Lo mfundi uthe akaqondi ukuthi yini eyenze waba yinhlekisa.

ZANELE MSOMI noNONTUTHUKO NGUBANE

ISIKHUNGO semfundo ephakeme i-University of Zululand (Ongoye), sizothatha izinyathelo ezinzima kubafundi abahlukumeze omunye wesifazane bamenza inhlekisa ngenxa yokugqoka isikhindi.

Izolo lesi sikhungo siphawule okokuqala ngokuhlukunyezwa kukaNksz Onkarabetse Thebeng.

Isithombe salo mfundi sisatshalaliswe kuFacebook abanye begxeka isenzo sabafundi abahlukumeze omunye ekubeni kuyinyanga yabesifazane. Kulesi sithombe uNksz Thebeng ugqoke isikhindi esiveza amathanga, ugqoke izicathulo eziphakeme wagaxa nesikhwama. Ulandelwa yiqulu labesifazane abagqoke iziketi ezinde, abamthwebula ngomakhalekhukhwini behleka.

Izolo lo mfundi uphawule oKhozini FM echaza indlela ahlukumezeka ngayo ngalesi sigameko esenzeka emagcekeni esikhungo.

Lo mfundi ongakwazi ukukhuluma isiZulu njengoba ekhuluma isiTswana uthe akaqondi ukuthi yini eyenze waba yinhlekisa.

“Ngijwayele ukugqoka izimpahla ezimfishane kodwa bengiqala ukuhlangabezana nale nkinga. Ngayizolo bengigqoke okufishane ngaphezu kwalokhu,” usho kanje.

Usola ukuthi lesi senzo sihlobene nomkhuba wabesifazane womona nokwehlisana isithunzi. Nokho ubezwakala ekhululekile yize abaningi bebemzwela.

Abanye abalaleli abaphawule oKhozini bathe basibona isithombe kuFacebook. Bebebabaza bethi namanje abakholwa abakubonile. Omunye wesilisa ofunda kulesi sikhungo uthe wayengekho isigameko senzeka kodwa kumphoxile ukuthi senziwe ngabesifazane. Bonke abalaleli bebesigxeka lesi senzo bethi abayiboni inkinga ngendlela lo mfundi abegqoke ngayo.

UNksz Normah Zondo okhulumela isikhungo uthe bayaqala ukuhlangabezana nesigameko esifuze lesi. Ugcizelele ukuthi awukho umgomo obekiwe mayelana nokugqoka kwabafundi.

“Kuyamangaza ukuthi umfundi uneminyaka emithathu efunda kulesi sikhungo futhi egqoka ngendlela efanayo. Bazothathelwa izinyathelo abafundi abathintekayo bese kuthi umfundi ohlukunyeziwe alulekwe ngokomqondo,” kusho uNormah.

UNksz Makhosazana Nxumalo oyiMenenja yeCommission for Gender Equality esifundazweni uthe umfundi unegunya lokuvula icala lokwehliswa isithunzi.

“Uma ubezizwa ekhululekile ngakugqokile besingekho isidingo sokuhlukumezeka, acwaswe ngalokho,” echaza.

Ukucwaswa kwabesifazane ngendlela abagqoka ngayo kuke kwaba sematheni izinhlangano zabesifazane ezaziholwa nguNkk Nomvula Monkonyane owayengu-Ndunankulu waseGauteng zahlela imashi. Lokhu kwenzeka emuva kokwanda kwesigameko sokuhlukunyezwa kowesifazane ngosomatekisi erenki yaseGoli.

Uvune umndeni umphumela wokuhlolwa kwesidumbu sendodana yawo obekusolwa ukuthi yabulawa wukushaywa ngamaphoyisa ejele.

ZANELE MSOMI

UVUNE umndeni umphumela wokuhlolwa kwesidumbu sendodana yawo obekusolwa ukuthi yabulawa wukushaywa ngamaphoyisa ejele eWestville, obekubambezele nomngcwabo.

Umndeni kaBuhle Sikhakhane (osesithombeni), waseMzinyathi oshone ngenyanga edlule edonsa isigwebo seminyaka emithathu ngokuphanga ugcine ukhululekile wamngcwa-ba ngoMgqibelo. Lo mndeni wahlehlisa umngcwabo ufuna kuphenywe ngokufa kwendodana (26) eyaqala isigwebo ngonyaka odlule.

Umufi okuthiwa washona ngo-Agasti 21 esibhedlela iKing Edward, kusolwa ukuthi washaywa emuva kokuba ezinye iziboshwa zikhombe yena zathi usebenzisa umakhalekhukhwini.

Ngokwemithetho yasejele kuthiwa akuvumelekile ukusetshenziswa komakhalekhu-khwini yiziboshwa ngaphakathi.

UNkk Thobile Sikhakhane ongunina kamufi uthe indodana yakhe yashawa phezu kokuba amaphoyisa engayibambanga nomakhalekhukhwini.

Uthe egcina ukuyibona indoda-na yakhe ejele wayifica imabokobo-ko wukushaywa, yamtshela ukuthi ishayelwe ubala. Uveze ukuthi yayisiphuma esibhedlela emuva kokulaliswa okokuqala kodwa isakhala ngezinhlungu nokunganakwa ejele.

Ishona ngomhla ka 21 yayisingeniswe okwesibili esibhedlela ingalulami.

Umndeni uthi wathola ngoku-shona kukaBuhle ngoba sekuvaka-she udadewabo wangamthola.

UNkk Sikhakhane uthe ushayelwe ucingo ngalo lolu suku ebikelwa ngokufa kwendodana ngoba sekuzitholele indodakazi yakhe.

Umndeni bekufanele ungcwabe emasontweni amabili edlule kodwa wacela ukumisa umngcwabo ukuze kuhlo-lwe isidumbu. Okwenze ufune sihlolwe wukuthi ubukholelwa wukuthi umufi wabulawa wukushaywa. Kuthiwa incwadi kadokotela yabhalwa ukuthi uBuhle uzifele. Emuva kokungenelela komndeni kukhishwe isidumbu emakhazeni esibhedlela safakwa kwakahulumeni.

UNkk Sikhakhane uthe yize eseyingcwabile indodana kodwa ngeke akhululeke lingaphumanga iqiniso.

UCaptain Thulani Zwane okhulumela amaphoyisa eKZN uthe leli cala lizophenywa wuphiko olubhekene namacala enziwe ngamaphoyisa.

Indoda evulele ngenhlamvu esiteshini samaphoyisa kusolwa ukuthi icasulwe ukulindiswa.

NOKUBONGWA PHENYANE

INDODA evulele ngenhlamvu esiteshini samaphoyisa ePhoyinti, eThekwini, izolo emuva kokuhlwitha isibhamu sephoyisa elinguCaptain kusolwa ukuthi icasulwe ukulindiswa usuku lonke ingakutholi ukusizwa kusukela ngeSonto igqigqa esiteshini.

Kulesi sigameko kudubuleke iphoyisa elinye lathuka lavukwa yisifo senhliziyo.

Womabili amaphoyisa aphuthunyiswe esibhedlela emuva kokuba umsolwa yena edutshulwe ezandleni ngamaphoyisa abezama ukuzivikela.

Iphoyisa elikhulume neSolezwe lithe lithuke kakhulu futhi liyacabanga ukuthi umsolwa wenze lesi sigameko ngoba ubesecasulwe ukuhlala isikhathi eside esiteshini elindile.

“Ukunganakwa ngicabanga ukuthi yikhona okumenze wathatha isinqumo sokwenza lesi sigameko,” kusho leli phoyisa.

Lithe sekuzoba nzima ukuthemba wonke umuntu ozocela usizo ngoba ngeke bazi ukuthi ngempela unaziphi izinhloso.

Le ndoda eneminyaka engu-25 kuthiwa ifike kulesi siteshi ngeSonto izocela ukuthi amaphoyisa ayigodukise noma ayinike imali yokugibela njengoba abangani bayo ebibavakashele eThekwini bese bengayinakile.

UCaptain Thulani Zwane, okhulumela amaphoyisa KwaZulu-Natal, uthe ngesikhathi le ndoda ifika kulesi siteshi amaphoyisa ayinxuse ukuthi iwanike inombolo yomndeni wayo ukuze axhumane nawo ngoba amatasa ngeke akwazi ukuyihambisa ngaleso sikhathi.

“Amaphoyisa amcele ukuba ahlale phansi alinde azomtshela uma kukhona akutholayo. Ngemuva kokukhuluma nomfowabo abe esemtshela ukuthi asexhumene nabakubo wagcina ngokuthi ahambe,” kusho uZwane.

Uthe izolo ngoMsombuluko ube esebuya ezozwa ukuthi isicelo sakhe sihamba kanjani kodwa watshelwa ukuthi kumele alinde ngoba kusasizwa abanye abantu.

“Ngemuva kwalokho kuthiwa ubonakale ehla enyuka ngaphakathi esiteshini kungazeki ukuthi wenzani.

“Amaphoyisa ezwe kusuka umsindo lona wesilisa esephuce iphoyisa elinguCaptain isibhamu wavulela ngenhlamvu kwadubuleka iphoyisa esiphongweni,” kuchaza yena.

Uthe amaphoyisa azame ukuzi-vikela adubula umsolwa ezandleni.

“Ungaphansi kweso lamaphoyisa ubhekene necala lokuzama ukubulala kanti uzovela maduzane enkantolo yeMantshi eThekwini,” kuchaza yena

UZwane uthe amaphoyisa athuke kakhulu ngalesi sigameko.

Ngesikhathi Isolezwe lifika kulesi siteshi amaphoyisa abemi izixongololo ebhunga ngalolu daba.

Elinye elikhulume neSolezwe lithe lithuke kakhulu futhi liyacabanga ukuthi umsolwa wenze lesi sigameko ngoba ubesecasuke kakhulu ngenxa yokulindiswa.

Usephuthwe wumsebenzi ezinkampanini ezinkulu owesilisa osekuphele iminyaka emibili engasitholi isitifiketi.

ZANELE MSOMI

USEPHUTHWE wumsebenzi ezinkampanini ezinkulu owesilisa owenza izifundo zikagesi esikhungweni esizimele eThekwini osekuphele iminyaka emibili engasitholi isitifiketi.

UMnuz Mlungisi Sithole (32), waseClare Estate, usegcine ehlala ekhaya phezu kwekhono lomsebenzi analo kodwa akaqashwa ngenxa yokungaphumi kwesitifiketi eMbani Training Centre.

USithole wakhokha uR12 000 ngoJanuwari 2012 enza iTrade Test kagesi amasonto ayisihlanu ethembe ukuthi uyophuma esehlomele umsebenzi.

Ngaphambi kokungena kulesi sikhungo esiseJacobs, eThekwini, wayeka itoho ngoba efuna ukuthola isitifiketi ukuze aqasheke kangcono.

“Ngayalelwa wubhuti wami owafunda khona wathola isitifiketi ngo-2009. Yize imali inkulu kodwa ngadela konke ukuze ngiphume nesitifiketi ngoba ngazi ukuthi azovela amathuba omsebenzi,” kusho yena.

Phezu kwalo R12 000 uSithole uthe wazithengela umfaniswano okubalwa namabhuzu okusebenza, izincwadi namathuluzi.

Ukhombise Isolezwe incwadi eqinisekisa ukuthi usephothule izifundo kulesi sikhungo eyasayinwa nguStephanie Pillay oyi-Administrator. Incwadi ihambisana nesitatimende esibhalwe izifundo abezenza nokuthi uphumelele kuzona zonke.

Uthe ubelokhu esebenzisa lezi zincwadi uma eyofuna umsebenzi kodwa izinkampani zithi zifuna isitifiketi. Usephindele kaningi lapho ayefunda khona afike atshelwe ukuthi uzosithola isitifiketi emuva kwezinyanga ezintathu.

“Bekuphela izinyanga ezintathu ngiphindele, ngilindiswe ezinye izinyanga. Ngigcina ukushaya ucingo ngesonto eledlule obambe ucingo uthe angiphole ngoba kusakhishwa izitifiketi zika-2009,” usho kanje.

USithole uthe amathuba akhona futhi ziyaphuma izikhala zomsebenzi yena abanjwe yisitifiketi yize ewazi umsebenzi kagesi. Useke wazama kuMasipala weTheku nakhona kwafuneka sona.

Uphinde wathola itoho kwa-Eskom wabavezela isitatimende wabatshela ukuthi usalinde isitifiketi. Kuphele isikhathi singaphumi wagcina ephuthwe kanjalo wumsebenzi.

Kushayelwa eMbani Training Centre ucingo ludluliselwe kuMnuz Zak Narain othe ungumphathi waso. Uqale wanqaba ukuphawula ethi Isolezwe alizifikele kuzoxoxwa eduze.

Uthe ngeke aphawule ngoSithole kuphela ngoba akuyena yedwa onenkinga.

“Sizama ngakho konke okusemandleni ukulungisa izinkinga. Isikhungo sithengwe abaphathi abasha abafice izinkinga kuso. Kumanje abanye abafundi anginawo amafayela abo kodwa siyazama ukulungisa,” kusho yena.

Basebenza umathanda odokotela mbumbulu abakhipha izisu eThekwini.

INTATHELI YESOLEZWE

BASEBENZA umathanda odokotela mbumbulu abakhipha izisu eThekwini njengoba iziphathimandla zilushaya indiva udaba lokwanda kwabo.

Amaphoyisa kaMasipala weTheku nawe-SAPS esifundazweni asolwa ngokungenzi lutho ukulwa nokwanda kwemitholampilo engekho emthethweni ethi isiza abafuna ukukhipha izisu.

Izikhangiso ezithembisa ukukhishwa kwezisu ngokushesha ngendlela ephephile zisaphake lonke iTheku.

Umthombo osebenza kumasipala weTheku uthe ukungazimiseli ekulweni nokwanda kwalezi zikhungo yikho okwenza zande.

Uthe ithimba okufanele engabe yilo elilwa nokwanda kwale mitholampilo engekho emthethweni yi-Inner City Thekwini Regeneration and Urban Management Programme (iTrump).

Sekuphele iminyaka emithathu leli thimba lingagaseli kule mitholampilo ukuze ivalwe. Ngokusho komthombo, kuqala ithimba le iTrump beligasela kungazelele kule mitholampilo nobekuholela ekutheni ivalwe.

“I-iTrump yithimba elibhekele lokhu kodwa lilahlekelwe yisigamu sabasebenzi balo ezinyangeni ezedlule. Manje sebenedlanzana nje labantu abenza neminye imisebenzi njengokuhlola amabhilidi angekho esimeni. Abanaso neze isikhathi sokulandelana nabemitholampilo engekho emthethweni,” kusho umthombo.

Inhloko ye-iTrump uMnuz Hoosen Moolla, ikuvumile ukuthi kunezinkinga zokushoda kwezinsiza kusebenza.

Uthe banethemba lokuthi lizohlanganiswa ithimba elizophenya bese livala imitholampilo engekho emthethweni.

Akakwazanga ukusho ukuthi kuzoqala nini ukuhlaselwa kwale mitholampilo.

“Sisematasa nezinye izinhlelo okwamanje. Le nkinga ayikho eThekwini kuphela kepha ikhona ezweni lonke. Okwamanje asinalo ithimba elibheka laba bantu libabophe. Udaba lomthetho elidinga ukuthi kusebenzisane iminyango eminingi,” kusho uMoolla.

Okwamanje izikhangiso ezithembisa izinto ezahlukene okubalwa kuzo ukukhishwa kwezisu okuphephile nokusheshayo zinamekwe ezindongeni nasezigxotsheni zeTheku.

Okhulumela umasipala uNksz Tozi Mthethwa uthe izikhangiso nemitholampilo kuyinkinga eqhubekayo.

“Ngaphambilini umasipala bewuhlanganyela namaphoyisa esifunda ugasele kule mitholampilo bese kuboshwa abanikazi bayo. Ikhona imikhankaso ekhona ukuqwashisa umphakathi ngobungozi bokusebenzisa odokotela abangekho emthethweni,” kusho uNksz Mthethwa.

Bafuna umasipala weTheku ungenelele odabeni lokubulawa kwabantu ehostela laseGlebelands.

LUNGI LANGA

BAFUNA umasipala weTheku ungenelele odabeni lokubulawa kwabantu ehostela laseGlebelands eMlazi osekufe inqwaba kulo ngenxa yombango wemibhede.

Inhlangano yabasemahostela Ubunye Bamahostela seyizwakalise ukukhathazeka ngokucweba kweziziba kuMasipala weTheku mayelana nodaba lokubulawa kwabantu ehostela lezinxushunxushu iGlebe.

Okhulumela le nhlangano uMnuz Mthembiseni Thusi uthe kuyabakhathaza ukuthi akukho okusakhulunywe ngumasipala ngodaba lokufa kwabantu kuleliya hostela.

“Besifisa ukubona umasipala kanye namakhansela bekhuluma ngezinto ezenzeka ehostela. Kusiphatha kabi ukubona umasipala ungenzi lutho ngalokhu okwenzeka lapha,” kusho uThusi.

Lokhu kulandela ukufa kwabantu ehostela bebulawa ngendlela engaqondakali kusukela ekuqaleni kwalo nyaka embangweni okuthiwa usuka ekudayisweni kwemibhede.

Kukholakala ukuthi bangaphezu kuka-14 abantu asebebulewe kanti yinqwaba esilimele.

UThusi uthe bekungakuhle ikhansela lakuleya ndawo uMnuz Mshiyeni Mzobe angenelele ekuxazululeni lolu daba ngoba ukuthula kwalo kukhombisa ukuthi kukhona okungahambi kahle.

“Asisho ukuthi sisola ikhansela ngokwenzekayo kepha kungakuhle lizame ukwehlisa umoya likhulume nalezi zinhlaka eziqedanayo ehostela.

“Uma bukhona ubuqiniso ekutheni kunabadayisa ngemibhede, bekufanele baboshwe ngoba lokhu abakwenzayo akukho emthethweni,” kusho uThusi.

Ngempelasonto kuvele ukuthi kutholakale izidumbu ezimbili kwase kudutshulwa oyedwa esikhathini esingangesonto. Isidumbu sikaMnuz Thothenhle Shinga sitholakale ngoLwesihlanu ekuseni. Ngomgqibelo ntambama kuhlaselwe kwadutshulwa umgcinimafa we-ANC uNksz Thandiwe Ntobela (41).

Okhulumela amaphoyisa uCaptain Thulani Zwane ukuqinisekisile ukuthi baphenya amacala okubulala nelokuzama ukubulala.

Uthe umasipala ufana nomasitende ngakho bebelindele ukuthi ube ngabanye babakhuluma ngodaba lokufa kwabantu kuleliya hostela.

Isolezwe livakashele kuleli hostela isimo besibukeka sisemanzonzo njengoba nabahlali bakulona bebezwakala besaba ukukhuluma ngodaba lokubulawa kwabantu.

Omunye ohlala kule ndawo uveze ukuthi abasathembani bodwa ngoba kumaqembuqembu.

Kukhona abahambisana nosihlalo basehostela bese kuba nabahambisana nelinye ithimba elifuna bachithwe.

“Izindaba zokubulawa kwabantu zikhulunyelwa phansi okungangokuthi uma kutholakale umuntu namuhla abanye bagcina ngokuzwa emuva kwezinsuku ezimbili,” kusho lo ohlala kuleli hostela.

Abanye bebevele baphendule bathi bavakashile abazi lutho ngezigameko zokubulawa kwabantu.

Kufike isikhathi sokushicilela umasipala ungayiphendulile imibuzo ethunyelwe kuwo mayelana nalolu daba. Nemizamo yokuthola uMzobe ayizange iphumelele njengoba ucingo lwakhe ebengaluphenduli.

UNkk Nomusa Dube-Ncube usexwayise omasipala ukuthi ngeke bananaze ukususa abayizithiyo wekuhanjisweni kwezidingo emphakathini.

MHLENGI SHANGASE

UNGQONGQOSHE wezokuBusa ngokuBambisana neziNdaba zoMdabu KwaZulu-Natal, uNkk Nomusa Dube-Ncube usexwayise omasipala ukuthi ngeke bananaze ukususa abayizithiyo wekuhanjisweni kwezidingo emphakathini.

UNkk Dube-Ncube, obekhuluma ngesikhathi kunomhlangano womkhandlu wezifundazwe iNational Council of Provinces (NCOP) eThekwini. Uthe uhulumeni awusinisi amahleza.

“Sizobasusa abantu abayizithiyo ekuhanjisweni kwezidingo emphakathini. Akumele sibe yizihambi kubantu abasikhetha kumele ngaso sonke isikhathi siye kubona. Kuze kube nemibhikisho yezidingo ngenxa yokuthi abantu basuke belinde izimpendulo,” kusho uNkk Dube-Ncube.

Ukusho lokhu emele uNdunankulu waKwaZulu-Natal uMnuz Senzo Mchunu njengoba lo mkhandlu uzozinza kumasipala weTheku lonke leli sonto.

Usho lokhu nje, ngeledlule uxoshe wonke amakhansela kuMasipala iMpofana kulandela izinxushunxushu nemibhikisho yomphakathi. Ufake lo mkhandlu ngaphansi kozowuxazulula.

UNkk Dube-Ncube uthe bazowasusa amakhansela akhohlakele ngoba inkohlakalo yinto abafuna ukuyisusa nezimpande zayo kuhulumeni.

UMnuz Mtomuhle Khawula, we-IFP, ukhale ngokuthi bebezitshela ukuthi kuzokhulunywa ngezinkinga ezikhungethe uMasipala weTheku nemibhikisho yomphakathi.

Ukhale nangokuthi kusuka ngo-2005 kuya kulo nyaka omasipala babuyisela imali emuva kuhulumeni bengayisebenzisanga ekubeni abantu behlezi bekhala ngezidingo.

“Ikuphi okwenzayo ukulwa nalesi sihlava sokubuyisela imali emuva?” Kubuza uKhawula.

Ubuze nokuthi njengoba umnyango uhlinzeka izizwe ngezindlu ezihlala amakhosi kwenzakani uma inkosi ikhothama.

“Ngifuna ukuthola la ngqongqoshe ukuthi njengoba izindlu zakhelwe amakhosi, kwenzekani uma edlula emhlabeni?”

UNkk Dube-Ncube uthe bayabeseka omasipala ukuthi basebenzise sonke isabelomali uma bengayisebenzisi bayidlulisela kulabo abayisebenzisayo.

“Mayelana nezindlu zamakhosi zisingethwe nguMnyango wezemiSebenzi yoMphakathi futhi zisuke zakhelwe isizwe. Akukaze kube nesimo la kushona khona inkosi ukuze sibheke ukuthi umuzi siwenzeni. Kodwa ngoba kusuke kungowesizwe uzoqhubeka usetshenziswe yisona ngoba ngeke phela siwuqukule siwususe uma sekushone inkosi,” kusho uNkk Dube-Ncube.

Uthe kusazoba umhlangano abazoba nawo ne-NCOP lapho bezochazela lo mkhandlu ngesinqumo sokuhlakaza uMasipala iMpofana.

U-Oscar Pistorius wabenzela phansi abameli bakhe.

Sapa

U MSUBATHI u-Oscar Pistorius (osesithombeni) wabenzela phansi abameli bakhe ngesikhathi efakaza ecaleni lakhe lokubulala, ngokusho kommeli ngaphambi kokuthi kuphume isinqumo ngoLwesine.

“Indaba yokuthi waphubuka wakhala kuyinto eqondekayo kodwa inkinga ngukuthi ubelokhu eshintshashintsha esho lokhu aphinde asho okunye. ngicabanga ukuthi ubengufakazi omuhle woMbuso,” kusho u-Advocate okwiBridge Group, uMannie Witz.

“Abameli bommangalelwa balethule kahle uhlangothi lwabo kodwa ubenzele phansi abemmele ngoba ubengeyena ufakazi omuhle.”

UWitz uthe uPistorius bekumele agxile kulokhu akusho ngesikhathi efuna ibheyili. Ngaleso sikhathi wathi wayecabanga ukuthi kunesigebengu esingene ethoyilethi emzini wakhe osePitoli ngesikhathi edubula ebhekise esicabheni.

Wadubula kane, ebulala intombi yakhe eyabe ingumkhangisi futhi ineziqu zomthetho uReeva Steenkamp ngoFebhuwari 14, 2013.

UMbuso uthi wambulala ehlosile.

Ijaji uThokozile Masipa uzoqala ukwethula isinqumo sakhe eNkantolo eNkulu yasePitoli kusasa.

Ngesikhathi kuqala ukuqulwa kwecala ngoMashi 3, uPistorius wawaphika amacala okubalwa elokubulala namathathu abhekene nokuphatha isibhamu.

Oyi-senior lecturer enyuvesi yaseKapa, uKelly Phelps, uthe abameli bakaPistorius benze umsebenzi omuhle “wokuhlanganisa imicu eyehlukene yobufakazi ukuze bayibumbe yenze umqondo”.

“Uma ufunda izethulo zabo sekuzophothulwa ukuqulwa kwecala ngicabanga ukuthi bagqamisa isizathu sikafakazi ngamunye ngendlela ecacile,” usho kanje.

“Ngicabanga ukuthi uma ubheka lezi zethulo bakwenzile okufanele ukuveza okungahlangani ezethulweni zoMbuso.”

Umalume kaReeva, uMichael Steenkamp, uthe umndeni uzobe usenkantolo kusasa.

Ngesikhathi kuqulwa icala, uMasipa ubesizwa nguThemba Mazibuko noJanette Henzen-du Toit.

Izolo i-ANC ithe ayikhathazekile nakancane ngalokho iDA ethi igabe ngakho.

IZOLO i-ANC ithe ayikhathazekile nakancane ngalokho iDA ethi igabe ngakho mayelana nezinkulumo eziqoshiwe zobunhloli efuna kubuyekezwe ngazo isinqumo sokuhoxiswa kwamacala ayebhekene noMengameli Jacob Zuma.

Okhulumela i-ANC, uMnuz Zizi Kodwa uthe ukugxila komholi weDA kulezi zinkulumo eziqoshiwe kukhomba ukuthi usaqhuba umkhankaso wokudicilela phansi i-ANC nobuholi bayo.

“Asithukile futhi asikhathazekile ngokutholwe yiDA ezinkulumweni eziqoshiwe,” kusho uKodwa esitatimendeni.

Uthe i-ANC ikholelwa ekutheni uMqondisi owayebambile wezokuShushiswa koMphakathi, uMokotedi Mpshe, wathatha isinqumo ayesicabange kahle.

Okhulumela iDA kuzwelonke uMarius Redelinghuys izolo uthe uma i-ANC ingasabi lutho oluqukethwe yizingxoxo eziqoshiwe kumele ngabe kade yaphumela obala ngazo.

Kusolwa ukuthi izingxoxo eziqoshiwe ziphakathi kowayeyinhloko yophiko loKlebe uMnuz Leonard McCarthy, nowayeyinhloko yeNPA uMnuz Bulelani Ngcuka ababedingida ukuphazamisa ukushushiswa kwecala ngaphambi kwengqungquthela ye-ANC ePolokwane ngo 2007.

Kuleyo ngqungquthela uMnuz Jacob Zuma waqokelwa ukuba ngumengameli we-ANC, ekade ebangisana noMnuz Thabo Mbeki.

Ngaleso sikhathi uMpshe wanquma ukuthi uZuma wayakhelwa uzungu lwezombusazwe amiswa amacala. Wonke amacala ayebhekene nawo ahoxiswa ngaphambi kokuthi afungiswe njengomengameli wezwe ngo 2009. – Intatheli yeSolezwe

Uthukuthele uyaveva uyise womfundi okuthiwa sekuphele isonto elele esibhedlela emuva kokushaywa nguthisha.

ZANELE MSOMI

UTHUKUTHELE uyaveva uyise womfundi waseZwelibanzi High School, eMlazi okuthiwa sekuphele isonto elele esibhedlela emuva kokushaywa nguthisha ngenduku, walimala isandla.

UZasembo Mkhize (15), owenza uGrade 9, usesibhedlela ePrince Mshiyeni lapho esalashelwa khona ukulimala esandleni.

Kuthiwa ungomunye wabayisithupha abashaywe nguthisha ofundisa izibalo emasontweni amabili edlule ngoba engawuqedanga umsebenzi.

Kuthiwa uthisha wabathembisa imivimbo eyisikhombisa ngamunye, uZasembo wacela ukushaywa izikhawu ngoba uyayisaba induku.

Uqale washaywa eyisihlanu uthisha wadlulela kwabanye wabuyela kuyena nemivimbo yokugcina emibili. Isandla sobunxele ashaywe kuso kuthiwa yisona asisebenzisayo.

UMnuz Bhekisisani Mkhize (47), uthe usephithene ikhanda njengoba indodakazi yakhe ingalulami.

Uveze ukuthi ingane ingene eZwelibanzi nonyaka ikade ifunda eStanger, wayibuyisa ngoba esefuna ifunde ngolimi lwayo. Uqale ukunaka ukuthi ingane ilimele ngoba ikhala ngezinhlungu ipeni lingabambeki.

“Ngambuza ukuthi kanti kwenzekeni wangilandisa ukuthi bashayelwe ukungaqedi umsebenzi wesikole. Uthe yena washaywa izikhawu ngoba eyisaba induku, walimala emunweni wokukhomba. Izinhlungu zidlongile ngamyisa esibhedlela,” kusho yena.

UMkhize uthi akakholwanga ingane isiyoshaywa isithombe sesandla esibhedlela, kwathiwa izolaliswa ngoba ilimele kakhulu.

Okuphatha kabi uMkhize wukuthi esikoleni sebeyalwazi udaba lokulimala kwengane kodwa bathule.

“Ngaya esikoleni ngangamfica uthishanhloko. Ngenxa yokuthi bebematasa esikoleni kunikezwa abafundi imiphumela, ngashiya umyalezo ehhovisi ngalubika nodaba engize ngalo. Ngafonelwa ngakusasa kwangathi bazoyivakashela ingane esibhedlela kodwa angikaze ngithintwe,” kusho yena.

UZasembo kuthiwa uhlinzwe umunwe ngoLwesibili olwedlule kodwa isandla asikasebenzi. Uyise ubelindele akhishwe esibhedlela izolo kodwa bathe usalulwa iminwe.

UMkhize uzame ukuvula icala esiteshini samaphoyisa eBhekithemba, eMlazi ngoMsombuluko, amaphoyisa athi afuna ukuyozibonela ingane.

“Athe angowashayela uma sengiya esibhedlela ayobona ingane. Ngivele ngadikibala ngoba angikaze ngiyizwe le nto abayishoyo,” usho kanje.

UCaptain Thulani Zwane okhulumela amaphoyisa KwaZulu-Natal uthe uMkhize kumele adlulele kumphathi-siteshi wamaphoyisa.

Okhulumela uMnyango wezeMfundo uMnuz Muzi Mahlambi, ucashunwe ezindabeni zeSABC ngoLwesihlanu ethi sebeqale uphenyo ngokushaywa komfundi. Uthe othisha bayazi ukuthi ukushaywa kwezingane kwavalwa futhi bathathelwa izinyathelo abaqhubekayo.

Abesilisa ababili babhokodwe ngommese ngabesilisa okuthiwa babafice bemi nowesifazane.

NOKUBONGWA PHENYANE

USABABAZA isihluku umphakathi wakwa U eMlazi ngesehlakalo sangempelasonto lapho kugwazwe kwabulawa abesilisa ababili abangomakhelwane esigamekweni okusolwa kuso umbango wentombi.

UMnuz Xolani Ngcaca (30) noMnuz Thami Ngcobo (25), babhokodwe ngommese ngabesilisa okuthiwa babafice bemi nowesifazane okusolwa ukuthi uyintombi kaXolani.

Lona wesifazane ubeshiye uXolani nomngani wakhe uThami lapho bekade behleli khona endlini ethi uyothenga iSavannah.

Umphakathi namalungu emindeni yabashonile isababaza isihluku ababulawe ngaso njengoba kuthiwa izidumbu zabo ubungafunga ukuthi bezidwetshwa ngommese.

Umalume kaNgcaca uMnuz Bhutana Cebekhulu uthi uyoyikhohlwa efile into ayibonile ngenxa yamanxeba asabekayo abafi abebenawo njengoba bobabili beshonele endaweni yesigameko.

“Nami nginebhizinisi lokudayisa utshwala ekhaya ngakhetha ukuthi ngoLwesihlanu ebusuku ngizihlalele nabo sashisa inyama kwathi sekusebusuku sengifuna ukuvala nami ngilale ngoba angiphilile, ngabatshela ukuthi abathathe inyama bahambe nayo bayozijabulisa,” kusho uCebekhulu.

Uthe bahamba bayohlala kwenye indawo yena wasala walala.

“Kwathi ngo-1 ekuseni kwafika intombi kaXolani izongitshela ukuthi sebegwaziwe. Ngavele ngavuka lapho ngathi ngifika lapho kwenzeke khona isigameko ngakhala izinyembezi ngendlela ababeyiyo. Ngabuza ukuthi kwenzakaleni intombazane yathi yona ayazi kubangweni futhi nabafana abenze lokhu ayibazi,” kuchaza uCebekhulu.

Uthe uma sebethola kahle kuthiwa intombi kaXolani yabafica behlezi, nayo yahlala nabo nokwathi isikhashana ifikile yabonakala isicofa ifoni.

“Ngemuva kwalokho kuthiwa yezwakala isithi isiyahamba isayothenga isiphuzo kodwa izobuya.

“Ngesikhathi iqeda kuphuma laba uXolani noThami bayilandela kwathi befika esitolo bayifica imi nomunye wesilisa. Kuthiwa uXolani wafika wakhuluma nayo nokwagcina ngokuthi imshaye intombazane kwaba khona ingxabano waphetha ngokuyishiya wahamba,” kulanda uCebekhulu.

Endleleni kuthiwa babengasanakile ukuthi laba besilisa bayabalandela kanti bazobahlasela babagwazele khona lapho.

UNksz Busisiwe Maphumulo unina kaThami uthe ufe olwembiza ngendodana yakhe obekungukuphela kwayo nebingasukeli muntu.

“Angisho ngoba kuyingane yami kodwa ubengeyena umuntu onodlame, naye uXolani bebehlala behleli esitolo sikaCebekhulu. Bafe kabuhlungu bengaphethe lutho lokuzivikela. Uyabona ukuthi babengathuswa ngokubulawa kodwa vele babefuneka befile,” kuchaza uNksz Maphumulo.

Umthombo okhulume neSolezwe uthe uXolani ubehlala ngokuhlukumezeka njalo kulona wesifazane abanengane naye.

Okhulumela amaphoyisa KwaZulu-Natal uCaptain Thulani Zwane, uthe kusaphenywa amacala amabili okubulala, akekho osaboshiwe ngalesi sigameko.

UZwane uthe imbangela yokubulawa kwalaba abakayazi okwamanje.

Umnyango weMfundo eyisiSekelo, usuzwakalise ukuthi ngeke uwunake umbiko weWorld Economic Forum.

MHLENGI SHANGASE

UMNYANGO weMfundo eyisiSekelo, usuzwakalise ukuthi ngeke uwunake umbiko weWorld Economic Forum (WEF) oklelise iNingizimu Afrika ekugcineni emazweni abhacazayo ekufundisweni kwe-maths nesayensi.

Umbiko okhishiwe ulibeka kunombolo 140 elaseNingizimu Afrika ngokohlelo lwezemfundo olukhona.

Okhulumela umnyango, uMnuz Elijah Mhlanga, uthe abanandaba nalo mbiko ngoba owabantu abathile ababeka umbono wabo ngeNingizimu Afrika.

Uthe leli qeqebana losomabhizinisi alibathinti futhi akukho cwaningo abalwenzayo ngezwe nangohlelo lwezemfundo.

“Umbiko uyinto esingayithathi njengento ekhona ngoba oweqeqebana losomabhizinisi elisuke linombono ngemfundo. Umbono nje ongahambisani nacwaningo yinto yabo nje. Bahlala ekhoneni bakhe isithombe engqondweni sokuthi izwe kumele libe sekugcineni,” usho kanje.

Uthe ukuba basuke benze ucwaningo ngezinto abasuke bekhuluma ngazo ngabe mhlawumbe bayazihlupha ngalo mbiko.

“Into nje esingazihluphi ngayo le ngoba ifana nento engekho. Sinazo thina izinhlelo zokubona ukuthi esikwenzayo kuba yimpumelelo. Lide ibanga eselihanjiwe ukuthuthukisa ezemfundo. Asifihli uma kunezinkinga ithina esiba abokuqala ukuphumela obala sizisho lezo zinkinga,” usho kanje.

Uthe izivivinyo ezifana ne-Annual National Assessments (ANA) ngezinye zezinto ababona ngazo izinkinga.

“Umbiko we-ANA uyasho la kushoda khona nala kumele siqinise khona. Ngakho ke siyazi ukuthi izinkinga zikuphi asidingi ukutshelwa osomabhizinisi abayisa izingane zabo ezikoleni ezizimele,” kusho uMhlanga.

Ngokombiko elaseNingizimu Afrika lingunombolo 117 uma kuza ezikoleni ezine-internet libe ngu-133 uma kuza ezingeni lemfundo yamabanga aphansi.

Emfundweni yasemanyuvesi lingunombolo 93 uma kuza ezibalweni zabafundi kulezi zikhungo.

Okhulumela i-DA kwezemfundo, uNksz Annette Lovemore, uthe zishayisa ngovalo izibalo ngezwe ngoba zitshengisa ukuthi kunezinkinga ekufundisweni kwezibalo nesayensi ezikoleni.

“Asibaniki abafundi ithuba lokuthi baphumelele empilweni uma singabaniki amathuba kwezemfundo. Silanda lonke uhlobo lwama-artisan kwamanye amazwe nonjiniyela ngoba asikwazi ukuzikhiqizela abethu,” usho kanje.

I-DA ifuna uNgqongqoshe walo mnyango, uNkk Angie Motshekga (osesithombeni ) asebenzise iziphakamiso zombiko wethimba elalibheka izinga lika-matric.

Ezinye zeziphakamiso zaleli thimba kwakuwukwenza imaths ibe yimpoqo kubona bonke abafundi ukuze kuliwe nokwehla kwesibalo sabafundi abenza lesi sifundo.

Muva nje uNkk Motshekga wathi usawucubungula umbiko waleli thimba.

Owesifazane waseVerulam usethembise ukuklomelisa ngemali noma ngubani ongamsiza athole isoka lakhe.

MCEBO MPUNGOSE

OWESIFAZANE waseVerulam usethembise ukuklomelisa ngemali noma ngubani onga-msiza athole isoka lakhe osekuyophela amasonto amabili limdukele emuva kokumethembisa umshado.

UNksz Sthembile Zondi (35) usekhiphe umehlokaboni ka-R1 000 kumuntu ozomsiza athole isoka lakhe, uMnuz Jan Odio Gumede obehlala eWaterloo, abesethandane naye iminyaka emibili. Le ntokazi ithe izimisele ukunikeza imali umuntu ozoyisiza ithole uGumede ezinsukwini eziyishumi ezilandelayo.

Uthe uGumede unyamalala nje ngenyanga ezayo bekumele bahambele kubo eZimbabwe beyohlanganiswa ngokwesiko ngoba izinkolelo zabo azibavumeli ukuthi bahlale ndawonye bengashadile.

“Uhambe engumuntu obenza amalungiselelo okusuka eWaterloo ukuze sihlale ndawonye kodwa savumelana ngokuthi sizoshada kuqala. Bese sihlele konke, ngaze ngathola amaphepha okuhambela eZimbabwe ngoba besizohlanganiswa nguyise ngo-Okthoba, sibuye sesizohlala ndawonye,” usho kanje.

Uthe nakuba umndeni kaGumede ungowaseZimbabwe, yena uzalelwe kuleli wakhulela eGoli ngaphambi kokuzosebenza eThekwini. Uthe umndeni wakhe eGoli nawo ukhathazekile njengoba kungekho noyedwa owaziyo ukuthi ukuphi.

“Ngabe kungcono ukube umuntu onyamalele sithandana nje, manje sesithembisene nomshado,” kuqhuba uNksz Zondi obelokhu ekhale njalo exoxa ngalolu daba.

Ebuza abangani bakhe ngoGumede uthi bamazisa ukuthi wafika ngesithuthuthu sakhe ezoqoqa izinto ngoMgqibelo odlule, wathi usethenge umuzi naye.

“Wathi uthenge nami, uMaZondi, wahamba etshele abangani bakhe ukuthi uzobuya emizuzwini emihlanu kodwa bagcina lapho ukumbona ehamba ngesithuthuthu engamthe-ngela sona,” kuqhuba uNksz Zondi.

“Nasemaphoyiseni eVerulam ngize ngacela bangibhekele ukuthi akaboshwanga yini noma mhlawumbe ube nengozi. Ngabe kungcono ukube ngiyazi ukuthi ukuphi manje angazi lutho nocingo lwakhe alungeni,” usho kanje.

Okhulumela amaphoyisa KwaZulu-Natal uCaptain Thulani Zwane ukuqinisekisile ukuvulwa kwedokodo ngowesilisa olahlekile wathi amaphoyisa asaphenya.

UNksz Zondi uthe ucela abanga-kwazi ukumsiza athole uGumede baphumele obala baxhumane naye.

Umphakathi waseNtuzuma uvuke umbhejazane wavala umgwaqo uThendele ukhala ngekhansela lawo eliphethe ku-ward 42.

ZAMANDOSI CELE

UMPHAKATHI waseNtuzuma uvuke umbhejazane wavala umgwaqo uThendele ngasegaraji lakwaNozaza ukhala ngekhansela lawo eliphethe ku-ward 42.

Bavuke ekuseni bavala umgwaqo ngamatshe okwenze ukuhamba kwezimoto kwaba nzima abashayeli bevika amatshe.

Ngezikhathi zasemini bese kutshalwe amaphoyisa ukuqapha isimo.

UNksz Gugu Zuma (33), ohlala eNtuzuma, uthe abantu bavale umgwaqo ngoba befuna kukhishwe ikhansela esikhundleni ngoba alenzi lutho.

Utshele Isolezwe ukuthi bekumele kwakhiwe izindlu endaweni abantu baze badilizelwa izindlu zabo ezindala okuholele ekutheni bacushiswe ezindlini zabantu kodwa kuze kube yimanje akukho okwenzekayo ngezindlu.

Liziphendulela ikhansela uMnuz Bhekisisa Ngwane liziphikile izinsolo ezibekwa umphakathi zokuthi alenzi lutho.

Uthe abantu abavale umgwaqo baxabene namakhosikazi abo manje sebezama ukuzenza amaqabane ngokuvala umgwaqo.

“Izindlu azakhiwa yimina kodwa zakhiwa osonkontileka. Wake walibonaphi ikhansela lakha imizi,” kusho uNgwane.

Uthe uhlelo lokwakhiwa kwezindlu olubizwa ngo-R293 kuMasipala weTheku aluphethwe uyena.

Uveze ukuthi uma kufika uhlelo oluthile lwentuthuko akubi nguye oluphathayo kodwa kunikezwa abanye abantu ukuthi baluphathe.

UMnuz Bonginkosi Ngcobo uthe uyoyixoxela amagwababa echobana into eyenziwe ngumakoti kamfowabo omdala ongasekho.

BAWINILE NGCOBO

AKHUNGATHEKILE amalungu omndeni wakwaNgcobo eMlazi kwa-H asethole incwadi ethi awaphume endlini yakubo ekupheleni kwenyanga ngoba umakoti useyidayisile indlu.

UMnuz Bonginkosi Ngcobo ekhuluma neSolezwe, uthe uyoyixoxela amagwababa echobana into eyenziwe ngumakoti kamfowabo omdala ongasekho edayisa indlu behleli phakathi ekubeni enomuzi wakhe eNanda.

Uthe udaba lwendlu yakubo ludala njengoba unina eshone ngo-Ephreli kuzanywa ukuthi lulungiswe kwaze kwayiwa ekhanseleni.

Uthe uyise ongumnikazi wendlu kwathi esemdala wabhala umfowabo njengomuntu ozongamela indlu kodwa unina wayevele ekhona.

“Umfowethu wayebhalwe phezulu ngoba wayemdala kithi kodwa umuzi kungowasekhaya. Kuthe ngokuhamba kwesikhathi sekushone ubaba saya koyilungisa le nto inkantolo yeMantshi yabuyisela indlu kumama,” kusho uNgcobo.

Lo mndeni unencwadi yasenkantolo ekhombisa ukuthi indlu eyayisegameni likamfowabo kaNgcobo yabe isibuyiselwe egameni likanina.

UNgcobo uthe umfowabo wabe eseshona, unina wazama ukuthola itayitela lendlu ukuze libuyele ngakuye.

“Sihambile saya ekhanseleni ngoba kubizwa abadinga amatayitela ezindlu. Umama uhambe naye umakoti baya ekhanseleni, nalo lafike lasho ukuthi umuzi ngowasekhaya asikho isidingo sokuthi udayiswe,” kusho uNgcobo.

Uthe unina ube eseshona ngo-Ephreli kanti kube sekulokhu kufika abantu endlini bathi bezwe ukuthi iyadayisa bazoyibona.

“Mina uma befika laba bantu bengibatshela ukuthi umuzi awudayisi owasekhaya, abasilethele lona othi uyadayiswa. Angikaze ngizwe ukuthi umakoti onendawo yakhe yokuhlala avele adayise umuzi wabantu abadala kube kukhona abantu abahleli endlini,” kusho uNgcobo.

Uthe kube sekufika owesifazane osebenza ehhovisi labammeli eChatsworth wabatshela ukuthi ubunikazi bendlu sebudluliselwe kulo oyithengile.

Ngokwamaphepha aphuma kubameli aphoqa lo mndeni ukuthi uphume endlini, umuzi udayiswe ngoDisemba 2013 ngo-R160 000.

UNgcobo uthe bawahambisile wonke amaphepha kummeli futhi ngeke baphume ngoba owomndeni.

Kulo muzi uhlala namadodakazi akhe amabili nabashana bakhe.

Ikhansela uNkk Mathombi Mnyandu, lithe udaba lakwaNgcobo liyalwazi ngoba ugogo ngaphambi kokushona ubeza kulo ezocela usizo ngoba umakoti ebakhipha endlini.

“Ngokuqonda kwami umuzi owomndeni ngoba kwakungowabazali. Ubaba wabhala indodana endala ngoba efuna kube khona ozokwengamela izidingo zawo ngoba esemdala,” kusho uNkk Mnyandu.

Ahoxisiwe amacala emaphoyiseni amabili angoConstable abebhekene necala lokudubula umculi we-hip hop.

AHOXISIWE amacala emaphoyiseni amabili angoConstable abebhekene necala lokudubula umculi we-hip hop uKhuli Chana ngesikhathi evele izolo enkantolo yeMantshi eRandburg.

“Abehhovisi lezokushushiswa komphakathi bathole incwadi ebiphuma kubameli bamaphoyisa kwase kuthi emuva kokuxoxisana kwanqunywa ukuba amacala ahoxiswe,” kusho uMnuz Peter Rassie Erasmus okhulumela ihhovisi leNational Director of Public Prosecutions.

“Umbuso uzolulandelela udaba lwalaba basolwa ababili.’’

UConstable Mduduzi Mfundisi Nzuza noConstable Sam Baloyi bebebhekene namacala okuzama ukubulala, ukuba budedengu nokuvulela ngenhlamvu.

Bobabili bangaphandle ngebheyili.

Lawa maphoyisa asolwa ngokuvulela ngenhlamvu imoto kaKhuli Chana oyintandokazi kubathandi be-hip hop ngesikhathi ehluleka ukuma kwisivimba-mgwaqo esasiku-N1 eMidrand ngo-Okthoba 28.

Lo mculi walimala esandleni nasemhlane.

Ufike enkantolo ngoLwesibili, wahlala endaweni yomphakathi elalele icala.

Ngesikhathi uKhuli Chana edubuleka, amaphoyisa ayethungatha amadoda ayethumbe usomabhizinisi waseBedfordview.

Imali ayeyifuna kwakumele ishiywe egaraji likaphetroli, kuN1.

Amaphoyisa afanisa imoto kaChana neyabasolwa ase evulela ngenhlamvu. – Sapa

Badinwe bathelwa ngamanzi abashayeli benkampani iZwelothando Minerals and Resources, eseCato Ridge.

NONTUTHUKO NGUBANE

BADINWE bathelwa ngamanzi abashayeli benkampani iZwelothando Minerals and Resources, eseCato Ridge, okuyinkampani ephethwe ngunkosikazi kaMnuz Zwelinzima Vavi, uNkk Noluthando Vavi.

Izolo abashayeli bale nkampani bathinte Isolezwe beveva ngokuxoshwa kwabo ngokungekho emthethweni kulandela ukutelekela amaholo angcono.

Bathi kuyabaxaka ukuzwelana nabalingisi beGenerations kukaVavi ekubeni bebhekene nesimo esifanayo.

UNobhala Jikelele we-Congress of South African Trade Unions (Cosatu) uVavi ngoLwesibili uyalele ababukeli beGenerations ukuba badube ukubuka lo mdlalo njengoba ingaxazululeki inkinga yokuxoshwa kwabalingisi bayo abakhala ngamaholo.

Laba bashayeli abangathandanga namagama nabazibona bengaphephile bathe bashaqekile namanje ngokuxoshwa kwabo.

“Sixoshwe kulandela ukubeka phansi amathuluzi sifuna amaholo angcono. Kule nkampani asazi ukuthi sihola malini njengoba besinikezwa noma ngabe yimalini abasuke bethanda ukusiholela yona. Sisebenza amahora amaningi kodwa asiholelwa ngokusebenza isikhathi esengeziwe. Asitholi nencazelo ngendlela yokuhola.

“Sikhulume kakhulu noNkk Vavi kodwa wakhetha ukusixosha ngaphandle kokulungisa izinkinga zethu. Umyeni wakhe usezwakala ekhalisana nabasebenzi beGenerations ekubeni nathi sibhekene nenkinga efanayo,” kusho umshayeli.

Laba bashayeli bathe bamiswe ngempelasonto emsebenzini.

Bathi uNkk Vavi ubaphethe ngesandla sensimbi kule nkampani futhi akafuni ukuphikiswa.

“Kumanje sizibona singaphephile, unokushayela abashayeli ngamunye abasabise uma kutelekiwe. Akadingeki umuntu osuke ebuza imibuzo nophikisa okwenziwayo,” kusho umshayeli.

Izolo Isolezwe lithinte uNkk Vavi nothe ngeke akwazi ukuphendula imibuzo ngoba usematasa.

“Ngeke ngikwazi ukuphendula imibuzo ngisesemhlanganweni, ngicela ungithinte emuva kamahora amabili,” kusho uNkk Vavi.

Esethintwa okwesibili akazange aphumele obala ngokuxoshwa kwabashayeli, wacela ukuthunyelwa i-email.

“Kunzima ukuphendula leyo mibuzo, awungithumele i-email ngizoyiphendula uma ngithola ithuba,” kusho uNkk Vavi.

Kuze kwashaya isikhathi sokushicilela engakaphenduli imibuzo athunyelwe yona nge-email.

Kuvele enkantolo yemantshi eMthunzini umqashi waseRencken’s Butchery eMandeni nonogada wakhe, abasolwa naye ngokushaya omunye wabasebenzi ngezinsolo zokuntshontsha inyama ebhusha.

ZANELE MSOMI

KUVELE enkantolo yemantshi eMthunzini izolo umqashi waseRencken’s Butchery eMandeni nonogada wakhe, abasolwa naye ngokushaya omunye wabasebenzi ngezinsolo zokuntshontsha inyama ebhusha.

UMnuz Rupen Rencken (43) ongumnikazi webhusha noMnuz Robert Sangweni (41) kuthiwa bashaya balimaza uMnuz Nhlanhla Ngema (24) ngo-Agasti 30.

UNgema ofike emahhovisi eSolezwe esagodle ingalo, uthe ubengakaqashwa ngokugcwele kule nkampani njengoba eqale ngoMeyi nonyaka.

Kuthe engazelele esebenza kwafika abanye abasebenzi bamtshela ukuthi ubizwa ngabaqashi ngoba kuthiwa untshontshe inyama.

“Inyama emsebenzini ihlala endlini yokuqandisa futhi kungena wonke umuntu khona. Ngaya kubona ngabatshela ukuthi angikaze ngintshontshe bathi angiqhubeke nokusebenza kodwa kuzomele ngizochaza ngaphambi kokuthi ngiphume,” kusho yena.

Uthe eselungiselela ukuphuma emsebenzini uphinde wabizwa ehhovisi lomqashi wabuzwa ngenyama kwathiwa uma ephika akakhiphe oyebile.

“Omunye uthe ayikho enye indlela abazongivumisa ngayo ngaphandle kokuthi bangishaye. Ngizwe lokho ngasuka ngabaleka,” usho kanje.

UNgema uthe akabange esaphindela emsebenzini kunalokho wayobika emahhovisi eCommission for Conciliation . Mediation and Arbitration (CCMA), bathi ngeke bakwazi ukumsiza ngoba bekungamele abaleke. Uthe esendleleni udunyelwe ngonogada basemsebenzini bamshaya, baze bamhudula walimala engalweni. Uthe bamyise esiteshini samaphoyisa kodwa amaphoyisa abuye amdedela ngoba bungekho ubufakazi. UNgema uthi waqala kudokotela wabuye wavula icala lokushaywa ngoLwesithathu olwedlule.

“Ngithole ucingo ngibizwa emsebenzini kuthiwa angizoxoxa nabaqashi. Bathe uma ngisula icala bazonginika uR5 000 bangibuyisele nasemsebenzini. Nginqabile ngathi ngifuna uR100 000 kwabe sengiziyalile, umqashi washiya angalazi wathi ngiyahlanya,” kusho yena.

Izolo inkantolo inqume ukuthi icala lihoxiswe uNgema avumelane nabaqashi ngesinxephezelo. UNgema ugcine evuma ukukhokhelwa uR5 000 wesinxephezelo nezindleko zokulashwa kwakhe njengoba ethi ingalo yesobunxele ayikasebenzi. Nokho uthe akasathandi ukubuyela emsebenzini ngoba akasaphephile.

Okhulumela amaphoyisa, uCaptain Thulani Zwane KwaZulu-Natal, ukuqinisekisile ukuthi abasolwa bavelile enkantolo izolo ngecala lokulimaza.

Namuhle amehlo omhlaba azobe ethe nje eNkantolo eNkulu yasePitoli.

INTATHELI YESOLEZWE

NAMUHLA amehlo omhlaba azobe ethe nje eNkantolo eNkulu yasePitoli lapho kubhekeke ukuba iJaji Thokozile Masipa liqaphe ukukhipha isinqumo mayelana necala elibhekene nomgijimi wakuleli u-Oscar Pistorius (osesithombeni) ngokubulala intombi yakhe uReeva Steenkamp ngosuku lwezithandani ngo-2013.

Owayegijima noPistorius, u-Ofentse Mogawane, uthe noma isinqumo sanamuhla singathini, kodwa umlando kaPistorius uyohlala njalo ukhona.

“Abantu bavamise ukukhohlwa asekwenzile bagxile kulesi sigameko esingesihle,” kusho uMogawane izolo.

“Usesenzele okuningi isizwe nabantu abakhubazekile. Wakwazi ukwazisa iNingizimu Afrika emhlabeni wonke. Ngicabanga ukuthi umlando wakhe uzohlala esikhathini eside esizayo, abantu ngeke bakhohlwe,” usho kanje.

UMogawane wayeyingxenye yomjaho we-4x400m relay ngo-2012 kuma-Olympic Games lapho uPistorius aqopha umlando ngokuba ngowokuqala okhubazekile ukugijima nabangakhubazekile.

Ngo-2011 laba bagijimi, babambisana noWillie de Beer noShane Victor kuma-IAAF World Championships eDaegu eSouth Korea lapho ababeka irekhodi lakuleli le 4x400m lika 2:59.21.

UMogawane ubesegijime noPistorius iminyaka emine eNyuvesi yaseTshwane ngaphansi kwe Athletics Gauteng North.

Uthishanhloko, iphini lakhe nomabhalane baseNsizwakazi Primary, eKlaarwater, abasalubhadi esikoleni.

MLUNGISI GUMEDE

Uthishanhloko, iphini lakhe nomabhalane baseNsizwakazi Primary, eKlaarwater, abasalubhadi esikoleni ngemuva kokuhlaselwa ngamalungu omphakathi abefuna ukubadla luhlaza ngoba ebasola ngokuthi abasikhathalele isikole.

Banyamalale emuva kokuthi iqulu lamalungu omphakathi livuke umbhejazane lavala isango lesikole ngoLwesibili ngamathayi avuthayo.

Amalungu omphakathi ashaya phansi ngonyawo athi ngeke aze avume ukuthi baqhubeke nokusebenza.

UNksz Samkelisiwe Mdadane osekomidini lo mphakathi uthe isikole asinawo amanzi, izingane ziyaphoqwa ukuthi amanzi ziwakhe ngaphandle kwesikole.

Uthe kukhona nekilasi isicabha salo esingavuleki izingane zingeniswa ngamawindi kulona.

“Nonogada akekho esikoleni, lokho okwenza izingane zethu zingaphephi. uma ubheka isimo sesikole uyabona ukuthi iziphathimandla zaso azisikhathalele yingakho singasazifuni. sifuna abantu abazokwenza isiqiniseko sokuthi yonke into ihamba ngendlela,” usho kanje.

Uthe okunye abakhala ngakho wukuthi uthishanhloko uqasha izihlobo zakhe.

“Iphini lakhe nomabhalane bayizihlobo zakhe,” kusho uNksz Mdadane.

Uthe ezinye izingane zabo seziyagula ngenxa yokungahlanzeki kwamathoyilethi eziwasebenzisayo.

UNksz Mdadane uthe bazoqhubeka nomkhankaso wabo kodwa benze isiqiseko sokuthi ukufunda akuphazamiseki.

“Sekuzophela amasonto amathathu manje siqhinqile lapha ngaphandle kwamasango esikole ukuzwakalisa ilaka lethu kodwa iziphathimandla zomnyango wezeMfundo zisishaya indiva,,” usho kanje.

Uthe bekungakafiki ekutheni bagcine bezijezisela bona, yingakho yonke into besayenza ngokuthula.

UNksz Mdadane uthe i-SGB kufana nokuthi abanayo ngoba iyizichuse zikathishanhloko.

Kusukela kuqale izinxushunxushu kulesi sikole kuthiwa uthishanhloko ubesehlale ephelezelwa ngamaphoyisa uma eza noma esehamba esikoleni.

Ngakolunye uhlangothi kuthiwa naye ushaya phansi ngonyawo uthi uyohamba ngebhokisi kulesi sikole.

Izolo ithimba leSolezwe livakashele kusona lesi sikole liyohlola isimo lafike lafica iqulu labazali limi ngaphandle kwesango, ngaphakathi kuqhubeka umhlangano wothisha nesikhulu ebesivela ehhovisi labahloli.

Uthishanhloko iPhini lakhe nomabhalane bebengabonwa nangokhalo.

Okhulumela uMnyango wezeMfundo KwaZulu-Natal uMnuz Muzi Mahlambi uthe udaba lwaseNsizwakazi bayalazi bayalulungisa.