Ungqongqoshe wamaPhoyisa, uMnuz Nathi Mthethwa uthi bachithe imali engu-R300 million ngamacala okumangalelwe kuwo amaphoyisa akuleli eminyakeni emithathu eyedlule.

UNGQONGQOSHE wamaPhoyisa, uMnuz Nathi Mthethwa uthi bachithe imali engu-R300 million ngamacala okumangalelwe kuwo amaphoyisa akuleli eminyakeni emithathu eyedlule.

Lokhu kuvela vele sishayekile isithunzi ngezigameko zakamuva ezithinta isibhicongo saseMarikana namaphoyisa ayisishiyagalolunye abhekene necala lokubulala umshayeli wamatekisi waseDaveyton odabuka eMozambique uMnuz Mido Macia.

Ngokwempendulo kaMthethwa ayenze ephalamende, isibalo samacala okumangalelwe kuwo amaphoyisa anyukile esuka ku 3 007 ngo 2010/2011 aya ku 5 090 ngo 2011/12, kodwa ayemaningi kakhulu ngo 2009/2010 engu 7 004.

Lamacala abandakanya owokuboshwa kwabantu ngephutha, inkohlakalo, ubudedengu kanye nodlame lwamaphoyisa.

UMthethwa uthe ngonyaka odlule bachitha imali engu R131m bekhokhela abameli emacaleni asezinkantolo baphinde bakhokha ngaphansi kuka R4m bekhokhela izinkampani ezizimele ngamacala okwakumangalelwe kuwo amaphoyisa.

UMthethwa usejube uKhomishana wamaPhoyisa kuzwelonke, uGeneral Riah Phiyega (osesithombeni), ukuba angenelele ngokushesha ukuze kunciphe isibalo samacala abhekiswe emaphoyiseni awaphethe.

“Emizameni yokwehlisa isibalo samacala abhekiswe emaphoyiseni, abaphathi kumele babheke, bacubungule indlela amaphoyisa asebenza ngayo eMnyangweni,” kusho uMthethwa izolo.

“Sidinga ukuvala igebe ngokubheka ukuthi yiluphi uhlobo lokuqeqeshwa olunganikwa amaphoyisa. Uma kunesidingo ajeziswe amaphoyisa ephula umthetho.”

AbeHuman Rights Commission phambilini kulo nyaka baveza ukhathazeka ngezibalo zamacala amaphoyisa. – Intatheli yeSolezwe

Isikhathi obekumele kube ngesenjabulo kunina womfana onxeshezelwe ngezigidi ngemuva kokunqunywa umlenze esibhedlela, sesiphenduke isiqalekiso njengoba ephunga abantu asebecabanga ukuthi useyinjinga.

ZANELE MSOMI

ISIKHATHI obekumele kube ngesenjabulo kunina womfana onxeshezelwe ngezigidi ngemuva kokunqunywa umlenze esibhedlela, sesiphenduke isiqalekiso njengoba ephunga abantu asebecabanga ukuthi useyinjinga.

UNksz Thokozani Mkhize waseMalukazi ngaseMlazi, ungunina kaMinenhle (10) owanqunywa umlenze ngenxa yobudedengu besibhedlela saseMlazi, iPrince Mshiyeni.

Uthi akasakutholi ukuphumula selokhu evele kwabezindaba ngokunxeshezelwa ngo-R7.1million nguMnyango wezeMpilo eKZN.

Utshele leli phephandaba ukuthi uphunga izingcingo ezingena ubuthaphuthaphu zimbuza ngemali ayitholile.

Bese kuphele iminyaka emihlanu uNksz Mkhize egqigqa kubammeli efuna isinxephezelo sendodana.

UMinenhle owenza uGrade 5 eWindow Heights Primary, walimala eneminyaka emihlanu ewa esihlahleni.

Unina wamyisa esibhedlela eMshiyeni belokhu bemphindisa emuva okugcine kudingeka anqunywe umlenze.

Umndeni wakhe ubufuna isinxephezelo sika-R11.1-million, ngoMsombuluko umnyango wezempilo nabameli bakaFriedman and Associates, bavumelene ngokuthi lo mndeni unxeshezelwe ngo-R7.1million.

Izolo Isolezwe livakashele uNksz Mkhize, ukhombise ukwethuka futhi engasafuni nokuvela ephephandabeni ngoba ethi usenengcindezi novalo.

“Sengiphethwe yikhanda yile ndaba. Bengingazi ukuthi izongifaka enkingeni kanje,” kusho yena.

Uthe babodwa abamshayela izingcingo besho sakubhuqa ukuthi wafa yimali, abanye bambuza ukuthi uzoyenzani imali engaka, basho nokuthi usezoceba.

“Kungcono nokuthi yimali engiyiwinile manje ngeyomuntu odinga ukunakekelwa ngokwempilo. Kumanje anginawo ngisho u-R100 ephaketheni ngoba imali izoya esikhwameni esizobhekela imfundo nempilo kaMinenhle.”

UNksz Mkhize unezingane ezintathu kanti uMinenhle ungowesibili, uyise kaMinenhle washona ngo-2010 evele esenqunyiwe umlenze. Zehla zibe yimpophoma izinyembezi uma exoxa ngendlela impilo yendodana yakhe eyashintsha ngayo emuva kokunqunywa umlenze.

Uthi kwaba nzima sekufanele atshele uMinenhle esibhedlela ukuthi kuzomele anqunywe umlenze.

“Angikaze ngiphatheke kabuhlungu kanje. UMinenhle wavele wakhala ethi akafuni ukunqunywa. Kusukela lapho ngaphathwa yikhanda eliyisimanga,” echiphiza.

Uthe kwaphela izinyanga ezintathu uMinenhle esephume esibhedlela ngaphambi kokufakelwa umlenze. Lo mle-nze athi wawuthola esibhedle-la ubungekho esimeni.

“Wayesaba nokuhamba ngawo efuna ukudondolozela. Ngelinye ilanga wakhumuka siphakathi nomgwaqo ngamhudula sengisaba izimoto. Bengikhala njalo uma engibi-kela ngokugconwa yizingane esikoleni,” kuxoxa uNksz Mkhize.

Uthi sekungcono njengoba esathola imilenze yohlobo olusezingeni ngosizo lwaba-meli, omunye ngowokuhamba kanti omunye ngowokugijima.

“Ubevele ezifela ngokugijima engakalimali. Namanje uyagijima, sengicele nothisha ukuthi angenele nemijaho yokugijima esikoleni.”

Uthe akukho okutheni okuzoshintsha ngempilo yabo ngoba noMinenhle uzoqhubeka esikoleni akuso. Ukugcizelele ukuthi yonke imali uyibekele imfundo kaMinenhle.

UMnuz Michael Friedman ongumnikazi weFriedman and Associates uthe banelisekile ngesinxephezelo yize bekungamele icala lidonse kangaka. Ukuqinisekisile ukuthi imali ngeyezindleko zempilo kaMinenhle.

Uthe bebevele batshelwa kudala ukuthi bazowina ngoba odokotela babe budedengu, obekusele yisivumelwano sesinxephezelo.

Ubufakazi bukababa besehlo esenzeka eminyakeni engu-25 edlule buyamanisa uNkk Winnie Madikizela-Mandela nokubulawa kwabafana ababili.

INTATHELI YESOLEZWE

UBUFAKAZI bukababa besehlo esenzeka eminyakeni engu-25 edlule buyamanisa uNkk Winnie Madikizela-Mandela nokubulawa kwabafana ababili.

Ngo-1996, uMnuz Nicodemus Sono watshela iTruth and Reconciliation Commission ukuthi wayibona injani okokugcina indodana yakhe uLolo ngoNovemba 13, 1988, ishaywe kabuhlungu isetekisini okwakukhona kuyo uNkk Madikizela-Mandela namanye amalungu eMandela United Football Club.

Izolo oKlebe bathe noma ngubani owayekuleya tekisi eyayiluhlaza ngombala ungumsolwa ekubulaweni kukaLolo Sono noSiboniso Shabalala. Bacela noma ngubani ongaba nolwazi ngalesi sigameko ukuthi eze nobufakazi.

Leli cala eselineminyaka engu-25 lenzeka livukile izolo ngesikhathi amalungu eNational Prosecuting Authority’s Missing Persons Task Team, ehlangene namaphoyisa embe amathambo alaba ababulawa emathuneni ase-Avalon, eSoweto, izolo.

La mathambo abekhishwa kulawo alabo abangcwatshwa nguhulumeni njengabantu abangenabani abehluhlukaniswe ngu-50m kwelinye kanti kukholakala ukuthi ngakaSono noShabalala.

Okhulumela oKlebe, uMnuz Paul Ramaloko, uthe mabili amadokodo amacala aphenywayo; avulwa ngo-1988 ngesikhathi kutholakala lezi zidumbu eDiepkloof Extension zigcwele amanxeba okugwazwa esifubeni. Ngaleso sikhathi azizange zihlonzwe ukuthi ngezobani. .

URamaloko uthe baqale ukubheka leli cala ekuqaleni kwalo nyaka ngemuva kokuthola umbiko kwabe-Missing Persons Task Team wokuthi kungenzeka ukuthi laba bobabili bangcwatshwa emathuneni ase-Avalon. URamaloko akashongo noma uMadikizela-Mandela ungomunye wabasolwa, kodwa uthe labo ababesetekisini bangabasolwa.

“Okwamanje asikwazi ukukhomba abathile ngeminwe,” usho kanje.

Uthe kungenzeka ukuthi etekisini kwakukhona abanye ababulawa.

Uyise kaLolo watshela iTRC ngo-1996 ukuthi indodana yakhe yathathwa yileli tekisi eliluhlaza ngoNovemba 13, 1988.

Uthi ngobusuku baleli langa watshelwa ukuthi uNkk Madikizela-Mandela ufuna ukumbona. Wahamba wayogibela kuleli tekisi.

“Ngesikhathi ngingena etekisini ngabona uNkk Mandela kukhona nomshayeli uMichael nabanye abafana engingabazi. Indodana yami uLolo wayekhona naye kuleli tekisi. Wayebukeka eshaywe kanzima ebusweni futhi egodola.”

Kuthiwa uNkk Madikizela-Mandela watshela uSono ukuthi uzoyithatha indodana yakhe ngoba iyimpimpi.

UShabalala, owayengumakhelwane kaSono, wathunjwa ngosuku olulandelayo. NgoNovemba 15, 1988, izidumbu zalaba bafana zatholwa zilahlwe eDiepkloof Extension.

UNkk Madikizela-Mandela akatholakalanga izolo ukuthi aphawule.

Izolo emindeni emibili yalaba bafana ibibukela ithukile ngesikhathi kumbiwa izidumbu. Usuku luqale ngokuthi abomndeni wakwaSono bachele okusamuthi ethuneni kanti abomndeni kaShabalala bathandazile.

Kule mindeni ukutholakala kwala mathambo kuletha ithemba lokuvalwa kwaleli khasi ngemuva kweminyaka befunwa.

“Iqiniso lizophuma ngoba manje sibona ebesingasacabangi ukuthi siyoke sikubone,” kusho ubaba omncane kaLolo, uMnuz John Sono.

Bekukhona nomuzwa wokudinwa.

“Ngidnwe kabi,” kusho umfowabo kaShabalala uPilani, “kumele baliqhube leli cala.” Izihlobo zikaShabalala zithe zizolinda zize zihlonzwe lezi zidumbu.

Umama kaLolo, uNkk Dorothy Sono, utshele labo abebemba ukuthi lamathambo akuwona awendodana yakhe ngoba intambo ebomvu etholakale eduze kwawo ayikaze isetshenziswe indodana yakhe.

Abe-Missing Persons Task Team bathe kusazothatha amasonto lamathambo ehlolwa ukuthi ngawabo ngempela yini labafana bakwaSono nakwaShabalala.

Ungqongqoshe wezokuBusa ngokuBambisana neziNdaba zoMdabu KwaZulu-Natal, uNksz Nomusa Dube usebizele esigcawini sokuqondisa izigwegwe bonke omasipala abathole imibiko emibi embikweni kaMcwaningi-mabhuku, uMnuz Terrence Nombembe.

INTATHELI YESOLEZWE

UNGQONGQOSHE wezokuBusa ngokuBambisana neziNdaba zoMdabu KwaZulu-Natal, uNksz Nomusa Dube usebizele esigcawini sokuqondisa izigwegwe bonke omasipala abathole imibiko emibi embikweni kaMcwaningi-mabhuku, uMnuz Terrence Nombembe.

UNgqongqoshe uDube ufuna ukuthi labo masipala bazochaza ngezizathu ezenze bangenzi kahle.

IziMeya nezikhulu eziphezulu koMasipala kulindeleke ukuthi zizochaza kabanzi kuNksz Dube ngezinto eziholele ekutheni kube khona imibiko emibi ngomasipala yazo efana nokungalandelwa kwemigudu efanele uma kukhishwa imisebenzi nokusetshenziswa budlabha kwemali yemikhandlu.

Lena yimizamo kaNksz Dube yokwenza isiqiniseko sokuthi akukho nowodwa umasipala KwaZulu-Natal othola umbiko omubi ngo-2014.

“Ohulumeni basemakhaya yibona abasekhaleni ekulethweni kwezidingo zomphakathi, ukuphumelela nokuhluleka komasipala ukuhlinzeka izidingo kulimaza isithunzi sikahulumeni wonkana. Ezingeni lokusebenza nakwezombusazwe, ukuphathwa budlabha kwezimali kudweba isithombe esingesihle kuphinde kuqubule nezinsolo zenkohlakalo,” usho kanje.

UNksz Dube uthe unethemba lokuthi lesi sinyathelo sokuphoqa izikhulu ukuthi zibhekane nomphumela wemisebenzi yazo kuzosiza ukuthi izimali ziphathwe ngendlela, wengeza ngokuthi amakomidi abhekelele ukusetshenziswa kwezimali nawo kuzofanele aphoswe imibuzo mayelana nokusetshenziswa kwemali ngenhloso yokwenza isiqiniseko sokuthi yonke into ihamba kahle.

Ukhale izinyembezi zenjabulo ugogo waseMlazi obesehleli lubhojozi engenelwa yizigebengu zimphuce imali yempesheni ngesikhathi kuvulwa kabusha umuzi wakhe obulungiswa ngosomabhizinisi baseMlazi abezwa udaba lwakhe emaphoyiseni akule ndawo.

BAWINILE NGCOBO

UKHALE izinyembezi zenjabulo ugogo waseMlazi obesehleli lubhojozi engenelwa yizigebengu zimphuce imali yempesheni ngesikhathi kuvulwa kabusha umuzi wakhe obulungiswa ngosomabhizinisi baseMlazi abezwa udaba lwakhe emaphoyiseni akule ndawo.

UNkk Sizani Mbongwa (89) uhluleke wukuzibamba wakhala ngesikhathi amaphoyisa nosomabhizinisi benze umcimbi wokuvula kabusha umuzi wakhe obulungiswa.

Uthe uqale ukungenelwa yizigebengu ngoDisemba nyakenye.

Uthe ingane kamzala wakhe yayiphuma emsebenzini ebusuku kwathi uma ivula isicabha kwakhona abasiphushayo emuva kwayo bayikhomba ngesibhamu bathi ayikhiphe imali.

“Mina ngangicashe ngaphansi kombhede, bangihudula bengikhipha, ngalimala onyaweni. Bangifuna imali yempesheni engangikade ngiyoyihola. Bathatha imali namaselula amabili bashiya kumahliphihliphi endlini,” kusho uNkk Mbongwa.

Uthe sebehambile laba bantu bacela usizo komakhelwane kwafonelwa amaphoyisa afika ngokushesha.

Uthe emuva kwalesi sigameko ubephila ngokuhlupheka kukhona abafika ebusuku bezoxakazisa isicabha bafune ukuvula. Uthe ubehlalele ovalweni ngoba uzihlalela nomzukulu wakhe nengane yesihlobo.

Amaphoyisa ayezozwa udaba lokuhlaselwa kukaNkk Mbongwa axhumana noCaptain Khephu Ndlovu owawaxhumanisa nosomabhizinisi ukuze kulekelelwe ugogo alungiselwe umuzi wakhe uphephe.

Kulo muzi osulungisiwe sekufakwe izicabha namawindi okusha, kwabiywa, kwapendwa kabusha kwalungiswa nophahla.

“Angazi ngizobonga ngani emaphoyiseni okuyiwona afika la abona lolu sizi lwami angicelela usizo njengoba namuhla sengizizwa ngiphephile kuleli khaya,” kusho uNkk Mbongwa.

Ugogo usizwe abakwa-Y Motors, uMlazi Discount Hardware, abakhiphe izimpahla zokulungisa bakhipha nabantu abazokwenza umsebenzi wokulungisa ikhaya no-Dkt Abu Baker waseMlazi Medical Centre othembise ukuthi uzosiza ugogo ngokufeza zonke izidingo zempilo eziqondene naye kuze kube uyahamba emhlabeni.

UMnuz Ishmail Hassan ongusomabhizinisi uthe bakubona kufanele ukuthi bafake isandla emphakathini abasebenza kuwo uma udinga usizo.

“Kuyadabukisa ukuthi kunamacala amaningi okudlwengula nanodlame abhekiswe kubantu abadala nabangakwazi ukuzilwela. Sicela amaphoyisa aphenye ngalamacala ukuze abenzi bobubi bathole isijeziso esifanele baboshwe,” kusho uHassan.

Ugogo uzophinde athole igilosa nyanga zonke komunye usomabhizinisi wase-Mgungundlovu.

Kulo muzi obese kukhona nomakhelwane kuwona, amaphoyisa athole ithuba lokutshela abantu ukuthi awezi uma ezojaha izigebengu kuphela kodwa nawo ayasondela uma kudingeka ukuba kunakekelwe kuthuthukiswe umphakathi.

UGeneral Riah Phiyega izolo ukuphikile ukuthi wahleka wenza nehlaya ngesikhathi kukhonjiswa imifanekiso ye-video yabavukuzi ababulawa ngo-Agasti 16, nyakenye eLonmin, eMarikana, eNorth West.

INTATHELI YESOLEZWE

Ukhomishana wamaPhoyisa kuzwelonke, uGeneral Riah Phiyega (osesithombeni) izolo ukuphikile ukuthi wahleka wenza nehlaya ngesikhathi kukhonjiswa imifanekiso ye-video yabavukuzi ababulawa ngo-Agasti 16, nyakenye eLonmin, eMarikana, eNorth West.

Umfanekiso we-video uphinde wakhonjiswa uJaji Ian Farlam owengamele iKhomishini ephenya ngesibhicongo saseMarikana.

“Kungiphatha kabi ukubona ukuthi kunabacabanga ukuthi ngahleka. Kubuhlungu lokhu.

“Ngaphandle kokuthi akusibo ubuntu, akuyona nje indlela engiziphatha ngayo leyo futhi akusilona iqiniso,” kusho uGeneral Phiyega etshela iKhomishini.

“Lokhu ngiyakuphikisa. Okwenzeka ngo-Agasti 16 kubuhlungu.”

UGeneral Phiyega ubephendula embikweni owakhishwa ephephandabeni iTimes ngo-Okthoba owathi wenza ihlaya ngesikhathi kudlalwa umfanekiso ngokufa kwabavukuzi.

Uthe efunda umbiko waphatheka kabi, wathi akumele kudicilelwe phansi igama lomuntu ngale ndlela kungenasizathu.

UGeneral Phiyega uqale ukwethula ubufakazi izolo ekuseni ngeqhaza lamaphoyisa esibhicongweni sasemayini lapho kwabulawa khona abavukuzi abangu-34 ababetelekile, kwalimala abangu-78.

IKhomishini izwe nokuthi uGeneral Phiyega wakhuluma noNgqongqoshe wamaPhoyisa ngo-Agasti 16 emazisa ngesibhicongo wamnxusa nokuthi alusukumele mathupha udaba.

Kuxabene ubendle phakathi kowesifazane waseDassenhoek, eThekwini nomfowabo ongumfundisi okuthiwa udinwe wukuthi akayitholanga i-ipad.

ZANELE MSOMI

KUXABENE ubendle phakathi kowesifazane waseDassenhoek, eThekwini nomfowabo ongumfundisi okuthiwa udinwe wukuthi akayitholanga i-ipad, okuwubukhazikhazi bekhompyutha ewucwephe eqopha iphinde ithwebule izithombe ezisezingeni eliphezulu, abeyibize kwembeswa udadewabo.

UNksz Nonhlanhla Mkhize (29), akasangenelani noMfu Nkosi Mkhize webandla iSoul Rennaisance Ministries edume ngokuthi yiZero To Hero eThekwini.

Isolezwe lithole ukuthi udweshu lususwe ukuthi uMfu Mkhize oshumayela nasemisakazweni, akayitholanga i-ipad Apple okuwuhlobo oluphathwa ngomntakabani, ayibize kumbeswa udadewabo ngoNovemba nyakenye.

Akekho ofuna ukuzehlisa kanti indaba isingenwe nangamanye amalungu omndeni.

Echaza uNksz Mkhize onyukelwa umoya uma exoxa le ndaba, uthe bazalana ngokwegazi nomfowabo futhi bakhule bengamathe nolimi.

Yize ethi bakhule behlala ngokwehlukana ngenxa yokuthi unina washadela kwenye indawo, bebevulelana izifuba besizana noma benezinkinga.

UNksz Mkhize olotsholwa kwaNxele, uthi umfowabo nguye abembikela konke ngoba uyise umaze esemdala futhi nobudlelwano abubuhle.

Uveza ukuthi nangesikhathi sekukhulunywa ezamalobolo umfowabo nguye owengamela yonke into.

“Ngesikhathi ngicelwa nguye nomama abamukele imali.

Ngisho uhla lwezibizo lwenziwa yibona,” eqhuba.

Uthe wathuka woma esebona uhla lwezibizo.

Uthuswe wukuthi kubhalwe i-ipad athi bathole ukuthi ibiza ngaphezulu kuka-R7 000.

Ohlwini bekubhalwe nefoni yohlobo oluphambili iBlackberry ne-microwave enezibuko.

“Sixoxile nomyeni wami kwacaca ukuthi ngeke akwazi ukuthenga i-iPad ebizwe ngubhuti.

Ngimfonelile naye umfowethu ngesihle ngamchazela.”

Uveza ukuthi umkhwenyana ugcine ethenge olunye uhlobo lwe-ipad ebiza uR4 000.

Ngosuku lwezibizo umfowabo wafika kwambeswa kukuhle kudelile.

Uthe wanikezwa naso isibizo sakhe yize bekungasewona “ungqo” lona abewufunile. Isolezwe lizibonile izithombe zomembeso obuhlanganiswe nomthembiso.

Kulezi zithombe uMfu Mkhize uyabonakala amukeliswa ucwephe olusakhompyutha, ukuyiyo belu i-ipad ayeyibizile.

UNksz Mkhize uthi kuphele isonto kudlule umembeso wathola ucingo kumfowabo ethi mabayiphindisele esitolo i-ipad ukuze azigcwalisele athenge le ayifunayo.

“Ngimtshelile ukuthi umyeni wami abekwenza ubekweza ngothando,” kusho yena.

Uthe baze bayidayisa i-Ipad imali bayinikeza yena umfowabo othe uzozigcwalisela.

UNksz Mkhize ushaya phansi ngonyawo uthi ngeke umfowabo ayithole i-ipad ayifunayo futhi akazimisele ukuyocela uxolo ngoba akazi woneni.

UMfu Mkhize uthe uyalwazi udaba lwe-ipad kodwa ayibhalwanga nguye ezibizweni. Uthe ngudadewabo nomyeni abazibhalela futhi kwazisukela kubona ukuthenga i-ipad.

“Uma ngifuna i-ipad ibandla lami lingangithengela. Angizange ngithole kwaleyo abayishoyo ezibizweni,” kusho yena

Ebuzwa ngesithombe abonakala kuso ezibizweni amukela i-ipad, uphikile.

“Akuyona i-ipad leya, nami angazi ukuthi yini.

Ngicabanga ukuthi yi-device oyithola kwaSamsung ekwazi nokushutha izithombe.”

Uthe ubeselokhu agcina ngoDisemba ukuxhumana nodadewabo aze akhuluma naye ngoLwesithathu, kwaphakama imimoya.

“Ngilindele yena azoxolisa ngoba angazi sixatshaniswa yini,” kusho uMfu Mkhize.

USolwazi Jabulani Maphalala onguMhlaziyi womlando namasiko uthe uyakuqabuka okokubiza kobukhazikhazi bezimpahla.

Uthe umkhuba wokwandisa izibizo uzokwenza bande abangagani.

Ugcizelele ukuthi uma kulotsholwa kwakhiwa ubuhlobo ngesihle ngoba umuntu akathengwa.

Uveza ukuthi okubalulekile ezibizweni yinkomo eyisibizo sikababa nesikamama, okunye kusuke kuyizipho zokwakha ubuhlobo.

Bayoze babuyele ngo-Ephreli 8 enkantolo yeziNdaba zabaSebenzi abasebenzi bama-ambulensi kahulumeni KwaZulu- Natal abebefakwe nguMnyango wezeMpilo esifundazweni enkantolo ngoba kuthiwa bateleka ngokungemthetho.

NQOBILE MASIMULA

BAYOZE babuyele ngo-Ephreli 8 enkantolo yeziNdaba zabaSebenzi abasebenzi bama-ambulensi kahulumeni KwaZulu- Natal abebefakwe nguMnyango wezeMpilo esifundazweni enkantolo ngoba kuthiwa bateleka ngokungemthetho.

Laba basebenzi bophiko i-Emergency Medical Rescue Services (EMRS) bebekule nkantolo ngoLwesihlanu lapho bekulindeleke ukuthi ummeli wabo enze izethulo enkantolo.

UMnuz S’fiso Dlamini okhulumela abasebenzi yize axoshwa kulo msebenzi, uthe abameli bezinhlangothi zombili bavumelane ngokuthi kuqhutshekwe ngo-Ephreli ukuze kubuyelwe enkantolo sebukhona bonke ubufakazi obudingekayo.

“Kuyakhathaza ukuthi esikhundleni sokuthi kugxilwe entweni efunwa ngabasebenzi kodwa uMnyango ulibele ukubayisa enkantolo ngento engekho.

kekho umsebenzi wakwa-EMRS owake walova emsebenzini ngenxa yesiteleka,” kusho uDlamini.

Isolezwe libike ngalolu daba ngeledlule nalapho iNational Freedom Party (NFP) ibiphumela khona obala ngokungenami ngendlela olusingethwe ngayo udaba lwabasebenzi nokuyikhona okwenza izibophezele ekubasekeni.

Umgqugquzeli we-NFP esifundazweni, uMnuz Stanley Dladla, ubekhona enkantolo ngoLwesihlanu ehambisana namanye amalungu aleli qembu ukuzokweseka abasebenzi bakwa-EMRS.

Abasebenzi bakwa-EMRS baqale ukuzwakalisa ukukhononda kwabo ekupheleni konyaka odlule. Babekhononde ngokwengezwa kwamahora okusebenza kodwa umholo ube unganyukile. Okunye okukhalisa abasebenzi yindaba yokungaholelwa kwabo imali yokwenza umsebenzi oyingozi.

Omunye umsebenzi ongathandanga ukuthi kudalulwe igama lakhe obehlanganyele kanye nozakwabo abebeqhamuka kuzona zonke izinkalo zesifundazweni, uthe kufana nokuthi benziwa izilima uma kuthiwa bathola ibhonasi ngoba uma bebala kahle, imali abayithola njengebhonasi ilingana neyamahora abangawakhokhelwa bebe bewasebenzile.

“Kumanje uMnyango usiqambela amanga uthi sateleka ngokungekho emthethweni, selokhu saqala ukuzwakalisa izikhalo zethu, abantu abatelekayo yilabo abasuke besemalivini noma abangasebenzi ngalolo suku,” kusho lo msebenzi.

Ayiphumelelanga imizamo yokuxhumana nokhulumela uMnyango wezeMpilo esifundazweni, uMnuz Sam Mkhwanazi, ukuze acacise ukuthi uMnyango uzimisele ngokuziphendula nini izimfuno zabasenzi, njengoba ucingo lwakhe beluzikhalela lungabanjwa.

Bahambe bedumele abanye babantu abebehambise izihlobo zabo ezigulayo enkonzweni kaMfundisi Paseka Motsoeneng owaziwa ngelikaMboro ngoMgqibelo eKing Zwelithini Stadium, eMlazi.

MBALI KHANYILE

BAHAMBE bedumele abanye babantu abebehambise izihlobo zabo ezigulayo enkonzweni kaMfundisi Paseka Motsoeneng owaziwa ngelikaMboro ngoMgqibelo eKing Zwelithini Stadium, eMlazi.

UMboro udume ngokwenza izimanga zokushintsha impilo yabantu abaphila nokukhubazeka.

Kule nkonzo bekugcwele phama abantu abebesuka ezindaweni ezahlukene KwaZulu-Natal. Indawo yokupaka izimoto nayo ibigcwele kungaselula ngisho nokungena enkundleni.

Omunye wabahambe bedumele ongathandanga kudalulwe igama lakhe, uthe kumphathe kabuhlungu ukungasukumi kwendodana yakhe eneminyaka engu-10, eyazalwa nokukhubazeka njengoba abanye abantu bekwazile ukudondolozela ngesikhathi uMboro esenza adume ngakho.

“Ngiphume ekhaya nginethemba lokuthi ngizobuyela khona ingane yami isikwazi ukuhamba kodwa lokho kuvele kwashabalala konke ngesikhathi ngibuka abanye abantu abebeseceleni kwami besukuma bedondolozela beya kuyena kodwa kungalungi,” kusho lona owesifazane othe ungowaseMlazi esigcemeni kwa-P.

Uthe yize kungenzekanga lokho abefisa ukuthi kwenzeke usazoqhubeka nokuhambela izinkonzo zalo mfundisi.

Abanye abantu abafike benezilonda osekuphele iminyaka babanazo zivele zopha ngemuva kokuthi ebakhulukele zaqala phansi kwaze kwangenelela abezimo eziphuthumayo.

Lo mfundisi ubeqashwe inqwaba yezidlakela zamadoda amade abemlandela yonke indawo abesuke eya kuyo.

UMboro obekhuluma nezinkumbi zabantu abebehambele inkonzo yakhe ebiseKing Zwelithini,uzwakalise ukukhathazeka ngabezindaba athe babhala yonke insambatheka engcolisa igama lakhe.

“Izindaba ezifundwa ngabantu emaphephandabeni zisuke zingezinhle kangangoba abantu abaningi baze balikhiphe ngembaba elokuthi mina ngiyisithunywa sikaSathane,” kusho lo mfundisi othe kuyamxaka ukuthi uSathane angabalaphelani abantu.

Abantu abebekulezi zinkundla bahambe sebeqiqinge amakhandlela, usawoti, uvaselina, ama-pads namanzi athandazelwe abedayiswa yilo mfundisi othe lezi zinto zizobasiza kuzo zonke izinkinga abanazo emakhaya, kwezezimali nasemzimbeni.

UMboro uzakhele kakhulu udumo ngokutshengisa izimanga azenzayo kubantu abagulayo, abanenkinga yemali, nabakhubazekile kuSoweto TV ohlelweni i-Incredible Happenings.

I-IFP isola uSihlalo we-ANC KwaZulu-Natal uDkt Zweli Mkhize ngokungabi neqiniso ngodaba lomgwaqo waseMlazi uGriffiths Mxenge Highway.

CELANI SIKHAKHANE noBAWINILE NGCOBO

I-IFP isola uSihlalo we-ANC KwaZulu-Natal uDkt Zweli Mkhize ngokungabi neqiniso ngodaba lomgwaqo waseMlazi uGriffiths Mxenge Highway, abathi sekukaningi bethi akuhlalwe phansi kodwa yena abike imbiba nebuzi, okuyisizathu esesidale ukuthi abantu bathukuthele.

UMnuz Blessed Gwala ohola leli qembu esiShayamthetho, uthe okwenzeke eMlazi ngoMgqibelo kungumphumela wokungathembeki kukaMkhize ngoba bazamile ukumcela ukuthi kuxoxwe kodwa akafuni ukubaphendula.

“Siqale ukukhuluma naye esiShayamthetho wathi lolu daba luzodingidwa ngaphandle ludinga i-ANC ne-IFP. Kuthe uma sizama ngaphandle wasikhomba kuNobhala wabo uSihle Zikalala, nakhona asitholanga zimpendulo. Nezincwadi esizibhalayo abaziphenduli,” kusho uGwala.

UGriffiths Mxenge Highway uqanjwe wumasipala weTheku ngommeli owayedumile u-Advocate Mxenge kwasuswa igama likaDkt Mangosuthu Buthelezi.

UGwala uthe akulona lolu daba kuphela abafuna ukuluxoxa ne-ANC kodwa kuningi okubakhathazayo ngoba nakomasipala kukhishwa konke okuhambisana negama likaButhelezi njengezithombe zakhe, amagama ezakhiwo eziqanjwe ngaye nokunye.

Eqhuba uthe manje baphezu kwemizamo yokuxhumana noMkhize bakhulume ikakhulukazi ngomgwaqo waseMlazi ngoba abantu sebethukuthele.

Uthe bayabona ukuthi i-ANC ihlose ukubaqoba ibaqede beyi-IFP.

Ezintweni esezisuswe igama likaButhelezi kubalwa nesakhiwo esingaphakathi kumasipala waseBaqulusini eVryheid kwasuswa nezithombe ezisesi-Shayamthetho.

Okunye wukuthi i-ANC ihlongoza ukuguqula negama leNyuvesi yaseMlazi iMangosuthu University of Technology iqanjwe ngoMoses Kotane we-SACP, nesikhumulo sezindiza sasoLundi iMangosuthu Buthelezi Airport, ibizwe ngeqhawe lomzabalzo uMnuz Harry Gwala.

Okhulumela uMkhize, uMnuz Ndabe Sibiya uthe akulona iqiniso okushiwo wuGwala ngoba bahlangana uMkhize wanxusa ukuthi lolu daba lusingathwe ngendlela engeke idicilele phansi igama likaButhelezi nelikaMxenge ngoba abaholi abahlonishwa umhlaba wonke .

Uthe udaba lwesikhumulo sezindiza uMkhize wacacisa kahle ukuthi ngeke sishintshwe ngoba liyaziwa iqhaza likaButhelezi kwezentuthuko ngakho labo asebephakamisa lokho sebeqonde ukuxova okungenasidingo kwezepolitiki.

Izolo bese kubuyele esimweni esijwayelekile ukuhamba kwezimoto emgwaqweni waseMlazi, emuva kokuthi kubekwe amagatsha ezihlahla, amatshe, kwashiswa namathayi kwaphazamiseka izimoto ngoMgqibelo.

Bathwale kanzima abashayeli bezimoto abebeya noma bephuma kuleli lokishi ngoMgqibelo kanti kuze kwaphoqeleka ukuthi amaphoyisa kaMasipala weTheku avele awuvale lo mgwaqo kusuka kwa-V emarobhothini kuze kuyoshaya ezitolo kwa-Rhino.

Amalungu e-IFP abemasha ebheke eNkantolo eMlazi ekhala ngokushintshwa kwegama lomgwaqo uMangosuthu Highway osuwuGriffiths Mxenge.

Izimoto beziphoqeleka ukuthi zisebenzise eminye imigwaqo. Lokhu kudale esikhulu isiminyaminya kwazise lo mgwaqo uvele uyalungiswa kukhona neminye imizila engasebenzi.

Luthathe elinye igxathu udaba lombango wezindlu zomxhaso eCato Crest, eMayville.

SIMPHIWE NGUBANE

LUTHATHE elinye igxathu udaba lombango wezindlu zomxhaso eCato Crest, eMayville emuva kwesehlakalo sokudutshulwa kufe obengumholi wenhlangano yabahlala kule ndawo nomunye uzakwabo ,ngoLwesihlanu ebusuku.

UMnuz Thembinkosi Qumbelo obenguSihlalo weCato Crest Residents’ Association noMnuz Sizwe Cele badutshulwe ngabantu abangaziwa besendaweni yokucima ukoma KwaNyambose eStop 4, bashonela khona lapho.

UQumbelo namalungu omphakathi bebesanda kupotshozela Isolezwe ngomkhonyovu wokudayiswa kwezindlu zomxhaso, okuthiwa kudla lubi kuleya ndawo. Lo mkhonyovu udale uthuthuva ngoba abantu abasuswa ezindaweni zabo ngesikhathi bebhidlizelwa imijondolo yabo bethenjiswa intuthuko, befuna ikhansela namakomiti omphakathi ukuba babahlinzeke ngezindlu ababathembisa zona.

Kwenzeka lezi gameko nje, ikhansela lendawo uMnuz Mzimuni Nzoyiya, libhacile njengoba kusanda kuhlaselwa umuzi walo namahhovisi elisebenzela kuwona. UNzoyiya uthe isimo asisihle kuleya ndawo kukhona abantu abangafuni ukusuka enkundleni yezemidlalo ababuthanele kuyo.

Okhulumela amaphoyisa KwaZulu-Natal uCaptain Thulani Zwane, usiqinisekisile isigameko sokusocongwa kwabafi, wathi kuvulwe amacala amabili okubulala, kukhona muntu oboshiwe.

“Ayikaziwa imbangela yokubulawa koQumbelo kodwa amaphoyisa alandela umkhondo, aphenya kabanzi ngalolu daba,” kusho uZwane.

Omunye wabebekade besondelene nomufi, osinde edutshulwa, utshele leli phephandaba ukuthi ukubulawa koQumbelo kuhlobene nombango wezindlu oqhubekayo eCato Crest. Le ndoda ecele ukuba ligodlwe igama layo ihlaselwe ngoLwesine ebusuku, yadutshulwa ngemvula yezinhlamvu kodwa yasinda. Kumanje iyelashwa esibhedlela.

“Kunabantu esibakhiphe ezindlini zomxhaso abese bengene kuzona ngodli ngoLwesithathu ebusuku, abagcine sebesisongela ngokuthi bazosibulala. Abanye babo baphume kule zindlu bayongena emaflethini akhiwayo belokhu beqhubekile nezinsongo zokuthi bazosibulala kanti akuzophela sikhathi esingakanani ngoLwesine ezintatha bangidubula. Ngakusasa badubule uQumbelo, ngeshwa washona,” kusho owesilisa othe abahlaseli bamshiya bezitshela ukuthi ufile.

Ikhansela le-DA uMnuz Hlanganani Gumbi lithe ukube amakomiti abakhipha kahle abantu emijondolo ababehlala kuyona, afeza izethembiso azenza, ngabe igwemekile le nto yokudliwa komhlaba.

Uthe bayixwayisa iMeya yeTheku uMnuz James Nxumalo noSihlalo wekomiti lezokuHlaliswa kwaBantu kumasipala uMnuz Nigel Gumede ngokwakwenzeka eCato Crest kuhlukunyezwa abantu ngonyaka odlule kodwa bazithela ngabandayo.

“Sabacela ukuthi abatholele abantu izindlu zesikhashana ngesikhathi besalinde izindlu zabo kodwa kwangenzeka. Sinxusa abantu ukuba bangenzi okuphambene nomthetho balandele imigudu esemthethweni ukuzwakalisa izikhalo zabo,” kusho uGumbi.

Umndeni wabayisikhombisa abaqothwe ngenhlamvu eTshekeni eMuden ngempelasonto edlule, ucabanga eyokuthi uphume uphele kule ndawo emuva kwalesi sigameko.

MLUNGISI GUMEDE

UMNDENI wabayisikhombisa abaqothwe ngenhlamvu eTshekeni eMuden ngempelasonto edlule, ucabanga eyokuthi uphume uphele kule ndawo emuva kwalesi sigameko.

Lokhu kuvezwe yilungu lalo mndeni izolo ngesikhathi kunenkonzo yokufihla ababulewe.

UMnuz Mzuvele Mkhize uthe babhunga eyokuthi bathuthe kule ndawo ngemuva kwesigameko.

“Kuzoba nzima ukuthi umndeni uqhubeke nokuhlala kule ndawo ngemuva kwesigameko esibuhlungu esenzekile,” usho kanje.

UMkhize uthe abahlaseli bacishe baqotha imbokodo nesisekelo.

Amalungu omphakathi abezokhalisa umndeni namanje asababaza isihluku esenzekile.

“Ngisho noma ngabe kuthiwa abazali bebonile pho izingane zona zenzeni,” kusho elinye ilungu lomphakathi.

Kulesi sigameko kwashona oMnuz Mngeni Mkhize (45), Mnuz Simphiwe Mkhize (32), Mnuz Mhlengi “Tonqo” Mkhize (38), Lungisani Mkhize (17), Sbusiso Mkhize (17), Sizwe Zondi (18) noFikanobuhle Mkhize (2) oshonele esibhedlela.

Abasinda ngoBongani Mkhize (17), Phelelani Mkhize (4) Fika Mkhize (3) nogogo oneminyaka engu-90.

Omunye wesilisa wakwaMkhize oneminyaka engu-22 kuthiwa kubonwa ngokusa kuyena esibhedlela

IPhini likaNgqongqoshe weziMali kuleli, uMnuz Nhlanhla Nene, lithe kuyadabukisa ukuthi kusekhona abantu abathi uma becasukile badinwe ngalolu hlobo, baze bafikelwe wumqondo wokuqotha abantu ngale ndlela.

UNgqongqoshe wezeMfundo KwaZulu-Natal uMnuz Senzo Mchunu uchaze abahlaseli njengamagwala akwazi ukucathamela abantu ebusuku. Uphinde wabafanisa nezilwane zokugcina ezisahleli nomphakathi.

UMnuz Willies Mchunu onguNgqongqoshe wezokuPhepha unxuse umndeni wakwaMkhize nezinsizwa zendawo ukuba bangaziphindiseleli. “Asifuni ukuthi sizwe ukuthi sekukhona ukuphindisela ngoba lokho kuzokwenza ukuthi kugobhoze igazi,” usho kanje. UMchunu unxuse ukuba aphumele obala amalungu omphakathi angaba nolwazi olungasiza amaphoyisa kuboshwe abasolwa.

“Ukhona umkhondo esiwulandelayo kodwa sisaludinga olunye ulwazi ngoba asifuni ukubopha abantu baphinde badedelwe,” usho kanje.

USihlalo we-Community Policing Forum KwaZulu-Natal, uMnuz Bafana Mtambo uthe abahlaseli batshale imbewu embi endaweni engase idale ukuchitheka kwegazi.

UMnuz Tallman Zuma onguSihlalo weSikebhe uthe bazobiza umhlangano ophuthumayo ngenhloso yokuqinisa izinhlaka ezilwa nobugebengu kule ndawo. UZuma unxuse umphakathi ukuthi awuhlale emiyalelweni eyishumi ukuze kuphele izigameko zokubulawa kwabantu. Kuthiwa liphezulu izinga lokwebiwa kwemfuyo kule ndawo futhi maningi namacala abikwayo athinta izigameko zokuntshontshwa kwayo. Kuzokhumbuleka ukuthi endaweni engumakhelwane neTshekeni, eMthaleni, ngonyaka odlule kuke kwenzeka isigameko esifanayo lapho kwaqothwa ngenhlamvu amalungu eSikebhe ayisikhombisa ayeyozama ukulanda imfuyo eyayebiwe ifihlwe eMahlaba.

Kuquleke abesifazane ababili kule nkonzo yomngcwabo okuze kwaphoqeleka ukuthi babizelwe i-ambulensi.

Utholwe esengamathambo owesifazane waseSakhamkhanya obeselahleke amasonto amahlanu, emuva kokuhamba nesoka lakhe okuthiwa belimhlukumeza limshaya.

BAWINILE NGCOBO

UTHOLWE esengamathambo owesifazane waseSakhamkhanya, KwaMlilo ngaKwaDukuza obeselahleke amasonto amahlanu, emuva kokuhamba nesoka lakhe okuthiwa belimhlukumeza limshaya.

Isidumbu sikaNksz Smangele Mthembu (19) sitholwe ngamalungu omphakathi esimobeni esingaphesheya kwakubo ngoLwesine. Selokhu agcina ukubonakala ekhaya ngo-Febhuwari 12 ngesikhathi ethi uya kovula icala ngokushaywa isoka lakhe okuthiwa ngelokudabuka eMozambique.

Leli soka kuthiwa alisabonakali endaweni selokhu kwalahleka uNksz Mthembu. Kunezinsolo zokuthi seliphindele kwelakubo.

Kuboshwe umnakwabo kaNksz Mthembu ngalesi sigameko.

Okhulumela amaphoyisa uCaptain Thulani Zwane uthe amaphoyisa aphenya icala lokubulala.

UCaptain Zwane uthe kuboshwe owesifazane oneminyaka engu-31 ngecala lokubulala, uzovela eNkantolo KwaDukuza kusasa (namuhla),” kusho uZwane.

Ubabekazi kaNksz Mthembu, uNksz Nelisiwe Dube, uthe wabona leli soka lijaha indodakazi yabo, kwathi uma ekhuluma nayo yathi iyovula icala emaphoyiseni.

“Wathatha umazisi wakhe, nesikhwama wahamba. Ngacela abanye ukuthi bamphelezele, wagibela etekisini kanti lizomlandela,” kusho uNksz Dube.

Uthe ngokuthola kwabo akabange esaya esiteshini samaphoyisa isoka lamthatha baya eMgababa lapho kuhlala khona umfowabo.

Ngakusasa, unina kaSma wafonela umfowabo wavuma ukuthi bebekhona kodwa sebehambile.

Unina kaNksz Mthembu, uNksz Tholakele Mthembu uthe indodakazi yakhe yafona yathi isiyabuya.

Uthe ayizange ibuye, nesoka layo alibange lisabonakala.

UNksz Dube uthe izimpahla zesoka zitholwe komunye umuzi, bathi uma beyobheka bangalifica. Intombi yalo ibanjwe sekuhlwile isiyozilanda, yabanjwa ngamalungu omphakathi ayinikela emaphoyiseni.

“Amaphoyisa ayidedelile, kwathi uma amalungu omphakathi ezwa lokhu afuna ukuzibambela kuyona yazinikela yona emaphoyiseni,” kusho uNksz Dube.

Uthe indodakazi yabo ibisinesikhathi ithandana nesoka layo abaqala ukuthandana nalo isencane, ibishaywa ngoba ibingasalifuni selinenye intombi le eboshiwe.

Lo mndeni uthe ubonga omama bendawo namalungu omphakathi, okuyibo abebesukumele lolu daba nakuba kukhulunywa ukuthi amathambo endodakazi yawo atholakele.

Eduze kwawo kutholwe izingubo eyahamba izigqokile, isikhwama sayo sinomazisi wayo.

Kusolwa ukuthi idliwe yizingulube ezihlala esimobeni njengoba itholwe isingamathambo.

Lo mndeni ukhala ngokuthi awazi ukuthi usuzokwenze njani ngoba ngo-Msombuluko odlule ubufihla elinye ilungu lawo.

Ikhansela le-DA kule ndawo, uMnuz Thokozani Gumede, lithe uhulumeni kumele uqinise imithetho emingceleni ngoba abantu bakwamanye amazwe bayazingenela nje, benze amacala babuye bephindele emazweni abo kungabi lula ukuthi batholakale.

Isimo asisalawuleki eNyuvesi yaKwaZulu-Natal eHoward College izolo, ngesikhathi abafundi abebethukuthele becekela phansi impahla yenyuvesi, becikwa ngabakubize ngokuphendulwa ibhola lomnqakiswano ngabaphathi benyuvesi ngendawo yokuhlala.

INTATHELI YESOLEZWE

isimo asisalawuleki eNyuvesi yaKwaZulu-Natal eHoward College izolo, ngesikhathi abafundi abebethukuthele becekela phansi impahla yenyuvesi, becikwa ngabakubize ngokuphendulwa ibhola lomnqakiswano ngabaphathi benyuvesi ngendawo yokuhlala.

Ngezikhathi zasekuseni izolo bese kucacile ukuthi isimo sishubile, abafundi bevale isango elikhulu elingenela kule nyuvesi, besho iziqubulo ebezigxeka abaphathi ngokungabakhathaleli.

Kube neziqubu zokucekelwa phansi kwempahla, obekwenzeka kubuka amaphoyisa nonogada benyuvesi. Okhulumela i-SRC uMnuz Siyabonga Zulu, uthe abafundi bakuthola kunzima ukwenza kahle umsebenzi wesikole ngoba abanayo indawo eqondile yokuhlala.

Uthe nasezindaweni abacushiswe kuzo kumele bazithengele ukudla ngoba inyuvesi ayizifezi izethembiso eyazenza.

Izolo, uNksz Nomonde Mbadi, ukuqinisekisile ukuthi ukufunda kuphazamisekile.

“Ababhikishi baphazamise ukufunda. Sithole imibiko ethi abanye babo bahlome ngezinduku, amatshe nezando,” kusho uNksz Mbadi.

Okhulumela amaphoyisa KwaZulu-Natal, uCaptain Thulani Zwane, uthe azikho izigameko ezinzima ezibikiwe.

“Abafundi ababalelwa ku-50 babhikisha ngaphandle kwamasango esikhungo. Amaphoyisa asiqaphile isimo,” kusho Zwane.

Azikho izigameko zokulimala kwabantu ezibikiwe futhi bekungakaboshwa muntu.

Babalelwa ku-560 abafundi abebehlala ebhilidini elihlala abafundi elise-Albert Park abasale dengwane bengenamanzi nogesi ngoba umnikazi wendawo engakukhokhelanga.

Abafundi baphoqeleke ukuthi baphume kuleli bhilidi ekuqaleni kwenyanga. Isikhungo sibafake emahhotela ahlukene asenkabeni yeTheku.

Ngeledlule abanye bakhishwe ngendluzula eCoastlands Hotel lapho bekunengqugquthela ye-ANC.

Abanye bebehlaliswe eDown Town Lodge ePhoyinti. Umnikazi wale ndawo ubhekene nezinsolo zokuqhuba ibhizinisi lokudayisa ngomzimba kuyo.

Okwamanje abafundi bahlaliswe e-Pavillion Hotel, Impala Holiday Flats neSeaside Hotel. Bafuna indawo yokuhlala abazohlala kuyo unomphela.

UMbadi uthe abahambisani nodlame nokulinyazwa kwempahla. Uthe lesi sikhungo siyibeke phambili indaba yokutholela abafundi indawo yokuhlala futhi bathemba ukuthi bazoqhamuka nesisombululo maduze.

Inikine ikhanda sakukhombisa ukudideka igwetshwa udilikajele yiNkantolo eNkulu yaseThekwini indoda yaseMlazi ngecala lokubulala owayeyikhansela le-ANC, uMnuz Wiseman Mshibe, eminyakeni emibili edlule.

SIMPHIWE NGUBANE

INIKINE ikhanda sakukhombisa ukudideka igwetshwa udilikajele yiNkantolo eNkulu yaseThekwini indoda yaseMlazi ngecala lokubulala owayeyikhansela le-ANC, uMnuz Wiseman Mshibe, eminyakeni emibili edlule.

UNkosiyabo Ngubane (32) ukhombise ukudideka ngemuva kokuthi iJaji Thomas Ngubane limgixabeze ngalesi sigwebo enkantolo ebigcwele phama abaholi namalungu e-ANC, abebedlubhe umfaniswano wale nhlangano. Abantu basukume babonga uMdali ngemuva kokukhishwa kwesigwebo bethi liphume nobomvu.

Phakathi kwabaholi abebekhona kubalwa uNkk Zandile Gumede uMgcinimafa we-ANC eThekwini, uMnuz Bheki Ntshangase uNobhala we-ANC kulesi sifunda noSihlalo we-ANCYL eKZN uMnuz Mxolisi Kaunda.

UNgubane nguyena owayeshayela imoto eyayilayishe amadoda abulala uMshibe ebusuku bangoMashi 1, 2011. Amlandela ephuma emhlanganweni we-ANC eMlazi aze amdubula esengena emzini wakhe okuCoedmore Road eYellowwood Park.

Liqulwe laze laqedwa icala engakaze athi vu ngokwenzeka kodwa inkantolo isebenzise isitatimende asenza emaphoyiseni lapho ayechaza khona ukusuka nokuhlala kwesigameko. Ayeboshwe nabo baphuma phambili emacaleni ababethweswe wona ngenxa yokushoda kobufakazi.

IJaji lithe siphezulu isibalo samacala okubulawa kwabantu KwaZulu-Natal ngenxa yokungabekezelelani kwezepolitiki. Lithe kusemahlombe enkantolo ukususa emphakathini abalahlwa ngalolu hlobo lwamacala

“Kwahlalwa phansi kwahlelwa ukubulawa kukamufi. Amacala alolu hlobo ayinsakavukela futhi kubukeka eqhubeka esifundazweni, ngakho kuwumsebenzi wethu ukuba siwaqede ngokuthi sikhiphe izigwebo ezinzima kwabalahlwe ngamacala,” kusho uNcube, engeza ngokuthi isigwebo asikhiphile sizothumela umyalezo kwabanye.

Ummeli kaNgubane, u-Advocate Sabera Khan, unikwe yinkantolo imvume yokudlulisela phambili eNkantolo yokuDluliswa kwamaCala eBloemfontein icala, uma efuna ukuthi ibuyekeze isigwebo esikhishiwe ngecala kukaNgubane.

UNgubane ugcine ebangeni leshumi ngokwemfundo. Unezingane ezintathu ezineminyaka eyisishiyagalombili, emihlanu nemithathu ezihlala nonina abehlukene. Ubukeka ezikhululekele engena ebhokisini labasolwa, waze washintsha izimpahla abezigqokile ezinika unina.

Ngemuva kwesigwebo usukume wanikina ikhanda, ebukeka edidekile, watshatha isikhwama angene esiphethe waphuma ngokushesha enkantolo engena emgodini esebheke ezitokisini.

Ngaphandle kwamagceke enkantolo, amalungu e-ANC acule izingoma zomzabalazo, edansa, etusa ubuqhawe bukaMshibe.

UKaunda uthe yize beneme ngesigwebo kodwa kukhona amagama abantu abathile abevela ngesikhathi kuqulwa icala, okungaziwa ukuthi basale kanjani ngaphandle kukhishwa isigwebo. Uthe banethemba lokuthi nababulali bakaMnuz Sbu Sibiya owayenguNobhala kaKhongolose eThekwini bazogwetshwa udilikajele.

Usindele amaphoyisa umnikazi wesikole esifundisa amakhono okusebenza ezindaweni zokudlela ngesikhathi abantu abebezofesa besho ukumqeda.

NONHLANHLA MKHABELA

USINDELE amaphoyisa umnikazi wesikole esifundisa amakhono okusebenza ezindaweni zokudlela ngesikhathi abantu abebezofesa besho ukumqeda bethi isikhangiso esisephepheni sithembisa umsebenzi ezindaweni ezahlukene, ezidayisa inkukhu echochobaliswe emafutheni iKFC, kodwa useyabajikela usethi bazoqala bafunde bakhokhe no-R1 700.

Abantu abafike esikoleni esisePinetown iNBN Catering and Admin Work bebethukuthele bemdonsa ngezinwele, bemuklinya befuna ukumbhuquzisa phansi umnikazi waso uNksz Nomusa Ngubo, bethi wafaka isikhangiso esingamanga ephephandabeni.

Amaphoyisa afike apholisa isimo kodwa akekho umuntu oboshiwe futhi alikho necala elivuliwe.

Isikhangiso esavela emaphephandabeni angesonto eledlule sasithi: Ngabe uyafuna ukusebenza eKFC? Woza wenze izifundo zesikhashana zeHotel and Catering.

Kwakufakwe nenombolo yokuxhumana naye.

Abebekhona kuthe uma befika bachazelwa ukuthi kumele bafunde inyanga mahhala bese bekhokhela isitifiketi ngo-R1 600. Bavuke inja ebomvu sebetshelwa lokhu, bafuna imali abagibele ngayo.

“Thina size lapha sazi ukuthi sizofuna umsebenzi eKFC hhayi ngoba sizofunda. Kade sasishaya ucingo sibuza konke okuphathelene nomsebenzi, akekho owake waphatha indaba yokufunda nemali njengoba sesitshelwa namhlanje, sesigibele ngemali sihambela amahhala,” kusho omunye wabo uNksz Zinhle Gumede obesuka eMolweni.

Uma bebuzwa ngokubhalwe esikhangisweni bathe uma befika bebechazelwa izinto ezahlukene, abanye betshelwa ukuthi bazofakwa emahhotela hhayi eKFC.

UMnuz Siyabonga Madondo waseKlaarwater, obefunda kulesi sikole ngoJanuwari, uthe usaduve ekhaya namanje akakawutholi umsebenzi kodwa wayethenjiswe ukuthi uma ususitholile isitifiketi ufakwa emsebenzini.

“Ngafonelwa kwathiwa angiye kwelinye ihhotela kuyaqashwa ngafika khona kwathiwa akuqashwa kusetshenzwa ngabantu abazoqeqeshelwa umsebenzi. Ekhaya bavuma ukukhokha le mali efunekayo banginika noR60 wokugibela nsuku zonke ngoba ngithenjiswe ukuthi ngizofakwa ehhotela uma ngiqeda,” kusho uMnuz Madondo.

Uthe okumsuse ekhaya wukuthi kungaqashwa kanjani abantu abasha yena esefundile kodwa eduve ekhaya?

UNksz Ngubo uthe akakaze ahlangabezane nenkinga enjena futhi uyamangala ukuthi yini abantu baziphathe ngale ndlela bafune nemali yokugibela kuyena.

“Uma ufaka isikhangiso igama negama uyalikhokhela ngakho asikwazi ukuchaza yonke into esikhangisweni yingakho sifaka inombolo yocingo ukuze abantu babuze,” kusho uNksz Ngubo.

Uvumile ukuthi abafundi ubathembisa ukubafaka emsebenzini uma sebephothule izifundo, uhlale ebafaka njalo, wathi uMnuz Madondo kungenzeka ukuthi wasala kwelinye lamathimba akhe, uzothatha izimfanelo zakhe amfake emsebenzini.

Isolezwe lifika emahhovisi kaNksz Ngubo, abantu bebegcwele ngaphandle, abanye bangena ngaphakathi bamdonsa ngezinwele. Sebeqala ukumshaya, ulanyulelwe amaphoyisa abefike ngezimoto ezimbili, okuthe kamuva zajoyinwa enye.

Omunye ubemvimbezele kwelinye igumbi ethi akaphumi engayikhiphanga imali yakhe yokugibela.

Imizamo yokuthola abaseKFC ukuthi baphawule ayizange iphumelele ngoba abenkampani yezokuxhumana esebenzisana nabo izingcingo zabo bezikhala zingabanjwa kwaze kwashaya isikhathi sokuloba.

Ugcine engenile emzini wakhe owesifazane waseNhlanzini, KwaMbonambi okwasuka umsindo ezokwakhelwa wona, amanye amalungu omphakathi ekhala ngokuthi kwakhelwa umuntu wokufika endaweni, ekubeni wona enganakiwe futhi kudala aba khona.

NOKUBONGWA PHENYANE

UGCINE engenile emzini wakhe owesifazane waseNhlanzini, KwaMbonambi okwasuka umsindo ezokwakhelwa wona, amanye amalungu omphakathi ekhala ngokuthi kwakhelwa umuntu wokufika endaweni, ekubeni wona enganakiwe futhi kudala aba khona.

UNkk Nkosingiphile Ngema uhlukele nawukukhuluma, wakhihla isililo wakhuleka, ngesikhathi kuzovulwa umuzi wakhe omusha ceke ka-R135 000 kule ndawo ngoLwesihlanu.

Ngo-2011 uNgqongqoshe wezoLimo neMvelo uDkt Meshack Radebe esaphethe uMnyango wokuThuthukiswa koMphakathi, wayehambele kuleya ndawo ngesikhathi ebona umuzi okungathi akuhlali muntu kuwo lapho anxusa khona ukuthi osomabhizinisi bawakhe ukuze kushintshwe impilo yabahlala kuwo.

Usomabhizinisi obuye abe nguSihlalo ekolishi laseMfolozi, eRichards Bay, uMnuz Themba Fakazi bahlanganisa noMphathi wekolishi uMnuz Sam Zungu ukuze bakhe lo muzi.

UFakazi uthe ngesikhathi sebeqala ukwakha kwaba khona ukukhuluma okukhulu emphakathini ubasola ngokwenzelela ebantwini.

“Siyabonga namhlanje ukuthi sesize saphumelela ekutheni umuzi siwuqede, siwunikele kumnikazi wawo okwakunesidingo esikhulu sokuthi awuthole, njengoba ebehlala phandle,” kusho uFakazi.

Uthe umuzi bawakhe ngemali eyaqongelwelwa ngaphakathi esikoleni, kusukela kothisha njengoba bekukhona ngisho abafundi akade befaka isandla ngesikhathi wakhiwa.

“Abafundi basekolishi nothisha babe nesandla esikhulu ekutheni lo muzi wakhiwe. Sibonga iso likaNgqongqoshe, okuyilona elabona ukuthi akuwona umuzi wokuhlala abantu lona,” kuchaza uFakazi.

UDkt Radebe uthe wayedlula ngomgwaqo ngesikhathi ebona lo muzi, okwathi engena kuwona ehamba nonogada bakhe bafica umnikazi wawo ehlezi emanzini njengoba lalina.

Uthi wafike wakhuluma nosomabhizinisi wabanxusa ukuthi abawakhe njengoba isimo senhlalo sisibi.

Ubonge kakhulu ukuzinikela kwabo njengoba ethe umuzi bekumele bawudlulisele kumnikazi wawo ngonyaka odlule kodwa ngenxa yomsebenzi yikho bewudlulise kulo nyaka.

Usadidikile namanje ukuthi ibulaweleni indodana yakhe owesifazane ohlala eVillage eChatsworth, eduke izinsuku ezine, yatholakala emhosheni KwaNdengezi ishayiwe yanqunywa ubuntu bayo.

NOKUBONGWA PHENYANE

USADIDEKILE namanje ukuthi ibulaweleni indodana yakhe owesifazane ohlala eVillage eChatsworth, eduke izinsuku ezine, yatholakala emhosheni KwaNdengezi ishayiwe yanqunywa ubuntu bayo.

Isidumbu sikaMnuz Siphamandla Mkhize (23) satholwa abantu ababezingela. Umndeni usola ukuthi kukhona okushaya amanzi ngokubulawa kukaSiphamandla ngoba nezitho zakhe zomzimba bese zingaphelele.

UNksz Zanele Mkhize (39), unina kamufi uthe indodana yakhe yaqala yashaywa wumphakathi, ngemuva kokuthi umakhelwane wakhe ongusomatekisi ethe intshontshe umsakazo wemoto yakhe.

“Ingane yacela ukuhamba ivakashele ekhaya lapho ngizalwa khona. Ngangingafuni kodwa ngagcina ngivumile ngoba yayiyolanda imali kumuntu oqashile ekhaya. Ngakusasa ngafonela udadewethu ngimbuza ukuthi uphi uSpha, wathi ukamakhelwane kukhona itoho alitholile, usebenza khona kodwa useyaqeda usezobuya,” kusho uNksz Mkhize.

Uthe wezwa sekungena ucingo luvela enganeni kadadewabo, lumtshela ukuthi indodana yakhe ishaywa amalungu omphakathi, kuthiwa intshontshile.

“Ngafonela udadewethu ngathi akahambe ayongibhekela ukuthi kwenze njani, naye wangitshela ukuthi akekho ekhaya. Ngagcina ngokufonela amaphoyisa aseMariannhill ukuthi ahambe ayongibhekela ukuthi kwenzekani kodwa ngaze ngalala ngingatholanga mpendulo,” kuchaza uNksz Mkhize echiphiza izinyembezi.

Ngesikhathi efika kule ndawo ngakusasa, ezobuza ngokushaywa kwendodana yakhe uthe akekho umuntu owamtshela into ezwakalayo, waze wahamba waya esibhedlela eRK Khan, wangayithola.

“Ngaze ngasizwa wumngani wakhe uSpha, owangitshela ukuthi ababemshaya bamfaka etekisini bahamba naye, akazi ukuthi bamusa kuphi,” kuchaza unina kamufi.

Uthe indodana yakhe yaze yatholwa ngeSonto ngowesilisa owayezingela, ilahlwe esigangeni inqunu.

UNksz Mkhize uthe alikho icala abalivula emaphoyiseni ngokunyamalala nokufa kwendodana yakhe ngoba basalindele ukuthi owesifazane onamatekisi owayesola indodana yakhe ngokuthi yebe umsakazo emotweni yakhe, abachazele ukusuka nokuhlala ngalolu daba, kuyima bethatha izinyathelo zomthetho.

Umcimbi wosuku lwamaLungelo abantu owaduma ngesibhicongo saseSharpville oba ngoMashi 21 uzogujwa okokuqala ngaphandle kwesifundazwe okwenzeka kuso lesi sehlo.

INTATHELI YESOLEZWE

UMCIMBI wosuku lwamaLungelo abantu owaduma ngesibhicongo saseSharpville oba ngoMashi 21 uzogujwa okokuqala ngaphandle kwesifundazwe okwenzeka kuso lesi sehlo. Uhulumeni kazwelonke uwuhlelele ukuthi ube seWestern Cape kusasa.

OwaKwaZulu-Natal wona uzoba senkundleni yemidlalo iKing Zwelithini eMlazi kanti kuzobe kukhuluma uNdunankulu uDkt Zweli Mkhize ephelezelwa yizikhulu zikahulumeni namalungu esiShayamthetho saseKZN.

UMengameli Jacob Zuma uzobe ehola ithimba lezikhulu zombuso kokazwelonke ozoba seWestern Cape.

Lo mcimbi osekuke kwasuka umsindo mayelana nokugudluzwa kwawo elokishini iSharpville kuthe ngonyaka odlule wayiswa eSoweto nokwenza abantu baseSharpville bavuka umbhejazane bekhala ngokuthi lesi senzo singukubukela phansi umzabalazo wabo.

Ihhovisi likaMengameli izolo likhiphe isimemezelo sokuthi lo mcimbi uzoba selokishini eMbekweni e-Paarl, eKapa nokuzobe kungokokuqala emlandweni ukuthi i-Western Cape iwusingathe.

Okhulumela ihhovisi likaMengameli uMnuz Mac Maharaj uthe uhlelwe ngokubambisana noMnyango wezoBulungiswa nokuThuthukiswa koMthethosisekelo nowezobuCiko ngaphansi kwesiqubulo esithi: “Ubumbano ekubekeni phambili izidingo zabantu nokukhululeka kwezomnotho kubo bonke abantu.”

Uthe inhloso enkulu ukusebenzisa lo mcimbi ukuthi kube nokubuyisana nokukhumelana umlotha ngokwezinhlanga ezahlukene, ukwakhiwa kwesizwe, ukuzigqaja ngobu-Afrika nokuBumbana kwezinhlanga ezahlukene ngaphandle kokubheka ubuzwe noma ibala.

Lo mcimbi ubuvamise ukuhlelwa eSharpville kususelwa esigamekweni sikaMashi 21, 1960 lapho amaphoyisa ombuso wobandlululo abulala abantu ababengaphezulu kuka-60.

Lolusuku lwalubizwa ngeSharpville Day kodwa uhulumeni waliguqula igama wathi i-Human Rights Day kanti beluhlale lugujwa seSharpville kodwa ngonyaka odlule lwenzelwa eSoweto.

Abantu base-Sharpville nabe-PAC abakuthandanga lokhu bebona ukuthi baphucwa umlando wabo.

“Uhulumeni wanquma ukuba lolu suku lwenziwe usuku lukazwelonke lwamaLungelo abantu ukuze kuqinisekiswe ukuthi wonke umuntu uvikelekile kumthetho-sisekelo futhi akekho umuntu oyophinde azithole ehlukunyezwa njengoba kwenza uhulumeni wengci-ndezelo ngo-1960,” kusho uMaharaj.

I-NFP kaNkk Zanele Magwaza-Msibi izogubha lolu suku eMlazi cinema kusasa.

Kwembulwa kwembeswa kwabanye abagibeli ababandakanyeke engozini yokushayisana kwezimoto eziyisishiyagalombili, emgwaqweni uGreytown eMgungundlovu, izolo ekuseni.

NONTUTHUKO NGUBANE

KWEMBULWA kwembeswa kwabanye abagibeli ababandakanyeke engozini yokushayisana kwezimoto eziyisishiyagalombili, emgwaqweni uGreytown eMgungundlovu, izolo ekuseni.

Abantu abangaphezu kuka-20 bangeniswe ezibhedlela benemihuzuko, abanye belimele kanzima.

Ingozi yenzeke eduzane nalapho kwashona khona abantu abangu-14 engozini yetekisi ngo-2011. Kuyo futhi le ndawo ngonyaka odlule kushone umshayeli weveni ethutha izinsimbi.

Ngokuthola kwabaphenyi kule ngozi, iveni ebikhuphuka ngomgwaqo iya eGreytown, iqhunyelwe yisondo yaphaphalaza yashayisana namatekisi amabili angama-Quantum abegcwele abagibeli, kwathinteka nezimoto ezinhlanu ebezihamba kuwo lo mgwaqo. Ezimbili bekuyizimoto ezincane namaveni amathathu.

Ingozi yenzeke ngehora lesikhombisa ekuseni, okuyisikhathi sebhizi kulo mgwaqo.

Iphoyisa ebelisebenza kule ndawo elingavu-melekile ukuphawula kwabezindaba, litshele Isolezwe ukuthi imoto eqhunywelwe yisondo ibihamba ngesivinini esiphezulu kakhulu okwenze yangalawuleka.

Amatekisi amabili abegcwele phama abagibeli abebeya emsebenzini, yiwona aphazamiseke kakhulu, abaningi abalimele bebegibele kuwo.

Owesifazane ongeniswe esibhedlela ozibize ngoSindi, uthe ubeya emsebenzini egibele itekisi. Uthuke kwaphela nasozwaneni ezitshela ukuthi uyafa ngesikhathi kuqhuma isililo esikhulu etekisini.

“Sivele saqhumisa isililo sakhala ubumayemaye, sibona izimoto zishayisana phambi kwethu. Kukho lokho kukhala nathi sizwe sesishayiseka saphuma emgwaqweni. Angibange ngisabona ukuthi kwenzekeni ngenxa yokuthuka. Uvalo namanje lusangishaya,” kusho yena.

Okhulumela amaphoyisa maphakathi nesifundazwe, uLieutenant Joey Jeevan, uthe kuvulwe icala lokushayela budedengu.

“Kusaphenywa ukuthi ngubani obesephutheni phakathi kwalezi zimoto eziyisishiyagalombili ezishayisene. Okwamanje kuvulwe icala lokushayela budedengu, akekho oboshiwe,” kusho uJeevan.

Abezimo eziphuthumayo i-ER24 bathe bafice abantu beyizigingqane kule ndawo kodwa kungekho oshonile.

Okhulumela i-ER24, uDerrick Banks, uthe abane balimale kakhulu kwathi abangu-16 bathola ukulashwa endaweni yesigameko bayiswa esibhedlela.

“Abantu bebesemgwaqweni abanye bengaphandle. Abane abalimale kakhulu baphuthunyiswe esibhedlela. Sithole ukuthi balimale kanzima emqaleni nomgogodla, basikeka. Baxhunywe emishini yokubasiza bephefumule. Abangu-16 bathola imihuzuko, balashelwe kwindawo yesigameko baphuthunyiswa esibhedlela esiseduzane,” kusho uBanks.

Lo mgwaqo uyijika. Sekujwayelekile ukuthi kube nezingozi kuwo.

Uphenyo lwamaphoyisa lusaqhubeka.