Ikhishwe ngebheyili |ka-R1 000 izolo enkantolo yeMantshi, oBonjeni indoda etholwe nogwayi womkokotelo, ngoMsombuluko.

INTATHELI YESOLEZWE

IKHISHWE ngebheyili ka-R1 000 izolo enkantolo yeMantshi, oBonjeni indoda etholwe nogwayi womkokotelo, ngoMsombuluko.

Kuthiwa le ndoda iboshwe ngamaphoyisa ophiko olulwa nobugebengu eMbazwane, emuva kokuthi elunywe indlebe ngemoto ebithutha ugwayi womkokotelo kule ndawo.

Okhulumela amaphoyisa esifundazweni uCaptain Thulani Zwane, uthe amaphoyisa abe eseqala ukuqapha le moto, ayibona emgwaqweni uR22 ibheke ngaseHluhluwe.

Amaphoyisa abone imoto eyi-BMW enezinombolo zaseGoli ayimisa ebangeni elingamakhilomitha amabili ukusuka eHluhluwe ayisesha.

UZwane uthe kule moto bekukhona umshayeli kuphela, kwatholwa amabhokisi angu-26 kagwayi ongumkokotelo.

“Lo gwayi ubufakwe ebhuthini nasesihlalweni esingemuva semoto,” kusho uZwane.

Lo gwayi kuthiwa ungabiza uR195 000 uma ungase udayiswe emgwaqweni.

Umshayeli wemoto kuthiwa uhlulekile ukunika amaphoyisa incazelo ezwakalayo ngalo gwayi.

Kunezinsolo zokuthi lo mshayeli ubethutha ugwayi ewususa eMozambique ezowudayisa kuleli.

Uvele kafushane enkantolo wakhishwa ngebheyili, icala lakhe lahlehliselwa u-Ephreli 25 nonyaka. Uphenyo luyaqhubeka.

Ithembisa ukuthela izithelo ezinhle ingqungquthela yeBrics eqale ngegiya eliphezulu izolo uMengameli Jacob Zuma esayina isivumelwano sokuqinisa ubudlelwano nezwe iChina.

ZANELE MSOMI

ITHEMBISA ukuthela izithelo ezinhle ingqungquthela yeBrics – Brazil, Russia, India, China neSouth Africa – eqale ngegiya eliphezulu izolo uMengameli Jacob Zuma esayina isivumelwano sokuqinisa ubudlelwano nezwe iChina. UZuma ngaphambi kokuqala kwengqungquthela yesihlanu eNkosi Albert Luthuli International Convention Centre (ICC), usayine isivumelwano noMnuz Xi Jinping onguMengameli osanda kuqokwa eChina.

Lokhu kwenzeke ePitoli lapho uZuma egcizelele ukuthi buya kude ubudlelwano beNingizimu Afrika neChina. Utshele abezindaba ukuthi ubudlelwano neChina buqale eminyakeni engu-60 edlule. Uveze ukuthi omunye wabaholi be-ANC ongasekho uMnuz Walter Sisulu wavakashela eChina ngo-1953 eyonxenxa ukwesekwa, elakuleli lisaxakwe wubandlululo. Ubonge ukuzibophezela kweChina ekuthuthukiseni izingqalasizinda emkhakheni wezolimo, ezesayensi nobuchwepheshe nezemfundo. Isivumelwano esisayinwe izolo sisho ukuthi iChina isazoqhubeka nokubambisana neNingizimu Afrika kwezohwebo. Kuzoba nethimba elizobheka ukuthi zonke izinhlelo zokuhweba nokuthuthukisa umnotho ziyafezeka. IChina inyuka ngesivinini kwezomnotho emazweni angaphansi kweBrics. Isivumelwano sizokwenza nokuthi iNingizimu Afrika ifunde ukuthi yini imfihlo yeChina ekuthuthukiseni umnotho.

Uhulumeni wakuleli ngo-2011 wethule ibhanoyi elizothwala izivakashi ezivela eChina ngenxa yokwanda komthamo wazo kuleli.

Nyakenye iNingizimu Afrika izuze u-R89 billion ngokuhwebelana neChina, yona ezuze u-R112 billion.

Khona izolo abaholi beBrics bavumelene ngazwi linye ukuthi kusungulwe ibhange lokuthuthukisa izingqalasizinda. Kulindeleke ukuthi kuphele ingqungquthela namuhla abaholi sebevezile eminye imininingwane ngokusebenza kwaleli bhange.

UMengameli Zuma kulindeleke aphinde aveze imininingwane ngomhlangano wakhe noMengameli waseRussia uMnuz Vladimir Putin, otheleke izolo.

Khona manjalo izinhlangano zomphakathi zibhikishe ngaphandle kwe-ICC zifuna abaholi beBrics bafake unswinyo kwa-Israel.

Lezi zinhlangano zithi uhulumeni wakwa-israel usabusa ngobandlululo nokucindezela abasePalestine. Zidlulise uhla lwezikhalo kuMnuz Marias Fransman oyisekela likaNgqongqoshe wezoBudlelwano namazwe. Umbhikisho wesekwe yiCongress of Trade Unions (Cosatu) neYoung Communist League (YCL) ebimelwe nguNobhala wayo uMnuz Buti Manamela. Ethula izikhalo uManamela, uthe kabaxabene nengqungquthela yeBrics kodwa bafuna ukusebenzisa yona ukudlulisa izikhalo ngezwe i-Israel. Uthe ngeke bathule uma kusekhona izwe elibusa ngobandlululo nangokucwasa ngoba kuvuka izilonda zokwenzeka kuleli ngaphambi kwenkululeko.

“Okubi wukuthi uhulumeni wakwa-Israel uqinisa ikhanda ngokuthi balandela imigomo efanele ekubuseni, ekubeni bayacwasa. Bavale yonke into kunzima ngisho ukufunda nokuthola ezinye izingqalasizinda,” kusho yena. Unxenxe uMnuz Fransman ukuthi atshele abaholi beBrics ukuthi bavale yonke imigudu yokuhweba ne-Israel. Uthe ingcindezi ingathambisa uhulumeni wakhona avume ukuxoxa.

“IMelika ngeke yenze lutho iyodwa. UMengameli Barrack Obama uzamile ukungenelela kwangalunga, yingakho sesinxenxa nabaholi beBrics.”

UMnuz Fransman uthembise ukudlulisa izikhalo kwabanye abaholi beBrics, wabonga nokuthi lezi zinhlangano zikhombisa ukukhathalela amanye amazwe.

Ingqungquthela yeBrics eqalayo ukusingathwa kuleli izogoqwa namuhla, elandelayo kulindeleke ibe seBrazil ngonyaka ozayo. Yethanyelwe ngomengameli beBrics nabawu-15 basemazweni ase-Afrika. Lishone elayizolo sekufike nomengameli waseBrazil, uNkk Dilma Rousseff.

Ubanjwe ugesi washona owesifazane obethi uvala isango elingenela ezindlini ezincane ehostela KwaMashu, ngoMsombuluko.

BAWINILE NGCOBO

UBANJWE ugesi washona owesifazane obethi uvala isango elingenela ezindlini ezincane ehostela KwaMashu, ngoMsombuluko.

UNksz Hlalisile Mtshali (33) ongowokudabuka eMsinga kuthiwa ushonele emgodini obumbiwa ngabasebenzi kaMasipala weTheku, okuyibo abebevule leli sango balishiya bengalivalile.

Umakhelwane wakhe obone kwenzeka lesi sigameko, uNksz Nompumelelo Ngubane uthe ngoMsombuluko emini bekukhona abasebenzi bakaMasipala abebesebenza eduze kwamasango ezindlu ezincane.

“Bafike bavula base besebenza ngaphakathi. UHlalisile uhambile eya endlini encane wabe esethinta isango ethi uyalivala, wabe esesho- kheka, waze wawela emgodini ombiwe ngabasebenzi bakaMasipala,” kusho uNksz Ngubane.

Uthe bebefuna ukumsiza uNksz Mtshali kodwa bekuna imvula bengakwazi ukusondela, besaba ukubanjwa ugesi nabo.

Uthe leli sango sekunesikhathi lishokha uma belithinta kodwa belingakaze lenze umonakalo ofana nalo, wokuthi umuntu aze alahlekelwe umphefumulo. Uthe abazi ukuthi yini eyenza lo gesi ushokhe ngoba akusiwo owomkokotelo.

“Sisola ukuthi izintambo zikagesi ezikhona sezizindala, yizo ezidala ukuthi sishokheke,” kusho uNksz Ngubane.

Uthe ikhansela labo uMnuz Sakhile Ngcamu liyazi ngale nkinga yesango, lifikile emuva kwalesi sigameko. Abantu bakule ndawo bathe ngisho ompompi babo bayashokha, abakaze balubike lolu daba kuMasipala.

Okhulumela amaphoyisa esifundazweni uCaptain Thulani Zwane uthe amaphoyisa ayaphenya ngalesi sigameko.

Sishubile isimo ehostela laKwaMashu emuva kokuboshwa kwekhansela le-IFP ngecala lokutholakala nesibhamu esingekho emthethweni nokuthinteka kwalo esigamekweni sokufa komuntu.

SIMPHIWE NGUBANE

SISHUBILE isimo ehostela laKwaMashu emuva kokuboshwa kwekhansela le-IFP ngecala lokutholakala nesibhamu esingekho emthethweni nokuthinteka kwalo esigamekweni sokufa komuntu.

Ikhansela, elingeke lidalulwe igama lalo kuze kube livela eNkantolo yeMantshi eNtuzuma namuhla, liboshwe ngoMsombuluko yithimba lamaphoyisa aseNanda.

Okhulumela amaphoyisa KwaZulu-Natal, uCaptain Thulani Zwane, uthe icala lesibili elivulelwe ikhansela liveza ukuthi kukhona lapho afaka khona isandla ekufeni komuntu.

Uqhube wathi owabulawa wadutshulwa ngamadoda angaziwa ayehlasele ikhansela emzini walo okuleli lokishi.

Lasinda ngokulambisa ngenxa yokuthi lase lihlaselwa okwesibili ezinsukwini ezintathu okwaholela ekutheni litholelwe abazoliqapha.

“Iqulu labantu basehostela limashele esiteshini samaphoyisa ngemuva kokuboshwa kwekhansela labo lifuna ngodli ukuba lidedelwe,” kusho uZwane.

Kuvele ukuthi ikhansela liboshwe lase liyogcinwa esitokisini sesiteshi samaphoyisa eDurban North.

Ngesikhathi kukhona abebemashela esiteshini, abanye abantu basale bavuka indlobane bachitha imigqomo kadoti obususakazeke imigwaqo izolo, benengwa wukuboshwa kwekhansela labo.

Izolo abantu bebemi izixongolo bengqumuza udaba lokuboshwa kwekhansela, abanye benovalo lokuthi kungabe njalo sekuphinda okwenzeka ngesikhathi kuthunjwa owayeyikhansela leNkatha kuleya ndawo, uMnuz Themba Xulu, isidumbu sakhe esatholwa ngabantu simbobombobo yizinhlamvu zesibhamu esimobeni eNanda.

UXulu walandwa ngamadoda amahlanu ayezenza amaphoyisa ngo-Okthoba nyakenye esehhovisi lakhe, amthumba watholakala esefile.

USihlalo weKhokhasi yeNkatha eThekwini, uMnuz Mdu Nkosi, uthe abantu babhikishe ngoba bebethukile ukuthi mhlawumbe sekuphinda esikaXulu.

Uthe bazoqala uphenyo lwabo ngaphakathi eqenjini okuzothi uma seluphothuliwe bakhiphe isitatimende.

“Sizothumela ikhansela elizobamba okwesikhashana ukuze kuqhubeke ukuhlinzekwa kwabantu ngezidingo njengoba senza nangesikhathi kuthunjwe uXulu. Abantu abayeke amahemuhemu badedele ingalo yomthetho yenze uphenyo lwayo ngalesi sigameko,” kusho uNkosi.

UNgqongqoshe woMnyango wezokuThutha, ukuPhepha nokuXhumana koMphakathi, uMnuz Willies Mchunu ushayele ihlombe amaphoyisa ngokubopha ikhansela ethi lokhu kukhombisa ngokusobala ukuthi akukho muntu ongaphezu komthetho.

Unxuse abantu basehostela, athe idume ngezigigaba zokuhlaselana ngenxa yepolitiki, ukuthi babeke umoya phansi badedele amaphoyisa enze uphenyo lwawo.

Umndeni wesosha lomkhonto wesizwe elanyamalala ngo-1993 usubeke amathemba kubacwaningi abazobe behlola izinsalela zamathambo okukholakala ukuthi ngawalo, ambiwe emathuneni aseRed Hill, eThekwini, izolo.

INTATHELI YESOLEZWE

UMNDENI wesosha lomkhonto wesizwe (MK) elanyamalala ngo-1993 ngemuva kokuthunjwa ngabantu abangaziwa, usubeke amathemba kubacwaningi abazobe behlola izinsalela zamathambo okukholakala ukuthi ngawalo, ambiwe emathuneni aseRed Hill, eThekwini, izolo.

UMnuz Sthembiso Herbert Gambu sekuphele iminyaka engu-20 aduka kanti umndeni wakhe ukholelwa ekutheni abantu abamthatha babengamaphoyisa obandlululo ayelwisana nalabo ababelwela umzabalazo wakuleli.

Abophiko lwalabo abasuke benyamalele ngaphansi kophiko lwezokushushisa yibona abazokwenza ucwaningo ngalezi zinsalela, okukholakala ukuthi ngezikaGambu.

Izolo amalungu omndeni , abaholi be-ANC namasosha e-MK babuthane emathuneni aseRed Hill lapho obekumbiwa khona ithuna ebelinezinsalela ezisayohlolwa bese kuqinisekiswa ukuthi ngezakhe ngempela yini.

UGambu kuthiwa ngosuku aduka ngalo kwatholwa isidumbu sakhe sidindilize eduze komgwaqo kodwa wangcwatshwa ngaphandle kokwaziswa komndeni wakhe.

I-SACP KwaZulu-Natal isikubeke kwacaca ukuthi ayinalo noluncane uxolo kumbulali kaMnuz Chris Hani, uClive Derby-Lewis.

CELANI SIKHAKHANE

I-SACP KwaZulu-Natal isikubeke kwacaca ukuthi ayinalo noluncane uxolo kumbulali kaMnuz Chris Hani, uClive Derby-Lewis kuze kube ukhipha iqiniso mayelana nokuthi ubani owayemthumile ukuthi asoconge uHani.

I-SACP ikhulume kanje izolo eThekwini, ngesikhathi inesithangami nabezindaba ebichaza kuso ngezinye zezinto ebizidingida emhlanganweni wangempelasonto wesigungu esiphezulu sesifundazwe .

Kulo mhlangano bekubhungwa nangezinhlelo zesifundazwe zemigubho yesikhumbuzo sikaHani namuhla okuphela iminyaka engu-20 adlula emhlabeni.

UNobhala we-SACP esifundazweni uMnuz Themba Mthembu, uthe abayingeni indaba yokubalisa kukaLewis ngokuthi uyagula, ucela ukudedelwa ngoshwele axolelwe ngokubulala kwakhe uHani.

“Sifuna akhiphe iqiniso kuqala achaze kabanzi ukuthi ubani owayemthumile nokuthi kwakuyini imbangela yokuthi kubulawe lo mholi wamaKhomanisi.

Uma engenze njalo siyobe sesiyambhekelela siyixoxe indaba yakhe yokuthi athole ushwele ngoba esikudingayo kuye yiqiniso kuphela,” kusho uMthembu.

ULewis owayengumholi we-Conservative Party, waboshwa ngemuva kokuvela kokuthi wahlela nenkabi enguJanusz Walus ukuthi kusocongwe uHani kanti bobabili bagwetshwa isigwebo sentambo kodwa saguqulwa saba yiminyaka engu-25 ngenxa yokuthi yayisivaliwe intambo kuleli.

UHani wayebonwa engomunye wabaholi owayengaba wumengameli we-ANC olandelayo ngemuva kukaMnuz Nelson Mandela.

ULewis kuthe ngo-2011 wabalwa kulezo ziboshwa ezazicele ushwele kuMengameli, wayekhala ngesifo somdlavuza esasimphethe kodwa wanqatshelwa.

UMthembu uthe kule nyanga bazoba nemicimbi eyahlukene yokukhumbula uHani, okuhlanganisa nesifundo esizokwethulwa nguMnuz Jeremy Cronin oyiphini lesibili likaNobhala-Jikelele we-SACP.

Kulolu chungechunge kuzobe kuhanjelwa amagatsha nezifunda KwaZulu-Natal.

Ngaphandle kwalokho kulo mhlangano i-SACP ibuye yezwakalisa ukungenami ngesimo somasipala esifundazweni, yathi ukuthi kube nomasipala oyedwa othola umbiko oncomekeyo kumcwaningi mabhuku kusho ukuthi kumele isifundazwe silile kunokuba sijabule.

Uphinde wakhala ngodaba lomhlaba onikezwa ama-Trust wathi lokhu sekudale inkinga emphakathini ngoba leyo mihlaba igcina yenziwa ibhizinisi, ekubeni abantu behlupheka bengenazindawo. Uthe sebethathe isinqumo sokungenelela kulolu daba.

Ubale nodaba lwaseGreytown lapho umphakathi uxabane ne-Trust okuthiwa ibingafuni kwakhiwe isikole ngoba ithi indawo eyokutshala ihlathi.

Sekuvele ukuthi iphoyisa elisolwa ngokudubula libulale owesilisa oneminyaka engu 21 ubudala eNanda belicasulwe wukuthi uphazamise isibuko semoto yalo ephuma endaweni okuphuzwa kuyo.

NOKUBONGWA PHENYANE

SEKUVELE ukuthi iphoyisa elisolwa ngokudubula libulale owesilisa oneminyaka engu 21 ubudala eNanda belicasulwe wukuthi uphazamise isibuko semoto yalo ephuma endaweni okuphuzwa kuyo, lase limdubula amahlandla amahlanu washona khona lapho maqede lazinikela emaphoyiseni.

Iphoyisa lophiko lweTRT eNanda lisolwa ngokubulala uMnuz Siyabonga Macasha obeziphilisa ngokuwasha izimoto. Lesi sigameko senzeke ngeSonto entathakusa umufi esebuyela kubo ephuma endaweni yokucima ukoma eyaziwa ngeMabaleng, KwaMashu kwa-F lapho nomsolwa oyiphoyisa kuthiwa ubephuza khona.

Umsolwa obehlala KwaMashu kwa-G kusolwa ukuthi bebeqiwe wuphuzo oludakayo benomufi kwenzeka lesi sigameko, esiqale ngokuthi bahilizisane.

Umndeni kamufi namanje usamangele, uthi umsolwa bekumele okungcono amshaye kunokuthi aze ambulale.

UNksz Gugu Macasha, unina kamufi uthe indodana yakhe ibingumuntu ophuzayo kodwa izithulela, okubashiya bemangele ukuthi yini le engaka eyenze leli phoyisa lize likhethe ukuyidubula.

“Abangani bakhe bathi ubesephumile eMabaleng ebuyela ekhaya. Badlule eduzane kwemoto yalo leli phoyisa imile ngaphandle wagudluza isibuko semoto yalo, kwasuka ingxabano, lakhipha isibhamu lathi lidubula inja,” kusho uNksz Macasha.

Uthe yena ubizwe abangani bakamufi ngezithuba zehora lokuqala ekuseni bemtshela ukuthi indodana yakhe isidubulekile.

“Ngesikhathi sifika abafana bangikhombise lona leli phoyisa kukhona umngani walo obelithethisa, ethi isibhamu belisiyisaphi futhi liyayibona yini into eliyenzile njengoba selidubule umuntu. Alizihluphanga ngokuza kithina kodwa ligibele emotweni lahamba,” kuchaza uNksz Macasha.

Uthe indodana yakhe ibisibizwa wukufa ngoba ibingajwayele ukuya kule ndawo, ibithenga iziphuzo izihlalele ekhaya nabangani bayo.

“Angithembi nokuthi uzoboshwa umsolwa ngoba uyiphoyisa.

Ngifuna abolele ejele ngento ayenzile kithina ngoba bekukhona abengakwenza kunalesi sinqumo asithathile,” kusho unina kamufi obehlengezela izinyembezi elanda lolu daba.

Ngesikhathi Isolezwe lifika kule ndawo ebizwa ngeMabaleng, lifice owesilisa othe lesi sigameko asenzekanga kule ndawo njengoba sekudume kanjalo.

Uthe le nto izobaxoshela amakhasimende uma kuqhutshekwa nokubikwa kwento engekho futhi akukho abazokuphawula ngoba ayenzekanga ngaphakathi eMabaleng.

Leli cala njengamanje lisezandleni zophiko oluphenya amaphoyisa i-Independent Police Investigative Directorate. Okhulumela lolu phiko uMnuz Moses Dlamini uthe basaphenya.

Ishiye isimemo somngcwabo wayo kubangani exoxa nabo enkundleni yokuxhumana i-Mxit, intombazane yaseNanda etholakale ilenga endlini yokugeza kubo.

ZANELE MSOMI

ISHIYE isimemo somngcwabo wayo kubangani exoxa nabo enkundleni yokuxhumana i-Mxit, intombazane yaseNanda etholakale ilenga endlini yokugeza kubo ngoLwesihlanu.

UCamilla Mlangeni (16), obefunda ugrade 12 eNtshisekelo High School eNanda obengaconsi phansi kontanga yakhe ngenxa yefilimu abedlala kuyo ethi Indoda Ayikhali, ushiye umndeni udidekile ngembangela yokuzibulala kwakhe.

Kwesinye isigameko esifuze lesi omunye umfundi uSiboniso Radebe obenza uGrade 10 esikoleni esifanayo naye uzilengise endlini yokugezela kubo ngoMgqibelo. Naye asitholakalanga isizathu zokuzibulala kwakhe.

Sekusabalele amahlebezi athi umfana ozilengisile ubethandana noCamilla kodwa unina kaCamilla, uNkk Pinky Gwala, uyayichitha le mibiko ngendodakazi yakhe.

Ikusasa likaCamilla belibonakala liqhakazile kwezokulingisa emuva kokubonakala efilimini evutshelwe ekhaya. ubesehambela nemicimbi yosaziwayo. Ubedlala indawo kaThando efilimini etholakala kwi-DVD ezitolo.

UNkk Gwala utshele Isolezwe ukuthi kuduma ikhanda uma ezama ukucabanga isizathu ebesingenza indodakazi yakhe izibulale. Uthe akukho abebengakuxoxi nayo futhi wayishiya ineme njengenjwayelo ngoLwesihlanu ekuseni.

“UCamilla ubengumngani wami omkhulu. Ngihambe ekuseni ngiya e-salon ngoba wangitshela ukuthi sengimubi ekhanda. Ngamshiya eneme wangithembisa nokuthi ngizofika kucwebezela endlini,” kusho yena.

Uthe indodakazi yakhe ibingakukhonzile ukufaka upholishi endlini kodwa ngoLwesihlanu yenza okungajwayelekile. UNkk Gwala uthe ubesedolobheni ethola ucingo kumyeni wakhe emtshela ukuthi akuvuleki endlini yokugeza. Ulandelise ngombiko othi indodakazi yakhe itholakale ilenga khona. Ugcizelela ukuthi akukho obekusolisa nobekubonakala kuphathe kabi uCamilla athi ubengakuthandi nokuzula.

“Ubeseshilo ukuthi ngonyaka ozayo uyokwenza izifundo zobudokotela eCuba ngoba ubengananazi ukuthi uzozitholela u-A kwiPhysical Science nakweziye izifundo. Bengize ngimkhuze ngendlela abezikhandla ngayo ngokutadisha.”

Ufisa sengathi ngabe ubeshiye incwadi eveza isizathu sokuzibulala ngoba abantu sebezikhulumela yonke into abayithandayo.

Uthe ubengakaze axoxe nendodakazi yakhe ngezokujola kodwa ubekhuthalele ukuhamba uMkhosi woMhlanga futhi ehlolwa. Kuthiwa ngoLwesihlanu uCamilla athumelela ngalo bonke abangani bakhe umyalezo ku-Mxit ebamema emngcwabeni wakhe akashongo ukuthi uzozibulala.

Udadewabo uBuyi Khumalo, abazalwa nguyise oyedwa naye, ugcine ukukhuluma naye ocingweni ngemizuzu yokugcina ngaphambi kokuzilengisa. Uthe ubengahlali nodadewabo kodwa bebekade bendawonye ngempelasonto edlule. Ugcine ukukhuluma naye sekuyoshaya u-11 emini.

“Akakhulumanga okuningi kodwa ubezwakala eneme ngoba vele sonke siziphaphele. Esevalelisa ugcizelele ukuthi uyangithanda,” kusho yena.

Uthe nemiyalezo ku-Mxit akayinakanga ngoba ubejwayele ukukhuluma ngomngcwabo uma egula athi usezofa. Yize othisha baseNtshisekelo benqabile ukuphawula kodwa Isolezwe lithole ukuthi bashayana ngamakhanda ngoba laba bekungabafundi abakhaliphile futhi beziphethe kahle. Kulindeleke ukuthi kube nenkonzo yesikhumbuzo kusasa. Imizamo yokuthola umndeni kaRadebe ayiphumelelanga izolo ebusuku.

NONHLANHLA MKHABELA

NONHLANHLA MKHABELA

USHAYA phansi ngonyawo uMasipala weTheku ngesicelo esifakwe yinhlangano yabashayeli bamatekisi iSouth African Taxi Workers Union (SATWO). Le nyunyana ifuna ukuthi amalungu ayo angaboshwa uma kunezivimbamgwaqo kodwa izihambisele yona amagama abanamacala enkantolo.

I-SATWO eyaziwa ngokuthi yiQina Mshayeli, yenza lesi siphakamiso ngenyanga edlule emhlanganweni eyaba nawo nesikhulu sophiko lweSpecialised Enforcement emaphoyiseni kaMasipala weTheku, uSenior Supt Rajen Chin ngoba ithi kuphazamiseka ukuthuthwa kwabagibeli uma abashayeli bezohlala ngokuboshwa besemgwaqweni.

UChin uthe kuyinto enhle ukuthi abashayeli baziyele bona enkantolo ukuyobhekana namacala abo kodwa akukho semandleni abo bengamaphoyisa ukuthi engababophi uma ebathola emgwaqweni benamacala.

“Isicelo sabo sachithwa ngoba amaphoyisa awanawo amandla okwenza lokhu abakucelayo. Bona bayinyunyana, abakwazi ukungena kakhulu endleleni amaphoyisa asebenza ngayo,” kusho uChin.

Uthe isizathu esikhulu sokuchitha isicelo kwaba wukuthi uma bengase bethi abawabophi amalungu eSATWO ngoba ethi azoziyela wona enkantolo, bonke abashayeli bamatekisi bazoyojoyina le nhlangano bese kuphazamiseka ukusebenza komthetho.

UNobhala-jikelele weSATWO, uMnuz Musawenkosi Khoza, uthe ngoLwesihlanu kwasuka umsindo emgwaqweni uKhuzimpi Shezi (Williams) ngenkathi amaphoyisa ebopha abashayeli ababesohlwini lwabazovela enkantolo kuleli sonto.

Uthe amaphoyisa abopha aze ashaqa namalungu ebhodi yenhlangano ayethi azama ukwehlisa imimoya kubashayeli abebewotha ubomvu ngokuboshwa kwabo ekubeni bethi uhlelo luhamba kahle.

“Uhlelo lokuhambisa amagama enkantolo sesiluqalile kodwa besisalinde ukuthi uChin abuyele kithina nempendulo yokuthi isicelo sethu siyemukelwa noma cha kodwa ubengakaze abuyele kithina kusukela sagcina ukuhlangana ngoMeyi 5,” kusho uMnuz Khoza.

Uthe ngokohlelo uma umshayeli esekulungele ukuvela enkantolo ngamacala akhe uza ehhovisi lenhlangano afake isicelo bese bethatha igama lakhe balifake ohlwini oluba namagama abangu-10 ngosuku baluhambise enkantolo banikezwe usuku lokuvela.

UChin uthe ukugcina kwakhe ukubheka ngenyanga edlule bebengu-10 kuphela abashayeli okuhanjiswe amagama abo enkantolo.

Owesifazane waseQuarry Heights ukhala ngesibhedlela saseThekwini iKing Edward VIII asisola ngobudedengu ngenkathi eyohlinzwa ebeletha ngoJanuwari ka-2010.

BONGIWE ZUMA

OWESIFAZANE waseQuarry Heights ukhala ngesibhedlela saseThekwini iKing Edward VIII asisola ngobudedengu ngenkathi eyohlinzwa ebeletha ngoJanuwari ka-2010.

UNksz Sithabile Ngcobo (33) uthi usephenduke into ejika nelanga ngenxa yezinhlungu asephila nazo esiswini kulandela into esasikhwama sezinkambi zetiye eyathungelwa ngaphakathi esiswini ngenkathi ehlanzwa inxeba lokuhlizwa.

Uthi kusukela ngawo u-2010 ugqigqa kodokotela nasezibhedlela ezahlukene ngoba iKing Edward yamdlulisela esibhedlela iClairwood emuva kokumhlinza.

“Angilali ebusuku yizinhlungu selokhu kwasala le nto esasikhwama sezinkambi zetiye kimina, ngisho emini ngishukwa wubuhlungu.

“Ngababuza nabahlengikazi ababengisiza ukuthi ngizophila kanjani nale nto esiswini ngoba bakhipha okubili kuphela ekubeni babefake okuthathu.

“Kunalokho bagxekana bodwa ngokuthi bekungafanele ngifakwe okuthathu ngoba kujwayelekile ukuthi kucashe kungabe kusatholwa nokuyilapho engadluliswelwa kwesinye isibhedlela ngasekupheleni kwaJanuwari,” kusho uNksz Ngcobo.

Uqhube ngokuthi izinhlungu uzizwa kakhulu ohlangothini lwesokudla lapho asola ukuthi ihleli ngakhona le nto eyasala ngaphakathi kuye.

Uthe uma ethola umsebenzi akahlali kuwo isikhathi eside ngenxa yezinhlungu, uyaphoqeleka ukuba ayeke, okwenza impilo ibe nzima ngoba unezidingo nomndeni wakhe.

Ngaphandle kwezinhlungu zangaphakathi, ukhala nangomthungo wakhe ongaphandle esiswini athi awukaze uphole ngoba uhlala uqaqamba.

Okhulumela isibhedlela iKing Edward, uNksz Nontobeko Ndlela uthe isibhedlela besingakaze sithole zikhalazo eziqhamuka kuNksz Ngcobo ngakho bazolusukumela udaba lwakhe njengoba seluvelile.

“Isibhedlela besingakaze sibikelwe lutho ngalo wesifazane ngakho sizothatha imininingwane yakhe ukuze kutholakale nefayela eliqondile lakhe. Kungaba wumqondo omuhle naye uma engakwazi ukusheshe axhumane nathi,” kusho uNksz Ndlela.”

Ababeyizishoshovu zentsha ye-ANC KwaZulu-Natal baqokelwe esigungwini sesikhashana se-ANCYL ngemuva kokuthi kuhlakazwe ikomiti lesigungu esiphezulu salolu phiko ngenyanga edlule.

INTATHELI YESOLEZWE

ABABEYIZISHO-SHOVU zentsha ye-ANC KwaZulu-Natal baqokelwe esigungwini sesikhashana se-ANCYL ngemuva kokuthi kuhlakazwe ikomiti lesigungu esiphezulu salolu phiko ngenyanga edlule.

UMnuz Mxolisi Kaunda noMnuz Magasela Mzobe bamenyezelwe kanye nabanye abaholi abangu-22 ekutheni bahole lolu phiko kuze kufike ingqungquthela yalo yokukhetha ubuholi bukazwelonke .

UMnuz Kaunda wayenguSihlalo we-ANCYL esifundazweni kanti ubalwa nabanye abaholi ababa namandla okugqugquzela umkhankaso wokukhethwa kukaMengameli Jacob Zuma, engqungqutheleni eyayisePolokwane ngo-2007 okwehlulwa kuyo uMnuz Thabo Mbeki.

Ngakolunye uhlangothi uMzobe yena wayeyisishoshovu senhlangano yabafundi edlelana ne-ANC, i-Sasco. Waduma ngesikhathi sokusungulwa kwe-Cope lapho ayegxeka khona abaholi ababeyingxenye yale nhlangano eyayibizwa ngeShikota.

UNobhala-jikelele we-ANC uMnuz Gwede Mantashe obekhuluma nabezindaba eGoli izolo, uthe baqoke amalungu angu-22 azoba ingxenye yalolu hlaka kodwa baqinisekisa ukuthi labo abesebeqalile ukukhankasela izikhundla ababafaki.

“Umsebenzi walolu hlaka kuzoba ukulungiselela ingqungquthela ye-ANCYL, luphinde luqinisekise ukwakheka kwezinhlaka zalolu phiko emagatsheni ahlukene nasezifu-ndazweni,” kusho uMantashe.

Ngokohla olwethuliwe, uMdidiyeli kuzoba uMnuz Mzwandile Mosina bese umxhumanisi kube uMagasela Mzobe.

Abanye u-Victoria De Beer, Bongiwe Gigaba, Braam Hanekom, Thembinkosi Josopu, Mxolisi Kaunda, Bandile Masuku, Nokuthula Mbese, Nomvuyo Mhlakaza, Johan Mkhatshwa, Bridget Mogakwe-Seokamo, Smangaliso Mtengwana, Adelle Naidoo, Maruping Ntuli, Silence Ntshavheni, Mawethu Rune, Jolene Samuels, Joel Samuels, Joel Seabi, Shaka Sisulu, Rebone Tau noCynthia Theko.

Echaza uMantashe, uthe babili kuphela abaholi abebeyingxenye ye-ANCYL abafakwe kuleli thimba lesikhashana.

Uthe balubhekisise kabanzi uhla lwalaba bantu ngaphambi kokuba bathathe isinqumo ngabo ngoba bebefuna amalungu athembekile enhlanganweni, anomlando wokusebenza ngokuzikhandla futhi abanamakhono adingekayo entsheni.

Kuke kwavela ukuthi umdlali webholi weKaizer Chiefs uJimmy Tau kukhona abaholi abebefuna angene kanti naye uzivumele kodwa akazange afakwe.

Akazi ukuthi uzothathani ahlanganise nani umfana oneminyaka engu-18 oshonelwe ngunina abebehlala naye kwa-J, eMlazi bodwa nabafowabo ababili abancane.

NQOBILE MASIMULA

AKAZI ukuthi uzothathani ahlanganise nani umfana oneminyaka engu-18 oshonelwe ngunina abebehlala naye kwa-J, eMlazi bodwa nabafowabo ababili abancane.

USphesihle Mchunu ofunda u-Grade 11 eDloko Secondary kuleli lokishi, uthi uswele imali yokufihla unina, uNksz Zandile Mchunu (35) (osesithombeni), oshone ngoMsombuluko esibhedlela iPrince Mshiyeni emuva kokungeniswa exinekile ngeledlule.

USphesihle uthe uyise akaze ambone selokhu azalwa, akazazi nezihlobo zikanina njengoba wagcina ukuya eMthwalume lapho kuzalwa khona unina esemncane.

“Ngeke ngikukhombe kwamanje lapho kuzalwa khona umama kodwa ngiyakhumbula khona ukuthi sake saya ngiseyingane. Ngiphithene ikhanda, bengingazitsheli ukuthi angase ashone umama ngoba ukube bengazile ngabe ngenze isiqiniseko sokuthi ngithola lonke ulwazi kuyena mayelana nezihlobo zakhe,” kusho uSphesihle.

Uthe ngokusho kukanina engakaguli, kubo kusesigodini saseMabheleni, eMthwalume, eduze nesikole samabanga aphansi iVelimemeze.

Abafowabo bakaSphesihle ababili, oneminyaka emihlanu noneminyaka engu-12, bahlaliswe ngomakhelwane. USphesihle uphuma engena ezindaweni ezihlukene efuna usizo lokufihla unina.

“Noma kungathiwa asizitholi izihlobo zikamama kodwa singalujabulela noma yiluphi usizo olungaholela ekutheni agcine efihlwe ngesizotha,” kusho uSphesihle echiphiza izinyembezi.

Omunye womakhelwane okhulume neSolezwe obehleli nabafowabo bakaSphesihle, uNkk Bongi Mkhize, uthe sibathinte kakhulu lesi sigameko bengomakhelwane yize lungekho usizo olutheni abangaxhasa ngalo ngenxa yokuthi nabo bayentula.

“Nathi singomakhelwane siyabakhulekisa abantwana bakwaMchunu ukuthi bathole ukusizakala. Kuyisilonda esikhulu ukulahlekelwa ngumzali kodwa esibuye sigumbeke kakhulu uma usuzontula nemali yokumbeka endlini yakhe yokugcina,” kusho uNkk Mkhize.

Umengameli Jacob Zuma usephefumulile ngenkulumo eyenziwe uMnuz Trevor Manuel othe sesiphelile isikhathi sokuthi labo abakuhulumeni bagxeke ubandlululo ngezinto ezenzekayo ezweni.

INTATHELI YESOLEZWE

UMENGAMELI Jacob Zuma usephefumulile ngenkulumo eyenziwe uNgqongqoshe wezokuHlela ehhovisi likaMengameli uMnuz Trevor Manuel othe sesiphelile isikhathi sokuthi labo abakuhulumeni bagxeke ubandlululo ngezinto ezenzekayo ezweni. UManuel inkulumo yakhe esidale ukuphawula kubantu wathi ongqongqoshe kuhulumeni akumele ngaso sonke isikhathi uma kumele balethe intuthuko kubantu bakhale ngobandlululo kodwa kumele basebenzise amandla abo njengoba sekuyophela iminyaka engu 20 uhulumeni oholwa i-ANC ubusa.

Inkulumo yakhe ayehlanga kahle kozakwabo be-ANC kodwa amaqembu aphikisayo abonakale emtusa ngokukhuluma “iqiniso” ngokungesabi.

Ekhuluma esikhumbuzweni sikaNobhala-jikelele weSACP owasocongwa uChris Hani, uZuma uthe akuyona into elula ukuthi kubonakale ushintsho kule minyaka engu-20.

Uthe umonakalo owadalwa ubandlululo usazoba khona ezweni isikhathi eside.

“Ukuphakamisa ukuthi angeke sikwazi ukugxeka ubandlululo ngezinto ezenzekayo manje ezweni lethu, ngicabanga ukuthi kuyiphutha elikhulu ezintweni esingazisho,” kusho uMengameli enkulumeni yakhe yize engazange amgagule uManuel ngegama.

Uveze ukuthi asikho isidingo sokuthi baze bakhombise ukuthi yini eyenziwa ubandlululo. “Iqiniso ukuthi izwe linye kodwa lihlukene kabili, uya kunoma yiliphi idolobha kunengxenye enhle bese kuthi kwenye ingxenye kube nemijondolo. Lokhu akwenziwanga intando yeningi ngakho asikwazi ukuyeka ukugxeka labo abenza lokhu,” kugcizelela uZuma.

Ekhuluma ngesonto elidlule uManuel wathi abasebenzi bakahulumeni kumele bakhumbule ukuthi basebenzela umphakathi hhayi amaqembu abo ezepolitiki.

Ngemuva kokugxekwa inyunyana iNehawu ngale nkulumo yakhe, uManuel waziphendulela ethi yena akazange athi azisekho izibazi zobandlululo kuleli kodwa wathi asisekho isidingo sokuchasha ngalo uma kumele kuyiswe izidingo kubantu.

Indodakazi encane kaHani ikhuluma emcimbini wakhe izolo, ithe uyise wayeyiqhawe emehlweni ayo. ULindiwe ukusho lokhu emcimbini wokukhumbula uyise obuseGoli izolo.

“UChris Hani wayehlale eyiqhawe lami kodwa angizange ngibone ngaleso sikhathi ukuthi wayeyiqhawe lomhlaba wonke,” usho kanje.

“Nganginganakile ukuthi ubaba unguChris Hani waze washona.”

ULindiwe uthe njengendodakazi encane, uyise ubengamazi ngoba ubengahlali nomndeni ngenxa yokuthi wayesekudingisweni.

“Ngangingazi nokuthi uyisishoshovu esasilwela inkululeko,” kusho uLindiwe.

Uthe uyise wayezinikele ekulweleni izwe lakhe, wathi ukukhunjulwa kwakhe ngemuva kweminyaka engu 20 adlula emhlabeni kuyisibusiso.

“Okubuhlungu wukuthi angizange ngilithole ithuba lokuzilela ubaba ngenxa yokuthi izwe lonke lalibuka.”

Uthe wayalwa ukuba aziqinise, angakhombisi ukuba ntekenteke, angakhali.

“Eminyakeni engu-20 edlule izwe lonke lalila kodwa wonke umuntu wayelokhu enathi nomndeni besisingethe. Ngiyamkhumbula ubaba, ngihlezi ngimcabanga nsuku zonke. Ngiyazi nabantu ngokunjalo bayamkhumbula.”

Ekhuluma ngaphambi kukaZuma izolo uNobhala weSACP uMnuz Blade Nzimande uthe uHani wayengumholi owayesebenzela abantu engabhekile kakhulu iholo njengoba aqoka ukuhola iSACP.

UNobhala weCosatu uMnuz Zwelinzima Vavi naye obekhona kulo mcimbi uthe uHani “ubeyophoxeka kakhulu ngobugovu nabantu abathanda izinto nalabo abasebenzisa izikhundla abanazo zepolitiki njengethuluzi lokuziqoqela umcebo”.

“Wayengeke ayivumele le nkohlakalo ekhona nokumoshwa kwemali yomphakathi futhi wayeyokhathazeka ngokubulawa kwamaqabane kubangwa izikhundla,” kusho uVavi.

UNzimande uthe kunzima ukwazi ukuthi uHani ngabe ukusiphi isikhundla ukube usaphila, “kodwa engikwaziyo wukuthi ubezokuya kohola abantu lapho i-ANC ne- SACP imthume khona”.

“UChris wayezokubeka eceleni ukuthi yena ufisani bese evumelana nalokho inhlangano ethi makakwenze, kubandakanya nokuya kuhulumeni uma kuthiwe makaye khona,” kusho uNzimande.

UVavi phambilini useke wabagxeka abaholi beSACP abafana naye uNzimande, onguNgqongqoshe wezeMfundo ePhakeme, ngokuthatha izikhundla kuhulumeni ekubeni benezikhundla emaqenjini abo.

Zimkhalele owesifazane oboshwe ngemuva kokubekwa icala lokuqola izingane ezingomakhelwane bakhe abethatha omazisi bazo avule amakhadi asebhange athi uzifunela umsebenzi.

NOKUBONGWA PHENYANE

ZIMKHALELE owesifazane oboshwe ngemuva kokubekwa icala lokuqola izingane ezingomakhelwane bakhe abethatha omazisi bazo avule amakhadi asebhange athi uzifunela umsebenzi.

UNksz Thabisile “Jojo” Majozi (25), waKwaMshayazafe, eThornwood, udedelwe ngebheyili ngoLwesibili yiNkantolo yasePinetown ngemuva kokuthi eboshwe ngoMgqibelo ezinye zezingane sezithole ukuthi kukhona lapho aqola khona ngamagama azo.

Ukuboshwa kwakhe kulandela uphenyo lwamaphoyisa angene emphakathini awutshela ukuthi athungatha uNksz Majozi nokuthe uma umphakathi ubuzisisa ngokufunwa kwakhe amaphoyisa akuveza ukuthi uhamba eqola abantu.

UNksz Majozi ofundisa abantu abadala eBhekokuhle Primary School, kuthiwa ubethatha ezingane zamantombazane ezingasebenzi ngakubo ahambe nazo aye ebhange lakwaStandard afike azivulele amakhadi kodwa angaziniki wona ahlale ngakuye.

Izolo abantu abasetshenziswa nguNksz Majozi banikele kuleli bhange ePinetown bafike bathola ukuthi ubethola imali ayikhiphe esebenzisa amakhadi ahlukene nokungacaci ukuthi le mali ibiphuma kuphi.

Ngemuva kokuvula la makhadi kuthiwa ubethatha la mantombazane athi uzowanikeza imali noma awafake endaweni edayisa inyama echochobaliswe emafutheni iKFC, ebonga ngamenzele khona.

UNksz Zamo Malungi uthi njalo kuleli khadi alivuliswa uNksz Majozi bekungena imali engango-R1 400 angazi naye ukuthi iphuma kuphi.

“Uhambe nami wathi ufuna ukungitholela umsebenzi asihambe siyovula ikhadi lasebhange ukuze imali ingene kulo uma sengisebenza. Ubengafuni ukusitshela ukuthi uzositholela kuphi umsebenzi namakhadi ethi uzosinika uma sesiqashiwe, singazi ukuthi uyawasebenzisa ngasese. Ngimangalile sekufika amaphoyisa ethi ayamfuna sagcina sizwile ukuthi ubesebenzisa amagama ethu ehola ngawo la makhadi,” kusho uNksz Malungi.

Uthe bahambile baya ekhaya kubo ngemuva kokuzwa ukuthi ufunwa ngamaphoyisa wabatshela ukuthi ngeke esabatholela umsebenzi ngoba sebemcebe emaphoyiseni.

“Ebhange basitshele ukuthi la makhadi esiwasebenzisayo anenombolo eyimfihlo eyodwa, imali beyithi uma ingena ayikhiphe yonke kanye kanye,” kuchaza yena.

Bathe okunye abakutholile ukuthi kukhona umsebenzi wakuleli bhange uNksz Majozi abesebenzisana naye ukwenza lokhu.

Umnyango wezokuThutha KwaZulu-Natal usukubeke kwacaca ukuthi angeke uyeke ukugijimisa labo abasuke befuna ukuba ngamaphoyisa omgwaqo.

MLUNGISI GUMEDE

UMNYANGO wezokuThutha KwaZulu-Natal usukubeke kwacaca ukuthi angeke uyeke ukugijimisa labo abasuke befuna ukuba ngamaphoyisa omgwaqo, yize kusanda kushona abantu esigamekweni esaba undabamlonyeni ngesikhathi kuqhutshwa lolu hlelo eMgungundlovu nyakenye.

Esithangamini sabezindaba izolo, uNgqongqoshe walo Mnyango, uMnuz Willies Mchunu, uthe yize bekhathazekile ngesigameko sokushona kwabantu abayisishiyagalombili kodwa uhlelo lokuhlola abantu ngokubagijimisa ukuthi bakulungele yini ukuba ngamaphoyisa luyaqhubeka.

Kwashona abantu abayisishiyagalombili ababefesele umsebenzi ngesikhathi bequleka ngenxa yelanga elalishisa.

“Ukugijimisa labo abasuke befuna ukuba ngamaphoyisa, ngenye yezinto ezisemqoka uma kuqashwa amaphoyisa ngenhloso yokuthola ukuthi lowo muntu osuke efuna umsebenzi uwulungele yini,” usho kanje.

Uthe lolu hlelo kade lwaqala wukuthi kwabaneshwa kwenzeka isigameko saseHarry Gwala Stadium, eMgungundlovu.

UMchunu uthe bazophinde balinde isinqumo seKhomishini ejutshwe ukuthi iphenye ngalesi sigameko bezwe ukuthi ithini.

Uthe uma iKhomishini ithi abaluyeke lolu hlelo bazosihlonipha leso sinqumo, wengeza ngokuthi kodwa bazofuna izincazelo ngokuthi ifinyelele kanjani kuleso sinqumo.

“Le ndaba sayixoxa noNdunankulu waKwaZulu-Natal uDkt Zweli Mkhize ukuthi asifuni ukuthi kwenziwe iKhomishini ezoholela ukuthi sigcine sesiphenyana sodwa,” usho kanje.

Uthe uma futhi iKhomishini ithi kumele ahoxe esikhundleni sakhe, uyokwenza njengoba kushiwo.

Uphinde waveza ukuthi uhlelo lokuqasha amaphoyisa njengoba kunezikhala ezingu-90 luyaqhubeka ngomhlaka 20 kwephezulu, kodwa wakugcizelela ukuthi abantu sebezohlolelwa ngasemakubo.

Uthe bathola izicelo zomsebenzi ezingu-150 000 ngemuva kokukhangisa lo msebenzi, baba ngu-40 700 ababizwa ukuthi bazohlolwa, manje sekusele abangu-13 000 osekusele ukuthi bahlolwe ukuthi bashayela kanjani baphinde bahlolwe nakwenzinye izinto ngaphambi kokuthi benze inhlolokhono yokugcina engabafaka emsebenzini.

Inhloko yoMnyango wezokuThutha KwaZulu-Natal, uMnuz Sbusiso Gumbi, ithe luselude ukhalo ngaphambi kokuthi ziphothulwe izivivinyo,

UGumbi ukugcizelele ukuthi okwamanje asisezoba khona isigaba sokugijima njengoba sekudluliwe kusona.

Uthe labo abangu-13 000 basazohlolwa ukuthi baphile kahle, kubhekwe nezicucu zabo ukuthi zisemthethweni yini.

Isabisa ngokhukhulelangoqo wesiteleka inyunyana yamaphoyisa omgwaqo ophikweni lakwaRoad Traffic Inspectorate eThekwini uma engasuli esikhundleni umphathi walolu phiko kulesi sifunda.

NQOBIZIZWE ZWANE

ISABISA ngokhukhulelangoqo wesiteleka inyunyana yamaphoyisa omgwaqo ophikweni lakwaRoad Traffic Inspectorate (RTI) eThekwini uma engasuli esikhundleni umphathi walolu phiko kulesi sifunda.

Inyunyana i-Police and Prisons Civil Rights Union (Popcru) iveze ukuthi iyakumisa ukuhudula izinyawo kwamaphoyisa akwa-RTI izolo, ePinetown obesekuqhubeke isikhathi esingaphezu kwesonto ithi ifuna ijazi ligcwale umoya kumphathi walama phoyisa kulesifunda ikhala ngokuthi ubefukamela omunye umphathi abafuna axoshwe.

“Siyakumisa ukugqoza ukusebenza namhlanje (izolo) ngoba sesivumelene ngokuthi lo mphathi ebesifuna amiswe ngeke abuyiselwe kulesi siteshi,” kusho uNobhala wePopcru KwaZulu Natal, uMnuz Kwenza Nxele.

Eqhubeka uthe inhloso yesiteleka abasihlelayo wukuthi kusule umphathi wesifunda.

“Izifunda ezingaphansi kobuholi bakhe azisamfuni ngoba uhlulekile wukuba nomgogodla wokumela iqiniso evikela abaphathi abathile,” kusho uNxele.

Isolezwe lifika kule ndawo lazithela phezu kojenga lwezimoto zikanise ngaphandle kwesiteshi samaphoyisa ePinetown kungangeni moto ngaphakathi ngisho ezezikole ezifundisa ukushayela.

Abantu abebengena ngaphakathi bebefika baqhinqe ezitebhisini kungekho muntu ozobasiza ngoba kubhikisha amaphoyisa.

Baqale ukuthola usizo ngo-10 ekuseni ekubeni kuvalwa ngo-2.30 ntambama.

Iningi labantu abebezofuna usizo belinikina amakhanda likhala ngokuthi sekuyisikhathi lingalutholi usizo. Imizamo yokuthola ukuphawula kubaphathi bamaphoyisa omgwaqo izolo ayiphumelelanga.

Ugcine ezitholile izihlobo zikanina uSphesihle Mchunu waseMlazi kwa-J, obedidekile engazi ukuthi uzokwenze njani emuva kokushiywa ngunina emhlabeni.

NQOBILE MASIMULA

UGCINE ezitholile izihlobo zikanina uSphesihle Mchunu (18) waseMlazi kwa-J, obedidekile engazi ukuthi uzokwenze njani emuva kokushiywa ngunina emhlabeni.

Isolezwe libike ngodaba lukaSphesihle izolo, nalapho ebecela khona ukufuniswa izihlobo zikanina oze washona engakaze amtshele into eqondile ngazo.

Inkinga enkulu abebhekene nayo uSphesihle nabafowabo ababili abancane, bekuyimali yokufihla unina nokuyikhona okwenze wacela usizo lokufuniswa izihlobo zakhe.

UNksz Zandile Mchunu wagcina ngokuthi atshele indodana yakhe ukuthi ungowasesigodini saseMachunwini, eCabhane, eMthwalume.

Umakhelwane obambe iqhaza elikhulu ekutholakaleni kwezihlobo zikaNksz Mchunu, uNkk Bongi Mkhize, uthe baye eMthwalume behambe bebuza kunoma ngubani ongaba nolwazi ngalo mndeni wakwaMchunu emuva kombiko weSolezwe.

“Yize kungabanga lula njengoba iminingi imindeni yakwaMchunu kuleya ndawo kodwa sigcine siwutholile umndeni okuyiwona. Kusuke umthwalo kuSphesihle ngoba ufice ngisho ugogo wakhe emuva kweminyaka engaka,” kusho uNkk Mkhize.

Uthe umndeni wakwaMchunu uyenzile imizamo ethile yokuthi kulandwe isidumbu sikaNksz Mchunu esibhedlela iPrince Mshiyeni lapho eshonele khona, safakwa emakhazeni aseMthwalume abangcwabi abazibophezele ukufaka isandla.

“Osekusele wukuthi kuphothulwe amalungiselelo omngcwabo okulindeleke ukuthi ube ngoMgqibelo ngesonto elizayo. Ngiyakholwa ukuthi umndeni usengaluthokozela usizo lokuthwaliswa izindleko zomngcwabo ngoba ugogo kaSphesihle akanawo amandla anele okuzithwala zonke izindleko,” kuchaza uNkk Mkhize.

Uthe abafowabo bakaSphesihle ababili, oneminyaka emihlanu noneminyaka engu-12, bebehlaliswe ngabanye omakhelwane ngesikhathi beye eMthwalume.

Noma ngubani ongaba namandla okusiza lo mndeni angaxhumana neSolezwe ukuze axhunyaniswe nalo mndeni odinga usizo.

Umgijimi u-Oscar Pistorius nomndeni wakhe sebezwakalise ukukhathazeka ngendlela abezindaba abaphawula ngayo ngobudlelwano bakhe uPistorious nomufi obeyintombi yakhe uReeva Steenkamp.

INATHELI YESOLEZWE

UMGIJIMI u-Oscar Pistorius nomndeni wakhe sebezwakalise ukukhathazeka ngendlela abezindaba abaphawula ngayo ngobudlelwano bakhe uPistorious nomufi obeyintombi yakhe uReeva Steenkamp.

“Ukungabi nazwelo okukhonjiswa ngabanye abaphawula ezinkundleni zokuxhumana kuyethusa. Bakhombisa ukungawuzweli nakancane umndeni kamufi uReeva nabangani,” kusho umndeni kaPistorious esitatimendeni.

“Asikho isikhathi lapho lungadluli usuku uPistorious engazange alilele intombi yakhe uReeva nomndeni wakhe nabo bonke labo ababesondelene naye uReeva. Bonke uhlale ecabanga ngabo.”

UPistorius ubhekene necala lokubulala. Kuthiwa wadubula intombi yakhe ngosuku lwezithandani ngoFebhuwari 14 emzini wakhe osePitoli.

Wakhululwa ngebheyili ngoFebhuwari 22 ngemibandela yokuthi angayi kwelinye izwe.

Wafaka isicelo sokuguqula leso sinqumo eNkantolo eNkulu yasePitoli, nangempela saxegiswa.

Okhulumela umndeni kaPistorious, uNkk Anneliese Burgess, uthe: “Umndeni kaReeva nabo bonke abayizihlobo nabangani abebemthanda bayohlale besemicabangweni yethu nasemikhulekweni yethu. Yize ubudlelwano babo babusebusha kodwa useyilo ilungu lomndeni.”

UNkk Burgess uthe ngesikhathi uPistorious noReeva besathandana, uPistorius akazange abe nethuba lokuhlangana nomndeni kaReeva.

Isola abaholi be-NFP abasuswe ezikhundleni iMeya ye-ANC yaseMbabazane, esinde ngokulambisa ilalelwa unyendle eduze komuzi wayo.

CELANI SIKHAKHANE

ISOLA abaholi be-NFP abasuswe ezikhundleni iMeya ye-ANC yaseMbabazane, esinde ngokulambisa ilalelwa unyendle eduze komuzi wayo, abantu abaqhulule izinhlamvu emotweni yayo kodwa bagcina bebaleka, ngoLwesithathu ntambama.

UNkk Phindile Strydom, uhlangabezane nalesi sigameko ebuya emhlanganweni weqembu lakhe obuseMnambithi weProvincial Task Tea, obudingida ngesimo soMasipala basoKhahlamba ababonakala besenkingeni yokuphathwa.

Ngesikhathi echaza lesi sigameko, uthe uyathuthumela futhi uyesaba ngoba akazi ukuthi kuzokwenzekani njengoba esindile nonogada bakhe.

“Angingabazi ukuthi abantu abenze lokhu yibo laba be-NFP abasuswe ezihlalweni ngemuva kwesinqumo senkantolo njengoba bese bengikhiphile ngevoti kodwa inkantolo yakuphikisa lokhu, kwagcina ngokuthi umasipala wethu uphucwe amandla,” kusho uNkk Strydom.

Echaza uthe ngesikhathi bezongena ekhaya kuvumbuke abantu abangabazi, badubula bebhekise emotweni yakhe, sekunzima nokuyihlehlisa kusha inhlamvu.

Uthe badubule izikhathi eziningana kwaze kwalamula unogada ovele waphuma ngendlela naye angayibonanga wathola intuba yokudubula ebumnyameni base bebaleka ngoba bebengamboni ukuthi ucuthe ngakuphi.

Uqhube wathi nakuba kudutshulwe ngentululwane yezinhlamvu kodwa imoto ayilimalanga nabo futhi abashayekanga ngoba okugqamile ukuthi laba abebedubula bekuzwakala ukuthi badubula ngezibhamu ezincane futhi badubulela kude abasondeli.

Uthe okunye okubasindisile ukuthi bekumnyama ngoba kuyindawo yasemakhaya eMbabazane futhi nomuzi wakhe ukhona lapho.

Lo masipala ubesematheni ngesikhathi amakhansela e-NFP nawe-IFP ne-DA ehlangana eketula uNkk Strydom we-ANC noSomlomo, kwaze kwaphoqeleka ukuthi kungenelele uMnyango wezokuBusa nokuBambisana esifundazweni.

Nakhona lokho kwenzeka ngemuva kokuthi i-ANC esifundazweni yacela uNksz Nomusa Dube (osesithombeni) onguNgqongqoshe walo Mnyango ukuthi angenelele ngoba zonke izinqumo ezithathwa yilo masipala azikho emthethweni.

Phakathi kwazo kubalwa nokuqashwa kwemenenja kamasipala, okuthiwa ibiyi-NFP kanti lokho kwenziwa ngaphandle kokulandela imigudu efanele.

Kuyimanje uMvikeli woMphakathi uphenya uNksz Dube ngodaba lokuthi lomasipala wangenelela kuwo ngokwezepolitiki, wasebenzisa izinsiza zikahulumeni ukukhipha iMeya ye-NFP uMnuz Mbuzeleni Mkhize, okunguye owammangalela kuMvikeli woMphakathi.

UNksz Dube esitatimendeni sakhe asikhiphile, usigxekile lesi senzo sokuzama ukusoconga uNksz Strydom asichaze njengobugwala.

“Siyasigxeka lesi senzo sobugwala ebesiqondiswe kuMeya, okuyinto esithuse nomphakathi wonke wale ndawo.

Noma singasazi isizathu kodwa sifuna ukukugcizelela ukuthi lesi senzo sobugwala senziwe ngenhloso yokuphikisana nokufunwa ngabantu,” kusho uNksz Dube.

UNksz Dube unxuse umphakathi ukuthi uyekele lolu daba kwabomthetho.

UMnuz Maliyakhe Shelembe we-NFP, uthe beyigeqembu ababoni ukuthi sebengaze bahlangane bacabangele uNkk Strydom ukuthi akufanele aphile ngoba akukho abangakuzuza ngokulinyazwa kwakhe ngoba nesikhala sakhe singavalwa ngomunye umuntu we-ANC.

Amaphoyisa aKwaZulu-Natal athe bekungakaboshwa muntu ngalesi sigameko kodwa asaphenya ngembangela yesehlakalo.

Lishone elayizolo ziphambili izindaba zokugwazwa koqweqwe lommeli wakuleli u-Advocate Dali Mpofu obephangwa yizigebengu engcebeleka ebhishi e-East London, e-Eastern Cape.

ZANELE MSOMI

SIMPHIWE NGUBANE

LISHONE elayizolo ziphambili izindaba zokugwazwa koqweqwe lommeli wakuleli u-Advocate Dali Mpofu obephangwa yizigebengu engcebeleka ebhishi e-East London, e-Eastern Cape. UMpofu (51), owayeyisikhulu esiphezulu enhlanganweni yezokusakaza i-SABC, kuthiwa ubeshaywa wumoya ngasolwandle ngesikhathi izigebengu zimbamba inkunzi.

Imibiko kayicacisanga ukuthi ubehamba nobani kwenzeka lesi sigameko. Kuthiwa uphucwe umakhalekhukhwini nezinye izimpahla abeziphethe ezingadalulwanga.

UBrigadier Miranda Mills, okhulumela amaphoyisa e-Eastern Cape, ukuqinisekisile ukuthi uMpofu ugwazwe izolo ntambama kodwa ngesikhathi sokuloba ubelulama esibhedlela iSt Dominic.

Izindaba zokugwazwa kwalesi sikhulu zisabalale okomlilo wequbula nasezinkundleni zokuxhumana, abanye besifisela ukwelulama ngokushesha.

UMnuz Jackson Mthembu, okhulumela i-ANC uMpofu angummeli wayo, utshele Isolezwe ukuthi namanje akakholwa ukuthi umuntu omkhulu nobaluleke kangaka eNingizimu Afrika cishe wafela umakhalekhukhwini.

“Sicasuke kakhulu yizenzo zobugebengu kuleli. Siyathemba ukuthi amaphoyisa azozibamba ngokushesha lezi zigilamkhuba zithole umvuzo wazo,” kusho yena.

Ngesikhathi ethintwa izolo ebusuku, uMthembu bekuzwakala ukuthi usathukile njengoba eshilo ukuthi usanda kuzithola lezi zindaba futhi abakakhiphi ngisho isitatimende kwabezindaba. Uthe okwehlise amaphaphu ukuthi uMpofu usindile futhi sebezwile ukuthi uzodedelwa maduze esibhedlela. Ufisele nomndeni wakhe ukuthi usheshe ukwamukele nangokomqondo lokhu okwenzekile ngoba lezi yizindaba ezithusayo nezibeka impilo yomuntu engcupheni.

U-Advocate Mpofu ungomunye wabameli abanohlonze kuleli futhi uyahlonishwa ngamagalelo akhe.

Igama lakhe lisematheni kulezi zinsuku njengoba engummeli wezihlobo zabashonelwa ngabavukuzi emayini yaseLonmin, eMarikana ngo-Agasti nyakenye.

Umele nabavukuzi abasinda kulesi sehlakalo njengoba kuqhubeka ubufakazi kwiKhomishini ka-Ian Farlam.

UMpofu uphinde abe nguMengameli weSouthern African Broadcasting Association.

Uyilungu lamabhodi amaningi kuleli okubalwa neBoxing South Africa.

Uzakhele udumo nakwezamabhizinisi futhi uke wahlabana ngendondo yeBusiness Person of the Year ngo-2004 emcimbini weBBQ Magazine.

Ubalwa nezifundiswa ezinohlonze kuleli ngenxa yoxhaxha lweziqu zemfundo. Kumanje wenza izifundo zeBachelor of Commerce.