Sekuqubuke umsindo mayelana nesinqumo sikaNkk Nomusa Dube-Ncube sokufaka amakhosi kuMasipala weTheku.

MLUNGISI GUMEDE

SEKUQUBUKE umsindo mayelana nesinqumo sikaNgqongqoshe wezokuBusa ngokuBambisana neziNdaba zoMdabu KwaZulu-Natal, uNkk Nomusa Dube-Ncube, sokufaka amakhosi kuMasipala weTheku lapho kulindeleke ukuthi athole umhlomulo ka-R5000 njalo ngenyanga.

Amakhosi angu-40 izindawo zawo ezikumasipala kulindeleke ukuthi abambe iqhaza emihlanganweni yomkhandlu.

Umsindo uvela kwi-DA ekhala ngokuthi yinkulu le mali ezonikwa amakhosi ngoba isola ukuthi ngeke aze alubhade ngisho emihlanganweni.

Umholi wekhokhasi ye-DA eThekwini, uMnuz Zwakele Mncwango, ubuze ukuthi qhaza lini elizobanjwa ngamakhosi emkhandlwini ngoba akhona amakhansela okuyiwona abhekelele ukuletha intuthuko emphakathini.

Uthe ngokwazi kwakhe amakhosi aholelwa wucogta manje kungani sekumele anikwe enye imali.

“Nginovalo lokuthi abanye oNdabezitha bazozilovela bangezi emihlanganweni kodwa bathole imali, ngaphezu kwakho konke lokhu ngibona ngathi inkulu le mali abazonikwa yona,” usho kanje.

Ilungu lekomidi elihola umkhandlu, uMnuz Nigel Gumede we-ANC, lithe uma kukhulunywa iqiniso yincane le mali ezonikwa amakhosi ngoba kuzokwenzeka ukuthi izindleko zenkosi ethile zibe ngaphezulu kuka-R5 000 ngenyanga.

U-R5 000 ozonikwa amakhosi kuthiwa yimali yokuwahlangabeza ngezindleko azongena kuzona angazihlelele njengoba sekuzomele abambe iqhaza emkhandlwini.

“Lapha sibheke uphethroli wokuza emihlanganweni, amakhosi abuye ahlele imihlangano yomphakathi kungenzeka inyanga ethile izindleko zibe nkulu,” usho kanje.

IMeya uMnuz James Nxumalo ithe bayakuthokozela ukusebenzisana namakhosi kodwa kuzomele basebenze ngokwemithetho nemigomo kamasipala.

“Kuzomele amakhosi ahambe imihlangano, uma inkosi ethile ingeke ikwazi ukuphumelela ibike kodwa uma kwenzeka inkosi ethile igcine isilova emihlanganweni kulandelana sizophoqeleka ukuthi silandele imigomo ngoba ngeke sikwazi ukuholela umuntu ongezi emhlanganweni,” usho kanje.

Sekuvele ukuthi udedelwe esibhedlela umshayeli weveni okwashona kuyo abafundi eMbali.

NONTUTHUKO NGUBANE

SEKUVELE ukuthi udedelwe esibhedlela wayohlaliswa ezihlotsheni umshayeli weveni okwashona kuyo abafundi abayisikhombisa emuva kokuphaphalaza yakhalakathela emzini womuntu eMbali eMgungundlovu ngo Januwari 28.

Isolezwe lithole ukuthi umshayeli weveni uNksz Lungi Mthimkhulu (33) wakhishwa esibhedlela ngeledlule kodwa akaboshiwe futhi akaze avele enkantolo ngecala elithinta ingozi.

Okhulumela isibhedlela saseGreys eMgungundlovu uMnuz Zamo Mtungwa ukuqinisekisile ukuthi uNksz Lungi Mthimkhulu udedelwe esibhedlela ngoFebhuwari 5 kodwa kuthintwa okhulumela umndeni uMnuz Joel Sithole uphikile ukuthi ukhishiwe.

“Ngokwazi kwami uselashwa esibhedlela ngaphandle uma kube khona ushintsho olwenzeke izolo ngoba ngisendleleni eya eThekwini,” kusho uSithole.

Kuthintwa unina walo mshayeli uNkk Mariah Mthimkhulu uvumile ukuthi indodakazi yakhe iphumile esibhedlela ngeledlule yaya eThekwini.

“Uphumile esibhedlela undodakazi kodwa usehlala eThekwini ngenxa yezinkinga ahlangabezane nazo,” kusho uNkk Mthimkhulu ngamafuphi.

Eqhubeka emva kokuphonswa imibuzo ushaye ingwiji wathi empeleni usesibhedlela eThekwini kodwa ngeke asidalule.

“Ngeke sidalule lapho ekhona, kuyimfihlo yethu ngenxa yezizathu ezithize,” kusho yena.

Okhulumela amaphoyisa KwaZulu-Natal uMajor Thulani Zwane uthe kusaphenywa ngecala lomshayeli kodwa akukaboshwa muntu.

“Kuvulwe amacala okubulala ngokungenhloso uphenyo lwenziwa amaphoyisa ase-Plessislaer,” kusho uZwane.

Kuthintwa umzali womfundi owashona, uMnuz Sizwe Mchunu onguyise kaSinakhokonke, uthe bebengazi nokuthi umshayeli uphumile esibhedlela.

“Ngiqala ngawe ukuzwa ukuthi umshayeli usesekhaya. Asikaze sitshelwe, namaphoyisa akaze afike ekhaya ezosibikela indaba yecala. Selokhu kwashona ingane yami kuthule ngophenyo angazi ukuthi kwenzekeni nomshayeli akakaze afike ekhaya ezoxoxa ngokwenzeka,” kubeka uMchunu.

UNgqongqoshe wezokuPhepha nokuXhumanisa uMphakathi KwaZulu-Natal uMnuz Willies Mchunu wathi kusaphenywa indaba yokuthi amabhuleki ayesebenza ngendlela yini. Okhulumela uMnyango uMnuz Kwanele Ncalane uthe uphenyo lusaqhubeka.

“Uphenyo luyaqhubeka. Amathimba ocwepheshe ayihlola iveni.

Silindele akhiphe umbiko bese sitshela umndeni nabafanele ngomphumela,” kusho uMnuz Ncalane.

Kuze kwabizwa onogada ukudambisa isimo ngesikhathi iziguli zivuka indlobane zixoshwa esibhedlela saseThekwini.

LUNGI LANGA

KUZE kwabizwa onogada ukudambisa isimo ngesikhathi iziguli zivuka indlobane zixoshwa esibhedlela saseThekwini iKing Dinuzulu.

Kuthiwa ngoMsombuluko ntambama iziguli zakulesi sibhedlela bezingezwa mshini ngokuxoshwa kwazo okuthiwa sekuyinto ejwayelekile ukuthi zitshelwe ukuthi azibuye ngakusasa.

Umthombo ongaphakathi uthe isibhedlela sinenkinga yokugcwala kweziguli ngenxa yokushoda kwabasebenzi.

Uthe iziguli ziyaye zitshelwe ukuthi igumbi elibona abafika nezifo ezahlukene livalwa ngehora lesine ntambama.

Selokhu sashintsha ekusebenzeni njengesibhedlela eselapha ufuba kuphela, leli gumbi livalwa ngehora lesine.

Ngokusho kwakhe iziguli sezikhathele ukutshelwa into eyodwa kodwa singalungiswa isimo.

NgoMsombuluko kuthiwa zishaye phansi ngonyawo ngesikhathi zitshelwa ukuthi azihambe zibuye ngakusasa.

“Inkinga ukuthi abasebenzi bayashoda okwenza ukuthi iziguli zigcine zihlale isikhathi eside zingalutholi usizo. Kuthi uma sekufika izikhathi zantambama zitshelwe ukuthi azigoduke zibuye ngakusasa. Nalokhu kuvele kufane ngoba ngakusasa kusuke kugcwele. Kokunye siba neziguli ezingu-40 ezisuke zifike ngayizolo zacelwa ukuthi zifike ngakusasa,” kusho lo mthombo.

Eminyakeni emithathu edlule lesi sibhedlela ebeselapha ufuba kuphela sishintshwe senziwa isibhedlela eselapha izifo zonke.

Kwakuthiwe uhlelo lokuqashwa kweziguli luzoba yizigaba ezintathu kodwa kugcine kwenziwe uhlelo olulodwa. Ngokomthombo waleli phephandaba ngonyaka odlule kuke kwafika omunye wabaphathi besifunda emnyangweni wezempilo ezofuna ukwazi ukuthi iziguli ziphindiselwelani emuva.

“Okunye okubeke ingcindezi ukuthi iziguli ebeziya kwezinye izibhedlela njengaseWentworth seziza la. Zazi ukuthi kunemishini esezingeni kodwa manje azazi ukuthi abekho abasebenzi,” kusho lo mthombo.

Iziguli zihlala amahora alinganiselwa kwamabili zilinde ukubona umsebenzi wezempilo zigcine sezihamba ntambama ezinye zingalutholi usizo.

Umnyango usanda kuveza ukuthi ufuna ukwehlisa umthamo weziguli ezivakashela izibhedlela ezaziwa njengezigcwalayo okubalwa kuzo iMahatma Gandhi Memorial nePrince Mshiyeni Memorial.

UMnuz Mandla Shabangu wenyunyana yabasebenzi iDemocratic Nursing Organisation of South Africa (Denosa) uthe bebengakezwa ngezinkinga zakulesiya sibhedlela.

“Yize singakayitholi imibiko ngalokhu asivumelani nokuthi iziguli zigodukiswe zingalutholile usizo. Kuyakhathaza ukuthi iziguli zisebenzisa imali yazo zize esibhedlela bese zitshelwa ukuthi azibuye ngakusasa. Sizoxoxisana nesibhedlela ukuzwa ukuthi ngabe zidalwa yini lezi zinkinga,” kusho uShabangu.

Kungakha isithombe esibi ngeNingizimu Afrika uma abe-EFF begcina beyiphazamise ngempela inkulumo yesizwe kaMengameli Jacob Zuma.

Siyabonga Mkhwanazi

KUNGAKHA isithombe esibi ngeNingizimu Afrika uma abe-EFF begcina beyiphazamise ngempela inkulumo yesizwe kaMengameli Jacob Zuma kusihlwa.

Kungaholela ekutheni ubudlelwano be-ANC ne-EFF bube muncu kakhulu ePhalamende nangaphandle nokungadala ukuthi uKhongolose ayikhiphe inyumbazane i-EFF.

Yize uSomlomo wePhalamende, uNksz Baleka Mbete, ethe abazi ukuthi yini abangayilindela kodwa uKhongolose angaba nonya uma i-EFF iphazamisa umcimbi.

I-ANC ingakhetha ukungayinaki i-EFF nakunoma yiluphi udaba ePhalamende noma ngaphandle.

Emasontweni edlule i-EFF ibilokhu ibelesele ithi izohlangana noZuma ukuze aziphendulele khona ukuthi ngabe uzoyikhokha nini imali okwakhiwa ngayo umuzi wakhe oseNkandla.

UZuma wathi uzobuyela ePhalamende eseyophendula umbuzo ngeNkandla ngoMashi 11.

Kodwa umholi we- EFF, uMnuz Julius Malema, wathi ufuna uZuma aphendule kusihlwa.

Ngokomthetho omusha uZuma kumele avele ePhalamende kane ngonyaka ezophendula imibuzo yamalungu alo.

Yize i-EFF ithi izoyiphazamisa inkulumo yesizwe kodwa elinye iqembu eliphikisayo iDA iyaziqhelanisa nezinhlelo ze-EFF.

Uma uMalema egcine embuze ngempela uZuma imibuzo, ngeke ayiphendule. Lokho kuzoholela ekutheni kusuke umsindo.

UZuma noKhongolose ngeke bakwamukele ukuphinde bahlazeke futhi phambi kwezimenywa zakwamanye amazwe. Uma iPhalamende ligcine liphazamisekile kungaholela ekutheni uZuma angalubhadi khona ne-ANC iyikhiphe inyumbazane i-EFF.

Yize i-ANC ingaxoxisana namanye amaqembu aphikisayo ePhalamende ngemithetho yakhona kodwa ingathwala kanzima i-EFF.

Omunye umthetho obhekwe yi-EFF yi-Expropriation Bill ohlongozwe izolo wuNgqongqoshe wemiSebenzi yoMphakathi uThulas Nxesi.

I-EFF ifuna kubuyiselwe umhlaba ngaphandle kwenkokhelo kodwa uKhongolose uthi kumele sikhokhwe isinxephezelo. Ngakhoke izingxoxo phakathi kwala maqembu womabili zibalulekile kubona ukuze bezovumelana.

Sekuphele izinyanga eziyisikhombisa uZuma agcina ukuvela ePhalamende njengoba agcina ngo-Agasti ngonyaka odlule.

Ukushaywa ngesithende kwe- EFF ePhalamende kungayisebenzela i-ANC ngenxa yokuthi imigudu yokuqondiswa ubugwegwe ePhalamende izobe isiqondile.

Ngisho nesijeziso sangonyaka odlule esanikwa abangu-20 be-EFF ePhalamede asikaqali ngenxa yesinqumo seNkantolo eNkulu yaseWestern Cape.

Kanjalo nokuqiniswa kwemithetho yasePhalamende ukujezisa abaziphatha budlabha kusekude ukuthi kwenzeke.

Abafundi baseNyuvesi yaseZululand, oNgoye, abangazitholanga izindawo zokuhlala bathi sebelala endle kodwa bebe bekhokhile.

MHLENGI SHANGASE

Abafundi baseNyuvesi yaseZululand, oNgoye, abangazitholanga izindawo zokuhlala bathi sebelala endle kodwa bebe bekhokhile.

Bathe sebephila ngokuquba kubangani abahlala emqashweni noma balale ngaphakathi enyuvesi osekuphele cishe amasonto kuqaliwe ukufunda kuyona.

Abafundi bakhale ngokuthi ukungabikhona komkhandlu wabafundi yikhona okwenza izinto zibe nzima.

Abanye bathi nakube babengamfuni umphathi wenyuvesi owashiya nyakenye, uSolwazi Fikile Mazibuko, kodwa ayikaze yenzeke into enje esekhona.

Omunye wabafundi, ocele ukungadalulwa, uthe useze wabuyela kubo ngenxa yokuthi akanayo indawo yokuhlala.

Umfundi, oneminyaka emine efunda iziqu zokufundisa, uthe selokhu afika enyuvesi akakaze abe undingasithebeni aze alale endle.

“Kunzima, angikweleti lutho nezindlu kazinamuntu kodwa sitshelwa ukuthi ayikho indawo yokuhlala. Kuthiwa izindlu zigcwele kodwa azinamuntu,” usho kanje.

Uthe bebengamfuni uSolwazi Mazibuko kodwa bayamkhumbula ezikhathini ezinzima kanje.

“Bekungcono kusekhona uMazibuko ngoba asikaze silale emnyango. Izingane zilala emnyango ungaya nje kozibonela. Siyacela inyuvesi isizwele ngoba thina siqale ngoMsombuluko ukufunda kodwa asinazo izindawo zokuhlala,” usho kanje.

Omunye wabafundi, naye ocele ukungadalulwa, oze wathumelela Isolezwe izithombe behleli emnyango, uthe usehlala eSikhawini kubangani ukuze akwazi ukugeza.

Uthe kubo isoLundi ngakho akanazo izihlobo eduzane yingakho ehlala kubangani.

“Ngikhokhe yonke imali ebengiyikweleta ekuqaleni konyaka ngathola noxhaso lweNational Students’ Financial Aid Scheme (NSFAS) olukhokhe yonke imali yalo nyaka yezifundo neyendawo yokuhlala kodwa kuze kube yimanje anginayo indawo. Uma siya kobuza kuthiwa izindawo zigcwele ayikho into abangayenza ekubeni iNSFAS isikhokhile,” usho kanje.

Okhulumela le nyuvesi, uNksz Normah Zondo, uthe abafundi banikwa ithuba lokuthi babhalisele izindlu besebenzisa i-internet ngo-Okthoba nyakenye ngokwemigomo yezindlu.

Uthe bamatasa nohlelo lokufaka abafundi ezindlini kulabo abakwazi ukubamba umnqamulajuqu.

Njengoba namuhla kugujwa usuku lwama-condom, izithandani ziyanxuswa ukuba zingayikhohlwa i-condom uma seziya ocansini kusasa.

BONISWA MOHALE

NJENGOBA namuhla kugujwa usuku lwama-condom i-International Condom Day izithandani ziyanxuswa ukuba zingayikhohlwa i-condom uma seziya ocansini kusasa ngosuku lwe-Valentine.

Indikimba yalo nyaka ithi Condoms are Cool kanti abenhlangano ebhekele abaphila ne-HIV emhlabeni jikelele i-Aids Healthcare Foundation (AHF) bagcizelele umyalezo wokuthi abantu baye ocansini oluphephile.

I-International Condom Day igujwa njalo ngoFebhuwari 13 kanti abe-AHF bazoqwashisa umphakathi KwaZulu-Natal nase-Eastern Cape baphinde bakhiphe ama-condom amahhala. Baphinde bakhumbuza izithandani ukuthi noma sezincikana kusasa zinikana izipho zingawashiyi ngaphandle ama-condom ngoba abalulekile.

Ngeke kube yiseNingizimu Afrika kuphela lapho kugujwa khona i-International Condom Day njengoba kuzoba nemicimbi engu-31 emazweni omhlaba okubalwa kuwo o-USA, Portugal namanye.

UDkt Hillary Thulare, ophethe i-AHF eNingizimu Afrika, uthe kubalulekile ukuthi abantu bakhunjuzwe ngokubaluleka kocansi oluphephile ikakhulukazi nge-Valentine’s Day.

“Siyabagqugquzela abantu ukuthi baye ocansini oluphephile. Ukusebenzisa ama-condom kwehlisa izinga lokuthelelana nge-HIV nezinye izifo zocansi. Kubalulekile ukuthi abantu bakhumbule ukuthi uma usithanda isithandwa sakho kumele usivikele. Sinezinhlobo ezimbili zama-condom manje okuyi-LOVE ne-ICON zombili zitholakala mahhala futhi ziphephile,” kusho uDkt Thulare.

Njalo ngonyaka i-AHF igubha i-International Condom Day kanti abantu baphiwa ama-condom mahhala bathole nethuba lokuzihlolela i-HIV nezinye izifo.

Namhlanje ithimba le-AHF lizobe liseClermont Taxi Rank kusukela ngo-10 ekuseni kuze kube ngu-3 ntambama lihlola abantu i-HIV, libaqwashisa likhipha nama-condom. Kusasa lizobe lisebhishi i-Bay of Plenty eThekwini kusukela ngo-10 ekuseni kuze kube ngu-2.30 ntambama. Kuzophinde kuhlolwe abantu isimo sabo sempilo e-Eastern Cape wonke uFebhuwari.

I-AHF yinhlangano esiza abane-HIV emhlabeni jikelele ikomkhulu layo lise-USA kanti inika abantu abangu-380 000 imishanguzo emazweni angu-36. KwaZulu-Natal i-AHF isebenzela eMlazi emtholampilo Ithembalabantu.

Ukhihla isililo unina womfundi kaGrade 7 okhonjwe indlela esikoleni ebefunda kuso ngoba kuthiwa uyisela.

NONTUTHUKO NGUBANE

UKHIHLA isililo unina womfundi kaGrade 7 obebhekene necala lokugqekeza umuzi nokuntshontsha isithuthuthu osekuholele ekutheni akhonjwe indlela esikoleni ebefunda kuso ngoba kuthiwa uyisela.

Umfundi wase-Clairwood Boys Primary eThekwini uNtando Hlongwa (15) ubhuquza ekhaya selokhu kwaqala unyaka kulandela ukuchithwa yisikole sithi indawo yakhe asisenayo.

Unina walo mfundi uNkk Sthandiwe Hlongwa (42) ukhala uyazithulisa ngesigameko athi sizobulala ikusasa lendodana yakhe ehlakaniphile njengoba isahlezi ekhaya kulandela ukungavunyelwa ukuba ibuyele lapho ekade ifunda khona.

UNkk Hlongwa uthe indodana yakhe yaboshwa ngo-Agasti 2014, ifunda uGrade 7 kulandela ukutholakala itetemuka ngesithuthuthu okwavela ukuthi sebiwa kugqekezwa umuzi.

Wahlala inyanga yonke lapho kugcinwa khona izingane ejele eWestville, lokhu kwaholela ekutheni angakwazi ukubhala izivivinyo zakhe zokuphela konyaka. Icala kuvele ukuthi laphela njengoba ubufakazi obumhlanganisa nalo bungazange buhlangane.

Uthe yize indodana yakhe inamaphutha ewenzile kodwa kumele ayilwele ukuze ithole imfundo.

“Ilenzile ingane iphutha, ngayijezisa ngisho nabomthetho uqobo bayijezisa, angicabangi ukuthi kunobulungiswa uma sekumele ingaqhubeki nemfundo yayo. Sengigqigqe kaningi esikoleni ngiyincengela ukuba bayamukele ukuze iqede amabanga aphansi bavele bengichithe ngokuthi iyisela ngakho kumele iye esikoleni sezingane ezikhubazekile. Ngifuna ukuba ingane yami ithole imfundo njengezinye izingane,” kusho uNkk Hlongwa.

Ngesikhathi Isolezwe liye kubo kalo mfundi limfice elele. Uthe inhliziyo yakhe iyaqaqamba ngoba uyasala kozwakwabo akade efunda nabo.

“Sengigqigqe kuyo yonke iminyango ngicela usizo ngoba angifuni ukuthi ingane yami igcine isiyisigebengu esibamba abantu bese ngibuzwa ukuthi kungani ngayiyekelela. Ngizama konke okusemandleni ukuba ithole imfundo efanele,” usho kanje.

Uthe ubezama ukubambisana nothisha ngayo yonke indlela kodwa bakhombisa ukungamamukeli nengane yakhe.

AboMnyango wezeMfundo KwaZulu-Natal babikeliwe ngalolu daba kodwa kwaze kwashaya isikhathi sokushicilela bengakaphenduli.

Usuthatha izinyathelo zomthetho umndeni waseSea View indodakazi yawo ekhishwe isibeletho ngephutha iyobeletha eKing Edward VIII.

ZANELE MSOMI

USUTHATHA izinyathelo zomthetho umndeni waseSea View, eThekwini, indodakazi yawo ekhishwe isibeletho ngephutha iyobeletha esibhedlela eKing Edward VIII.

UNkk Ntombi Shange ongunina kaNksz Nombali Shange (33), uthe ucishe wayeswela indodakazi yakhe okumanje yelashwa esibhedlela esizimele. Uthe indodakazi yakhe ibihamba umtholampilo kwavela ukuthi ingane inkulu kakhulu kumele ihlinzwe.

“Udokotela wathi uma esikwa akaye eKing Edward ngoba banezinsiza ezifanele isimo sakhe. Wasikwa ngoJanuwari 10 wahanjiswa esibhedlela wabeletha ebusuku,” kusho yena.

Uthe beyombona esebelethile bamangala bemfica esegunjini labagula kakhulu esefakwe amaphakethe ayisihlanu egazi. Kuthiwa wayengakwazi nokuzidlela kodwa naye engazi ukuthi uguliswa yini. Wakhishwa esibhedlela ngoJanuwari 17 bamangala engasakwazi nokubamba umchamo.

“Sabona ukuthi ayingangathi ngoba besibona esemanzi umchamo engakwazi ukuwubamba. Yilapho sabona khona ukuthi inkulu inkinga emehlele,” kusho uNkk Shange.

Udadewabo kaNombali uNksz Amanda Shange uthe selokhu aphuma esibhedlela ingane inakekelwa nguyena. Uyena owabuye waphelezela udadewabo bemyisa emtholampilo emuva kokukhishwa esibhedlela nakhona babakhomba eKing Edward.

“Saphindela eKing Edward ngoJanuwari 21 sabatshela ukuthi uNombali ubelethele khona. Kufike kwasixaka ukuthi bathi asenze ikhadi elisha ekubeni kumele babe nayo imininingwane yakhe nokuthi kwenzekeni. Sezwa omunye unesi ethi okuyosiza wukumyisa esibhedlela esizimele ngoba njengoba sekunenkinga bazozama ukugqiba ubufakazi,” usho kanje.

UNombali kuthiwa wangeniswa esibhedlela esizimele ngakusasa wafakwa egunjini labagula kakhulu. Bekungavumelekile nokuthi abonwe kanti kuthiwa usehlinzwe kasithupha. Esibhedlela esizimele bathole ukuthi wakhishwa isibeletho kwathinteka nesinye okwenza angakwazi ukubamba umchamo.

Umndeni ulinde umbiko kadokotela ukuze uwudlulisele kummeli ozothatha izinyathelo zomthetho.

UNkk Shange uthe bashayela uDkt Sibongiseni Dhlomo ucingo bembikela udaba wathembisa ukubuyela kubona. Bakhombise Isolezwe ne-SMS abamthumelela yona ngoJanuwari 19 enemininingwane yodaba.

UMnyango wezeMpilo esifundazweni ucele ukuthunyelelwa imininingwane kaNksz Shange ukuze uphendule uma usuphenye kahle ngodaba.

Ibidida unwabu imibala ephalamende amalungu alo eziphihle ngengqephu egqamile.

BONISWA MOHALE noNONTUTHUKO NGUBANE

IBIDIDA unwabu imibala ephalamende izolo amalungu alo eziphihle ngengqephu egqamile ngesikhathi eyokwethamela inkulumo yokuqala kaMengameli Jacob Zuma ebhekiswe esizweni eKapa.

Kuqale kwafika amalungu ephalamende obekukhona kuwo uNkk Dikeledi Mahlangu, Lindiwe Maseko akade begqokiswe nguDavid Tlale izingubo ezinombala ophuzi noluhlaza okwesibhakabhaka.

Kube sekulandela amalungu ePhalamende aqavile okubalwa uJenene Bantu Holomisa we-UDM obefake isudi emnyama ephethe nencwadi yoMthetho Sisekelo, uNgqongqoshe wezaManzi neNhlanzeko, uNkk Nomvula Mokonyane, obegqoke ingubo enokubomvu no-lace omnyama, uNgqongqoshe wezobuCiko namaSiko, uMnuz Nathi Mthethwa, nowakwakhe, uNkk Philisiwe Mthethwa, abangathandanga ukusho ukuthi bagqokiswe ngubani.

Inkosi yaseMvezo, uMandla Mandela, nondlunkulu wakhe, uNodiyala Mandela, bebeziphihle ngemvunulo yakwaXhosa.

Aliphoxanga iPhini likaNgqongqoshe wezoLimo nokuDoba, uMnuz Bheki Cele, obethwele isigqoko adume ngaso esimbala osakwatapeya ebesimesha ingubo yomkakhe uNkk Thembeka Cele.

Abanye akade begqamile ngoMnuz Dali Tambo nomkakhe, uRachel, abebedle umbala ophuzi befaniselene, uNkk Lindiwe Zulu ufike nonina odondolezayo, uNkk Mthele Zulu, efake ingubo enemibala ye-ANC. Unina ubegqoke ingubo ende enombala obomvu nomnyama.

Ilungu le-ANC elithuse abaningi nguNksz Thabiswa Nkwana obegqoke ingubo enombala onsundu nomhlophe ofaniswe nenkomo. izithombe ezihlekisa ngomsiko wakhe bese zigcwele ezinkundleni zokuxhumana.

Amakhosikazi kaMengameli, oNkk Bongi MaNgema noNkk Sizakele MaKhumalo Zuma bebegqoke izingubo ezinombala o-cream.

UNkk Thobeka kaMadiba ufike nomyeni wakhe eshaye ingubo yakhe emnyama ehlotshiswe ngokusasiliva, ibinemikhono emincane.

Amalungu eFF abedlume ama-ovaloli abomvu njengesethembiso. IDA yona ibigqoke izimpahla ezimnyama. Lokhu bathe bakwenzela ukuveza ukungenami kwabo ngesimo sePhalamende.

Okugqamile wukuthi abaningi bebengazifakile izicathulo eziphakeme kakhulu. Amadoda enze okujwayelekile iningi lawo lidle amasudi nothayi.

UZuma naye akuzange kubabazeke abekugqokile njengoba ubezothe kahle ngesudi yakhe enavy nothayi obomvu.

Aselala emnyango amalungu omndeni wakwaMathwebula kwaC KwaMashu.

NONTUTHUKO NGUBANE

ASELALA emnyango amalungu omndeni wakwaMathwebula kwaC KwaMashu kulandela ukukhishwa endlini abehlala kuyona okuvele ukuthi idayiselwe omunye umuntu ngo-R160 000 engazi.

Bangu-13 sebebonke kwaMathwebula abahlala kulo muzi onamagumbi amane okumanje babamba bayayeka ngokuthi bazophuma bashonephi.

Izolo Isolezwe lihambele lo mndeni lawuthola uhleli ngaphandle nempahla yawo yonke yasendlini.

Ilandisa Isolezwe indodakazi yakhona uNksz Busisiwe Mathwebula (51) ithe balala emnyango ukuze bagade izimpahla zabo ezikhishelwe ngaphandle yisikhonzi senkantolo bexoshwa endlini ngoLwesithathu olwedlule.

“Wumuzi kababa osashona lona. Ngazalelwa kuwona nezingane zakithi zonke njengoba sesihlala ngisho nabazukulu manje. Ubaba washada nomama naye owashona ngo-1985. Ngemuva kwalokhu ushade nenkosikazi yesibili nayo yashona. Uphinde washada nowesithathu uNkk Mamasonto Rakobela abatholana naye eGoli.

“Ubaba washona washiya umkakhe abase behlala naye ogcine ngokushona abathole ukuthi umuzi wakubo wawudayisa bekhona,” kuchaza uNksz Mathwebula.

Uthe abahambisani nalokho ngoba umuzi uyikhaya labo.

Lo mndeni uthe uyamangala ngoba incwadi yamanzi isabiza uyise futhi bayakhokha zinyanga zonke.

Incwadi ebonwe yiSolezwe iveza ukuthi uMnuz Jimmy Mathwebula wayeshade nonkosikazi Rakobela esengunkosikazi wesithathu beshade ngokuhlanganisa amafa okwenza umuzi waba ngokankosikazi ngesikhathi uMathwebula eseshona. UMathwebula kuvele ukuthi wayenezingane ezine nonkosikazi wokuqala kuphela, akazange esazithola ezinye.

Kulo muzi kuhlala abesifazane abangu-11 nabesilisa ababili omncane kubo owesifazane oneminyaka engu-22.

Ummeli ophethe udaba lokudayiswa kwalo muzi uMnuz Subhash Maharaj uthe namanje usamangele ngendlela umphakathi nomndeni oziphathe ngayo bekhumula beba nqunu bengafuni ukuphuma kule ndlu esidayisiwe.

“ Umuzi udayisiwe ngendlela eqondile ngemali elinganiselwa ku-R160 000. Umnikazi wawo owawuthola kulandela ukushona komyeni wakhe wawudayisa. Itayitela lomuzi sinalo, akukho ukukhwabanisa esikwenzayo. Ngenxa yezinkinga esihlangabezene nazo bengafuni ukuphuma endlini sithole imvume eNkantolo yaseNtuzuma ukuba baphume baphele kulowa muzi. Sithwale kanzima omunye wesifazane ekhumula eba nqunu engafuni ukuba singene endlini. Nomphakathi ubuphethe obhushu ungafuni lutho ngomuzi. Lokhu kuholele ekutheni size siqashe onogada abahlomile abathathu abaqaphe loya muzi,” kusho uMaharaj.

Ummeli uthe bakhipha u-R2 000 ngosuku ukugada lomuzi ukuvimba abafuna ukungena kuwona.

Umndeni wakwaMathwebula uthe kungamanga aluhlaza ukuthi kukhona oke wakhumula wanqunu enqaba ukukhishwa kule ndlu.

Omakhelwane basabise ngokuthi kuzophuma isidumbu ngaphambi kokuba kungene omunye umndeni kulo muzi.

UMnuz Mbuso Gumede, ongumakhelwaane uthe baphatheke kabi njengoba izingane zamantombazane sezilala emnyango. “Lezi zingane zikhulele kulo muzi. Kuyihlazo ukuthi unina udayise umuzi ziphakathi. Siwumphakathi asizoyingena le nto yokuthi kube khona abangena kuwona. Ntambama namhlanje (izolo) sinomhlangano womphakathi lapho sizohlela khona ukuthi sizokwenzenjani ngalokhu,” Kusho uGumede.

Baphazamise ukufunda abafundi baseNyuvesi yaseZululand, oNgoye bekhala ngabafundi abalala ehlane ekubeni bakhokhela izindawo zokuhlala.

MHLENGI SHANGASE

BAPHAZAMISE ukufunda abafundi baseNyuvesi yaseZululand, oNgoye bekhala ngabafundi abalala ehlane ekubeni bakhokhela izindawo zokuhlala.

Laba bafundi bamashile izolo kwaze kwangenelela onogada benyuvesi abadambise isimo.

Isolezwe izolo libike ngenkinga yalaba bafundi.

USihlalo wenhlangano yabafundi edlelana ne-NFP, iNasmo kule nyuvesi, uMnuz Skhumbuzo Hlongwane, uthe ibami emphinjeni eyokulala ehlane ekubeni bekhokhile.

Uthe abafundi ababhekene nengwadla yezindawo zokuhlala ekubeni bakhokha abebefunda kule nyuvesi.

“Simashile, sajahwa onogada ngoba sesikhathele ukulala emahlathini ekubeni sizikhokhele lezi zindawo zokuhlala. Abaphathi abafuni ukusiphendula okunalokho basifaka onogada futhi bavika ngokuthi isiteleka asikho emthethweni,” usho kanje.

Uthe ziningi nezinye izikhalo abanazo enyuvesi kodwa esiseqhulwini esezindawo zokuhlala esenze abanye baze baquba kubangani abanye babuyele emakubo ngoba bengazi bazolala kuphi.

Isitatimende esikhishwe ngokhulumela inyuvesi izolo uNksz Normah Zondo, sithe abaphathi bathola uhlu lwezikhalo kubafundi ngoLwesibili.

Sithe abaphathi banikwa isikhathi kuze kube yinamhlanje ukuthi baphendule izikhalo zabafundi.

NaseDurban University of Technology (DUT) nakhona kutelekiwe ngenxa yabafundi abakweletayo abangazange bakhokhelwe yisikhwama iNSFAS.

Okhulumela uMnyango weMfundo ePhakeme, uMnuz Khaye Nkwanyana, uthe lesi sikhwama basihlinzeke ngo-R9.5 billion wokubhekana nezinkinga zabafundi kulo nyaka.

“Le mali eyokusiza abafundi balo nyaka kanti odabeni oluthinta izikweletu ezindala zabafundi saxoxa nabaphathi bamanyuvesi ukuthi sizoyikhokha leyo mali sibambisene noNSFAS. Asifuni abafundi babe yizisulu ngenxa yezikweletu ezindala okuyinto esayixoxa nabaphathi bamanyuvesi,” kusho uNkwanyana.

Kumiselwe isikhathi esingaziwa ukungcwaba emathuneni aseSeventini, eMlazi.

ZANELE MSOMI

KUMISELWE isikhathi esingaziwa ukungcwaba emathuneni aseSeventini, eMlazi, emuva kokuba ngoLwesine amalungu omphakathi ehlasele abasebenzi bakaMasipala weTheku efuna ukuqashwa ngenkani.

Kuthiwa abasebenzi ababanjwe yiqulu labantu ngesidlozana bazokwelulekwa ngokwengqondo ngenxa yokwethuka. Sekungokwesithathu kuhlaselwa abasebenzi basemathuneni eSeventini, okuyisizathu esenze umasipala unqume ukuthi kumiswe ukungcwaba.

UMnuz Thembinkosi Ngcobo oyiNhloko yezamaPaki, ezokuNgcebeleka namaSiko kumasipala ukuqinisekisile ukuthi kusukela ngempelasonto ngeke kusangcwatshwa eSeventini.

“Imindeni obekumele ingcwabe ngale mpelasonto isidluliselwe kwezinye izindawo. Ngenhlanhla akekho olimele kodwa abasebenzi bathuke kakhulu. Sinqume ukuthi kumiswe ukungcwaba ngoba akusaphephile kubasebenzi futhi akuqali ukwenzeka,” kusho yena.

Kwenzeka lokhu nje umnyango wezamathuna ubhekene nengwadla njengoba sekuhlongozwa ukuthi kuphinde kuvunyelwe ukufakwa kwamatshe amathuna.

Kuthiwa lolu daba seludingidwe kaningi yikomiti elikhulu kumasipala ngenxa yengcindezi yamalungu omphakathi afuna ukufaka amatshe emathuneni.

Eminyakeni emine edlule umasipala wanquma ukuthi angabe esafakwa ngenxa yokushoda kwezindawo zokungcwaba. Kwathiwa ukufakwa kwamatshe kuqeda indawo ekubeni vele kunenkinga yokushoda komhlaba.

Isolezwe lithole ukuthi emhlanganweni wokugcina wesigungu ngonyaka odlule luphinde lwadingidwa lolu daba. Yize kuthiwa asiphumanga isinqumo esiwujuqu kodwa kuphakanyiswe ukuthi abantu bavunyelwe ukufaka amatshe angamakhanda kuphela ukugwema ukuncipha kwezindawo.

Amanye amalungu esigungu ayayihlaba indaba yokubuyekezwa kwalolu daba ngoba kumanje ayikaxazululeki eyokushoda kwezindawo zokungcwaba. Abanye bakhala ngokuthi lokhu kuzosusa umsindo ngoba amanye amathuna sekungcwatshwe kuwona kabili, okuzoba yinkinga ukufaka itshe elilodwa.

UNgcobo uthe okwenza kumiswe ukufakwa kwamatshe yingenxa yokushoda kwezindawo zokungcwaba okuyimanje asikho isixazululo. Uthe basabakhuthaza abantu ukuthi bazame ezinye izindlela njengokushiswa ukuze kongiwe izindawo.

Ikhansela elihola i-DA emkhandlwini, uMnuz Zwakele Mncwango, lithe indaba yamathuna akumele ikhiwe phezulu ngoba ithinta namasiko abantu.

“Kunzima ukuphuma nesinqumo ngoba kume yonke into njengoba ingakabi khona ingqungquthela yokukhetha ubuholi be-ANC. NguNkk Zandile Gumede okumele abhekelele lolu daba kodwa okungeke kwenzeka njengoba naye esemjahweni wombango wesikhundla. Okwamanje kukhona iziphakamiso okumele zidingidwe wumphakathi ngolwamathuna,” usho kanje.

UMengameli Jacob Zuma uthi uhulumeni wakhe wenza konke okusemandleni ukubhekana nenkinga yokucisha kukagesi kuleli.

CELANI SIKHAKHANE

UMENGAMELI Jacob Zuma (osesithombeni) uthi uhulumeni wakhe wenza konke okusemandleni ukubhekana nenkinga yokucisha kukagesi kuleli kangangokuthi bazonikeza u-Eskom imali engu-R23 billion.

Ukusho lokhu izolo ethula inkulumo yakhe yesizwe abeyethula ephalamende eCape Town nalapho ebeveza khona izinhlelo abanazo nasebezenzele umphakathi kuleli.

“Inkinga kagesi siyazama ukubhekana nayo njengohulumeni kodwa kulesi sikhathi kuzomele sibambisane ukubhekana nesimo sikagesi. Ngakho siyanxusa ukuthi umphakathi, izimboni nohulumeni baqinisekise ukuthi siba nezinye izinhlelo esizisebenzisayo njenge-gas, okuhambisana nezokumbiwa nemfucuza ukuze sikwazi ukubhekana nale nkinga,” kusho uZuma.

Uthe bakhiphe umyalelo wokuthi uMnyango wezeMisebenzi yoMphakathi uqinisekise ukuthi zonke izakhiwo zikahulumeni zincika ohlelweni lwezokumbiwa.

Ngesikhathi ethula inkulumo yakhe amalungu eDA, EFF ne-UDM abese ephumile ashiya ephalamende.

UZuma ubuye watshela izimenywa namalungu ephalamende ukuthi izwe ligubha iminyaka engu-25 kwakhululwa uDkt Nelson Mandela ejele ngoFebhuwari 11, 1990.

Uthe ukukhululwa kukaMadiba kusho lukhulu kubantu bakuleli.

Ephawula ngendaba kagesi uthe uhulumeni uzoqinisa isandla kulabo abantshontsha i-copper. Uthe abantu bangaphandle ngeke bavunyelwe ukuthi babe ngabanikazi bomhlaba eNingizimu Afrika. Uthi kunengxenye yomhlaba osuwabelwe abalimi nabantu abahlala emapulazini.

Kube nezinxushunxushu kwantaza omakalabha ePhalamende eKapa.

MHLENGI SHANGASE

KUBE nezinxushunxushu kwantaza omakalabha izolo ePhalamende eKapa ngesikhathi amalungu amaqembu aphikisayo i-EFF ne-DA ephuma eshiya phansi inkulumo ebibhekiswe esizweni nguMengameli Jacob Zuma.

I-DA ikhale ngokuthi kufana nokuphula umthetho wezwe ukuvumela amaphoyisa angene ngaphakathi ePhalamende.

Ngaphambi kwalokho i-EFF isukume yabuza ukuthi uZuma uyikhokha nini imali eyasebenza ngesikhathi kuqiniswa ezokuphepha emzini wakhe eNkandla. Kuqale kwaba nezinxushunxushu ngesikhathi kumiswa inkulumo kaZuma kukhalwa ngemishini ebiyenza izingcingo zingadonsi.

USotswebhu we-DA ePhalamende, uMnuz John Steenhuisen usukume wakhala ngokuthi kususwe le mishini ngoba ukuba khona kwayo kuphambene nemithetho yezwe.

Umholi we-Freedom Front Plus uMnuz Pieter Mulder naye uthe ayingaqhubeki le nkulumo ngenxa yale mishini.

UMnuz Mmusi Maimane ongumholi we-DA usukume wathi uma ingasuswa imishini bazimisele ukuyisa iPhalamende enkantolo ngalokhu.

USomlomo uNkk Baleka Mbete ubelokhu emile ekutheni uNobhala wePhalamende uyaluphenya lolu daba futhi uzoletha umbiko.

USotswebhu we-EFF, uMnuz Floyd Shivambu, uthe kungcono iguqe okwesikhashana indlu kusalungiswa le nkinga.

“Somlomo kungcono iguqe okwesikhashana indlu kusalungiswa le nkinga.”

UMnuz Mbuyiseni Ndlozi we-EFF yena ukhale ngokuthi amanzi awekho ePhalamende kanti bomile njengoba bebesalinde kulungiswe izinkinga ebikhona.

“Kunenkinga la yokuhanjiswa kwezidingo ePhalamende, amanzi awekho kanti somile.”

Le nkinga igcine ilungisiwe kanti uZuma uqale ukukhuluma sekudlule imizuzu engu-20 njengoba bekumele aqale ngehora lesikhombisa.

Ngesikhathi eqeda ukubingelela, kusaphele imizuzu emihlanu kusukume uMnuz Godrich Gardee we-EFF wabuza ukuthi uZuma uzoyikhokha nini imali.

“Sifuna ukwazi ukuthi imali uzoyikhokha ngaluphi uhlelo, EFT, ukheshi noma nge-e-wallet?”

Kube sekusukuma namanye amalungu e-EFF abuza ukuthi uZuma uyikhokha nini imali. UNkk Mbete uthe inkulumo yayizolo bekungeyona eyokubuza imibuzo kodwa inkulumo ebhekiswe esizweni.

“Isikhathi semibuzo sizoba ngesonto elizayo uma uZuma esephendula ngenkulumo yakhe. Nazisiwe ukuthi uzophendula imibuzo azobe ephonswe yona ngoMashi 11, bese ephendula emkhandlwini wezifundazwe ngoMashi 18,” kusho uNkk Mbete.

Kube sekusukuma umholi we-EFF uMnuz Julius Malema watshela uNkk Mbete ukuthi akaphendule imibuzo yelinye ilungu le-EFF.

Uthe bafuna uZuma aphendule umbuzo olula wokuthi uZuma uyikhokha nini imali njengoba kwasho noMvikeli woMphakathi.

UNkk Mbete unxuse uMalema ukuthi aphume endlini ngoba akafuni ukulalela.

“Lunga elihloniphekile Malema ngicela uphume uhambe. Lunga elihloniphekile Shivambu ngicela nawe uhambe. Nize la ukuzophazamisa ngoba vele nitshele izwe ukuthi nizophazamisa inkulumo. Uma ningafuni ukuhamba ngizocela ukuthi nisizwe nikhishwe ePhalamende,” kusho uNkk Mbete.

UMalema ubelokhu ephendulile ethi: “Angisebenzeli wena, angizanga ngekhadi lakho la”.

UNkk Mbete uthe ngeke amalungu e-EFF avimbe inkulumo kaZuma wabiza abezokuphepha ukuthi bakhiphe i-EFF. Ibe isikhishwa ngesidlozane i-EFF ngamaphoyisa.

UMaimane usukume wathi akulungile ukuthi kube namaphoyisa azokhipha amalungu ePhalamende. Ngesikhathi kukhishwa amalungu e-EFF akuzange kuvezwe kumathelevishini okwenzekayo.

Umholi we-IFP Inkosi Mangosuthu Buthelezi uthe kuyanyanyisa okwenzeke ePhalamende. I-DA ibe isiphuma.

Ngesikhathi kuqhubeka inkulumo kaZuma amalungu amaqembu aphikisayo akhishiwe abengaphandle kugcwele.

Amalungu omphakathi wasePolokwane, eLindelani akhala ngokuhlala isikhathi eside ezindlini ezibizwa ngolindela ngaphansi kwezimo ezingabekezeleki.

NONTUTHUKO NGUBANE

AMALUNGU omphakathi wasePolokwane, eLindelani, eThekwini ukhala ngokuhlala isikhathi eside ezindlini ezibizwa ngolindela ngaphansi kwezimo ezingabekezeleki wathi le ndawo isiphenduke ‘ikhaya’ lezigebengu.

La malungu athi asabela impilo yawo ngokuqhubeka nokuhlala kulezi zindlu zesikhashana belinde imizi yemixhaso.

Ngesikhathi Isolezwe lihambele amalungu alo mphakathi ngoLwesihlanu athe sekuphele iminyaka elinganiselwa kweyisishiyagalombili ehleli endaweni.

UNkk Matlodi Mothiba osehlale iminyaka emihlanu, uthe baningi bephuma kolindela beya ezindlini abazinikezwe nguhulumeni nokwenza kusale olindela abangenabantu bajike bahlale izigilamkhuba.

“Sihlalele ovalweni, ziningi izigameko zokudlwengulwa kwezingane, ukuntshontshwa kwempahla nezinye izigigaba zobugebengu. Kwabanye olindela basele bodwa ngoba kukhishwe abantu bayiswa ezindlini manje sebephenduke ikhaya lezigebengu ezivele zizingenele. NgoKhisimusi odlule sicele ukuba sigadwe amaphoyisa ngoba sisabela impilo yethu. Sineminyaka sihlala lapha kolindela sithenjiswe imizi kuze kube manje akuzange kwenzeke. Akekho olalela izikhalo zethu. Kule ndawo amathoyilethi avaliwe, amanzi awekho akuyona indawo yokuhlala umuntu. Kunobunuku obumangalisayo kufana nokuthi sihlala nendle endlini ngoba sisebenzisa amabhakede ukuzikhulula,” kusho uNkk Mothiba.

Lokhu kufakazelwe nguNksz Jabu Khumalo othe naye uneminyaka emihlanu ethenjiswa umuzi kodwa usahlezi kulindela nomndeni wakhe.

“Kuyashisa ngendlela emangalisayo kulezi zindlu ngoba simbondelene ndawonye. Kunogesi wokukokotela, izingane aziphephile. Sihlezi kanzima kodwa kuyasicacela ukuthi sizolinda izindlu esingeke sizithole ngoba sekungeniswe abanye abantu thina sisalinde iminyaka,” kusho uNksz Khumalo.

Amanye amalungu omphakathi akhale ngokuhlala kwamalungu omndeni amaningi egunjini elilodwa.

Lo mphakathi uthe kukhona nabantu abamhlophe namakhaladi abahlala kule ndawo kodwa bengakaze bababone phambilini nokubenza basole ukuthi izindlu ziyadayiswa bona behlupheka.

Okhulumela uMasipala weThekwini uMnuz Thabo Mofokeng, uthe bayalwazi usizi olubhekene nabantu abahlala isikhathi eside ezindlini ezingolindela

“Umasipala uyaziqonda izinselelo zabantu asebehlale isikhathi eside kulezi zindlu belinde ukuba kuphume imizi yabo. Yingakho sesinohlelo lokuthi ziqedwe maduzane. Sifuna kungapheli isikhathi eside zisekhona. Sizama nezinye izindlela zokwakha izindlu zesikhashana ezingcono. Ephuzwini lokudayiswa kwezindlu, sihlezi sigqugquzela ukuba laba abanobufakazi beze kumasipala bezobika ngoba kukhona amakomiti abhekelela izindaba ezifuze lezo kumasipala,” kusho uMofokeng.

Usengcupheni yokungazibhali izivivinyo zika-matric umfundi ongawutholi umazisi omusha eMnyangweni wezaseKhaya.

BONISWA MOHALE

USENGCUPHENI yokungazibhali izivivinyo zika-matric umfundi (19) ongawutholi umazisi omusha eMnyangweni wezaseKhaya emuva kokuthi omdala ushe emlilweni emijondolo yakuKennedy Road, eThekwini.

USenzokuhle Mbhele (osesithombeni) utshele Isolezwe ukuthi usegqigqe iminyaka emine ezama ukuthola umazisi omusha eMnyangweni wezaseKhaya kodwa ehluleka ngenxa yokuthi bafuna eze nonina ongaphilile kahle.

“Nginenkinga yokuthi ngeke ngizibhale izivivinyo zika-matric ngoba esikoleni bathe ngeke ngibhalise ngaphandle kukamazisi. Ngizamile ukuya nodadewethu basitshela ukuthi sibancane. Asikwazi ukuhamba nomama ngoba akaphilile kahle. EMnyangweni wezaseKhaya bathe ngeke bakwazi ukungisiza ngoba bafuna umama nezinombolo ezindala zikamazisi. ngisho sengibachazela ukuthi washa futhi bengingazazi izinombolo zawo abazange bangilekelele. Sengidinga usizo lukaNgqongqoshe wezokuThuthukiswa koMphakathi KwaZulu-Natal (uNkk Weziwe Thusi) mhlawumbe bazosukuma uma sebethintwa nguye,” kusho uSenzo.

Udadewabo, uNksz Lindiwe Mbhele (24), uthe yena wasizwa wukuthi ayobheka izinombolo zakhe zikamazisi esibhedlela ayetetele kuso ngoba naye babengafuni ukumenzela umazisi omusha befuna kuze unina.

Unxuse abaphethe uMnyango wezaseKhaya ukuba bangenelele odabeni lukaSenzokuhle ngoba uyithemba lomndeni.

“Ngeke kulunge ukuthi uSenzo ahlale phansi esezoqeda isikole ngoba uzoze angene ezintweni ezingalungile. Besicela aboMnyango wezaseKhaya bamsize ngomazisi ngoba impilo yakhe imile. Nasesikoleni bambhalele incwadi echazayo ukuthi kungani engenawo umazisi ukuze bezombhalisa kodwa bathi ayanele. Uqale ukufunda eSea Cow Lake engenawo umazisi yingakho izinombolo zawo zingekho nasesikoleni, wayesanda kuwuthola ngesikhathi kuqubuka umlilo,” kuchaza uNksz Mbhele.

Isolezwe lithumele imininingwane kaSenzokuhle kwaboMnyango wezaseKhaya nokuze kwashaya isikhathi sokushicilela ingaphendulwanga.

Imile impilo yentombazane osekuphele inyanga ingayi esikoleni okuthiwa ixoshwe ngoba isindala ukuthi ingafunda uGrade 10.

BONISWA MOHALE

IMILE impilo yentombazane (18) osekuphele inyanga ingayi esikoleni okuthiwa ixoshwe ngoba isindala ukuthi ingafunda uGrade 10.

UBongiwe Khwela obefunda eSea Cow Lake Secondary, eThekwini, uthe uke wahlaba ikhefu lonyaka engafundi ngesikhathi ekhulelwe kwathi nonyaka wabuyela esikoleni.

Uthe utshelwe ukuthi usemdala ukuthi angafunda uGrade 10, kwathiwa unina kumele abhale incwadi eshoyo ukuthi kungani ebehleli ekhaya ngonyaka odlule.

“Umama uyibhalile incwadi eshoyo ukuthi benginengane yingakho bengihleli ekhaya kodwa esikoleni basitshele ukuthi kumele ngiyofunda esikhungweni sokuqhubezela imfundo iFurther Education and Training (FET) ngoba sengimdala ukuthi ngingafunda uGrade 10. Inkinga yami wukuthi umama akanayo imali yokungifundisa eFET njengoba ephila ngokubamba amatoho,” kusho uBongiwe.

UNksz Sindisiwe Luthuli ongunina kaBongiwe, uthe ucela kungenelele abaphethe uMnyango wezeMfundo ngoba ingane yakhe isivinjwa ukuba ifunde ngenxa yokukhulelwa.

“Ngibamba amatoho emajalidini bese ngimkhokhela esikoleni, ngisho u-R900 wesikole ngiwukhokha kancane kancane, eyokukhokhela iFET angazi ngizoyithathaphi. Ngihlala lapha emjondolo kuKennedy Road, anginaye umyeni ongilekelelayo. Ngeza lapha ngizofuna amatoho ngo-1999 ngicela bangisize ogqongqoshe bemfundo ngoba imile impilo yomntanami. Ngisho ingane ayeyikhulelwe seyadlula emhlabeni, akukho azokuhlalela ekhaya, kumele afunde,” kusho uNksz Luthuli.

Uthe uBongiwe wathola ingane ngaphambi kwesikhathi sokuzalwa kwayo ngoJuni 2013 inezinyanga eziyisikhombisa. Ishone ngoJulayi ngonyaka odlule.

Uphethe ngokuthi ubezitshela ukuthi indodakazi yakhe izobuyela esikoleni kulo nyaka kodwa washaqeka uma esetshelwa ukuthi ayisamukelekile ngoba isindala.

Imizamo yokuthola aboMnyango wezeMfundo KwaZulu-Natal ukuze baphawule ayiphumelelanga njengoba izingcingo zabo bezikhala zingabanjwa kwaze kwashaya isikhathi sokushicilela.

Uvukwe wumunyu wakhala unkosikazi kaMnuz Jerome Bhunu Hlengwa ngesikhathi ethula ubufakazi ngendlela okwabulawa ngayo umyeni wakhe.

BAWINILE NGCOBO

UVUKWE wumunyu wakhala unkosikazi wowayengumdlali waMaZulu FC, uMnuz Jerome Bhunu Hlengwa ngesikhathi ethula ubufakazi ngendlela okwabulawa ngayo umyeni wakhe eNkantolo ePhakeme eThekwini, ngoLwesihlanu.

UNkk Bongekile Victoria Hlengwa ubengufakazi wombuso ecaleni elithweswe uNksz Duduzile Mamfo Mchunu okuvele ukuthi babethandana naye nosolwa ngokuthenga izinkabi ezabulala uHlengwa ngoJanuwari 2013.

Uthe wayeseshade nomyeni wakhe iminyaka engu-16, bekuba nezikhathi ezimnandi nezingemnandi ngoba umyeni wakhe wayebuye amhlukumeze nokwakumenza abuye aphindele kubo aphinde abuyele emzini wakhe.

Uthe isikhathi eside asihamba emzini wakhe kwakuyizinyanga eziphakathi kweziyisishiyagalolunye neziyishumi.

Ngesikhathi ehambe isikhathi eside ekhaya uthe wayehlangana nommangalelwa cishe zonke izinsuku. Uthe bahlangana naye ngo-2002 befundisa ezikoleni ezingomakhelwane.

“Saqala ngokuthi sibe ngabangani kodwa ngenxa yokuthi sasixoxa ngazo zonke izinto sagcina sesithandana,” kusho uNkk Hlengwa.

Uthe ukuthandana kwabo kwaqala ngaphambi kokuthi ahambe ekhaya isikhathi eside.

Utshele inkantolo ukuthi wabuye waphindela ekhaya emuva kokuthi umyeni wakhe efike kubo ezoxolisa baxoxisana.

Uthe esebuyele ekhaya wacela kummangalelwa ukuthi behlise kancane ekuthandaneni bagxile ebunganini ngoba umyeni wakhe wayesekhononda ngokuthi bahlale behamba njalo.

“Wavuma uma ngimcela kodwa kwakunzima ngoba sasisondelene kakhulu kodwa sasibonana zonke izinsuku,” kusho uNkk Hlengwa.

Uthe ngosuku lokubulawa kukaHlengwa, nguye owaqinisekisa ukuthi iminyango ivaliwe base beya ekamelweni labo lokulala beyobuka khona iTV, umsizi wabo wasendlini walala kuqala.

Uthe umuntu ayegcine ukukhuluma naye ocingweni ngummangalelwa ngoba wayekade emthinte ngesikhathi kufika umyeni wakhe ngabo 7.30 ebusuku.

UNkk Hlengwa uthe babuka iTV yena wazumeka sekudlala ifilimu kanti wavuswa ngumyeni wakhe ecela amanzi okuphuza amaphilisi base becisha iTV belala.

Uthe wavuswa ngumsindo omkhulu kunento eshaya esicabheni kungathi into eklajwayo.

“Ngalunguza ngewindi ngangabona lutho, ngavusa umyeni wami ngathatha iselula ngase ngivula umnyango ngifuna kuyobiza u-anti osisizayo ukuze eze ekamelweni lethu.

Ngathi uma ngivula umnyango ngabona izithunzi ezimbili ngabe sengiphindela ekamelweni ngaphusha umnyango ngesandla,” kusho uNkk Hlengwa.

Uthe umyeni wakhe, owanqunywa umlenze ngo-2012, wabe eseshoshela ngezinqe ethi uzomlekelela kanti uzowa ngesikhathi esehla embhedeni naye wadedela isicabha kwabe sekungena abasolwa.

“Owokuqala wangena wangiphushela embhedeni wabeka imbazo kimi emqaleni wafuna imali. Owesibili wangena ephethe isibhamu,” kuchaza uNkk Hlengwa.

Uthe umsolwa owayekuye wamphuca iselula kanti wezwa sekuqhuma isibhamu kabili kwahamba umqondo kodwa esesemakhazeni ngakusasa wabona amanxeba ayisihlanu ekhanda kumyeni wakhe nelilodwa ovalweni.

Uthe emuva kwalokho kudubula kwathi sebehambile abasolwa waphuma wayocela usizo komakhelwane.

Phambilini enkantolo iJaji uPhillip Nkosi lisinqabile isicelo sombuso sokuthi incwadi efungelwe yokuvuma icala okuthiwa yenziwa ngummangalelwa ithathwe njengobufakazi.

Icala liyaqhubeka namhlanje.

I-EFF ithe uNkk Baleka Mbete ubhebhethekisa udlame ngokubachaza njengezigebengu nangokubiza uMnuz Julius Malema ngekokoloshe.

IZOLO i-EFF ithe uNkk Baleka Mbete onguSomlomo wePhalamende ubhebhethekisa udlame ngokubachaza njengezigebengu nangokubiza umholi wabo uMnuz Julius Malema ngekokoloshe.

“Akukho okuzosivimba ekutheni sifune izimpendulo kule ANC egcwele inkohlakalo,” kusho uMnuz Mbuyiseni Ndlozi okhulumela i-EFF esitatimendeni.

Iphephandaba iMail&Guardian licaphune uNkk Mbete ethi: “Uma singasebenzi sizoqhubeka nokuba namakokoroshe afana noMalema ezicanasela yonke indawo.’’

UNkk Mbete ubekhuluma engqungqutheleni ye-ANC esifundazweni iNorth-West lapho abekhuluma njengoSihlalo we-ANC.

Uxwayise amalungu e-ANC ngokuthi i-EFF isazoqhubeka nokuphazamisa eziShayamthetho nakomasipala wayisola nangokuthi isebenzisana nabathile baphesheya kwezilwandle.

“Leziya zigebengu zizofika ezifundazweni zizoqhuba umkhankaso wazo, hhayi kuphela eziShayamthetho kodwa nakomasipala imbala.

“Kumele nifundise izingane zethu ukuthi azingadukiswa ngokugqoka ama-avaloni abomvu.

Laba bantu abasebenzi nezakhamuzi zakuleli kuphela kodwa basebenza nabanye ohulumeni basemazweni angaphandle,’’ ucashunwe esho kanje uNkk Mbete.

Uthe i-EFF ifuna ukuliqumba phansi iPhalamende bese kuba nokhetho oluyisipesheli, okuyinto abangeke bayivume.

“Bafuna ukuphatha leli lizwe ukuze babe nezimayini babelane ngazo nabangani ababonakala bepepenyeka nabo phesheya kwezilwandle,’’ kusho uNkk Mbete.

UNdlozi uthe okushiwo wuNkk Mbete kubhebhethekisa udlame eqenjeni labo.

Uthe i-EFF ayizisoli ngokufuna izimpendulo kuMengameli Jacob Zuma zokuthi uzoyikhokha nini imali okwalungiswa ngayo umuzi wakhe oseNkandla ngemali engaphezulu kuka-R240 million.

“Izwe alikwazi ukuba noSomlomo obhebhethelisa udlame emalungwini ePhalamende,’’ kusho uNdlozi.

NgoLwesine olwedlule amaphoyisa akhipha ngoshova amalungu e-EFF ePhalamende ngesikhathi ephazamisa inkulumo kaMengameli ayeyithulela isizwe.

I-ANC ayitholakalanga ukuthi iphawule. – Sapa

Kugiye abesifazane kunqoba iMeya yeTheku, uMnuz James Nxumalo, esikhundleni sokuba nguSihlalo we-ANC esifundeni saseThekwini.

CELANI SKHAKHANE

KUGIYE abesifazane kunqoba iMeya yeTheku, uMnuz James Nxumalo, esikhundleni sokuba nguSihlalo we-ANC esifundeni saseThekwini engqungqutheleni yezinsuku ezintathu ephothulwe izolo e-ICC.

Imiphumela yokhetho imenyezelwe ngo-5 ekuseni izolo, kwavela ukuthi uNkk Zandile Gumede ukhale ngaphansi ngamavoti angu-219 ehlulwa uNxumalo ngamavoti angu-233.

Izolo ngesikhathi uNxumalo ephuma okokuqala ngaphakathi ehholo obekuhlangenwe kulo abesifazane bakikizile bamvimba emaphaseji ase-ICC bemhasha besho nokuthi bahlupheke kakhulu bethukelwa yena emagatsheni kusalungiselelwa ingqungquthela.

“Siyabonga Sothondose, Mkhatshwa, Zwide. hawu ulakhile iTheku, pho ubungahlala kanjani ungasithathi isikhundla. Bekuvele kuyimihlola ukuthi iTheku belizoba umuzi ophethwe wumfazi. wake wayizwaphi into enjalo ekubeni indoda ikhona,” kusho uNkk Sindi Mathonsi okume yonke into kwabukwa yena ehasha uNxumalo.

Abanye besifazane bebezithela kuye bethwebula izithombe ngamaselula bethi kwenzeke abebekufuna ngokuthi anqobe.

Abanye abebengaphandle abebengamalungu kaKhongolose abeseka uNxumalo kodwa bengezona izithunywa bebejabule bengaphandle besho ukuthi kubo lokhu okwenzekile kufane nomzuzu wango-2004 mhla i-ANC ithatha iKZN ku-IFP.

“Phela besithwele kanzima kangangokuthi amaphoyisa kamasipala weTheku abesetshenziswa njengama-ZP. Sijabule kabi ngoba akunqobanga ongxiwa ngoba ukube kuwine bona ngabe laba bantu abasemazingeni aphansi abalapha abekho ngoba bekuzobe kugcwele omntakabani bebhiyoza koFlorida,” kusho omunye wamalungu obeseka uNxumalo.

Bekukhona iqeqebana ebelicula izingoma lithi “Yonke le minyaka uNxumao ezabalaza uZandile (Nkk Gumede) wayelibele izinto zakhe.”

Abaseki baNkk Gumede bebengasabonwa nangokhalo njengoba bese kugqame abakaNxumalo kunalokho bekubonakala ngamunye noma ngababili bezihambela ngaphakathi bebukeka bedikibele.

NgoMgqibelo bekukhonya bona abalandeli baNkk Gumede, befike kwezwakala behaya izingoma eziphakamisa yena njengebithi “Sihole Zandile, Sihole”.

Ngisho izimoto ebezibhalwe “Sihamba noMama” ebeziseka uNkk Gumede bezingasabonwa izolo.

UNkk Gumede ubethwelwe ngeqoma yi-ANCYL, ingxenye ye-ANCWL, onobhala bamagatsha, inyunyana yabasebenzi bakamasipala, iSamwu. Bekubhekwe ukuthi aqophe umlando ngokuba owesifazane wokuqala ukuphatha i-ANC eThekwini.

UNxumalo yena ubesekwa yiCosatu, SACP, ingxenye ye-ANCWL neSanco. bebethi uNxumalo uzele ukuzodala ubumbano eThekwini.