Ludla lubi udlame ejele laseWestville uma kuqhathaniswa namanye amajele aseNingizimu Afrika.

BAWINILE NGCOBO

LUDLA lubi udlame ejele laseWestville uma kuqhathaniswa namanye amajele aseNingizimu Afrika. Iphini likaNgqongqoshe wezoBulungiswa namaJele uMnuz Thabang Makwetla, ngeledlule ngesikhathi lihambele leli jele, lithe izinga lodlame kulona liphezulu kunawo wonke amajele.

“Angaphezulu kuka-300 amacala okushayana kweziboshwa zizodwa ngonyaka kanti angaphezulu kuka-200 awokushayana kweziboshwa nojele,” kusho uMakwetla.

Uthe bavumelene ukuthi lena yinselelo okumele kubhekanWe nayo ngqo.

“Sizobheka izindlela zokubhekana nalolu dlame okubalwa ukubheka isibalo sabasebenzi uma uqhathanisa nesibalo sabantu ababoshiwe okumele babagade,” kusho uMakwetla.

Uthe leli jele libalwa namahlanu amakhulu kuleli kanti lineziboshwa eziningi.

Uthe linerekhodi elihle lokungabi nesisodwa isiboshwa eseqile.

UMakwetla obuye wahambela ijele iMbongweni, eKokstad okugcinwa kulo iziboshwa eziyingozi okubalwa o-Ananius Mathe noThozamile Taki, uthe bagculisekile ngaleli jele.

“Sigculisekile ngezokuphepha kuleli jele ingesakhiwo nangabasebenzi bakhona. Isakhiwo nezokuphepha zingagculisa kodwa uma abasebenzi bengenakho ukuzinikela ngeke kwenze mehluko,” kusho uMakwetla.

Uthe abasebenzi bakhona banengcindezi ukwedlula abanye abasebenza kwamanye amajele ngenxa yokuthi bagada abantu abayingozi.

Ekhuluma ngokugqoza kokuphothulwa kwezicelo zikashwele, uthe le ngqinamba ikhona kulo lonke leli ngoba kunenkinga ngamalungu ebhodi likashwele.

Asale edidekile amalungu esiShayamthetho saseKZN ngesinyathelo seqembu le-DA.

INTATHELI YESOLEZWE

ASALE edidekile amalungu esiShayamthetho saKwaZulu-Natal ngoLwesihlanu ngesinyathelo seqembu leDemocratic Alliance (da) sokuphuma eceleni liphikisa ukuba kubekwe eceleni imali engu-R85 million ezothuthukisa ingqalasizinda yamadolobha amancane esifundazweni.

Phakathi kwezinto okuhlelwe ukuba zenziwe kula madolobha ukufakwa kwengqalasizinda kagesi nokubhekelwa kwentuthuko yawo.

AboMnyango wezokuBusa ngokuBambisana neziNdaba zoMdabu KwaZulu-Natal bayigxekile iDA ngokuphuma eceleni njengojosaka ngesikhathi amalungu esiShayamthetho evotela ukuba kuphasiswe isabelo mali esizobhekana nokuhlinzekwa kwala madolobha ngemali. Lokhu kwenzeke ngesikhathi isiShayamthetho sicubungula umthethosivivinywa ka 2014 obizwa nge-Adjustment Bill obekwe ezithebeni ngumgcinimafa.

UMnyango wezokuBusa ngokuBambisana neziNdaba zoMdabu ubeke eceleni imali engu-R85 million ezobhekana nohlelo olubizwa ngeSmall Town Rehabilitation Programme.

Le mali iphuma kuMgcinimafa esifundazweni kanti inhloso enkulu wukubheka ukuthi zingehliswa kanjani izindleko zikahulumeni. Noma lo mthethosivivinywa ugcine uphasile kodwa iDA ibishaya phansi ngonyawo ingahambhisani nawo kodwa yagcina ihluliwe okhethweni.

“Indlela iDA eziphathe ngayo ishayelela isipikili kulokhu ebesihlale sikusho ukuthi iDA iyaphikisana nentuthuko yabantu futhi iyisitha soqobo senqubekela phambili. Into abayenzayo iyaphikisana nalokho abakushumayela emphakathini njengoba bemelene nazo zonke izinto ngenhloso yokubambezela izinhlelo okuhloswe ngazo ukunyusa umnotho ezindaweni zomphakathi emadolobheni asemakhaya,” kusho uNgqongqoshe walo Mnyango uNkk Nomusa Dube-Ncube.

Uthe ubuxoki beDA buvele obala eveza ukuthi yilona leli qembu elihlale ligxeka uhulumeni ngokuthi awenzi okwanele ukuthuthukisa amadolobha amancane noma ukuhambisa izidingo ezifana namanzi nogesi kodwa ngakolunye uhlangothi iyona futhi ephikisa izinhlelo zikahulumeni zokwenza lokhu.

“Le mali okwengezwe ngayo, iwubufakazi bempumelelo yangaphambilini yezinhlelo zethu, iSmall Town Rehabilitation Programme esezishintshe inqwaba yamadolobha KwaZulu-Natal eminya-keni edlule kwadaleka namathuba emisebenzi kubantu abebedonsa kanzima kwalethwa nengqalasizinda,” kuphawula uDube-Ncube.

Umholi weDA eKZN noyilungu lesiShayamthetho uMnuz Sizwe Mchunu uthe esikhundleni sokuchitha imali engu-R85 million kulungiswa “ingqalasizinda engekho”, babona ukuthi uhulumeni wesifundazwe kumele alwele ukuthi kutholakale imali yokwakha ingqalasizinda entsha.

“Thina sithi kumele bakhankasele ukutholakala kwengqalasiznda entsha komasipala.

“Siphikisana nalokhu okwenziwayo ngesizathu sokuthi kumele kuqalwe ngokubalulekile kuqala, kwakhiwe isisekelo sakho,” kusho uMchunu.

Inkampani usihlalo wayo okungumsunguli weJacob Zuma Trust Fund uMnuz Don Mkhwanazi ihlomule ngethenda yomsebenzi ka-R406 million.

INKAMPANI usihlalo wayo okungumsunguli weJacob Zuma Trust Fund uMnuz Don Mkhwanazi ihlomule ngethenda yomsebenzi ka-R406 million.

UMkhwanazi ukuphikile ukuthi ubudlelwano bakhe noMengameli Jacob Zuma kube nawo umthelela ekutholeni lo msebenzi wezigidi.

“UMengameli akawakhiphi amathenda,” kusho uMkhwanazi etshela iphephandaba langeSonto iSunday Times okuyilo eshicilele lolu daba kuqala.

Uthe noma ngabo ibuphi ubudlelwano anabo noMengameli ngeke bukwazi ukuxhunyaniswa nomsebenzi nohlelo lonke lokukhishwa kwamathenda. Lo msebenzi otholwe yile nkampani uthinta ezombutho wasemanzini wakuleli.

Iphephandaba libike ukuthi uMnyango wezokuVikela ukhiphele ngaphandle umsebenzi wokunakekelwa kwemikhumbi yawo enkampanini iSouthern African Shipyards, okuyinkampani ezimele uMkhwanazi ongomunye wabaphathi bayo.

Le nkampani isithole umsebenzi wezigidi eminyekeni emithathu edlule.

Ngo-Agasti iSouthern African Shipyards yanikwa umsebenzi ka-R1.4 billion uTransnet ukuze bakhelwe imikhumbi ethutha impahla olwandle.

UMkhwanazi, onamasheya kule nkampani kusuka ngo-2006 uke waba nguMqondisi kwaTransnet phakathi kuka 2010 no-2012.

Uthe umsebenzi wokwakha imikhumbi wakhishwa eminyakeni emibili nengxenye yena esephumile ekubeni uMqondisi kwaTransnet. - Sapa

Uzokwazi ngekusasa lakhe ngoLwesithathu uMnuz Vincent Mdunge.

MLUNGISI GUMEDE

UZOKWAZI ngekusasa lakhe ngoLwesithathu lowo obeyisikhulu samaphoyisa KwaZulu-Natal uMnuz Vincent Mdunge, ngemuva kokulahlwa ngamacala amabili okukhwabanisa nelilodwa lokukokotela isitifiketi sakhe sika-matric.

Imantshi yaseNkantolo yesifunda saseThekwini uNkk Thandeka Fikeni, kulindeleke ukuba ikhiphe isigwebo mayelana namacala alahle uMdunge ngenyanga edlule.

Indodakazi kaMdunge, yahluleka wukuzibamba yasikhihla isililo ngemuva kokuthi uyise elahlwa ngamacala.

Ngesikhathi indodakazi ikhala, uMdunge wabonakala eziqinisa ebhokisini ngemuva kokukhishwa kwesinqumo ecaleni lakhe lenkohlakalo nokukhwabanisa.

UMdunge ubebhekene namacala amahlanu, ulahlwe ngamabili okukhwabanisa nelilodwa lokukokotela isitifiketi sakhe sika-matric.

UNkk Fikeni wathi wanelisekile ngobufakazi obethulwe wumbuso mayelana nesitifiketi sikaMdunge.

Izikhulu ezimbili zoMnyango wezeMfundo zethule ubufakazi obuveza ukuthi isitifiketi sikaMdunge sika-matric singumbombayi.

Zithe inombolo esesitifiketini sikaMdunge iqala ngo-83, hhayi u-85, okuwunyaka abhala ngawo u-matric. Kodwa uthisha owayemfundisa uMnuz Vusimuzi Khumalo, owabizwa ezothula ubufakazi, watshela inkantolo ukuthi uMdunge wawuphasa u-matric futhi nguyena owamnika isitifiketi sakhe ngo-1985.

UNkk Fikeni uthe abameli bakaMdunge bathe wangena embuthweni wamaphoyisa njenge-special constable, okungadingeki ukuthi umuntu abeno-matric.

Uthe akucaci ukuthi uMdunge waqashwa emaphoyiseni ngoba eno-matric noma cha. Uphinde wathi umbuso kumele uyicubungule kahle indaba yokuthi kumele ayibuyise imali engu-R3.5 million ayihola ngesikhathi esasebenza.

Ethula ubufakazi bakhe phambilini, uMdunge manje osesebenza njengomphenyi enkampanini yonogada iMugnum watshela inkantolo ukuthi bekuvele kunetulo lokumketula emsebenzini ngoba kade engasathandisiswa kahle ngemuva kwesitatimende asenza ngo-2012, lapho aqinisekisa khona ukuthi lowo owayeyisilomo somculi kamaskandi, uKwakhe “Mgqumeni” Khumalo uvuke ekufeni.

Wathi kwaba nesikhalo kubaphathi bakhe becabanga ukuthi iMercedes Benz yakhe ayezithengele yona wabe egwazelwe ngayo, wathi kwafakwa ngisho izidakamizwa emotweni yakhe bezama ukumninda ngecala.

Izidakamizwa ezatholwa ngamaphoyisa oPhiko lwezinja, kwatholakala ukuthi ubengazi lutho ngazo.

Ukusabela komphakathi waseMbube KwaMkhizwana ekhweleni lokulethelwa intuthuko, kubhekane nengwadla yokuphelelwa kwendawo ngamanzi.

NASH NGCOBO

UKUSABELA komphakathi waseMbube KwaMkhizwana esigodini saKwaXimba ku-ward 2 entshonalanga yeTheku ekhweleni lokulethelwa intuthuko, kubhekane nengwadla yokuphelelwa kwendawo ngamanzi.

Lokhu kuhlale obala ngeledlule ngenkathi inhlangano iResilient Educaton Trust ilethele isikole sakwaNonqomfela CP School izindlu zangasese ezisebenzisa amanzi nomtapo wolwazi okuzosizakala kuwo nomphakathi.

Lesi sikole esiphethwe nguMnuz Thulani Mbanjwa sisendaweni esemakhaya futhi okuba yinselelo enkulu ukufinyelela kwentuthuko kuso ngenxa yokungabikhona kwezingqalasizinda njengazo zokulethwa komphakathi amanzi.

UMbanjwa ubonge ubambiswano aluthole emalungeni ekomiti elilawula ukuphathwa kwesikole, othisha nabantwana ngokuqokwa kwesikole sabo yiResilient Education Trust.

Uthi lolu hambo luqale emva kokufunda udaba ephephandabeni lomphakathi ngo-Agasti 2013 olwalunxusa othishanhloko bezikole zasemakhaya ngokufaka izicelo zokulethelwa intuthuko ezikoleni zabo.

“Angisichithanga isikhathi ngabhalela ephephandabeni, bangiphendula futhi bazifikela mathupha nabaxhasi ukuzosibona lesi sikole ngezidingo zaso.

“Ngibonga ikomiti lesikole nalo elihlanganise amakhanda laqoqa imali yokwakha ikhishi ukulekelela kwesikwenzelwe yiResilient,” kusho uMbanjwa.

UMnuz Mandla Masikane ongumhloli wezikole ezingu-35 kwisekethe yaseNtshanga namaphethelo uthe kuyamjabulisa ukuthi indawo ayiphethe kunothishanhloko okhuthele futhi okhaliphe njengoMbanjwa.

Unxuse umphakathi ngokuzivikela lezi zakhiwo ezintweni ezizobuyisela emuva umsebenzi omuhle kangaka osuwenziwe nokuyohlala kukhunjulwa ngawo uMbanjwa nethimba lakhe endaweni.

“Lo mtapo wolwazi ngowenu mphakathi njengoba isikole kungesenu, yilapho nizothola khona ukuthuthukisa khona ulwazi ngokufunda okuningi eningakwazi okwenzeka ezweni nithuthukise nolwazi.

“Le ndawo izoqhubeka nokulethelwa intuthuko nokuhlonishwa uma othisha, amalungu omphakathi nezingane zihlangana ekugcinweni kwayo iyinhle, iphephile futhi iheha abanye abasafuna ukuyisiza,” kusonga uMasikane.

Uqhubeke ngokunxusa izinhlaka zikahulumeni ngokuqinisa ekuletheleni imiphakathi efana nowaKwaMkhizwana izingqalasizinda ikakhulukazi ezamanzi njengoba engafinyeleli ngomfutho owanele emizini.

Mayelana nokuphela kwamanzi atholakala emathangini abizwa ngoJojo, uMbanjwa uthe bekuqala kule liviki ukwenzeka, ngeshwa kwaqondana nosuku lokuhlolwa nokwethulwa kwalezi zindlu zangasese ezisebenzisa wona.

Inselelo isibhekene nomphakathi ukugqugquzela ubuholi ngokuqikelela ukuthi zonke izidingo zomphakathi ziyatholakala.

UMnuz Qedezakhe Ndlovu ongusihlalo wekomiti elilawula isikole unxuse abazali ngokukhuthalela ukwazi ukuthi kwenzekani ezikoleni okufunda kuzo izingane zabo kanjalo nomphakathi wonkana.

Ngodaba lwamanzi uthe kuyihlazo ukuthi banomfula Umngeni odabula endaweni uze uyozilahla olwandle kodwa abakwazi ukusizakala ngamanzi awo.

Uthe amanzi awusizo kakhulu ekuniseleni izivande ezikoleni, ezigcina ngokuphekelwa abantwana kokunye zidluliselwe nasemiphakathini entulayo.

Uthe ukwanda kobugebengu obudicilela phansi inqubekela phambili kufanele umphakathi uqinise umkhankaso wokulwa nabo.

“Izikole zethu endaweni zidinga ukuqashwa ubusuku nemini ngoba ubugebengu nokulinyazwa kwempahla kwenzeka ebusuku,” kusho uGatsheni.

UNksz Ntombi Gwala ongomunye wothisha abadala kulesi sikole ukhale kakhulu ngezinto zokuthutha njengoba amatekisi egcina ebhulohweni eliqhelelene nesikole.

Uthi othisha abaningi kuyabagqilaza ukuzosebenza kulesi sikole kufanele babe nezimoto okuyinto engelula.

Uphakamise ukuthi kungangcono uma uMnyango wezeMfundo uzoqhamuka nohlelo lwezindlu zokuhlala othisha abaqhamuka kude oluzoba semagcekeni esikole ukuze basize nasekuxoshweni kwezigebengu.

UNdunankulu weNkosi yesizwe sakwaShangase, uMnuz Elias Shangase ubonge wanconcoza ngomsebenzi owenziwe nguthishanhloko walesi sikole.

Uthe lesi sikole sasungulwa nguyise, egcekeni lakubo efundela endlini ka-rondavel bengu 20 waze washiya eseyofunda uStd 4 (Grade 6) kwesinye esiyibangana.

Ulibeke ngembaba elokubonga intuthuko eyenzeka esizweni sikayise wathi kuko konke okwenzeka kuso, uyohlale ezivulile izandla zokulekelela nanganoma yingani edingekayo.

“Akusekho ukukhala ngezinkinga ezenzeka kudala, sekusezandleni zethu ukuvala ikhasi lomlando ongemuhle wethu ngokuthi sibambisane, silwele ukubheka phambili ngentuthuko, “ kusonga uShangase.

Umholi we-EFF uMnuz Julius Malema uthe uNksz Winnie Madikizela-Mandela akathokozile kwi-ANC.

SAPA

IZOLO umholi we-Economic Freedom Fighters (EFF) uMnuz Julius Malema uthe uNksz Winnie Madikizela-Mandela akathokozile kwi-ANC.

“Iqiniso lithi akathokozile neze kuKhongolose, manje ufuna nathi sibuyele lapho esingeke sithokoze khona? Cha...sesidlulile ekuhlukunyezweni,” kusho uMalema engqungqutheleni yokuqala ye-EFF eBloemfontein.

UNkk uNksz Madikizela-Mandela watshela iSABC ukuthi uyethemba ukuthi uMalema uzobuyela kuyona, njengoba axoshwa.

“Ngiyafuna ukubuyisa uJulius, ngimbuyise ekhaya ngaphambi kokuthi ngilale obungunaphakade,’’ kusho uNksz Madikizela Mandela etshela iSABC.

UMalema uthe akusoze kwenzeka lokho.

“Siyawancoma amagalelo ababa nawo emzabalazweni kodwa iqiniso lithi i-ANC ayisoze yashintsha. Izinto azisefani nakuqala.”

Uthe uNksz Madikizela-Mandela ubegxile kwi-ANC impilo yakhe yonke.

UMalema uphinde wathi uMnuz Cyril Ramaphosa oyiphini likaMengameli ubheda kakhulu kunoMengameli Jacob Zuma.

“Uma ucabanga nje i-ANC uma isuka kuZuma iya kuRamaphosa izoshintsha? UCyril uyinkinga okwedlula uZuma.

“UCyril uhlezi ecabanga ngebhizinisi nasezintweni zepolitiki. Umthuma eLesotho, akucabangayo wukuthi leliya lizwe linamadayimane. Umtshela ukuthi alungise u-Eskom, yena ucabanga ukuthi angawudayisela kanjani amalahle.” kusho uMalema.

Awuzange usaba khona umabo esigodlweni senkosi yaseNhlangwini uMelizwe Dlamini.

ZANELE MSOMI

AWUZANGE usaba khona umabo esigodlweni senkosi yaseNhlangwini uMelizwe Dlamini obekulindekele ube izolo emuva komshado omhlophe ngoMgqibelo eNkosi Albert Luthuli, ICC, eThekwini.

Inkosi uMelizwe ibishadelwa uNdlunkulu uPhumzile, uMaMtimande (22) waseNanda, emuva kwezinyanga ezimbili eshadelwe uNdlunkulu uNontando, uMaSosibo (25). Yize umshado wangoMgqibelo uqale sekuphele amahora amabili kunobekulindelekile, kubonakele ukuthi uhlelwe kusenesikhathi ngenxa yobukhazikhazi.

Abanye bababaze ukungena ngokulandelana kondlunkulu eNhlangwini njengoba uMaSosibo eshade ngoSepthemba 6. Yize imithombo ithe kwakucatshangwa ukuthi ondlunkulu bayoshada ngosuku olulodwa ngoSepthemba njengoba noMaMtimande ayesaziwa, abasebukhosini bathe wayengakalotsholwa.

Inkosi uMzabane Makhoba ngeledlule itshele Isolezwe ukuthi undlunkulu wesibili wayeseboniwe kodwa engakalotsholwa.

Inkosi uMelizwe ibishaye isudi ewuhlobo lweyayigqoke ishadelwa noSepthemba nayo edle ngobukhazikhazi. Okhalweni ibigqoke ibhande elikhulu eliyindwangu emabalala nayo ewuphawu lokuthi ngeyasebukhosini yaphatha induku yethusi.

Injabulo ibibonakala ebusweni kundlunkulu obemamatheka, onconywe yizihambeli zomshado ngobuhle. Inkosi uMelizwe okuthiwa ike yadunguzela, ibibonakala iluleme ngaphandle kwezinyawo ebezikhomba ukuvuvukala.

Kuhlengezele izinyembezi kuyena ngesikhathi umculi we-opera uZenneth eshaya ingoma ethi You Will Not Walk Alone. Kuthiwa inkosi ithanda lolu hlobo lomculo njengoba kubonakale isukunyiswa yinjabulo emva kokucula kukaZenneth.

Ngesikhathi uMakhoba ekhuluma nephephandaba ngaphambi komshado wathi umabo uzoba izolo eNhlangwini lapho bekuzohlatshwa nezinkomo kubuswe njengoba kwenzeka nasemshadweni odlule.

Izolo kushintshe uhlelo kodwa sangacaca kahle isizathu sokungaqhubeki komabo. UMakhoba akatholakalanga kodwa uPrince Mqondisi Dlamini naye okhulumela inkosi uthe umabo uzoba ngoJanuwari 11.

“Ngokwazi kwami uhlelo lwaluvele lukhomba ukuthi umabo uzoba ngoJanuwari ngenxa yokuthi inkosi ibisinezinye izinhlelo osukwini lwayizolo. Umabo uyoqhubeka khona esigodlweni senkosi ngoJanuwari,” kusho yena.

Emuva komshado izimenywa zibusiswe ngezidlo e-ICC kwathi ezinye eziqavile zadlulela emzini wenkosi eLa Lucia, eThekwini nakhona kwabuswa. Kubikwe ukuthi undlunkulu omusha uzohlala emzini oseThekwini njengoba uMaSosibo ehlala esigodlweni.

Inkosi ibishadelwa okwesine kodwa ondlunkulu ababili kubikwa ukuthi sebahamba.

Abahlalise lubhojozi amagundane abathi adla kwasani abantu abahlala emijondolo yaseNtuzuma eSoweto.

LUNGI LANGA

ABAHLALISE lubhojozi amagundane abathi adla kwasani abantu abahlala emijondolo yaseNtuzuma eSoweto abanye babo abathi abasenampahla yokugqoka ngenxa yawo. Abantu balapha bathi sebesaba nokuthi azogcina ngokudla izingane njengoba phambilini sekuke kwenzeka ingane idliwa amagundane yagcina ngokushona emijondolo yakuKennedy Road eThekwini.

UNkk Khosi Zwane (53) ohlala kule ndawo uthi kusukela ngoMashi behlaselwa yile nkinga yamagundane.

“Angena adle yonke into endlini. Adla izingubo, asilume kwathina uma silele adle nezingubo. Asisazi ukuthi yini okufanele siyenze ngoba sesizame zonke izindlela zokuwabulala,” kuzikhalela uNkk Zwane.

Uthe yena usezama ukuqikelela ukuthi ulala embathile ngoba amagundane ayabaqeda ebadla izithende ebaluma.

UNkk Zwane uthe unovalo ngoba ingane engumzukulu wakhe eneminyaka emihlanu nayo seyike yalunywa amagundane. Akuyena kuphela uNkk Zwane kodwa nomphakathi wonke ukhala esifanayo ngamagundane.

Inkinga yamagundane ayiyintsha kuleli njengoba nase- Alexandra eGoli ake ahlasela, uhulumeni waseGauteng waze waletha izikhova endaweni ukuzowadla kodwa abantu bashaya amakhala ngazo ngoba benenkolelo yokuthi zisetshenziselwa ezintweni zokuthakatha. Kwaba nemibiko yokuthi abanye abantu babezibulala izikhova bezisebenzisela ukwenza umuthi

UNksz Thabile Mtshali oqashile eNtuzuma utshele Isolezwe ukuthi usecabanga ukufuna enye indawo.

“Kusukela ngiqale ukuhlala lapha ekupheleni konyaka odlule bekulokhu kukhona le nkinga yamagundane. Kunokuthi ibe ngcono iyaqhubeka. Adla kwasani, amaqanda, izitsha nezingubo. Uma ngiya kwenye indawo umbuzo wokuqala nje engizobabuza wona ukuthi abanayo yini inkinga yamagundane,” kubalisa uNksz Mtshali.

UNkk Zwane uthe kuqala amagundane abevame ukuthi avumbuke uma sebelele kodwa manje aseyazicanasela.

“Sesike sithi sihleli siwabone ephuma aze abe mahlanu endlini,” kusho uNkk Zwane.

Umyeni wakhe uMnuz Vusi Zwane (56) uthe naye asewaqedile amashethi akhe.

Ukhiphe nezimbadada zakhe nazo okubonakala ukuthi ziququdwa yiwo amagundane.

“Wake wayibona kodwa into enje? Amagundane adla aze adle izimbadada pho,” kukhala uZwane.

Uthe uke wazama ukuletha ikati ngoba enethemba lokuthi lizokwazi ukubhekana nawo, kwanhlanga zimuka nomoya.

“Kugcine kubaleka lona ikati ngoba kucaca ukuthi liyehlulwa. Manje sesisele, asisazi ukuthi sizokwenzenjani ngoba siyaphela nathi yiwona.

Nezingane azisalali kahle ngoba zisaba ukuthi ayaziluma,” kusho uZwane.

Ucishe wasala engenandlebe owesilisa waseNew Hanover Park oshayela amatekisi eThekwini.

LUNGI LANGA

UCISHE wasala engenandlebe owesilisa waseNew Hanover Park oshayela amatekisi eThekwini olunywe indlebe omunye uzakwabo naye ongumshayeli belwa erenki izolo ntambama.

UMnuz Sibusiso Shandu (30), ongumshayeli uthe uyoyixoxela amagwababa echobana indaba yokuthi ucishe wasala engenandlebe ngesikhathi elwa nomunye uzakwabo ongumshayeli wetekisi.

UShandu obesaconsa igazi endlebeni exoxa udaba lwakhe, uthe impi isuswe ukuthi lona omu-nye umshayeli utshele omunye ukuthi wehlise ithayi lemoto yakhe.

“Uvele watshela omunye umfowethu esisebenza naye ukuthi ngehlise ithayi le moto yakhe. Uye kobheka wathola ukuthi ithayi lemoto yakhe alehlisiwe. Uthe uma esebuya esho lokho ngaya kuyena lo ngambuza ukuthi yini ehamba ekhuluma amanga ngami. Ngithe uma ngisho lokho kwabe ngizonele,” kuchaza uShandu.

Uthe lo mlisa uvele wamdumela emshaya ngezimpama.

“Nami ngimshaye ngequpha ngoba ngibona ukuthi akazibekile phansi. Erenki bavele bathi asidedelwe siqhuthane,” kusho uShandu.

Uthe ngesikhathi belwa lona omunye umshayeli ube esedumela indlebe yakhe wayihlala ngezinyo wacishe wayilahla phansi.

UShandu obekhuluma elokhu esula igazi uthe ubengalindele ukuthi lo mshayeli angavele amlume.

Uqhube wathi okum-phethe kabi ukuthi uthe noma eya esibhedlela iSt Aidan’s watshelwa ukuthi ngeke aluthole usizo.

“Bangitshele ukuthi ngeke bakwazi ukungisiza ngoba bona sebelapha amehlo. Bangiphathe kabi ngoba ngithe noma sengicela bangifonelele i-ambulensi banqaba bavele bangitshela ukuthi angihambe ngiye e-Addington,” kusho uShandu.

Emuva kokuba enekele Isolezwe udaba lwakhe ube esenikela esibhedlela uShandu.

Osonhlalakahle baseNtuzuma sebeqalile ukubhekana nenkinga yezingane ezilaxazwa ngonina beya ebumnandini.

ZANELE MSOMI

OSONHLALAKAHLE baseNtuzuma sebeqalile ukubhekana nenkinga yezingane ezilaxazwa ngonina beya ebumnandini njengoba sekulahlwe eziyisihlanu esikhathini esingangesonto.

UNksz Nokuthula Zuma onguSonhlakahle uthe kujwayelekile ukuthi bathwale kanzima ngalesi sikhathi sonyaka ngoba abaningi basuke sebeqale imicimbi yamaholide kaKhisimusi, izingane zisale dengwane.

NgoLwesihlanu kutholakale amawele anezinyanga ezintathu eshiywe wodwa usuku lonke ngaphandle kokudla namanabukeni, ePholani ngaseRichmond Farm. Lamawele angamantombazane kuthiwa ashiywe ngunina endlini kusukela ngo-10 ekuseni omakhelwane baze babikela amaphoyisa bebona lishona engabonwa. Kusolwa ukuthi unina ubeye komunye umcimbi wobumnandi nelinye isoka.

“Siphoqelekile ukuthi sivule icala ngoMgqibelo ngoba unina wamawele ubengakabuyi. Izingane sizishiye kumakhelwane ngoba sithole ukuthi uyise wazo uhlala kude eStanger. Sizame indlela yokuthi zinakekeleke ngoba bekungekho ngisho amanabukeni azo,” kusho yena.

UNksz Zuma uthe okubi wukuthi lezi zingane ngezamantombazane kanti nezinga lokudlwengulwa kwawo liphezulu. Uveze ukuthi uma sekuyilesi sikhathi sonyaka, alipheli isonto bengahlangabezananga nenkinga yokulaxazwa kwezingane.

Uthe ngesonto eledlule kwalaxazwa ezinye ezintathu kwaBester ezineminyaka ewu-7, 5 no-2. Ezimbili ezindala ngezabafana neyodwa yentombazane.

Kusolwa ukuthi unina wazo okhulelwe, wayeye ebumnandini nenye ingane esagonwa, engatholakalanga ukuthi ingakanani.

UNksz Zuma uthe kube nzima ukuxazulula udaba lwakhe ngendlela abenolaka ngayo. Uthe ngisho esefike esiteshini samaphoyisa wayelwa nomakhelwane okuyibona ababikele amaphoyisa, ebasola ngokugxambukela. Kuthiwa kwase kuphele isonto izingane ezishiye zodwa kwatholakala nokuthi wumkhuba awujwayele.

“Inselelo esibhekene nayo emacaleni okulahlwa kwezingane wukuthi asikho isigwebo nesijeziso esiqinile. Siyawavula amacala kodwa umuntu avele enkantolo, adedelwe ngesexwayiso. Kusuke sekunzima kithina ukunikeza lowo muntu izingane esekhombisile ukuthi akazinakile. Bazoqhubeka nokulahla izingane ngoba bayazi ukuthi ababoshwa,” usho kanje.

Njengoba kusanda kuphothulwa nomkhankaso wokulwa nokuhlukunyezwa kwabesifazane nezingane, uNksz Zuma uthe ababoni mehluko njengoba ezinye izigameko zenzeka ungakapheli ngisho umkhankaso.

Amaphoyisa akuqinisekisile ukuthi unina wamawele uvulelwe icala kodwa akazi uzovela nini enkantolo.

Umphakathi wamaBhunu ukhala ngokuthi usabhekene nenkinga yokubulawa emapulazini.

CELANI SIKHAKHANE

UMPHAKATHI wamaBhunu ukhala ngokuthi usabhekene nenkinga yokubulawa emapulazini okungesinye sezizathu esenze ukuthi ungalisabeli ikhwelo likaMengameli Jacob Zuma neSilo samaBadla lokuba kubuyiswane phakathi kwawo namaZulu.

Lokhu kuvele ngesikhathi ingxenye yamaBhunu ixoxa neSolezwe lapho ebehlele khona umcimbi eBlood River Museum ngaphesheya komfula iNcome ezokhumbula ukunqoba kwawo isizwe samaZulu empini yango-1838.

Lo mcimbi ubuhlelwe ngaphesheya lapho khona kunetshe lesikhumbuzo samaBhunu elinesifungo esaqoshwa phansi sokuzibophezela kuMdali ngokuthi uma benqoba amaZulu bayohlale behlanganela khona bezobonga kuNkulunkulu.

Nganeno kweNcome okuwuhlangothi okwakuhleli kulo ibutho likaZulu bekuqhubeka umcimbi wokubuyisana obuhanjelwe uMengameli Zuma, uMntwana uMangosuthu Buthelezi, uNdunankulu waKwaZulu-Natal uMnuz Senzo Mchunu, Isilo nabanye abaholi nezinkumbi zabantu abamnyama nengcosana yabamhlophe abebengafike ngisho ku-20 namaNdiya.

UMnuz Frans Schutte (78) wasePitoli uthe bona abayingeni indaba yokubuyisana ngoba ayisizi ngalutho, kunalokho umphakathi wamaBhunu uyahlaselwa ubulawe emapulazini.

“Ukube uhulumeni le nto yokubuyisana uyenza unyaka wonke kuqedwe nokubulawa kwamaBhunu emapulazini ngabe siyezwa kodwa manje kwenziwa embuthanweni wosuku olulodwa ongeke usize ngalutho,” kusho uSchutte.

Uthe yena nomndeni wakhe njalo ngoDisemba beza eNcome bezohlanganyela namanye amaBhunu bakhumbule ukunqoba kwabo babonge uNkulunkulu.

Okunye ukuthi amaBhunu awayingeni indaba yebhuloho elifakwe emfuleni iNcome eliwuphawu lokubuyisana nokubambisana phakathi kwawo namaZulu ngoba ethi wona awasoze awelele ngaphesheya kodwa njalo ngoDisemba 16 ayohlale engasohlangothini loyisemkhulu okubekwe kulo itshe lesifungo sokunqoba.

UMnuz Bert Visser (50) uthe akaqondi ukuthi kungani kufanele awelele ngaphesheya noma ayohlanganyela namaZulu uma kunomcimbi ngoba imigubho yabo yalolu suku ayifani futhi ayisoze yafana.

“Thina uma silana sisuke sizothandaza kuleli tshe siqinisa isifungo esenziwa okhokho bethu kulona. Ngaphandle kwalokho leli tshe labusiswa uMfu Gert Maritz yingakho lingcwele futhi singasoze sagudluka kulo uma kuyilolu suku. Okunye ukuthi nina bantu abamnyama nisuke ngalolu suku nizenzela amaphathi nijabula kanti kithina lisho lukhulu emlandweni,” kusho uVisser.

Leli tshe labekwa lapho okwafikela khona amabutho amaBhunu ngo-1838 ezolwa namaZulu kanti kubiyelwe kwabekwa nemifanekiso yezinqola zempi.

Umhlaziyi wezepolitiki uMnuz Thabani Khuma-lo uthe lokhu kuphonsa inselelo kuhulumeni ngale micimbi ehlale yenziwa ngoba kuyacaca ukuthi isuke igxile ohlangothini olulodwa lwabantu abamnyama.

“Akuwona kuphela lo mcimbi abamhlophe abawushaya indiva kodwa miningi. Ugcina usuzibuza ukuthi abantu abamnyama babuyisana nobani uma kuba yibo bodwa kule migubho ekubeni labo ababexabene nabo bengayihambeli. Lokhu kuphoqa uhulumeni ukuthi abenezinhlelo ezizogxila kuzona zonke izinhlanga kuqiniswe indaba yokubuyisana kuzona zonke izinhlanga kungabi nje imicimbi yosuku olulodwa,” kusho uKhumalo.

Uphethe ngokuthi kuyacaca ukuthi namanje amaBhunu asenenzondo futhi awayifihli ngoba nakwezombusazwe kwala ngisho esondezwa kodwa awafuni.

Bathi sebelufake kubameli udaba lokususwa kwabo abahlali basebhilidini eliku-Epson Road.

ZANELE MSOMI

BATHI sebelufake kubameli udaba lokususwa kwabo abahlali basebhilidini eliku-Epson Road ngaseYMCA eThekwini abakhishwe uMasipala weTheku ngesonto eledlule.

NgoLwesithathu olwedlule abahlali abangaphezu kuka-20 bakhishwa ngoshova yizithunywa zikamasipala kwashaqwa izimpahla zabo ngeloli. Lokhu kwenzeke emuva kokufika kwamaphoyisa ezobaxwayisa ngokuthi abaphume baphele kuleli bhilidi eselilungiswa kabusha.

Abahlali, iningi labo elivela ezindaweni ezikude, bathe sebeneminyaka behlala kuleli bhilidi okuthiwa lalinehholo kudlalwa kulo isibhakela ne-tennis.

Okhulumela abahlali uMnuz Leornard Mkhize uthe emuva kokusala dengwane ngesonto eledlule abazange baphume emagcekeni kodwa amaphoyisa abelokhu ebuya ezobasabisa.

“Udaba seludluliselwe kubameli bethu abathumele incwadi kumasipala ukuze siqhubeke nokuhlala. Kumanje abahlali basahleli kuleli bhilidi yize izimpahla zabo zingabuyanga,” kusho yena.

Uthe abahlali abanayo indawo abangashona kuyo ngoba impilo yabo ibisiphelele kuleli bhilidi. Uthe abahlali basuswa ezindaweni ezahlukene okubalwa nasePhezulu Lodge kuMngeni Road bathenjiswa ukuthi bazotholelwa izindawo ezingcono.

Kulaba bahlali kukhona noMnuz Lucky Zwane ohamba ngesihlalo esinamasondo othi wafika ngo-1978 kuleli bhilidi kusahlala abelungu.

UMnuz Musa Dlamini oyikhansela ku-ward 27 uthe wachazelwa ngendaba yalaba bahlali ngesikhathi engena kwesokuba yikhansela ngo-2011.

“Ngokwazi kwami laba bantu babekade behamba behlala beshintshwa ezindaweni. Abanye bese beneminyaka engaphezu kweshumi behamba behlala futhi kwakunga-besifazane abaningi. Noma ngingazi ukuthi bafakwa ubani kuleliya bhilidi kodwa kwathiwa kumele basizwe,” kusho yena.

UDlamini uthe bavakashela abahlali nomasipala bathola ukuthi isimo sabo siyabheda kakhulu.

“Ngenhlanhla babevele benalo uhlu lwamagama abo sathatha lona ukuze sibafunele indawo. Uhlu lwadluliselwa kumasipala nabezezindlu eminyakeni emithathu edlule. Emasontweni amane edlule bayiswa ezindaweni abatholelwe zona,” kusho uDlamini.

Uthe ushaqekile ngenyanga edlule ezwa ukuthi kunabakhala ngokushiywa ngaphandle. Uthe uphindelile kubona wathola ukuthi abakhalayo akazani nabo okungenzeka ukuthi babengekho ohlwini olwathathwa umasipala.

“Inhloso kamasipala wukuqeda izindawo ezingafanele ukuhlala abantu njengayo leya ngoba zandisa ubugebengu. Ngeke ngithembise okwamanje ukuthi kukhona izindlu abazonikwa zona ngoba ngilinde umhlangano naboMnyango wezokuHlaliswa kwaBantu sibone ukuthi senzenjani,” usho kanje.

Abasebuhleni bazophinde bahambele intaba yasoZwathini ekuqaleni konyaka ozayo.

MCEBO MPUNGOSE

ABASEBUHLENI bazophinde bahambele intaba yasoZwathini ekuqaleni konyaka ozayo ohambeni lwabo lwaminyaka yonke. Kuzobe kungokwesibili abaseBuhleni bengayi entabeni iNhlangakazi okuyiyo inkosi yokuqala eyehla kuyo njengoba ngonyaka ozayo bezohambela intaba iKhenana kusukela ngoJanuwari 4 bahlale kuyona amasonto amabili.

Umthombo weSolezwe oseBuhleni uthe bazovuka ezintathakusa ngo 4 Januwari baqale uhambo lwabo oluzodlula enkosini yamaQadi, uMqoqi Ngcobo, ezinsukwini ezintathu abazozihamba. Umthombo uthe nakuba bekhethe le ntaba, kunabanye abakulolu hlangothi oluholwa inkosi uMduduzi ‘Nyazilwezulu’ Shembe abanganeme ngokungayi eNhlangakazi.

“INhlangakazi iyona ntaba okwehla kuyo uMphrofethi wokuqala ngakho kunabanye abebefuna kubuyelwe khona,” usho kanje.

Njengoba kunombango wobuholi baleli bandla osaqhubeka enkantolo eNkulu yaseThekwini wokuthi ubani okumele ahole ibandla phakathi kwenkosi uMduduzi Shembe nenkosi uVela Shembe waseThembezinhle bekulindelekile ukuthi kube khona ukushayisana ngodaba lokuya entabeni nangonyaka ozayo.

Okhulumela abaseThembezinhle uMnuz Nhlanhla Mthethwa uthe abaseBuhleni basifakile isicelo sokuya entabeni iNhlangakazi ngonyaka ozayo kodwa bagcina behlele ngezansi bakhetha ukuya eKhenana ngoba bengagculisekile ngezinhlelo zokuya eNhlangakazi. Uthe abaseBuhleni bebezoya eNhlangakazi ngomhlaka 26 Januwari, belandela abasekuPhakameni abazoya ngo 2 kuya ku 11 Januwari beholwa inkosi uVukile Shembe, ngo 11 kuya ku 20 Januwari kuzolandela abaseThembezinhle beholwa yinkosi uVela Shembe, bese kuba abaseGinyezinye ngo 20 kuya 26 Januwari beholwa yinkosi uSizwe Shembe.

UMthethwa uthe abaseBuhleni basihlabile lesi siphakamiso bathi bancamela ukuya kwenye intaba.

“Bebefuna ukuya eNhlangakazi, bafaka isicelo sokuhlala amasonto amabili, amanye amabandla ezohlala isonto elilodwa, bona abayizwanga kahle leyo bakhetha ukuya entabeni yasoZwathini,” usho kanje. Uthe osekusele manje wukuthi baphothule izingxoxo zabo nomasipala waseNdwedwe ozobe ubasiza kulolu hambo ezintweni ezithinta ezimpilo, ukuphepha nokunye.

NgoLwesihlanu kuzobe kunenkonzo yokukhumbula umholi webandla wesibili owadlula ngo 19 Disemba kanti kulindeleke ukuthi amabandla amemezele zonke izinhlelo zohambo ngoMgqibelo.

Inkantolo yesifunda saseThekwini ikuhlehlisile ukukhipha isigwebo ecaleni lobeyisikhulu samaphoyisa.

MLUNGISI GUMEDE

INKANTOLO yesifunda saseThekwini izolo ikuhlehlisile ukukhipha isigwebo ecaleni lobeyisikhulu samaphoyisa KwaZulu-Natal uMnuz Vincent Mdunge ngoba ifuna ukuthola kabanzi ukuthi yimalini ayikhwabanisa ngesikhathi esebenza embuthweni ngesitifiketi sakhe sikamatric somgunyathi.

Imantshi uNkk Thandeka Fikeni ithe bazobiza ufakazi wokugcina ozochazela inkantolo ukuthi malini ngempela ezuzwe nguMdunge ngoba yena uyaphika ukuthi uthole umhlomulo ka-R874,901, ngesikhathi esuka esikhundleni sokuba u-Warrant Officer enyukela ekubeni ngu-Colonel.

Le mali okukhulunywa ngayo umhlomulo kuphela ofaka namabhonasi nokunye, akukhulunywa ngo-R3.5 million okuthiwa wawuhola kusukela aqala emaphoyiseni ngo-1985, waze wasula ngo-2013.

UMdunge ushaya phansi ngonyawo uthi ubengayitholi lemali umbuso okhuluma ngayo. Uthe ibiningi intela abeyikhokha kukhona nezimali eziningi ezibanjwayo.

Manje uNkk Fikeni ngaphambi kokuba akhiphe isigwebo sakhe uphoqelekile ukuthi abize lofakazi okumele agibele ebhokisini ngo-Februwari 17, ngonyaka ozayo.

U-Colonel Nico Kleynhans, oyiNhloko kwaNdabazabantu nguyena okulindeleke ukuba azochazela inkantolo ngemali etholwe nguMdunge.

NgoNovemba, uNkk Fikeni ulahle uMdunge ngamacala amathathu, amabili okukhwabanisa nelilodwa lokukokotela isitifiketi sakhe sikamatric.

UNkk Fikeni uthe uMdunge wakhwabanisa ngokuhambisa isitifiketi sakhe sikamatric eyofunda e-Unisa kodwa ebazi ukuthi singumbombayi.

Elinye icala lokukhwabanisa elimlahlile yilelo lokuthi usebenzise isitifiketi sikamatric esingumkokotelo waze wanyuselwa ngisho ezikhundleni embuthweni njengoba esule esenguColonel.

Ngokomthetho wangaphakathi embuthweni wamaphoyisa kuthiwa iphoyisa elingenawo umatric linyuselwa iziqu ligcine ku-warrant officer kodwa uMdunge zikhwele kuye waze waba ngu-Colonel.

Ezikhalela ukuthi angagwetshwa kakhulu, ummeli kaMdunge u-Advocate Saleem Khan uthe uMdunge uyaqala ukuboshwa lokho okumenza abengumuntu oziphethe kahle.

“UMdunge uneminyaka engu-49, izingane ezinhlanu azondlayo, ushadile iqiniso lokuthi uphelelwe umsebenzi kusukela ngoSepthemba 2013, lokho kusho ukuthi usebunzimeni ngokwempilo obudlula isigwebo inkantolo engamnika sona,” usho kanje.

UKhan uthe icala alahlwe ngalo uMdunge, isigwebo salo kuvamise ukuthi kube yisigwebo esilengisiwe noma inhlawulo.

Unxuse inkantolo ukuba imnike isigwebo esilengisiwe esingenanhlawulo.

Umshushisi uMnuz Barend Greon unxuse inkantolo ukuba inike uMdunge isigwebo esizombhadlisa ejele ukuze kwenziwe isifundo ngaye.

“UMdunge ezinkingeni akuzona uzifake yena. Ube budedengu kakhulu wathi azi ukuthi isitifiketi sakhe sika-matric sikokoteliwe kodwa waba nesibindi esisebenzisa iminyaka engu-27, waze waba ngoColonel,” usho kanje.

Azohlakazwa amagatsha e-ANC azohluleka ukuhlalisa imihlangano njengoba kulungiselelwa ingqungquthela ebhekwe ngabomvu.

MLUNGISI GUMEDE

AZOHLAKAZWA amagatsha e-ANC azohluleka ukuhlalisa imihlangano njengoba kulungiselelwa ingqungquthela ebhekwe ngabomvu yokukhetha ubuholi obusha besifunda iTheku esizoba ngonyaka ozayo ngemuva kokuhlehla kabili kulo nyaka.

Lesi sinqumo sithathwe emhlanganweni obuseCommercial City eThekwini ngoLwesithathu ntambama. Amakhansela alamagatsha kuthiwe nawo azothola amachaphazelo.

Kulo mhlangano obizwe isigubhukane obuhanjelwe ngoSihlalo noNobhala kuphela emagatsheni kuphinde kwamenyezelwa ukuthi ubuholi besifundazwe yibona osebuzobheka kakhulu indaba yohlelo lokuhlala kwamagatsha ngokusebenzisana kakhulu nesigungu sesikhashana esajutshwa isifundazwe esiholwa uMnuz Mike Mabuyakhulu.

Amagatsha angakahlali aphinde elulelwa isikhathi sokuthi ahlalise imihlangano yawo kuze kube uJanuwari 18, wangonyaka ozayo.

Okhulumela i-ANC esifundazweni uMnuz Bongani Tembe, uthe ingqungquthela ingase ihlale mhlawumbe ekupheleni kukaJanuwari noma ekuqaleni kukaFebhuwari ngonyaka ozayo.

“Isizathu esidale ukuthi sihlehlise usuku lwengqungquthela wukuthi besifuna ukunika wonke amagatsha angakahlali isikhathi esanele sokuthi ahlale,” usho kanje.

UTembe unqabile ukuphawula ngezinqumo ezithathwe emhlanganweni.

Kodwa imithombo yeSolezwe ebiyingxenye yomhlangano ikuqinisekisile eyokuthi amagatsha azohluleka ukuhlala azohlakazwa.

Umbango omkhulu eThekwini uphakathi kweMeya yeTheku uMnuz James Nxumalo noNkk Zandile Gumede onguMgcinimafa esigungwini esihola iTheku manje ababanga isikhundla sikaSihlalo. Ngesikhathi usaqala umkhankaso uNkk Gumede ubebonakala kungathi uzozidlela amahlanga kwesikaSihlalo kodwa zajika izinto sekuphakanyiswe uNxumalo.

Lesi sikhundla kumanje siphethwe wuDkt Sbongiseni Dhlomo ovele wahosha imfe kulolu khetho ngoba ebona ukuthi amagatsha awayizwa kahle indaba yakhe.

Kunokushayisana kwezibalo ngemiphumela emagatsheni asehlalile njengoba izinhlangothi zombili zithi ziyanqoba.

Izinkinga nombango emagatsheni yizona zizathu ezidale ukuthi ihlehle le ngqungquthela.

Sewesaba ngisho ukubuyela ekhaya umndeni kasomatekisi waKwaMaphumulo.

LUNGI LANGA

SEWESABA ngisho ukubuyela ekhaya umndeni kasomatekisi waKwaMaphumulo osanda kuhlaselwa esigamekweni okusolwa kuso umbango oqhubekayo wezimpi zamatekisi kuleya ndawo.

UMnuz Thulani Xulu ongumsizi kanobhala kasoseshini wamatekisi KwaMaphumulo uthe sebesaba ngisho ukuphindela ekhaya emuva kokuhlaselwa amadoda angaziwa ngoLwesine olwedlule.

“Bengihleli ekhaya usuku lonke ngoLwesine kwase kuphela ugesi ngezikhathi zasebusuku nokwenze ukuthi sisheshe silale. Kuthe ngesikhathi silungiselela ukulala ngase ngibona izithunzi zabantu zidlula. Akuphelanga sikhathi kwase kungqongqoza abantu bezibiza ngamaphoyisa,” kuchaza uXulu.

Uthe la madoda angqongqoze azenza amaphoyisa ebala njengoba ayememeza ngesilungu ethi ‘police’.

Akuphelanga sikhathi esingakanani kube sekuzwakala ukuqhuma kwesibhamu.

UXulu uthe isibhamu siqhume isikhathi eside bedubula ezindlini zonke nasezicabheni badubula nezinkomo zakhe ezine.

“Ngavele ngabona ukuthi akukwazi ukuthi ngabe bangamaphoyisa. Salala phansi nezingane nonkosikazi wami sabe siqhubeka isibhamu,” kusho uXulu.

Uthe usola ukuthi ukuhlaselwa kwabo kuhambisana nempi yamatekisi ekhona KwaMaphumulo ngenxa yezigameko esezike zenzeka phambilini.

Usoseshini waKwaMaphumulo uke waba nezinkinga okuthiwa ziqale emuva kokuthi kube khona abebefuna ukufaka izimoto zabo ngenkani ukuthi zihambe amabanga amade.

Kuthiwa kube sekubulawa amalungu ekomiti likasoseshini ebelikhona nokuholele ekutheni usihlalo owayekhona ngaleso sikhathi afake labo ababesolwa ngokuphehla udweshu.

Ngokuhamba kwesikhathi kwaphinde kwaqala phansi ukubulawa kwabantu ngoba sekuthiwe laba abayeke ukuhamba amabanga amade. Kuthiwa bangaphezu kweshumi ababulawa kusoseshini.

Ngesonto elandulela ukuhlaselwa kukaXulu, kuhlaselwe kwabulawa uNkk Babongile Mtshali (61) obeyilungu lekomiti likasoseshini obulewe esangweni lakwakhe.

UMnuz Bonginkosi Ngiba ongusihlalo kasoseshini uthe abazi noma lesi sigameko sihambisana nokungezwani ematekisini.

UNgiba uthe ngesikhathi bebhula umlilo ngaphakathi kusoseshini bebexakwe yizingxabano phakathi kwasoseshini wabo nowaKwaDukuza.

Manje abasazi ukuthi ukubulawa kwabantu kudalwa yizinkinga zangaphakathi noma.

UMnuz Bongani Mkhwanazi wenhlangano yamatekisi iSouth African Taxi Council (Santaco) uthe zibaphatha kabi izigameko zokuhlaselwa nokubulawa kwabantu KwaMaphumulo.

Uthe bebengazi ngalezi zigameko zakamuva zokuhlaselwa kwabantu.

Unxuse amalungu kasoseshini eze ngaphambili uma enezinkinga, angaphenduli ngodlame.

Okhulumela uMnyango wezokuPhepha KwaZulu-Natal uMnuz Kwanele Ncalane uthe bakhathazekile ngezinkinga zikasoseshini waKwaMaphumulo.

Uthe kunethimba elalijutshiwe ukuthi libheke izinkinga kulo soseshini.

“Kuyasikhathaza ukuqhubeka kwezigameko zokubulawa kwabantu yize sizama ukubheka izisombululo zezinkinga zalapha.

“ Sinxusa bonke abathintekayo kulokhu behlise umoya, sisazama ukubhekana nesimo salapha KwaMaphumulo,” kusho uNcalane.

Umndeni waseKlaarwater usaphithene amakhanda ngogogo ongenandawo yokuhlala okuthiwa akafunwa yindodakazi yakhe.

LUNGI LANGA

UMNDENI waseKlaarwater usaphithene amakhanda ngogogo (74) ongenandawo yokuhlala okuthiwa akafunwa yindodakazi yakhe.

UNksz Thulisile Cele (39) okumanje uhlalise lo gogo uthi udidekile ngesikhathi kufika uNkk Ntombizonke Evelina Dlamini ngoMgqibelo ntambama ethi uxoshiwe lapho abehlala khona.

UNksz Cele uthe babone ngomfana efika naye emphathele izikhwama.

“Ngithukile uma ngimbona ezifikela ngoba ngazi ukuthi wahamba nendodakazi yakhe eyayikade iqashe komunye umakhelwane wami,” kusho uNksz Cele.

Uthe uNkk Dlamini umtshele ukuthi uhambe KwaDumisa ngoba engazange azwane nonkosikazi kamfowabo abehlala emzini wakhe.

Kuthiwa babanga ukuthi umka mfowabo wahamba naye ethi uyomlungisela ukuthi imali yakhe yempesheni ayithole ebhange kanti yena akathandi.

UNksz Cele uthe kwamkhathaza lokhu ngoba naye akanayo indawo yokumgcina ube esethinta indodakazi yakhe.

“Okungixakile nokwenze ngakhathazeka wukuthi indodakazi yakhe ngiyifonelile yangitshela ukuthi ayimdingi,” kusho uNksz Cele.

Uthe indodakazi kaNkk Dlamini ithe akaphindele KwaDumisa ngoba yona yayimshiye khona.

“Ithe yona ayinayo indawo yakhe yingakho yamyisa KwaDumisa. Uthe useshadile manje ngakho akanayo indawo angamgcina kuyo unina,” kuchaza uNksz Cele.

Uthe kuyamkhathaza lokhu ngoba naye uhlala endlini engamagumbi amabili nezingane zakhe ezimbili, eneminyaka engu-19 neneminyaka engu-10.

“Ngiphinde ngazame ukuyifonela indodakazi yakhe yangabe isalubamba ucingo. Ngibe sengikhuluma nomunye umakhelwane oyisihlobo sami ngamchazela ngesimo engibhekene naso wathi uzoyifonela indodakazi kagogo. Kuthe uma izwa ukuthi udaba sengizoluletha kwiSolezwe ngoba ngifuna usizo yacela umakhelwane ukuthi ayihlalele nogogo kwacaca ukuthi naye akanayo indawo,” kusho uNksz Cele.

Ekhuluma neSolezwe, uNkk Dlamini uthe ubuye KwaDumisa ngoba ezofuna indawo yokuhlala eKlaarwater.

“Bengifuna indawo yokuhlala ukuze ngizokwazi ukuyolanda izimpahla zami kwaDumisa. Ngihambe khona ngoba befuna ngiyohola ebhange ngibe ngingathandi,” kusho uNkk Dlamini.

Ebuzwa ngendodakazi yakhe uthe: “Loyo wangihambisa KwaDumisa kade ngamgcina.”

Ithintwa ngalolu daba indodakazi kaNkk Dlamini ayizange ilubambe ucingo. Ayiyiphendulanga nemiyalezo ethunyelwe yona.

I-DA ikushayele ihlombe ukwesula kukaNksz Ellen Tshabalala obengusihlalo webhodi yeSABC.

sapa

IZOLO iDemocratic Alliance ikushayele ihlombe ukwesula kukaNksz Ellen Tshabalala obengusihlalo webhodi yeSABC.

“Ukwesula kukaNksz Tshabalala kube yisinqumo esiphusile esithathwe emva kokuba uMengameli Jacob Zuma ebe nengcindezi yokuthi amumise emuva kombiko wePhalamende,’’ kusho uMnuz Gavin Davis omele iDA ePhalamende esitatimendeni.

Bekulindeleke ukuthi luqale ngoFebhuwari wangonyaka ozayo uhlelo lokususa uNksz Tshabalala esikhundleni uma sekuhlala iPhalamende.

“Sekuphele izinyanga eziyisihlanu iDA yacela iPhalamende ukuthi liphenye ngezinsolo zokuqamba amanga kukaNksz Tshabalala ngemfundo yakhe. Ukubambezeleka kwalolu hlelo bekungenasidingo njengoba yena nethimba lakhe labameli bebelubambezela,’’ kusho uDavis.

Uthe abaseshi banikwe umsebenzi wokuthi baphenye ngezinsolo zokuqamba amanga.

Izolo iHhovisi likaMengameli likuqinisekisile ukuthi uZuma uyitholile futhi wayamukela incwadi yokwesula kwakhe njengelungu lebhodi yeSABC.

“UMengameli udlulisa amazwi okubonga kuNksz Tshabalala ngegalelo abe nalo enhlanganweni esakazela umphakathi futhi umfisela okumhlophe ezinhlelweni zakhe zangomuso,’’ kusho uMnuz Mac Maharaj okhulumela uZuma.

USolwazi Mbulaheni Obert Maguvhe oyiphini likaSihlalo webhodi yeSABC usezobamba kulesi sikhundla kuze kube uZuma uqoka ozongena kusona ngokugcwele.

UNksz Tshabalala ube nengcindezi yokuthi aveze ubufakazi beziqu zakhe zemfundo ngokomyalelo wekomiti lasePhalamende.

UDavis uthe kumele anconywe wonke amalungu asekomitini lezokuxhumana ePhalamende ikakhulukazi abe-ANC.

“Baqhubekile nomsebenzi ePhalamende yize uNksz Tshabalala exhumene nezikhulu eziphezulu ze-ANC,” usho kanje.

“Kumele abaningi bathole isifundo ngokukokotelwa kweziqu kulabo abakuSABC nabangaphandle. Abantu baseNingizimu Afrika abakulindele ukuqanjelwa amanga yizikhulu,” kusho uDavis.

UPhiko lwabesifazane be-ANC selushaye ingwiji lwahlaba ikhwelo lokuthi uyekwe lo mkhuba ngoba uhlukumeza abesifazane.

CELANI SIKHAKHANE

KUNGAKAPHELI neminyaka emibili uMengameli woPhiko lwabesifazane be-ANC uNkk Angie Motshekga exolisile eSilweni samaBandla ngokugxeka umkhuba wokuhlolwa kwezintombi, lolu phiko selushaye ingwiji lwahlaba ikhwelo lokuthi uyekwe lo mkhuba ngoba uhlukumeza abesifazane.

Lokhu kuvele engqungqutheleni ye-ANCWL yenqubomgomo ebiseGoli ngempelasonto nalapho kwezinye zezigaba zemigomo yabo bethi umkhuba ofana nokuthwalwa kwabesifazane nokuhlolwa kwezintombi yizinto okumele zivalwe ngoba ziyihlazo futhi zidicilela phansi isithunzi sabesifazane.

Ecashunwa engqungqutheleni uMengameli walolu phiko uNkk Motshekga uthe le mikhuba ihlukumeza abesifazane futhi idicilela phansi nesithunzi sabo.

“Ngaphandle kwalokho ukuthwala kuhlukumeza abesifazane ngakho kungeminye yemikhuba okufanele iqedwe nya,” kusho uNkk Motshekga.

Udaba lokuvalwa kokuhlolwa kwezintombi, ukuthwala neminye imikhuba yizinto ezizodingidwa kabanzi emagatsheni ukuze afike engqungqutheleni yokukhetha ubuholi sekuvunyelenwe kwaqedwa ngalezi ziphakamiso.

Lolu phiko lufuna kuhlonishwe namalungelo abaqwayizi futhi bagunyazwe ukuthi baqwayize ngokusemthethweni ngaphandle kokuhlukunyezwa.

Alugcini lapho lufuna naseziteshini zamaphoyisa kuqinisekiswe ukuthi amaphoyisa abesifazane akhona.

Ngonyaka odlule uNkk Motshekga wathumela isigungu sabaholi be-ANCWL KwaZulu-Natal ukuthi bayomxolisela eSilweni samabandla ngemuva kokuthi ayeveze le ndaba yokuhlolwa kwezintombi wathi lo khuba kufanele uvalwe ngoba izingane ziyahlukumezeka.

Indlunkulu kaZulu ngomlomo kaMntwana uThulani Zulu ithe ayizukuphawula ngalolu daba ngoba ayinalwazi ngalo.

UDkt Nomagugu Ngobese wenhlangano iNomkhubulwane ukhwele wadilika kulolu phiko elusola ngokuphuma umkhankaso wokucindezela abantu abamnyama ngokuchitha izinto zabo.

“Labo bantu besifazane be-ANC abahlukane nokugxambukela ezintweni zethu thina bantu abamnyama ngoba isiko lifana nenkolo ngakho awukwazi ukukhethela umuntu ukuthi kumele alithande yini noma aliyeke. Ukuhlolwa kwezintombi kungezinye zezinto njengesizwe samaZulu esiziqhenyayo ngayo. Bona uma bezenyeza ngesiyikho abasiyeke ngoba amasiko ethu akhona kumthethosisekelo futhi achaza isiqu sethu ukuthi singobani,” kusho uDkt Ngobese.

Uthe umkhuba ofana nokuthwala basho nabo ukuthi awuvalwe ngoba abantu sebewenza ngendlela engafanele bathathe izingane zabantu ngenkani bayoziganisa ekubeni kudala intombi yayivumelana nesoka layo ngoba lingenazo izinkomo ukuthi liyithwale bese kuthunyelwa abakhongi.

Izolo kushaye isikhathi sokushicilela i-ANCWL ingakawu-phenduli umyalezo ethunyelelwe wona ukuze icacise ngalokhu nocingo lomkhulumeli wayo uNkk Khusela Sangoni Khawe beluvaliwe.

Umkhosi woMhlanga wokuhlolwa kwezintombi oba sesigodlweni seSilo eNyokeni ubonakala ukhula minyaka yonke kanti kulo nyaka izintombi ebeziwuhambela bezibalelwa ku-30 000.

Izoba noKhisimusi omuncu imindeni ekhishwe ngesidlozana emaflethini eNewlands West.

LUNGI LANGA

IZOBA noKhisimusi omuncu imindeni ekhishwe ngesidlozana emaflethini kasomabhizinisi waseThekwini uMnuz Jay Singh aseCastle Hill, eNewlands West izolo obese kuphele unyaka ihlala kuwo ngokungemthetho.

Kusuke isidumo ngesikhathi laba bahlali abadla amaflethi ngejozi ngoba kungahlali muntu, bekhishwa amaphoyisa ehambisana nabasebenzi bakaSingh nenkampani yonogada.

Kuthiwa amaphoyisa agcine esevulela isisi esikhalisa unyembezi ngenhloso yokukhipha imindeni obekucaca ukuthi ayizimisele ukuphuma kulama fulethi.

Le mindeni ingene emafulethini kaSingh ngonyaka odlule emuva kokuthi kubonakale kungathi akehlo ohlalayo kuwo.

USingh oke waba sezindabeni emuva kokuwa kwesakhiwo senxanxathela yezitolo abeyakha oThongathi okwafa kuyo abasebenzi, kuthiwa ukhiphe imindeni emuva komyalelo weNkantolo eNkulu yaseThekwini.

Okhulumela uSingh, uMnuz Marvin Reddy, uthe konke abebekwenza bebelandela umyalelo wenkantolo enkulu futhi yena nethimba lakhe bebefikele ukuqinisekisa ukuthi kuyenzeka ngendlela enokuthula.

UMnuz Mbelenja Willie Shangase (85) ongomunye wabahlali abakhishwe kulama flethi ukhale ngokuthi akazi ukuthi uzohlala kuphi njengoba bekhishwe engalindele izolo.

“Bengingalindele ukuthi singakhishwa namuhla, ngakho angazi ukuthi sizolala kuphi nabantwana,” kusho uShangase.

Ubekhuluma ehleli ngaphandle kwesango nezimpahla zakhe namadodakazi akhe amane nabazukulu abane abehlala nabo efulethini elinamagumbi amabili okulala.

“Bese ngizitshela ukuthi ngizofela khona la ngoba ayikho enye indawo enginayo,” kusho uShangase.

Uthe yena nomndeni wakhe bebehlala emijondolo e-B5 khona eNewlands ngaphambi kokungena emaflethini ngoDisemba nyakenye.

“Sawelwa umjondolo esasihlala kuwo ngenxa yemvula. Kuthe uma abantu bengena emaflethini nathi sathola ithuba lokuba nekhaya,” kusho uShangase.

Ikhansela lakule ndawo uMnuz Siphiwe Lubhede lithe bese bebikeliwe ngokukhishwa kwabantu kulawa maflethi kodwa akukho abangakwenza ngaphandle kokuzama ukutholela labo abeza kubo usizo.

Okhulumela uMnyango wezokuHlaliswa kwaBantu esifundazweni uMnuz Mbulelo Baloyi, uthe akukho abebengakwenza ukuvimba ukukhishwa kwabantu ngoba leya ndawo akuyona ekahulumeni.

“Abantu kwakufanele engabe baphume ngoMashi kodwa sazama ukumisa lokhu ngoba kwakuzoqondana nesikhathi sobusika. Siphinde sazama ukukumisa ngo-Okthoba ngenhloso yokuthi bathole isikhathi sokuthola ezinye izindawo zokuhlala. Besingalindele ukuthi bangakhishwa namuhla. Kube kubi ukuthi bagcine bekhishwe ngesikhathi samaholidi Khisimusi,” kusho uBaloyi.

Uthe kunemindeni ephakathi elinganiselwa kwengu-17 abathi uma bevakashele lama flethi bathola ikufanele ukutholelwa indawo yokuhlala ngenxa yezimo ephila phansi kwazo.

UBaloyi uthe basezinhlelweni zokuzama ukuyisiza le mindeni nalabo abangenayo indawo yokuhlala.

UNksz Bandile Mdlalose ongumengameli wenhlangano elwela amalungelo abangenandawo iCommunity Justice Movement, uthe ngeke bakwazi ukuvimba ukukhishwa kwabantu ezindlini.

“Isinqumo seNkantolo eNkulu yaseThekwini sithe abantu abakhishwe, ngakho akukho esesingakwenza manje ukuvimba ukukhishwa kwabo. Esingakwenza ukuzama ukutholela labo abangenandawo yokuhlala usizo,” kusho uNksz Mdlalose.