INKOSI yaseThembezinhle ithi ngeke ize imangale uma abaseBuhleni benqaba ukulandela isinqumo senkantolo uma icala lobuholi eliseNkantolo eNkulu yaseThekwini libalahla ngoba behluleka kwasekuqaleni ukulandela umyalelo woThingolwenkosazana.

SIMPHIWE NDWANDWE

Ebika eseNhlangakazi

INKOSI yaseThembezinhle ithi ngeke ize imangale uma abaseBuhleni benqaba ukulandela isinqumo senkantolo uma icala lobuholi eliseNkantolo eNkulu yaseThekwini libalahla ngoba behluleka kwasekuqaleni ukulandela umyalelo woThingolwenkosazana.

INkosi uVela Shembe ibikhuluma izolo ngesikhathi kunomgidi wokugcina entabeni iNhlangakazi, eNdwedwe.

“Ngeke ngize ngethuke ngoba vele sizithola silapha esikhona nje kumanje yingoba behluleka ukulalela umyalelo woThingo. Uma umyalelo woThingo umkhulu kangaka wedlula owezinkantolo ngicabanga ukuthi ngeke kube yinto emangazayo uma bengahambisani nowezinkantolo,” kusho iNkosi uVela.

Ukuphawula kweNkosi uVela kumayelana nombango wokuhola ibandla iNazareth Baptist Church osenkantolo lapho kumele kucace ukuthi ngubani umholi ongu-ngqo phakathi kweNkosi uVela, ehola uhlangothi lwaseThembezinhle, eMthwalume, neNkosi uMduduzi Shembe ohola uhlangothi lwaseBuhleni, eNanda.

Icala libuyela enkantolo ngoFebhuwari 4, nonyaka lapho kulindeleke ukuthi uchwepheshe wokucubungula okubhalwe ngesandla angene ebhokisini lapho ezokwethula khona ubufakazi. Uma kuqedwa ukwethulwa kwalobu bufakazi kulindeleke ukuthi uhlangothi lwaseBuhleni luqale lwethule ofakazi balo ukuze luphekwe ngemibuzo.

Umbango waqubuka ngesikhathi kutshalwa iNkosi eyakhothama uVimbeni Shembe okwathi mhla ifihlwa kwamemezelwa la makhosi womabili ukuthi kumele ahole ibandla.

Ephawula ngohambo lwabo lwasentabeni okokuqala selokhu athatha isihlalo sobukhosi nyakenye, iNkosi uVela uthe bajabule kakhulu ukuthi bakwazi ukwenza konke ngaphandle kokuphazanyiswa.

Uthe ukungabi bikho kweziyaluyalu namathizethize abengaphazamisa kusho ngokusobala ukuthi uhambo lwabo lubusisiwe.

Banyukela kule ntaba ngoMsombuluko owedlule kulandela ukuthi abasekuPhakameni sebeqede isikhathi sabo kuyo leya ntaba esemqoka emlandweni waleli bandla elinamalungu alinganiselwa ngaphezulu kuka-7 million.

Kulindeleke ukuthi behle namuhla bese uhlangothi lwaseBuhleni lulungiselela ukwenyuka. Lolu hlangothi lunezinkumbi zabalandeli njengoba uma kwenyuka lona kubamhlophe amaqele nemigwaqo ngenxa yemiNazaretha yamalungu alolu hlangothi amaningi.

Entabeni bebengabaningi ngendlela ebabazekayo abantu kodwa bekuvunguza umoya wokuzwana nokuthobelana kumalungu aseThembezinhle.

Izolo umgidi ubudla lubi ngisho iNkosi uVela iqephuza igida neziNhlalisuthi, Amakhosazana neNgudlungudlu.

Amaphoyisa isimo abesiqaphe ngelokhozi enkanise kuzo zonke izingxenye ezingena entabeni iNhlangakazi.

ZIYAQHUBEKA izigcawu zokulalelwa kwemibono yabasebenzi ngokubuyekezwa kwamaholo abasebenzi basemapulazini eWestern Cape.

ZIYAQHUBEKA izigcawu zokulalelwa kwemibono yabasebenzi ngokubuyekezwa kwamaholo abasebenzi basemapulazini eWestern Cape.

Isigcawu sokuqala sibe seGrabouw ngoMsombuluko ebusuku.

Esesibili sihlelelwe inamuhla kusihlwa ePaarl.

Ukulalelwa kwemibono kuzoqhubeka naseDe Doorns, Robertson, Oudtshoorn naseVredendal kulo leli sonto. Izindawo okuhlalwa kuzona zisazomenyezelwa.

UMnyango wezabaSebenzi, ube nezigcawu ezithathe inyanga ezweni lonke lapho ulalela khona imibono yabasebenzi basemapulazini ngalolu daba oluthinta amaholo. Lokhu kwenzeke kusukela ngoNovemba kuya kuDisemba.

Ngenxa yesiteleka sabasebenzi basemapulazini eWestern Cape, uMnyango ubone kungcono uselule isikhathi kulesiya sifundazwe.

Abasebenzi abatelekile bafuna ukwenyuselwa amaholo asuke ku-R69 ngosuku aye ku-R150 ngosuku.

Bafuna kuphuculwe nezimo abasebenza phansi kwazo. UNgqongqoshe wezemiSebenzi, uMildred Oliphant, bekulindeleke ukuthi amemezele amaholo amasha ngenyanga ezayo. – Intatheli yeSolezwe

OWAYENGUMENGAMELI we-ANC Youth League owaxoshwa, uMnuz Julius Malema (osesithombeni), usemangalele owayengumngani wakhe, uMnuz Boy Mamabolo.

OWAYENGUMENGAMELI we-ANC Youth League owaxoshwa, uMnuz Julius Malema (osesithombeni), usemangalele owayengumngani wakhe, uMnuz Boy Mamabolo.

Umvulele icala lokumthunaza isithunzi ngoMgqibelo ebusuku esiteshini samaphoyisa ePolokwane. Lokhu kushiwo ngamaphoyisa aseLimpopo izolo.

“UMalema uvule icala ngoMgqibelo ebusuku esiteshini samaphoyisa ePolokwane,” kusho uBrigadier Hangwani Mulaudzi okhulumela amaphoyisa.

UMulaudzi uthe amaphoyisa ayaphenya ngaleli cala.

NgoLwesibili, iphephandaba iThe Star libike ukuthi uMamabolo usabise ngokugumba amathambo kanina kaMalema, uMahlodi Malema, ethuneni bese lawo mathambo ayowalahla phambi komuzi kagogo wakhe eSeshego.

Kuthiwa lokhu kwenziwa wukuthi uMalema wathumela abangani bakhe ukuthi balale nentombi kaMamabolo.

Leli phephandaba libike ukuthi uMamabolo wathumela uMalema i-SMS efundeka kanje: “Kulokhu ngifuna ukukutshengisa ukuthi nginesihluku esinjani ngokuthi ngigubhe amathambo kaMahlodi ethuneni bese ngiwabeka phambi komuzi kagogo wakho. Usungenze izinto ezimbi kakhulu.”

UMamabolo uthe uMalema wayalela uSihlalo we-ANC Youth League eLimpopo, uMnuz Jacob Lebogo noMnuz Jossie Buthane, ukuthi balale nentombi yakhe.

UMulaudzi uthe amaphoyisa ayaluphenya lolu daba.

LICHITHIWE icala lokudilizwa kwemizi kanokusho yabalimi abasafufusa yinkantolo eNkulu yaseMgungundlovu izolo kulandela ukuvela kokuthi akuzange kulandelwe umthetho ngendlela.

NONTUTHUKO NGUBANE

LICHITHIWE icala lokudilizwa kwemizi kanokusho yabalimi abasafufusa yinkantolo eNkulu yaseMgungundlovu izolo kulandela ukuvela kokuthi akuzange kulandelwe umthetho ngendlela.

Kuqhume umkikizo bavuma ingoma enkantolo abalimi baseThornville ngaphandle kwaseMgungundlovu bejabulele isinqumo seJaji uYvonne Mbatha elikubeke kwacaca ukuthi leli cala ngeke lithathwe njengesimo esiphuthumayo.

Laba balimi bebebhekene nengozi yokudilizelwa imizi yabo kanokusho, eminye ebiza imali ecela ezigidini. Bathe sebezolala ubuthongo ngoba bese bethuka izanya uma kukhona okudumayo becabanga ukuthi bayadilizelwa.

Abameli bakamasipala waseMsunduzi baphume benyobozela ngenxa yokumangazwa yilesi sinqumo esikhishwe yinkantolo.

Ngokomqingo osenkantolo laba bahlali bathole incwadi egunyaza ukuba bengabe besaqhubeka ukwakha kule ndawo esepulazini laseSlangspruit ne-Ambleton ngaphandle kwalokho izindlu zabo zizodilizwa.

UJudy Singh obemele umasipala ufike washaya ungqimphothwe kuleli cala wathi ngeke badilize izindlu zabalimi into abayifunayo ukuba kungaqhutshekwa nokwakhiwa ngoba bahlezi kule ndawo ngaphandle komthetho.

“Asisho ukuthi siyabaxosha, nokuthi siyabadilizela izindlu zabo kodwa esikufunayo wukuba bangabe besaqhubeka nokwakha ngoba umhlaba abahlezi kuwo ungokamasipala. Wumasipala onelungelo lonke kulowa mhlaba. Abantu abakha kuleya ndawo abanawo ngisho amapulani okwakha izindlu. Lo mhlaba ubekelwe abantu abampofu ukuze bezokwakhelwa izindlu zomxhaso konke lokho kuvimbekile,” kusho uSingh.

Ummeli ozicelele ukumela abahlali, uMnuz Sundeep Singh, ube esecela ukuba inkantolo isheshe ilihoxise leli cala ngoba akulandelwanga imigudu efanele njengoba kungekho noyedwa umhlali osayinile ukuthi uyitholile le ncwadi.

Ijaji selikhipha elikutholile liqhathanise lolu daba nalolo lwaseLenasia eGoli lapho umasipala egcine ngokudiliza imizi yabantu.

“Uma kudilizwa imizi kumele kulandelwe imithetho efanele. Ngokuthola kwami leli cala aliphuthumi ngakho akukho okunye engingakwenza ngaphandle kokulichitha,” kusho iJaji uMbatha.

UNkk Zanele Sithole onomuzi awakhe ngo-R700 000 kule ndawo uthe sekuphele isikhathi eside engabuthi quthu ubuthongo.

“Sengizoke ngilale ubuthongo, bese ngihlezi ngithukile ngingazi ukuthi sizodilizelwa nini imizi yethu. Isinqumo senkantolo siyangijabulisa ngoba sengizokwazi ukuqhubeka nempilo yami,” kusho uNkk Sithole.

UNkk Nomusa Nkabinde obengomunye omele umphakathi kulolu daba uthe umasipala ubusubagwinya nemizi yabo.

IMenenja kaMasipala waseMsunduzi, uMnuz Mxolisi Nkosi, ithe le mpi basazoyilwa baze bewuthole umhlaba wabo.

“Umhlaba ungokamasipala. Abantu abahlezi kulo mhlaba bahlezi ngaphandle kwemvume. Ukuhlulwa kwethu akusho ukuthi umhlaba akusewona owethu. Sisazoqhubeka siyilwe le mpi,” kusho uNkosi.

SITHOLAKALE ediphini isidumbu sentombazane eneminyaka emithathu ebinyamalele eWoody Glen ngaseMpumalanga.

MLUNGISI GUMEDE

SITHOLAKALE ediphini isidumbu sentombazane eneminyaka emithathu ebinyamalele eWoody Glen ngaseMpumalanga.

Isidumbu sika-Okuhle Dlamini, onyamalale ngoMgqibelo, sitholwe umfana wendawo ngoMsombuluko ntambama ngemuva kokuthungathwa izinsuku ezimbili.

Lo mfana ubehamba nabangane bakhe bevele bemthungatha u-Okuhle ngesikhathi bezithela phezu kwesidumbu sakhe ediphini bengazelele.

Ukutholakala kwesidumbu sengane sekudale ukuthi sishube isimo emphakathini njengoba umndeni kukhona omsolayo ngokufa kwayo.

Amalungu omphakathi akhulume neSolezwe, kodwa acela ukuthi angadalulwa, athe ukhona owesifazane amsolayo.

Unina ka-Okuhle, uNksz Bongeka Dlamini, uthe bafike nengane eWoody Glen bekade bevakashele eXobho ngoLwesihlanu, ingane yalahleka ngakusasa.

“Ingane ngayigcina idlala nezingane zakwamakhelwane. Sezwa kuthiwa zibonakale ngasesitobhini. Sathi siyobheka ngakhona safica izingane zakwamakhelwane kuphela, ingane yami kwathiwa ikhalile yathi ifuna ukuphindela ekhaya yabuyela emuva yodwa,” kusho uNksz Dlamini.

Uthe babe sebeqala ukuyithungatha kodwa bangayithola.

“Siye kabili ukuyobheka ediphini sangayithola njengoba ize yatholakala manje,” kuqhuba yena.

Uthe umndeni uyile ukuyobhula esangomeni sabatshela ukuthi kukhona owesifazane oyithathile ingane.

Ikhansela lendawo, uMnuz Nkosiphendule Dlamini, unxuse umphakathi ukuthi wehlise imimoya, uyekele emthethweni.

“Njalo uma kwenzeke izigameko ezifana nalezi kuvamise ukuthi kubekhona abanukwayo nalapha e-Woody Glen sizwile ukuthi kukhona asebesolwa ngalesi sigameko,” kusho uDlamini.

UDlamini uthe umphakathi kumele ufunde kulesi sigameko mayelana nokuqikelela ukuthi izingane azinyamalali isikhathi eside emehlweni abazali.

“Mancane amathuba okuthi lengane iziyele yona ediphini, kubukeka sengathi ibulewe ndawana thize yabe isiyophoswa khona,” kusho uDlamini.

UNgqongqoshe wezoLimo KwaZulu-Natal, uDkt Meshack Radebe, uvakashele umndeni izolo, wathembisa ukuthi umnyango wakhe uzosiza ngezindleko zomngcwabo.

KUBOSHWE abantu abangu-67 000 ezifundazweni ezingu-9 ngesikhathi samaholidi okuphela konyaka. Ababoshiwe bebethinteka emacaleni obugebengu obehlukahlukene.

INTATHELI YESOLEZWE

KUBOSHWE abantu abangu-67 000 ezifundazweni ezingu-9 ngesikhathi samaholidi okuphela konyaka. Ababoshiwe bebethinteka emacaleni obugebengu obehlukahlukene.

Lokhu kushiwo nguNgqongqoshe wamaPhoyisa kuzwelonke, uMnuz Nathi Mthethwa, izolo esithangamini nabezindaba ePitoli lapho ebehambisana noKhomishana wamaPhiyisa kuzwelonke, uGeneral Riah Phiyega.

Zombili iziphathimandla zamaphoyisa bezikhuluma ngemikhankaso ebiyenziwa ngonyaka owedlule ngesikhathi kuhlelewa amaholidi kaDisemba.

Uthe ubugebengu obuningi obenzekile buhlanganisa ukubulala, ukubamba inkunzi, ukudlwengula, ukugqekeza, ukukhwabanisa nokweba ezitolo.

Isibalo abekhuluma ngaso uthe sihlanganisa ngisho namalungu amaphoyisa aboshiwe. Uthe uma bebopha abantu abasolwa ngobugebengu abahlukanisi kodwa babathatha ngendlela efanayo bonke kuhlanganisa namaphoyisa.

Umkhankaso wokulwa nobugebengu waqala ngo-Okthoba 15 kanti uzovalwa ngokusemthethweni ngoJanuwari 31. UMthethwa uthe abantu abangu-704 baboshelwe udlame emphakathini wabe esenxusa ukuthi balisebenzise ilungelo labo lokubhikisha belandela imigudu esemthethweni ukuze bagweme ukuphoswa ejele.

“Siyalihlonipha ilungelo labantu lokuba bateleke ngoba lokho kuyigunya labo elibhalwe kumthethosisekelo wezwe. Asinazo izinhloso zokuba siphazamise leli lungelo labantu,” kusho uMthethwa.

Uthe yize kunjalo kodwa bayaphikisana nanoma yiluphi uhlobo lodlame nokucekelwa phansi kwempehla, ukusabisa, nokubulawa kwabantu abangenacala kube kumbathiswe ngeziteleka.

Uthe kuhlawuliswe abantu abangu-51 191 ngesikhathi samaholidi ngenxa yezizathu ezehlukene kuhlanganisa namathikithi omgwaqo nokudayisa utshwala ngendlela engavumelekile.

UMthethwa ukhale kakhulu ngokungahlonishwa kwemithetho yomgwaqo ethi abantu abakafuni namanje ukuhlonipha imiyalelo yokubavikela emgwaqeni okuholela ekutheni kube khona izingozi.

Uthe kuboshwe abashayeli abangu-2 751 abebesolwa ngokushayela bephuzile. Kuze kube manje sekutholwe izimoto ezingu-451 ebezebiwe ezweni lonke.

UNgqongqoshe wezokuThutha kuzwelonke, uMnuz Ben Martins, uthe siyethusa isibalo sabashone emgwaqweni ngesikhathi samaholidi. Kushone abantu abangu-1 465.

Amaphoyisa athole izibhamu ezingu-721 ezingekho emthethweni nezinhlamvu ezingu-7 638 kuhlanganisa neziqhumane.

Esephetha uMthethwa uthe ukusetshenziswa kwezidakamizwa kuseyinkinga enkulu.

Uthe amaphoyisa ashaqe insangu enesisindo esingu 6 million grams, yi-cocaine enesisindo esingu-2 832g nesidakamizwa esibizwa ngokuthi yi-nyaope esinesisindo esingu-4 225g bese kuma ngama-gram angu-2 551 esidakamizwa esibizwa ngokuthi yi-tik.

Amaphoyisa aseshe abantu abangu-1 477 901 nezimoto ezingu-501 373. Konke lokhu kwenzeke ngesikhathi kunezivimbamgwaqo ezingu-3 614.

BAZOWUQALA kabi unyaka othisha bakwaGrade R KwaZulu-Natal abasadunguza ebumnyameni ngendaba yamaholo okungakacaci ukuthi imali bazoyinyuselwa nini.

MHLENGI SHANGASE

BAZOWUQALA kabi unyaka othisha bakwaGrade R KwaZulu-Natal abasadunguza ebumnyameni ngendaba yamaholo okungakacaci ukuthi imali bazoyinyuselwa nini.

Indaba yalabo thisha ibe segudwini befuna ukunyuselwa umholo abe ngu-R6 000 esuka ku-R4 000 okumanje bayawuhola.

Othisha bakwaGrade R abakwazi ngisho ukuthatha ilivu, uma beyobeletha abakwazi ukuhlala izinyanga ezine kodwa babeletha babuyele emsebenzini.

Abanalo ngisho ikhefu lokuyofunda, noma elokugula kanjalo nemihlomulo yokuthenga imizi engu-R800 abanayo.

Uma begula baya emitholampilo ngoba nama-medical aid abanawo kodwa yibona bantu abafundisa isisekelo semfundo njengoba becathulisa umfundi osuke ezoqala ukufunda.

Ucwaningo olwenziwayo luveza ukuthi umfundi oqala enze uGrade R wenza kahle kakhulu uma esefika kwaGrade 1.

NoMengameli wezwe uMnuz Jacob Zuma walincoma iqhaza lalabo thisha njengoba kuyibo abantu abacathulisa izingane kodwa yibona bantu abashiywe ngaphandle ekubhekelelweni.

UMnuz Allen Thompson, oyiPhini likaMengameli weNatu, uthe kunzima kakhulu kulabo thisha ngoba bashaywa indiva abacatshangelwa ekubeni nabo befana nozakwabo bamanye amabanga.

Uthe balwela ukuthi okungenani bahole u-R6 000 babe ne-medical aid yamahhala kwaGems futhi babe nayo yonke imihlomulo etholwa ngabanye ngoba yibona bantu ababaluleke ukudlula bonke othisha.

“Labo thisha babalulekile ngoba ingane ngeke ifike kwaMatric ingazange idlule kubona. Yibona bantu abanganakiwe kodwa ngoba namanje indaba yabo ayicaci, abazange banyuselwe nemali nyakenye. Sizohlangana nabo bonke abaholi bezinye izifundazwe siyise lolu daba kwikhomishini exazulula izindaba zabasebenzi ngoba yilapho sicabanga ukuthi lungalunga khona,” kusho uThompson.

UDkt Nkosinathi Sishi, oyiNhloko yoMnyango wezeMfundo esifundazweni, uthe indaba yalabo thisha yadluliselwa emkhandlwini obhunga ngezindaba zamaholo, i-Education Labour Relations Council ukuze ilucubungule.

NJENGOBA namhlanje kuvulwa izikole ezindaweni ezigudle ugu okubalwa neKwaZulu-Natal, abafundi ababalelwa ku-250 000 bazongena ngokokuqala ngqa esikoleni bezokwenza uGrade 1.

MHLENGI SHANGASE noBONISWA MOHALE

NJENGOBA namhlanje kuvulwa izikole ezindaweni ezigudle ugu okubalwa neKwaZulu-Natal, abafundi ababalelwa ku-250 000 bazongena ngokokuqala ngqa esikoleni bezokwenza uGrade 1.

Laba bafundi benza u-1 million wabafundi abazokwenza leli banga ezweni lonke njengoba lesi sifundazwe sihamba phambili ngesibalo sabafundi ezikoleni.

UMnyango wezeMfundo ufuna ukuthi eminyakeni emithathu ezayo sinyuke isibalo sabafunda ezikoleni zesifundazwe babe ngu-3 million. Okwamanje bangu-2.8 million.

UDkt Nkosinathi Sishi, oyinhloko yalo mnyango, uthe kuzoba nezinguquko emfundweni ikakhulu kwaGrade 4, 5 no-Grade 6.

USishi uthe zizokwehliswa izifundo ezenziwa ngabafundi kula mabanga zisuka kweziyisishiyagalombili ziye kwezeyisithupha.

“Kuzohlanganiswa izifundo, ezobuciko zizohlanganiswa ne-life orientation, kuthi ezobuchwepheshe zihlanganiswe nesayensi. Lezi zifundo ziyadlelana kanti kuzonika isikhathi esiningi manje sokuthi zenziwe uma sezihlanganisiwe,” kusho uSishi.

Uthe bazobhalela bonke abazali bezingane ezizokwenza uGrade 1 bebazisa ukuthi yiziphi izinto okumele bazilindele nanokuthi yikuphi lapho kumele babhekisise khona ngoba bafuna ukuthi babambe iqhaza emfundweni yezingane zabo.

Uqhube wathi uyehliswa nomthwalo obhekene nothisha wathi uhlelo lokuphucula imfundo i-Curriculum Assessments Policy Statements (Caps) ebalula ukuthi isifundo kumele sifundwe isikhathi esingakanani nezinto okumele zifundwe, izofakwa kulokhu kwaGrade 4, 5, 6 noGrade 11.

“Ngonyaka ozayo iCaps izofakwa kwaGrade 7, 8, 9 noMatric. Uhlelo lokuthi isiNgisi sifundwe zisuka amadaka luvele lukhona, ngakho lezi ezinye izinhlelo zizoqinisa lapho sivele sigijima khona,” kusho uSishi.

USishi ugxeke kakhulu othishanhloko abasaqhubeka nokubamba imiphumela yabafundi ngoba bengayikhokhile imali yesikole noma belahle izincwadi.

ELihlithemba Comprehensive eNdwedwe uthishanhloko wakhona ubambe imiphumela yabafundi abangazange bawukhokhe “umnikelo” ka-R130 ayewuclelile.

Omunye wabazali okhulume neSolezwe ocele ukungadalulwa, uthe lesi sikole akukhokhwa nhlobo kusona imali yokufunda kodwa uthishanhloko uyifuna ngodli.

“Akukhokhwa nhlobo kulesi sikole kodwa uthishanhloko wacela ukuthi sinikele ukuze kukwazi ukukhokhela ezinye izinto. Abazali kuphoqeleke ukuthi bayoboleka izimali bengenazo ngoba uthishanhloko ugweve namaripoti,” kusho lo mzali.

USishi uthe babathathela izinyathelo abenza lokhu ngoba bahlezi belishumayela leli vangelo lokuthi imiphumela ingabanjwa.

“Othishanhloko abenza lokhu ababikwe ngoba sihlezi sishumayela ivangeli lokuthi ayingabanjwa imiphumela. Kuyicala elibovu ukubamba imiphumela yomfundi angiyiphathi-ke uma isikole singakhokhisi mali,” kusho uSishi.

Izolo esikoleni samabanga aphezulu esiseNanda iZiphembeleni Secondary School, othisha bebematasa belungiselela ukuvulwa kwezikole.

Okuphawulekayo ngalesi sikole wukuthi utshani bebunqunyiwe, othisha bephethe ama-timetable abo futhi nohlu lwezingane ezizofunda emakilasini ahlukene selukhona.

Ngokusho kukaMnuz Khetha Dladla oyiNhloko yesifundo zeSayensi kulesi sikole, izingane zizoqala ukufunda namhlanje ngoba bona sebekulungele ukufundisa.

Uthe izingane zabo angeke zibe wuvanzi namuhla ngoba wonke uthisha uyazi ukuthi uzobe ekuphi.

Yize bekusafika izingane ezizocela isikhala sokufunda kulesi sikole, uDladla uthe bazozibheka kodwa lezo abanazo ezingu-689 seziyazi ukuthi zizofunda kuphi.

Labo abanenkinga yokubhalisa ezikoleni noma ngabe ngeyezincwadi ezingafikanga bangafonela ku-0860596363 okuyinombolo yesikhungo soMnyango wezeMfundo esizobhekela izinkinga ezikoleni.

AVELE enkantolo yaseHowick izolo amadoda angu 11 asolwa ngokuba ngongqondongqondo ekuqhumiseni imishini yemali ngamabhomu esifundazweni.

NONTUTHUKO NGUBANE

AVELE enkantolo yaseHowick izolo amadoda angu 11 asolwa ngokuba ngongqondongqondo ekuqhumiseni imishini yemali ngamabhomu esifundazweni.

Abasolwa babhekene nohide lwamacala, okubalwa elokubulala iphoyisa lophiko lezinja uConstable Vidhur Jadoo eHowick. Kuthiwa iveni eyayihamba abasolwa yayilayishe iziqhumane ezisetshenzizwa ukuqhumisa imishini yemali.

Abanye abasolwa kuvele ukuthi bayafunwa ngamacala afanayo enzeka eGoli, eKapa naseFree State.

Ukuboshwa kwabasolwa kulandela uphenyo loKlebe ngemva kochungechunge lwezigameko zokuqhunyiswa kwemishini yemali. Umshini wokugcina uqhunyiswe eHowick lapho kushone khona uJadoo.

Abasolwa kuthiwa bahlala ehostela eGoli kodwa bangabokuzalwa KwaZulu-Natal.

Emva kokuphonswa imibuzo ngamaphoyisa abasolwa kuthiwa bathatha amaphoyisa bawayisa emzini othile eManguzi lapho kwatholwa khona izibhamu ezine ezingama AK-47 okusolwa ukuthi yizo ebezisetshenziswa ebugebengwini.

Abasolwa baphinde batholwa neveni eyebiwe abebehamba ngayo. Laba basolwa babhekene namacala okuphanga kuhlonyiwe, wukutholakala nezibhamu neziqhumane nemoto eyebiwe.

Kulindeleke ukuthi abasolwa baphinde bavele enkantolo ngoJanuwari 22.

USASHAQEKILE umndeni wentombazane yakwaDabeka eThekwini ezilengise ngoMsombuluko ngenxa yokudinwa ngabangani bayo abebeyigcona ngokuthi izophinda ikilasi, njengoba izikole zivulwa namuhla.

SIMPHIWE NDWANDWE

USASHAQEKILE umndeni wentombazane yakwaDabeka eThekwini ezilengise ngoMsombuluko ngenxa yokudinwa ngabangani bayo abebeyigcona ngokuthi izophinda ikilasi, njengoba izikole zivulwa namuhla.

UGugulethu Gumede (16) ufeyile uGrade 11 ngonyaka owedlule eSithokozile Secondary KwaDabeka.

Utholwe wunina, uNksz Ntombifuthi Khumalo, elenga esihlahleni esisegcekeni kubo ngoMsombuluko ntambama.

Umufi kuthiwa ubegconwa ngontanga yakhe baze bathi kufanele ayocela ukwedluliselwa phambili esikoleni.

Unina kamufi uthe wethuke woma ngesikhathi ethola indodakazi yakhe ilenga ekubeni ekuseni eyishiye iphila futhi ingenazo izinkomba zokuthi khona okuyixakile emphefumulweni.

“Ngesikhathi ngifika ngibuya emsebenzini ngithole ukuthi endlini kubiliswe amanzi ngebhodwe kanti phezu kwetafula (uGugulethu) ubebeke ubhontshisi abelungiselela ukuwupheka. Ngimemeze yonke indawo ngimcinga kodwa lutho ukumthola.

“Ngibe sengibona into emnyamana ezihlahleni ngazitshela ukuthi wuplasitiki kadoti ophoswe ngumakhelwane.

“Ngiya khona-nje ngiyobheka ukuthi yini lena ngiyathetha ngoba bengicabanga ukuthi khona umakhelwane ovele waphosa udoti wakwakhe emzini wami,” kusho uNksz Khumalo osebenzisa isibongo sakubo yize eshadele kwaGumede.

Uthe uvele wathi khimilili uma ebona ukuthi akuwona uplasitiki kodwa wumuntu lona olenga esihlahleni. Ngesikhathi ebhekisisa ebona ukuthi yindodakazi yakhe, kuhlwe emini, amehlo agcwala inkungu.

Uthe ngesikhathi sekufike namaphoyisa nomakhelwane yize eyikhuthuze amaphakethe indodakazi bebheka ukuthi ayishiyanga ncwadi kodwa akutholakalanga lutho kanti kunzima ukwazi ngqo isizathu sokuthi yenze lokhu.

“Kumphathe kabi ukungaphumeleli esikoleni kangangoba uke wezwakalisa ukungajabuli ngokuthi kuphase umfowabo uMzomuhle abebefunda naye ekilasini elilodwa kodwa yena wasala. Besithi sizozwa kothisha esikoleni ukuthi ngeke yini edluliselwe phambili ngoba imiphumela yakhe ibingemibi ngaleyo ndlela elahlisa ithemba. Nakhu ingane isivele ifa kusenjena,” kusho uNksz Khumalo.

Umufi uzilengise ngebhayi le-ANC elinobuso bukaMengameli Jacob Zuma.

Yize uNkk Khumalo ekhomba ukuthi umntanakhe kungenzeka uzibulale ngenxa yokungaphasi esikoleni kodwa bekunamahemuhemu okuthi ubezoganiselwa “ikhehla” ebandleni abakhonza kulo KwaShembe, iNazareth Baptist Church.

Lokhu uNksz Khumalo ukuchithile wathi yindlela athukwa ngayo ngomakhelwane abangezwani nabo ngenxa yokuthi ingane yakhe ibiziphethe kahle futhi ingenangane ekubeni ezabo “sezishaya nga-three noma nga-four zisencane”.

Uze washaya ucingo eshayela isoka likamufi ukuthi liqinisekise ukuthi ubethandana nontanga yakhe, eyokuthi uzogana ikhehla yimbudane ebhebhethekiswa wumphakathi.

Okhulumela amaphoyisa KwaZulu-Natal, uCaptain Thulani Zwane, uthe kusaphenywa ukuthi umufi ushone kanjani.

Uthe akukho okusolisayo ngokufa kukaGugulethu okwamanje.

Utitinywe wumphakathi owesifazane waseMzomusha, eNanda, osolwa ngokuthakatha ngemuva kokuthi ebanjwe echela kamakhelwane izintatha zayizolo.

NOKUBONGWA PHENYANE

UTITINYWE wumphakathi owesifazane waseMzomusha, eNanda, osolwa ngokuthakatha ngemuva kokuthi ebanjwe echela kamakhelwane izintatha zayizolo.

Uthathwe ngamaphoyisa amgcina esiteshini emva kokuthi umphakathi ubufuna ukumudla umfele ngalesi senzo sakhe.

Kuthiwa uzivumele yena phambi komphakathi ukuthi akwehli kahle kuye uma ebona omakhelwane bakhe bephumelela yena ehlupheka.

Kusize ukufika kwamaphoyisa kanye nomunye okuthiwa uyinyanga yakhe abamlamulele olakeni lomphakathi.

UNkk Nonhlanhla Mgenge, ongumakhelwane wokuthiwa uyathakatha, uthe ubamangaze kakhulu ukuthi angaphiki nakancane kodwa avume eyokuthakatha.

“Okwesibili ebanjwa emzini yabantu echela kodwa ekuqaleni wayekwa emuva kokuxolisa. Izolo ubanjwe yizingane zamemeza, saphuma sonke samthola ephethe ibhakede ehamba nendodana yakhe,” kusho uNkk Mgenge.

Uthe ngesikhathi bemfica ubephethe ibhakede elinamanzi anombala obomvu awachithile ngesikhathi beqhamuka.

“Ubanjwe ehamba nengane yakhe. Simshayile sambuza ukuthi yini enze le nto, wasitshela ukuthi yena ukhathele ukuhlupheka ehlala ebona omakhelwane bakhe izinto zibahambela kahle,” kusho yena.

Amalungu omphakathi bekubonakala ukuthi awasamdingi ngoba athi ngisho indodana yakhe iwuhlupho yaziwa ngokuntshontsha.

UNksz Ntombizodwa Luthuli uthe sebekhiphe ngisho izimpahla zomsolwa bafuna ukuthi uma efika azithathe ahambe.

Amalungu omndeni walapho abanjwe echela khona awatholakalanga. Kade esemsebenzini nomakhewane bengenazo izinombolo zomakhalekhukhwini bawo.

AKUSENSUKU zatshwala kuqale umqhudelwano i-Africa Cup of Nations (Afcon), kanti ngale kokuhamba kancane kokudayisa kwamathikithi nokungashayi amagoli kweBafana, zikhona izindaba ezizojabulisa abantu.

INTATHELI YESOLEZWE

AKUSENSUKU zatshwala kuqale umqhudelwano i-Africa Cup of Nations (Afcon), kanti ngale kokuhamba kancane kokudayisa kwamathikithi nokungashayi amagoli kweBafana, zikhona izindaba ezizojabulisa abantu.

Isihlabani seBafana Bafana uBenni McCarthy sesiqophe ingoma nophrojusa we-hip hop wodumo kuleli uDome. Le ngoma esihloko sithi Viva Afrika, kungenzeka ibe yingoma evelele ebholeni.

Yenziwe ngokuhlanganyela yiqembu le-hip hop iTeam Tswara kanti iphethe lesi sihlabani sebhola esingeke size sibe yingxenye yomqhudelwano we-Afcon ngenxa yokulimala.

Enye ingoma kaBenni ake wayiqopha yenziwa ngo-1998 lapho ayecula khona neTKZee ngethi Shibobo eyadayisa ukwedlula zonke izingoma ezingama-single okuze kube yimanje ingakaze idlulwe.

“Ngicula neTKZee ngangibhalelwe amagama engangizowacula, okwami kwaba wukungena estudiyo ngiqophe kodwa kuViva Afrika ngizibhalele ngokwami,” kusho uBenni.

“Ngangesaba ngendlela eyisimanga ukuwabhala kodwa abafana ebengisebenza nabo bangenza ngakhululeka,” kuqhuba uBenni.

Uthi kule ngoma uberepha ngamava asewaqoqe kunobhutshuzwayo yonke le minyaka selokhu aqala ukudlala.

“Sengizuze kakhulu kunabanye abadlali base-Afrika kanti bengifuna ukubhala ngakho konke lokhu. Le ngoma iyingoma yesizwekazi sama-Afrika kanti ihlanganisa izigqi zase-Afrika eziningi. Igqugquzela ama-Afrika ukuthi azethembe asebenze ngokubambisana,” kuchaza lesi sihlabani.

Uthi waxhunyaniswa noDome nabarepha abangoDiva, Boy noRytious abacula kuleli culo, yimenenja yakhe.

“Laba ngabarepha abasafufusa kanti baphethe ithalente eliyisimanga. Badinga ukuthola ithuba nje kanti ngokusebenza nami bangaphumelela. Ngiqophe leli culo ikakhulukazi ngenxa yabo laba bafana,” kusho uBenni.

UBenni uphinde waqopha elinye iculo leqembu lakhe i-Orlando Pirates lapho ebe nesizini eyimpumelelo khona ngonyaka odlule.

Kule ngoma esihloko sithi Amabhakabhaka ubonga abalandeli bakhe ngokumeseka njalo.

Lezi zingoma zombili ziphrojuswe nguDome oseke wasebenza nezihlabani ezifana noSlikour, HHP, Skwatta Kamp, Pro nabanye.

UDome uthe: “UBenni ungumfana olungile. Wafika lapha ezilungiselele, wayesezilalele lezi zingoma ngaphambi kokuthi eze lapha. Bese sivele sizihlanganisile izinsimbi ngezingoma zebhola ukuze sigqugquzeleke.”

UBenni uthe kube mnandi ukwenza lezi zingoma njengoba umculo uyingxenye enkulu yempilo yakhe.

Ngale kwalezi zingoma ezimbili, uBenni uvela kwi-video ka-AKA yodumo ethi Jealousy kanti usanda kunxenxwa yiTKZee ukuthi acule iShibobo bukhoma emcimbini.

“Angethuki uma ngidlala ibhola kodwa ngicula bukhoma esteji kuxega amadolo,” kusho lo mdlali.

Umsebenzi wakhe wakamuva awusho ukuthi usefuna ukusebenza ngomculo, kusho ithimba labamphethe, uyohlale ebheke ibhola neqhaza lakhe kwi-Orlando Pirates neBafana Bafana.

NGEMVA kwezikhawu eziyisithupha icala lezelamani |zakwaNtuli ezingamalungu |e-IFP lihlehla, ummeli |wazo utshele inkantolo izolo|ukuthi uzofaka isicelo sebheyili ngoLwesithathu oluzayo.

BONISWA MOHALE

NGEMVA kwezikhawu eziyisithupha icala lezelamani zakwaNtuli ezingamalungu e-IFP lihlehla, ummeli wazo utshele inkantolo izolo ukuthi uzofaka isicelo sebheyili ngoLwesithathu oluzayo.

Amalungu e-IFP abekhona ajabule afa ezwa lezi zindaba.

Abasolwa yizelamani zakwaNtuli uMuzi (32) noXolani (29) ababekwe icala lokubulala ilungu le-NFP ehostela laseSeventini, eMlazi, uMnuz Mthunzi Gwala ekuqaleni kuka-Agasti nyakenye.

Izelamani zakwaNtuli zidlele uKhisimusi zaphinde zaqala unyaka omusha zisesitokisini kanti izolo bezibukeka zikhathazekile kodwa kuthe uma ummeli wazo, uMnuz Lourens De Klerk, echazela inkantolo ukuthi usezofaka isicelo sebheyili zabonakala zijabula.

Uthe uma ezibuza ukuthi ziyakuqonda yini osekuzokwenzeka zavuma zimamatheka.

Ngokusho kuka-De Klerk abukho ubufakazi obubambekayo obuhlanganisa abamangalelwa necala lokubulala ilungu leNFP ehostela ngoba amaphoyisa awazange abuqoqe kahle ubufakazi.

Uthe amaphoyisa anezitatimende zabasolwa lapho kuthiwa bazivumela khona leli cala kodwa obunye ubufakazi okuyibona obenze ukuthi angasifaki isicelo sebheyili abusamkhathazi.

Umshushisi uthe umbuso usazosiphikisa isicelo sebheyili nangokuzayo wavuma ukuthi icala lihlehlele uLwesithathu oluzayo.

IMantshi, uMnuz Avesh Sukdoo, itshele abasolwa ukuthi basazoqhubeka nokugcinwa esitokisini kuze kube nguLwesithathu ukuze ummeli wabo afake isicelo sebheyili.

Inkantolo ibigcwele njengokujwayelekile amalungu e-IFP emaningi kanti aweNFP abengabonwa nangokhalo.

Icala lezelamani zakwaNtuli belihlehla njengoba ummeli ebenganelisekile ngobufakazi obesebuqoqiwe.

Emuva kwecala u-De Klerk ube nomhlangano namalungu e-IFP ewachazela ngokwenzeke enkantolo.

ISIKHUNGO esibhekele ukukhishwa kwemali yesibonelelo sezingane nempesheni yabadala i-South African Social Security Agency (Sassa) sesikugxekile ukuloviswa kwezingane ngomama abasuke beyovuselela amakhadi okuhola.

BONISWA MOHALE

ISIKHUNGO esibhekele ukukhishwa kwemali yesibonelelo sezingane nempesheni yabadala i-South African Social Security Agency (Sassa) sesikugxekile ukuloviswa kwezingane ngomama abasuke beyovuselela amakhadi okuhola.

Ngokusho kukaMnuz Vusi Mahaye, obhekelele ezokuxhumana kwa-Sassa KwaZulu-Natal, izingane zesikole akufanele zibe sezikhungweni zabo ngesikhathi sesikole ngoba kufanele zifunde.

Uthe izingane kufanele zibe sezikhungweni zakwa-Sassa ngabo-2 ntambama ngoba inhloso yabo wukuqeda izipoki, hhayi ukuphazamisa ukufunda.

Unxuse abazali ukuthi bawuyeke umkhuba wokuhambisa izingane kwa-Sassa ngesikhathi sokufunda ngoba sebevula ngisho nangezimpelasonto ukuqinisekisa ukuthi labo abanezingane ezifundayo abasali ngaphandle.

Labo ababona izingane ngesikhathi sokufunda ezikhungweni zakwa-Sassa bayanxuswa ukuba bazise izikhulu zakwa-Sassa noma bafonele emahhovisi akhona ukuze uphele lo mkhuba.

Izolo izingane zesikole bezibhaliswa ehholo lakwa-V eMlazi zifake umfaniswano wesikole kusukela ekuseni. Ngesikhathi Isolezwe lifika ehholo owesifazane ochazwe njengomphathi uthe ngeke akwazi ukukhuluma nezintatheli futhi omama akade behamba nezingane ebezigqoke umfaniswano wesikole bebegcwele ngaphakathi ehholo.

UMahaye uthe akazi ukuthi kungani kusenzeka lokhu ngoba babatshelile abasebenzi babo ukuthi izingane zingafiki ezikhungweni zabo ngesikhathi sokufunda.

Unxuse ababona lo mkhuba bathinte u-Sassa ku 0800 60 10 11.

UNGQONGQOSHE weMfundo eyisiSekelo, uNkk Angie Motshekga, useziqhelelanisile nomuntu ozibiza ngaye ku-Twitter.

MHLENGI SHANGASE

UNGQONGQOSHE weMfundo eyisiSekelo, uNkk Angie Motshekga, useziqhelelanisile nomuntu ozibiza ngaye ku-Twitter.

Okhulumela uNkk Motshekga, uMnuz Panyaza Lesufi, uthe uNgqongqoshe akanawo u-Twitter njengoba kukhona ovule i-account ngegama lakhe lapho ebhala khona ngezemfundo.

“Kule account kubhalwa izinto kube sengathi nguNgqongqoshe kanti sifuna ukuqinisekisa ukuthi uNkk Motshekga akekho ku-Twitter. Usebenzisa eyoMnyango ethi, @dbe_SA,” kusho uLesufi.

Uxwayise labo abasebenzisa izinkundla zokuxhumana ukuthi bamshaye indiva ozibiza ngoNgqongqoshe ngoba le account ayimele uMnyango, uNgqongqoshe noma uhulumeni.

“Abantu abavule le account abananhlonipho futhi bafuna ukungcolisa igama likaNgqongqoshe,” kusho uLesufi.

Izolo ozibiza ngo-@AngieMotshekga, ubhale ku-Twitter ukuthi ucabanga ukuthi zonke izikole zibe nemitapo yolwazi ukuze othisha bangasheshi ukuphuma.

Enye yezinto ngukuthi abazali abahambise izingane zabo ezikoleni ngesikhathi ngoba izikole zodaka ngeke zizigcwalise.

Okunye obekubhaliwe ngukuthi abafundi abangayi ezikoleni ezizimele.

Ozenza uNkk Motshekga uke wabhala nokuthi uyafisa ukuthi ahlangane nowayenguMengameli wophiko lwentsha lwe-ANC uMnuz Julius Malema.

Owayengumholi we-IFP Youth Brigade, uNkk Pat Lebenya-Ntanzi, usejoyine uKhongolose ngemuva kokungagculiseki kwakhe ngokukhishwa ePhalamende ngendlela engacacile ngonyaka odlule.

CELANI SIKHAKHANE

OwayeNGUMHOLI we-IFP Youth Brigade, uNkk Pat Lebenya-Ntanzi, usejoyine uKhongolose ngemuva kokungagculiseki kwakhe ngokukhishwa ePhalamende ngendlela engacacile ngonyaka odlule.

UNkk Lebenya-Ntanzi ubesehole uphiko lwentsha isikhathi eside ku-IFP elimele nasePhalamende kanti ubengomunye wabaholi besifazane baleli qembu abebekhombisa ukudlondlobala ezinhlakeni zale nhlangano.

Lo mholi ubonakale okokuqala embuthanweni we-ANC wenkulumo kaMengameli Jacob Zuma, iJanuary 8 Statement kanti ubehlezi endaweni yezipheshethwa ebinabaholi bamazinga ehlukene kaKhongolose, e-Absa Stadium, eThekwini.

“Ngingakuqinisekisa ukuthi sengiyilungu le-ANC egatsheni laseWestville, eThekwini. Ngijoyine kuwona lo nyaka esiwuqalayo. Ngaphandle kwalokho ngithathe isinqumo sokuthi ngikhohlwe yikho konke okubi okwenzeke kimi kodwa ngigxile kwinqubekela phambili ngizihlanganise neqembu elizimisele ngokuthuthukisa izimpilo zabantu,” kusho uNkk Lebenya-Ntanzi.

Echaza uthe akuzange kumphathe kahle ukukhishwa kwakhe ePhalamende yi-IFP ngoba akazange aziswe kodwa wathi ezifikela ezoqhubeka nomsebenzi wakhe wasePhalamende wathola incwadi ehhovisi likaMnuz Koos Van der Merwe eyayimyalela ukuthi akaselona ilungu lePhalamende ngoba iqembu lase limsusile.

“Okwenzeka kwaba yinto engangingayilindele, ikakhulukazi kumuntu osezingeni lami ebuholini beqembu. Angizange ngibizwe ngisho ekomitini lokuqondiswa izigwegwe ukuze ngitshelwe ukuthi ngenzeni ngiziphendulele ngaphambi kokuba ngikhonjwe indlela kodwa bavele banginika incwadi engazisa ukuthi bayangisusa ePhalamende,” kusho uNkk Ntanzi.

Isigameko sokususwa kwakhe eKapa engazelele kwakungesisona esokuqala. Kwathi kunengqungquthela yabesifazane be-IFP ngo-2011 oNdini kwavela imibiko yokuthi uphoqiwe ukuba ahoxe esikhundleni ayephakanyiselwe kuso ngo-elethu yizithunywa ezazimfuna.

Ngemuva kwaleyo ngqungquthela wayekade eqeda kubeka phansi izintambo zokuhola intsha kwathatha uMnuz Mkhuleko Hlengwa.

Ngesikhathi esesuswa ePhalamende i-IFP yaziphendulela ngokuthi wayengeke esakwazi ukuqhubeka nokuba yilungu lePhalamende ngoba alukho uhlaka lweqembu ayesekulo. Wayekade eyiswe eKapa ngoba engumholi wentsha.

UNkk Lebenya-Ntanzi uthe kuningi akufundile kwezombusazwe eseku-IFP ngakho ngeke akwazi ukwenaba ngokuningi ngaphandle kokuthi usebheke phambili.

Uthe isinqumo sakhe sokushiya i-IFP sibe esokuthi ubengafuni ukuzisola ngokuhlala ekubeni umnyango uvaliwe kodwa ibe ikhona eminye evuliwe.

Kusemthanjeni yegazi lamasosha oMkhonto weSizwe (MKMVA) ukuba nesibindi nokubeka impilo yawo engcupheni uma kunesidingo, yingakho amanye amalungu ale nhlangano akhumula amajakhethi okubhukuda awaphosa phansi angena edamini abhukuda ngaphandle kokubanovalo.

SIMPHIWE NGUBANE

KUSEMITHANJENI yegazi lamasosha oMkhonto weSizwe (MKMVA) ukuba nesibindi nokubeka impilo yawo engcupheni uma kunesidingo, yingakho amanye amalungu ale nhlangano akhumula amajakhethi okubhukuda awaphosa phansi angena edamini abhukuda ngaphandle kokuba novalo.

Lokhu kushiwo nguNobhala we-MKMVA KwaZulu-Natal, uMnuz Themba Mavundla, esithangamini nabezindaba eThekwini lapho ebecacisa ngokwenzeka ngesikhathi kuminza uMnuz Nduduzo “Stix” Mdletshe edamini iNanda emasontweni amabili edlule.

Isidumbu sikaMdletshe (40), obenguSihlalo wale nhlangano esiFundeni iJerome Langa Region, eThekwini, sitholakale edamini ngoMsombuluko, sasikade siminze ngoJanuwari 6.

UMavundla uthe bebebizwe ngumphenyi wecala namanye amalungu ayekhona kuminza uStix ukuba bazokwenza izitatimende bachaze ngokwenzeka ngaloluya suku.

“Sichazile ngokwenzeka futhi sizimisele ukusebenzisana namaphoyisa ophenyweni alwenzayo ngisho kuthiwa imiphumela yokuhlolwa kwesidumbu sikaStix ikhombisa ukuthi kunogcobho ekufeni kwakhe,” kusho uMavundla ethi akaziboni ephindela kuleliya damu.

Ebuzwa ukuthi kungani basishaya indiva isexwayiso sasedanyini esivimbela abantu ukuthi babhukude ngaphandle kokugqoka ijakhethi yokubhukuda, uMavundla uvumile ukuthi benza elikhulu iphutha ngesikhathi bephuma esikebheni noStix begxumela emanzini bengafakile amajakhethi.

Umufi uchazwe njengomuntu obenesibindi , engumondli wezintandane efuqa nomkhankaso wokuba kubhekelelwe amasosha ale nhlangano ahluphekayo.

UStix wayesekhaleni lomkhankaso wokuvimbela umholi weDA, uNkk Helen Zille, ekutheni angayi kobona umuzi kaMengameli Jacob Zuma oseNkandla ngonyaka odlule.

Wavela kuthelevishini nasemaphephandabeni elele mba ngesisu emgwaqweni oya eNkandla okwaphoqa uZille ukuthi aphume esehlehla kuleya ndawo.

Izolo bekunenkonzo yesikhumbuzo sikaStix eCity Hall, eThekwini. Uzongcwatshwa emathuneni i-Heroes Acre, eChesterville, ngeSonto (Januwari 20) ngemuva kwenkonzo yokumphelezela eyoba seCity Hall ngo-10 ekuseni.

Okhulumela amaphoyisa uColonel Vincent Mdunge uthe baphenya icala lokuminza komuntu. imibiko kadokotela ohlola isidumbu sikaStix izokwethulelwa umndeni kuqala.

UMnyango wezeMpilo KwaZulu-Natal izolo ukuphikile ukuthi sizovalwa isibhedlela i-Addington obekunemibiko yokuthi ukusebenza kuzoma ukusebenza ngenxa yokuthi ziyalungiswa.

INTATHELI YESOLEZWE

UMNYANGO wezeMpilo KwaZulu-Natal izolo ukuphikile ukuthi sizovalwa isibhedlela i-Addington obekunemibiko yokuthi ukusebenza kuzoma ukusebenza ngenxa yokuthi ziyalungiswa.

Esitatiemndeni esikhishwe nguMnuz Sam Mkhwanazi, oyimenenja ebhekele ezokuXhumana eMnyangweni, kuthiwe le mibiko ayilona iqiniso ngoba ukulungiswa kwesibhedlela kuyahambisana nohlelo lwesifundazwe lokuphucula zonke izibhedlela ezidinga ukunakekelwa.

UMkhwanazi uthe kubekwe eceleni u-R1 billion okuhloswe ngawo ukuthi kubhekwane nezindleko zokulungisa i-Addington ibe sezingeni eliphezulu futhi ikwazi ukuba nobuxhakaxhaka besimanjemanje obuzosiza kwezokwelapha namhlanje.

Ukulungiswa kwezibhedla uthe kwenzelwa ukuthi kuqambe kuqala ukusebenza kohlelo olubizwa ngokuthi yi-National Health Insurance, oluzosiza abahlwempu ngokwelashwa okusezingeni okwesekwa nguhulumeni, izibhedlela sezisezingeni elihle.

Kuleli sonto kuvalwe amawodi amane namagumbi okuhlinza amane ngenxa yenkinga yama-aircon kulesi sibhedlela.

Inhloko yoMnyango wezeMpilo esifundazweni, uDkt Sibongile Zungu, ngaphambi kokukhishwa kwesitatimende icashunwe emaphephandabeni ithi babona ukuthi kuzoba ngcono uma besivala sonke isibhedlela.

“Sisezinhlelweni zokuqala izithangami zokubonisana namalungu omphakathi ukuze sizwe ukuthi wona abona kanjani uma sithi asivalwe isibhedlela,” kusho uDkt Zungu.

Uphinde wathi isinqumo sokuvala isibhedlela singase sibeke engcupheni izinhlelo zokwakhiwa kwezibhedlela ezimbili okuhlelwe ukuthi zakhiwe KwaMashu naseNanda.

Isibhedlela saKwaMashu sizobizwa ngeDr Pixley ka Seme, kuthi esaseNanda sibizwe ngeDkt John Dube.

Ukungabaza ngokwakhiwa kwalezi zibhedlela kudalwa wukuthi imali engu-R2 billion okumele ngabe ifakwa ezinhlelweni zokwakha zona ingangena ekulungiseni i-Addington.

Ukuwa kwe-Addington sekuthathe isikhathi eside njengoba phambilini yayithathwa njengesibhedlela esingcono kakhulu kwezokwelapha, njengoba ingeyesibili ngobukhulu ngemva kwe-King Edward.

Ikomidi lanikeza abaphathi besibhedlela izinyanga ezintathu ukulungisa isimo esasingagculisi salesi sibhedlela.

UNgqongqoshe wezeMpilo esifundazweni, uDkt Sibongiseni Dhlomo, uthe ukuvalwa kwamawodi nawokuhlinza kuyingxenye yokulungisa isimo esibhedlela.

Uthe bebengakwazi ukuthi bafake iziguli emawodini engenawo umoya opholile kodwa bagcina bethathe isinqumo sokuthi bazithuthele kwamanye.

Abahlengikazi okukhulunywe nabo bathe inkinga yokungasebenzi ngendlela kwama-aircon esibhedlela yinkinga enkulu esize yadala ukuthi iziguli nabasebenzi bagcine sebeziphathela ama-fan abo.

Omunye umhlengikazi uthe udokotela othile kulesi sibhedlela wake wabhala incwadi ekhononda ngokungasebenzi ngendlela kwama-aircon kodwa akukho okusenziwe kuze kube manje.

Akhwele adilika enkampanini kagesi i-Eskom amalungu omphakathi ephikisana nokwenyuswa kwentengo kagesi ngo-16% iminyaka emihlanu ezayo okuhlongozwa yile nkampani esigcawini sokulalela imibono yabantu eICC, eThekwini, izolo.

NONHLANHLA MKHABELA

AKHWELE adilika enkampanini kagesi i-Eskom amalungu omphakathi ephikisana nokwenyuswa kwentengo kagesi ngo-16% iminyaka emihlanu ezayo okuhlongozwa yile nkampani esigcawini sokulalela imibono yabantu eICC, eThekwini, izolo.

Amalungu omphakathi aveze ukuthi ukwenyuka kukagesi kuzowahlukumeza kanjani nokuthi abona ukuthi ingaxazululwa kanjani le nkinga.

UNkk Idah Cele (84) waseMlazi obekhona kulesi sigcawu uthe uphila ngemali yempesheni akhulisa ngayo abazukulu bakhe abangasenabazali. Akazi ukuthi uzowuthenga ngani ugesi obiza ngale ndlela.

“Baningi abantu abafana nami abangasebenzi, bazokwenzenjani uma ugesi usubiza ngale ndlela,” kubuza uNkk Cele egane unwabu.

UNksz China Khuzwayo wenhlangano yomphakathi ebhekelela ukulethwa kukagesi emphakathi ngendlela efanele, i-Electricity Action Group, eseMgungundlovu, uthe bayaqonda ukuthi u-Eskom kumele ukhule kodwa lokhu akumele kuzwele kubantu abahlwempu.

“Yithina bazali abangenani esizohlupheka kakhulu ngalokhu kwenyuka kukagesi. Kuzohlukumezeka izingane zethu ngoba impilo yonke izoma sisebenzele ukuthenga ugesi kuphela,” kubeka uNksz Khuzwayo.

Uthe imizi izobhubha umlilo ngoba amakhaya amaningi antulayo azophephela emakhandleleni ukukhanyisa ekubeni ayingozi.

Lesi sigcawu besingesinye sezihlelwa yinhlangano i-National Energy Regulator of South Africa ezweni lonkana lapho kulalelwa izikhalo zabantu ngokwenyuswa kukagesi okuhlongozwayo.

umengameli weNational Union of Metal Workers of South Africa (NUMSA), UMnuz Cedric Gina, ephawula ngendlela okungagwenywa ngayo ukwenyuka kwentengo kagesi kakhulu uthe kumele kubhekwe intengo yamalahle amba eqolo.

“Ukube amalahle awambi eqolo ngabe le nkinga ayiyinkulu ngendlela eyiyona. Kumele uhulumeni abheke ukuthi amalahle angasetshenziswa kanjani yisizwe ngendlela enobuhlakani ezoletha inzuzo kuwona wonke umuntu,” kubeka uGina.

Uthe akusizi lutho ukuthi nabaphathi bakwa-Eskom balokhu bezitika ngamabhonasi amakhulu isizwe sibe sibulawa wukubiza kukagesi.

Obhekelele izindaba zamabhizinisi kwi-SA Cane Grower’s Association, uMnuz Thomas Funke, uthe imisebenzi engu-35 000 isengcupheni ngoba umsebenzi wokulima ummoba uncike kakhulu ekusebenziseni ugesi uma kuchelelwa. Ukukhula kwawo kungasho ukuphela komsebenzi kwabaningi.

Okhulumela u-Eskom kuzwelonke, uNkk Hillary Joffe uthe bayaziqonda izikhalo kodwa kubalulekile ukuthi kulungiswe kuphinde kwengezwe izindawo zokuphehla ugesi. Kuzobiza kakhulu ukwenza lokhu.

“Kuzothatha imali elinganiselwa ku-R340billion ukwenza wonke umsebenzi.

imali sizoyeboleka okusho ukuthi kumele sibe nemali eyanele yokukhokha nenzalo. ngakho kubalulekile ukuthi siyenyuse intengo,” kuchaza uNkk Joffe.

Yize ngoLwesithathu kube nesixakaxaka esiphoqe ukuba simiswe isigcawu ebesisePort Elizabeth, akubanga khona msindo obe nobudlova obukhulu eThekwini.

UNgqongqoshe weMfundo KwaZulu-Natal, uMnuz Senzo Mchunu, usexwayise abafundi ukuthi bangabhemeli imaths insangu ngoba ngeke bayiphase bebanjwe yizidakamizwa.

MHLENGI SHANGASE

UNGQONGQOSHE weMfundo KwaZulu-Natal, uMnuz Senzo Mchunu, usexwayise abafundi ukuthi bangabhemeli imaths insangu ngoba ngeke bayiphase bebanjwe yizidakamizwa.

UMchunu, obevakashele izikole eFolweni, eMbumbulu naseMlazi izolo, ngosuku lwesibili izikole zivuliwe, uthe uma isifundo usifeyila ungadakwe yilutho, ngeke usiphase uma usudle izidakamizwa.

Ubekhuluma nabafundi ababili baseSwelihle High abanikwe ithuba lokugcina lokufunda kulo nyaka ngenxa yokuhlushwa yinkinga yezidakamizwa.

“Yekani insangu namaphilisi ngoba ngeke nibhemele imaths insangu bese nicabanga ukuthi nizoyiphasa. Uma kuwukuthi uyifeyila ungabhemile, ngeke uyiphase noma usubhemile,” kweluleka uMchunu.

Uxwayise ngokuthi uma abafundi sebexoshwe esikoleni kuba nzima ukuphinda bathole izikhala zokufunda esifundazweni ngoba ngeke besemukelwa ndawo.

Uthe laba bafundi badinga usizo, wathi abazali “abangalahli” izingane zabo kothisha ngoba kwabona ayikho into abangayenza kuzona uma zihlula abazali.

Uxwayise nabafundi bamatric ukuthi abaqale manje bagxile ezifundweni zabo bangafundi uma sekuzophela unyaka sebebhala.

“Khohlwani yindaba yokuthi nilale nabafana, ukhumule nje uyingane yesikole ebusuku, ukhumulela umuntu.

“Bafana yekani izidakamizwa, fundani nithole imifundaze neziqu. Seningenza enikuthandayo ngemuva kwalokho.

“Ntombazane usungaba nenqwaba yezingane uma usube neziqu zakho ususebenza. Mfana usungabhema iwunga uze ufike eGoli uma uthanda kodwa uma ususebenza,” kusho uMchunu.

Uthe abafundi abagxile ezincwadini, bakhohlwe yithelevishini nabangani baze bababone ngemva kokuphothula izivivinyo zabo.

Ngesonto elizayo uthe kuzoba nengqungquthela okuzodingidwa kuyo izinto ezikhungethe abafundi okubalwa ukukhulelwa kwabafundi, izidakamizwa nokunye.

Uthe ugculisekile ngezinto azifice ezikoleni ngoba uthole ukuthi iningi lazo bekufundwa ngosuku lokuqala.

“Abaqondisi bezifunda bemiNyango kumele basilekelele batshele othishanhloko ukuthi kumele bathande izikole zabo. Ufika ezikoleni ezilawulwa othishanhloko bethu, ufike kungcolile kodwa uma uya kwezezinye izinhlanga ufike zihlanzekile,” kusho uMchunu.

Uthe bakhona othishanhloko abasabamba imiphumela yabafundi ngoba abazali bengakhokhile. Uthe kumele bakuyeke lokho ngoba yicala futhi ababaningi yidlanzana elisenza lo mkhuba.