Le nkantolo yayithe owayeyiNhloko yophiko lwezokuShushiswa koMphakathi u-Adv Mukotedi Mpshe waphaphalaza ngesikhathi ehoxisa amacala awu-783 enkohlakalo ayebhekene noZuma. Njengamanje wonke amehlo asethe njo ophikweni lwezokuShushiswa koMphakathi ukuthi luzothatha siphi isinqumo ngalokhu.

IDemocratic Alliance, okuyiyo eyafaka lolu daba enkantolo, isamukele isinqumo senkantolo sayizolo yase inxusa ukuthi uZuma aphinde abekwe la macala ayehoxisiwe.

Umholi waleli qembu uMnuz Mmusi Maimane uthe lesi sinqumo siwukunqoba, yingakho iqembu lakhe lizocindezela uphiko lwezokushushisa ukuthi luwavuse amacala.

“Ngizobhalela iNational Director of Public Prosecutions, * -Adv Shaun Abrahams, ngigcizelela ukuthi uMnuz Jacob Zumaabekwe amacala avele enkantolo ngokukhulu ukushesha,” kusho uMaimane.

Ne-United Democratic Movement (UDM) inxuse ukuthi uZuma abhekana namacala enkohlakalo eyebekwe wona phambilini.

“UMengameli Zuma kumele ayophendula enkantolo ngamacala abekwa wona,” kusho umengameli waleli qembu uMnuz Bantu Holomisa.

I-EFF yona ithe kuzomele i-NPA ibuyise isithunzi sayo ngokuthi ibeke uZuma amacala.

Leli qembu liphinde lagcizelela ngokuthi uZuma kumele ashenxe esikhundleni sokuba wumengameli wezwe. -ANA

KUDLA lubi ukuqwayiza kwiFacebook, ngenxa yamakhasi ocansi alandelwa ngabantu abalinganiselwa ku-33 000 agqugquzela lo mkhuba nokwenziwa kocansi udede, kwesinye isikhathi olungaphephile.

Kuleli khasi elinolimi oluqosheme, lilandelwa ngabesilisa nabesifazane abacelana ucansi esidlangalaleni.

Babodwa abalucela bathembise ukulukhokhela, noma bafune ukukhokhelwa imali kusukela ku-R100 kuya phezulu, kuvunyelwane.

Uma sekuhlangenwe kuthiwa lwenziwa baze bathumele izithombe kuleli khasi njengobufakazi kwabebehlangene.

Kunanezithombe Isolezwe ngeSonto elinazo, indoda iqhethe nabesifazane ababili abayiphahlile bezisonge ngeshidi bephuza ezikaFaro bethi basehhotela.

Ngokusho komunye osenesikhathi ekulona, kubuye kwenziwe iqhinga lokuthi kuhlanganwe mhlawumbe kube ngabantu abayishumi kuyiwe ehhotela kuyoqhathwa izilwane.

“Lapho ulala nomuntu omhalelayo nizitike ngocansi. Kwesinye isikhathi izingcingo azivunyelwa uma kwenziwa ucansi ngokwamaqembu,” kusho okuleli khasi ongathandanga negama lakhe.

Esikhathini esiningi uma kukhulunywa ngalo msebenzi wokuhweba ngesinene, abantu babona ngamehlo engqondo umuntu olinda amakhasimende emgwaqeni, kodwa muva nje abenza lo msebenzi sebezitholela kalula abazothenga ngokucofa ucingo lwabo bangene kuFacebook.

Inhlangano engenzi nzuzo, iSiphila Ngomusa, eholwa nguNomvula Shale, yenze ucwaningo ngokwenzeka kuleli khasi elingundaba mlonyeni.

Uthe akubonile kumshiye ebambe ongezansi ngokwanda komahosha.

“Namanje ngisashaqekile ngengikubonile. Ngemuva kweminyaka engu-17 silwa, sizama ukufundisa nokuqwashisa ngezifo ezithelelanayo ngokocansi njengeHIV/Aids, kubukeka sengathi wonke lowo msebenzi unyathelwa ngezinyawo,” kusho uNomvula.

Uthe ngelinye ilanga ekuleli khasi uze wanikwa iseluleko ngomunye wesifazane ngokuthi naye akadayise umzimba emadodeni akuleli khasi.

“Wathi yena wenza imali elinganiselwa ku-R2 000 ngosuku, ngoba uvele abhukhe ehhotela, maqede angene kule nkundla acele abesilisa azolala nabo ngemali ebhekile,” kusho uNomvula.

Uthe lokhu kwamkhombisa ukuthi abantu abakafundiseki ngeHIV/Aids nezinye izifo ezithathelana ngocansi.

Ukusho lokhu ngoba uthi zimbalwa izikhathi lapho kukhulunywa khona ngokuzivikela.

Usole ukushoda kwemisebenzi, ukungafundiseki kwabantu ngezifo nokuganga kulaba abazinikele kulolu cansi.

Abasebenzi baphume entathakusa izolo emgodini abese behlale kuwo kusukela ngoLwesibili.

NgoLwesibili bekuwusuku lokuqala bebuyele emsebenzini ngemuva kwesiteleka sesonto esimiswe okwesikhashana ukuze inkantolo ibheke isivumelwano esasenziwe abaqashi baphambilini ngalokhu abakhala ngakho.

Inyunyana yabo, iNational Union of Mineworkers (NUM) yathatha isinqumo sokuthi abasebenzi ababuyele emsebenzini ngoLwesibili ngoba umqashi ethi uzoya enkantolo ngemuva kokuthi iCCMA (exazulula izindaba zabasebenzi nabaqashi) yehlulekile ukuphuma nesinqumo sokuthi ngabe umqashi kufanele yini ayikhokhe imali abasebenzi ababevumelene ngayo nomqashi waphambilini ngo-2005.

Umqashi omusha, iManor Holdings, kuthiwa uthenge imayini ngo-2015. Izingxoxo phakathi kwakhe neNUM ngalolu daba zifinyelele kwangqi-ngetshe ekuqaleni kwale nyanga. Abasebenzi bateleka ngokungemthetho.

UMnuz Musa Nkabinde wale nyunyana uthe beyinyunyana bebefuna umqashi aqhubeke ahlomulise abasebenzi njalo ngemuva kweminyaka emihlanu bekule nkampani njengoba babevumelene nomqashi waphambilini.

“Umqashi omusha wathi yena akaboni ukuthi yini engamenza ahlomulise abasebenzi elandela lesi sivumelwano. KwaCCMA abakwazanga ukukhomba ukuthi ngubani okhuluma iqiniso ngalolu daba. Umqashi ube esekhuluma eyokuya enkantolo, sabona ukuthi asibuye sizosebenza kusalindwe ukuthi lolu daba lukhulunywe,” kusho uNkabinde.

NgoLwesibili uthe abasebenzi abangene kuqala emgodini abazange baphume, nabesibili benza okufanayo kwagcina sekunamathimba amathathu asemgodini kanti bebethi abaphumi emgodini umqashi engalulungisile lolu daba.

“Ngeshwa lokhu okwenzekile bese kungavikelekile futhi bekungasewona kuphela amalungu ethu abetelekile bese kungabasebenzi abangu-153. Kwale sesibancenga sithi abaphume kuxoxwe. Bebenolaka bethi bazimele kulo mgodi abayona iNUM. Zayima emthumeni nakithina,” kusho uNkabinde.

Uthe umqashi ubelokhu ebasabisa ngokubaxosha bonke abasebenzi abazibandakanye kulesi senzo. Entathakusa izolo ushintshile wathi ngeke baxoshwe uzobashaya ngoswazi oluncane ngokuphazamisa umsebenzi.

“Kuvunyelwane ngokuthi isigwebo esikhulu esingatholwa umsebenzi obeqhinqile kungaba yincwadi yokugcina yesexwayiso. Namhlanje silindele ukuthi abasebenzi babuyele emsebenzini,” kusho uNkabinde.

Imizamo yokuthola umqashi ukuze aphawule ngalolu daba ayiphumelelanga ngoba ucingo lwasehhovisi belungabanjwa nenombolo yeselula igcine ingatholakalanga.

Ekhuluma emcimbini wokugubha impilo yengqalabutho ye-SACP engasekho, uMnuz Moses Mabhida, enkundleni yezemidlalo eCurries Fountain eThekwini izolo, uRamaphosa uthe ibaphatha kabi indaba yokubulawa kwamaqabane eKZN ngoba idala ukuthi lungabikhona uzinzo ezweni lonke.

“Siyazibuza siyaziphendula ukuthi ngabe lokhu kubulalana kudalwa yini, ngabe yinto engaphakathi enhlanganweni noma isuka ngaphandle,” kusho uRamaphosa.

Uthe banethemba lokuthi iKhomishini ephenya ngokubulawa kwabantu izophuma nesisombululo.

“IKZN phambilini ibiyithemba le-ANC kwaziwa ukuthi yisona sifundazwe esibumbene kunazo zonke kodwa lokhu kuphele konke ngo-2015, isifundazwe sanhlakanhlaka,” kusho uRamaphosa.

Uphinde wanxusa ukuthi kube nobumbano kumadlelandawonye ukuze akwazi ukusebenzela abantu bakuleli.

Uthe uma ubumbano lungekho kumadlelandawonye, i-ANC ngeke ikwazi ukuxazulula izinkinga ezibhekene nabantu bakuleli okubalwa kuzo ububha, ukuntuleka kwamathuba emisebenzi nokungalingani.

IPhini likaMengameli weCosatu, uNksz Zingisa Losi, lisivikele isinqumo sabo sokuphakamisa uRamaphosa kulabo abathi bakhetha ungxiwankulu wathi uRamaphosa wajutshwa ngumbutho emabhizinisini.

“Siyezwa kukhona abathi sifuna kuphathe ungxiwankulu, sebekhohliwe ukuthi uRamaphosa nabanye osomabhizinisi abafana noMnuz Saki Macozoma ukuthi bathunywa wuKhongolose ukuba bangene emabhizinisi khona bezokwazi ukusiza inhlangano ngezimali,” kusho uNksz Losi. Uthe uma kuphatha uRamaphosa abatshalizimali bangaphandle bazobuya bazofaka imali lapha eNingizimu Afrika kudaleke amathuba omsebenzi.

UNobhala we-Young Communist League kuzwelonke, uMnuz Mluleki Dlelanga, uthe njengoba kuyiwa engqungqutheleni kaDisemba amalungu e-ANC akumele akhethe abaholi abazovumela umndeni wakwaGupta uchachaze emakhanda abo.

Uthe bona abasoze bakhetha abaholi abazodayisa ngomzabalazo. “Siyazi ukuthi sizojeza kanzima ngokuphumela obala sithi kasihambisani nenkohlakalo nokulawulwa kombuso yidlanzana.”

Amalungu e-ANC eKZN abephume ngezinkani kulo mcimbi kaRamaphosa egqoke izikibha ezibhalwe ukuthi CR17 #Siyavuma.

Kuthiwa abahlala kule mijondolo bathe babonwa yini ngesikhathi iloli liphaphalaza lishayisa imijondolo yabo. Abazange bazikhathaze ngokubheka ukuthi kukhona yini olimele ngesikhathi iloli lishayisa imijondolo emine ebiseduze komgwaqo. Bagijime namabhakede bavula ompompi bathela ‘iwayini ‘ baya kophuza.

UNkk Andiswa Zungula ongomunye wababe neshwa lokushayiswa komjondolo wakhe yiloli, uthe ubeye esontweni iloli ishayisa umjondolo wakhe.

“Akubange kusaba khona nomuntu ongichazelayo ukuthi kwenzekeni ngoba abantu bebegijima namabhakede, bekha ‘iwayini’,” kusho uNkk Zungula.

Iloli kuthiwa iphaphalaze ngezikhathi zasekuseni kodwa lize lashona umphakathi ugijima namabhakede.

“Abebetapa ‘iwayini’ ngisola ukuthi bangene nasendlini ngoba kunezinto engingaziboni, ngaphandle kwalezi ezigxotshwe yiloli,” kusho yena.

Okhulumela amaphoyisa KwaZulu-Natal uLt Col Thulani Zwane, uthe alikho icala elivuliwe ngalesi sigameko kodwa bawutholile umbiko wokuthi iloli liphazamisekile laphaphalaza emgwaqweni.

UDkt Nondumiso Shange waseDurdoc Centre uthe i-apple cider vinegar isetshenziselwa ukuhlanza umzimba (detox). Isikali esivumelekile yi-tea spoon kuya esipunwini esihlanganiswa nengilazi yamanzi.

“Uma kungenzeka ukuthi umuntu ayiphuze kakhulu angagcwala i-acid esiswini, okungaholela ekutheni isisu sihlambuluke noma abe nokungakhululeki. Angalimala namazinyo noma izinsini uma eyiphuza ingaxutshiwe namanzi,” kusho uDkt Shange.

Uthe abayiphuzile kumele baphuze kakhulu amanzi noma baphuthume ezikhungweni zezempilo.

Kwenye ingozi eyehlukile, kulimale ababili abebeyokwemulisa. Kuphaphalaze itekisi abebehamba ngayo eDududu. Abesifazane bakwaGumede eNewlands West kuthiwa bebephuma kolanda umkhonto koninalume kwenzeka ingozi ngoMgqibelo.

UNolwazi Gumede (21) noNothando (25) ebebezokwemula nodadewabo uNonkululeko balaliswe esibhedlela kwagcina kumule uNonkululeko yedwa.

Udadewabo uNonkululeko uthe odadewabo nabangani bebeye, eMkhunya, eMkhomazi, koninalume beyolanda umkhonto.

Yena umkhonto uwulande emzini wakhe ngoba useganile.

“Besilokhu sixhumana ngocingo ngoba bekuhlelwe ukuthi sizophumela esigcawini ngo-1 emini. Ngibe nenkinga ngingasabatholi kanti sebelimele engozini yemoto,” kusho yena.

Abanye abebehamba nabo bathole imihuzuko.

Uthe akathandi ukuchaza ukuthi itekisi iphazanyiswe yini emgwaqweni ngoba akazi futhi akanalo ulwazi noma amaphoyisa azisiwe yini ngalesi sigameko.

ULt Col Zwane uthe ayikho ingozi yemoto ebikiwe kule ndawo.

UMengameli Jacob Zuma kungenzeka agcine ethathelwe izinyathelo zomthetho ngemuva kokuthi ehlulekile ukuqoka ibhodi entsha yakwa iSabc engakopheli amahora angu-48 abenqunyelwe wona.

Bekumele kushaye ihora lesihlanu ntambama esekwenzile lokhu uZuma, kodwa ugcine engaliqokanga.

 Umyalelo wokuthi uZuma kumele ngabe ubeseliqokile ibhodi lale nhlangano esakazela umphakathi bewufakwe abeMedia Monitoring Africa (MMA) ngokubambisana nabe SOS Support Public Broadcasting Coalition enkantolo enkulu eGoli ngoLwesihlanu. Namhlanje, okhulumela iSOS uDudu Hetsang uthe uZuma uhlulekile ukuhlangabezana nomnqamula juqu abebekelwe wona.

Ngokunjalo uMnuz William Bird of MMA ukuqinisekisile ukuthi uZuma uhluleke wancama ukuqoka ibhodi ngesikhathi abebekelwe sona.

Bobabili laba bathi sebelinde ukuqala kwecala. 

Okhulumela uZuma uDkt Bongani Ngqulunga uthe uzoxhumana nabameli bamengameli Zuma ngaphambi kuka 5, kodwa ugcine engasaziphenduli izingcingo ngesikhathi esethintwa.

ABABENGOMENGAMELI bezwe uDkt Nelson Mandela noMnuz Thabo Mbeki bahluleka ukunxenxa abatshali zimali ukuthi baseke imfundo ephakeme ngesikhathi besaphethe. Lokhu kube ukuphawula kwalowo okhulumela i-EFF kuzwelonke uDkt Mbuyiseni Ndlozi ngesikhathi ekhuluma nabafundi bophiko istudent command olungaphansi kwale nhlangano eWits University ngaphambi kokhetho lomkhandlu wabafundi kulesi sikhungo.

UNdlozi ukusho lokhu ngemuva kokuthi uNkk Lindiwe Sisulu onguNgqongqoshe wezokuHlaliswa Kwabantu’s comments came after the Minister of Human Settlements, Lindiwe Sisulu, base University of Johannesburg ngesonto eledlule ukuthi uma sekuphethe yena uzokwenza isiqiniseko sokuthi imfundo imahhala.

USisulu uthe lemfundo izoxhaswa abatshali mali bangaphandle, uhulumeni nabamabhizinisi azimele.

UNdlozi ukuphikisile. Ngokwakhe iNingizimu Afrika beyithandwa kakhulu ngesikhathi sikaMandela nesikaMbeki kodwa bahluleka ukuheha abatshali zimali.

Uveze ukuthi mancane kakhulu amathuba okuthin abaxhasi zimali baseke uhulumeni ongaphansi kukaMengameli Jacob Zuma.

Uviniga (apple cider) bawuthathe ethangini leloli eliphaphalaze langena emijondolo yabo ngeSonto.

Isolezwe livakashele kule ndawo izolo lafica abantu besaqhubeka nokuwuphuza yize kunabathi uyabagulisa. Abaguliswe wuviniga bathe baphethwe amakhanda, abanye bebelele bethi akuvukeki.

UMnuz Nhlanhla Khoza oficwe ephuza nabangani bakhe uthe abathi wuviniga bebezama ukubethusa.

“Asifanga, asigulanga sisaqhubeka nokuphuza, uviniga umnandi kabi. Ngidakwe kakhulu izolo (ngeSonto) ngalala. Namhlanje (izolo) ngivuke ngaqhubeka, amanga ukuthi siyagula siyimiqemane,” kusho uKhoza ehleka.

Abesifazane abaphuze uviniga ngeSonto bathe baphuze izingilazi ezimbili badakwa balala. Izolo bebengasayingeni eyokuphuza bethi kubuhlungu amakhanda. Bale baphetha namagama abo noma ukuthathwa izithombe. Bebelokhu bemile kwelokuthi yiwayini abaliphuzile kodwa bathi lizwakala sengathi alikahluzwa.

UMnuz Mbhekiswano Radebe umjondolo wakhe odilizwe yiloli uthe akanayo indawo yokulala yingakho eziduduza ngoviniga. Uthe uzwile ukuthi kuthiwa wuviniga futhi kuyingozi ukuthi bawuphuze.

“Ubani obethi sizokhishwa yizisu uma siphuza leli wayini? Uma kuwuviniga kulungile umnandi futhi uyadaka. Thina ngeke siliyeke ijiki silizwa limnandi kanje. Nibuye nakusasa nizobheka ukuthi asifanga sisaqhubeka,” kusho uRadebe.

Emjondolo abebephuzela kuwona bekunebhakede elingamalitha amahlanu ebebekha kulona ngenkomishi baphuze.

Kubona akekho okhumbulayo ukuthi bebekhe uviniga ongakanani elolini.

Omakhelwane abangaphuzi bathe abazange babuthi qothu ubuthongo abaphuzayo bebanga umsindo abanye beshaya ingoma.

Abebeya emsebenzini kuthiwa bebehamba becula.

UMnuz Njabulo Shezi uthe njalo ngempelasonto kuba nemoto ephaphalazayo ishayiseke ezinsimbini ezinye ziphonseka phezu kwezihlahla.

“Ngenhlanhla akekho oseke walinyazwa yimoto ephaphalazile,” kusho uShezi.

UNksz Ntobeko Dube (27) waseMkhuyana, eShowe, usolwa ngokugwaza uMnuz Sabelo Zulu (37) wasoYemeni, eMthunzini, ngoLwesihlanu.

Kuthiwa umufi nomsolwa banengane kodwa bebengasathandani. Umsolwa ubeseganele kwenye indawo. Kuvele ukuthi umufi ubengenandaba nalokho ngoba bekuthi njalo uma ephuzile aye kubo kamsolwa athi uzofuna ingane. Kuthiwa umsolwa ubenqaba nengane ngoba umufi ubeyifuna uma ephuzile kuphela.

Ngaphambi kwesigameko sangoLwesihlanu kuthiwa umufi ubeke ashaye umsolwa, kwesinye isikhathi ashaye ngisho odadewabo.

Umsolwa ubewavula amacala okuhlukunyezwa esiteshini saseShowe kodwa umufi angaboshwa aqhubeke nokumhlukumeza.

NgoLwesihlanu kuthiwa umufi ufike kubo kaNksz Dube ebusuku ekhombisa ukuthi weqisile emanzini amponjwana. Ngaleso sikhathi umsolwa ubengekho. Kuthiwa walwa nodadewabo bakamsolwa baze bamshayela bathi akabuye.

Umthombo waleli phephandaba owazana nalo mndeni uthe uNksz Dube ubuyile ethi uzolamulela odadewabo.

“Umufi akazange avume ukuhamba ngesikhathi emxosha. Baxabana bebanga lokho nokuthi umufi ufuna ingane ngenkani ephuzile. UNtobeko uhoshe ummese wasekhishini wamgwaza ngawo,” kusho yena.

Umufi kuthiwa uphuthunyiswe esibhedlela eShowe ngoLwesihlanu ebusuku washona ngemuva kwesikhashana efike esibhedlela.

Kuthiwa umufi ubengafuni ukwamukela ukuthi uNksz Dube usegane kwenye indawo.

Okhulumela amaphoyisa kulesi sifundazwe, uCol Thembeka Mbhele, uthe umsolwa uvele enkantolo izolo ngecala lokubulala.

“Icala lihlehliselwe uLwesihlanu, ngalolo suku umsolwa uzocela ibheyili,” kusho uCol Mbhele.

Ukuqinisekisile ukuthi akhona amacala ake avulwa wumsolwa ewavulela umufi phambilini.

KUSEKUDE ukuthi aphinde athembe umuntu wesilisa owesifazane waseThekwini othi uluthwe yisoka alithole ejimini, elishaye lachitha noR69 000 wakhe.

UNksz Happiness Gcwabe (34), oyiBusiness Analyst, kwelinye lamabhange amakhulu eGoli, uthe kusenzima ukukholwa ukuthi uMnuz Martin Lwanja waseMalawi oyigeza, ungumgulukudu wesigebengu.

Uthe kwenzeka lokhu nje ubesazikhotha amanxeba ngemuva kokuhlukana nesoka elimphule inhliziyo.

UNksz Gcwabe uthe uthole ekugcineni ukuthi uLwanja akasiyo injinga, kodwa ungumsebenzi waseVirgin Active.

“Ngangisejimini eVirgin Active, eMorningside, eGoli, kwaqhamuka lo bhuti elethe ijakhethi yami eyayisale emshinini wokugijima. Waqala wangincoma wathi uthathekile ubuhle bami. Ngachazeka nami, indoda yamaphupho. Mude, umnyama, unomzimba owakheke kahle. Angibanga nankinga ngesikhathi ecela inamba yami.”

“Ngemuva kwezinsuku sibonene, wangikhipha sayodla. Wangitshela kabanzi ngaye. Wathi ungowaseZambia. Ngathola nokuthi sisebenza kumkhakha owodwa. Wayebukeka engumacaphuna kusale, njengoba wayehamba ngeBMW X5. Wayesenemininingwane ngami ayesevele eyazi. Wangichazela ukuthi kulula kuyena njengoba esebenza kwezobuchwepheshe,” kuchaza le ntokazi.

Uthe lo mlisa uqale ukumchutha ngokuthi athi unina ugulela ukufa.

“Wacela ngimboleke uR16 000 wokugoduka. Eyakhe wathi isavalelekile ebhizinisini lakhe. Wathi angiyifake kwaCapitec, kodwa ngaxakeka ngoba isibongo esasibhaliwe sasingafani nangitshele sona. Wathi yisithakazelo sakhe. Kuphele usuku ebuyile, wathi unina useshonile. Wacela ngimboleke uR20 000 ukuze abuyele kubo.”

Uthe uLwanja imali ubeseyicela kulandelana, njengoba amcela ambolekele uR25 000 ebhange, waphinda wacela uR7 000 wokugcwalisela emngcwabeni noR1 000 kaphethroli.

Imizamo yokuvula icala uthe ayiphumelelanga, amaphoyisa athe babevumelene. Athi ungowesibili ukubika ngoLwanja.

ULwanja uthe bahlanganile nalo wesifazane esiteshini samaphoyisa eMorningside lapho esayine khona incwadi efungelwe echaza ukuthi uzomkhokhela kanjani.

Imenenja yaseVirgin Active, e-Alice Lane, uMnuz Wil-Riaan Engelbrecht, uthe kunzima ukululandela udaba njengoba uLwanja esesulile emsebenzini.

UDkt Dlamini Zuma, obengusihlalo we-African Union Commission, nePhini likaMengameli, uMnuz Cyril Ramaphosa, babonakala behamba phambili ekutheni omunye wabo abe ngumengameli we-ANC uma uMengameli Jacob Zuma esezibeka phansi.

Ngempelasonto i-ANC eNorth West ithathe lesi sinqumo engqungqutheleni yayo yesifundazwe ebiseRustenburg. Iphinde yaphakamisa uNdunankulu waseMpumalanga, uMnuz David Mabuza, njengozoba yiPhini likaMengameli.

UNdunankulu waseFree State uMnuz Ace Magashule uzoba nguNobhala Jikelele, uNkk Jessie Duarte abe yiPhini likaNobhala Jikelele lokuqala, elesibili kube wuNdunankulu wase-Eastern Cape uMnuz Phumulo Masualle, uNgqongqoshe wezobuCiko namaSiko, uMnuz Nathi Mthethwa, akhulumele inhlangano kuzwelonke, uNgqongqoshe wezoBudlelwano namaZwe angaPhandle, uNkk Maite Nkoana-Mashabane abe uMgcinimafa kuzwelonke.

Baphinde bakhipha nohlu lwamagama abazoba sesigungwini esiphezulu sale nhlangano.

Inyunyana ithe ikhathazekile ngoba imali - isikhwama sinemali engaphezulu kuka-R1.9 trillion - izogcina ifinyelele ezandleni ezingafanele.

Ezinye zezinyunyana zabasebenzi okubalwa kuzo iFedusa zifuna isikhwama sezimpesheni zikahulumeni iGovernment Employees Pension Fund (GEPF) enemali engaphezulu kuka-R1.6 trillion sihoxe kwi-PIC ngoba kunemibiko yokuthi kuzothathwa imali yabasebenzi kutakulwe izinkampani zikahulumeni.

Ekhuluma emgubheni wosuku lothisha weNatu oLundi ngempelasonto, uMnuz Allen Thompson uthe bafuna okungenani imali inikwe othisha ukuze bakwazi ukubhekana nezidingo zempilo.

“Uzokhumbula ukuthi iGEPF iyona enemali enkulu kwiPIC ngakho abasebenzi abanezikweletu abanikwe enye imali yabo ukuze bakwazi ukukhava izinto kunokuthi kuthathwe imali itshalwe ezinkampanini eziwayo. Uma imali itshalwa kulezi zinkampani akubi nanzuzo ngoba imali ifakwa emgodini ongagcwali. Asifuni imali yabasebenzi inikwe noma ngubani noma iphathwe budlabha ngoba basebenza kanzima,” kusho uThompson.

Uqhube wathi usuku balugubhe kule ndawo ngoba bekhumbula namalungu eNatu ashona elwa nenkohlakalo.

“Othisha bethu ababili basocongwa izidumbu zabo zalahlwa ehlathini ngoba belwa nenkohlakalo ngaphakathi esikoleni. Uthishanhloko nosihlalo wesigungu esilawula isikole nezinkabi zabo abazithenga bathola odilikajele ngemuva kokuthi siqashe abaseshi abazimele abathola izidumbu zabo ezazilahlwe ehlathini ngoba amaphoyisa ayehluleka ukubathola. Sigubha lolu suku sikhumbula labo thisha abafela emsebenzini,” kusho uThompson.

Uthe indaba yezokuphepha ezikoleni iseyinkinga njengoba othisha bedutshulwa, begwazwa ezikoleni.

“Siyabaxwayisa nothisha bethu ukuthi baqaphele bangabashayi abafundi njengoba bexoshwa nje. Nomnyango kumele uqashe onogada ngoba akuphephile ezikoleni,” kusho uThompson.

Kugujwe neminyaka ewu-17 umengameli uMnuz Siphosethu Ngcobo ephethe kule nyunyana neminyaka ewu-99 kwasungulwa iNatu.

BABHEKENE ngeziqu zamehlo abaholi be-ANC, uNobhala Jikelele noNksz Lindiwe Sisulu ongungqongqoshe wezokuHlaliswa kwaBantu. Lokhu kulandela ukuthi uGwede ethe umuntu okumele abe ngumengameli we-ANC, iPhini likaMengameni uMnuz Cyril Ramaphosa nathe akajiki kulokho. UNksz Sisulu ongomunye wabafuna isikhundla sikamengameli we-ANC ube esebuza ukuthi ungubani uMantashe ngoba abamkhumbuli ngesikhathi besekudingisweni, wathi bamkhumbula ngokuthi ngesikhathi sakhe engunobhala kwazalwa iCope ne EFF kwaphinde kwaqembukelana iCosatu.

UMantashe eziphendulela uthe i-ANC ikwisizini enzima njemngoba abaholi bekhombigsa ukungacabangi.

UMantashe uphinde wathi uSisulu ucabanga ukuthi ukuba semzabalazweni ukuya ekudingisweni.

UL’vovo uke wasebenza noBrickz engomeni ethi EzakwaDerrango. Uthe kubuhlungu okwenzekile.

“Umthetho uthathe indawo yawo. Kubuhlungu khona kodwa siyathemba ukuthi uzoqhubeka ngaphakathi futhi aphume asijabulise. Okwenzekile kusenza sifunde ukuthi umthetho ukhona futhi kumele sihloniphe abesifazane njengenzalabantu,” kusho uL’vovo.

Abanye ozakwabo abake basebenza naye abafunanga ukuphawula.

Umdidiyeli womculo osebenze nalo mculi, uRobbie Malinga nomculi wekwaito uProfessor owenza naye ingoma ethi Ntombzam, banqabile ukuphawula.

UBrickz ugwetshwe iminyaka engu-15 yiNkantolo yeMantshi yaseRoodepoort izolo.

Lesi silomo seSweety My Baby neTjovitjo saboshwa ngoNovemba ka-2013 ngezinsolo zokudlwengula umshana waso owayeneminyaka engu-17 emzini wakhe oseRuimsig.

Icala lize lamgojela ngoJulayi nonyaka njengoba ebegwetshwa izolo nje yiMantshi uJohn Baloyi.

“Ngigculisekile ukuthi isigwebo seminyaka engu-15 sifanele kulolu daba,” kusho uBaloyi.

Kwabikwa ukuthi unkosikazi kaBrickz, uNkk Nqobile Ndlovu, waba nelikhulu iqhaza ukusiza umgilwa ekuvuleni icala.

“Ngesikhathi umshana kaBrickz, ozalwa ngudadewabo, ebhalela inkantolo ngadlula kubo edlwengulwa yilo mculi, wadalula ukuthi wayelindele ukuthi abe ngubaba kuye.

“Malume wangilimaza ngempela. Ngiyazibuza ukuthi ngakwenzani uze ungidlwengula. Ngangifuna ungiphathe njengendodakazi yakho kodwa awukaze ukwenze lokho. Ngeke ngisazigqaja ngempilo yami futhi ngeke ngisathemba muntu. Ngizokhumbula le nto impilo yami yonke,” usho kanje embikweni owethulwa enkantolo ngenyanga edlule.

ICommission for Gender Equality (CGE) isamukele isigwebo seminyaka engu-15 esinikezwe uBrickz. Ithe yize isamukela isinqumo kodwa ikhathazekile ngokuthatha isikhathi kwamacala okuhlukumeza.

Iphonsele inselelo amaphoyisa ukuthi awaphenyisise la macala ngoba ikholwa wukuthi athatha isikhathi eside ngoba kusuke kushoda ubufakazi.

Imantshi inqabile ukuthi uBrickz alidlulisele phambili leli cala ngoba ikholwa ukuthi ayikho enye inkantolo engafinyelela esinqumeni esehlukile.

Bebethembe ukuthi bazodla kahle ngoDisemba njengoba inkampani iX-Traders Markets, enamahhovisi KwaZulu-Natal nase-Eastern Cape, ibibathembise inzuzo enkulu kodwa manje abanikazi bayo abasabatholakali nasocingweni nasemahhovisi sekulenga ingidi.

NgoMsombuluko nayizolo kuthiwa bekulenga ingidi emahhovisi enkampani esemgwaqwewni uVoortrekker, eGreytown, abantu besami olayini bezofuna imali yabo.

Ngisho umsebenzi weX-Traders obengumabhalane kuthiwa ufike ezosebenza njengokujwayelekile kodwa wamangala ebona sekuvaliwe. Abaqashi bakhe kuthiwa bahambe bengamkhokhele ngisho iholo lakhe.

Ekhasini lenkampani kwiFacebook abantu bebekhala nxa zonke besho ukuthi wonke amahhovisi bafice evaliwe KwaZulu-Natal nase-Eastern Cape kusukela ngoMsombuluko.

UMnuz Enock Mngoma waseGreytown uthe namanje akakholwa wukuthi bashaye bachitha no-R1 100 abewufakile.

“Bebesitshela amanga akholekayo. Bekuthi noma sazi ukuthi kukhona into okuthiwa yibhanoyi kodwa besingazitsheli ukuthi nabo bayilona. Ngibe nenhlanhla ngoba ngoMsombuluko bengiphethe enye imali enkulu ngithi ngiyoyifaka kanti ngizofika sekukhala ibhungane. Ngifice abantu bekhala ngemali yabo abayitshalile,” kusho uMngoma.

Omunye wesifazane ocele ukungadalulwa obekhihla isililo uthe yena uthathe yonke imali abeyibekela ukuyofundisa ngayo ingane yakhe enyuvesi wayifaka enkampanini.

“Ngifake u-R15 000 ngizitshela ukuthi ngizothola u-R12 000 izinyanga eziyisithupha noma u-R225 000 ngoDisemba. Kumanje ngiphithene ikhanda angazi nokuthi ngizoyiqala kanjani le ndaba ngoba nomyeni wami akanalo ulwazi ukuthi ngithathe imali ngayipha abantu. Ngisangene impela.”

Isolezwe lithole ngephoyisa laseGreytown elingagunyaziwe ukuba likhulume nabezindaba ukuthi babiziwe emahhovisi enkampani ngoMsombuluko kodwa bekungekho abebengakwenza ngoba akekho obesefuna ukuvula icala.

“Sithole inqwaba nje yabantu ime izixongololo ikhala ngemali yabo esihambe nabantu abangaziwa. Bese kukhiyiwe emahhovisi. Abanye bathi bazolivula icala uma kuzobuya imali yabo. Manje asikho isiqiniseko sokuthi imali izobuya ngokuvulwa kwecala,” kusho iphoyisa.

Abakhulumela amaphoyisa KwaZulu-Natal bathe alikho icala elisavuliwe ngokuluthwa kwabantu.

Kuthiwa ngoMgqibelo eGreytown kufike umlungu obekhuluma isiZulu esomile obegqugquzela abantu ukuba befake imali enkampanini.

“Besinike-zwa izigqoko nezikibha ubona nje ukuthi sizokwenza imali yangempela. Besiyikhipha yonke imali yethu kusukela ku-R1000. Baze basincoma ukuthi lapha eGreytown sihamba phambili ngokutshalwa kwemali ngoba sesifake ama-millions enkampanini,” kusho umthombo ogilekile.

Ehhovisi lenkampani bekunempatho, abantu bemukelwa ngesiphuzo esibandayo nesithelo umuntu asithandayo.

Ubungena egumbini bese ufaka imali yakho, uthenjiswe ukuthi uzothola inzuzo uma sekuphele inyanga.

Epheshaneni lokukhangisa lenkampani kuvele ukuthi banendawo yokusebenza eThekwini (kuSmith noField), eMgungundlovu ku-Timber Street, oPhongolo kuPiet Retief Street nase-Eastern Cape kuMaclean Street.

Kuthiwa inkampani ibinezinyanga eziyisithupha isebenza. Abantu okuthiwa bafaka imali ngasekuqaleni bebeyikha ngamafosholo imali, nokwenze baheha nabanye. Imizamo yokuthola abakwaX-Traders Markert izolo ayizange iphumelele izinombolo ezibhaliwe okuthiwa batholakala kuzo bezingangeni.

Ipheshana lokukhangisa liveza ukuthi le nkampani isebenza ngo-Plan A,B,C.D.

Iqala ku-R1000 bese kuba * -R100 ngaphezulu wokubhalisa.

Abaku-A bathola imali njalo izinyanga eziyisithupha isinenzalo, abaku-B bathola imali ezinyangeni ezintathu inenzalo, abaku-C bathola imali emuva kwezinyanga ezimbili inenzalo, abaku-D bebezothola imali ngoDisemba isiphindwe kaningi.

Igcina ku-R750 000 imali obungayihlomula.

Lokhu kuvezwe nguNkk Weziwe Thusi onguNgqongqoshe wezokuThuthukiswa koMphakathi futhi obambe kwesikaNgqongqoshe wezokuBusa ngokuBambisana KwaZulu-Natal, ngesikhathi kwethulwa ngokusemthethweni umkhankaso wezokuphepha oholwa ngabakwaSouth African Brewaries (SAB) kuleli lokishi, izolo.

UNkk Thusi uthe ucwaningo lwakamuva loMnyango wezokuThuthukiswa koMphakathi luveza ukuthi eMlaza, ePhoyinti, eMnambithi, iPhoenix, eVerulam naseNewlands kuphuzwa kakhulu.

Uthe abantu abaphuza kakhulu yintsha kusukela kweneminyaka ewu-15. UMlaza yilokishi elikhulu kunawo wonke esifundazweni, kulinganiselwa ukuthi kuhlala abantu abangu-500 000.

IPhini loMqondisi Jikelele woMnyango wezokuThutha KwaZulu-Natal, uNkk Fikile Sithole lithe ngokocwaningo lwabo abantu abaneminyaka ephakathi kuka 20 no 35 yibo abashona kakhulu ezingozini zomgwaqo esifundazweni.

Uqhube wathi ngokwalolu cwaningo izingozi eziningi zidalwa ubudedengu babashayeli, okubalwa ukushayela uphuzile, ijubane nokudlula izimoto ezindaweni ezingavumelekile.

Uthe iningi lalezi zingozi zenzeka ngempelasonto. Bangu-1 670 abantu abashone ezingozini zomgwaqo esifundazweni kulo nyaka.

UMnuz Ricardo Tadeu, umengameli we-AB/ InBev and SAB, e-Afrika uthe ngokuthola kwabo abantu abalimala ezingozini kusuke kungebona abadale izingozi. Izingozi zidalwa ngabantu abanenkinga yezimilo balimaze izingane nabanye abantu.

“Sifuna ukulungisa izimilo, sesiluqoqile ulwazi olukhombisa ukuthi yiziphi izindawo ezinezinkinga,” kusho yena. UMnuz Max Mqadi weMax’s Lifestyle uthe ukushona kwabantu ezingozini zomgwaqo kusho ukuncipha kwamakhasinde kubona nokuncipha kwamavoti ezinhlanganweni zezombusazwe. “Lokhu kusitshela ukuthi kumele sibambisane ukulungisa izimilo kubantu. Utshwala abuyona inkinga. Inkinga umuntu ongakwazi ukuzikalela, lokho kumele kulungiswe. Izindawo zethu zifaka umnotho, zilethe izivakashi emalokishini,” kusho uMqadi.