Ukubulawa kukaSenzo Meyiwa kube ngesinye sezigameko sobugebengu esibe ngundabuzekwayo kulo nyaka.

BAWINILE NGCOBO

UKUBULAWA kukaKaputeni weBafana Bafana ne-Orlando Pirates, uSenzo Meyiwa, kube ngesinye sezigameko sobugebengu esibe ngundabuzekwayo kulo nyaka.

Lesi sigameko esenzeke ngo-Okthoba eVosloorus kubo kanina wengane yakhe ongumculi uKelly Khumalo sishaqise abaningi kanti singesinye kweziningi ezihambisana nobugebengu obenziwa kusetshenziswa izibhamu eNingizimu Afrika.

Kwaba nesikhalo esikhulu ngezinga lobugebengu kuleli kwaze kwaba khona abaphakamisa ukuthi kubuyiswe owayenguKhomishana wamaphoyisa uMnuz Bheki Cele.

Kuze kube yimanje akukaboshwa muntu ngalesi sigameko emuva kokuthi kwaboshwa uMnuz Zanokuhle Mbatha owakhishwa enkantolo ngoba kuthiwa ubufakazi abuhlangani.

Lesi sigameko singezinye zobugebengu ezenzeka mihla namalanga kuleli.

Esinye isigameko esenzeke esifundazweni saKwaZulu-Natal esadlula nemiphefumulo yabantu abangu-15 eZakheni, eMnambithi, lapho kwadutshulwa khona imoto iMercedes Benz iphuma emshadweni kwashona oyedwa.

Itekisi elabona kwenzeka lesi sigameko lathi livika lesi sigameko lazithela phezu kweloli kwashona abantu abayisishiyagalolunye kulo.

Ngalo lolu suku kusadlule ihora kwenzeke lesi sigameko kwadutshulwa abantu abahlanu behleli endaweni yokuwasha izimoto khona eZakheni kwa-D.

Uphenyo lwamaphoyisa lwakhomba ukuthi lezi zigameko ziyahambisana kanti umsusa wazo umbango okhona phakathi kwemindeni emibili yakule ndawo.

Ukubulawa kwamaphoyisa esemsebenzini noma engekho emsebenzini kube ngesinye zezigameko ezenzeke zilandelana kulesi sifundazwe.

Ngo-Agasti iphoyisa laseDurban Central uConstable Nkanyiso Ngcobo watholwa eseshonile egqitshwe emgodini ongashoni eMkhomazi emuva kokuduka amasonto amathathu ehambe nabangani bakhe beya emcimbini.

Emuva kokutholwa kwesidumbu sakhe kwaboshwa ozakwabo ababili nomunye umfowabo womunye uzakwabo abasahamba icala namanje.

Esinye isigameko esibe sematheni ngo-Agasti ngesokubulawa kwephoyisa lesifazane uConstable Zethu Cele laseBerea owadutshulwa beyobheka isimo lapho babebizelwe khona kubanjwa inkunzi.

Kuze kube yimanje akukaboshwa muntu ngalesi sigameko.

Elinye iphoyisa uWarrant Officer Norman John libulawe ezitokisini nokuthiwa kwenziwa ngesinye isiboshwa esamphuca isibhamu esiteshini eMayville.

Kulesi sigameko kwashona abasolwa ababili kwalimala namaphoyisa amabili.

Ukubulawa kosomatekisi kusoseshini waseNanda ngendlela efanayo besesiminyaminyeni sezimoto emgwaqweni kube ngundabuzekwayo ngo-Okthoba.

Abantu babekhuluma ngakho ezinkundleni zokuzhumana.

UMnuz Falakhe Maphumulo wabulawa esemotweni yakhe emgwaqeni uM25 ehamba nonkosikazi wakhe ngesikhathi sesiminyaminya.

Unkosikazi wakhe wangeniswa esibhedlela elimele.

Emuva kwezinsuku ezintathu kwenzeke lesi sigameko, kwadutshulwa omunye usomatekisi emgwaqweni uNandi Drive ngesikhathi sesiminyaminya.

UNkk Eunice Mkhwanazi washonela endaweni yesigameko kwathi umyeni wakhe uMnuz nathi Mkhwanazi waphuthunyiswa ngendiza enophephela emhlane esibhedlela.

Ngaphandle kokubulawa kwabantu ngendlela eyisihluku kubonakale kubanjwa abasolwa abaningi ngezigameko zokushushumbiswa kwezidakamizwa kwelakuleli.

Isigameko esashaqisa kakhulu esokutholwa kwenqwaba yezithako zezidakamizwa nemishini yokuzenza emzini osendaweni yabadla izambane likapondo eKloof nonyaka emzini obubukeka njengojwayelekile ungasolisi ngalutho.

Kwaboshwa ababili base-China noyedwa wakuleli awayedabuka eKapa abatholakala kulo muzi.

Uma ungakayihleleli ibhonasi yakho, udonswa ngendlebe ukuba ungayibhubhudli.

INTATHELI YESOLEZWE

UMA ungakayihleleli ibhonasi yakho, udonswa ngendlebe ukuba ungayibhubhudli kwazise kumele ube nemali kuze kube nguJanuwari.

Kuhle ukubeka eceleni imali yezikweleti zakho ozikhokhela ngama-debit order, eyegilosa nokunye ozokudinga ngonyaka ozayo kwazise kusasele amasonto amahlanu ukuba uthole umholo olandelayo.

UNkk Boitumelo Mothoagae, wakwa-Liberty, uxwayise abantu ukuba bathenge izinto ezinesidingo, hhayi izinto abazihalelayo noma abangaphila ngaphandle kwazo.

“Ngamaholidi abantu banomkhuba wokukhithiza ngisho impahla engenasidingo. Kumele bakugweme lokho, izidingo ngamabhondi ezindlu, irenti, uphethroli uma unemoto, igilosa, umshwalense, imali oyilondolozayo nokunye okuhlale kudonswa ebhange unyaka wonke. Okungenasidingo yizipho, imali yamaphathi neyokungcebeleka,” kusho uNkk Mothoagae.

Uma ifika imali uNkk Mothoagae, utshele abantu ukuba bayihlukanise ngokwezidingo, babeke nenye yezinhlekelele ezingalindelwe njengokuqhuma kwama-geyser nezinye izehlakalo zempilo ezivele zenzeke ungalindele.

Labo abathole amasenti athe xaxa kungakuhle ukuthi bawasebenzisele ukukhokha izikweletu zabo, bathenge umfaniswano wesikole nezincwadi zezingane noma bawavalele kwenye i-akhawunti abangeke bayisebenzise ngesikhathi samaholidi.

“Ukukhokhela izikweletu ngaphambi kwesikhathi kuyakusiza ukuthi wonge imali ngisho inzalo ayibi nkulu uma usheshe waqeda. Uma ukwazi khokhela umshwalense wonyaka ozayo ngemali yebhonasi ukuze uzothola ukuphefumula ngoJanuwari,” kusho uNkk Mothoagae.

Okumosha imali ngamaholidi ngamaphathi angahleliwe, yizipho ezibizayo abantu mabazigweme. UNkk Mothoagae uthe abantu abamenywa emaphathini basebenzisa uphethiloli othe xaxa, bathenge izingubo ezintsha, ukudla, utshwala okungaholela ekumoshweni kwemali.

Ucebise abantu ukuthi uma benza amaphathi kuhle bacele izihambeli zabo ukuthi ziphathe okuthile kanti uma bemenyiwe kumele beze nenyama, basize abantu ababamemile ngokulungiselela umcimbi.

Mayelana nezipho uthe akubalulekile ukuthi umuntu aze ayothenga isipho esitolo kodwa angakwazi ukuzenzela ekhaya onge nemali.

Igilosa abantu kumele bayithenge ezitolo ezingafani, baqhathanise amanani. Amanye amasu angakusiza ukonga imali yilawa:

n Ungathengeli wonke umuntu isipho kungcono ungafaka amagama esigqokweni nitomule ukuze umndeni nabangani bathengelane.

n Thenga ukudla okungaboli uma kuqala indali ukuze kuzosebenza nangoKhisimusi.

n Asikho isidingo sokuthenga amaphepha okugoqa izipho, ungasebenzisa iphephandaba elidala noma uzenzele okwakho kokugoqa isipho.

n Ungasika amakhadi amadala kaKhisimusi ukwenza izipho.

n Ungathengi izinto zokuhlobisa isihlahla zenzele ezakho.

n Qalani isitokofela nabangani, owonge imali eningi athole isipho lokhu kuyasiza ukuthi ubeke imali eyanele ezokusiza ngomuso.

n Kuhle ukwenza i-braai esikhundleni sokuzikhipha futhi ungonga nogesi ngokubasa amalahle.

n Shiya amakhadi asebhange ekhaya uma uyothenga kungcono usebenzise ukheshi ngoba imali oyiphethe yiyona kuphela engakusiza ukuphuma nempahla esitolo. Uma usuyiqedile ayikho enye kumele uye ekhaya.

Osomatekisi baseNyoni KwaZulu-Natal sebesabise ngokuthi bazobuyela ngenkani emzileni wabo waseMandeni.

CELANI SIKHAKHANE

OSOMATEKISI baseNyoni KwaZulu-Natal sebesabise ngokuthi bazobuyela ngenkani emzileni wabo waseMandeni abamiswa kuwona ngoMashi ngemuva kodweshu olwaqubuka phakathi kwabo nososeshini waseSundumbili.

Osomatekisi abacele kugodlwe amagama abo ngenxa yokwesaba bathe kusukela ngoMashi amatekisi abo awasebenzi ahleli emakhaya nosekuholele ekutheni abanye badlelwe wona ngoba sebehluleka ukuwakhokhela.

Bathi bafuna uNgqongqoshe wezokuThutha KwaZulu-Natal uMnuz Willies Mchunu angenelele ukuzoxazulula lolu daba ngoba uma ehluleka bazozifakela bona ngenkani izimoto zabo eMandeni ngoba bayehluleka ukubekezelela usizi nendlala ekubeni benawo umzila.

Usihlalo waseSundumbili uMnuz Sphethu Ngcobo kuthiwa uke wazama ukuxazulula lolu daba kodwa wadutshulwa washona.

USihlalo omusha waseSundumbili uMnuz Masango ngesikhathi ethintwa akazange atholakale izingcingo zakhe zombili bezivaliwe. “Sihlukumezekile ngento eyenzeka yokuphucwa umzila osomatekisi baseSundumbili. Sikhuluma nje selokhu inxanxathela yezitolo yaseMandeni yaqala ukusebenza thina asiyazi nokuthi injani ngoba savalwa mhla izovulwa ukuthi sithuthe abantu izimoto zethu zahlala emakhaya. Okubuhlungu ukuthi uma sithi siyazama ukubuyela siyadutshulwa izinkabi noma kubizwe amaphoyisa asishaye kuthiwe sizodala udlame ekubeni kuyithi esaphucwa umzila. Sinayo ngisho imvume yoMnyango wezokuThutha yokusebenzisa umzila wethu osuka eNyoni uye eMandeni kodwa sidutshulwa nawo amaphepha asigunyaza ukuthi sisebenze,” kusho omunye wosomatekisi.

Abanye balabo somatekisi bagcwele izibazi zokushaywa ngenxa yombango walo mzila ohlanganisa osuka eNyoni uyoshaya koNdulinde, Ndwandwe, Zavutha, Standard Bank, Maxhafuza kuyofinyelela eMthonjeni. Bathi babikile emahhovisi oMnyango wezokuThutha eMandeni kodwa abalutholi usizo.

Okhulumela uMnyango wezokuThutha KwaZulu-Natal uMnuz Kwanele Ncalane uthe ngokwazi kwabo abantu abamiswa emzileni kwaba iMandeni noSundumbili ngoba kungekho onemvume yokusebenza.

“Esikwaziyo ukuthi akekho osanikwe ilungelo lokusebenzisa imizila okukhalwa ngayo ngoba uMnyango usalusebenza lolu daba. Kuleya ndawo sifake amaphoyisa ukuze aqaphe isimo ngaphandle kwalokho abazobanjwa besebenzisa imizila evaliwe bazoboshwa,” kusho uNcalane.

Bakhala ngokuthi isikhathi esimatasa lesi samaholidi okufanele ngabe nabo bazenzela inzuzo kodwa izimoto zihleli emakhaya.

Bakhononda nangephoyisa okuthiwa linetekisi kusoseshini waseSundumbili abathi livele litheleke nethimba lozakwabo libashaye libafune nezibhamu ezingekho lithi bayizinkabi.

Sekuvele uhlangothi eqenjini le-ANC olufuna ukukhipha uMnuz Senzo Mchunu esikhundleni sakhe.

BONGANI HANS

SEKUVELE uhlangothi eqenjini le-African National Congress (ANC) esifundazweni iKwaZulu-Natal olufuna ukukhipha uSihlalo we-ANC eKZN uMnuz Senzo Mchunu esikhundleni sakhe kanti sebeqale nomkhankaso osezingeni eliphezulu ukwenza lokhu.

Abangamfuni uMchunu onguNdunankulu waseKZN kuthiwa bafuna ukuvala isikhala sakhe ngoNobhala weqembu esifundazweni uMnuz Sihle Zikalala.

Iphephandaba elinguzakwabo weSolezwe, i-The Mercury lithole ukuthi amalungu e-ANC Youth League nawe-Women’s League aseka uZikalala, kanti uMchunu unokwesekwa abadala kuleli qembu.

Ukhetho lwezifunda ze-ANC ezingu-11 eKZN selubanjiwe ezifundeni eziningi kanti imiphumela yalo kuthiwa izokuba nomthelela ekuthini uMchunu uyaqhubeka esikhundleni sakhe uma sekunokhetho lwesifundazwe ngo-2016.

Imithombo eminingi okukhulunywe nayo nhlangothi zombili ikuqinisekisile ukuthi imiphumela yokhetho lwezifunda yiyo ezohlahla indlela ngokhetho lwesifundazwe ngo-2016.

Bathe azikho izinhlelo zokususa uMchunu esikhundleni sakhe sokuba nguNdunankulu yize bemsola ngokungababongi ngezikhundla zokuba uNgqongqoshe labo abameseka ekhethwa ukuba nguSihlalo weqembu esifundazweni.

“Ikhabhinethi yakhe icishe ifane naleyo ebivele ikhona. Waqoka uMnuz Cyril Xaba njengoNgqongqoshe wavala isikhala ebesiphethwe ngumuntu omhlophe (Ina Cronjé) ngomunye omhlophe (Belinda Scott).”

Eminye imithombo ithi loyo owake waba yilungu lePhalamende uNkk Ntombikayise Sabhidla-Saphetha waphendlelwa nguZuma ukuba nguNgqongqoshe wezeMidlalo eKZN.

“I-ANC ayinawo umgomo othi uSihlalo kumele nakanjani abe nguNdunankulu,” kusho omunye umthombo.

Abaseka uZikalala babandakanya labo abangaphathekanga kahle ngesikhathi kukhethwa uMchunu ekuqaleni kuka-2013 ehlula loyo oyiphini lakhe uMnuz Willies Mchunu.

Yize kunjalo kodwa uZikalala uzichaze njengo“msangano” izinsolo zokuthi uzobanga nomuntu omdala kuye.

“Umsangano loyo futhi angifuni ukhuluma ngemisangano,” usho kanje.

Isifunda iTheku, esikhulu kanazo zonke esifundazweni, sibaluleke kuzo zombili izinhlangothi.

IMeya yeTheku uMnuz James Nxumalo noMgcinimafa we-ANC eThekwini uNkk Zandile Gumede yibo ababanga isikhundla sikasihlalo embangweni osuchazwe njengoshubile nokungaziwa ukuthi iyozala nkomoni kuwo. Ingqungquthela yesifunda saseThekwini isihlehliswe kabili ngenxa yemibango ethinta laba bobabili.

Ezifundeni ezingu-11, eziyisishiyagalolunye sezibakhethile abaholi bazo: Harry Gwala (Ixopo); Moses Mabhida (Maritzburg); Musa Dladla (Empangeni), Lower South Coast (Port Shepstone), Abaqulusi (Vryheid), Far North (Mkhuze), KwaDukuza (North Coast, Stanger), Ukhahlamba (Bergville) naseMalahleni (Newcastle). Enkosi Bhambatha (Greytown) kuzokhethwa kusasa.

Imithombo ithi uhlangothi lukaNxumalo luhamba noMchunu kanti olukaGumede lweseka uZikalala kusihlalo weTheku.

“Ezifundeni esezikhethile izinkomba zithi kwesekwa kakhulu uMchunu. Bancane abeseka uZikalala,” kubeka umthombo.

Abaseka uMchunu basola uhlangothi lukaZikalala ngokwenza izinto ezingekho emthethweni bephusha umkhankaso kaNkk Gumede eThekwini.

Ikati lilele eziko emindenini yabashona kwinhlolokhono yamaphoyisa omgwaqo ngoDisemba 2012 abathenjiswa isinxephezelo sikahulumeni.

NONTUTHUKO NGUBANE

IKATI lilele eziko emindenini yabashona kwinhlolokhono yamaphoyisa omgwaqo ngoDisemba 2012 abathenjiswa isinxephezelo sikahulumeni.

Imindeni yabayisishiyagalombili abashona ngesikhathi kunenhlolokhono yamaphoyisa omgwaqo, kwavezwa ukuthi bazothola isinxephezelo esingadalulwanga kulandela ukuvela kokuthi uMnyango wezokuThutha KwaZulu-Natal waba nobudedengu ngokushona kwabo.

NgoLwesibili Isolezwe lixhumane nemindeni eveze ukuthi izoba noKhisimusi omuncu njengoba uMnyango ungakabacaciseli ngesinxephezelo.

UMnuz Joseph Nxumalo ongubaba womunye wabashona uLenny Nxumalo, uthi usephila ngokukha imifino ukuze izingane zikamufi zikwazi ukuthola okuya ngasethunjini.

“UKhisimuzi asinawo, imali esathenjiswa yona ayikaze ifike. Kumanje ngikha imifino ensimini ukuze kuzodla izingane zikamufi. Besilokhu sigqigqa emihlanganweni nomnyango kodwa akukho okwenzekayo. Kunzima kakhulu ikati lilele eziko, umufi uyena obondla kulo muzi, unezingane ezimbili nezikadadewabo ezintathu abezondla. Asazi sizokhala kubani, sixakekile,” kusho uNxumalo maqede wakhihla isililo.

UNdunankulu waKwaZulu-Natal uMnuz Senzo Mchunu ethula umbiko esithangamini nabezindaba eMgungundlovu ngo-Agasti waveza ukuthi izincomo ezenziwa iKhomishini ebiphenya ngalesi sigameko sangoDisemba 2012, iphakamise ukuthi imindeni inxeshezelwe.

Abashona ngoSibonakaliso Mhlanga (30), Lindokuhle Kunene(30), Xolani Gumede (29), Ntuthuko Sibisi (28), uLenny (28), Sanele Ngcobo (22), Bongiwe Mbatha (29) noLungile Wamba (30).

Bonke laba kwavela ukuthi bebondla imindeni yabo abanye benezingane. USanele washiya ingane isenezinyanga, uSibonakaliso yena ingane yakhe yazalwa eseshonile.

Ugogo kaSanele uNkk Thembi Ngcobo uthe akazi uzothathani ahlanganise nani ukondla ingane kamufi nokuyinto evusa kakhulu ubuhlungu kulesi sikhathi.

“Inhliziyo iyaqaqamba uma ngicabanga ngesikhathi sikaKhisimuzi ngoba isona isikhathi okwashona ngaso ingane yami iyofesela umsebenzi wamaphoyisa omgwaqo. Kuze kube manje udaba alukaphothulwa. Ingane yakhe ayishiya ineminyaka emibili nezinyanga manje asazi sizoyinikani ngesikhathi sikaKhisimuzi, nokudla angisakwazi ukukufaka emlonyeni wami,” kusho uNkk Ngcobo.

Okhulumela uMnyango wezokuThutha uMnuz Kwanele Ncalane ebuzwa ngezinhlelo zokukhokhelwa kwemindeni uthe sekuyaphothulwa.

“UMnyango unalo uhlelo osebenza phezu kwalo lokuphothula zonke izincomo ezalethwa ikhomishini ngalolu daba.

Kumanje sesiwethulile umbiko kwikhabhinethi ngesizokwenza, imindeni izothintwa maduze ngenqubekela phambili,”kusho uNcalane.

UMchunu wathi uMnyango wezokuThutha kutholwe ukuthi waba budedengu ngokwenzeka kwalesi sigameko. Yiwona ozobhekelela ukunxeshezelwa kwemindeni.

Abashona babephakathi kwabangu 40 700 ababefesele umsebenzi wokuba ngamaphoyisa omgwaqo kukhangiswe izikhala ezingu 90 kuphela.

UThamsanqa Dlamini ongomunye wabalaliswa esibhedlela isikhathi eside ngenxa yokulimala kuphakanyiswe ukuthi akanxeshezelwe ngo-R10 000.

Abanye abalimala kule nhlolokhono (amagama abo akulo mbiko weKhomishini) nabo kuthiwa bazonikezwa u-R10 000 umuntu ngamunye.

UMchunu waveza ukuthi kuzohlanganwa nemindeni yabashona ukuze kuxoxiswane ngesamba semali abazoyithola kuzoqala ngokukhulu ukushesha.

UMnyango wezokuThutha kuvele ukuthi wahluleka ukuqasha inkundla okwakwenzelwe kuyona le nhlolokhono nokulandela imithetho ehambisana nokuqashwa kwabantu.

Bahluleka ukuhlela ukuba kube nabezimo eziphuthumayo njengoba kwakunama-ambulensi amabili kuphela.

Inkundla yaseHarry Gwala ethwala abantu abangu-13 000 bayigcwalisa kakhulu ngabantu abalinganiselwa ku-40 700 izinsuku ezimbili.

Amanzi nokunye okwakudingwa ngababebiziwe akubanga khona. Kutholakale nokuthi abazange baqinise ezokuphepha njengoba abantu babengabhekwa uma bengena noma bephuma kule nkundla. Utshwala abuzange bulawulwe. UMchunu waxolisa emindenini ngokwenzeka.

Kunzima kwabakhishwe emaflethini kasomabhizinisi waseThekwini uMnuz Jay Singh.

BONISWA MOHALE

KUNZIMA kwabakhishwe emaflethini kasomabhizinisi waseThekwini uMnuz Jay Singh aseCastle Hill, eNewlands West asebelala emgwaqweni nezingane nezimpahla zabo kusukela bekhishwe ngesidlozane kuwona ngoLwesithathu.

Izolo imindeni ebalelwa ku-96 ibithoswa yilanga ebelikhipha umkhovu etsheni nefenisha yayo eduze kwamaflethi. Abanye abaxoshiwe banezingane ezincane okuphoqeleke ukuba balale nazo emgwaqweni.

Ngesikhathi Isolezwe lifika kule ndawo izolo abantu bebegcwele ngaphansi kwezihlahla, abanye bepheka impahla yabo igcwele unqenqema lomgwaqo.

Eduze kwabo bekukhona amaphoyisa abegade isimo njengoba laba bantu bebegoloza ukuphuma emaflethini.

NgokukaNksz Mbali Dlangisa oyilungu lekomiti labaxoshwe kulama flethi balale emgwaqweni ngoba bengazi ukuthi bashonephi.

“Sixoshwe ngoLwesithathu emaflethini kanti kusukela lapho asikaze siluthole usizo lwamanzi nendawo yokukhosela. Kukhona amalungu e-Economic Freedom Fighters (EFF) azobheka ukuthi kwenzekani. Akhulumile nekhansela lawatshela ukuthi lisazama,” kusho uNksz Dlangisa.

Uthe badinga aboMnyango wezokuHlaliswa kwabantu esifundazweni ukuba babasize ngendawo yokuhlala.

UNkk Sibongile Khawula oyilungu le-EFF ePhalamende eKapa uthe akaneme neze ngokukhishwa kwabantu emaflethini maqede bangahlinzekwa ngendawo yokuhlala.

“Siphuma kwi-16 Days of Activism for no violence against women and children. Lo muntu okhiphe imindeni emaflethini wayihlalisa emgwaqweni uthini ngokudlwengulwa kwezingane nabesifazane. Ikhansela lithe lisaxoxa naboMnyango wezokuHlaliswa kwabantu manje uma lisaxoxa lithi abantu abahlale kuphi? Mina ngibona kufanele batholelwe uphahla njengoba nehholo lingekho kule ndawo,” kusho uNkk Khawula.

Uthe amaflethi kaSingh bekumele kuhlale kuwo abantu abengenandawo yokuhlala kwazise iseyinkinga indaba yomhlaba.

Ukhale ngokuthi kwayena uSingh kufanele aboshwe ngoba unezinkinga ngamaflethi abhodlokayo ePhoenix nesakhiwo senxanxathela yezitolo eyabulala abantu oThongathi.

UNksz Bandile Mdlalose wenhlangano esiza umphakathi i-Community Justice Movement (CJM) uthe unethemba lokuthi abantu bazotholelwa umpheme kwazise balungisa lolo daba nekhansela lendawo uMnuz Simphiwe Lubede.

Kuphume isidumbu kubangwa umphumela wengoma ebinesiteki sika R1 200 eThelezini eNquthu.

NOKUBONGWA PHENYANE

KUPHUME isidumbu kubangwa umphumela wengoma ebinesiteki sika R1 200 eThelezini eNquthu ngeSonto. Sekuboshwe abesilisa abayisikhombisa ngecala lokushaya babulale omunye wesilisa abebemsola ngokuthi ubarobhile bagcina bengasiwinanga isiteki sika-R1 200 emncintiswaneni wengoma.

Umufi uMnuz Malusi Sikhakhane (34), kuthiwa uhlaselwe abesilisa esendleleni eya esitolo eNtababomvu emuva komcimbi wendlamu bemsola ngokuthi ube nesandla ekutheni bangawini.

Abazibonele bathi baqale ngokumshaya abanye bamgwaza nokugcine ngokuthi aphuthunyiswe esibhedlela iCharles Johnson, eNquthu, lapho eshonele khona.

Abasolwa abaneminyaka ephakathi kuka 16 no 21 bavele izolo enkantolo yeMantshi eNquthu ngecala lokubulala.

Okhulumela amaphoyisa KwaZulu-Natal uMajor Thulani Zwane uthe: “Amaphoyisa asebenze kanzima abopha laba besilisa ngolwazi abanalo ngokuthinteka kwabo kulesi sigameko,” kusho uZwane.

Uthe kuphenywa ngomsuka walesi sigameko wangakuqinisekisa ukuthi bekubangwa ingoma.

Umthombo owawukhona kule ndawo ngesikhathi kwenzeka lesi sigameko uthe ngesikhathi umcimbi usuya ngasemaphethelweni kwasuka umsindo abanye besola ukuthi kukhona lapho berojwe khona bafuna kubuyiswe imali yabo.

“Ngabe nginamanga uma ngithi kwasala kwenzekani ngempela ngoba nami ngashiya ngisaba ukwenziwa isilo sengubo ngahamba. Isimo sashuba kakhulu ngoba abanye engangihamba nabo babesafuna ukusala babukele kodwa ngabona kukubi impela,” kusho umthombo.

Omunye umthombo owawukhona uthe kukhona iqembu elahlulwa engomeni nokwathi sekungumdlalo wamanqamu lakhala ngokuthi likhishwe ngendlela engabonakali.

“Kwasuka umsindo besolana bodwa kwaze kwaliwa kodwa kwangalimala muntu,” kuchaza wona.

Uthe umufi naye wayekhona endaweni yesigameko ngalelo langa kodwa elamula abantu ababelwa khona.

Iphoyisa elingagunyaziwe ukukhuluma nabezindaba lithe abasolwa bathi umufi wayekade eshaye omunye kwathi sebembona base beyaziphindiselela bamhlasela.

Uboshelwe ukutholakala nezimpahla ezingumkokotelo nokuzama ukugwazela amaphoyisa ukuze angambophi umlisa wase-Ethiopia.

UBOSHELWE ukutholakala nezimpahla ezingumkokotelo nokuzama ukugwazela amaphoyisa ukuze angambophi umlisa wase-Ethiopia ngoLwesihlanu.

Kuthiwa amaphoyisa ophiko lwe-Durban Corridor of the Rapid Rail Police alunywe indlebe ngomuntu obedayisa izingubo ezingumkokotelo.

Okhulumela amaphoyisa KwaZulu-Natal uMajor Thulani Zwane uthe amaphoyisa aye endaweni okugcinwa kuyona izimpahla emgwaqweni uVictoria, eThekwini athola inqwaba yamasaka agcwele izimpahla ezehlukene okubalwa kuzo, izikhwama, izingubo, izicathulo nokunye.

Lezi zimpahla bezinamagama ehlukene aziwa ukuthi amba eqolo okubalwa oLevis, Uzzi, Lacoste, Guess namanye. Kuthiwa zingabiza uR500 000.

Kuboshwe indoda yase-Ethopia eneminyaka engu-21 ngokutholwa kwalezi zimpahla eziwumkokotelo yabekwa necala lokugwazela amaphoyisa emuva kokuthi izame ukunika amaphoyisa uR1000 ukuze angayibophi – Intatheli yeSolezwe

Iminyaka engu-20 yentando yabantu ebigujwa ngo-2014 ayisho lutho kumuntu ohlala ehostela laKwaMashu.

THOKOZANI NDLOVU

IMINYAKA engu-20 yentando yabantu ebigujwa ngo-2014 ayisho lutho kumuntu ohlala ehostela laKwaMashu njengoba isimo senhlalo yakhona siya ngokuba sibi futhi lingathuthuki. Ukuze lithuthuke kungakuhle ukuthi uhulumeni aqale ngokususa imijondolo egcwele kulona ukuze afake intuthuko.

Lawa ngamazwi ashiwo nguMnuz Lawrance Khanyile (68) wakwaJanokwe, kwaSwayimane, ohlale kuleli hostela iminyaka engu-38 wabuyela ekhaya ngo-2002 ngemuva kokuphelelwa umsebenzi.

UKhanyile uthe waba ngowokuqala ukuhlala kuleli hostela ngo-1964 lisanda kwakhiwa enabanye abasebenzi ayeqashwe nabo enkampanini eyayikhanda ama-airconditioner i-Improvair.

“Ngesikhathi sifika satshelwa ukuthi ihostela laliyinkompolo (izindlu ezihlala abasebenzi) yakwaBhomane. Sasihlala sibe bane ekamelweni elilodwa. Imibhede yakhona yayakhiwe ngezitini kwabekwa ipulangwe ngaphezulu. Ngaphansi kwakuneshalofu lokufaka izimpahla,” kusho uKhanyile.

Uthe emafasiteleni babengavunyelwe ukufaka amakhethini ngenxa yokuthi babegadwe amaphoyisa ayebizwa ngamaBlack Jack okwakumele abone ngaphakathi uma ekhanyisa ngethoshi ukuze bangabafaki abesifazane ngoba babengavunyelwe ukuhlala khona.

Uthe impilo yayibukeka inzima kulona kodwa kubi kakhulu manje njengoba sekwande ubugebengu sekukhona nemijondolo.

Uthe noma babengavunyelwe abesifazane ukungena ehostela kodwa kwakunezindlu eziseduze kwalo ezazibizwa ngokuthi iko-14 owawufaka isicelo sokuthi uyohlala kuzona uma uvakashelwe unkosikazi wakho bese uvunyelwa ukuthi uhlale kuzona izinsuku ezingu-14.

“Imali yerenti eyayikhokhwa ngaleso sikhathi ibila ko-R2.00 umbhede ngamunye. Manje abantu baKwaMashu abasakhokhi ngisho isenti. Ukuqala ukushintsha kwezinto kungesikhathi sekuqala ukungena abesifazane ehostela nabo abangavunyelwanga muntu ukungena khona. Kwaqala ngokuthi izinsizwa zishushumbise izintombi zizigqokise ama-ovaloli. Kwakuthi uma zibanjiwe ziboshwe kuthi amasoka azo azikhiphe ngo-R4.00.

Ngesikhathi sekuthatha uhulumeni waKwaZulu, owawuholwa yiNkatha, uKhanyile uthe kwaqala kwabakhona amaphoyisa ayebizwa ngamaZP ayengasakwazi ukulawula isimo sasehostela.

Uthe abesifazane baqale lapho ukungena ngokukhululeka ehostela ngenxa yokuthi babevunyelwa ukuthi bangene bathenge ezitolo ezingaphakathi ehostela kwathi nabanamatafula abadayisela kuwona ukudla notshwala bavunyelwa ukuthi babe nawo ngaphakathi. Kulapho athi iningi labesifazane belidayisa ligcine selilala khona ehostela.

Uthe imidiyadiya yaqala kanjalo kwelakwaMashu ngenxa yokuthi bekuthi uma kukhona ovakashelwe yintombi ahenqe ngeshidi ukuze bangamboni uma ezijabulisa nowakwakhe yize kwakuzwakala konke ababekwenza ngemuva kweshidi.

Phambilini uthe ubugebengu babungekho ngenxa yokuthi babebumbene ehostela. Uthe kwakuthi uma kukhona obanjwa enza okuphambene nomthetho kuhlatshwe umkhosi abantu bamjahe. Ngenxa yokwanda kwabantu uthe akekho obesanaka omunye ngoba noma kukhona okhalayo egcekeni ebusuku bekuba lukhuni ukuthi uphume ngoba ubungazithola usuhlangabezana nenhlamvu.

UKhanyile uyakuphikisa ukuthi leli hostela libuswa yipolitiki wathi wubugebengu nje obulihlasele.

Nalezi zitezi esezakhiwe kulona akayiboni inqubekela phambili ngazo njengoba nabantu bengafuni nokukhokha irenti ekubeni kwayona ingenkulu. Uthe uma kungukuthi wonke amahostela afana nelaKwaMashu angancamela ukufa kunokuthi aphinde ayohlala ehostela.

Zifane nezinye izingane ezizothola izipho kubazali bazo ngalo Khisimusi izingane ezihlala emigwaqweni yeTheku.

NOKUBONGWA PHENYANE

ZIFANE nezinye izingane ezizothola izipho kubazali bazo ngalo Khisimusi izingane ezihlala emigwaqweni yeTheku ezinikezwe izipho uNgqongqoshe wokuThuthukiswa koMphakathi KwaZulu-Natal uNkk Weziwe Thusi.

Kulo mcimbi izingane ezehlukene obekukhona nezihlala emakhaya ezintandane bezizonikezwa izipho ukuze zizibone zifana nezinye izingane ezinamakhaya nabazali.

Emcimbini obusebhishi eBallito izingane ezingaphezu kuka-100 zizitike ngobumnandi obehlukene obebukhona kule ndawo.

UNondumiso Mgabhi (17) waseNkandla kodwa ohlala ekhaya lezingane ezingenabani eNgwelezane Place of Safety uthe ujabule kakhulu ngokwenzelwa umcimbi ofana nalona wathi bazizwa bebalulekile.

“Lokhu kungikhombisile ukuthi nathi sibaluleke kanjani. Ngibone uthando oluyisimanga esilukhonjiswe umama uThusi. Nami ngigqugquzelekile ukuthi ngelinye ilanga uma sengisebenza kahle ngingazinaki mina ngedwa kodwa ngikhumbule izingane ezingenabani nezingenamakhaya,” kusho uNondumiso.

Uthe ukhuliswe ugogo wakhe okwathi esegula kakhulu wathathwa omakhelwane nokwagcina ngokuthi aze aye ekhaya ahlala kulo manje.

UNondumiso uthe akabazi abazali bakhe bobabili.

UJames Ntshaba (8) waseMgungundlovu naye uthe ujabule kakhulu ukudla izinto ezimnandi akade agcina ukuzifaka emlonyeni wakhe.

“Sengifuna ukufika endlini engihlala kuyona njengoba ngingenabazali ngivule isipho sami. Kade ngidla u-pop corn engikade ngawugcina, ngijabule kakhulu,” kusho yena.

UNkk Thusi uthe bebengeke bakhohlwe izingane ezingenabani njengoba kwazona ziyikusasa emhlabeni.

“Njengoba silapha sonke sadlula kuso lesi sigaba sokuba bancane. Ukuba babengekho abantu ababesinakekela ngabe abanye bethu abazange bakhule noma ngabe bakhula kodwa baba yizingane ezingahloniphi ezihlupha umphakathi. SinguMnyango sinikeza izingane ithuba lesibili, ukuze zikhulele esandleni esinakekelayo,” kusho uNkk Thusi.

Uthe osukwini abenze ngalo umcimbi bebefuna ukwenza into abangalitholi njalo ithuba lokuyenza, okuwukutshela izingane ezihlala emgwaqweni, ezisebenza khona zizama ukuziphilisa nezingane ezihlala emakhaya okugcina izingane ukuthi uhulumeni wazo uyazithanda njengazo zonke izingane ezikhona ezweni.

“Singuhulumeni kuningi esikwenzayo ukunakekela izingane. Sixhase amakhaya ezingane angu-61, asiza izingane ezingu-3 301. Sibuye sibe namakhaya ezingane angaphansi kukahulumeni ayisikhombisa asiza izingane ezingu-453. Lokhu kuyasiza nangokuthi zingabi khona izingane ezingondingasithebeni, zigcine sezihlukumeza umphakathi. Lapha nje edolobheni laseThekwini luyinkinga kakhulu udaba lwezingane ezingondingasithebeni,” kuchaza yena okugcizelele ukuthi abakwazi ukwehluleka kulokhu bazosebenza kanzima ukuvikela izingane.

Emnyangweni wakhe uthe banezinhlelo eziningi okukhona kuzona ezokuthuthukisa izingane, ukuzifundisa imisebenzi yezandla efundelwayo ngokubambisana nama-FET College, izinhlelo zokwelashwa nokulwa nezidakamizwa nezinye.

Mancane amathemba okuthi uzoba mnandi uKhisimusi emndenini kaMnuz Derrick Sogexe waseMthatha.

ZANELE MSOMI

MANCANE amathemba okuthi uzoba mnandi uKhisimusi emndenini kaMnuz Derrick Sogexe waseMthatha obesebenzela eThekwini, obezogoduka ngamaholidi onyamalele.

USogexe (45), kuthiwa ubedayisa emgwaqweni eThekwini, umndeni wakhe waseMthatha ubulindele ukuthi uzofika ngoDisemba 24 ezodla nawo uKhisimusi. Ukuzwakala kwezindaba zokunyamalala kwakhe ngoNovemba 30 sekudunge izinhlelo zokudla uKhisimusi bendawonye.

Umkakhe, uNksz Nobomi Jozana ongunina wezingane zakhe obuyele eMthatha ngesonto eledlule, uthe sekuduma ikhanda ngoba umyeni wakhe akakaze anyamalale engashongo.

USogexe kuthiwa ubehlala yedwa emqashweni eMpola, eDassenhoek.

“Ngathola ucingo kusisi owathi uhlala eduze kwalapho bekuqashe khona uDerrick. Wangitshela ukuthi bavuke ekuseni kuvuliwe endlini yakhe engekho,” kusho yena.

UNksz Jozana uthe wagcina ukukhuluma noSogexe ngoNovemba 28 eqeda ukumtshela ukuthi umthumelele imali. Uthe konke bekusesimweni esijwayelekile futhi wakuqinisekisa ukuthi uzodla nabo uKhisimusi.

Efika eDassenhoek uNksz Jozana uthe abanye omakhelwane bakaSogexe bathe bagcina ukumbona ngoMgqibelo ephuma esontweni njengoba kuthiwa ubesonta KwaShembe.

Abanye bathi bambona ekuseni kakhulu ngosuku anyamalala ngalo bathi wayebukeka sengathi uphazamisekile emqondweni.

USogexe okuthiwa unezingane ezine nazo abezithembise ukuzibona ngoKhisimusi kuthiwa kusukela enyamalele akatholakali ocingweni lwakhe oluvaliwe.

“Ngisola ukuthi kukhona okwenzekile kuyena ngoba akufani naye ukuvele anyamalale. Akabhemi futhi akaphuzi, uwumuntu ozikhonzele isonto,” kusho uNksz Jozana.

Uthe sebebikile emaphoyiseni aseMpola kodwa akukho mkhondo osavelile. Nasendlini yakhe akukho okusolisayo njengoba bethi konke bakufice kusesimweni.

Umndeni wakhe awukabheki emakhazeni nasezibhedlela ngoba usanethemba lokuthi uzombona eqhamuka uSogexe.

Amaphoyisa asaphenya ngokunyamalala kwakhe kodwa akukatholakali mkhondo.

Bangase bagcine bewudlele etendeni uKhisimusi abantu abakhishwe emaflethini eNewlands West.

BONISWA MOHALE

BANGASE bagcine bewudlele etendeni uKhisimusi abantu abakhishwe emaflethini kasomabhizinisi waseThekwini uMnuz Jay Singh, akuCastle Hill Drive, eNewlands West, eThekwini.

Kusukela ngoLwesithathu imindeni engu-96 ilale emgwaqweni ikhala ngokuthi kayazi izoshonaphi emuva kokukhishwa ngendluzula emaflethini.

Izolo uNksz Bandile Mdlalose wenhlangano esiza umphakathi iCommunity Justice Movement (CJM), uthe abantu bazohlaliswa etendeni eliseduze kwendawo kadokotela iLindwes eNewlands West kanti bathole ukuthi yidlanzana elihlezi kuleli tende abanye basaqhubeka nokuhlala ngaphandle bathi bafuna ukubuyiselwa emaflethini.

“NgoLwesine sihlangane naboPhiko lwezokuHlaliswa kwaBantu basinika itende. Kukhona abangenile kodwa eminye imindeni isaqhinqe emgwaqweni njengoba nabona ukuthi sekukhona abalandela i-EFF abathe ngeke baye etendeni bafuna ukufakwa emaflethini,” kusho uNksz Mdlalose.

NgoLwesine abantu bebehleli ngaphansi kwezihlahla, ngisho nezingane ezinamasonto ayisithupha nezalukazi ezindala begadwe ngamaphoyisa elangeni elalikhipha umkhovu etsheni.

UNksz Mdlalose,uthe, itende lizoma uma kukhona abahleli, lisuswe uma kungangeni muntu kulo.

Uphethe ngokuthi ngeke bahlale etendeni isikhathi eside kodwa abophiko lwezokuHlaliswa kwaBantu bazoqhubeka nokubafunela indawo lapho bezohlala khona.

Ikomiti lasemaflethini lisole uNksz Mdlalose ngokungabanakekeli abampofu limsola ngokuchema nekhansela nomasipala ovumele ukuba bakhishwe.

Ilungu le-EFF ePhalamende uNkk Sibongile Khawula likhale ngokuthi akekho umuntu waseNingizimu Afrika okumele akhishwe eflethini esikhathini samanje engahlinzekwanga ngophahla.

“Umthetho ukubeka kucace ukuthi awukwazi ukukhipha umuntu lapho ehlala khona umbeke ngaphandle. Mhlinzeke ngendawo yokuhlala. Okwenzeka lapha asikwazi,’’ kusho uNkk Khawula.

Kuxwayiswe abaholi be-ANC KwaZulu-Natal ukuba bagweme ukuxoveka kwenhlangano.

CELANI SIKHAKHANE

KUXWAYISWE abaholi be-ANC KwaZulu-Natal ukuba bagweme ukuxoveka kwenhlangano ngenxa yeqeqebana eseliqalile ukubahlukanisa ngokuthi ubani okufanele akhethelwe ukuhola uKhongolose engqungqutheleni yesifundazwe ezoba ngonyaka ozayo.

UNkk Edna Molewa oyilungu lesigungu esiphezulu ku-ANC obejutshwe esifundeni Inkosi Bhambatha ukusho lokhu engqungqutheleni yokukhetha ubuholi ebiseDundee ngempelasonto lapho enxuse ukuthi wonke amalungu angayivumeli indaba yamakhempu aseqalile ukuqubuka ahlukanisa le nhlangano esifundazweni.

“Nobhala noSihlalo siyocela ukuthi ningalivumeli leli qeqebana okuthiwa seliqalile ukuxoxa indaba yobuholi ukuthi linixove. Kumele nibumbane ukuze i-ANC ikhule KwaZulu-Natal, siyazi ukuthi niyisifundazwe esisebenza ngokuzikhandla. Njengamalungu e-ANC asingavumi ukuhlukaniswa abantu kodwa kufanele sibe munye silwe noqhekeko. Asisho ukuthi kubi ukuhlukana ngemibono kodwa asiqikelele ukuthi asikhiphelani ngaphandle kube khona abangasatshelwa uma kunemihlangano bashaywe ngesithende,” kusho uNkk Molewa.

UZikalala uthe akukho ukungezwani okukhona phakathi kwakhe noMnuz Senzo Mchunu obuye abenguNdunankulu waseKZN.

“Siyafonelana sikhulume ngendlela esingaqinisa ngayo umsebenzi we-ANC esifundazweni. Asiyingeni lena yamaqembu qembu okuthiwa asekhona kodwa sigxile ekusebenzeleni uKhongolose,” kusho uZikalala.

Uthe njengoba kuzoba nengqungquthela ngonyaka ozayo ezoba ngoJuni 26 bazobe bengagxilile endabeni yobuholi kodwa okubalulekile kuyobe kukhulunywa ngendlela yokusebenza kwe-ANC, ukubuyekezwa kwemigomo yayo ukubheka ukuthi ngabe isahambisana yini nokufiswa yinhlangano.

Uthe udaba lokukhetha ubuholi luzobe luyinto nje eyokwenzeka engqungqutheleni kodwa luzobe lungewona umongo wayo.

Ngesonto eledlule kuvele ukuthi sekukhona izinhlaka ezithile okubalwa i-ANCWL, ANCYL eseziqale umkhankaso wokuthi kuchithwe uMchunu ukuze kukhethwe uZikalala njengosihlalo.

UZikalala ukhale ngokuthi kukhona abantu ku-ANC asebengenelwe umkhuba wokuba osomathuba baphushe abantu abathile ukuthi baqokelwe ezikhundleni bese becasha ngegama lokuthi bavikela umbutho ngokufuna amagama alabo baholi.

Uthe ubumbano ababe nalo KwaZulu-Natal luyikhulisile inhlangano waxwayisa ngokuthi akumele nangengozi bafane nesifundazwe iWestern Cape lapho amalungu akhona ebeke phambili izikhundla kwaba noqhekeko bagcina sebehlulwa ukuphatha isifundazwe sawela ku-DA.

Kushone umama nengane yakhe enezinyanga eziyisithupha abeyibelethe emhlane emuva kokushaywa ngumbani.

BAWINILE NGCOBO

KUSHONE umama nengane yakhe enezinyanga eziyisithupha abeyibelethe emhlane eMphondi, eNquthu, ngempelasonto emuva kokushaywa ngumbani.

Kulesi sigameko esenzeke ngoMgqibelo ebusuku kuthiwa kulimale umyeni walo wesifazane nenye ingane yabo eneminyaka emine abeyiphethe beshaywa ngumbani.

Kushone uNkk Nokubongwa Sithole (24) nengane u-Ayabongwa Shabangu.

Ngokuthola kweSolezwe lo mndeni ubuzowela umgwaqo ongenela ekhaya ngesikhathi kushaya umbani kwadlula emhlabeni uNkk Sithole no-Ayabongwa.

Ubaba nenye ingane baphuthunyiswe esibhedlela eNquthu.

Ikhansela lendawo uMnuz Mthandeni Shabangu lithe liwutholile umyalezo ngalesi sigameko kwasho ukuthi lisengqungqutheleni.

Lithe lithumele ithimba lezibhicongo eliyobheka umonakalo nokuthi yini okungalekelelwa ngayo.

“Nami uma ngisuka la ngizoya khona,” kusho uShabangu.

Kwesinye isigameko esifuze lesi esenzeke ngawo uMgqibelo eNquthu kuthiwa kulimale abantu abathathu beshaywa wumbani kuduma izulu.

Owezimo eziphuthumayo uRobert McKenzie uthe phambilini ngoMgqibelo owesimame oneminyaka engu-28, umfana oneminyaka engu-12 nentombazane eneminyaka emihlanu balimale kanzima beshaywa ngumbani kuyo le ndawo.

Uthe kuzo zombili lezi zigameko akwaziwa ukuthi umbani ubuseduze kangakanani ngesikhathi ushaya abalimele.

Abalimele bayiswe esibhedlela eNquthu.

Isifundazwe iKwaZulu-Natal nakwezinye izingxenye zezwe kujwayelekile ukuthi njalo ngalesi sikhathi sonyaka kube nezigameko zokushona nokulimala kwabantu ngenxa yesimo sezulu esingasihle.

Okhulumela uMnyango wezokuBusa ngokuBambisana neziNdaba zoMdabu KwaZulu-Natal, uMnuz Lennox Mabaso, uthe uNgqongqoshe walo mnyango uNkk Nomusa Dube-Ncube usexwayise amalungu omphakathi ukuthi ahlale eqaphile uma isimo sezulu singesihle.

“Sekuyisikhathi sonyaka lapho sidinga khona ukuthi siqaphele ngenxa yesimo sezulu. Siyazwelana nemindeni ethintekayo ngalesi sigameko kanti siyethembisa ukuthi uphiko lwezinhlekelele lumi ngomumo ukuthi lulekelele lapho kudingeka khona,” kusho uNkk Dube-Ncube.

Usethole ukusizakala owesifazane wakwa R eMlazi ophila nesifo sohlangothi ongenaye umuntu omnakekelayo yize enazo izingane.

ZAMANDOSI CELE

USETHOLE ukusizakala owesifazane wakwa R eMlazi ophila nesifo sohlangothi ongenaye umuntu omnakekelayo yize enazo izingane. Udaba ngosizi lwakhe oluphume kwiSolezwe ngeledlule.

Leli phephandaba libike ngoNksz Duduzile Myeza (59) osephila ngokuphakelwa omakhelwane emuva kokuthi eshaywe isifo sohlangothi ngo 2009 ngesikhathi kunesiteleka sodokotela.

Udaba lwakhe luthinte izikhungo ezinakekela umphakathi ezimvakashele ekhaya ziyohlola isimo sakhe.

UMnuz Abelo Dlamini ongumqondisi wohlelo iSukuma Sakhe eLamontville naseMlazi osebenza eMnyangweni wezokuBusa ngokuBambisana eKZN nabaphuma eMnyangweni wezeMpilo bahambele emzini kaNksz Myeza.

“Sidingida izinkinga zomphakathi futhi sihamba sibheka ukuthi abantu baphila kanjani,” kusho uDlamini.

Uthe baphatheke kabi befunda udaba lukaNksz Myeza ephepheni bethola nokuthi kunodaba olufana nalolu kwi-ward yabo.

Ngesikhathi bevakashile kuvele ukuthi uNksz Myeza wasizakala phambilini lapho inkampani uHirsch’s yamakhela indlu eminyankeni emithathu edlule.

Bathe bazosebenzisana nomndeni ukuqiniseka ukuthi uNksz Myeza uyanakekelwa bathi bazoxhumana nosonhlalakahle ukuze abhalisele impesheni aqale ukuhola.

Baphinde bathi inkinga edale ukuthi uNksz Myeza angabi nonompilo omsizayo wukuthi owayesebenzela endaweni phambilini sewashiya.

“Siyanxusa emndenini ukuthi umnakekele uNksz Myeza, umthande, bamgeze bamnikeze nokudla. Iqiniso lithi ngeke kuze kufike unompilo ezonakekela ugogo,” kusho uNkk Thoko Blose ophuma eMnyangweni wezeMpilo.

Bathe bazothumela unompilo ovela enhlanganweni yezempilo esiza abantu iMaskey Health Services yakhona esigcemeni sakwa-R futhi bazozama ukuthi uNksz Myeza athunyelwe esibhedlela lapho ezohlolwa aphinde abonane nodokotela wamathambo.

UNkk Lucia Memela ongumakhelwane kaNksz Myeza futhi owathinta Isolezwe ngesimo sikaNksz Myeza ubonge kakhulu uMdali ngosekwenzekile athe kuyinto ayeyikhulekela.

“Ngiyabonga ukuthi udaba senilusukumele futhi naye ngiyambongela,” kusho uNkk Memela.

Njengoba kusondela usuku lukaKhisimusi eminye imindeni ihlezi emanzini ngenxa yezigameko zokubulawa kwezingane ngabazali.

BAWINILE NGCOBO

NJENGOBA kusondela usuku lukaKhisimusi eminye imindeni ihlezi emanzini ngenxa yezigameko zokubulawa kwezingane ngabazali emuva kokuxabana nabasuke bethandana nabo.

Okugqamayo ngalezi zigameko ukuthi unina wengane usuke exabene noyise wayo bese edubela kuyona noma kube uyise oxabana nonina bese edubela kuyo.

NgeSonto eledlule Isolezwe libike ngokubulawa kwengane yomfana eneminyaka eyisithupha okuthiwa iphonswe ebhulohweni ngunina okuthiwa uthe uhluphekisa uyise wayo ngalesi senzo sakhe.

Isidumbu sengane satholwa sihlukene nekhanda.

Unina waboshwa wabekwa icala lokubulala kanti kulindeleke ukuthi acele ibheyili namuhla eNkantolo yeMantshi eCamperdown.

Ngesonto eledlule kuvele indoda eNkantolo yeMantshi eBabanango ngecala lokubhaxabula indodana yayo eneminyaka emine yagcina ngokushona emuva kokuthi ixabane nonina wayo.

Khonamanjalo ibanjwe isibhacile indoda esolwa ngokusacaza odongeni ngekhanda ingane yayo enezinyanga ezine emuva kwengxabano nonina eMapulangweni, eNanda.

Le ndoda eneminyaka engu-25 kuthiwa iboshwe isibhace eSakhakhanye, KwaDukuza, ngoLwesine emuva kokuthi ibalekile lapho kwenzeke khona isigameko.

Kuthiwa iboshwe nomunye oneminyaka engu-35 okuthiwa uboshelwe ukuvimbela ukusebenza kwengalo yomthetho ngoba wayengafuni ukukhipha umsolwa ngesikhathi amaphoyisa esefikile ezombopha.

Ngokuthola kweSolezwe ngemithombo kuthiwa umsolwa wayesola unina wengane yakhe ngokuthi sekukhona enye indoda ayiqomile wakhiphela isibhongo enganeni.

Okhulumela amaphoyisa KwaZulu-Natal uMajor Thulani Zwane, uthe indoda kuthiwa ixabane nentombi yayo ezintatha ngoLwesithathu yathatha ingane yabo enezinyanga ezine ebilele yayishaya ngekhanda odongeni.

Ingane kuthiwa yalimala kanzima ekhanda yabe isiphuthunyiswa ekliniki lapho ifike yashonela khona.

UZwane uthe emuva kwalesi sigameko umsolwa ubalekile endaweni.

Amaphoyisa aseNanda avule icala lokubulala kanti ngosizo lophiko lwe-Provincial Tracking Unit, Umhlali K9 belekelelwa abe-Border Security KSIA nePML Unit bamthole bambopha umsolwa eseKwaDukuza wabekwa icala lokubulala.

Umsolwa nalowo owayemfihla bazovela eNkantolo ngala macala namuhla.

Udidekile umndeni wentombazane yaseHammarsdale osekuphele amasonto amathathu inyamalele ekhaya.

LUNGI LANGA

UDIDEKILE umndeni wentombazane (15) yaseHammarsdale osekuphele amasonto amathathu inyamalele ekhaya emuva kokuba ihambe ithi iyovakashela unina ebizodla naye uKhisimusi.

Umndeni kaSamukelisiwe Mncwabe uxakekile njengoba engabuyi emuva kokuhamba kwakhe ekuqaleni kukaDisemba ethi uvakashela unina khona eHammarsdale.

Unina uNksz Khumbuzile Mncwabe (35) waseMlaba Village, uthe usehambe yonke indawo ezama ukuthola umkhondo wendodakazi yakhe.

“Sengizame bonke abangani bakhe bonke bathi abamazi. Uma sifonela ucingo lwakhe lungena ku-voicemail. Nabangani bakhe basesikoleni bathi bamgcina ngesikhathi kuvalwa izikole abakaze baphinde bambone emuva kwalokho,” kusho uNksz Mncwabe.

Uthe indodakazi yakhe ihlala nogogo wayo komazakhele eHammarsdale. Ihambe ekhaya ithi izovakashela yena yangafika.

“Ugogo wangifonela kunguLwesine ntambama nokuwusuku eyayisuke ngalo izovakasha. Wayebuza ukuthi ngabe ufikile yini kwacaca ukuthi ubengakafiki ekhaya. Ngibe sengiqala lapho ngiba nokukhathazeka,” kusho uNksz Mncwabe.

Uthe uSamkelisiwe ubenawo umkhuba wokuhamba ayohlala nabangani bakhe kodwa lokhu kuyaye kube yizinsuku ezimbili noma olulodwa.

Lokhu kwenze ukuthi angasheshe aye emaphoyiseni ngoba ezitshela ukuthi bazombona esememfuka ephuma kubangani.

“Kuthe uma kuphela usuku engafiki futhi sithi noma sibuza kubangani bakhe singamtholi ngabona kungcono ngiye emaphoyiseni. Kuze kube manje akekho kubona othi useke wambona. Naloyo othi ugcine ukumbona uthi umbone ngale mpelasonto anyamalale ngayo,” kuchaza uNksz Mncwabe.

Uthe akakholwa ukuthi indodakazi yakhe inyamalele ngoba ibingafuni ukuvakasha la ahlala khona ngoba ngesikhathi ihamba ngamaholide kaSepthemba yayishilo ukuthi izofika ngawaDisemba.

Beyilokhu isho futhi ukuthi izofika nini ngakho kuyamxaka uma sekuphele izinsuku eziningi kangaka ingatholakali.

Lolu daba lubikiwe emaphoyiseni aseHammarsdale ladluliselwa esiteshini saseMpumalanga.

UMengameliI jacob Zuma ukhohlise abantu baseNingizimu Afrika mayelana noR246 million owasetshenziswa emzini wakhe oseNkandla, usho kanje uMnuz Mmusi Maimane.

SAPA

UMENGAMELI jacob Zuma ukhohlise abantu baseNingizimu Afrika mayelana noR246 million owasetshenziswa emzini wakhe oseNkandla, usho kanje umholi weDA ePhalamende uMnuz Mmusi Maimane izolo.

“Izolo ebusuku (esho ngeSonto) ngesikhathi exoxa nabezindaba beSABC, uMengameli Zuma ukhohlise isizwe ngesikhathi ethi “akukho okubi akwenza’’ mayelana noR246m wabakhokhi bentela owasetshenziswa emzini wakhe eNkandla,” esho esitatimendeni.

Uthe uZuma uphinde wabeka ngendlela engeyona umbiko woMvikeli woMphakathi u-Advocate Thuli Madonsela.

“Izigidi zamarandi ezamoshwa zisetshenziselwa indoda eyodwa. Ngakho-ke ukuthi umengameli akunekele izwe ukuthi akukho okubi akwenzile kuwukungawenzi ngendlela umsebenzi wakhe wokuvikela imali yabakhokhi bentela nokulandela izimiso zoMbuso,” kusho uMaimane.

UZuma ukusho lokhu kwinkulumongxoxo eqoshiwe eyethulwe wuSABC.

UMaimane uthe kubonakala sengathi umengameli akazange awufunde umbiko ka-Adv Madonsela, “oveza ngokusobala ukuthi wahlomula kungafanele ngezinto ezafakwa emzini wakhe ezingahlangene nezokuphepha.”

Umbiko woMvikeli woMphakathi uphinde uveze ukuthi uZuma kufanele akhokhe “imali ethile eyingxenye yemali eyasetshenziswa kulungiswa umuzi wakhe,” angakayikhokhi.

“Njengoba iningi labantu baseNingizimu Afrika lazi, umbiko woMvikeli woMphakathi uphinde ubeke ukuthi uZuma “ngaphandle kokuvuma ngokucacile kodwa wakwamukela’’ ukulungiswa komuzi wakhe okungahlangene nokuthuthukiswa kwezokuphepha, nokuthi nguye owaqoka usonkontileka oyedwa. Lokho kuchaza ukuthi naye uyathinteka ekwenzeni okungalungile.”

Umnyango wezokuHlaliswa kwaBantu uluhoxisile usizo lwetende obekuzokhosela kulo imindeni ekhishwe ngoshova emaflethini eNewlands.

BONISWA MOHALE

UMNYANGO wezokuHlaliswa kwaBantu KwaZulu-Natal uluhoxisile usizo lwetende obekuzokhosela kulo imindeni ekhishwe ngoshova emaflethini kasomabhizinisi waseThekwini uMnuz Jay Singh ase-Castle Hill, eNewlands.

Izolo Isolezwe lifice amadoda eqoqa izibonda elayisha itende elaligxunyekwe ngoLwesihlanu ukuze abantu ababekhishwe emaflethini abese bewaqambe ngokuthi yiMandela bakhosele kulo.

Imindeni emine ebihlala kulo ibimi eduze kwempahla izikhalela ngokuthi ayazi izoshonaphi njengoba seyiphucwe itende.

Ikhansela lendawo, uMnuz Simphiwe Lubede, lithe kuthathwe isinqumo sokuthi itende libuyele emuva ngoba bengebaningi abantu abahlala kulo.

“Itende belizokhoselisa bonke abantu abakhishwe emaflethini kodwa sithole ukuthi yimindeni emine kuphela ehlala kulona. Abanye abafuni ukuhlala kulona yingakho silibuyisela emuva,” kusho uLubede.

UMnuz Nkosenye Ntanda (62), obehlala etendeni uthe akazi ukuthi uzoyaphi ngoKhisimusi ngoba isizathu sokuthi abe kwabahlala ngenkani emaflethini akwaSingh wukuthi akanayo indawo yokuhlala.

“Nganginomuzi eMatikwe washiswa abantu. Kade ngangigqigqa eMnyangweni wezokuHlaliswa kwaBantu kodwa kungalungi belokhu bethi angithole umuzi odayisayo bona bazongikhokhela kodwa namanje abakaze bangisize. Kuyacaca ukuthi uKhisimusi sizowudlela ehlane ngoba asinayo enye indawo. Kubuhlungu ukuthi siphucwe itende ebesilisebenzisa,” kusho uNtanda.

UMnuz Mbulelo Baloyi, okhulumela uNgqongqoshe woMnyango wezokuHlaliswa kwaBantu KwaZulu-Natal, uthe itende lithathwe emuva kokuthi kungafikanga isibalo esanele sabadinga indawo yokuhlala.

“Sathola ukuthi ingu-17 imindeni eswele indawo yokuhlala, siphoxekile uma sizwa kuthiwa mine kuphela ehleli etendeni. Sibone kungcono ukuba silibuyisele emuva ngoba siyalikhokhela usuku nosuku uma limile. Akukuhle ukumosha imali yabakhokhi bentela sisiza abantu abangasebenzisani nathi uma sizama usizo,” kusho uBaloyi.

Isolezwe libe selibuza uNksz Bandile Mdlalose wenhlangano esiza umphakathi i-Community Justice Movement (CJM) ukuthi bazoyaphi abantu abebehlala etendeni wathi usazokhuluma naboMnyango wezokuHlaliswa kwaBantu abheke nomfundisi wesonto lendawo ukuthi ngeke abacuphise esontweni ngesikhathi bezanyelwa indawo yokuhlala.

UNksz Fakazile Ngema (40) obegone indodakazi yakhe uThandeka (3) ukhale esifanayo ethi akazi uzoshonaphi ngoba akanamuva akanaphambili kuyambhedela nje.

“Ekhaya abazali sebashona, ngingowaseShowe, ngafika eThekwini ngizobheka amatoho. Umuntu ebengizwana naye ngihlalisene naye sahlukana ngenxa yezinkinga eziba khona othandweni. Ngagcina sengihlala eMandela (emaflethini). Angazi sizoshonaphi ngoba nasetohweni angikaze ngilubhade selokhu kusuke lesi sidumo.

“Ngihola imali engaphansi kuka-R2 000 angikwazi ukuthenga umuzi noma ngirente ngondle nezingane. Akusikhona ukuthi ngikhetha ukuzala ngibe ngingenayo indawo yokuhlala kodwa kuyenzeka nje ukuthi izingane zibe khona ungazimisele,” kusho uNksz Ngema.

UNksz Sithembile Makhoba, onengane enamasonto ayisithupha u-Asibonge, uthe basenkingeni njengoba bengenandawo yokuhlala. Uthe waxoshwa kubo, akakwazi kanti uzokhosela etendeni elixhunywe ngabahlali basemjondolo eduze kwamaflethi kaSingh.

“Sicela indawo yokuhlala, siphelele lapha akukho la singaya khona. Besihleli emgwaqweni emuva kokukhishwa ngo-Lwesihlanu. Kufike abe-EFF bezobheka isimo sethu basipha nokudla. Ikhansela noBandile abakaze basisize kunalokho sifunda emaphepheni bekhuluma ngathi. Sisizwe yinhlangano Abahlali baseMjondolo esakhele amatende amabili yasihlinzeka nangetho-yilethi. Singajabula uma sithola indawo yokuhlala lapho sizoba namanzi ngoba asikwazi nokuya ematohweni njengoba singena-manzi okugeza,” kusho uNksz Makhoba.

Imile impilo yomshayeli wetekisi owathweswa icala lokushayela itekisi engenayo imvume yokuthutha umphakathi.

BONISWA MOHALE

IMILE impilo yomshayeli wetekisi owathweswa icala lokushayela itekisi engenayo imvume yokuthutha umphakathi okuthiwa lizoze lisulwe emuva kweminyaka engu-10.

UMnuz Sanda Nxumalo (26) waboshwa ngamaphoyisa kashanela ngo-2012 kanti kuze kube manje akakwazi ukuthola incwadi emgunyaza ukuba ashayele izimoto ezithutha umphakathi noma omunye umsebenzi ngenxa yerekhodi alithola eshayela itekisi.

“Ngo-2012 ngaboshwa ngamaphoyisa kashanela angifuna ilayisensi, i-PDP ne-Operating Permit. Athola ukuthi nginakho okudingeka kimina kodwa i-Operating Permit yayingekho, ngathi uma ngifonela umnikazi wemoto wangitshela ukuthi ayikho. Ngathathwa ngaya eMpangeni kwathi ngakusasa sayobingelela iMantshi kodwa kwathathwa abanikazi bezimoto thina sadedelwa. Ngithe uma sengiyofaka isicelo se-PDP ngathola ukuthi angikwazi ukuyithola ngoba nginecala kokushayela imoto engena-Operating Permit,” kusho uNxumalo.

Uthe wabhalela eMnyangweni wezokuThutha echaza isimo sakhe ngoba ayeboshwe nabo bayaqhubeka nempilo amacala ezimoto athwalwa abanikazi bazo kodwa yena ubhekene necala ekubeni engenatekisi.

Uthe kusebenza yena yedwa kubo futhi akazi uzokwenzanjani njengoba engawutholi umsebenzi ngenxa yecala le-Operating Permit.

“Ngicela uNgqongqoshe wezokuThutha uBaba uMacingwane angisize ngoba icala lokuthi imoto ayinayo i-Operating Permit akulona elami ngelomnikazi wayo. Mina impilo yami imile ngibe ngingenatekisi ngingenamoto. Kufanele ngisebenzele umndeni wasekhaya nezingane zami eziyisithupha kodwa angikwazi. Ngiyawabamba amatoho kodwa nami ngiyafisa ukuthola umsebenzi engizobhaliswa kuwona. Wunyaka wesibili ngibhekene nale nkinga,” kusho uNxumalo.

UMnuz Mfanakayise Nxumalo ongubaba omncane kaSanda uthe luyabaxaka udaba lwakhe ngoba ngokujwayelekile ngabanikazi bamatekisi abathwala amacala okusebenzisa izimoto ngaphandle kwemvume hhayi umshayeli.

Uthe sebezamile ukuluxazulula kodwa kunhlanga zimuka nomoya wanxusa uNgqongqoshe wezokuThutha KwaZulu-Natal uMnuz Willies Mchunu ukuba angenelele.

UMnuz Kwanele Ncalane okhulumela uNgqongqoshe wezokuThutha KwaZulu-Natal uthe bazoluhlolisisa lolu daba kwazise amaphoyisa kashanela agcina ngokubopha umuntu bese kuba yinkantolo emthola enecala.

Uthathe imininingwane kaNxumalo ukuze enze uphenyo olunzulu ngodaba lwakhe.