Kubuye kwashayeka ingwijikhwebu ecaleni elibhekene nomsubathi wakuleli u-Oscar Pistorius izolo ngesikhathi kuzwakala ukuthi obengumphenyi ophambili wombuso, uMnuz Hilton Botha, usesusiwe ekuphenyeni leli cala.

INTATHELI YESOLEZWE

KUBUYE kwashayeka ingwijikhwebu ecaleni elibhekene nomsubathi wakuleli u-Oscar Pistorius izolo ngesikhathi kuzwakala ukuthi obengumphenyi ophambili wombuso, uMnuz Hilton Botha, usesusiwe ekuphenyeni leli cala.

Lokhu kulandela ukuvuka kwamacala ayisikhombisa okuzama ukubulala ayebekwe wona ngo-2011.

Izolo uKhomishana wamaPhoyisa, uGeneral Riah Phiyega, uthathe isinqumo sokuthi ahoxiswe kuleli cala uBotha ukuze liqhubeke ngaphandle kwezinkulumo zokuthi umphenyi walo ugubuzelwe yifu lecala ebe esingethe uphenyo lwecala elibucayi likaPistorius.

UPistorius ubhekene necala lokubulala intombi yakhe, uReeva Steenkamp, eyashona ngemuva kokudutshulwa emzini wakhe endaweni yomntakabani ePitoli.

Uyaphika ukuthi wadubula intombi yakhe ngamabomu kodwa uthi wayecabanga ukuthi udubula isigebengu esasizogqekeza.

UBotha wethule ubufakazi ohlangothini lombuso ngesikhathi kulalelwe isicelo sebheyili eNkantolo yeMantshi yasePitoli esifakwe ngu-Pistorius.

Amaphoyisa akuqinisekisile ukuthi uBotha ubhekene namacala ayisikhombisa okuzama ukubulala ngesikhathi yena nozakwabo bedubula itekisi ababeyijaha.

Okhulumela amaphoyisa aseGauteng, uBrigadier Neville Malila, ukuqinisekisile ukuthi uBotha ubhekene nala macala.

Khona izolo isicelo sebheyili sikaPistorius siqhubekile njengoba zombili izinhlangothi okuwumbuso nabameli bakaPistorius bezenza izethulo zokugcina phambi kweMantshi uMnuz Desmond Nair.

Isicelo sebheyili ka-Pistorius singenela osukwini lwesine uma selibuyela namuhla enkantolo. Umshushisi uMnuz Gerrie Nel ngemuva kokulalelwa kobufakazi uthe uzizwa “enelisekile” ngokuqhubeka kwecala.

Ummeli kaPistorius, u-Advocate Barry Roux, uthe uzizwa “ekahle.” U-Roux ukhale ngokuthi amaphoyisa awawenzanga umsebenzi ogculisayo ngesikhathi ephenya icala.

Uthe kuzoba nzima ukuthi umbuso ukhiphe ubufakazi bokuthi uPistorius wabulala ngenhloso. Uthe ukube uPistorius wayehlose ukubulala uReeava wayengamdubula noma yikuphi.

Utshele inkantolo ukuthi ubufakazi obuntekenteke obethulwe ngumphenyi wecala osemisiwe uBotha bukhombisa ngokusobala ukuthi umbuso ubamba uyayeka, awuyazi into oyenzayo.

UNel yena uthe kunzima ukukholwa ukuthi uPistorius wayeka intombi yakhe wangayivusa ekubeni ekholwa wukuthi uhlaselwa yizigebengu.

Kulindeleke ukuthi kuqhubeke namuhla ukulalelwa kwabameli bephikisana mayelana nokucatshangwa ukuthi kwenzeka ngelanga okwabulawa ngalo u-Reeva owayengumkhangisi.

Umphakathi wasoZwathini, e-Appelbosch, ufuna kufakwe izinciphisa jubane emgwaqweni omkhulu kule ndawo u-R614 kulandela isibhicongo sengozi eyenzeke izolo ekuseni.

NQOBIZIZWE ZWANE

UMPHAKATHI wasoZwathini, e-Appelbosch, ufuna kufakwe izinciphisa jubane emgwaqweni omkhulu kule ndawo u-R614 kulandela isibhicongo sengozi eyenzeke izolo ekuseni lapho iloli lishayise labulala abantu abahlanu abebeseceleni komgwaqo belinde izinto zokuhamba beya emsebenzini.

Umphakathi wakule ndawo obuthukuthele ugane unwabu ukhala ngokuthi izingozi seziyinsaka-vukela umchilo wesidwaba kule ndawo.

“Namuhla (izolo) kuvalwe ngehlahla njengoba izingane zalaba bazali zizosala zincela izithupha ngoba bekuyibona imigogodla yemindeni yabo,” kusho umsebenzi wasesibhedlela kule ndawo ongagunyaziwe ukhuluma nabezindaba.

Abashonile nguMnuz Alfred Ndlovu, Nkk Thuleleni Mhlongo, Nkk Thembeni Khuzwayo, Nksz Velephi Langa noNkk Bhekisile Zondi okuvela ukuthi bebeyizinsika emindenini yabo. Isolezwe lifike kule ndawo iloli elinamasondo angu-16 elidale umonakalo lifohlokile, izimpahla ebelizithwele zithe chithi saka endleleni.

UNksz Nana Mthembu ozibonele ngo “si” le ngozi uthe bebeyiqulu labasebenzi elilinganiselwa ku-30 belinde izinto zokuhamba izolo ekuseni ngesikhathi kuthushuka iloli ekhoneni kulo mgwaqo lihamba lukeke kucaca ukuthi liyaphaphalaza.

“Besizixoxela esitobhini ngesikhathi liqhamuka lihamba lukeke kungaqondakali ukuthi libhekephi. Sihlakazeke sabheka le nale, ngeshwa laphaphalazela ngqo lapho abanye bethu bebemi khona. Emva kwalokho kube mnyama emehlweni kithi sonke kwathi emva kwemizuzwana sabona ngezimpahla zabo sesisakazeke umgwaqo wonke kunamagwinya nezikhwama,” kusho uNksz Mthembu.

Eqhubeka uthe nalapho abaqondanga ukuthi kwenzekani, umqondo ubusajamile.

“Angikaze ngizwe ubuhlungu obungaka ngibuka abantu sebekhishwa ngaphansi kweloli ungasaboni nokuthi bangobani ebusweni ngenxa yokulimala. Izidumbu bese sizifanisa ngezimpahla ngendlela abebelimele ngayo, imilenze nezingalo besikujomba sizama ukuyosiza sinethemba lokuthi hleze basindile kanti lutho,” kusho uNksz Mthembu.

UNksz Mthembu uthe usola ukuthi umshayeli ubelele ngendlela okwenzeke ngayo.

“Ukube ubebhekile ubengabamba ngisho amabhuleki noma enze imizamo. Kubukeka sengathi ubelele,” kusho uNksz Mthembu.

Isolezwe litheleka kule ndawo lapho lo mphakathi obumi khona izixongololo ukhungathekile, ubusho ngazwi linye ukuthi akufakwe izinciphisa jubane ngoba lo mgwaqo unamajika amaningi, nezikole zezingane ezincane ziseduze komgwaqo.

UMnuz Thulani Nala, indodana kaNdlovu, uthe abazi nokuthi bazomfihla ngani uyise ngoba nguyena obetohoza yize ebesathatha impesheni.

UNksz Gugu Mabaso womndeni kaNkk Khuzwayo ukhale esifanayo noNala eveza ukuthi abazi ukuthi bazothathani bahlanganise nani ukuze impilo iqhubeke ngoba umufi nguyena obeyinsika yekhaya.

Amaphoyisa ngomlomo kaCaptain Thulazi Zwane athi kuphenywa amacala amahlanu okubulala ngokungehloso kodwa umshayeli weloli ubengakaboshwa.

Umshayeli waleli loli ulimele waphuthunyiswa esibhedlela. Ngesikhathi sokuloba lapha abakwa Spar bebengakaphawuli.

Izophela indlala yothisha abafundisa izifundo ezinzima iMaths, iSayensi nobuChwepheshe KwaZulu-Natal njengoba abafundi abahlwempu bethole ithuba lokuyofunda eTurkey ukuze babuye bengongoti kulezi zifundo.

MHLENGI SHANGASE

IZOPHELA indlala yothisha abafundisa izifundo ezinzima iMaths, iSayensi nobuChwepheshe KwaZulu-Natal njengoba abafundi abahlwempu bethole ithuba lokuyofunda eTurkey ukuze babuye bengongoti kulezi zifundo.

Abafundi abangu-33 bazofulathela elakuleli ngoLwesine balibhekise eTurkey lapho bezozinza khona iminyaka emine nohhafu befundela ukuba ngothisha.

Akubona kuphela laba bafundi abazofunda ubuthishela eTurkey, abanye ababili bayofundela ubudokotela, oyedwa ayofundela ubuhlengikazi.

UNgqongqoshe wezeMfundo, uMnuz Senzo Mchunu wahambela eTurkey ngo-2011 eyobona uhlelo lwakhona lwezemfundo.

Kube sekuba nobudlelwano njengoba laba bafundi bethole uxhaso esikhwameni iHorizon Education Trust, yaseTurkey ezobakhokhela zonke izindleko zokufunda ulimi lwaleliya lizwe izinyanga eziyisithupha, indawo yokuhlala, ukudla, imali yokugibela, imali yokuphila, ukufunda kanti uMnyango uzokhokha izindleko zokuhamba belibhekise eTurkey.

“Into edingeka niyenze ukuthi niye eTurkey niphase, akukho okunye. Yithuba elingandele bani nami ngiyafisa ukuba ngalithola leli thuba,” kusho uMchunu etshela laba bafundi abahambayo eStar College, eWestville ngempelasonto.

Uthe akudingeki ukuthi basebenze eTurkey bazobuya bazotshala ulwazi ezikoleni zesifundazwe.

Okhulumela lesi sikhwa-ma, uMnuz Atilla Dag, uthe iTurkey yathathwa wusizi lwabafundi abahluphekayo yase ifaka isandla ukuze bafukulwe.

Uthe abafundi bebefaka izicelo, kutonyulwe labo abenze kahle kwaMatric bese bebahloma imibuzo bathathe labo ababadingayo.

“Sigxile kakhulu kulabo basemakhaya ngoba sifuna ukutshala ulwazi lwalezi zifundo ezinzima kulezi zikole uma sebebuya. Nyakenye sithathe abafundi abangu-11 abebeyokwenza imikhakha ehlukene okubalwa nowezobunjiniyela, ubudokotela neminye okumanje bafunda eTurkey,” usho kanje.

UNksz Pinky Chiliza waseMzinto, ongomu-nye wabaxhasiwe, uthe waphumelela uMatric ngo-2008 kanti wake walunguza e-Unisa enza iziqu zokufundisa.

“Kwashona ubaba, ngangakwazi ukuqhubeka ngifunde ngalahla nethemba kodwa imithandazo yami yaphenduleka uma ngizwa ngaleli thuba lokuyofunda eTurkey. Ngiyakuthanda ukufu-ndisa, impilo yami neyo-mndeni izoshintsha ngoba ngizokwazi ukubheka ikhaya,” usho kanje.

UMnuz Dag uthe okuhle ngalaba bafundi ukuthi uma bebuya bazobe sebezokwenza i-masters.

Umengameli we-NFP, uNkk Zanele Magwaza-Msibi, izolo uphumele obala okokuqala ngqa wavuma ukuthi iqembu labo libhekene nengqinamba yamakhempu ngaphakathi ebeka ikusasa lenhlangano engcupheni.

MLUNGISI GUMEDE

UMENGAMELI we-NFP, uNkk Zanele Magwaza-Msibi, izolo uphumele obala okokuqala ngqa wavuma ukuthi iqembu labo libhekene nengqinamba yamakhempu ngaphakathi ebeka ikusasa lenhlangano engcupheni.

Ekhuluma emgubheni wokugubha iminyaka emibili iqembu lasungulwa ePrincess Magogo Stadium, uNkk Magwaza-Msibi uthe kuze kube yimanje basazabalaza kanzima ukubhekana nenselelo eqhamuka nokubakhona kwamakhempu ngaphakathi eqenjini asunguleke ngokhetho. “Maqabane, ngesikhathi kunenqubo yentando yabantu yangaphakathi eqenjini silahlekelwe ngamanye amalungu, amanye awo abambe iqhaza elikhulu ngenkathi kusungulwa iqembu kodwa ayenezinhloso zokungena ezikhundleni,” usho kanje.

UNkk Magwaza-Msibi uthe umuntu ozibiza nge-Power nozibiza ngeFinish uyalizonda iqembu.

Ube esenxusa iqembu ukuba lingcwabe izinkambo ukuze lenze isiqiniseko sokuthi alishabalali.

UNkk Magwaza-Msibi uthe into ebenza ukuthi bahluke kwamanye amaqembu wukubekezela ngoba abaholi babo abazange bajoyine iqembu ngenxa yokugcwalisa izisu zabo kodwa bafuna ukusebenzela umphakathi.

“Esikufundile wukuthi awukwazi ukuthi wethembe umuntu ofikayo eqenjini ngoba usuke ungazi ukuthi uze ngaziphi izinhloso. uze umbone ngokuhamba kwesikhathi esezikhombisa imibala yakhe yangempela,” usho kanje.

Uthe yize zikhona izingqinamba iqembu elibhekene nazo kodwa kuningi abakufundile futhi inhlangano yabo iyadlondlobala.

“Ngesikhathi iqembu lisungulwa, labo abazibiza ngezazi zezepolitiki bathi inhlangano yethu izoshabalala njengamanye angamahlubuka,” usho kanje. Uthe iyamcika indaba yokuthi babizwe ngezingane ze-IFP.

Uthe ufuna ukukucacisa ukuthi abanabo ubudlelwano ne-IFP bona kodwa bayiqembu elizimele futhi elinemigomo yalo.

Uqhube wathi isinqumo sabo sokunqaba ukusebenza ngokubambisana ne-IFP komasipala abangu-19 baKwaZulu-Natal ngemuva kokuthi lingabanga khona iqembu elinqoba ngamalengiso okhethweni lohulumeni basekhaya, siyakuqinisekisa ukuthi bangumJuda nomKristu.

“Ukusebenzisana kwethu ne-ANC sekuhlangabezane nenselelo nokuzamazama okukhulu. Yize eningini lalabo masipala kube yimpumelelo ukusebenzisana, kwabanye omasipala kuyantenga kanti kwabanye kufadabele. Lokhu kwenzeka ngisho sinekomiti labantu ababili inhlangano ngayinye elibhekelele ukuxazilula izinkinga ezikhona,” usho kanje. wengeza ngokuthi yize zikhona izingqinamba kodwa bazohlala esivumelwaneni sokusebenzisana kuze kuphele iminyaka emihlanu abayibeka.

Uthe okubucayi kakhulu wukuthi babumbane baqede uqhekeko balwe nokungaboni ngaso linye.

Angaphezu kuka-20 000 amalungu eNFP abehambele lo mgubho. Nezokuphepha beziqinisiwe ngemuva kwemibiko ethi i-IFP ibihlele ukuba nomhlangano kule ndawo.

Umholi we-IFP esigungwini saseThekwini, uMnuz Mdu Nkosi, uthe abakaze bahlele mhlangano ngalolu suku, wengeza ngokuthi iNFP ibifuna ukwenza ihawu lokuvika ukuthi uma umgubho wayo ungabi yimpumelelo bese ibeka izaba.

Yize zingabanga khona izigameko ezimbi emgubheni kodwa uNkk Magwaza-Msibi uveze ukuthi bazwile ukuthi kunabantu abebefuna ukuthenga izikibha zeqembu labo ngenhloso yokungena enkundleni bazodunga umcimbi.

Uthe amaphoyisa akwazile ukubaxosha.

Abasebenzi bakahulumeni abathinteka emacaleni enkohlakalo bazongena ehlazweni lokuthi amagama abo anekelwe izwe ngokuba adluliselwe emithonjeni yabezindaba.

INTATHELI YESOLEZWE

ABASEBENZI bakahulumeni abathinteka emacaleni enkohlakalo bazongena ehlazweni lokuthi amagama abo anekelwe izwe ngokuba adluliselwe emithonjeni yabezindaba.

Lokhu kushiwo nguNgqongqoshe wezobuLungiswa, uMnuz Jeff Radebe (osesithombeni), ngesikhathi ekhuluma nezintatheli izolo, ePitoli.

Uthe ezinsukwini ezizayo bazomemezela amagama abantu ikakhulukazi labo abalahlwe ngamacala enkohlakalo futhi kwamiswa ama-akhawunti abo asemabhange.

Abanye balaba abazobhalwa emaphepheni noma bamemezelwe emisakazweni yilabo asebedlelwe ngisho impahla nemizi ukuthi kubuyiswe imali abayeba ngenkohlakalo.

URadebe uthe lokhu kwenziwa ngenhloso yokuthi izwe libazi abantu ababolile bakuleli.

Uthe njengamanje bamatasa babheka ukuthi lokhu bazokwenza kanjani abasebenzi boMnyango nokuthi yimiphi imithombo yabezindaba ezosetshenziswa.

Ebuzwa ukuthi ngeke yini ukukhipha amagama abantu abalahlwe ngamacala enkohlakalo emaphephandeni kudale ukuthi athathelwe izinyathelo zomthetho, uRadebe uthe ngeke ngoba vele abantu abazonekelwa izwe kabasafihliwe uma sebelahlwe ngamacala.

Uthe bafuna ukuthi abantu abalahlwe ngamacala bangagcini nje ngokuhlazeka ezinkantolo kodwa nabantu mababazi ukuthi baze baboshwe nje babedla imali yabo yentela.

Phambilini uRadebe uthe ithimba elibizwa ngokuthi yi-Anti-Corruption Task Team lisebenza kahle ukulwa nenkohlakalo selokhu lasungulwa ngo-2010.

Uthe izimpahla zabantu abangu-59 zenani lika-R816million sezibanjiwe ngumbuso, cishe u-R78 million usuqoqiwe wabuyiselwa kuhulumeni.

Ngaphezu kwalokho amapulazi ayisihlanu nawo athathiwe ngumbuso kanti intengo yawo esewonke ingafinyelela ku-R74 million. Eminyakeni emithathu edlule sekuboshwe abantu abangu-237 ngamacala enkohlakalo.

Kulaba uthe abangu-32 sebelahlwe ngamacala wathi ababili bakhishwa phambili laba abanye abangu-203 basahamba amacala.

URadebe uthe isifundazwe iLimpopo sesiyaqala ukukhombisa imiphumela emihle selokhu saqashwa ngelokhozi ngabaphenyi. Uphinde wancoma indlela yokumiswa kwama-akhawunti asemabhange abasolwa.

Uyise wezelamani eziboshwe ngeledlule zisolwa ngokubulala ishende likanina uthi useyixolele inkosikazi yakhe phezu kwakho konke okwenzekile.

NOKUBONGWA PHENYANE

UYISE wezelamani eziboshwe ngeledlule zisolwa ngokubulala ishende likanina uthi useyixolele inkosikazi yakhe phezu kwakho konke okwenzekile.

UMnuz Wani Sibisi (56) uthe usamthanda umkakhe uNkk Sibongile Sibisi aseshade naye iminyaka engu-18 kodwa uthe simmangazile kakhulu lesi sigameko ngoba umufi, uMnuz Khethani Gumede (67), uyisihlobo sakhe ngoba unina kwakunguMaSibisi.

UMnuz Nkosenhle (25) nomfowabo uMnuz Mzweleni Sibisi (19) basolwa ngokubulala uGumede, okuthiwa ubethandana nomama wabo endaweni yaseMvini, KwaXimba.

USibisi, osebenza ePinetown, uthe namanje usadidekile ngoba yena nomufi bebehlala bebonana uma ekhona ekhaya futhi engasoli lutho.

“Izingane zingitshelile ukuthi lokhu ezikwenzile bese kufike isikhathi kodwa bezithi ziyamthusa ngokumshaya zingazi ukuthi angaze ashone. Uma zingichazela zithi uGumede wafika ebusuku ngo-10, zavusana ngoba zilala ezindlini ezehlukene zifuna ukumbona ukuthi uzohamba nini. Zithi zahlala ubusuku bonke zimbhekile ukuthi uphuma nini. Ngesikhathi eqeda ukungena zithi kwakhanya endlini zababona bezitika ngocansi baqeda bacisha balala,” kuxoxa uSibisi.

Uthe ngezithuba zehora lesithathu entathakusa izingane zabona sekukhanya waphuma uGumede ephethe induku zamlandela zafika zamshaya washona.

Uthe uGumede naye wabuzwa ngamalungu omphakathi ngalokhu kodwa wawatshela ukuthi ubegula ubeze kumelaphi njengoba lo mama eyisangoma.

USibisi uthe inkosikazi yakhe iqale yaveza ukuthi ubezomelapha umufi kodwa wagcina evumile ukuthi bebethandana.

“Ngenxa yokuthi babelokhu bephika abantu bagcina ngokuthi bamkhumule umufi bambheke ukuthi akukho yini okufakazela ukuthi ubeye ocansini nangempela lwatholakala. Mina anginankinga ngalokhu okwenzekile,” kuchaza uSibisi.

Ngesikhathi ithimba leSolezwe lifika emndenini wakwaGumede lifike isimo sisemuncu namalungu omndeni aqale ala aphetha ukukhuluma nalo.

Indodakazi kamufi, uNksz Lungi Gumede, ithe bamangele kakhulu ngoba bona bebazi ukuthi bayizihlobo futhi benganakile ukuthi kungase kube khona ukuthandana okukhona.

Izelamani bezivele enkantolo yeMantshi yaseCamperdown ngoLwesihlanu. iMantshi, uMnuz T Jalyard, ithe ngenxa yokuthi bafuna ummeli wamahhala kumele baphinde babuye namhlanje ngoba akatholakalanga ngoLwesihlanu.

“Uma ummeli nimthola ngoMsombuluko nakanjani yilapho siyoqala khona sicubungule usuku enizothola ngalo ukufaka isicelo senu sebheyili,” kusho uJalyard.

Wesulwe izinyembezi zeminyaka umphakathi waseKwandeni owakhe ngaphandle kwelokishi laseMpumalanga ngemuva kokufakelwa ugesi okokuqala empilweni yawo.

MLUNGISI GUMEDE

WESULWE izinyembezi zeminyaka umphakathi waseKwandeni owakhe ngaphandle kwelokishi laseMpumalanga ngemuva kokufakelwa ugesi okokuqala empilweni yawo.

Lo gesi wamakhadi uvulwe ngokusemthethweni ngempelasonto. Lo mphakathi ubusebenzisa amakhandlela, abanye besebenzisa ugesi wezinyokanyoka iminyaka engaphezu kwengu-20 ngesikhathi besalinde ukuthola usizo.

Amakhansela amabili e-ANC elinye elingasekho emhlabeni uMnuz Fashi Ngcobo noMnuz Njabulo Ntanzi ehluleka ukufakela lo mphakathi ugesi ngoba ethi indawo ohleli kuyo ayiveli kwibalazwe likamasipala.

Lolu sizi lweminyaka abantu bengenawo ugesi beluhambisana nezigameko ezimbi njengoba ugesi womkokotelo ukule ndawo usubulale abantu nemfuyo.

Esinye sezigameko esikhumbulekayo wukushona kwengane encane eyashaywa wugesi womkokotelo ngesikhathi ibelethwe ngudadewabo.

Ilungu lo mphakathi, uMnuz Thinabantu Gwala, lithe bese belilahlile ithemba lokuthi bayoke bafakelwe ugesi.

“Kade kwasa kudlalwa ngathi kuthiwa ngeke sifakelwe ugesi ngoba indawo yethu ayiveli,” kusho uGwala.

Elinye ilungu lomphakathi, uMnuz Sanele Mgwaba, lithe okubuhlungu wukuthi baningi asebeshonile belwela indaba kagesi abangeke besakwazi ukuthokoza kanye nabo njengoba uze wafakwa.

Ikhansela lendawo, uMnuz Nkosiphendule Dlamini, lithe bekuhlale kuyisilonda kulona ukubona abantu baseKwandeni bengenawo ugesi, lazitshela ukuthi uma likhethwa njengekhansela lizoqala ngabo libasize.

UDlamini ubonge umphakathi waseKwandeni ngokubekezela wangasebenzisa udlame ukuphoqa ukuthi ufakelwe ugesi.

“Ngifisa ukuthi nabanye bakwezinye izindawo bafunde ukuthi kuyabekezelwa uma ulinde intuthuko,” usho kanje.

Ngaphandle kukukhanyisa ugesi, uDlamini uvule nomuzi wesibonelelo ohlonyulwe wumndeni wakwaLatha ngemuva kokuthi umuzi wawo wabhidlizwa yizikhukhula.

IMeya kaMasipala weTheku, uMnuz James Nxumalo, ibongele umphakathi waseKwandeni wathembisa ukuthi kuningi osazokuzuza ezinhlelweni zentuthuko. UNxumalo uthe okunye abazokulungisa wukukhanyisa imigwaqo ngenhloso yokunciphisa izinga lobugebengu.

Bakhala ngokungahleleki kwezinto abafundi abahlala kude neTheku abafunda e-Unisa.

MHLENGI SHANGASE

BAKHALA ngokungahleleki kwezinto abafundi abahlala kude neTheku abafunda e-Unisa okudingeka behle benyuka bezofuna amakhadi, abanye abagcina ngokuphindela emuva belambatha ngenxa yokugcwala.

Laba bafundi bathi ngabe kungcono ukuthi lolu hlelo alwenziwa kuphela eThekwini njengoba ekhona amahhovisi kwezinye izindawo kodwa awawenzi la makhadi.

Omunye wabafundi osuka eShowe, uNksz Nokulunga Dube osebenza enkantolo yakule ndawo, uthe usegqigqe izikhawu ezintathu ezama ukwenza ikhadi kodwa kwanhlanga zimuka nomoya.

Ukhala ngokuthi uhlezi ecela ukusheshe aphume emsebenzini ukuze azolungisa le nkinga yaleli khadi ukuze akwazi ukusebenzisa umtapo wolwazi eRichards Bay.

“Okokuqala ngafika ngiwunamba 197 kodwa ngangakwazi ukungena ngoba kwase kuvalwa. Okwesibili ngasheshe ngasuka ngafika kwathiwa sekuyavalwa futhi kodwa ngokwamahora abhaliwe kuthiwa kuvalwa ngo-4 kodwa kwakuwu-3 kuvalwa,” kulandisa uNksz Dube.

Okwesithathu uthe yilapho emane alahla khona ithemba ngoba kuvalwe besami kulayini wathi noma esezikhalela ukuthi usuka kude kwamane kwafana nokuthela amanzi emhlane wedada.

Udadewabo, uNksz Sijabulile Dube, osuka eFilidi owenza iziqu zokufundisa uthe naye usegqigqe kathathu kodwa lutho ukusizakala.

“NgoMashi 1 kumele sibe sesinawo amakhadi ngoba kuyavalwa kodwa uma kwenzeka kanje kuyacaca ukuthi ngeke siwathole. Angisazi manje ukuthi ngizokwenzenjani ngoba ngisuka kude angikwazi ukwehla ngenyuka ngize eThekwini ngizokwenza ikhadi,” usho kanje.

Obhekele ezokuxhumana nokwazisa kulesi sikhungo, uNksz Gcina Nhleko, uthe abafundi baye babuzwe ukuthi baqhamuka kuphi futhi bayakhuthazwa labo abahlala kude ukuthi baziveze ukuze basizakale.

Uthe abahlala ezindaweni ezingaphandle njengasePort Shepstone bathathwa izithombe bese amakhadi abo ashiywe ophikweni lwabo oluseWild Coast.

“Zikhona izikhalo esizitholayo abafundi bengacaciselekile ngokusebenza kohlelo nokuthi okwamanje lusenziwa eThekwini kuphela. Kodwa siyaqonda ukuthi i-student card senza impilo yomfundi ibe lula futhi asheshe abonakale yingakho bezama ukusheshisa,” usho kanje.

Uthe ngemuva kukaMeyi 2013, uhlelo luzosabalala naseMgungundlovu ngoba indawo kuzobe sekungeyabo.

“Samukela-200 ngosuku ngenxa yokuthi uyedwa owenza amakhadi, unomsizi oyedwa. Asikwazi futhi ukusebenzisa ukuthi umuntu usuka kuphi ngoba kukhona abavuka ngovivi esingeke sibenze ubulungiswa kubona uma sithatha abakude kuqala kodwa siyabagqugquzela ukuthi bafike kusekahle ngoba kuyagcwala.”

Unxuse abafundi ukuba behlise umoya njengoba ifilimu eyenza amakhadi ivela ekomkhulu ePitoli ngakho kwesinye isikhathi iyaphela kodwa abathathwe izithombe bese belanda amakhadi ngosuku olunqunyiwe noma basho ihhovisi le-Unisa eliseduze nabo.

Umvikeli woMphakathi, u-Advocate Thuli Madonsela, uzophenya uNgqongqoshe wamaPhoyisa, uMnuz Nathi Mthethwa (osesithombeni), ngokusebenzisa budedengu amandla anikwe wona ngokwesikhundla sakhe.

UMVIKELI woMphakathi, u-Advocate Thuli Madonsela, uzophenya uNgqongqoshe wamaPhoyisa, uMnuz Nathi Mthethwa (osesithombeni), ngokusebenzisa budedengu amandla anikwe wona ngokwesikhundla sakhe.

Isikhulu esiphezulu se-AfriForum, uMnuz Ernst Roets, sithe lokhu sekuqinisekisiwe encwadini abanayo.

“Incwadi siyithole njengempendulo esikhalweni esisifake njenge-AfriForum ngoMthethwa ngoJanuwari. Sikhala ngendlela uMthethwa asingatha ngayo udaba lwemashi eyayilwa nokubulawa kwabalimi eyayingoDisemba 1, 2012,” kusho uRoets esitatimendeni asithumelele abezindaba.

Uthe uMthethwa wathatha leyo mashi njengengekho emthethweni yize babefeze konke okwakumele kwenziwe uma kuzokuba nemashi.

URoets uthe ngaleso sikhathi babethole incwadi yasenkantolo eNkulu yasePitoli ebavumela ukuba imashi iqhubeke.

“UNgqongqoshe wayishaya indiva incwadi yenkantolo waqhubeka nokuthatha imashi njengengekho emthethweni,” kusho uRoets.

Uqhube wathi: “Kuleyo mashi kwakungatshalwanga maphoyisa lapho kwakumashelwa khona ePitoli ukuqinisekisa ukuthi zonke izinto zihamba ngononina nababhikishi baphephile. Amaphoyisa ayekhona ethuka nje ezithela emashini, ayengajutshiwe ukuba azoqapha isimo futhi ayengazi lutho ngemashi.”

Uthe uMthethwa wazama ukunqanda ukuba le mashi ibe khona futhi nomkhulumeli wakhe uMthethwa wakucacisa ngokusobala ngesikhathi bekhuluma ocingweni ukuthi akumele balindele ukuba nomhlangano noNgqongqoshe uma kuwukuthi bafuna ukukhuluma ngemashi.

Okhulumela u-Adv Madonsela, uNksz Kgalalelo Masibi, ukuqinisekisile ukuthi u-Adv Madonsela uyalubheka lolu daba. Akazange akhiphe eminye imininingwane ngalo. – Sapa

Utholwe eseshonile owesilisa osemdala okuvele ukuthi ujuqwe ngocelemba ngumzukulu wakhe.

PHUMLILE NTSELE

UTHOLWE eseshonile emzini wakhe egunjini lokuphumula owesilisa osemdala okuvele ukuthi ujuqwe ngocelemba ngumzukulu wakhe ogula ngengqondo obehlala naye ekhaya eGrange, ngaphandle kwaseMgungundlovu, ngempelasonto.

Ngokusho kwelungu lomndeni uMnuz Gideon Ngcobo (73) ufele endaweni yesigameko kwazise ukuthi umzukulu ubemgenca ephindelela evale iminyango yonke futhi kunguye nomkhulu esitikini.

“Thina sifonelwe ngunina omkhulu esibikela ngalezi zindaba kwazise besingekho kwagogo sisekhaya eMaqongqo lapho besinenkonzo yokukhumbula oNdlunkulu asebashona,” kusho uNdlunkulu Phumelele Maphumulo ongunkosikazi wenkosi yaseMaqongqo inkosi Nhlakanipho Maphumulo abuye abe ngumfowabo womsolwa.

Lesi sehlakalo kuthiwa senzeke ngoMgqibelo ngezithuba zantambama umkhulu ehlezi nomzukulu wakhe njengokujwayelekile.

Umzukulu uboshwe ngawo uMgqibelo, wavela enkantolo izolo.

Umndeni awuqondi ukuthi ngabe yini eholele kulesi sigameko.

Uveza ukuthi ngabe kukhulunywa okunye ukuba ubekhona nomunye umzukulu wentombazane omncane ngokweminyaka naye ohlala nomkhulu ngoba ngabe mhlawumbe naye ugilwe esifanayo.

Uthe namanje bewumndeni kusenzima ukukholwa wukuthi umkhulu wabo uhambe ngesandla somzukulu wakhe njengoba bebesondelene umufi nomzukulu yize bebebuye baxabane ngenxa yesimo sabo sokuthi omunye usemdala, omunye egula kodwa bebengakaze bacabange ukuthi kungamuncu ngale ndlela.

Abomndeni bathe bafike ekhaya kuphithizela amaphoyisa nemoto yasemakhazeni ebizolanda isidumbu nomakhelwane abebelokhu bebabaze isihluku esenzekile futhi befunga begomela ukuthi bazomjezisa ngokwabo uma amaphoyisa ehluleka ngoba uNgcobo ubeyisilomo endaweni.

Kuthiwa umfana ubengasawaphuzi amaphilisi okugula kwakhe ngenxa yokuthi ubengumuntu obuye anyamalale ekhaya ahlale komakhelwane abelusele imfuyo.

Kuthiwa lo mzukulu ubanjwe ngamaphoyisa ngoMgqibelo esebalekile lapho bekuhlala khona umkhulu watholwa emanaphanapha yigazi walivuma icala alenzile.

UNdlunkulu Maphumulo uthe kuyabonakala ukuthi bese kuvuke kwama ngezinyawo ukugula kumfowabo ngenxa “yesibindi” sokuqhubeka abhale ngegazi ezindongeni amagama abefundeka ngokuthi “lala ngoxolo.”

Okhulumela amaphoyisa esifundazwen uColonel Jay Naicker uthe: “Amaphoyisa aphenya icala lokubulala elibekwe umsolwa ovele eNkantolo yeMantshi eMgungundlovu ngecala lokubulala.”

Uselala obenyoni usomatekisi waseMkhomazi okhala ngokuhlaselwa amaphoyisa emzini wakhe amshaye phambi komkakhe nengane emfuna isibhamu angazani naso.

BONGIWE ZUMA

USELALA obenyoni usomatekisi waseMkhomazi okhala ngokuhlaselwa amaphoyisa emzini wakhe amshaye phambi komkakhe nengane emfuna isibhamu angazani naso.

UMnuz Norman Mgobhozi (44) ohlala esigodini saseMahlongwa uthi sekuwunyaka wesithathu ewukudla kwenduku ngenxa yamaphoyisa ambelesela ngokuthi akakhiphe isibhamu esingekho emthethweni.

UMgobhozi usefuna kungenelele nobuholi obuphezulu bamaphoyisa esifundazweni ngoba ethi usekhathele wukuphilisa okwenyamazane.

Uthe esigamekweni sokuqala ngo-2011 kwagasela amaphoyisa amane phakathi kwamabili, amabili efake umfaniswano, lawa amanye efake izigqoko ezivala ubuso ukuze angabonakali.

“Ngabo lobo busuku angishaya ngalimala ngazama ukuvika kwaze kwakhahleleka elinye lamaphoyisa elalizifihlile nokuyilapho eladinwa lasikhumula isigqoko ngalibona ukuthi lingubani.

Ngahamba ngayovula icala kodwa lutho ukusizakala njengoba la maphoyisa esephinde angihlasela amahlandla amabili kulandelana. Okokugcina kube yisekuqaleni kwenyanga,” kusho uMgobhozi.

Uqhube ngokuthi njalo amaphoyisa amhlasela ebusuku amshaye phambi komkakhe nengane eneminyaka eyisishiyagalombili aseze wakhetha ukuyoyicelela ezihlotsheni ngoba iyahlukumezeka.

Uthe okumangazayo ngala maphoyisa azishiya kude nomuzi izimoto uma ezomshaya noma ezocekela phansi umuzi wakhe ngokulimaza impahla.

UMgobhozi uthe useze wafaka amakhamera emzini wakhe kodwa nakho lokhu akumsizi ngoba la maphoyisa asefika nochwepheshe oqeda ubufakazi ngokucisha konke ebesekuthwetshulwe amakhamera.

Uthe asemathathu amacala awavulile eMkhomazi kodwa azikho izinyathelo athathelwa zona.

UNkk Philile Mgobhozi (31) oshade noMgobhozi uthe selokhu kwenzeka lesi sigameko impilo inzima emndenini ngoba bahlalele ovalweni abazi ukuthi angase abuye nini la maphoyisa.

“Ngikhathazekile angasikwazi ukujabula ngoba nomuzi wethu usunezinto eziningi ezilimele ngenxa yalolu dlame alusebenzisayo la maphoyisa.

“Sidinga usizo nezikhulu zamaphoyisa uma kukhona ezingasisiza ngakho sicela balusukumele udaba lwethu,” kusho yena.

Amaphoyisa aKwaZulu-Natal akuqinisekisile ukuvulwa kwala macala amathathu eMkhomazi yilo somatekisi.

UCaptain Thulani Zwane uthe yize kungaka boshwa muntu okwamanje kodwa akhona amacala amathathu aphenywayo ngalezi zigameko zonke.

Kube nesiminyaminya emigwaqweni eyakhele iDUT izolo ngesikhathi abasebenzi bemashela emahhovisi abaphathi balesi sikhungo asophikweni iSteve Biko.

MHLENGI SHANGASE

KUBE nesiminyaminya emigwaqweni eyakhele iDurban University of Technology (DUT) izolo ngesikhathi abasebenzi bemashela emahhovisi abaphathi balesi sikhungo asophikweni iSteve Biko.

Izimoto kudingeke zisebenzise umzila owodwa amaphoyisa evale umgwaqo omkhulu uSteve Biko ngenxa yokuthi imashi yabasebenzi ibisuka ophikweni lwaseML Sultan.

Isiteleka sabasebenzi singenela osukwini lwesithathu namhlanje kanti izolo bebemasha baphinde bazihlalele phakathi nomgwaqo uSteve Biko. Amatekisi aphithizela kulo mgwaqo abehamba ngeminye imizila.

Abasebenzi bafunga bayagomela ukuthi ngeke bawubeke umcondo wabo emsebenzini bengakutholile abakufunayo.

Bathi bazoma isikhathi abangasazi inqobo nje uma kungukuthi bazowuthola u-13% wokunyusa amaholo no-R1 500 womhlomulo wokuthenga imizi.

Abaphathi babeke etafuleni u-7.% wokunyusa amaholo no-R1 000 wokuthenga imizi.

Izolo abanye abasebenza emtapeni wolwazi kulesi sikhungo kudingeke ukuthi bavale ngoba abasebenzi bafike qathatha befuna uvalwe ngenxa yesiteleka.

Abafundi bazwakalise ukukhathazeka ngokuthi kuvalwe ngisho ama-lab amakhompyutha okwenza bangakwazi ngisho ukwenza umsebenzi ekubeni udingeka.

Okusohlwini lwezikhalo lwezinyunyana kulesi sikhungo okuyiNehawu, National Tertiary Education Union (Nteu), neTertiary Education National Union of South Africa (Tenusa), yindlela abaphathi abangazinikele ngayo ekuxazululeni izinkinga zabasebenzi.

USihlalo weNehawu kulesi sikhungo, uMnuz Milton Estrice, uthe abaphathekile kahle nangendlela abaphathi ababaphatha ngayo uma kunezingxoxo.

Ukhale nangokuthi abaphathi basabisa abasebenzi ngokuthi abangateleki nokuthi ababahloniphi abaholi bezinyunyana bakhuluma ngqo nabasebenzi.

“Sizoteleka isikhathi esingasazi ngoba ngeke sibuyele singakutholanga esikufunayo. Sekuphele izinyanga kubhungwa kanti abaphathi abazimisele ngokusiqeda lesi siteleka ngokusinika esikudingayo,” usho kanje.

Omunye wabasebenzi uthe ngeke sizwele lesi siteleka uma kusekhona “amagundane” asebenza betelekile.

Okhulumela lesi sikhungo, uMnuz Alan Khan, uthe abasebenzi ababalelwa ku-250 bahlangane eML Sultan balibangisa eSteve Biko.

Uthe kuke kwafundwa abasebenzi abangatelekile besemakilasini wathi kodwa abatelekile bake baphazamisa lapho kugaywa khona, emtapeni wolwazi nakwezinye izindawo.

“Sinyuse isibalo sonogada namaphoyisa kanti okwamanje azikho izigameko zodlame ezibikiwe. Umphathi wesikhungo uSolwazi Ahmed Bawa unethemba lokuthi sizotholakala isixazululo,” usho kanje.

Namuhla amehlo azobe ebheke kuNgqongqoshe wezeziMali kuleli uMnuz Pravin Gordhan njengoba ezokwethula isabelomali sonyaka ka-2013/2014 ePhalamende.

NAMUHLA amehlo azobe ebheke kuNgqongqoshe wezeziMali kuleli uMnuz Pravin Gordhan njengoba ezokwethula isabelomali sonyaka ka-2013/2014 ePhalamende. Izinto ezibhekwe kakhulu kulesi sabelo ukuthanjiselwa kwabakhokhi bentela abahola kancane bese kuqiniswa kakhulu kulaba abadla izambane likapondo. Ezinye izinto okubhekwe ukuthi uGordhan agxile kuzo wuhlelo lukahulumeni lokwakha amathuba emisebenzi iNational Development Plan nohlelo olubizwa nge-Youth Wage Employment Scheme okuhloswe ngalo ukusiza intsha ithole imisebenzi. Okunye okubhekwe kakhulu yintengo kaphethiloli nokuthi imali yezibonelelo izonyuka kanjani. Isolezwe lixoxisane nabambalwa lizwa amanzi ngobhoko ngabakulindele kuGordhan. ULungi Langa ukhulume namalungu omphakathi, uNqobile Mbonambi wathwebula izithombe.

UMnuz Vela Mbokazi (28) waKwaMashu uthe ubengazi ukuthi isabelomali sinamuhla. Kodwa uthe kumphatha kabi ukuthi namanje ama-thuba omsebenzi awakabi maningi.

“Sibaningi kakhulu esinamakhono kodwa esingawutholi umsebenzi. Ngifisa ukuzwa uNgqongqoshe ekhuluma ngokunyusa amathuba omsebenzi. Okunye okubi ukuthi kuthuthukiswa osomabhizinisi asebevele bephumelele futhi abanamabhizinisi asimeme,” kusho uMbokazi.

Uthe kuyafana noma kunganyuswa imali kagwayi ngoba kwabaningi ugwayi ufana nesinkwa bazowuthenga noma sewubiza.

UNksz Thulile Mabanga (25) waseNtuzuma ufisa ukuzwa ungqongqoshe ekhuluma ngokuthuthukisa izikole zasemakhaya.

“Mihla namalanga sifunda ngezingane ezifundela phansi kwezihlahla ngoba amagumbi okufundela engenele ezikoleni zasemakhaya. Kungakuhle kunyuswe imali yokwakha izikole.

“Kubuhlungu ukuzwa ngezingane ezifundela phansi kwezihlahla,” kusho uNksz Mabanga.

UMnuz Andile Ngcobo (27) waseNtuzuma naye obengazi ngesabelomali esithulwa namuhla, uthe ufisa kwandiswe imisebenzi.

“Sibaningi esingasebenzi futhi iningi lethu kalifundile kodwa siyafuna ukusebenza. Mina ngibona ukwandiswa kwamathuba emisebenzi kungasiza ngisho ekuqedeni ubugebengu ngoba abanye bethu benza ubugebengu ngoba bezama impilo,” kusho uNgcobo.

UMnuz Ayanda Khumalo (27) waKwaMashu yena uthe ufuna kwandiswe imisebenzi. Uthe okunye okubalu-lekile ukuthi kulungiswe ukuletha izindlela zokugqugquzela izingane ukuthi zikukuthalele ukufunda.

“Ukuqinisa izinhlelo zokugqugquzela izingane ukuthi zifunde kungasiza ekunciphiseni abantu abagcina benza ubugebengu,” kusho uKhumalo.

UNksz Zandile Mbonambi (33) uthe kumele kugxilwe ekunyuseni imali etholwa ngabakhubazekile netholwa yizalukazi.

“Ogogo yibona abanakekela izingane zabantwana babo futhi yibo abathwala imindeni eminingi, kungangcono banyuselwe imali yesibonelelo,” kusho uNksz Mbonambi.

UNksz Nobuhle Zulu, waseNtuzuma uthe kungakuhle uhulumeni athasisele imali ekwakhiweni kwemigwaqo nokufakwa kwamanzi nogesi ezindaweni zasemakhaya.

“Okunye okungasiza ukunyuswa kwemali yezaguga mgoba zona zihlala nabazukulu abaningi leyo mali igcine ingaseneli, isiphelela obala,” kusho uNksz Zulu.

Usinde kukubi owesilisa waseRichmond Farm okuthiwa ushiswe ngamafutha abilayo ngumakhelwane wakhe.

LUNGI LANGA

USINDE kukubi owesilisa waseRichmond Farm okuthiwa ushiswe ngamafutha abilayo ngumakhelwane wakhe ngoba emsola ngokuthi uthathe ingane yakhe ngaphandle kokumazisa.

UMnuz John Mokopane (51) uthi akasalali yizinhlungu zokusha emuva kokushiswa ngamafutha abilayo ngumakhelwane wakhe ngoba ethi uthathe ingane yakhe ena-14 wahamba nayo eyogunda utshani engamtshelanga. Lesi sigameko senzeke emasontweni amabili edlule.

“Ingane kamakhelwane yangilandela ngiya kogunda utshani nezinye izingane. Ngazama ukuyitshela ukuthi ayiphinde ekhaya kodwa yaqhubeka yangilandela,” kusho uMokopane.

Uthe unina wengane, uNksz Sibongile Duma (43), ufonile wamthethisa, wamthuka, wathi wenziwa yini athathe ingane yakhe ahambe nayo engamtshelanga.

“Ngabona ukuthi kungcono ngiyoxolisa ngoba ngangibona ukuthi ngimonile. Ngithe uma ngifika endlini yakhe wangibuza ukuthi ngimfunani, esho engibiza ngekwerekwere. Wangitshela ukuthi uzongibonisa abantu ngoba angibazi,” kuchaza uMokopane.

Uthe wezwa igazi limshiya wasukuma kanti yilapho uNksz Duma esezomthela khona ngamafutha abilayo ayesebhodweni.

Umshise kusuka endlebeni yesokudla, kuya engalweni nasemzimbeni.

Ethintwa uNksz Duma ucingo lwakhe lubanjwe ngomunye othe usasemsebenzini akabuye afonelwe.

Ephinda ethintwa ucingo lubanjwe nguye wathi ucela ukuchazelwa kuqala ngalolu daba anduba aphendule. Ucingo ube eseluvala. Ephinda ethintwa ucingo lwakhe lubanjwe nguNksz Thandiwe Mthembu othe ungumngane wakhe. Uthe umngane wakhe akakwazi ukukhuluma ngoba lolu daba luphenywa ngamaphoyisa. Uthe umngane wakhe wayengaqondile ukushisa uMokopane kodwa wayedinwe kakhulu wahluleka wukuzibamba.

“Akazange abilise amafutha ngenhloso yokushisa lo bhuti kodwa wayelungiselela ukupheka isidlo sakusihlwa ezothosa inkukhu ngamafutha. Umngani wami uhlala yedwa manje uma kufika umuntu wesilisa endlini eyedwa wayengeke angethuki. Futhi wayediniwe ngoba izingane zakhe zihlala zodwa emini le ndoda yahamba nalena ezigadayo,” kusho uNksz Mthembu.

Omakhelwane balaba bobabili abacele ukuba amagama abo agodlwe bathe sibathusile lesi sigameko.

Omunye uthe bezwa uNksz Duma ethi uzomshaya uMokopane kodwa bebengazitsheli ukuthi uzombilisa ngamafutha.

Uthe umakhelwane wabo usebaxakile nabo ngoba ingane yakhe yashisa enye ingane ngesipanji esivuthayo wangayinaka leyo nto wagcina ngokuthi uzokhokha. Namanje kuthiwa yena nesoka lakhe batshele uMokopane ukuthi bazomnika isinxephezelo ngokusha kwakhe.

Okhulumela amaphoyisa, uCol Jay Naicker, ukuqinisekisile ukuthi amaphoyisa aphenya icala lokuzama ukubulala. Kuthiwa uNksz Duma uvele enkantolo yeMantshi eNtuzuma ngoFebhuwari 20, uzophinde avele ngoMashi.

Ungaphandle ngebheyili ka-R1 000.

Umphakathi waseziMbokodweni eNingizimu yeTheku utitinye owesilisa wakule ndawo waze wafa emuva kokuba ebanjwe oqotsheni ephezulu kwesalukazi esidlwengula.

MBALI KHANYILE

UMPHAKATHI waseziMbokodweni eNingizimu yeTheku utitinye owesilisa (35) wakule ndawo waze wafa emuva kokuba ebanjwe oqotsheni ephezulu kwesalukazi (87) esidlwengula entathakusa ngeSonto.

Lo mlisa ushonele esibhedlela iPrince Mshiyeni ngoMsombuluko. Umkhosi kuthiwa uhlatshwe wumzukulu walesi salukazi emuva kokubona lo mlisa egunjini lokulala lesalukazi esekhumule izicathulo nezimpahla zokugqoka edlwengula.

Ilandisa ngalolu daba indodana kagogo odlwenguliwe ithe lokhu kwenzeke ngezintathakusa ngabo-1 ngeSonto.

Ithe lo mlisa obese kuphele unyaka ehlala kubo ubevele engumuntu ongaqondakali ukuthi uphila mpiloni njengoba ebengesinye seziqashi kulo muzi kodwa ebe engasebenzi.

Uthi yize kunjalo bebengakaze bazitshele ukuthi uyoke abhozomele unina wabo njengoba bese bemthatha njengomunye welungu lomndeni.

“Ukube indodana yami ayizange ivuke emuva kokuzwa umama ekhala ngabe lo mgulukudu umbulele umama njengoba ebemklinya ngesikhathi emgila lo mkhuba. Kwakuhlaba umkhosi kwendodana kusize kakhulu ngoba ukube ayimemezanga ibiza umphakathi ngabe ubalekile,” kubeka indodana.

Sichaza ngesigameko isalukazi obekubonakala ukuthi siphazamisekile emqondweni sithe, lo mlisa owasigila lo mkhuba waqale wasishaya ngempama waphinde wasiklinya njengoba sasingazibekile phansi silwa naye ngesikhathi esibhudubeza.

“Wangicindezela umfana (emgagula ngegama) maqede wangiklinya emqaleni, ngazama ukulwa naye kodwa kwasho ukuthi unamandla kunami wagcina esekwazile ukungidlwengula. Wabe esegila umkhuba phezulu kwami kwaze kwasiza umzukulu owangizwa ngizama ukukhala kuleli gumbi engangikulona nale ndoda,” kuchaza lesi salukazi.

Okhulumela amaphoyisa KwaZulu-Natal, uLt Colonel Thulani Zwane, usiqinisekisile lesi sigameko waveza ukuthi amaphoyisa amatasa nophenyo.

“Akekho oseboshiwe ngalesi gameko njengoba amaphoyisa esaqhubeka nophenyo,” kusho uZwane.

Abantu abadala basale dengwane ngesikhathi abasebenzi bekhaya labo, iZibambeleni Old Age Home, KwaDabeka, beyeka ukusebenza ngoba bekhala ngomphathi walesi sikhungo.

LUNGI LANGA

ABANTU abadala basale dengwane ngesikhathi abasebenzi bekhaya labo, iZibambeleni Old Age Home, KwaDabeka, beyeka ukusebenza ngoba bekhala ngomphathi walesi sikhungo.

Izolo ekuseni abasebenzi baseZibambeleni bakake amasango esikhungo bethi ngeke bathinte lutho zingasukunyelwanga izikhalo zabo, okubalwa kuzo ukubuyiselwa imali yebhonasi.

Omunye wabasebenzi ocele ligodlwe igama lakhe, uthe ngoJanuwari 24 kulo nyaka umphathi wesikhungo uMnuz Kwazi Zulu ubatshele ukuthi ngeke besawathola amabhonasi.

“Sasihola ngakusasa umphathi wethu wasitshela ukuthi asevaliwe amabhonasi ngeke sisawathola. Samangala uma sitshelwa ukuthi ngeke siwathole ngoba abanye bethu basebethenge izinto ngethemba lokuthi kukhona imali abazoyithola,” kusho lo msebenzi.

Abasebenzi bathe umphathi wabo ubatshele ukuthi babanjelwa le mali ngoba kunemali engango-R300 000 athi idukile emalini yalesi sikhungo.

UMnuz Zola Saphetha wenyunyana yabasebenzi iNational Education, Health and Allied Workers Union (Nehawu), uthe abasebenzi bazobuyela emsebenzini uma sekufezwe izidingo zabo.

“Ngonyaka odlule sibe nezingxoxo nomqashi sacela ukuthi abasebenzi banyuselwe amaholo ngo-R1 000 kodwa asizange sivumelane ngalokhu, sigcine ngokuthi sicele ukuthi basinyusele ngo-R450 kodwa ibhodi lesikhungo lithe lingayinyusa ngo-R300 kuphela. Umphathi omusha uthe ngeke bawuthole kwalowo R300,” kusho uSaphetha.

Abasebenzi baphinde basola umphathi wabo ngokubabiza ngeziqhaza ngoba ethi yena ngeke akhulume lutho nabo ngoba bagcine ka-Grade 7.

Bathe ngeke babuyele emsebenzini baphinde basola elinye lamalungu ebhodi ngokuhlukumeza abantu abadala abahlala kuleli khaya.

Abasebenzi baphinde bathi kunezimpahla abanikelelwa zona abadala kodwa zigcine zidayiselwa bona ngabaphathi besikhungo.

Ethintwa ngokuteleka kwabasebenzi uZulu, uthe ngeke akwazi ukuphawula ngalolu daba ngoba alusekho ezandleni zakhe.

“Akukho engingakwazi ukukusho ngalokhu okwamanje ngoba lolu daba aluphethwe yimi kanti kunemigudu esiyilandelayo mayelana nokuphathwa kwalo. Sizobiza isithangami sabezindaba silubhunge khona,” kusho uZulu.

Usihlalo webhodi lesikhungo uNkk Zabelungu Mqadi, uthe ngeke akwazi ukukhuluma ngodaba lokuteleka kwabasebenzi ngoba akanalo ulwazi ngalo.

Abantu abakhokhela ama-rates eThekwini bangazithola sebekhokha imali yokuba kuthengelwe amakhansela alo masipala ama-iPad.

INTATHELI YESOLEZWE

ABANTU abakhokhela ama-rates eThekwini bangazithola sebekhokha imali yokuba kuthengelwe amakhansela alo masipala ama-iPad emizameni yokuba amakhansela angasali ngaphandle kodwa ahambisane nesikhathi samanje sobuchwepheshe.

NgoLwesibili iMeya yeTheku, uMnuz James Nxumalo, ithe isike yabolekwa i-iPad uzakwabo ongumgcinimafa uMnuz Krish Kumar emuva kokuba ebone ukuthi kwabe kunguye kuphela iMeya eyabe ingenayo i-iPad emhlanganweni.

Eminyakeni eyisishiyagalombili edlule ngesikhathi umkhandlu uthola ama-laptops angu-200 awo wonke amakhansela, kwabe kugqugquzelwa ukuthi kuqedwe ngokusebenzisa kakhulu amaphepha kugxilwe ebuchwephesheni.

UMasipala wabe ususebenzisa u-R1.9 million ngama-laptops kuhlanganiswa nokufakwa kwe-internet. Ilungu lomkhandlu omkhulu kumasipala weTheku elimele i-DA, uMnuz Tex Collins, litshele umkhandlu ukuthi ukufakwa kwama-laptops akuzange kusize ngalutho futhi nomkhandlu akuwenzelanga lutho.

Ephendula uNxumalo uthe ama-iPad azokwenza umsebenzi ube lula kakhulu ngoba angcono kunama-laptops.

“Ngiyakwazi ukuthola ama-email ngokushesha ngiphinde ngiphendule kulabo abasuke bengithinta, ngikholwa ukuthi wonke amalungu esigungu esiphezulu kumasipala kumele abe nawo,” kusho uNxumalo.

Ukuphawula ngale ndlela kukaNxumalo kwenze kwabonakala izihlathi zivakashela izindlebe kwamanye amakhansela azwakale esho ngazwi linye ukuthi ama-iPad azokwenza umsebenzi wawo ube lula.

Ngaphandle kwama-laptops axhaswe wumkhandlu , amalungu esigungu esikhulu ahola phakathi kuka-R45 000 no-R50 000 ngenyanga aphinde athole umhlomulo weselula kaR1 500.

Amakhansela ajwayelekile nalawo asuke ekhethwe ngamaqembu awo ahola ephakathi kuka-R20 000 no-R25 000. UNxumalo uthe uma izinto zihamba kahle ama-iPad azonikezwa wonke amakhansela angu-200.

UNkk Lilian Develing ongusihlalo weDurban Combined Ratepayers Association, uthe i-iPad ngelinye nje “ithoyizi” elizofika nezindleko ezinkulu.

“Bamosha imali ngayo yonke indlela. Bonke banawo ama-laptops kodwa iningi labo aliwasebenzisi. La ma-iPads azophinde aphazamise emihlanganweni ngoba abanye bazodlala ngawo bakhohlwe ukulalela okwenzekayo,” kusho uNkk Develing.

I-iPad ibiza phakathi kuka-R4000 no-R7 500 kuzosho ukuthi abakhokhi bentela kumele bakhokhe imali ephakathi kuka-R800 000 no-R1.5 million, kuyona leyo mali kube khona ezokhokhwa ye-internet.

Ikhansela leMinority Front, uMnuz Patrick Pillay, lithe ama-iPad azokwenza umsebenzi wabo ube lula bakwazi nokuthumela ama-e-mail ngokushesha noma ngabe bakuphi.

Iziboshwa ezidonsa izigwebo zeminyaka ngamacala okubulala nodlame eRichmond eminyakeni edlule izolo zithole ithuba lokuxolisa emindenini yababulawa.

NONTUTHUKO NGUBANE

IZIBOSHWA ezidonsa izigwebo zeminyaka ngamacala okubulala nodlame eRichmond eminyakeni edlule izolo zithole ithuba lokuxolisa emindenini yababulawa ejele iNew Prison, eMgungundlovu, ngesikhathi kwethulwa uhlelo lokuxolelana okokuqala kuleli jele.

Kube nomunyu nosizi ngesikhathi iziboshwa zizivumela ukuthi zenza la macala ngenhloso futhi zisebenzisa isihluku.

Phakathi kwalezi ziboshwa bekukhona noSandile Dlamini oxolise emndenini kaMnuz Sfiso Nkabinde owayengumholi we-UDM owabulawa ngo-1999.

“Akukhona okokuqala ngixolisa kodwa ngiyaphinda namuhla ngoba ngifuna bazi ukuthi ngiyazisola ngento engayenza. Ubhuti uSfiso waboshwa ngenxa yamacala akhe kodwa wabuye wadedelwa yinkantolo. Thina sahlela ukumbulala, saphuca umndeni ubaba nelungu lawo. Ngiyazisola ngesenzo sami. Sengihlale iminyaka engaphezu kuka-14 ejele akumnandi neze kodwa ngiyakwazi kahle okwangibeka la,” kusho uSandile.

Unkosikazi kaNkabinde uNkk Nonhlanhla Nkabinde uthe yena ubaxolele bonke abahlasela umyeni wakhe njengoba eseke washo esikhathini esidlule.

“Namhlanje ngizofakazela ukuthi ngabaxolela ngempela laba bafana. Abanye babo sebengaphandle manje ngoba ngababhalela izincwadi ezaya ebhodini likashwele ngisho ukuthi abakhishwe. Engikufunayo nje wukuba zonke izingane zaseRichmond zizwane, iphele nendaba yesihlava sakudala ngoba okwenzeka kwenziwa obaba bazo, zona kazingene,” kusho uNkk Nkabinde.

Yize iziboshwa zixolisile kodwa kube nesikhalo ngezinto eziningi ezingakalungiswa eRichmond.

Phakathi kwezinto umphakathi okhale ngazo yintelezi nezikhonkwane okwasebenza ngesikhathi sodlame nabafuna kugezwe ukuze kuphele udlame kuleya ndawo njengoba kubhoke izigameko zokugwazana.

UMnuz Paulus Vezi owayeyikhansela le-IFP kule ndawo uzivumele yena ukuthi ubalwa kwababephaka impi kuleya ndawo kodwa manje okubalulekile wukuba kubuyiswane ukuze ithuthuke.

Ezinye iziboshwa eziboshelwe amacala okudlwengula namanye athathwa njengayingozi nazo zithole ithuba lokuxolisa emindenini.

UThulebona Jali wakwaSwayimane owaboshelwa ukudlwengula intombi yakhe eyayingaphansi kweminyaka ngaleso sikhathi ukwabathole ukuxolelwa nguMnuz Thokozani Dladla.

Ecela uxolo uthe uyazi ukuthi wayimosha impilo yowadlwengulwa “ayemhalela ngoba eyintombi nto” wathi ufuna azi ukuthi uyazisola.

Lolu hlelo lokucela ukuxolelwa kweziboshwa lwenziwa okokuqala kuleli jele eliseMgungundlovu kanti seluzoqhubeka zinyanga zonke.

USfiso Zulu osanda kuthola ushwele wasebenzisa lolu hlelo waxolisa emindenini eyahlukumezeka ngenxa yengozi ayenza.

Abaphuzayo nababhemayo bazokhokha okuthe xaxa kulonyaka.

INTATHELI YESOLEZWE

ABAPHUZAYO nababhemayo bazokhokha okuthe xaxa kulonyaka.

Ethula isabelomali salo nyaka uNgqongqoshe wezeziMali uMnuz Pravin Gordhan, uthe abaphuzayo bazokhokha 7c ngaphezulu ukuthenga ikani elilodwa likabhiya.

Ugwayi uzonyuka ngo-60c iphakethe.

Ibhodlela lewayini lizobiza u-15c ngaphezulu.

Imali yama-cider nezinye iziphuzo ezidakayo ezithakwe ngezithelo zizonyuka ngo-7c ilitha.

Ibhodlela likagologo elingu-750ml lizobiza u-R3.60 ngaphezulu kusuka ekuqaleni kuka-Ephreli.

Abaphuza ijuba bona bazokhokha kancane.

Abashayeli bazozwela njengoba bezokhokha u-23c ngaphezulu uma befaka uphethiloli kusuka ngo-Ephreli 3.

Ilevi kaphethiloli izonyuka ifike ku-15c ilitha, u-8c uzoya esikhwameni sezingozi, i-Road Accident Fund.

Abathengi ngeke bakujabulele ukuzwa ukuthi uplasitiki ezitolo uzonyuka usuka ku-4c uye ku-6c kulo nyaka.

Asehlalele ovalweni amalungu omphakathi aseSikhaleni, KwaSwayimane, ngemuva kwesigameko esishaqise abaningi sokufa kwengane enephulwe yizinja komakhelwane.

NOKUBONGWA PHENYANE

ASEHLALELE ovalweni amalungu omphakathi aseSikhaleni, KwaSwayimane, ngemuva kwesigameko esishaqise abaningi sokufa kwengane enephulwe yizinja komakhelwane.

Abanye bomphakathi bathuka izanya njengoba inja eyodwa kulezi ezibulele ingane ibalekile kanti kuthiwa iyabonakala ehlathini.

Isidumbu sika-Okuhle Manzi (3) sisale simanephunephu emuva kokudliwa yizinja unina ekade emshiye yedwa ephelezele enye ingane yakhe iyogibela iya esikoleni ngoMsombuluko.

Lezi zinja kuthiwa abanikazi bazo bebejwayele ukuhamba nazo beyozingela izinyamazane.

Ugogo ka-Okuhle uNkk Thokozani Gasa, uthe bamangele kakhulu ngalesi sigameko naye selokhu aba khona uyaqala ukusibona ngamehlo.

“Mina bengiqala ukubona into enjena. Angazi lezi zinja zazingenwe yini ngoba ingane bezihlala nayo futhi azikaze zikhombise bungozi ngisho kithina bantu abadala,” kusho uNkk Gasa.

Uthe ngesikhathi ingane ilandela unina akanakanga ukuthi ayibuyi ngoba wamuzwa eyixosha.

“Ngacabanga ukuthi uzingenele kamakhelwane njengoba ujwayele ukukhala uma embuyisa emuva kodwa kulokhi akaze akhale. Ngezwa ngomakhelwane sebememeza sekuqhuma isililo la enhla komuzi uma ngifika ingane ayisabonakali, sayithatha sayigoqa ngezingubo sayihambisa esibhedlela,” kuchaza uNkk Gasa.

Uthe abanankinga ngokwenzekile, ngeke babazonde noma baxabane nomakhelwane babo njengoba lokhu kungesona isigameko samabomu.

Umnikazi wenja eyodwa kulezi ezintathu ezibulale le ngane uNkk Fihlekile Phakathi, uthe kudala etshela abanikazi bezinja ezigcwala kwakhe ukuthi abazilande.

Uthe naye kamuva nje ubesezesaba njengoba bezike zigcwale umuzi wakhe angazi ukuthi zifunani.

“Ngibuhlungu kakhulu ngale ngane njengoba ibizihlalela nami ihamba yodwa singasabi lutho. Lezi zinja bezilandela eyalayikhaya njengoba bekuyiyona eyesifazane. Zaqala ukuhlala layikhaya ngabuza ukuthi ezakuphi ngathola eyodwa ngahamba ngayotshela umnikazi wayo ukuthi azoyilanda wathi uzothumela abafana kodwa abangafika,” kusho uNkk Phakathi.

Uthe nangesikhathi bethola umyalezo wokuthi izinja sezidle ingane yena wayecabanga ukuthi basho imbuzi kodwa wafika wamangala uma sebethola ukuthi u-Okuhle.