumeni wakhe ubambe ngakho ekulweni nesifo sengculazi nesandulela sayo ngakho ubona kufanele ashayelwe ihlombe kulokho.

“Nokho okubi ukuthi impilo yabantu bakithi inzima njengoba i-ANC kusukela ngo-1994 yabathembisa ikusasa eliqhakazile kodwa kuze kube yimanje i-ANC isathembisa abantu lelo kusasa elingafiki.

Ngabe akusona isikhathi lesi okufanele i-ANC ithembeke kithina ngezinto ezishoyo” kusho uButhelezi.

Uthe uma i-ANC yenza kahle i-IFP iyoma nayo kodwa uma kusho ukuthi izinto azihambi kahle bayoba sohlangothini lwamaqembu aphikisayo noma bazimele.

Kuthe kusenjalo kwangena uNkk Pamy Majodina we-ANC ogadle kwezwakala emaqenjini aphikisayo ewatshela ukuthi awakhohlwe ngoba uZuma isizwe sonke siyamthanda futhi siyameseka ngezinto azenzile.

“Ngaphansi kobuholi bakho Msholozi kube nemfundo yamahhala, abantu abadala bavikelwa abanye bakhelwa izindlu ezilungile izingulube zisho ezikushoyo,” kusho uNkk Majodina.

UNksz Phumzile Van Damme we-DA uthwale kanzima ngesikhathi amanye amalungu e-ANC emvimba ukuthi akhulume ngoba ethi akanabo ubuzwe bakuleli ngoba ungowokudabuka eSwazini.

Uze waphoqwa ukuba axolise emuva kokusebenzisa amagama alumelayo ewaqondise kuNdunankulu waseFree State uMnuz Ace Magashule.

UMnuz Pravin Gordan uxwayise amalungu ePhalamende ngokuthi kumele axazulule izinkinga zawo ngokuhlala phansi abonisane njengabantu abadala kunokugxila ezintweni ezingayi ndawo.

UNksz Thandi Mahambehlala ukhwele wadilika kuMalema wathi akalutho kodwa ugcwele inzondo embi ngendlela eyinqaba wathi basebenzisa isiqubulo sabo sokuthi uZuma akakhokhe ngoba bezifunela udumo.

Namhlanje iyaqhubeka le nkulumo kanti uZuma uzothola ithuba lokuziphendulela kusasa.

Izolo uSomlomo wePhalamende uNkk Baleba Mbete ubengekho kwingxoxo mpikiswano ngenkulumo kaZuma kodwa ubebanjelwe iphini lakhe uMnuz Lechesa Tsenoli, usihlalo weNational Council of Provinces uNkk Thandi Modise, iphini lakhe uMnuz Raseriti Tau kanye nosihlalo wendlu uNksz Thoko Didiza.

Basadidekile abomndeni wabashadile baseChesterville abaduke ngeSonto izidumbu zabo zatholwa ngokwehlukana ngaseLovu.

BAWINILE NGCOBO

BASADIDEKILE abomndeni wabashadile baseChesterville abebenomuzi eMorningside, eThekwini, abaduke ngeSonto izidumbu zabo zatholwa ngokwehlukana eWinkelspruit, ngaseLovu.

Izidumbu zikaMnuz Innocent Maishi (38) nesomkakhe uNkk Smangele Maishi (33) zitholwe ngoMsombuluko.

EsikaMnuz Maishi sitholwe ngumuntu thizeni ebhishi eWinkelspruit sinamanxeba okugwazwa ngemuva nasesifubeni nelokudutshulwa ekhanda.

Esomkakhe kuthiwa sitholwe ngumshayeli weloli lapho kulahlwa khona imfucuza eLovu sinenxeba lokudutshulwa ekhanda.

Imoto abebehamba ngayo iToyota Hilux kuthiwa i-tracker ithole ukuthi ibisiyowela umngcele waseLesotho kanti itholwe isishiywe enxanxatheleni yezitolo eFicksburg, eFree State.

Udadewabo kaMaishi, uNksz Lindiwe Maishi, uthe bathole umyalezo komunye udadewabo ngoMsombuluko ukuthi umfowabo nonkosikazi wakhe badukile.

Emuva kokuthi sithole lo myalezo singumndeni, udadewethu ube esecabanga ukuthi kuyiwe emaphoyiseni.

“Umamncane wezingane zabo abebemshiye nezingane ekhaya uveze ukuthi babethe baya eMgababa kodwa akucaci ababeyokwenza. Babethe bazobuya ngabo-7 ebusuku kodwa kuthe uma kushaya o-10 ebusuku bengabuyi wabe esethinta amaphoyisa,” kusho uNksz Maishi.

Uthe kusabadida ukuthi babeyaphi eMgababa njengoba izidumbu zabo zitholwe ngokwehlukana ngoMsombuluko.

“Umfowethu utholwe ekuseni ngumuntu thizeni ebhishi, umakoti utholwe ngabo-3 ngumuntu oshayela iloli eLovu,” uchaze kanje.

UMaishi kuthiwa ubeyimenenja ophikweni olukhipha amathenda kwaVeolia Water eSouth Coast.

Umndeni uthe usuthembele emaphoyiseni ukuthi azophenya aze alithole iqiniso lokuthi bekwenzenjani beze bebulawa ngesihluku esingaka bashiye izingane zabo zabafana ezincane.

UNksz Maishi uthe kubuhlungu okubehlele kodwa babonga ukuthi izidumbu zabo zitholakele.

Umndeni uthe ucela umphakathi ukuthi usize uma unolwazi ukuze kubanjwe abenzi bobubi kanti babonga kulabo abathole izidumbu base behlaba umkhosi emaphoyiseni.

Izihlobo nomakhelwane bebengena kulo muzi wakwaMaishi bezobhonga emswaneni.

Okhulumela amaphoyisa KwaZulu-Natal, uMajor Thulani Zwane, uthe baphenya amacala amabili okubulala kanti akukaboshwa muntu.

‘Niyiqulu leziqhwaga eliholwa esinye isiqhwaga.” Lena indlela inkantolo yaseThekwini echaze ngayo iqulu lamaphoyisa kamasipala ahlasela umshushisi.

NKULULEKO NENE

‘NIYIQULU leziqhwaga eliholwa esinye isiqhwaga.” Lena indlela inkantolo yaseThekwini echaze ngayo iqulu lamaphoyisa kamasipala ahlasela umshushisi owabe engekho emsebenzini ngoba ethathe izithombe zelinye lamaphoyisa likhuluma neselula lishayela.

Umholi wala maphoyisa, uThulisile Zondi (30), akakholwanga ngoMsombuluko ngesikhathi inkantolo yaseThekwini imhlawulisa u-R24 000 noma iminyaka emibili ejele ngecala lokushaya uNksz Nontobeko Biyela. Ingxenye yesigwebo ilengiswe iminyaka emihlanu.

Ngesikhathi evele enkantolo ubephelezelwa yiqulu labanye ozakwabo abalinganiselwa ku-50 abebezomeseka. IMantshi, uGarth Davies, uthe akekho umuntu ongaphezu komthetho, ngisho osopolitiki kodwa kukhona abangawuhloniphi.

UThulisile watholwa enecala ngenyanga edlule emuva kokushaya nokubopha ngokungemthetho uNkk Biyela owamthatha isithombe eshayela ekhuluma neselula. Lesi sigameko senzeka ngoMeyi 2013. UNkk Biyela kuthiwa wayesemotweni ngesikhathi uThulisile edlula ngemoto eqoqa amanye amaphoyisa esifazane.

Ebufakazini bakhe ngaleso sikhathi uNkk Biyela bambona uThulisile ekhuluma neselula eshayela baze benza ihlaya lokuthi ukube wumuntu nje bebengambopha.

Amaphoyisa abe esehlehlisa imoto yabo abuza uNkk Biyela ukuthi kungani ethatha izithombe. UThulisile wathukuthela waphuma emotweni kanye namanye amaphoyisa. elinye iphoyisa lamnxusa ukuba asule izithombe.

Uthe washaywa wagcinwa ezitokisini eDurban Central waze wakhishwa ebusuku. UThulisile ubephika ukuthi wamshaya uNkk Biyela.

Ngaphambi kokukhipha isigwebo iMantshi, uDavis, uthe uThulisile akazange akhombise ukuzisola.

Okhulumela amaphoyisa kamasipala, uSenior Superintendent Eugene Msomi, uthe bazofunda kahle isigwebo semantshi bese beyaphendula. Ummeli kaZondi uthe bazolidlulisela phambili icala. UThulisile ube esekhokha ibheyili ka-R8000 ukuze adedelwe ngesikhathi icala lidluliswa.

Sebeveza amahlazo e-EFF emphakathini abaholi abamisiwe kuleli qembu.

INTATHELI YESOLEZWE

SEBEVEZA amahlazo e-EFF emphakathini abaholi abamisiwe kuleli qembu njengoba izolo uNkk Khanyisile Litchfield-Tshabalala eshaqise abaningi edalula ukuthi kumele kwenziwe ucwaningo ngempilo ephambili ephilwa wuMnuz Julius Malema noMnuz Floyd Shivambu.

UNkk Litchfield-Tshabalala uveze ukuthi bazonikela eNkantolo yaseWestern Cape befuna kuphenywe ngokusebenza kwemali ye-EFF. Uthe uShivambu kumanje ushayela imoto yohlobo oluphambili iPorsche ekubeni umholo wakhe ungafiki ndawo kanti benoMalema abayikhiphi imali ekhokhwa ngabanye abaholi abangamalungu ephalamende eqenjini engu-10%.

“UMalema wawuthathaphi u-R4 millilon wokwenza umshado ophambili, indlela akhohlakele ngayo angiboni ukuthi yini engamvimba ukuthi axhaphaze imali yomphakathi uma esengumengameli wezwe njengoba enza ku-EFF. Bobabili noShivambu bathatha imali ye-EFF bayiphuze ematshwaleni nasezindaweni zobumnandi eziphambili koCubana,” kusho uNkk Litchfield-Tshabalala.

Uthe uShivambu noMalema yibo bobabili abazi ngokusebenza kwemali ye-EFF abayixhaphaza ngokuhamba izindawo zomtakabani.

Ubesho lokhu edalula nokuthi uShivambu akapheli esitolo sezinkinsela iLouis Vuitton esidayisa izimpahla ezibizayo nokungangeni noma wubani kuso.

UMnuz Andile Mngxitama naye obeyingxenye yalesi sithangami weseke uNkk Litchfield-Tshabalala ezinkulumeni zakhe waze wathi bazolweseka uphenyo noma ucwaningo oluzoveza obala abaholi be-EFF ukuthi ngabe baphila hlobo luni lwempilo ngokomcebo abanawo.

Laba baholi bathi abasoze bayishiya i-EFF kodwa abazokwenza wukuthi bazoya ezinhlakeni kubantu basebenze nabo bakhulise iqembu ngoba basalibona ikusasa likhona.

Ngesonto eledlule laba baholi babize isithangami esingazange siphumelele eCape Town ngaphambi kokuthi kuqale inkulumo yesizwe kamengameli wezwe ngoLwesine nalapho kwasuka khona udweshu amanye amalungu eqembu eshaya uMngxitama.

UNkk Litchfield-Tshabalala uzakhele udumo ngesikhathi i-EFF ibonakala ephalamende ngonyaka odlule icula u-Pay Back the Money beqondise kuZuma ababemphazamisa ethula inkulumo yakhe bethi bafuna achaze ukuthi uzoyibuyisa nini ingxenye yemali esebenze kungafanele ngesikhathi kuqiniswa ezokuphepha emzini wakhe eNkandla.

UNkk Litchfield-Tshabalala ukhala ngokuthi uyena owaqhamuka nalesi siqubulo kodwa manje uyabona sesisetshenziswa ngendlela engafanele.

Ufuna kwenzeke ubulungiswa owesifazane waKwaNyuswa eBothas Hill othi ugilwe wumshini wokukhipha imali yempesheni kwesinye sezitolo.

NONTUTHUKO NGUBANE

UFUNA kwenzeke ubulungiswa owesifazane waKwaNyuswa eBothas Hill othi ugilwe wumshini wokukhipha imali yempesheni kwesinye sezitolo kwagcina ngokuthi kugwinyeke ikhadi lakhe kwacwila nemali engu-R2 800 abeyikhipha.

UNkk Zinhle Mkhize (65), uthi lesi simo simhlukumeze kakhulu nabazukulu bakhe ababili oneminyaka engu-10 noneyisithupha abaholela imali yesibonelelo sikahulumeni sezintandane, kulandela ‘ukudliwa’ wumshini kwemali yakhe yempesheni.

UNkk Mkhize uthe waya kwesinye sezitolo ePinetown (Isolezwe linalo igama laso) eyokhipha imali ngoFebhuwari 2 nonyaka kwaba nobuxakaxaka kwagcina kucwile ikhadi lakhe nemali.

Uthe usehambe wonke amahhovisi ngisho elakwa-South African Social Security Agency (Sassa) ukuze athole usizo kodwa kunhlanga zimuka nomoya.

Uthi nabo bathi imali yakhe yaphuma emshinini ngesikhathi eyikhipha kodwa akhala ngakho ukuthi ayifinyelelanga kuye.

“Ngakhipha imali njengenjwayelo, kwavela ukuthi ngiyikhiphe ngendlela kodwa imali ayizange iphume kwathiwa umshini uvele wacima.

“Abesitolo bangicela ukuba ngilinde kodwa ngagcina ngingazange ngiyithole.

Ngaya emahhovisi aka-Sassa ukuze bangibhekele ukuthi kwenzekani, kodwa bathi imali yami ikhishwe esitolo lapho kwacima khona umshini.

Ngaphindela khona esitolo nabo balandula. Ngavele ngaphelelwa amandla nganyukelwa wushukela. AbakwaSassa bathi angiye esikhungweni sangakithi lapho kuholwa khona impesheni, ngoFebhuwari 11 ngiyile nakhona kwavela ukuthi imali ayikho. Kumanje sibhuqwa yindlala nezingane.

Okubuhlungu ukuthi izingane ziyakhala zifuna ukudla, yimali yokugibela ziya esikoleni nezinye izidingo,” kusho uNkk Mkhize.

Kuthintwa ophethe ezokuxhumana kwaSassa KwaZulu-Natal uMnuz Mbizeni Mdlalose uthe kuzophenywa ngalesi sigameko esehlele uNkk Mkhize.

“Uma ugogo esefake isikhalo kuthina ngokusemthethweni sizobe sesiqala uphenyo ukuze sithole ukuthi imali yakhe yashonaphi. Sicela nabanye abanenkinga efanayo } basithinte ku: 0800601011 ukuze bezosizakala,” kusho uMdlalose.

Sithwele kanzima isalukazi sakwa-U, eMlazi esiswele indawo yokuhlala.

LUNGI LANGA

SITHWELE kanzima isalukazi sakwa-U, eMlazi esiswele indawo yokuhlala emuva kokukhishwa endlini ebesihlala kuyo nabazukulu baso abangu-11.

NgoLwesibili uNkk Gladys Xulu (77) nabazukulu bakhe bachithe usuku behleli emgwaqweni emuva kokukhishwa endlini abebeqashe kuyo njengoba seyithengwe ngomunye umuntu.

UNkk Xulu uthe akazi ukuthi uzoya kuphi nabazukulu bakhe njengoba ingekho indawo abangahlala kuyona. Izolo abazukulu bakhe abayanga esikoleni ngenxa yesimo sabo sokungabi nendawo yokuhlala.

Uthe okumphatha kabi ukuthi ikhona indlu yomxhaso ayeyinikwe umasipala.

“Bese ngihlale la iminyaka engu-21. Ngonyaka odlule kube khona indlu engiyinikwa yimeya kodwa kuze kube manje angikwazi ukungena kuyona ngoba kuthiwa lezo zindlu zithathwe ngenkani amasosha,” kusho uNkk Xulu.

Uthe wayesesayine yonke into sekusele ukuthi bangene endlini kodwa uhlelo lokungena lwama ngoba sekuthiwa kukhona abantu abangene kuzona ngenkani.

“Kungcono ukube indlu yami bese ilungile bengizoqasha imoto ngithathe izimpahla zami nabazukulu siyohlala khona kodwa manje nakuyona kusathule. Sizophoqeleka ukuthi sihlale la emgwaqweni,” kusho uNkk Xulu.

Uthe baye emahhovisi amasipala ngesonto eledlule beyozwa ukuthi uhlelo lokufakwa ezindlini luhamba kanjani batshelwa ukuthi kufanele balinde.

Usole ikhansela uMnuz Vincent Nzama ngokungabasizi yize sebemazisile ngesimo ababhekene naso.

Ethintwa ngodaba uNzama uthe uke wazama kaningi ukusiza ekuxazululeni isimo sikaNkk Xulu. Ukhale ngokuthi akekho osemtshelile ngokukhishwa kwakhe endlini.

“Udaba lukagogo ngiyalwazi futhi ngilwazi kahle. Bengikade ngilulandela ngizama nokusiza kodwa kwagcina kukhona la esengidideka khona nami ngenxa yezinto ezazenziwa abazukulu bakhe,” kusho uNzama.

Uthe kukhona indlu eyayihlelelwe uNkk Xulu kodwa yagcina seyinikwe omunye umuntu ngenxa yezinhlelo athe zenziwa ngumzukulu kaNkk Xulu.

“Akukho esingakwenza ukusiza uNkk Xulu ngoba azikho izindlu ezikhona okwamanje. Izindlu kwangena abantu abazibiza ngamasosha kuzona. Engizokwenza ukuthinta imeya bese ngiyibikela ukuthi udaba lwalo mndeni sengize ngaluzwa ngabezindaba ngoba wona awukaze uze uzolubika kimi. Ngizobe sengizwa kuyona ukuthi ibeka ithini,” kusho uNzama.

Uthe ngeke bakwazi ukuhlalisa lo mndeni ehholo lomphakathi ngoba lokhu akusenziwa.

Uma sebeqhuma insini, abanye babonakala beshaya amatafula, abanye baze basukume bekhomba abanye okusuke kwenziwa ngabo ihlaya noma behleka loyo osuke ekhuluma ngaphambili.

NGQESHE BUTHELEZI

NAKUBA ishisa insimbi kulezi zinsuku ePhalamende, eKapa, osopolitiki bededelwe benikizana kube kuncane indawo kodwa kubuye kube neziqubu lapho behleka khona baze baqethuke bakhohlwe ukuthi bahlukene ngemibono.

Uma sebeqhuma insini, abanye babonakala beshaya amatafula, abanye baze basukume bekhomba abanye okusuke kwenziwa ngabo ihlaya noma behleka loyo osuke ekhuluma ngaphambili.

Lowo sopolitiki osuke ethula inkulumo yakhe esikhathini esiningi yena usuke engathi nsi, kokunye engaboni nokuthi usenza ihlaya ngesikhathi ezama ukubeka iphuzu lakhe.

Abanye bagcina sebephunyukile bakhulume amagama athile abagcina sebegconwa nangawo. Amahlaya alokhu eqhululwa phakathi kwezinkulumo mpikiswano abonakala ebavusa nalabo abasuke sebengquphazela ubuthongo. Usuku langoLwesibili ngesikhathi kuqala inkulumo mpikiswano ngenkulumo kaMengameli Jacob Zuma ilona olubonakale luba neziqubu eziningi zamahlaya. USihlalo womkhandlu wezifundazwe uNksz Thandi Modise uke waphenduka ihlaya ngesikhathi ebiza amalungu ePhalamende ngamaComrade.

Emuva kokuzibona ukuthi uphahlukile ubuye wakuhoxisa lokho kodwa iNdlu yonke bese “ifile insini.” UNdunankulu waseFree State uMnuz Ace Magashule naye uke waqala uhleko olukhulu ngesikhathi ethi umholi we-EFF uMnuz Julius Malema uke wahlangana naye kanye nomndeni wakwaGupta. UMalema obefa insini ngesikhathi ephendula uMagashule uphike wama ngentaba wathi “ngisho uMengameli Jacob Zuma angakufakazela ukuthi akaze abe nomhlangano nomndeni wakwaGupta”. Amalungu ePhalamende aphinde aphela insini nangesikhathi uMalema ethi onogada abagasela ePhalamende ngoLwesine olwedlule bambamba amankwahla.

Umholi we-IFP uDkt Mangosuthu Buthelezi wenze ozakwabo bahleka bacishe balala ngomhlane ebalingisela ngesikhathi bevungama ekhuluma echaza ukuthi unkosikazi kaDkt Albert Luthuli wayeyilungu leNkatha futhi enekhadi layo.

Izolo uNgqongqoshe wezamaBhizinisi kaHulumeni uNksz Lynne Brown uwabulele ngensini amalungu ePhalamende ekhuluma ngodaba lokuphela kukagesi nezinhlelo abanazo ngo-Eskom ethi ubesekhohliwe ukuthi unephini kulesi sikhundla esho ilungu le-DA elikhulumela leli qembu. Abe-EFF bambize ngoNgqongqoshe we-Load shedding uNksz Brown.

Usale namashanda nezilonda owesifazane oshiswe wumuthi wokwelula izinwele okuthiwa unekhemikhali eyingozi.

ZANELE MSOMI

USALE namashanda nezilonda owesifazane oshiswe wumuthi wokwelula izinwele okuthiwa unekhemikhali eyingozi, osetshelwe udokotela ukuthi kungenzeka zingaphinde zihlume.

UNkk Ntombiyodwa Gwala waseMontclair kuthiwa ukhihle isililo ebona izinwele zisala kubhavu abegezela kuwo kungakapheli nemizuzu eyisihlanu efake umuthi. UNkk Gwala osehlala ngokunwaya ikhanda ngenxa yokunsonsotha, uthe lesi simo simhlukumezile ngoba izinwele zingase zingaphinde zimile.

Wagunda imiyeko ngonyaka odlule, wakhulisa izinwele zemvelo. Ngenxa yokuthi ubefuna ukuzelula bese eyaluka, uye esitolo eyofuna umuthi.

“Angiwutholanga umuthi ebengiwufuna, okuyiwona engike ngiwusebenzise. Ngitshele usisi osebenza esitolo ukuthi angiwufuni ozozithambisa kodwa ngifuna zikhule ukuze ngiluke. Ungiyalele iCaivil Just For Kids athe ngeke izithambise ngoba eyezingane,” kusho yena.

Uthe ufike ekhaya wafunda umuthi wase enza njengoba kubhaliwe indlela osetshenziswa ngayo.

“Ngiqale ngezwa kushisa ikhanda lonke, ngathi ngiyathinta ngezwa sengathi izinwele ziyamonyuka. Ngigijime ngayogeza ngakhala mi ngibona izinwele zisala kubhavu. Amehlo ashintshe aba bomvu nobuso, kwamila nezilonda ngemizuzu emithathu ngifake umuthi. Angazi njengoba kuthiwa owezingane yona ingasha kanjani ngoba nami kube ngathi ngidliwe amagundane,” usho kanje.

Lo muthi onesithombe sengane enezinwele eziluliwe, ubhalwe wonke amakhemikhali afakiwe okubalwa ne-lithium hydroxide udokotela athe iyingozi esikhumbeni.

UNkk Gwala uthe ushayele inombolo ebhalwe ngaphandle komuthi, wabika osekumehlele kwathiwa akeze emahhovisi eMobeni lapho ukhiqizwa khona.

“Bathe umuthi wabo awunankinga uhlala usetshenziswa. Nginqabile bethi angiwushiye ngoba bengibona ukuthi bazogqiba ubufakazi. Bawukhe nesipuni bathi bazowuhlola e-laboratory, baxolisa,” echaza.

Izolo uye kudokotela wamjova wamnika amaphilisi azowasebenzisa isonto ngaphambi kokuqala eminye imishanguzo yokwelapha isikhumba.

Isolezwe liwubonile umbiko kaDkt Terence Subramoney oveza ukuthi i-lithium hydroxide iyingozi futhi akumele isetshenziswe esikhumbeni. Ubhale ukuthi uzomu-odela imishanguzo okuzomele ayisebenzise izinyanga eziyisithupha kodwa kuzomele abonane nodokotela wesikhumba.

UNkk Lee-ane Govender ongummeli wenkampani ekhiqiza lo muthi uthe basitholile isikhalo sikaNkk Gwala.

“Kuningi okusamele kwenziwe ukuhlola umuthi ukuze sibe nesiqiniseko ukuthi inkinga ibe kuphi. Siyoninika nemiphumela yokuhlolwa,” kusho yena.

Ukuxolisa kukaNkk Mbete ngokubiza uMnuz Julius Malema ngekokoroshe akusho ukuthi amaqembu aphikisayo asezoyeka ukufaka ingcindezi yokuthi aphume esikhundleni.

INTATHELI YESOLEZWE

UKUxolisa kukaSomlomo wePhalamende ngokubiza umholi we-EFF uMnuz Julius Malema ngekokoroshe akusho ukuthi amaqembu aphikisayo asezoyeka ukufaka ingcindezi yokuthi aphume esikhundleni.

Lona ngumbono womhlaziyi wezepolitiki uDkt Somadoda Fikeni obephawula emuva kokuba izolo ntambama uNkk Mbete exolisile kuMalema ngamagama awasho alumelayo.

UFikeni usincomile isenzo sikaMbete waveza nokuthi kungenzeka ukuthi uxolise ngenxa yengcindezi yokuthi ubengekho ePhalamende nokuthi ubegwema ukuthi udaba lufike enkantolo.

“Lolu daba lususe uhlevane kanti ukuxolisa kwakhe kuzokwehlisa ukushisa obese kudaleke ePhalamende,” kusho yena.

Ukuxolisa kwakhe kwenzeke ngemuva kokuthi i-EFF ifake isimangalo kwiKhomishini yamaLungelo Abantu ngoNkk Mbete ukuze kuphenywe kabanzi ngenkulumo yakhe ukuthi ubeqondeni ngayo.

NgoMgqibelo uNkk Mbete wacashunwa engqungqutheleni ye-ANC eNorth West ekhuluma nezithunywa zakhona ethi: “Uma singawenzi umsebenzi sizoqhubeka nokuba nenkinga yamakokoroshe afana noJulius Malema azobe ecanasa ezenzela umathanda.”

Izolo uNkk Mbete ukhiphe isitatimende echaza ukuthi uyaxolisa ngale nkulumo ayenze ngoMalema ngokumbiza ngekokoroshe.

“Ngicabange ngajula ngale nkulumo engayisho eNorth West ngafika esinqumeni sokuthi ngixolise kubona bonke engibaphathe kabi nasekutheni ngenze inkulumo efana nalena kungenasidingo, ngiyaxolisa kakhulu,” kusho uNkk Mbete esitatimendeni.

Lesi sitatimende sifundwe ePhalamende ngumholi we-IFP uDkt Mangosuthu Buthelezi nokuthe uma eqeda amalungu ashaya ihlombe elikhulu.

Ukwenze lokhu ngemuva kokugxekwa esolwa ngokuthi le nkulumo yakhe igqugquzela udlame kubantu ikakhulukazi njengoba iNingizimu Afrika ibhekene nodlame olubhekiswe kwabokufika.

Bekukhalwa nangokuthi udaba lokubiza umholi ngekokoroshe lunomlando ongemuhle e-Afrika njengoba eRwanda kwafa inqwaba yabantu kubangwa leli gama.

Labo abaseka uNkk Mbete bathi kuyaxaka lokhu ngoba uMalema naye eseku-ANC wabiza umholi we-DA uNkk Helen Zille ngokuthi uyikokoroshe embiza nangokuthi uyinkawu kodwa akuzange kusuke umsindo ongaka futhi akazange axolise.

UMbete uthe uxolisa esizweni nasePhalamende nakuMalema ngaphandle kwemibandela ngezinto azishilo nangokudala uhlevane olungenasidingo.

I-ANC ngoLwesibili ithe uNkk Mbete ubengaqondile okubi ngale nkulumo kodwa ubekhuluma nje ngaphandle kokuzama ukuhlokoza udlame.

UMalema ukwamukele ukuxolisa kukaMbete wathi asebekubhekile usuku lwangoMashi 11 lapho bezobe belindele izimpendulo kuMengameli Jacob Zuma. Uthi naye uyaxolisa kuZille.