Kungakapholi maseko kwenzeke inhlekelele yengozi ePinetown abezepolitiki sebephendule lesi sibhicongo sengozi udaba lombango.

CELANI SIKHAKHANE

KUNGAKAPHOLI maseko kwenzeke inhlekelele yengozi ePinetown nemindeni eshonelwe isazilile, abanye kusembulwa kwembeswa kubo ezibhedlela, abezepolitiki sebephendule lesi sibhicongo sengozi udaba lombango kulandela ukuqubuka komsindo phakathi kwe-ANC neDA ngeziphambano ezibekwe lapho le ngozi yenzeka khona. Isibalo sabafe kule ngozi namanje esengundabuzekwayo sesifinyelele ku-23.

I-ANC esifundeni iTheku ifuna lezi ziphambano zisuswe ngoba ikhala ngokuthi kwephulwe umthetho kamasipala ngokugxu-nyekwa kwazo futhi zibekwe yi-DA ngoba ihlekisa ngemindeni eyashonelwa kule ngozi.

Le ngozi yenzeka ezimpambanweni zomgwaqo uRichmond no-M13 ngesikhathi iloli eyayishayelwa uMnuz Sanele Goodness May waseSwazini imphunyuka kuField’s Hill yayoshaya izimoto ezaziserobhothini.

UNobhala we-ANC eThekwini u-Mnuz Bheki Ntshangase uthe baca-suke kakhulu ngalezi ziphambano ngoba azihambisani nemigomo ka-masipala futhi i-DA izibeke ngoba ibukisa ngemindeni eyashonelwa.

“Sifuna zisuswe futhi sizoxhumana nomasipala ukuba azisuse ngoba i-DA yenze into esingayazi nephambana nosiko lwama-Afrika ngokuthi ngesikhathi kufihlwa imindeni bese yona iyogiya endaweni yesigameko ihlekise ngokwenzekile igxumeke nezipha-mbano esingazazi ukuthi ngezani.

“Okokuqala asibazi ukuthi bebehlanganiseni emindenini eshonelwe njengoba benza lokhu,” kusho uNtshangase.

Uthe lesi sikhathi akusisona esokuziveza ngokwepolitiki kodwa ngesokuba amaqembu ahlangane akhalisane nemindeni .

Ngakolunye uhlangothi nenhlangano yamatekisi iSantaco ithe ayizifuni lezi ziphambano ngoba ziphazamisa abashayeli, ze-nza bavukwe umunyu bese bephazamiseka emgwaqweni becabanga ozakwabo abashone kule ngozi.

UMnuz Mdu Xaba wale nhlanga-no uthe okubacika kakhulu wuku-thi i-DA iyona ebeke lezi ziphamba-no ekubeni ihlasela noNgqongqo-she wezokuThutha esifundazweni uMnuz Willies Mchunu ifuna asule esikhundleni ngenxa yale ngozi.

Uthe ngisho umuntu ongazi ukuthi kwenzekeni uvele avukwe umunyu bese kuba muncu etekisini ngenxa nje yalezi ziphambano, futhi ziphazamisa ukuhamba kwezimoto.

Lezi ziphambano zifakwe zaba ngu-23 ngenhloso yokukhumbula bonke labo abadlula kule ngozi.

I-ANC neSantaco bakhala ngalokhu nje kuzothi ngeSonto bayokhuleka kuyo le ndawo yengozi kanti abacacisanga noma bazozisusa yini lezi ziphambano kodwa abamatekisi bathe bona bayobiza abantu sebezisusile.

Le nkonzo izoqala ngo-12 emini ePinetown Civic Centre.

Umholi we-DA eThekwini uMnuz Zwakele Mncwango, uthe akazi ukuthi i-ANC ikuthathaphi lokhu ngoba akuyona i-DA eyabeka lezi ziphambano kodwa umphakathi wasePinetown owawuhlangene khona.

Uthe wethukile ngesikhathi uNobhala we-ANC emthethisa ebuza ukuthi bazibekeleni lezi ziphambano kuleya ndawo ekubeni kwaziwa kahle ukuthi umphakathi owaqoqana uyokhalaza nangamaloli ahamba kulowa mgwaqo kwaba yiwo owabeka lezi ziphambano.

Uthi kwayena wayengekho kulowa mbuthano kodwa wayesemngcwabeni wabashona.

Oyisikhulu sikaMasipala we-Theku kwezamaPaki namaNgcwa-ba uMnuz Thembinkosi Ngcobo uthe akukho emthethweni ukubeka noma yini eduze komgwaqo.

Kuqhume umkikizo kwenzeka okungajwayelekile esigodini saseMatshemhlophe, eShowe, kuphuma umshado kagogo oneminyaka ewu-80.

ZANELE MSOMI

KUQHUME umkikizo kwenzeka okungajwayelekile ngempelasonto esigodini saseMatshemhlophe, eShowe, kuphuma umshado kagogo oneminyaka ewu-80 osashonelwa yindoda, obegcina isiko egcwalisa umshado.

UNkk Letta Makhanya, uMaMkhize ongasakhumbuli ukuthi umyeni uMnuz Elphas Makhanya washona nini, ubeqala ukushada ngoba wagcina ngokubhala enkantolo emuva kokuhlala isikhathi eside nomyeni. UNkk Makhanya ‘ubeshada’ nabazukulu bakhe abangamawele uBongani noBongiseni (13), abebemele umkhulu ongasekho.

Utshele Isolezwe ukuthi uzizwe emusha kwangathi kukhona umthwalo osukile emahlombe emuva kwalo mshado. Uthe bese kunesikhathi eside eqongelela imali yempesheni ngoba efuna ukuwenza uphelele umshado omhlophe olandelwe wumabo.

“Yize ngisele nezidubulo emzimbeni emuva kwalo msebenzi kodwa angizisoli ngoba ngisiqedile isikweletu,” kusho yena.

Uthe ushada nje sekwavalwa ngehlahla kubo kwaMkhize nasemzini athe sekusele umnakwabo kuphela. Ngeledlule uphindele kubo eShowe lapho sekusele khona umzukulu uNksz Sithembi Mkhize okunguye omkhiphile entathakusa wabika nomshado empepheni.

Umshado wenzelwe kwamkhwenyana kwaHlomendlini, eMandeni, uMfu Dlamuka elingatholakalanga igama lakhe, weChurch of the Holy Ghost, eHammarsdale, wabusisa umshado. Ugogo naye osonta kuleli bandla uthi alixabani namasiko kunalokho liyawagqugquzela. Uthe nabazalwane bebephume ngobuningi ukuzojabulela lolu suku.

Kuthiwa bekuwumshado ophelele nasetendeni bekuwu-bukhazikhazi kuhlotshiswe ngombala o-pink noyisiliva. Bekukhona nekhekhe elinezitezi ezintathu elihambisana nombala wosuku.

Kuhlatshwe izinkomo ezimbili njengoba kwenziwa uma kushadwa ngokuphelele, ugogo wathelwa ngenyongo kwaMakhanya.

Wabele abasemzini ngezingu-bo eziwu-16 namacansi emzini kodwa isidwaba akasigqokanga ngenxa yenkolo, kunalokho usha-ye isudi kanokusho nesigqoko.

UNkk Makhanya osehamba ngobhoko, uthe babebusiswe ngezingane eziwu-13 nomyeni kodwa sekusele eziyisishiyagalo-mbili, eziyisithupha sezishadile.

Uthe izingane zazisencane kakhulu kushona uyise athi wayesebenza kwaLoliwe. Uthe okuningi akasakukhumbuli ngoba akayanga nasesikoleni.

UNksz Mkhize ukuqinisekisile ukuthi nguye okhiphe ugogo ekhaya eseyoshada. Uthe akukho obekuhlupha ugogo okumphoqe ukuthi agcine leli siko kodwa nguye obethi akakhululekile ngenxa yesikweletu.

UMnuz Madoda Zungu ongumhlaziyi wamasiko uthe yisiko elidala elenziwe ngugogo. Uthe akukhathalekile ukuthi indoda yashona nini kumele ligcinwe.

Balengela eweni lokuboshwa abantu abantshontsha amanzi.

SIMPHIWE NGUBANE

BALENGELA eweni lokuboshwa abantu abantshontsha amanzi, abadla umhlaba ngodli nalabo abashisa imijondolo ngamabomu ngenhloso yokuzibeka ethubeni lkuthola izindlu zomxhaso kuMasipala weTheku.

Lokhu kuvele emhlanganweni wesigungu esilawula uMasipala weTheku ukuthi kuzoqiniswa imithetho yedolobha kubonakale nalabo abagila lo mkhuba baboshwe.

Lolu daba lusukela ekutheni iTheku lilahlekelwa ngama-litha amaningi amanzi ngosuku ngenxa yabantu abawebayo, amapayipi agxazayo nalabo abakokotela ama-washi amanzi ukuze bangawakhokheli.

Kuthiwa lokhu kudla umasipala izigidi zamarandi uma uwathenga eMngeni Water.

IMenenja kamasipala weTheku uMnuz Sbu Sithole (osesithombeni), ithe kunabantu abaqashelwe ukuthi abazobheka amanzi agxazayo nokunye. USithole uthe lubucayi udaba lwamanzi eThekwini futhi kumele luthathelwe phezulu.

“Kumele sibhekane kanzima nabantu abadla umhlaba ngodli singabavumeli ukuba bazenzele umathanda. Lokhu abakwenzayo kuphele manje,” kusho uSithole.

UMnuz Nigel Gumede ongusihlalo wekomiti lezokuHlaliswa kwaBantu eThekwini, uthe akuphenywe ngemililo equbuka njalo emijondolo.

“Kwesinye isikhathi kubukeka izinhlekelele ezidalwa wumlilo sengathi zenziwe ngamabomu emijondolo ngoba labo abashelwe sebefuna olunye uhlobo losizo.

“Lo mkhuba wenzeka kuwo wonke amawadi ngakho kuzomele kuphenywe ukuze kutholakale okusuke kuhlosiwe ngokushiswa komlilo,” kusho uGumede.

“Liphezulu izinga lokuxhunywa kwamanzi ngendlela engekho emthethweni emijondolo.

“Amanye amalungu omphakathi awayishayi mkhuba imithetho kaMasipala, lokhu okuzosidalela inkinga yokushoda kwamanzi ekugcineni.

“Kuzoba nesikhathi lapho abadla imbuya ngothi bezontula khona amanzi, omacaphuna kusale nezinkampani bawathenge phesheya kwezilwandle.

“Asifuni ukuzithola sesikuleso simo yingakho kumele isukunyelwe eyabantu abawantshontshayo namapayipi angxazayo,” kusho uGumede.

Isimo besimanzonzo ewadini u-18 no-26 eTlokwe, eNorth West lapho bekubanga i-ANC nalabo ababengamakhansela ayo amabili okhethweni lokuchibiyela.

ISIMO besimanzonzo ewadini u-18 no-26 eTlokwe, eNorth West lapho bekubanga i-ANC nalabo ababengamakhansela ayo amabili okhethweni lokuchibiyela.

“Lokhu kushuba kwesimo yinto eqondakalayo,” usho kanje okhulumela i-ANC, uMnuz Jackson Mthembu ngaphandle kwesikhungo sokuvota ebesise-St Augustine’s Anglican Church kuwadi 26.

“Sifuna isizinda esifanayo. Sifuna ukuvotelwa yilaba bantu ababavotela ngo- 2011 ngesikhathi besengamalungu kaKhongolose,” usho kanje.

Bekukanise iNyala yamaphoyisa neveni ngaphandle kwesikhungo sokuvota.

Umbango uphakathi komele i-ANC uMnuz Oupa Mogoshane nozimele uMnuz Butiki “Stone” Mahlabe, owabe eyikhasela le-ANC kule ndawo iminyaka eyishumi nambili.

UMahlabe ungelinye lamakhansela angu-14 axoshwa yi-ANC ngoJulayi emuva kokuthi ikomidi lokuqondisa ubugwegwe labathola benecala emacaleni amane okungaziphathi kahle kulandela isinqumo sokuthi abethenjwa ubuholi bemeya yaseTlokwe, uMaphetle Maphetle.

Esikhundleni sikaMaphetle kwangena ikhansela leDemocratic Alliance uNkk Annette Combrink.

Ikomidi likazwelonke lokuqondisa ubugwegwe lagcina lisishintshile lesi sinqumo sokuxoshwa.

Yize kunjalo, amakhansela ayisishiyagalombili kulawa, abhalisa njengabantu abazimele okhethweni lokuchibiyela.

UMthembu uthe i-ANC ayisatshiswa nguMahlabe futhi inethemba lokuthi izakhamuzi zizovotela le nhlangano.

“Abantu baseTlokwe bayazi ukuthi yini i-ANC ebenzele yona,” kusho uMthembu. - Sapa

Ukuvalwa kwamahhovisi amakhulu ezempesheni ku-Esplanade, eThekwini, kushiye dengwane inqwaba yabantu ebizofuna usizo.

MNCEDISI GOGE

UMYALELO owumnqamulajuqu okhishwe uMnyango wezaBasebenzi wokuthi kuvalwe thaqa amahhovisi amakhulu ezempesheni akwa South African Social Security Agency (Sassa) ebhilidini likahulumeni ku-Esplanade, eThekwini, kushiye dengwane inqwaba yabantu ebizofuna usizo.

Isizathu esinqala esikhishwe uMnyango wezaBasebenzi ngokuvalwa kwaleli bhilidi ubunuku nokungahleleki. Izinkumbi zabantu abadala nonina bezingane abebezobhalisela isibonelelo kuphoqelekile ukuthi babuyiselwe emuva. Abantu abebefika bebezithela phezu kombhalo obuthi: “Ukusebenza kwebhilidi i-Esplanade kuletha ubungozi kubantu nabasebenzi ngakho ngeke lisasebenza.”

Ngesikhathi Isolezwe lihambele kulendawo lizibonele abantu bejikiswa emnyango abanye besizwa ngaphandle.

Umsebenzi ongaphakathi ocele ukungadalulwa ngenxa yokuthi akavumelekile ukukhuluma nabezindaba, uthe kufanele engabe kade kwamiswa ukusebenza kwaleli bhilidi.

“Kade kwashiwo ukuthi leli bhilidi kumele livalwe, ngicabanga ukuthi lomyalelo waphuma ngo-2006 kodwa kwaqhubeka ukusebenza,” kusho lo msebenzi.

Uthe isimo abasebenza ngaphansi kwaso siyethusa futhi asamukelekile. Iningi labantu ebelifika lapha bese liphoqeleka ukuba lithathwe ngamatekisi liye kwamanye amahhovisi akwa Sassa eChatsworth.

UMnuz Andries Lebeko (56) uthe ufike kuvalwe amasango ngabo-6 ekuseni kanti akazi uzolala kuphi njengoba bekufanele athole ikhadi lakhe lokuhola bese ekhokhela irenti lapho ehlala khona.

“Ngiphazamisekile impela, bekufanele namhlanje (izolo) ngithole ikhadi lami lokuhola bese kuthi emuva kwalokho ngihambe ngiyohola bese ngikwazi ukukhokha la ngihlala khona. Njengamanje angazi noma ngizofika izimpahla zami sebezikhiphele ngaphandle yini,” kusho uLebeko.

UNksz Zanele Doncabe obeqhuba izingane ezine ezozenzela amakhadi okuhola, uthe ukuvalwa kwebhilidi kumphazamisile kakhulu njengoba sekufanele aye kwenye indawo ekude nezingane zakhe. Uthe ayikho into azoyenza ngoba uyayidinga imali ukuze izingane zakhe ziphile.

Okhulumela i-Sassa KwaZulu-Natal, uMnuz Vusi Mahaye, uthe bathathe isinqumo sokuthi bathathe abasebenzi bakulamahhovisi babatshale kwezinye izindawo.

“Sinxusa abantu ukuthi baye emahhovisi aseChatsworth, Inanda, KwaMashu, Phoenix, Pinetown, uMlazi naseVerulam,” kusho uMahaye.

Imenenja yakwa-Sassa esifundazweni uNkk Pearl Bengu ithe benza okusemandleni abo ukuthola amanye amahhovisi okusebenzela.

“Sisebenza ngokuzikhandla ukuthola amanye amahhovisi. Sizocela ukuxolisa emphakathini ngokuphazamiseka okwenzekile kanti sizowazisa futhi umphakathi uma sesiyitholile enye indawo,” kusho uNkk Bengu.

Imizamo yokuthola abakhulumela uMnyango wezaBasebenzi ukuze baphawule ngalolu daba izolo ayiphumelelanga.

Uhlabe imbuzi yomsebenzi athi eyokukhipha ibhadi umnikazi wetekisi okusanda kubanjwa kuyo oqotsheni umshayeli wakhe nenye insizwa bezitika ngocansi.

ZANELE MSOMI

UHLABE imbuzi yomsebenzi athi eyokukhipha ibhadi ngempelasonto umnikazi wetekisi okusanda kubanjwa kuyo oqotsheni umshayeli wakhe nenye insizwa bezitika ngocansi ngaseMbilo, eThekwini.

UMnuz Macashekhwapheni Shozi onamatekisi amabili ahambela eMlazi naseThekwini, uthe uyawagcina amasiko futhi ubengeke asonge izandla emuva kwalesi sigameko asibiza ngamanyala, esenzeke emotweni yokuthutha umphakathi.

Emasontweni amabili edlule amaphoyisa aseThekwini abambe uMnuz Luntu Faku (26) nomlisa elingatholakalanga igama lakhe, oboshwe wabuye wadedelwa. Babanjwa entathakusa beya ocansini, uFaku wacela empunzini ngesudi yesele. Emotweni kwasala izingubo zokugqoka okubalwa nezimpahla zangaphansi kwatholakala namabhodlela otshwala.

Isolezwe libuye lahlangana noFaku ovumile kuMnuz Shozi ukuthi ubethandana nomlisa abanjwa naye, wangayiphendula eminye imibuzo ngobudlelwano babo.

UShozi oyiNazaretha ngokwenkolo, ukhale ngokuthi kuyibhadi okwenzeke emotweni yakhe ngoba ngokwesintu akuyiwa ocansini emotweni. Emuva kokuboshwa kwetekisi yakhe uthe wangena ezindlekweni zikaR2 400, eyilungisa ngoba ivele yafa, yangasebenza izinsuku ezimbili. Lokhu ukuchaze njengemiphumela yebhadi elidalwe wukuthi laba balisa benze itekisi yakhe ilawu.

Izolo utshele Isolezwe ukuthi yize elazi isiko lokugeza imoto uma kuyiwe ocansini kuyo, kukhona nendoda endala emcebise ngokuthi asheshe athathe izinyathelo kungaze konakale.

“Ngihlabe imbuzi ngenza umsebenzi ngabiza nabantu. Imoto ngiyichele ngomswani nangenyongo ukuze ingahlali nesinyama namabhadi,” kuchaza yena.

Uveze ukuthi njengomuntu okholelwayo emasikweni, zonke izimoto zakhe uyazihlabela, azibike ngaphambi kokuthi zingene emgwaqweni. Uthe ngonyaka odlule ubehlabe izinkomo ezimbili ebika izimoto. UShozi akagcini ngokuhlaba kudliwe kodwa uthi imoto uyithela ngenyongo ukuze abaphansi bayibheke.

UMnuz Sazi Mhlongo ongumengameli weTraditional Healers Association ukuncomile okwenziwe nguShozi.

“Kusho ukuthi uphila isintu ngempela ngoba imoto iyagezwa uma kulalwe kuyo. Imoto ifana nenkomo ngoba nayo uyithenga ngemali yamadlozi. Ngeke udlalele esibayeni uye ocansini khona. Kumele ligcinwe ngempela leli siko ikakhulukazi uma imoto yabikwa,” kusho yena.

Uthe uma ungaligcinanga leli siko imoto ingagingqika kuphume isidumbu. Kwenzeka lokhu nje osomatekisi bakusoseshini kaShozi bathe ngeke baphinde bamqashe umshayeli oyisitabane. UShozi uthe ngalokhu abacwasi kodwa yindlela yokuziphatha kwazo izitabane abangahambisani nayo.

Uthukuthele uyaveva uthishanhloko wasenkulisa yaseMlazi osola izikole ezisendaweni eyayihlala abamhlophe eThekwini ngokunqaba ukuthatha abafundi bakhe.

MCEBO MPUNGOSE

UTHUKUTHELE uyaveva uthishanhloko wasenkulisa yaseMlazi osola izikole ezisendaweni eyayihlala abamhlophe eThekwini ngokunqaba ukuthatha abafundi bakhe.

UNksz Nomusa Zulu, weToddlers inn Educare centre, uthi udinwe yisenzo sezikole ezinhlanu zamabanga aphansi eThekwini ngokubambisa udonga izingane eziqhamuka enkulisa yakhe.

Ukhale ngeSeaview Primary School, Glenmore Primary, Penzance, Monclair Primary School neDurban Primary School aveze ukuthi lezi zikole zithathe isinqumo sokufaka ohlwini labalindile izingane eziphuma enkulisa nakuba befake izicelo kusenesikhathi. Uthe okubuhlungu kakhulu ngukuthi izingane zigcina zingamukelwanga, abazali bagcine sebezifaka kwezinye izikole abasuke bengazihlosile.

“Uthishanhloko waseSeaview wakhuluma njengomuntu ongamukelayo ngimtshela ngabafundi bami kodwa wathi angibhale ngicacise ukuthi baqhamuka eMlazi ezincwadini zabo zokubhalisa. Ngakwenza lokho ekuqaleni konyaka, kuze kube yimanje abafundi akaze bathathwe bagcina ngokufakwa ohlwini lwabalindile kwaze kwaphela izikhala. Zibaphelela kanjani abafundi izikhala bebhalise kuqala unyaka,” kubuza uNksz Zulu.

Uthe ubudlelwano bakhe nalezi zikole bebuhamba kahle kusukela ngo- 2006 kuya ku-2009 iToddlers Inn isahlezi eRossburgh. Ngenxa yesakhiwo esasingesihle bagcina benqume ukuthuthela eMlazi ngo-2010 nokulapho athe wayehlose ukusiza izingane zakhona zithole imfundo esezingeni zisesemabangeni aphansi.

“Bebenganayo inkinga siphakela izikole zabo sisafundela eRossburgh, inkinga iqale sesiya eMlazi. Okungixakayo ngukuthi izingane zakhona zisafundiswa ngothisha ababodwa, ngisho nabamhlophe bakhona bayafundisa,” kusho uNksz Zulu.

Uthe ngo-2011 waphoqeleka ukuthi aze asebenzise ikheli lothisha abamhlophe abahlala kwezinye izindawo ukuze zamukelwe ngokushesha izingane. Ukhale ngokuthi izingane nabazali basenkingeni njengoba sekuphela unyaka zingazi ukuthi zizofunda kuphi ngonyaka ozayo.

Kuthintwa uthishanhloko waseMontclair Junior oqale ngokuthi akavumelekile ukukhuluma nabezi-ndaba uthe uma uNksz Zulu enenkinga akeze azokhuluma nabo hhayi abezindaba.

Okhulumela uMnyango wezeMfundo KwaZulu-Natal, uMnuz Muzi Mahlambi, usihlabile isenzo salezi zikole wasifanisa nokwakwenzeka ngesikhathi sobandlululo kuhlukaniswa abantu ngezindawo zokuhlala.

“UMnyango ubeke umthetho wokuthi umuntu obhalise kuqala nguyena okumele athathwe esiko-leni. Abaphelelwe yizikhala kuphela abangeke bakwazi ukungena. Ukube kunomthetho othi izi-ngane zaseMlazi azikwazi ukufunda eGlenwood ngabe sesibuyisa izikhathi zobandlululo,” kusho uMahlambi.

UNKK Nomcebo Khumalo ungomunye wabaningi abaqhubeka nokwenza leli bhizinisi abathi selitakule imindeni eminingi.

ZANELE MSOMI

UNKK Nomcebo Khumalo (34), okungelona igama langempela, ungusomabhizinisi owaziwayo endaweni futhi nempilo iyazisho ukuthi ucaphunakusale. Akasebenzi kodwa akukho angakwazi ukukwenza ngendlela engena ngayo imali. Ngenyanga uyayenza inzuzo engaphezu kuka-R20 000, okuyimali abanye abangakaze bayihole. Usethenge izimoto ezimbili, waqedela ukwakha umuzi futhi ulekelela nokondla umndeni nokufundisa izingane zakhe.

Okwehlukile ngebhizinisi likaNkk Khumalo waseMlazi, wukuthi alikho emthethweni njengoba engumashonisa.

Ungomunye wabaningi abaqhubeka nokwenza leli bhizinisi abathi selitakule imindeni eminingi. Yize umthetho wakuleli uyichitha eyomashonisa abangabhalisiwe kwiFinancial Serives Board, abanaleli bhizinisi bathi liyimpendulo emindenini eminingi eshaywa ngesithende emabhange.

Ngenxa yokuthi yibhizinisi elingekho emthethweni, abakulona abathandi ukumemezela futhi ngeke ubathole bekhangisa. Ukuba kuleli bhizinisi kuhambisana nobungozi ngoba imali uyaziqoqela futhi akulula nokubopha abangasakukhokheli.

Muva nje Isolezwe libike ngoNksz Gugu Hlongwane (38), waseMlazi obengumashonisa okusolwa ukuthi ubulawe ngamanye amakhasimende akhe. Isihlobo sakhe sithe sisola ukuthi ubulewe ngomunye obemkweleta ngoba ubebolekisa ngemali yakhe nangeyesitokofela.

UNkk Khumalo uyavuma ukuthi yize kuphileka ngaleli bhizinisi, akusiniswa mahleza kanti kudingeka ube nesibindi. Waqala ukubolekisa ngemali ngo-2008 engazi ukuthi ibhizinisi lizokhula. Wayebolekisa komakhelwane imali engaphansi kuka-R300. Ngenxa yokuthi abantu bebetshelana, kugcine kufika othisha, amaphoyisa nosomathenda.

“Emuva kweminyaka emithathu ngiqalile ngibonile ukuthi ibhizinisi liyakhula. Likhule kakhulu sengiboleka abamathenda. Kuyenzeka ngibolekise uR50 000 obuya nenzalo ka-R20 000,” echaza.

Uveza ukuthi okusimamisa ibhizinisi yinzalo ngoba ingu-40%. Uma uboleke uR10 000 kuyena ubuyisa uR14 000.

Utshele Isolezwe ukuthi kuyajovana ukubolekisa ngemali.

“Uncamela ukubolekisa ngayo yonke onayo ngoba ucabanga inzuzo ezobuya nayo,” usho kanje.

Uthi akubona bonke abakhokha kahle ngoba abanye basheshe babuyise abayibolekile bebalekela inzalo ebuya ezinsukwini ezingu-31.

Izikhathi athi udla kahle ngazo nguNovemba noDisemba abantu sebethole amabhonasi nezitokofela. NgoJanuwari iphuma yonke sebebolekela ukuvulwa kwezikole.

Wenza njani ukuqinisekisa ukuthi uyakhokhelwa?

“Umuntu sengiyamsayinisa, ashiye nekhophi kamazisi wakhe. Uma ngingamethembi umelwa omunye oyikhasimende elidala.”

Uthi akahleki uma eseyofuna imali kwesinye isikhathi asabise nangokudla impahla endlini, agcine enezitha.

I-Micro Finance Regulatory Council kuleli ithi kuseyinkinga ukunqanda ibhizinisi lomashonisa.

Ithi okwenza bachithwe omashonisa ngukuthi bafaka inzuzo efinyelela ku-60% esikhathini esifishane futhi abayikhokhi nentela. Ukudlelwa izimoto nempahla ngokungekho emthethweni, ngezinye zezizathu ezenza le nhlangano ichithe omashonisa. Le nhlangano ithi abahola impesheni bajwayele ukuguga amaphakethe bekhokhela omashonisa.

“Ngebhadi nohulumeni uyehluleka ukuqeda omashonisa ngoba akukho nesivumelwano esisayinwayo. Uma kungekho okubhalwe phansi ngokusemthethweni, kunzima ukuthi kungenelele uhulumeni,” kusho le nhlangano.

Umthetho ophasiswe yiNational Credit Regulator (NCR) ngoJuni 1, 2005 nawo uyabagxeka omashonisa. Lo mthetho ovikela abathengi uthi akumele bakhokhiswe inzalo enkulu noma bahehwe ngezigaxa zemali ebolekisayo.

UMnuz Thami Bolani, uSihlalo weConsumer Fair, uthi uma bethola imininingwane ngomashonisa babathumela kwiNCR ukuze bashushiswe.

“Sekunesikhathi eside sikwenza lokhu futhi baningi asebeboshiwe. Abantu sebephelile bebanjelwa omazisi namakhadi asebhange. Kusanda kubanjwa omashonisa nenqwaba yamakhadi asemabhange beyokhipha izimali zabantu e-Eastern Cape,” kusho yena.

Uthe bayazama ukufundisa umphakathi ngengozi yokuzifaka komashonisa. Uveza ukuthi nawo amabhange amakhulu ayabawaka abantu ngokubaheha ngemali enkulu kanti ahlose ukufaka inzalo.

Bekungathi bathelwe ngezibonkolo abahlali basemjondolo eClare Estate, eThekwini.

NONHLANHLA MKHABELA

BEKUNGATHI bathelwe ngezibonkolo abahlali basemjondolo eClare Estate, eThekwini, izolo abamise uhlelo lokwakhiwa kwamathoyilethi bekhala ngekhansela labo abathe lihlulekile ukugcina izivumelwano abazenza nalo.

Umphakathi usola ikhansela uMnuz Themba Mtshali ngokuqasha abantu abasondelene naye ngaphandle kokuxhumana nomphakathi ngalolu hlelo lwentuthuko.

Inkampani ebizokwakha amathoyilethi iphoqeleke ukuthi ipakishe amathuluzi iphindele emuva umphakathi ushaya phansi ngonyawo uthi ngeke kwakhiwe ikhansela lingafikanga ukuzochaza ngokwenzekayo.

UMnuz Xolani Nala oyilungu lomphakathi uthe okubakhalisayo wukuthi izivumelwano ababezenze nekhansela zokuthi kuzomenyezelwa uma sekuqala ukwakhiwa ukuze kuqashwe abantu basendaweni abangasebenzi zigcine zingasafezwanga.

“Sibone sekufika abantu sebeqashiwe sekuzoqalwa umsebenzi kungazange kumenyezelwe ukuze siphakamise amagama abantu abadinga amatoho njengesivumelwano,” kusho uNala.

Uthe enye inkinga wukuthi amathoyilethi akhiwa endaweni lapho kukhona amanye amabili ekubeni kukhona imijondolo engenawo aseduzane nayo, abantu bakhona abahamba ibanga uma bedinga ukuzikhulula.

“Kwakuvunyelenwe ngokuthi kuzokwakhelwa abantu abahlala kude nalawa akhona njengoba esezokwengezwa lapha,” kukhononda uNala.

UNksz Xoli Duma oyilungu lekomiti lomphakathi uthe isizathu sokwakha eduze kwamathoyilethi amadala wukuthi indawo eyayibekelwe ukwakha amasha sekwakhiwe kuyona.

“Sasibhekile ukuthi ngabe ikhona yini indawo okuzokwakhiwa kuyona kodwa kuthe sekumele kwakhiwe kwatholakala ukuthi sekunabantu ababeke izindlu zabo kuyona yikho sithe akwakhiwe kulena ebese kuqalwa kuyona,” kuchaza uNksz Duma.

Ikhansela uMtshali lithintwa yiSolezwe lithe selixoxisene nomphakathi bazwana.

Lisole ilungu lomphakathi elilodwa ngokususa udweshu lathi leli lingu lifuna ukufeza izinhloso zalo.

“Eduze kwalapho kuzokwakhiwa khona kune-khonteyna eyisitolo, ngumnikazi walesi sitolo ongahambisani nokwakhiwa nodukise abantu wabatshela into ekungesiyona,” kusho uMtshali.

Uthe kuyiqiniso ukuthi kwakuvunyelwene ngendawo okwakuzokwakhiwa kuyona kodwa wathi akakwazi ukususa abantu asebakhe kuyona engenayo indawo azobabeka kuyona ngoba umthetho awumvumeli ukwenza lokho.

Uthe ukwakha kuzoqhubeka namhlanje ngoba bagcine bevumelene nomphakathi ngalokho.

Ikhansela laKwaGedleza, eJozini, ligxeka ukungafakwa kukagesi kwezinye izindawo ngesigameko sokusha kwezingane ezine zandawonye.

SIYABULELA DZANIBE

IKHANSELA laKwaGedleza, eJozini, ligxeka ukungafakwa kukagesi kwezinye izindawo ngesigameko sokusha kwezingane ezine zandawonye ezishe zaphelela endlini zilele kade zivalelwe wunina ngempelasonto.

UMnuz Sipho Mthembu uthe izehlakalo eziyisikhombisa zokufa kwabantu ngomlilo esezenzeke kule ndawo kulo nyaka bezingagwemeka.

Uthe umlilo udalwa amakhandlela kanye nokuqhuma kwezigubhu zegesi. UMthembu ukhuluma kanje emuva kwesigameko sokufa kwezingane zandawonye oNoxolo Mazibuko, Amkela Kwesaba, Nkosingizwile Mazibuko, noSnegugu Mazibuko.

“Imizi iyasha nabantu bayafa ngenxa yokusetshenziswa kwamakhandlela,” kusho uMthembu egxeka inkampani kagesi u-Eskom ngokufa kwabantu ewadini yakhe.

Uthe isicelo sakhe asifaka eMnyangweni wezokuThuthukiswa koMphakathi sokufakwa kukagesi endaweni saphasiswa ngonyaka wezimali ka 2012/2013 kodwa kuze kube yimanje akukho osekwenzekile.

“ingxenye engu-50% yesigodi saKwaGedleza ayinawo ugesi, sesibanike yonke imininingwane ngokufa kwabantu kwa-Eskom ngenxa yokungabi nawo ugesi. Sibatshela zonke lezi zinto kodwa akukho abakwenzayo,” kuzikhalela uMthembu.

Ngonyaka odlule kwafika ababemele u-Eskom bethula uhlelo lukagesi bathembisa ukuthi umsebenzi uzoqala ngo-Agasti 26 kodwa akukho okusenzekile.

UMthembu, okhathazekile ngokufa kwabantu ngale ndlela, uthe noma bekuqonda ukuthi ezinye zezinto zidalwa ubudedengu kodwa wathi ukube ugesi ubukhona izingane bezingeke zisebenzise amakhandlela.

“Abantu badubela ekhanseleni kube sengathi angenzi lutho. Enye inkinga wukuthi kwezinye izindawo amanzi awekho ngisho nemifula ayibonwa. Njengoba ugesi ungekho abantu bayaphoqeleka ukusebenzisa amakhandlela,” kusho uMthembu.

Indlu eshile izingane ebezilele kuyo ngeSonto ibinezigubhu ezintathu zegesi, ezimbili kungezesitofu esinye kungesefriji. Kusolwa ukuthi umlilo uqale kulezi zigubhu.

Okhulumela uMnyango wezokuThuthukiswa koMphakathi, uNksz Ncumisa Fandesi, uthe akukho ezandleni zabo ukuthi ugesi ufakwa nini kule ndawo.

Inyunyana yabasebenzi bezempilo ithi izohambisa izincwadi enkantolo ukuvimbela ukuvalwa kwesibhedlela iMcCord.

LUNGI LANGA

INYUNYANA yabasebenzi bezempilo, iNational Education, Health and Allied Workers Union (Nehawu) ithi namuhla izohambisa izincwadi enkantolo ukuvimbela ukuvalwa kwesibhedlela iMcCord esise-Overport.

UNobhala wale nyunyanya e-KZN, uMnuz Zola Saphetha uthe bazofaka incwadi enkantolo yabasebenzi namuhla ukuze balwe nokuvalwa kwesibhedlela.

“Besilindele ukuthi kube khona okuhlukile okushiwo yibhodi lesibhedlela njengoba sibathumele izincwadi kodwa akukho lutho. Sinethemba lokuthi ngoMsombuluko luyobe selungena lolu daba enkantolo,” kusho uSaphetha.

Ibhodi lesibhedlela limemezele ukuthi siyavala namuhla ngenxa yokubhuntsha kwezingxoxo phakathi kwalo noMnyango wezeMpilo KwaZulu-Natal.

Bekulindeleke ukuthi lo mnyango uthathe isibhedlela emuva kokuthi sibe nezinkinga zezimali kodwa lokhu akubange kusenzeka.

UNgqongqoshe wezeMpilo KwaZulu-Natal, uDkt Sibongiseni Dhlomo utshele ikomiti lezempilo ukuthi izingxoxo phakathi kwabo nebhodi lesibhedlela zibhuntshe ngoba ibhodi lifuna ukubadayisela ingxenyana yesibhedlela.

Uveze ukuthi babefuna ukuthi izindlu zodokotela, ezabahlengikazi, ihhovisi lomphathi nendawo yokupaka isale ngakubo uma umnyango uthenga isibhedlela.

Baphinde bathi bafuna u-R20 million ozocupha uma kwenzeka kukhona ababopha isibhedlela uhlale ngakubona. Ebuzwa ukuthi kukhona yini osekushintshile mayelana nesimo sesibhedlela, uDkt Dhlomo uthe balinde ibhodi ukuthi lishintshe umqondo ngalezi zinto ngoba basazimisele ngokusithenga isibhedlela.

Abameli bebhodi yeMcCord basanda kukhipha isitathimende besola umnyango ngokufuna ukuthenga isibhedlela ngemali encane.

UDkt Dhlomo uthe akukaze kube yinkinga ukungavumelani ngemali. “Uma singavumelani ngemali singathola abahloli bezakhiwo abazimele abashoyo ukuthi kufanele kukhishwe malini. Lokhu akukaze kube yinkinga,” kusho uDkt Dhlomo.

Uthe sebebachazelile abasebenzi ngalolu daba.

Izolo abasebenzi bahlangane emagcekeni esibhedlela ngenhloso yokuthandazela ukuthi kube noshintsho nokuthi isibhedlela singavalwa, maqede bashaya itoyi-toyi kuRidge Road.

UDkt Jay Manni ongumphathi esibhedlela obekhulumela abasebenzi, uthe abavumelani nokuvalwa kwesibhedlela.

“Siyabona ukuthi ibhodi lesibhedlela lenza izinto ezizosiza lona kuphela. Alibacabangeli abasebenzi abazosala bengenamisebenzi uma kuvalwa isibhedlela. Kubonakala ngokuthi lingafuni ukudedela umnyango uthathe isibhedlela. Kade sithule singabasebenzi kodwa manje sifuna ukuzwakalisa ukukhathazeka kwethu,” kusho uManni.

Kunezinsolo zokuthi sekukhona izinkampani ezahlukene ezizama ukuthenga isibhedlela okusolakala ukuthi zizosishintsha senze eminye imisebenzi. Amanye amahlebezi athi bona abaphathi besibhedlela bafuna ukuqhuba ikolishi elizimele bese lenza isikhungo sezempilo yingakho belilokhu lifuna kube nezindlu ezingeke zithathwa nguhulumeni.

Ebuzwa ngokuvalwa kwesibhedlela usihlalo webhodi uSolwazi Paulus Zulu ucele ukuba kukhulunywe nabameli besibhedlela.

Inyunyana yabahlengikazi iDemocratic Nursing Organisation of South Africa (Denosa) izwakalise ukukhathazeka ngalolu daba.

Izibalo zobugebengu zonyaka ka-2012/2013 zikhomba ukuthi benyukile ubugebengu obuhambisana nodlame kwelakuleli.

BAWINILE NGCOBO

IZIBALO zobugebengu zonyaka ka-2012/2013 zikhomba ukuthi benyukile ubugebengu obuhambisana nodlame kwelakuleli, okubalwa kubo ukubulala, ukuzama ukubulala, ukubamba inkunzi, ukugqekeza nokudunwa kwezimoto.

Lezi zibalo ezikhishwe nguNgqongqoshe wamaphoyisa kuzwelonke, uMnuz Nathi Mthethwa izolo ePitoli ngezaphakathi kuka-Ephreli 1, 2012 noMashi 31, 2013. Izibalo zikhomba ukuthi ukubulawa kwabantu kunyuke ngamaphesenti angu-0.6.

Lezi zibalo bezikhombisa ukwehla ngamaphesenti angu-16.6 eminyakeni emine eyedlule.

UMthethwa uthe bazosebenza kanzima ukuze baphinde behlise lezi zibalo. Izibalo zikhomba ukuthi ukuzama ukubulala kunyuke ngamaphesenti angu-6.5 ekubeni eminyakeni emine eyedlule lezi zibalo bezikhombisa ukwehla ngamaphesenti angu-16.8.

Ngokwezibalo iKwaZulu-Natal ihamba phambili ngokubulawa kwabantu abangu-3 629 ngalesi si-khathi, ilandelwe yi-Eastern Cape ngokubulawa kwabangu-3 344 kuze iGauteng ngabangu-2 997.

KwaZulu-Natal kubalulwe izimpi zezigodi, ukusetshenziswa kotshwala nokugcwala kwezibhamu ezingekho emthethweni, ukwebiwa kwemfuyo nodlame lwamatekisi njengezinye zezinto ezidala ukuthi lolu hlobo lobugebengu lwande.

Ukubamba inkunzi kunyuke ngamaphesenti angu-1.2 ekubeni kade kwehle ngangu-18.7 eminyakeni emine eyedlule.

KwaZulu-Natal kuvela ukuthi amaphesenti angu-57 alobu bugebengu enzeka emigwaqweni.

Ukugqekezwa kwemizi nakho kunyuke ngamaphesenti angu-3.3 ekubeni eminyakeni emine eyedlule kwakwehle ngephesenti.

UMthethwa uthe bakhathazekile ngalokhu kunyuka kwezibalo kodwa sebeqalile ukulubhekisisa lolu hlobo lobugebengu. Uthe okunye okwenza ukuthi lobu bugebengu bunyuke wukuthi kunobudedengu kwabanye abanini-mizi. “Sinxusa abanikazi bemizi ukuthi baqaphele ikakhulukazi ngesikhathi samaholide kaKhisimusi,” kusho uMthethwa.

Ukudunwa kwezimoto kwenyuke ngamaphesenti angu-5.4, ukudunwa kwamaloli kwenyuka ngawu-14.9 kwathi ubugebengu obuhlobene nezidakamizwa banyuka ngamaphesenti angu-13.5.

Ezinye izinhlobo zobugebengu ezinyukile:

n Ukugqekeza ezindaweni ezingahlali bantu kweyuke ngamaphesentu angu-1.7

n Ukweba emotweni kwenyuke ngamaphesenti angu-3.6

n Amacala ahlanganisa imali anyuke ngamaphesenti angu-0.6

n Ukushayela udakiwe noma udle izidakamizwa kwenyuke ngamaphesenti angu-1.5.

Yize indodakazi yakhe yadlwengulwa yabulawa kodwa uyise wayo uthi ukungaboshwa kwabasolwa ngalesi senzo kudala ukuthi kungadluli kuye.

BAWINILE NGCOBO

YIZE indodakazi yakhe eneminyaka eyisishiyagalombili yadlwengulwa yabulawa ekuqaleni kwalo nyaka eMlazi kodwa uyise wayo uthi ukungaboshwa kwabasolwa ngalesi senzo kudala ukuthi kungadluli kuye

UNonjabulo Sabela (8) owayefunda eMzwilili Senior Primary isidumbu sakhe satholwa eduze kwalesi sikole ngoFebhuwari 28 nonyaka okuyisikhathi esingena ngaphansi kwalesi sezibalo zobugebengu ebezikhishwa izolo.

UMnuz Hawula Khuzwayo, uyise wale ntombazane, ekhuluma neSolezwe emuva kokuphuma kwalezi zibalo zonyaka ka-2012/2013, uthe noma zingakhomba ukuthi kwehlile ukudlwengula kuleli yena ukholwa ngukuthi uma abantu abenza izigameko zobugebengu bengaboshwa izehlakalo ezifuze esehlela indodakazi yakhe ziyohlale zenzeka.

“Kuze kube yimanje sisahleli ebumnyameni ngokuthi ngubani owenza le nto enganeni yami. Ngiyakholwa ngukuthi ukube uyabanjwa ngabe kunqandeka nezinye izigameko ngoba ukungabanjwa kwakhe kuyamgqugquzela ukuthi aqhubeke nokwenza ubugebengu futhi nabanye bazobona ukuthi akabanjwa nabo babenze ubugebengu,” kusho uKhuzwayo.

Uthe ibaphethe kabi indaba yokungabanjwa komuntu osolwa ngokubulala indodakazi yakhe.

“Angazi ngomsebenzi wamaphoyisa noma yingoba kungazanywa ngokweqile ukuba abanjwe. Sizohlala ethembeni lokuthi ngelinye ilanga bayobanjwa,” kusho uKhuzwayo.

Uthe unesiqiniseko sokuthi umuntu owenza le nto akekho kude ukhona eduze futhi kungenzeka ukuthi kukhona abantu abanalo ulwazi ngaye kodwa abangeke baze bakhulume ngoba akukenzeki kubo.

“Umuntu ulindela ukuthi into ize yenzeke kuye ngaphambi kokuthi akhulume kusizakale nawe okade wehlelwa yisehlo,” kusho uKhuzwayo.

Uthe ukudlwengulwa nokubulawa kwendodakazi yakhe eyayiphuma esikoleni eyaqale yaduka isonto lonke ngaphambi kokuthi isidumbu sayo sitholakale ngasesikoleni akasoze akukhohlwa.

“Unina ukhala mihla namalanga ngoba nje akekho umuntu owajeza ngalesi sigameko. Uma ngihleli emnyango uma ngibona izingane zesikole zidlula kuvele kube sengathi naye uzoqhamuka,” kusho uKhuzwayo.

Udaba lukaNonjabulo lwaba ngundabuzekwayo abantu bebabaza isihluku esenziwa ebulawa kwaze kwaba nezinhlelo zokubhusha eduze kwesikole ngoba isidumbu sakhe satholwa sisesikhotheni eduze nesikole.

Umengameli we-IFP unxuse isizwe samaZulu ukuba sihlale sibumbene ngenhloso yokuhlonipha iSilo uShaka kaSenzangakhona.

MLUNGISI GUMEDE

UMENGAMELI we-IFP, iNkosi Mangosuthu Buthelezi, unxuse isizwe samaZulu ukuba sihlale sibumbene ngenhloso yokuhlonipha iSilo uShaka kaSenzangakhona.

Ekhuluma emkhosini weLembe kwaDukuza ngoMgqibelo, uButhelezi uthe amaZulu kumele azinuke amakhwapha azibheke ukuthi enza okufanele ukuvikela ifa elinonile elashiywa yiLembe.

“Kufanele sizibuze ukuthi ngabe uma sibheka efeni lomlando wethu weminyaka engu-200 ezayo kungabe senza konke yini esinokukwenza nakho konke okufanele sikwenze, ukuvikela leli fa lomlando? Lokhu kusho okungaphezulu kunokuba sihlangane ngale ndlela ukuzogubha uMkhosi weLembe. Lokhu kumayelana nokuthi kufanele sigcine ubunye besizwe sakithi bukhona njalo ngoba kungumcebo wefa lethu elinone kunawo wonke. Isilo iLembe sahlanganisa izizwe ezazihlukene, sakha ubunye. Ingozi enkulu kunazo zonke engenzeka ngobunye bethu namhlanje wukuvumela izimfa noqhekeko ukuba zingene phakathi kwethu,” usho kanje.

UButhelezi uthe isizwe samaZulu kumele siziqhenye ngesiyikho njengoba sihlonishwa ngisho emhlabeni-jikelele.

“Kungenxa yefa lomlando weSilo iLembe okwenza ukuba iSizwe samaZulu saziwe njengesizwe esiziqhenyayo nesizwe esinamandla. Kungenxa yefa lomlando weSilo iLembe ukuthi sanqoba impi esayilwa namabutho amaNgisi empini yaseSandlwana,” usho kanje.

Sithula inkulumo kulo mkhosi iSilo, sizwakalise ukungenami ngendlela okuhlelwa ngayo imikhosi yaso sathi abenze le misebenzi sebeqala ukungayihloniphi indlunkulu.

Sithe siyabona ukuthi uhulumeni uyehluleka wukumelena nokuseka ngenkece imikhosi yaso sanxusa ukuthi abantu banikele ngo-R5 ukuze kuhlangatshezwe uhulumeni.

“Ngokunikhiphisa le mali akusho ukuthi ngiyanithelisa kodwa ngifuna ukwenza isiqiniseko sokuthi imikhosi yethu iyaqhubeka nokuba khona ngoba ngiyabona ukuthi kunengcuphe yokuthi ishabalale,” sisho kanje.

Bebephume cishe bonke abaculi noDJ baseThekwini ukuyovalelisa okokugcina kuDJ Deep.

FANELESIBONGE BENGU

BEBEPHUME cishe bonke abaculi noDJ baseThekwini ukuyovalelisa okokugcina kuDJ Deep odlule emhlabeni emasontweni amabili edlule ngemuva lokuhlaselwa yiphika.

UMxolisi “DJ Deep” Xulu (29), obedume emakilabhini aseThekwini, ufihlwe izolo emathuneni aseTafuleni, eNanda, ngemuva kwenkonzo ebisehholo kwa-L KwaMashu. Iningi lezikhulumi libabaze inhlonipho kaDeep nothando abenalo lokudijeya.

“Sisebenzisane kahle kakhulu noDJ Deep. Inhlonipho yakhe ibiyenza kube lula nothando lomculo abenalo,” kusho uDJ Sox.

Phakathi kwabaculi noDJ abebekhona kubalwa kubo uDJ Cebo waseRichards Bay nongumhleli woMgido Music Festival ozoba ngoMgqibeko eBay, T’zozo, DJ Cndo, Bongz, Gukwa, Fisherman, DJ Mpilo, Dulaz, Merlon, Oros, Nzwiri nabanye abaningi.

Ngemuva kokudlula emhlabeni kukaDeep, bekunemicimbi eminingi yokumkhumbula emakilabhini.

EPlush ngoLwesine bekunomunye obuhlelwe nguPaul Mdiniso kanti naseRichards Bay bekuneminye.

UDJ Deep udlule emhlabeni esanda kukhipha i-albhamu yakhe yesibili iMusical Journey Volume 2 enengoma I’ve Got Your Back okucula kuyo uChappel nethi Music okucula kuyo uSK. Ushiye emhlabeni abafowabo abathathu nodadewabo ababili nezingane zakhe ezimbili. Emngcwabeni bekugcwele amalungu e-ANC nokuvele ukuthi wangena kwi-ANCYL ngo-1999.

Umengameli weCosatu uthe ukulungele ukufa kunokuthi avumele umfelandawonye wezinyunyana udlale abathile abafuna ukufeza izinhloso zabo zezepolitiki.

MLUNGISI GUMEDE

UMENGAMELI weCosatu uMnuz Sdumo Dlamini uthe ukulungele ukufa kunokuthi avumele umfelandawonye wezinyunyana udlale abathile abafuna ukufeza izinhloso zabo zezepolitiki.

Ekhuluma embuthanweni obekukhunjulwa kuwo umholi weSACP osashona, uMnuz Smiso Nkwanyana, enkundleni yezemidlalo eFolweni, izolo, uDlamini obezwakala ngisho ekhuluma ukuthi akaneme uthe ngeke avumele ukuthengwa adayise ngomzabalazo.

UDlamini uthe uyabona ukuthi kukhona abasebenzisa abathile kuCosatu ngenhloso yokulimaza i-ANC njengoba kuyiwa okhethweni ngonyaka ozayo.

“Ngikhuluma nje kukhona abasikaza ukuphuma kwiCosatu, uma bephuma kumfelandawonye kuzosizakala umqashi ngoba phela bamele abasebenzi. Abaqashi bayazi ukuthi umgogodla we-ANC ngabasebenzi, yingakho sebethi abawunqamule lowo mgogodla ukuze bashaye i-ANC,” kusho uDlamini.

Uphinde wathi akagaqele sikhundla ePhalamende ngokumisa uNobhala weCosatu uMnuz Zwelinzima Vavi.

UDlamini uqhube wathi kabanazo izinhlelo njengeCosatu zokushiya i-ANC wengeza ngokuthi abakuphuphi lokho ngisho belele.

“Kumanje kukhona abakhuluma ngokuthi kumele kube nengqungquthela ephuthumayo. UMengameli weCosatu akaphikisani nalokho kodwa asikhumbule ukuthi ukuba nayo akuthathi imali engaphansi kuka-R12 million. Ngisho umuntu angathi uzosinika imali yokuthi siyisingathe kodwa sizobheka ukuthi uyithathephi,” usho kanje.

UDlamini uthe abantu kumele bakwamukele ukwakhiwa uma benze amaphutha.

Unxuse i-ANC neSACP ukuba beseke iCosatu kulesi sikhathi esinzima ebhekene naso, wathi lesi simo kumele sibe yisifundo kumfelandawonye wabo.

UNobhala-jikelele weSACP, uDkt Blade Nzimande, uhambe emazwini kaDlamini wathi abafuna ukuhamba kuCosatu abahambe.

UNzimande uthe izinkinga zeCosatu zigqugquzelwa yinkohla-kalo yabathile abaphendula umfelandawonye umbuso wabo.

Uphinde wachitha imibiko ethi iSACP iyona exova iCosatu.

UMnuz Sihle Zikalala onguNobhala we-ANC esifundazweni uxwayise abasebenzi wathi abayeke ukulandela abantu abathile kumfelandawonye.

Uthe kumele benze isiqiniseko sokuthi iCosatu ihlala ibumbene ngoba ukuhlukana kwayo kungalimaza ukusebenza komfelandawonye wabo.

USsakhungathekile umndeni wowesilisa wase-Adams otholakale elenga esihlahleni emuva kokuvakashela ekhweni.

LUNGI LANGA

USAKHUNGATHEKILE umndeni wowesilisa (27) wase-Adams otholakale elenga esihlahleni emuva kokuvakashela ekhweni.

Umndeni kaMnuz Lucky Khuzwayo uthe ufuna izimpendulo ngokufa kwakhe emuva kokuthi etholakale endaweni eyihlathi ezilengisile.

Kuthiwa ubehambe eyobheka ingoduso yakhe, uNksz Sindiswa Ngidi (21), ebingaphilile.

Kunezinsolo zokuthi baxabene bebanga izingcingo ebizithola okusolwa ukuthi bezivela kwelinye isoka ebese lizomlobola.

Umfowabo omncane, uMnu Siyabonga Khuzwayo (22) uthe bathole ucingo ngoLwesihlanu lubika ngokushona komfowabo.

“Umfowethu ubehlala eMashiwase eduze kwasekhweni lakhe ngoba ubesebenzela khona. Uye engodusweni yakhe eyihambisele amaphilisi ngoba kuthiwa ayiphilile. Thina sizwe sekuthiwa ushonile ngempela samfica elenga esihlahleni esigangeni esingekude nakamakoti,” kusho uKhuzwayo.

Uthe okubaxakile wukuthi uLucky ubegcwele udaka futhi egqoke izingubo okungezona ezakhe.

Ngokusho kwakhe izingubo zomfowabo zitholakale egumbini lezivakashi kwamakoti wakhe okubenze baxwaya.

“Izimpahla zakhe bezihleli endlini yezivakashi nezicathulo zakhe zingekho. Okwakhe abekugqokile bekuyi-vest. Kodwa okuvele kwangasiphatha kahle neze kube ngamazwi akhulunywe ngumkhwe wakhe. Umkhwe wakhe uthe wenze kahle wazibulala ngoba ngabe ubulawe nguye uqobo,” kusho uKhuzwayo.

Uthe uqhubeke waveza ukuthi umbonile umfowabo elenga ngezikhathi zehora lesibili ekuseni kodwa wangatshela muntu ngisho indodakazi yakhe imbala.

Umfowabo uze wabonwa yizingane zesikole ekuseni okuyizo ezitshele abadala.

UKhuzwayo uthe batshelwe yingoduso kaLucky ukuthi baxabene nokuthi uzame nokumklinya ngaphambi kokuzibulala kepha akucaci ukuthi uzibulaleleni.

UKhuzwayo uthe batshelwe nokuthi uLucky ubazi ukuthi ingoduso yakhe izolotsholwa ngomunye umuntu.

Okhulumela amaphoyisa KwaZulu-Natal, uCol Jay Naicker, usiqinisekisile isigameko sokutholakala kwakhe elenga esihlahleni.

Ethintwa mayelana nodaba uNksz Ngidi ubuze ukuthi wubani obaxhumanise nephephandaba wathi ufuna ukukhuluma nabakwaKhuzwayo kuqala ngaphambi kokuthi aphawule.

Esethintwa okwesibili uthe abakwaKhuzwayo bathe abazi lutho ngalolu daba wacelwa ukungabe esathintwa mayelana nalo.

Akhishiwe emgwaqweni amaloli amathathu enkampani esanda kungena obishini emuva kokuthi iloli layo ibulale abawu-23.

ZANELE MSOMI

Akhishiwe emgwaqweni amaloli amathathu izolo enkampani esanda kungena obishini emuva kokuthi iloli layo ibulale abawu-23 engozini eyenzeke kuField’s Hill, ePinetown.

Lokhu kushiwo nguMnuz Kwanele Ncalane okhulumela uNgqongqoshe wezokuThutha nokuPhepha koMphakathi uMnuz Willies Mchunu, emuva kokuba kuthunyelwe ithimba iPublic Transport Enforcement ukuyohlola amaloli ale nkampani izolo. Inkampani yamaloli yasePhoenix, i-Segakal Logistics ingundabamlonyeni kulezi zinsuku njengoba necala likaMnuz Sanele May (23), obengumshayeli weloli elidale isibhicongo sengozi liqhubeka enkantolo yasePinetown.

Emuva kokuboshwa kukaMay odabuka eSwazini, kutholakale ukuthi iloli abelishayela elibulale abantu lalingekho esimeni futhi nezincwadi zakhe zemvume yokusebenza bese ziphelelwe yisikhathi.

UNcalane obekhona ethimbeni ebeliyohlola amaloli enkampani iSegakal Logistics izolo, uthe bahlole amaloli ayisithupha bathola ukuthi amathathu anenkinga yamabhuleki. Amanye amathathu nawo abekwe atholakale kukhona okungekho esimweni kuwona kodwa azoqhubeka asebenze.

Uthe ukuhlola bayawahlola ngisho amabhasi nezinye izimoto ezithutha umphakathi uma sekutholakale amaphutha angaphezu kwelilodwa kuleyo nkampani.

Utshele Isolezwe ukuthi okwenze

bagasele emagcekeni ale nkampani wukuthi ngoLwesine kubanjwe enye iloli yayo ethutha izimpahla kwatholakala ukuthi alikho esimeni sokuba semgwaqweni.

“Siyile emagcekeni enkampani

saqala sahlola amaloli ngokuwabuka, sibheka ukuthi ama-disc ayahambelana yini nezinombolo zemoto nokunye.

Ngenxa yokuthi bekukhona okusolisayo ngamaloli, siphoqeleke ukuthi siwathathe ayohlolwa kabanzi endaweni okuhlolwa kuyo eMdloti,” echaza.

Uthe bamficile nomnikazi wenkampani uMnuz Gregory Govender athi ubesebenzisana nabo kulo msebenzi.

Nokho uthe ummeli wakhe uqale waba nenkinga enemibuzo eminingi, engaqondi ukuthi kungani befuna ukuhlola amaloli enkampani.

Uveze ukuthi abaphathi benkampani bayalelwe ukuthi balungise amaloli amisiwe azophinde ahlolwe kabusha. Uma konke sekulungile noMnyango waneliseka ayobuyiselwa emgwaqweni.

Uthe amaloli amisiwe bawakhiphe ngisho ama-disc ngoba akumele neze ngabe abehamba emgwaqweni ngenxa yesimo akuso.

“Besingeke sisonge izandla singenzi lutho emuva kwesigameko sangoLwesine, yingakho sinqume ukuzozihlolela le nkampani.

“Njengoba kuzoqala u-Okthoba okuyinyanga yezokuthutha, sizoyiqinisa kakhulu imithetho ukuze kunciphe izingozi. Ukuhlola izimoto zokuthutha umphakathi kuzoqiniswa kulo mkhankaso,” kusho uNcalane.

Konke sekumi ngomumo ngamalungiselelo omcimbi wokugubha usuku lokuzalwa lwengqalabutho ye-ANC.

MLUNGISI GUMEDE

KONKE sekumi ngomumo ngamalungiselelo omcimbi wokugubha usuku lokuzalwa lwengqalabutho ye-ANC, uNkk Winnie Madikizela-Mandela, ozoba seCoastlands Convention Centre eMhlanga, eThekwini, kusasa.

UNkk Madikizela-Mandela uzogubha usuku lwakhe lokuzalwa nabantu abadala abaphuma ezikhungweni ezihlukene.

Lo mcimbi kulindeleke ukuthi uphinde uhanjelwe ngomntakabani abavela emikhakheni eyehlukene.

UNkk Madikizela-Mandela uzobe ehlanganisa iminyaka engu-77 azalwa kanti naye umeme abantu abadala abangu-77.

UMnuz Kevin Joseph, ozichaze njengomngani womndeni wakwaMandela, uthe konke sekumi ngomumo mayelana namalungiselelo omcimbi.

UJoseph uthe balindele abangani abadala baNkk Madikizela-Mandela, osomabhizinisi nosopolitiki abehlukene.

“Silindele ngisho abaculi abahlonishwayo ukuthi bazonandisa kulo mcimbi wokubungaza usuku lokuzalwa lukamama,” usho kanje.

UJoseph unqabile ukudalula ukuthi yimalini esetshenzisiwe ukuhlela lo mcimbi, ngaphandle kokuthi basizwe kakhulu ngabaxhasi.

“Baningi abantu abafake igxalaba ndlelathize engingeke ngize ngikwazi ukudalula amagama abo ngoba kusenezinhlelo eziqhubekayo ezingakaqedwa mayelana namalungiselelo,” usho kanje.

UNkk Madikizela-Mandela uzobuya okwesibili eThekwini esikhathini esingaphansi kwamasonto amathathu njengoba kade ekhona ezokwethula incwadi ekhuluma ngaye ngesikhathi esejele ngeminyaka yobandlululo.

Ukhathazekile ngendodakazi yakhe athi ayiphilile kahle ekhanda eyaduka eminyakeni emithathu eyedlule owesifazane waKwaMashu.

NONHLANHLA MKHABELA

Ukhathazekile ngendodakazi yakhe athi ayiphilile kahle ekhanda eyaduka eminyakeni emithathu eyedlule owesifazane waKwaMashu othi usetshelwe ukuthi idayisa ngomzimba nangezidakamizwa emgwaqweni uMahatma Gandhi, eThekwini.

UNksz Winnie Zwane uthe indodakazi yakhe uNksz Simangele Zwane (23) yaduka ngoFebhuwari 2009 ihambe nabangani bayo.

Uthe emasontweni ambalwa edlule uthole ucingo luphuma kumuntu wesilisa ongazange afune ukuzisho ukuthi ungubani othe unolwazi lokuthi ukuphi uSmangele.

“Uthe uke abonakale ngasechwebeni edayisa ngomzimba nangezidakamizwa futhi kukhona isakhiwo esithile okukhona kuso indawo yobumnandi ake ambona esebenzela kusona nasola ukuthi uphoqwa ngabantu bakhona ukuthi adayise ngomzimba,” kusho uNkk Zwane.

Uthe uSimangele wayehola imali yesibonelelo yokungaphili kahle ekhanda kanti kuyamkhathaza ukuthi usengaqwayiza engaphilile.

Udadewabo kaSmangele, uNkk Mpho Zwane, obehlala noSimangele njengoba unina ehlala lapho esebenza khona eDurban North uthe owesilisa owabashayela ucingo wathi mabahlangane esitolo esidayisa amakhamera ukuze bathenge ikhamera baye nayo kule ndawo athi wabona kuyona uSimangele.

Uthe wathi uzobuye abathinte wabanikeza nesikhathi azobathinta ngaso baya emaphoyiseni ukuze bakhulume naye phambi kwawo.

“Washaya ucingo sakhuluma naye phambi kwawo amaphoyisa asitshela ukuthi asingayi ukuyohlangana naye kodwa asimdobe ukuthi akaye kuleso sitolo akhuluma ngaso wona azobe esembamba khona kodwa wagcina engasabuyelanga kithina nemininingwane,” kuchaza uMpho.

Uthe elinye iphoyisa abelibasiza asesiteshini saKwaMashu labashayela ucingo labuza ukuthi useke waphinda wabathinta yini lo mlisa obebathintile bamtshela ukuthi bekusathule kwaphelela lapho.

Lithintwa leli phoyisa elingeke lidalulwe ngoba aligunyaziwe ukukhuluma nabezindaba lithe bafika esiteshini samaphoyisa abakwaZwane bezofuna usizo lababhekela ukuthi kukhona yini okuke kwavela ngokuduka kukaSimangele kodwa lathola ukuthi alikho ifayela labalahlekile elavulwa.

“Ngabeluleka ngokuthi ake baqale phansi bavule ifayela ukuze kube lula )nokuthi amaphoyisa angenelele ngokushesha uma kukhona ulwazi olusha oluqhamukayo kodwa ababange besabuya,” kusho leli phoyisa.