Seludale olunye uqhekeko udaba lwezitabane ebandleni lwakwaShembe.

CELANI SIKHAKHANE

SELUDALE olunye uqhekeko udaba lwezitabane ebandleni lwakwaShembe ngemuva kokuthi abaseKuphakameni sebezidele amathambo bagxeka umholi waseBuhleni inkosi Mduduzi Nyazilwezulu Shembe ngokuthi udukisa isizwe uma ithi yizo ezidala isomiso.

UNobhala Jikelele waseKuphakameni, uMnuz Thetha Ngiba, uthe nakuba bengahambisani nokuganana kwabesilisa beyibandla kodwa bayibone idukisa inkulumo yoNyazi ngokuthi lubone abesilisa abaganana bodwa beyimbangela yesomiso.

“UJehova waseKuphakameni akahambisani nobutabane ngoba buyisono ngokweBhayibheli kodwa ukuchaza amadoda aganene wodwa ngokuthi yiwo ayimbangela yesomiso lokho kuwukunhlanhlatha. Asikwazi ukuthi singabaholi singahlekisa ngesimo sesomiso esibhekene naso ezweni bese sikhomba izinto eduzane sithi yizo ezisidalile. Lokho kuwukuba ngusomathuba ukwenza izinsolo ezifana nalezi. Thina sikhuluma nje siyenyuka mhlaka 1 sibheke eNtabeni iNhlangakazi lapho siyocela khona uThixo ukuba asithethelele kuphele isomiso ngoba kuningi okuyizono okwenziwe emhlabeni. Lapha ngibala inhlonipho nokuzwana singabantu nokusondelana naye uThixo osekusilahlekele,” kusho uNgiba.

Sekuphawulwe kaningi ngentshumayelo yoNyazi eyayisola izitabane ukuthi yizo ezidale isomiso. Inkosi Phakama Shembe ehola amaNazaretha eGoli ngeledlule igxeke uNyazi ithi inkulumo yalo idicilela phansi isithunzi namalungelo abanye.

Nokho uMfu Mthembeni Mpanza owahlubuka eBuhleni, weNazareth Church of God ePinetown yena weseke uNyazi wathi konke elalikusho kuhambisana nezincwadi ezitholakala eBhayibhelini.

Umkhulumeli waseBuhleni uMfu Mhlaliseni Hlatshwayo uthe alikho iphutha ngentshumayelo yoNyazi ngisho kungathiwa izitabane zikhona ebandleni kodwa ngeke luyeke ukukhulekela ukuba ziphile impilo ejwayelekile.

“Siyabezwa abagxekayo kodwa konke okwashiwo wuNyazi kuseBhayibhelini. Mayelana nokuthi ngabe zikhona yini izitabane kwaShembe akusiyona into engingayivuma noma ngiyiphike. Engingakusho wukuthi ukhona omunye umfana ebandleni owacela uNyazi ukuba lumthandazele ngoba wayeyisitabane futhi ekhala ngokuthi abantu bafuna ukumbulala. Okunye wukuthi uma isono sikhona ebandleni akusho ukuthi uNyazi kuzomele lungashumayeli ngaso ngoba phela alwenzeli ukumema abantu ukuthi beze ebandleni kodwa lukhuluma ngezinto eziseNcwadini eNgcwele abanye abafundisi abasabayo ukukhuluma ngazo ngoba besaba ukuthi bazolahlekelwa amakholwa,” kusho uHlatshwayo.

Lolu daba lusezandleni zeKhomishini yamaLungelo eSintu. Lubikwe yinhlangano elwela amalungelo ezitabane KwaZulu-Natal.

Umkhandlu wamabandla ahlangene iSA Council of Churches unxuse isizwe ukuba sibe nesikhathi sokuzindla ngokuthi kusho ukuthini ukubuyisana ngokweqiniso eNingizimu Afrika.

INTATHELI YESOLEZWE

UMKHANDLU wamabandla ahlangene iSA Council of Churches (SACC) izolo unxuse isizwe ukuba sibe nesikhathi sokuzindla ngokuthi kusho ukuthini ukubuyisana ngokweqiniso eNingizimu Afrika.

Lokhu kumele kwenziwe ngokuhambisana nokukhumbula usuku okwashona ngalo owayengumengameli wakuleli uNelson Mandela, uDisemba 5.

Sekuwunyaka wesibili lona leli qhawe ladlula emhlabeni.

UNobhalala Jikelele weSACC uMbhishobhi Malusi Mpulwana uthe indlela ebheke ekubuyisaneni ngokweqiniso wuhambo okumele sonke isakhamuzi sakuleli sibe yingxenye yalo okuyilapho beyothola khona ukuthi kusho ukuthini lokhu.

ISACC yethule umkhankaso ekuqaleni kwalo nyaka obizwa ngokuthi yiThe South Africa We Pray For” okungahunyushwa ngokuthi iNingizimu Afrika esiyikhulekelayo.

Lo mkhankaso ugxile ekuphulukiseni nasekubuyiseni iNingizimu Afrika, abantu bayo nezimo abaphila ngaphansi kwazo.

UMpulwana unxuse izakhamuzi ukuba zibambane ngezandla zisebenzisane ukufeza injongo yalo mkhankaso yokubuyisana.

“Ukufeza lokhu kudinga ukuba sisebenzisane ukuvikela umbuso wentando yabantu nobuntu obugcizelelwa wuMthethosisekelo wethu,” kusho uMpulwana.

Uthe usemkhulu umsebenzi odinga ukwenziwa ukufeza lokhu. UMpulwana uthe ukuqala ukuvuma ukubuyisana, ukusebenzisana nokuqhubekela phambili kungasiza ukulwa nesihlava leli elibhekene naso njengobubha.

Uthe ukubuyisana kusho ukusebenzisana ukuqinisekisa ukuthi kuqedwa indlala, ubugebengu, inkohlakalo nokugcizelela ekutheni wonke umuntu uyakhululeka nangokomnotho.

Uthe uMandela walwela ukuthi kuphele ukucwasana ngokobuhlanga, ngokwebala, ngokobulili nabokufika, walwela ukuqedwa kwenkohlakalo nokuthi wonke umuntu wakuleli abe nokudla nendawo yokufihla ikhanda.

“Yiyona le Ningizimu Afrika esiyikhulekelayo nesizoyisebenzela,” kuphetha uMpulwana.

Uthe amabandla kulo lonke leli azoba nezinkonzo zokukhumbula uMandela ngeSonto (Disemba 6).

Kuvuke umunyu nezinseka kuSomlomo wesiShayamthetho saKwaZulu-Natal uNkk Lydia Johnson.

MLUNGISI GUMEDE

KUVUKE umunyu nezinseka kuSomlomo wesiShayamthetho saKwaZulu-Natal uNkk Lydia Johnson ngesikhathi ebona isimo sezingane ezingu-70 ezine-HIV futhi eziphila nokukhubazeka.

Izolo, ngosuku obeluqondiswe kwabaphila nokukhubazeka, uNkk Johnson namanye amalungu esiShayamthetho bahambele ikhaya okuhlala kulona lezi zingane eKuvukeni, eMnambithi.

Kuleli khaya, elasungulwa nguNkk Gugu Mgaga ngo-1994, kuhlala izingane ezingenabazali iminyaka yazo ephakathi kwemithathu kuya ku-15.

UNkk Mgaga wathatha izingane wazigcina emva kokubona indlela ezazihlukumezeke ngayo emva kokushona kwabazali bazo.

Uthe ekuqaleni babehlala emjondolo kwaba khona usizo alutholayo wakha isakhiwo esingcono esiyihholo abasisebenzisayo manje.

“Zonke lezi zingane azinabo abazali. Ngabona isimo sazo ngafikelwa wumqondo wokuthi ngizigcine yize nami ngingenalutho,” usho kanje.

Ubonge uNkk Johnson ngokubasiza ngezimpahla okubalwa kuzona iziqandisi, imibhede, ukudla nezingubo.

“Nathi sizoba noKhisimusi ofana nowabanye abantu emva kokuthola lolu sizo,” usho kanje.

Unxuse nosomabhizinisi ukuthi balule isandla basize izikhungo ezifana nalezi.

UNkk Johnson ubonge uNkk Mgaga ngokuba nesibindi sokuma angalivali leli khaya yize ekade engalutholi usizo.

Uthe bazokhuluma nomlingani wakhe uNkk Weziwe Thusi onguNgqongqoshe wezokuThuthukiswa koMphakathi amcele ukuthi akalivakashele leli khaya ukuze abone ukuthi ayikho yini indlela angasiza ngayo.

UNkk Johnson uthe bewuhulumeni kumele kube khona abakwenzayo ukuthuthukisa isimo saleli khaya.

UNomkhosi Nxumalo (13) uthe bajabule kakhulu ngokuthola usizo.

“Okungijabulisa kakhulu wukuthi ngithole nama-pads njengoba ngihlale ngihlupheka uma ngisezinsukwini zami,” usho kanje.

Sishiye kukhalwa isishingishane somoya ebesihambisana nesichotho esihlasele izindawo ezahlukene oPhongolo.

MTHOKOZISI MANQELE

EsoPhongolo

SISHIYE kukhalwa isishingishane somoya ebesihambisana nesichotho esihlasele izindawo ezahlukene oPhongolo, ngoLwesithathu ebusuku, okumanje inqwaba yabantu isele dengwane.

Ngokwesitatimende esithunyelwe wuMasipala wasoPhongolo kwabezindaba, ingu-120 imizi epheshukelwe wuphahla kuhlanganisa nemizi edilike izindonga.

Ayikho imibiko yokufa nokulimala kwabantu ngenxa yalesi sigameko.

Ithimba lezimo eziphuthumayo nezisebenzi zalo masipala zisize umphakathi ngamatende, izingubo zokulala nokudla.

Kubalwa izindawo ezisemawadini amane kwezihlaselwe yisiphepho. Ku-ward 1 kuthinteke iNyaliza, Manzamhlophe, Dwarsland, Mphatha neFuduka.

Ku-ward 5 sihlasele iBelgrade.

Kuward 6 sishaye iNtumbane Kortnek, Klipwal, Ntabakayishi, Manzamhlophe kwathi ku-ward 12 yadlula neNtuthuko, Mshololo, Manyandeni, Gabela, Chicago nakwaMakhwabi.

Ngokusho kwenduna yakwaNdlangamandla uMnuz Bhekisisa Zwane lesi siphepho siphinde sacekela phansi izigxobo zikagesi.

“Sithinte abakwa-Eskom bafika bazozilungisa ngoba bezizolilamaza izingane nomphakathi ngoba beziwele emgwaqweni nasemzini yabantu,” kusho uZwane.

Usizi belubhalwe emehlweni kwelinye ilungu lomphakathi uMnuz Sbongumusa Zwane (36) waseManyandeni osale nabekugqokile kuphela.

Uthi ubonga indlu encane yakwamakhelwane akwaze ukubambelela kuyo sekubheda.

“Ngesikhathi siqala sihlasela isiphepho ngiyizwe indlu inyakaza ibonakala ukuthi ifuna ukuwela kimi. Ngivele ngabalekela kwamakhelwane.

Nakhona angibange ngisakwazi ukungena endlini yakhona ngoba ibiwa nayo, ngavele ngayocasha endlini encane zasala zawa izindlu singekho phakathi.

Ukube angibalekanga ngabe ngifile ngoba ibizongingcwaba ngiphila le ndlu. Angazi ngizokwenzenjani ngoba konke ebinginakho konakele ngesikhathi kuphephuka indlu,” kubalisa uZwane owengeze ngokuthi akasebenzi futhi uhlala yedwa.

Kuthiwa isishingishane somoya walolu hlobo sesithole indawo yokudlalela emphakathini wasoPhongolo.

Kuthiwa emasontweni amabili edlule besihlasele kwawa namaqhwa amakhulu kwalimala inqwaba yezimoto edolobheni lakhona.

Naleso siphepho kuthiwa sidlule nenqwaba yemizi okuhlanganisa neminye eqedelwe ngesinye ebesihlasele ngoLwesithathu ebusuku.

Kushube isimo kwanuka umsizi erenki yamatekisi aya eSiphingo, ngemuva kokuthelwa ngemvula yezinhlamvu kosomatekisi abane.

S’MANGELE ZUMA

KUSHUBE isimo kwanuka umsizi erenki yamatekisi aya eSiphingo engaphandle kwesibhedlela iPrince Mshiyeni Memorial, eMlazi, ngemuva kokuthelwa ngemvula yezinhlamvu kosomatekisi abane ebebehleli emotweni erenki kwafa abathathu, kwalimala kanzima oyedwa izolo ntambama.

Amagama abo asagodliwe ngenxa yokuthi imindeni yabo ibingakaziswa yonke. kuthiwa bebehleli emotweni ngesikhathi kuqhamuka amadoda amathathu abezifihle ubuso afike aqhulula ngezinhlamvu.

Kuthiwa babaxinele eduze kangangokuthi abakwazanga nokuphuma emotweni babe sebeshonela khona.

Ngokusho komthombo weSolezwe indoda esindile ithe imoto abadutshulelwe kuyo bebeyibolekile benomngani wayo ophakathi kosomatekisi ababulewe.

“Osindile udubuleke entanyeni kodwa uyakwazi ukukhuluma. Uthe ubephelezele umngani wakhe ukuyokoleka imali kumphathi waserenki. Umphathi nomunye usomatekisi babe sebehlala nabo emotweni ngaphambi kokuba bahlaselwe. Lesi senzo sibathuse kakhulu abagibeli kepha akuphazamisekanga ukuhamba kwamatekisi ngoba imoto ibibuqamama nalapho okuhamba khona amatekisi,” kusho umthombo.

Uthe bonke osomatekisi abashonile ngabaseMlazi.

“Kusanda kudutshulwa osomatekisi ababili okusolakala ukuthi yibo abebeqoqa imali erenki. Kubukeka sengathi kubulawa laba abaqoqa imali. Kepha ngokuhamba kwesikhathi kuzogcina kuvelile ukuthi kubangwani,” kusho umthombo.

Omunye wabagibeli uthe ubaleke washiya isithunzi ngesikhathi isibhamu siqhuma siphindelela.

“Ngivele ngasaba ngoba bengingazi ukuthi isibhamu esiqhumayo siqhuma ngaphi. Ukubulawa kosomatekisi abathathu ngesikhathi esisodwa kuzosusa uthuthuva,” kusho umgibeli.

Okhulumela amaphoyisa aKwaZulu-Natal, uMajor Thulani Zwane, ukuqinisekisile isenzo sokudubula.

Kunzima ukuxazulula inkinga yokubhuqwabhuqwa kwabantu ehostela iGlebelands, eMlazi, osekufe inqwaba bedutshulwa.

NOELENE BARBEAU

KUNZIMA ukuxazulula inkinga yokubhuqwabhuqwa kwabantu ehostela iGlebelands, eMlazi, osekufe inqwaba bedutshulwa.

Lokhu kuvezwe nguMasipala weTheku, obufake isicelo esiphuthumayo sokuthola incwadi ezovimba abaphehli bodweshu kuleli hostela ukuqhubeka nokubhubhisa abantu.

Kulesi sicelo kuvela ukuthi umasipala uvuma ukuthi amaphoyisa ahlulekile noma awazimisele ngokuqeda inkinga yokubulawa kwabantu kuleliya hostela.

Lesi sicelo esifakwe eNkantolo eNkulu eThekwini siveza ukuthi amahostela aphethwe amakomiti afuna imali kubaqashi.

Yize uhulumeni ezamile ukuwaqeda amakomiti namaqembu alwayo, udlame lusaqhubeka.

Ijaji Dhaya Pillay usichithile lesi sicelo ngoba bengekho abantu esibhekiswe kubona.

Umasipala bewubale abantu abaphethe izitezi ukusuka ku-Block A kuya ku-Z ehostela iGlebelands njengabantu bokuqala okufanele baziphendulele.

Abesibili kube yilabo abaphethe izitezi kusuka ku-40 kuya ku-57.

Ezincwadini zenkantolo umasipala ubize bonke laba ngabaphehli bodlame.

Encwadini efungelwe uMnuz Sibusiso Sithole oyimenenja kaMasipala weTheku, uthe ngeke bakwazi ukubikela laba bantu abakhuluma ngabo ngalesi sicelo bebe bengawazi namagama abo.

Uthe bekunezinkolelo eziqinile zokuthi ukubazisa laba ngaphambi kokuthi kuqale lezi zinhlelo bekungaholela ekutheni kuqhubeke ukuchitheka kwegazi.

Lesi sicelo bekubhekwe ukuthi silalelwe ngoLwesihlanu olwedlule njengoba umasipala ubufuna incwadi evimbela labo ababalwe encwadini ukuthi bangenzi okulandelayo:

n Ukufaka abantu ezindlini ehostela.

n Ukuxosha abantu ngokungemthetho ehostela.

Ezincwadini zenkantolo uSithole uthe umasipala yiwo owengamele iGlebelands.

Uthe leli hostela linemibhede engu-11 580 kodwa kumanje linabantu abalinganiselwa ku-48 000.

Uthe lesi sibalo sikhuliswe wukuthi ezinye iziqashi beziletha izingane zazo, abantu abathandana nabo okanye abashade nabo ukuthi bahlale nabo ehostela.

USithole uthe esinye isizathu salokhu wukuthi labo abafakelwe isicelo bafaka abantu ngokungemthetho ukuze bathole imali kubona.

Phakathi kuka-1983 no-1996 amahostela abephethwe nguhulumeni wesifundazwe ngaphakathi ehostela kusebenza amakomiti futhi behambisana namaqembu athile ezepolitiki.

Uthe isimo sakhona besingekho emthethweni ngoba abantu bebefakwa ezindlini noma bakhishwe noma babulawe ngoba beseqenjini elithile lezepolitiki.

USithole uthe ngo-1996 umasipala waqoka ukuthi wengamele ukusebenza kwamahostela, ubhalise bonke abahlala kuwona.

Uthe amakomiti asehostela aqhubekile nohlelo lokukhipha abantu ezindlini ngokungemthetho.

Lapho bekufakwa abantu abasondelene nabo noma kufakwe labo abazimisele ngokukhokha imali kubo.

“Ngesikhathi beqhubeka nokukhipha abantu ezindlini, amakomiti abe esedlulela odlameni. Abantu ababehleli ezindlini ngokufanele bebebulawa ngamalungu amakomiti,” kusho uSithole.

Uthe ngo-Agasti nyakenye uNgqongqoshe wezokuHlaliswa kwaBantu nomasipala bathola incwadi yezikhalo evela kwabahlala kuleliya hostela bekhala ngokuphoqelelwa ukuthi bayeke ukukhokha irenti kumasipala.

Laba bathi babephoqwa ngabaholi bamakomiti.

Baphinde bakhala ngokuthi bakhishwa ngokungemthetho ezindlini yibo laba baholi nokuthi laba baholi bayathinteka ekubulaweni kwabantu.

Uthe uNdunankulu wawayekisa amakomiti ukuthi asebenze kodwa udlame alukapheli.

Uveze ukuthi kubulawa abaholi ngokuziphendulela emaqenjini alwayo.

Uthe kuyacaca ukuthi uma kungenziwa lutho ukumisa lesi simo lama qembu azoqhubeka nezenzo ezingekho emthethweni.

USithole uthe umasipala ngeke ukwazi ukusiza abahlala kuleli hostela ngoba amaphoyisa kamasipala awakwazi ukuhlinzeka usizo oludingeka ehostela.

Uthe amaphoyisa iSAPS ahlulekile ukusiza abantu basehostela njengoba ethe abaye kumasipala.

USithole uthe ayikho enye indlela ngaphandle kokuthola incwadi yokuvimba amaqembu alwayo ukuthi angakwazi ukuziphathela ihostela nokulenza lingabuseki.

Uphunyuke kunzima owesilisa wasehostela eGlebelands eMlazi obehlaselwa eya emsebenzini ekuseni eduze kwaseMega City.

LUNGI LANGA

UPHUNYUKE kunzima owesilisa wasehostela eGlebelands eMlazi obehlaselwa eya emsebenzini izolo ekuseni eduze kwaseMega City.

Kusolakala ukuthi lo mlisa ubesendleleni eya emsebenzini ngesikhathi kuqhamuka imoto emhlophe iNissan Almera yavulela ngenhlamvu kwadubuleka nobehamba naye.

Ngokusho komthombo obone lesi sigameko lona wesilisa obehamba ngeveni yomsebenzi ume erobhothini nokuyilapho kuqhamuke le moto yavulela ngenhlamvu.

Kudubuleke omunye umlisa asebenza naye okuthiwa uyalulama esibhedlela emuva kokudutshulwa engalweni nasesiswini.

Umthombo ocele ukuthi igama lawo ligodlwe uthe le moto ibe seyibaleka naye lo mlisa waphuthuma esibhedlela ehambisa lona abehamba naye.

Okhulumela amaphoyisa KwaZulu-Natal, uMajor Thulani Zwane, uthe amaphoyisa aseMlazi ayasiphenya lesi sigameko.

Uthe asikaziwa isizathu sokuhlaselwa kwabo futhi bekungakaboshwa muntu ngaso. Lesi sigameko esenzeke ngaphambi kwehora lesithupha, bekungekhona okokuqala senzeka.

Ngokusho komhlali wakuleliya hostela ocele ukuthi igama lakhe ligodlwe, sekuyisigameko sesibili kuleli sonto sokuhlaselwa kwalo mlisa. Uthe ngoLwesibili ekuseni uke wahlaselwa ngesikhathi eyothatha abantu asebenza nabo ngasesikhumulweni sezindiza esidala.

“Ubeyolanda omunye asebenza naye, kuthe esemthathile esevala isicabha bavele baqala laba badubula. Ngenhlanhla imoto ubeseyisusile waphunyuka kanjalo,” kusho lo mhlali.

Uthe lo mlisa kungenzeka ukuthi uhlaselwa ngoba wayekade engusihlalo wesinye sezitezi ngaphambi kokuthi kuxoshwe osihlalo bezitezi.

Kuthiwa ubengusihlalo esitezi uBlock M lapho ebesahlala khona namanje.

Ngokusho komhlali wakuleliya hostela isigameko sokuhlaselwa kwalo mlisa ngoLwesibili senzeke ngaphambi kokuthi kubulawe uMnuz Mlinyelwa Gobidolo (69) obedume ngelika-Majola obulawe ngoLwesibili ekuseni.

Uthe kabakhululekile neze ngoba abantu sebebulawa bengaphandle kwehostela. Uthe abaphephile ngisho begibela ematekisini.

Kusolakala ukuthi sebengu-54 abantu asebebulawe kuleliya hostela kusukela ngonyaka odlule.

Icushelwe umgoga zayikhalela inyanga mbumbulu ebisiyiqedile imali yabantu eThekwini.

S’MANGELE ZUMA

ICUSHELWE umgoga zayikhalela inyanga mbumbulu edabuka eMalawi ebisiyiqedile imali yabantu eThekwini ibathembisa ukubanikeza izizumbulu ebithi baziphiwe abakubo abangasekho.

Kusuke isidumo eMakethe, eThekwini izolo ngesikhathi uMnuz Siphesihle Zulu (29) osebenza egaraji eChatsworth etholana phezulu nale nyanga emqole u-R40 200, imthembisa ukumlungisela izitha zakhe ebithi sekunesikhathi zimhlukumeza.

Le nyanga (30) ebicabanga ukuthi izohlangana nomunye onenkinga, ithuke yoma isibona uZulu ogibele emotweni yayo ithi iyabaleka kwasakazeka izinto zabantu abadayisayo.

“Ngenyanga edlule ngibone isikhangiso sale nyanga ephepheni kuthiwa ikwazi ukuxazulula noma iyiphi inkinga. Ngiyishayele ucingo ngayibikela ngenkinga yami nezitha zami ezingihlalise kabi. Yangitshela ukuthi wubala lolo izokwazi ukuzisusa eduze kwami ngokuzenza ziphithanelwe amakhanda. Yathi asihlangane emakethe ngiphathe u-R1 500 ukuze izonginikeza umuthi ozongisiza. Ngayinikeza imali yanginikeza ibhodlela elincane elingazange lingisize ngalutho. Abantu bebeqhubeka bengihlukumeza,” kusho uZulu.

Uthe le nyanga yamtshela ukuthi kuzomele bayokhuluma nabadala olwandle eSipingo kodwa kumele aphathe u-R1700.

“Sithe sifika ngasolwandle yangiyisa kwenye indawo enamadwala, sachusha kuwona ebumnyameni yathi kunemikhovu. Imikhovu yathi angibeke phansi imali engiyiphethe ngiphume. Sengibuya kwase kunebhokisi elikhulu ligcwele imali engo-R200. Bathi le mali iwu-R4.4 million engiwuphiwe ngabakithi abangasekho. Bathi kodwa ngidinga ukuletha u-R35 000 ukuze bakwazi ukuyihlambulula ngiyisebenzise. Ngahamba ngabuya nayo ngempela le mali ngemuva kokuyoyiboleka,” kuxoxa uZulu.

Uthe kodwa watshelwa ukuthi kumele athume inyanga iyomlandela isikhwama ePolokwane sokuvimba imikhovu ukuthi ingayilandi yonke le mali uma esehambe nayo.

“Inyanga yathi mangiyinike u-R2000 wokuya ePolokwane ukuze imali izobuyela ngakumina. Ngathi ngiyithinta yathi lo muntu osePolokwane ufuna u-R45 000 ukuze akhulule isikhwama. Ngathi ngeke ngibe nayo wathi uzongilinda ngiyihlanganise noma ngisho abuye, ngikhohlwe yimali. Bekuthi uma ngimshayela ucingo athi usePolokwane ulinde imali. Yilapho ngithe umngani wami akayithinte azenze onenkinga ukuthola ukuthi ayikho ngempela. Sithukile isithi abahlangane eMakethe. Yilapho engiyicuthele khona ngabiza amaphoyisa abantu befuna ukuyiqeda,” kusho uZulu.

Umngani kaZulu uMnuz Vusi Sikhakhane (29) uthi uyajabula ukuthi ukwazile ukusiza umngani wakhe abophise le nyanga.

“Esikufunayo wukuthi abuyise imali kuphela. Okubuhlungu wukuthi lo muntu useyiqedile imali yabantu. Sicabanga nokuthatha imoto yakhe ayithole uma esekhokhe imali kaSiphesihle,” kusho uSikhakhane.

Owamaphoyisa aseThekwini uCaptain Khephu Ndlovu uthe amaphoyisa aseDurban Central avule icala lokuntshontsha.

“Kuboshwe owesilisa ona-30 ozibiza ngenyanga osolwa ngokuqola abantu,” kusho uNdlovu.

Basinde ngokulambisa abazali bowesilisa obhema insangu obakhiyele endlini maqede wayithungela ngomlilo.

S’MANGELE ZUMA

BASINDE ngokulambisa abazali bowesilisa (34) obhema insangu waseFolweni obakhiyele endlini maqede wayithungela ngomlilo ngoba bengamnikanga u-R2 kagwayi abewufuna ngo dli izolo ezintatha.

Kuphoqeleke ukuthi badonse ngendluzula izinsimbi zasewindini baphahlaze iwindi lasekamelweni labo lokulala ngoba izinsimbi zomnyango yomibili yokuphuma bezikhiyiwe.

Unina womsolwa uNksz Thabisile Mthembu (56), uthe kubacacele ukuthi indodana yabo ibifuna ukubashisa nendlu ngoba wonke amawindi nezicabha zasendlini zinezinsimbi.

“Silale sihilizisene naye ngemuva kokuthi esicele u-R2 samtshela ukuthi asinawo. Ube esebuza uyise ukuthi akanawo kanjani esanda kuhola impesheni. Uyise umtshele ukuthi sekunesikhathi eyitholile imali yakhe njengoba imali yempesheni isheshe yaphuma. Ngokubona impikiswano phakathi kwabo iqhubeka ngibe sengikhipha ishumi ebenginalo ngamnikeza umfana. Ulithathe evele enokukhononda ethi uyise umncisha imali,” kulandisa uNksz Mthembu.

Uthe ngesikhathi sebeyolala ubelokhu eyaluza endlini okwenze ukuthi uyise uMnuz Alfred Shandu (66) agcine emthethisile ethi makavale isicabha.

“Uthe vele usazophuma yingakho engawuvalile umnyango. Ngihlale kancane ngabuka ithelevishini ekamelweni ngimuzwa eyaluza endlini. Ngithe ngicima ithelevishini nogesi ngezwa kuhwashaza oplastiki, ngathi ngiyalunguza ekamelweni lakhe ngabona kumnyama. Kusho ukuthi yingaleso sikhathi ebehlanganisa izinto zokushisa. Sivuswe yintuthu isigcwele indlu sathi siya ngasesicabheni sathola izinsimbi zikhiyiwe. Sibe sesiphoqeleka ukuthi sibuyele ekamelweni ukuyohluthula izinsimbi, amalangabi esilandela ngemuva. Ngenhlanhla siphume singenamyocu kepha indlu ishe yaphela nakho konke obekuphakathi,” kusho uNksz Mthembu.

UShandu obengekho ngesikhathi Isolezwe lihambele kwakhe, uthe bashaqeka sebebhadama indodana yabo esiteshini samaphoyisa bethi bayovula icala.

“Amaphoyisa asitshele ukuthi uzinikele kuwo ebatshela ukuthi usewushisile umuzi wakubo nabazali bakhe phakathi. Kanti sizongena ngesikhathi besamphonsa ngemibuzo. Lo mfana ungibulale ngiphila ngalesi senzo sakhe, umuzi wami onamagumbi ayisithupha washa waphela. Umuzi engiwusebenzele kanzima kangaka. Namanje sisizwe yindlu yomxhaso ebisegcekeni ukuze sibe nendawo yokulala. Sibonga nokuthi abazukulu abathathu okungamadodana akhe umsolwa abevakashile ngesikhathi kusha,” kusho uShandu.

Uthe okubaphatha kabi wukuthi kungenzeka idedelwe indodana yabo ngoba ingumuntu ohamba odokotela bengqondo.

“Ubehola impesheni yokugula ngekhanda kodwa yanqamuka ngemuva kokuthi udokotela emfeyilisile ngoba ebhema insangu. Bekumele ukuthi aphinde ayoyivuselela maduze nje. Ngathatha izimali zami zasehhotela lapho engangisebenza khona ngazifaka ekulungiseni lo muzi awushisile. Angazi uma ngase adedelwe ukuthi ngizombhekelwa ubani,” kubalisa uShandu.

Okhulumela amaphoyisa aKwaZulu Natal uMajor Thulani Zwane uthe amaphoyisa aseFolweni avule icala lokusha ngemuva kokushiswa komuzi.

“Imbangela yalesi sehlakalo ayikaziwa okwamanje. Kuboshwe owesilisa oneminyaka engu-34,” kusho uZwane.

Ziningi izinselelo ezibhekene nabantu abakhubazekile ezisabanqinda ukuba bazenzele izinto kepha bancike ekusizweni ngabanye abantu.

NONTUTHUKO NGUBANE

ZININGI izinselelo ezibhekene nabantu abakhubazekile ezisabanqinda ukuba bazenzele izinto kepha bancike ekusizweni ngabanye abantu.

Lokhu kushiwo uNksz Bongi Mdluli (22), waseBergville kade ekhuluma ejele laseWestville kugujwa usuku lwabaphila nokukhubazeka, olugujwa umhlaba wonke ngoDisemba 3 minyaka yonke.

UBongi wanqunywa umlenze eneminyaka engu-13 emuva kokuba kutholakale ukuthi unesifo somdlavuza (oestrogenic cancer).

Wayefunda uGrade 6 ngaleso sikhathi kodwa waba nesibindi sokuvumela odokotela ukuba bamnqume umlenze kwazise abazali bakhe babesaba ukumnika imvume.

Ekhuluma neziboshwa eWestville uthe ziningi izinto okusamele zilungiswe ukuze abakhubazekile bazizwe beyingxenye yomphakathi ngokugcwele.

“Ngike ngithi nginemilenze emithathu, nginawo umlenze wokufakelwa kodwa angithandi ukuwufaka ngoba ngifuna abantu bangamukele ngendlela engiyiyo. Ngifuna abantu bakwazi ukubuka impilo yami bazi ukuthi nabo bangakwazi ukuphila impilo abayithandayo. Angizithathi njengomuntu okhubazekile kodwa ngihlukile. Ngenza konke engikuthandayo, ngifaka ngisho nesicathulo esiphakeme. Okungiphatha kabi wukuthi abantu abaphila nokukhubazeka basabhekene nezinselelo eziningi. Abahamba ngezihlalo abakwazi ukuzikhiphela imali ngoba imishini iphezulu kakhulu, kumele bahlale becela usizo. Abahamba ngezihlalo abakwazi ukuhamba ngezitebhisi ezihambayo ngoba kazakhiwe ngendlela ebalungele. Abakhubazekile badinga ukuba izidingo zabo zinakekelwe kungagcinwa icala,” kusho uBongi.

Uthe okunye okuphatha kabi abakhubazekile ngukudatshukelwa kube sengathi okhubazekile kukhona okungahambi kahle kuye.

“Angithandi ukudatshukelwa ngoba umlenze wakhishwa. Abantu abaningi abakhubazekile uthola bedatshukelwa kunokuthi bathathwe njengabanye abantu. Lokhu kugcina kunengana. Ngisho nendlela abantu abasibiza ngayo ayinambitheki kahle. Cabanga nje umuntu esethi ngikhuluma nosisi ongenawo umlenze, kubuhlungu lokho,” usho kanje.

UBongi uphinde wakhuza umoya wokuthanda ukuthola isibonelelo sikahulumeni kwabakhubazekile bese bevilapha ukuzisebenzela.

“Kwesinye isikhathi ukuthi ukhubazekile akuchazi ukuthi awukwazi ukuzisebenzela. Kubi ukuthi umuntu afune ukuthola isibonelelo sikahulumeni bese ondla ngaso umndeni wakhe enze nokunye kodwa anganakekeli impilo yakhe nokubonana nodokotela. Uma uphila nokukhubazeka kodwa ukwazi ukuzisebenzela asikho isidingo sokukhangeza kuhulumeni. Abantu abayeke ukuvilapha,” kusho uBongi.

Kumanje uBongi unenhlangano yakhe ebizwa ngokuthi yiConfident Driven Youth Club.

Unxuse ukuba neziboshwa ezisejele ezikhubazekile zithole ukunakekelwa ngendlela.

Uswele amaphiko okundiza umfana onesifo sezinso ehlanganiswa noMfundisi uSthembiso Zondo.

S’MANGELE ZUMA

USWELE amaphiko okundiza umfana waseHammarsdale onesifo sezinso ehlanganiswa noMfundisi uSthembiso Zondo esontweni lakhe iZero to Hero, eThekwini izolo ekuseni.

Umfana ophasele uGrade 12, uSibusisiwe Mabika (17) ubephelezelwe ngunina uNksz Thandeka Nqayi (42) ngesikhathi inhlangano efeza amaphupho ezingane eziphila nezifo ezibucayi iReach for A Dream ifeza iphupho lakhe leminyaka lokuhlangana noZondo.

“UPastor Zondo ngiqale ukumthanda ngo-2011 ngimuzwa njalo ekuseni ekhuthaza abantu emsakazweni Ukhozi FM. Bengingalenzi iphutha lokuphuthelwa yinkulumo yakhe eyakhayo nsukuzonke. Ngithanda ukuthi uyakwazi ukuvuka ezimweni ezinzima, ngisho sebemshayile bethi baqedile ngaye. Kuthe ngo-2014 ngitshelwa ukuthi nginesifo sezinso esingalapheki yaba buhlungu inhliziyo yami kodwa kwabuya zonke izinkulumo zikaZondo ezigqugquzela ukungalilahli ithemba,” kusho uSibusisiwe.

Uthe impilo yakhe inzima ngoba isifo sakhe simphoqa ukuthi ahlale esibhedlela isikhathi esiningi.

“Sincane isikhathi engiya ngaso esikoleni okwenza ngisebenze kanzima uma ngifuna ukuphasa. Kuyimanje kusangidida ukuthi yini eyabanga ngithole lesi sifo ngoba ngavele ngaphelelwa amandla, udokotela wami wathi nginezinaliti esiswini,” kuqhuba uSibusisiwe.

Uthe wafunda lukhulu ngokuputshuka kwe-video kaZondo enqunu, athi namanje usakholwa wukuthi yakhishwa ngumuntu owayefuna ukumcekela phansi.

“Ngathuka ngiyibona ngoba ngangizitshela ukuthi ngeke akwazi ukumelana naleli hlazo. Wabonisa izwe lonke ukuthi ayikho into angeke amelana nayo uma uNkulunkulu engakuye,” kusho uSibusisiwe.

UNksz Nqayi uthe ujabule njengoba indodana yakhe igcine imbonile uZondo.

“Siyamthanda uZondo ngoba okuphuma emlonyeni wakhe kuyaphilisa. Indaba ye-video yasibonisa ukuthi uma uNkulunkulu ekukhombile awuphili kahle emhlabeni. Ungumafa vuke futhi akamdeli uNkulunkulu. Ukuze sisizakale kumele sikhulume nomuntu oseke wadlula ezimweni, umuntu okhuluma ngento ayaziyo. Ayikho into ebuhlungu njengokugulelwa,” kusho uNksz Nqayi.

Umfezi maphupho weReach for A Dream, uNksz Kholiswa Nonkwelo uthe kubathathe inyanga ukuxhumanisa uSibusisiwe noZondo njengoba engumuntu ohlale ematasa.

“Siyakholelwa emaphusheni nasekuletheni ithemba kulezi zingane ezisuke zinezifo ezibucayi. Sisuke sifuna ukuzibonisa ukuthi akukapheli ngempilo yazo,” kusho uNksz Nonkwelo.

Eduduza uSibusisiwe uZondo uthe ukuphila komuntu kuncike eNkosini.

“Khumbula akufi abantu abagulayo kuphela. Uyafa noma ungagulanga. Uyaphila iminyaka engaphezu kuka-50 nesifo. UNkulunkulu uma ekuwe ushiya abantu bebuzana ukuthi kanjani. Iba wumngani noNkulu-nkulu, ufunde kimi ukuthi i-video ayingibulalanga. Naye isifo sakhe ngeke simbulale uma uNkulunkulu engavumanga,” kusho uZondo.

Unomachule Gigaba, inkosikazi kaNgqongqoshe wezaseKhaya, uMnuz Malusi Gigaba, uthi kunzima ukushada naye.

NONTUTHUKO NGUBANE

Unomachule Gigaba, inkosikazi kaNgqongqoshe wezaseKhaya, uMnuz Malusi Gigaba, uthi kunzima ukushada naye.

Usho lokhu engxoxweni ekhethelekile neSolezwe eWaterfront Hotel & Spa lapho ebezokhuluma khona emcimbini wabesifazane bodwa owenziwe iMalibongwe Club ngoMgqibelo.

UNkk Gigaba (34) uthe ngenxa yokuba yisikhulu komyeni wakhe abantu bahlezi bembhekile ukuthi wenzani.

“Kunzima ukushada noGigaba ngoba ungowesilisa onamandla kwezepolitiki. Uma abantu bengibona bahlezi bebheke ukuthi ngingunkosikazi kaGigaba. Ukuthi ngiwuNoma nami ngizimele ngokwami abakubheki. Lokhu kwenza ngihlezi ngilindeleke ukuba ngibe sezingeni elithize empilweni. Kwesinye isikhathi sizithola (noGigaba) sesigcwele emaphephandabeni kukhulunywa ngezindaba ezingafanele ukunekelwa izwe,” kusho uNomachule.

Okusha kulokhu wukuvela kowesifazane uNksz Buhle Mkhize osha amashushu ngokuthandana kwakhe noGigaba.

Ngeledlule kuvele incwadi eshisayo ayibhale kwi-website iJust Curious, abeveza kuyo konke ngoGigaba ukuthi wayemthengela izipho ezibizayo ezitolo eziphambili, amuphe nemali akhokhele amabhanoyi ababetetemuka ngawo uma bengcebeleka.

Kuvele nokuthi wayengazi nokuthi uGigaba usezoshada ngenxa yokuthi wayematasa “ejahana naye”.

Ngokombiko wephephandaba elinguzakwabo weSolezwe, iSunday Tribune iqembu lepolitiki i-EFF eliholwa nguMnuz Julius Malema, ifuna kuphenywe ukuthi ngabe ayikho yini imali yabakhokhintela esetshenziswe “ekujoleni kwakhe”.

Ebuzwa ngoNksz Mkhize, uNkk Gigaba uthe akayingeni indaba yakhe.

“Angimazi, angikaze ngimbone. Angifuni ukukhuluma ngaye kakhulu ngoba anginamsebenzi ngaye. Indaba yakhe angiyingeni. Engingakusho nje wukuthi kukhona abantu abangafuni ukwamukela ukuthi ngishade noGigaba. Bazibuza ukuthi le ntombazane ivelephi, isishada nje noGigaba,” kusho yena.

UNkk Gigaba unezingane ezimbili zabafana eneminyaka emine nenye eneminyaka emithathu.

Uthe yize kusekhona “izivunguvungu” kodwa bayathandana nomyeni wakhe abashade naye ngonyaka odlule ngo-Agasti.

Izolo uNksz Mkhize uphinde washiya angalazi ekhasini lakhe ku-Instagram ethi uma uGigaba eke wamchukuluza uzomembula izinqe.

“Ngathembisa ukuthi ngizokhipha ezinye izindaba uma uNgqongqoshe wakwaNdabazabantu (Gigaba) engihlaza futhi. Umphakathi uyahluleka wukubona ukuthi ngamxwayisa no-@mrs gigabyte (Nomachule) ukuba ayeke ukungeyisa ngoba izinto zizoba muncu uma kuvela izindaba emphakathini.”

UNkk Gigaba uthe usezozithulela kukho konke okushiwo wuNksz Mkhize.

UNkk Gigaba ngoMgqibelo ubezokhuluma nabesifazane abangosomabhizinisi kugxilwe nasekubhekaneni nokhwantalala.

UNksz Gigaba utshele Isolezwe ukuthi abesifazane kumele bazethembe bakwazi ukumelana nenselelo yempilo.

Uthe okusemqoka wukuba abesifazane basekane futhi baphinde babuze indlela kwabangaphambi.

Ukugasela kwamaphoyisa kwenye indlu obekuhlezi kuyo abantu abangaphezu kuka-15 ehostela KwaMashu kuphethe ngokushona koyedwa.

NONTUTHUKO NGUBANE

UKUGASELA kwamaphoyisa kwenye indlu obekuhlezi kuyo abantu abangaphezu kuka-15 ehostela KwaMashu ngoMgqibelo kuphethe ngokushona koyedwa okuthiwa ubezama ukudubula amaphoyisa.

Owesilisa igama lakhe elingakadalulwa kuthiwa udutshulwe ngoMgqibelo ntambama emva kokuvulela ngenhlamvu ebhekise emaphoyiseni.

Umufi kuthiwa ubephethe isibhamu i-9mm kanti kunezinsolo zokuthi uyathinteka esehlakalweni saseSeven Oaks lapho kwathelwa othulini abasolwa abayisikhombisa abasolwa ngokweba.

Omunye umsolwa wasehostela laKwaMashu oneminyaka engu-23 ugcine eboshwe ngecala lokutholwa nesibhamu esingekho emthethweni.

Kwenzeka lesi sehlakalo nje, ngoNovemba 28 nonyaka kwenzeke esifanayo kuleli hostela amaphoyisa egasela kwenye indlu ebinabesilisa.

Kwadutshulwa abathathu okuthiwa nabo badubula amaphoyisa.

Okhulumela amaphoyisa KwaZulu-Natal uMajor Thulani Zwane usiqinisekisile lesi sigameko wathi umsolwa oboshiwe uzovela enkantolo namhlanje.

“Amaphoyisa aKwaMashu abeqaphe isimo ehostela athole ulwazi lokuthi kukhona abasolwa abaphethe izibhamu ezingekho emthethweni. Abe esebiza amanye (Durban flying squad, K9 unit, nawaseNanda) ukuze awalekelele. Bekunabantu abangaphezu kuka-15 endlini. Owesilisa ebona ukuthi amaphoyisa eza ngakuye ube esedubula. Amaphoyisa adubulile kwashona oyedwa. Omunye umsolwa oneminyaka engu-23 uboshelwe icala lokuphatha isibhamu esingekho emthethweni. Uzovela enkantolo yaseNtuzuma kusasa (namhlanje),” kusho uZwane.

Umkhuzi wamaphoyisa KwaZulu-Natal Lt-Gen Mmamonnye Ngobeni uthe izibhamu ezitholakele zizohlolwa ukuze kuvele ukuthi azikaze zisetshenziswe yini kwezinye izigameko zobugebengu.

Umthombo weSolezwe ohlala kuleli hostela uthe kumele kubhekisiswe ukuthi abantu ababulawa ngamaphoyisa bayathinteka yini ezigamekweni zobugebengu.

“Isimo sishubile ehostela njengoba amaphoyisa esegasela njalo aphume nesidumbu. Siyakujabulela ukugadwa amaphoyisa kodwa asazi noma ngenye inkathi azobuye asihlasele. Sifuna kuphenywe ukuthi abasolwa ngempela bawasukele yini amaphoyisa,” kusho umthombo.

USihlalo woBunye Bamahostela nezakhiwo zawo uMnuz Vusi Zweni uthe kuyadumaza ukuthi kusenezigameko ezifuze lezi KwaMashu.

Isilo Samabandla, uZwelithini kaBhekuzulu situse uhulumeni wobandlululo.

BONGANI HANS

ISILO Samabandla, uZwelithini kaBhekuzulu situse uhulumeni wobandlululo sagxeka uhulumeni wentandoyabantu ngokuhluleka ukwakha ingqalasizinda nokuqinisa umnotho wezwe njengoba kwakwenza iNational Party ngezikhathi zobandlululo.

Sithe iNational Party yakwazi ukwenza umnotho onamandla nombutho oqinile wezokuvikela.

Sikusho lokhu ngesikhathi sigubha iminyaka engu-44 sibusa emcimbini obusesigodlweni KwaKhethomthandayo, KwaNongoma ngoMgqibelo ebusuku.

Sikhale nangokuthi selokhu kwangena uhulumeni wentandoyabantu abantu abamnyama baqala bacekela phansi zonke izakhiwo zoMbuso wangobandlululo esikhundleni sokuthi basebenzele phezu kwazo.

ISilo besithula inkulumo yaso eqale ntambama ngoMgqibelo yaze yaphothulwa phakathi kwamabili sekuzosa kube yiSonto.

Sitshele izinkumbi zabantu ebezihambele lo mcimbi waso ukuthi sizizwa sijabule kakhulu ukuthi sazalwa ngonyaka okwasungulwa ngawo iNational Party okwakungu-1948.

Sikusho lokhu nje akukapheli isikhathi eside sikhwele sadilika kuhulumeni wesifundazwe siwusola ngokugxumeka amafulegi anobuso bukaNdunankulu uSenzo Mchunu esikhundleni sobaso nobeSilo uShaka, emcimbini weLembe obuKwaDukuza ngoSepthemba.

Siphinde saveza nokuthi lo mcimbi waso wokugubha iminyaka engu-44 sibusa esihlalweni sikaZulu, sizenzele sona ngaphansi kwesikhwama saso iKing Zwelithini Foundation.

“Ngesikhathi sombuso weNational Party ezokuvikela zaziqinile nomnotho ukhula ngendlela eyisimanga kodwa manje uyacwila niwucekela phansi. Kumanje anifuni ukwakha phezu kwalokhu enakuthola kuhulumeni weNational Party, kunalokho nishisa zonke izakhiwo,” kusho iSilo.

Sithe okuxakayo wukuthi abantu abayifuni ingqalasizinda noma izakhiwo ezazakhiwe amaBhunu bazicekela phansi kodwa abaholi abakhethwe ngentandoyabantu abafana noDkt Nelson Mandela, Thabo Mbeki noMengameli Jacob Zuma abazange babe nankinga ngezakhiwo zangobandlululo kunalokho bayazisebenzisa.

“Okuxakayo wukuthi abantu emazingeni aphansi abazifuni lezi zakhiwo zangobandlululo bayazishisa bazicekele phansi kodwa bonke omengameli abakhethwe ngentando yabantu bahlala kuzo bazisebenzise yize amaBhunu ayehlangana kuzo ashaye imithetho eyayisicindezela. Ngakolunye uhlangothi nina lapha emazingeni aphansi nishisa konke enikufice sekwakhiwe ngoba nithi kuyizakhiwo zobandlululo ekubeni abaholi benu besazisebenzisa namanje,” kusho iSilo.

Sibuye sancoma uhulumeni weNational Party ukuthi nakuba ayehlukumeza abantu abamnyama kodwa yena wawumhlonipha. “Angazi ukuthi yini lena eyayenza amaBhunu angihloniphe kangaka. Ngikhuluma nje esigodlweni KwaKhethomthandayo kusenezindondo ayehlonipha ngazo ubukhosi bami,” kusho iSilo.

Uthathwe yisifo senhliziyo obengumlingisi osanda kuthatha umhlalaphansi njengomsakazi woKhozi FM, uShadrack Ngema.

FANELESIBONGE BENGU

UTHATHWE yisifo senhliziyo obengumlingisi osanda kuthatha umhlalaphansi njengomsakazi woKhozi FM, uShadrack Ngema, odlule emhlabeni ngoMgqibelo ebusuku esibhedlela ePrince Mshiyeni, eMlazi.

UNgema (65) uzakhele udumo ngesikhathi elingisa emdlalweni wamahlaya wakuSABC 1, Emzini Wezinsizwa, ophindwayo kulezi zinsuku kusona lesi siteshi.

Umfowabo kaNgema, uMnuz Mandla Ngema, uthe umfowabo waqala ngo-2011 ukuphathwa yisifo senhliziyo kodwa kwaba sengathi uyelapheka.

“Ukhale ngobuhlungu enhliziyweni futhi nezingalo zinenkwantshu. Izolo izinhlungu zimqinisile ngabe sengimphuthumisa esibhedlela emini wadlula ngabo-7.30 ebusuku. Odokotela bathe ushodelwa yigazi ngoba umthambo awulihambisi kahle enhliziyweni,” kusho uMandla.

Uthe kubathusile ukushona kwakhe ngoba ubengenazo izimpawu zokuthi ukugula sekungamenela.

“Kusithuse kakhulu ngoba ubekhuluma futhi ezihambela kodwa singena esibhedlela ngimqhube nge-wheelchair ngenxa yokuthi ubenenzululwane,” kusho uMandla.

UMandla uthe uNgema, obehlala kwa-Z, eMlazi, ushiye emhlabeni izingane zakhe ezine.

Uthe umfowabo ubesehlukanisile nenkosikazi yakhe.

Umchaze njengomuntu obeyimela into yakhe.

“Ubehlakaniphile futhi enamancoko. Ubekuthanda ukukhuluma nabantu. Amahlaya aseMzini Wezinsizwa hhayi ukuthi yinto ayeyifunda phansi kodwa bekuyinto yakhe,” kusho uMandla.

Uthe amalungiselelo omngcwabo abengakaphothulwa kodwa kungenzeka afihlwe ekhaya eNdwedwe ngempelasonto.

UNgema ushona nje ubesethathe umhlalaphansi emsakazweni ngenxa yokuthi iminyaka yakhe ibingasamvumeli ukuthi asebenze. Ubeselingisa emdlalweni womoya iKusa Kusa kuKhozi FM. UMandla uthe ubeqashwe yizinkampani ezizimele njengeSAB nasemikhankasweni yokuqwashisa ngengculazi.

Ngo-Agasti kwashona ayelingisa naye Emzini Wezinsizwa uBantu Roland Mqwebu owayedlala indawo kaMkhize.

Ngaphambi kukaMkhize, ngoJulayi kwakushone uBafana Mlangeni obaziwa ngoSibeko obedakwa kulo mdlalo.

UNgema uqale ukusakaza ngo-1977. Ubelingisa, asakaze ibhola oKhozini.

Uke walingisa kuShaka Zulu ngo-1986 kanti ubezifela ngomculi uDolly Parton noKenny Rogers.

Udlalile emdlalweni wamahlaya kaPastor Mjosty iKwaito Church Service.

Abebengozakwabo bomlingisi uShadrack Ngema oshone ngemuva kokuxinwa yisifo senhliziyo bathi bashaqekile ngokushona kwakhe.

FANELESIBONGE BENGU

ABEBENGOZAKWABO bomlingisi uShadrack Ngema oshone ngoMgqibelo ebusuku ngemuva kokuxinwa yisifo senhliziyo bathi bashaqekile ngokushona kwakhe.

UJoe Hudla osakaza ibhola OKhozini FM osebenze iminyaka noNgema uthe uthukile ethola ngokudlula kwakhe ngoba ubengakaze ezwe ukuthi ubambekile.

“Kunzima ndoda. Ubengumuntu obethi uma enza umsebenzi awenzisise. Uma futhi into engakholelwa kuyo ubungeke umshintshe. Okunye engikukhumbula ngaye wukuthi uma unaye ubungabi naso isizungu ngenxa yokuthi ubenamancoko. Ngisho sekuthiwa uxoxa into ebaluleke kangakanani kodwa ubevele ahlekise,” kusho uHudla.

UMphathi woKhozi FM uBonga Mpanza uthe ushaqekile futhi uphatheke kabi ngokushona kukaNgema.

“Sisebenze kahle kakhulu naye futhi isikhathi eside ngisho esethathe umhlalaphansi ngoba bese kuyophela unyaka ashiya. Silimele hhayi kuphela emsakazweni kodwa kwezobuciko jikelele. Umsebenzi ulimele ngoba ubedlala indawo kaMadoda kwiKusa Kusa,” kusho uMpanza.

Uthe okubaphatha kabi kakhulu wukuthi uNgema ube wumuntu wesithathu ukudlula emhlabeni esanda kuthatha umhlalaphansi.

“Kusiphatha kabi ukuhamba kwabantu besebancane ngoba uma uthatha umhlalaphansi akusho ukuthi usumdala. Kuqale kwaba nguDT Ngwenya kweza uMuvo Maphalala njengoba sekunguNgema. Sengathi umndeni wakhe neNingizimu Afrika yonke ingaduduzeka,” kusho uMpanza.

Umphathi wezinhlelo, uZandile Tembe, ubhale ekhasini lakhe le-Instagram ukuthi uMshedis, okuyigama uNgema abebembiza ngalo, ubengabhedelwa kodwa ubenenhliziyo enhle.

“Ngikujabulele ukufunda kuye nokunconywa njalo. Ubenothando lwezinja zakhe, ekhonze ukuxoxa ngokuqala kuthelevishini nokuthi abalingisi abamnyama bakuleli babehlupheka kanjani kodwa baphumelela...Ulale ngokuthula Bra M’Shedis,” kubhala uZandile.

Umrepha uZakwe ubhale enkundleni yezokuxhumana ukuthi sengathi angalala ngokuthula.

Ilungu le-IFP ePhalamende, uMkhuleko Hlengwa, lithe: “Ulale ngokuthula Shadrack “Magubane” Ngema. Dudu emndenini wakwaNgema nabangani.

Kusuke isidumo amalungu estokfela obekumele ahlukanise imali engu-R120 000 “iduka” ngomzuzu wokugcina.

NONTUTHUKO NGUBANE

KUSUKE isidumo amalungu estokfela obekumele ahlukanise imali engu-R120 000 “iduka” ngomzuzu wokugcina kwa-Q, eMlazi, ngoMgqibelo ebusuku.

Kushube isimo omakhelwane beqhinqa ubusuku bonke emzini kamgcinimafa walesi stokfela uNkk Nompumelelo “Mpume” Khuzwayo (41), kulandela ukunyamalala kwakhe kade ehambe ethi uyolanda imali ebilondolozwa kulesi stokfela obekumele ihlukaniswe ngawo uMgqibelo.

Amalungu estokfela ahlangane ngoMgqibelo ezoba nomhlangano wokugcina wokuqoqwa kwemali ebisele.

Lokhu kugcine kungenzekanga umgcinimafa washaya wachitha, wabuya esethi ubanjwe inkunzi ngabantu abangaziwa.

Izolo Isolezwe lifice amalungu estokfela ebhodla umlilo efuna incazelo ngemali yawo.

Kuvele ukuthi uNkk Khuzwayo imali yestokfela ubeyigcina kwakhe hhayi ebhange. Umuzi obekunomhlangano kuwo uhlukaniswe yizindlu ezimbalwa nomuzi kaNkk Nompumelelo Khuzwayo.

Amanye amalungu estokfela asalile lapho bekunomhlangano khona elindile ukuba kubuye imali kodwa kwangenzeka.

UNksz Zikhethile Mkhanyawo ongunobhala uthe balinde isikhathi eside ukuba uNkk Khuzwayo abuye nemali baze bayogasela emzini wakhe bafica kukhala ibhungezi.

“Sihlangane sonke sabhala phansi sabona ukuthi imali esiyiqoqile u-R121 000. Bangu-34 abantu abayingxenye yesitokofela. Ngesikhathi sekumele imali ihlukaniswe uMpume uphumile endlini, ebuyela kwakhe ukuze ezoyilanda. Sisale endlini salinda ukuze abuye. Emuva kwehora siqalile ukusola ngoba engasabuyi nemali. Simshayele ucingo wathi usathatha imali, ngaphinde ngamthinta wathi usendleleni. Ngithe sengimthinta okwesithathu ucingo lwakhe bese luvaliwe. Sibe sesisuka saya emzini wakhe ngoba kuseduzane. Sifike engasekho, nezingane zakhe zithi azimazi. Sihlale ubusuku bonke silinde ukuba abuye nemali yethu,” kusho uNksz Mkhanyawo.

UNkk Khuzwayo uze wabuya emzini wakhe sekushaye ihora lokuqala ntambama izolo imali engayiphethe.

Elandisa Isolezwe esendlini yakhe, uthe ucishe wafa yizigebengu ezimphuce imali.

“Ngisuke emhlanganweni ngizolanda imali. Ngibe sengiphuma ngomgwaqo ngithi ngibuyela emhlanganweni imali ngiyifake esiswini iyizishaqane. Bekukhona abafana ababili abebengilandela, bavele bathatha iduku ebengiligqokile bangivala amehlo. Bangifake emotweni kukhona umshayeli phakathi. Bangikakile belokhu befuna ngikhiphe imali. Baze bangitshela ukuthi ngifuna ukufela imali okungesiyo eyami. Sesihambe isikhathi eside nemali sengibanikile, bavele bangikhipha emotweni, bathi bafuna enye imali. Ngizwe lapho kuqhuma isibhamu, ngezwa sengishisa ethangeni. Kuvele kwacaca ukuthi ngidubulekile (ekhomba inxeba elivaliwe ethangeni). Ngisizwe ngumuntu engingamazi ongiyise esibhedlela eMshiyeni ePrince Mshiyeni. Ngifike ngalashwa ngabe sengidedelwa. Ngigibele itekisi ngabuyela lapha emzini wami ukuze ngizobatshela okwenzekile. Icala angizange ngilivule,” kusho uNkk Khuzwayo. Ebuzwa ikhadi lasesibhedlela, ulandulile wathi kukhona ipheshana eliluhlaza okwesibhakabhaka anikezwe lona kodwa alinalo usuku noma oluveza ukuthi uke walashwa eMshiyeni. Iphunzile imizamo yeSolezwe yokuthola imininingwane kaNkk Khuzwayo eMshiyeni. Lo mgcinimafa obekungunyaka wesibili imali yestokfela ibekwa kuyena uthe usola ukuthi uboshelwe amanqina enyathi.

Ngonyaka odlule lesi stokfela sahlukanisa ngaphandle kwezihibe u-R70 000 owawugcinwe nguye.

“Icala elami ngiyalivuma. Imali ithathwe yizigebengu kade iphethwe yimina. Ngizokwenze njani ngoba ihambile manje? Kungcono abadayise umuzi wami ukuze bezothola imali yabo. Cishe ngabulawa ngenxa yale mali. Izingane zami ngabe sezisele zodwa. Laba bantu bebefuna ukungibulala. Kungcono bengadayisa indlu yami ukuze kuzobuya imali yabo. Engikusolayo wukuthi phakathi kwethu esingamalungu estokfela kukhona onolwazi ngokubanjwa kwami,” kuzikhalela uNkk Khuzwayo.

Amalungu estokfela abengezwa mshini ngaleyo ncazelo yokuduka kwemali, abanye bebethi uyazenzisa uzigwazile.

UNkk Khuzwayo naye ubebuye adideke athi unamanxeba “okugwazwa”, engasho ukuthi amanxeba okudutshulwa.

“Sifuna akhiphe yonke imali yethu. Ayizwakali indaba yakhe yokubanjwa abantu. Okokuqala asazi ukuthi kungani ehambe yedwa wayolanda imali. Ubevele ehlelile ukuthi imali yethu ithathwe,” kusho ilungu lestokfela elingathandanga ukudaluwa. Amalungu amaningi adlala lesi stokfela athe asebenzisa imali yesibonelelo sikahulumeni sezingane zawo ukuze izingane bezozithengela izimpahla, bathenge nokudla kukaKhisimusi.

“Kumanje asazi sizothenga ngani ukudla. Izingane zizogqokani. Unyaka wonke besibeke le mali sithembele kuyo. Kuyamangaza ukuthi uMpume ebesimthembile angenza kanjena,” kubalisa elinye ilungu limemeza.

Omunye okuthiwa uqulekile ngoMgqibelo bekumele athole u-R12 000 kulesi stokfela.

Bathe bamnikeza izinsuku ezimbili ukuba uNkk Khuzwayo akhiphe imali. Amanye amalungu ebeseqalile eshaya izingcingo ukuthi bakhona abafuna indlu yomxhaso enamakamelo amane edayisayo, besho umuzi kaNkk Khuzwayo. Amalungu estokfela athe azovula icala lokuqolwa umgcinimafa.

Kuze kwashaya isikhathi sokushicilela icala lingakavulwa.

Abantu basehostela laseThekwini, iDalton, babonge ukuthi bahlalisene ngokuthula ngengoma.

MLUNGISI GUMEDE

ABANTU basehostela laseThekwini, iDalton, babonge ukuthi bahlalisene ngokuthula ngengoma ngesikhathi abalingani babo bakwamanye amahostela behleli lubhojozi ngenxa yezinga eliphezulu lokubulalana ezindaweni zabo.

NgeSonto ingoma ibisha phezulu eDalton abantu bakhona bebonga ukuthi bahleli ngokuthula.

Abebehambele leli hostela babheme bakholwa bebona ingoma ebisezingeni eliphezulu.

Ingoma edonse amehlo amaningi ngeyaseMangwaneni eBergville, ehluke kakhulu kweyasezindaweni eziningi KwaZulu-Natal.

Umholi kuleli hostela uMnuz Mthembiseni Thusi ophinde abe ngumkhulumeli woBunye Bamahostela nezakhiwo zawo uthe bathathe isinqumo sokuthi babonge umdali ngokuthi bahleli kahle ehostela labo.

“EDalton sihlalisene kahle akukho ukubulalana okwenzeka kwamanye amahostela yingakho sithe asibonge senze umkhuleko siphinde sidlale ingoma sigqugquzele ukuthula,” usho kanje.

UThusi unxuse ukuthi namanye amahostela afunde ekuziphatheni kwabantu baseDalton.

“Sigingqe inkomo sibonga nje ukuthi sekuphela unyaka endaweni yethu kunokuthula akukho ukubulalana,” usho kanje.

IDalton yihostela elidume ngokuthula uma kuqhathaniswa namanye aseThekwini kubalwa iGlebelands naKwaMashu.

EGlebelands bacela ku-55, manje abantu asebebulewe khona kusukela kuqale impi okungacaci ukuthi igqugquzelwa yini.

Phambilini ngesikhathi isaqala indaba yaseGlebelands bekuthiwa kubangwa imibhede kodwa namanje ukubulawa kwabantu kusaqhubeka.

Kuthiwa kuneqembu lezi gebengu eziqotha abantu, ziyaboshwa zidedelwe ezinkantolo okwenza kungapheli ukubulawa kwabantu.

Cishe awapheli amasonto amabili singabanga khona isigameko sokufa komuntu eGlebelands esifaniswa nebhusha ngendlela okugobhoza ngayo igazi.

KwaMashu khona awukho umbango obikwayo kodwa izigameko zokubulawa kwabantu ziyenzeka.

Khona isikhathi esiningi kusolwa ubugebengu nezombusazwe.

Isilo uGoodwill Zwelithini samemezela ukuthi sifuna ukuhambela eGlebelands naKwaMashu ngenhloso yokukhuza ukubulalana okuqhubeka khona.

I-ANCYL esifundeni saseThekwini ikhwele yadilika kuMeya yedolobha, uMnuz James Nxumalo, nabanye abaholi asebenzisana nabo esigungwini esihola umkhandlu.

CELANI SIKHAKHANE

I-ANCYL esifundeni saseThekwini ikhwele yadilika kuMeya yedolobha, uMnuz James Nxumalo, nabanye abaholi asebenzisana nabo esigungwini esihola umkhandlu ibasola ngokuthi bahluleke bancama ukubhekelela abantu abasha ngamathuba emisebenzi ngakho kumele baphume ezikhundleni.

Nokho ihhovisi likaNxumalo libona lokhu okushiwo yi-ANCYL kungukuphupha emini.

Uphiko lwentsha lisho lokhu izolo esithangamini nabezindaba ebelinaso emahhovisi esifunda akuCommercial Building, eThekwini, lapho belucacisa khona ngokuseka kwalo uNkk Zandile Gumede ekubeni yiMeya elandelayo yaseThekwini.

UNobhala we-ANCYL esifundeni, uMnuz Sqiniseko Shezi, uthe akukho nokukodwa okwenziwe wuNxumalo ukubhekelela abantu abasha kangangokuthi uhlulwe ngisho wukusungula isabelo mali esizoba nohlaka lwentsha.

“Sibona uNxumalo ehlulekile ukuhola iTheku njengeMeya ngakho sesiyakholwa ukuthi umama uZandile Gumede nguyena ozokwazi ukuqondisa izinto uma ethatha izintambo zokuba wuSihlalo we-ANC kulesi sifunda. Sizamile njenge-ANCYL ukuhlangana nobuholi bukaNxumalo kumasipala ukuze kusungulwe uphiko oluzobhekana ngqo nezidingo zentsha kodwa akukho okwenzekile. Okubi wukuthi lo mkhandlu uthola isabelo mali esifibalelwa ku-R40 billion ngonyaka kodwa uhlulwa wukubhekelela intsha ngaphansi kukaNxumalo yikho kumele aphume,” kusho uShezi.

UMnuz Phumlani Zulu, wesigungu se-ANCYL, uthe omunye umholi abakhala ngaye kumasipala nguNksz Nondumiso Cele ophethe uphiko lweGovernance and Human Resources, abamchaze ngokuthi akazi nokuthi lidumephi ezinhlakeni aziphethe kwaMasipala. bathi izinhlelo aziphethe kufanele kube yizo ezidala amathuba okuthuthukisa intsha.

Uthe kumanje kunohlelo olubizwa ngama-Extended Public Works Programme (EPWP) lapho kuqashwa khona abantu ukuthi basebenze njengamatoho kodwa uma sekuvela izikhala ezidinga abantu abazosebenza ngokugcwele, bashiwa ngaphandle laba be-EPWP.

Okhulumela iMeya yeTheku, uMnuz Sthe Mshengu, uthe akukho abangakusho ngalezi zinkulumo kodwa akuthintwe imenenja kamasipala.

“Ngaphandle kwalokho laba bantu bayaxaka ngoba sebengubuholi osebuphelelwe yisikhathi kodwa balibele wukukhuluma izinto ezingabasizi ngalutho esikhundleni sengqungquthela yabo. Kumele ngabe bakhuluma izinto ezizosiza intsha njengokuthi kusizwe labo abalungiselela ukuya ezikoleni ngonyaka ozayo nokunye okunenqubekela phambili,” kusho uMshengu.

Ngesikhathi ithintwa, imenenja kamasipala, uMnuz Sbu Sithole, kuthiwe imatasa emhlanganweni kodwa umsizi wayo ucele ukuthatha inombolo ukuze uSithole aphendule uma esekhululekile. kuze kwashaya isikhathi sokushicilela engakaphenduli.

Umkhulumeli we-ANC KwaZulu-Natal, uMnuz Mdumiseni Ntuli, uthe ingqungquthela yaseThekwini esihlehle kaningi, bazocacisa ngayo namhlanje ukuthi izoba nini.

‘Ngingabuyela ekuseni oKhozini uma kungathiwa nginikwa ithuba.” Lawa ngamazwi kaMfundisi Sthembiso Zondo.

S’MANGELE ZUMA

‘NGINGABUYELA ekuseni oKhozini uma kungathiwa nginikwa ithuba.”

Lawa ngamazwi kaMfundisi Sthembiso Zondo oveze ukuthi usafisa ukuqhubeka nokugqugquzela abantu ngezinkulumo ezakhayo kuKhozii FM.

Ukusho lokhu ngesikhathi ekhuluma neSolezwe ngemuva kokufeza iphupho lomfana ophila nesifo sezinso esibucayi uSibusisiwe Mabika (17) oseneminyaka efisa ukumbona bukhoma.

Sekuphele izinyanga ezingu-9 uZondo akhishwa ngesango oKhozini ngemuva kokusabalala kwe-video eshaya ngesudi yesele.

“Ubuhlungu engabuzwa nge-video buncane kunobuhlungu engabuzwa ngitshelwa ukuthi ngiyaxoshwa emsakazweni. Ukusebenza emsakazweni nokukhuluma nabantu ngadalelwa khona, hhayi i-video. Kubuhlungu ukubona abantu abaxakekile kodwa ngingakwazi ukubasiza. Ngibona ukuthi isono engasenza se-video sikhulu ukwedlula zonke, yingakho ngashaywa kangaka. Uma ngase Ukhozi luthi angibuye, ngingabuyela ekuseni ngokukhulu ukumamatheka. Inqobo nje uma ngizokhuluma nabantu ngiqhubeke nokushintsha impilo yabo,” kusho uZondo.

Uthe i-video kwakuyisivivinyo sokuthi uzokwazi yini ukuzikhipha emgodini njengoba ehlale eshumayeza abantu ukuba benze.

“Isiphiwo sami singaphezu kwanoma yiliphi ihlazo. UNkulunkulu engimkhonzayo mkhulu kunakho konke. Yingakho ngoMashi wonyaka ozayo ngizokhipha i-DVD ethi From Disgrace To Grace, lapho engizobe ngichaza ngokuthi ungaliguqula ihlazo ligcine libe yimpumelelo. UNkulunkulu uyakwazi ukusebenzisa utamatisi obolile ukukhiqiza omusha.

“Lo obolile ugcina ukhipha utamatisi omuhle kakhulu,” kuchaza uZondo.

Uthe ikhadi elibomvu akhishwa ngalo seliphelile abantu abalindele ukumuzwa emsakazweni ekuqaleni konyaka ozayo.

“Kunenkampani enkulu esixoxisana nayo ezimisele ngokuthatha uZondo imbuyisele ebantwini. Okubuhlungu wukuthi abantu abaningi bagcina bengacacelwanga ukuthi ngaxoshwa bazitshela ukuthi ngaziyekela. Babona sengathi ngazicabangela mina ngabashiya belenga, okuyinto engangingeke ngiyenze. Mina umqeqeshi wangibeka ebhentshini ngizolinda yena futhi ukuthi angibuyisele enkundleni. Abalandeli bami abazi ukuthi ukuthi ngibuyile futhi igoli ngizolishaya njengenhlala yenza,” kusho uZondo.

USibusisiwe, osizwe ngabeReach for A Dream, ujabule kakhulu ukuhlangana noZondo othi yiqhawe lakhe elimkhuthaza ukuthi anganikezeli ngempilo yakhe noma kunzima kanjani.

UMnuz Kaizer Kganyago okhulumela iSABC uthe abakwazi ukuxoxa ngezindaba zenkotileka yomsebenzi ngale ndlela.

“Baningi abantu la ngaphandle abafuna ukusebenza emsakazweni ngoba bathi banesiphiwo nothando lwawo. Kusho ukuthini? Akusho ukuthi sizobaqasha ngalokho. Lokhu akushoyo ukuthi asibachazelanga abalaleli ngokuxoshwa kwakhe akunasidingo ngoba vele kwakungelona udaba lwabo. Kwakuwudaba oluthinta yena nomqashi. Wonke umuntu uyazi kwenzakalani. Uma kwenzeka kuba nenkotileka entsha esimdingela yona sizomazisa. Uma kungenzeki impilo iyaqhubeka,” kusho uKganyago.