Bamshiyela umyalezo wezinsongo esikoleni sakhe uthishanhloko waseVilla Maria Primary.

LUNGI LANGA

BAMSHIYELA umyalezo wezinsongo esikoleni sakhe uthishanhloko waseVilla Maria Primary, uNkk Nokuthula Magwanyana, owatholwa emotweni yakhe ebulewe ngesihluku ngokuklajwa nokugwazwa.

Enkonzweni yakhe yesikhumbuzo izolo ehholo lomphakathi eMaqongqo, kuvele ukuthi ngesonto elandulela abulawa ngalo yena nabanye bazithela phezu kwemibhalo eyayilotshwe ezindongeni zesikole ngombala obomvu sagazi ithi akashiye.

Imibhalo yayiphelezelwa ngamakhandlela abomvu ayexhonywe phansi.

USihlalo weNatu eMgungundlovu, uMnuz Mzwandile Nkabini, obekhuluma enkonzweni, uthe uNkk Magwanyana wakubika lokhu kubona nasezikhulwini zomnyango nasemaphoyiseni.

“Sazitshela ukuthi ngabantu abagangayo. Sazitshela ukuthi ngeke abantu basho uma bezokwenza into enje. Naye wayebona ngendlela efanayo. Kuthe uma sibona kuqhubeka isonto kungenzeki lutho sakhululeka kanti kuzokwenzeka,” kusho uNkabini.

Uthe ngabe kungcono ukube umnyango wawenze uphenyo ngemuva kokutholakaka kwemibhalo.

BeyiNatu kabeneme ngokufakwa konogada emuva kwendaba kulesi sikole.

Uthe bafisa sengathi ngabe kwakwenziwe okuthile ngaphambi kokubulawa kukaNkk Magwanyana.

Uphinde wazwakalisa ukungenami ngokuthi umnyango uthi ubheke uphenyo lwamaphoyisa kodwa kawukhulumi lutho ngokwenza olwawo uphenyo yize kwaziwa ukuthi uNkk Magwanyana wayekade ethole ubunzima ngesikhathi eqashwa njengothishanhloko.

UMnuz Thulasizwe Mvubu, obemele umqondisi jikelele wezeMfundo, uthe umnyango sewuthumele inkampani yonogada esikole emuva kokubulawa kukaNkk Magwanyana.

“Ngike ngezwa ngoweSGB eveza udaba lokuphepha esikoleni namuhla. Sithe uma sivakashela esikoleni safike sathola ukuthi othisha abazizwa bephephile. Kube sekwenziwa uhlelo oluyisipesheli lokuthi kube khona onogada esikoleni. Lokhu kuzoba yisikhashana ngoba kuzoba yizinyanga ezimbili kuphela,” kusho uMvubu.

Uthe yize benza imizamo yokuthi kuphephe esikoleni bayazi ukuthi ngeke bakuqinisekise ukuphepha.

“Singazama nje kodwa ngeke sikuqinisekise ukuphepha. Ongaphezulu kuphela oqinisekisa ukuphepha,” kusho uMvubu.

Uthe babeke uthisha obesebenza noNkk Magwanyana ukuthi abambe isikhundla sokuhola isikole. Uthisha bamncengile yize ebekhala ethi akafuni kube nguye.

Othisha abebesebenza noMagwanyana nabanye abebesebenzela eMgungundlovu namaphethelo bamchaze njengomuntu obewuthanda umsebenzi wakhe, enobuhlakani futhi enothando lwezingane.

UNkk Bonisiwe Sikhosana, obambile, uthe bebesebenzisana kahle noNkk Magwanyana.

Uthe bebebambisene ngangokuthi emuva kokubhalwa kwezindonga, bebevame ukukhuleka ehhovisi lakhe.

“Besivame ukuthi singene ehhovisi lakhe sikhuleke. Ubethanda ukuthi uma sikhuleka sibambane ngezandla sobahlanu siyithimba ebelisizana naye. Ngelinye ilanga ngesikhathi sikhuleka usitshelile ukuthi akasoli muntu kithina ngale nto,” kusho uNkk Sikhosana.

UNkk Magwanyana kulindeleke ukuthi afihlwe ngoMgqibelo umndeni usazoqinisekisa amathuna azofihlelwa kuwo.

Zigcwale izinkalo izingane ezingu-14 eziyingxenye yebezizotakulwa ekhaya lezintandane iTholuthando, eMbo ngaseHillcrest.

NONTUTHUKO NGUBANE

ZIGCWALE izinkalo izingane ezingu-14 eziyingxenye yebezizotakulwa ekhaya lezintandane iTholuthando, eMbo ngaseHillcrest.

Bathwale kanzima osonhlalakale abebelande izingane ezihlala kule ndawo izolo njengoba ezinye zazo bezingasabonwa nangokhalo, sezishaye zachitha.

Lokhu kulandela ukuvalwa kwale ndawo ngoLwesibili nguNgqongqoshe wezokuThuthukiswa koMphakathi kwaZulu-Natal, uNkk Weziwe Thusi, kulandela ukuvela kokuthi ayibhalisiwe njengendawo ehlala izintandane. UNkk Thusi ememezela ukuvalwa kwale ndawo, izingane zikhihle isililo.

Ngokukahulumeni bekuwukuzitakula izingane ngoba zihlala endaweni engekho emthethweni kodwa zona zikubuke njengokuhlukunyezwa.

UNkk Thusi ubehamba nezikhulu zoMnyango nosonhlalakahle. Leli khaya lasungulwa nguNksz Sindi Duma (43), eminyakeni ewu-11 edlule, linezingane eziwu-29 njengamanje kodwa ziningi esezadlula khona.

UNksz Duma uthe uhlulekile wukuvimba izingane njengoba zimtshele ukuthi zincamela ukuyohlala emgwaqweni kunoma zisuswe eTholuthando.

“Izingane azikwazanga ukwamukela ukuthi zizoyiswa kwelinye ikhaya. Ngizamile ukuzivimba kodwa eziningi zithathe izikhwama zazo zahamba. Zithe zincamela ukuhlala emgwaqweni kunokuba zihlukumezeke ngalolu hlobo. Ngikhathazekile kakhulu ngazo nekusasa lazo njengoba eziningi bezifunda esikoleni esikule ndawo, zinekusasa eliqhakazile,” kusho uNksz Duma.

UNkk Thusi uthe uqale ukuthola izikhalo ngaleli khaya kusihlalo wekomiti lomnyango esiShayamthetho ngoJulayi. Bekunabathile emphakathini abebethi kunezingane ezake zadlwengulwa kuleli khaya.

UNkk Thusi uthe emuva kokufika kosonhlalakahle bathole ukuthi ayikho ingane eyake yadlwengulwa noma yahlukumezeka kodwa kumele balivale ikhaya ngoba akukho emthethweni ukuhlalisa kwalo izingane.

Ezinye zazo bezikubeka ngembaba ukuthi njengoba zihlukaniswa “nonina” ngeke zisaphinde zibuyiselwe kuye.

Leli khaya lakhelwa uNksz Duma yi-Group 5. Alixhasiwe nguhulumeni kodwa uhamba engqongqoza ezinkampanini ukuze alekelelwe.

Izingane ezikhulume neSolezwe ngosuku okuvalwe ngalo leli khaya, zithe azifuni ukuhlukaniswa nonina nezinye izingane ebese zifana nodadewabo.

Ophethe ezokuxhumana kulo Mnyango uMnuz Vukani Mbhele uthe zingu-15 izingane abazitholele ikhaya elisha, ezinye zingene indlela.

“Uhlelo lokutholela lezi zingane amakhaya luyaqhubeka. Ezinye ezingu-15 sezivele zithathiwe. Ezinye sezindala ngeminyaka ngakho zizotholelwa elinye ikhaya nguNksz Duma. Ezinye zihambile,” kusho uMbhele.

UMnuz Sipho Msimango waseManzimtoti naye onendawo egcine izingane eziyizintandane uthe uyadumala ngesenzo sikaNkk Thusi ngoba lezi zingane bese zinekhaya. Unxuse ukuba uMnyango ubhekisise imithetho yawo ngoba ekugcineni ingalahlekisela izingane ngekusasa.

“Kunenye indlela abebengenza ngayo, bazame ukubhalisa le ndawo izingane zisahlezi khona ngoba bezivele zingahlukunyezwa. Siyazithanda izingane futhi silekelela uMnyango ngokuba sizigcine kodwa sibongwa ngokuvalwa kwezindawo zethu ngale ndlela,” kusho uMsimango.

UNkk Thusi uthe cishe kungathatha izinyanga ezintathu noma eziyisithupha ukuba kubhaliswe iTholuthando bese ivunyelwa ukuba yikhaya lezintandane.

Usehamba ejeqeza uMnuz Zwakele Mncwango ngemuva kokusatshiswa ngokuthi uzolekwa ngesoyi.

MLUNGISI GUMEDE

USEHAMBA ejeqeza umholi weDA KwaZulu-Natal uMnuz Zwakele Mncwango ngemuva kokusatshiswa ngokuthi uzolekwa ngesoyi uma eqhubeka nokukhuluma ngodaba lokubulawa kwabantu emahostela eThekwini.

UMncwango ophinde abe umholi weDA kuMasipala weTheku uthe ngeledlule uthole incwadi eposini lakwakhe imsabisa ngokuthi uzofa.

Uthe umbhali wayo usebenzise ikheli laseNewcastle kodwa incwadi inesitembu saseMnambithi.

UMncwango uthe udaba ulubikele amaphoyisa aseMgungundlovu.

“Lo muntu uthe angihlukane nokukhuluma ngodaba lokubulawa kwabantu emahostela ngoba angazi lutho ngempilo yakhona,” usho kanje.

Uthe umbhali ozibize ngoSam umtshele ukuthi uzofa uma eqhubeka nokukhuluma indaba yasemahostela waphinde wamthuka.

“Angazi ngempela ukuthi lo muntu ufunani ngoba ngiphakamise ukuthi akusungulwe ikhomishini ezophenya ngokubulawa kwabantu emahostela ngoba ngibona ukuthi abantu babulawiswa okwezimpukane. Mhlawumbe lo muntu uyakuthanda ukuchitheka kwegazi emahostela njengoba ethi angingayikhulumi indaba yakhona,” usho kanje.

Uthe uyabona ukuthi umbhali ucabanga ukuthi ugxeka uhulumeni we-ANC ngokuhluleka ukuxazulula inkinga yokubulawa kwabantu emahostela.

“Uphinde wathi angihlukane noMengameli Jacob Zuma, wathi akazi ukuthi ngangifunani emzini wakhe eNkandla,” usho kanje.

Uthe uyabona ukuthi umuntu obhale incwadi akaqondi ukuthi ipolitiki isebenza kanjani.

“Kuwumsebenzi wethu njengamaqembu aphikisayo ukuthi sigxeke noma senze izincomo kuhulumeni futhi kuwumsebenzi wethu ukuthi senze uhulumeni athwale ijoka uma kukhona izinto ezingahambi kahle,” usho kanje.

Uthe uzoqhubeka nomsebenzi wakhe ngeke avume ukusatshiswa.

Ukusatshiswa kukaMncwango kulandela isehlakalo sokusatshiswa kukaNkk Venessa Burger olwela amalungelo abantu ophenya ngokubulawa kwabantu ehostela iGlebelands.

Naye utshelwe ukuba avale umlomo ngodaba lokubulawa kwabantu eGlebelends, uma esathanda ukuphila.

Sebecela ku 20 abantu ababulawe eGlebelands kulo nyaka bedutshulwa, abasolwa baboshwe baphinde badedelwe ngenxa yofakazi abesaba ukufakaza.

Okhulumela amaphoyisa KwaZulu-Natal uMajor Thulani Zwane uthe likhona icala lokusabisa elivuliwe esiteshini samaphoyisa eMgungundlovu kodwa okwamanje bekungakaboshwa muntu.

Uphiko lwentsha ye-ANC kusasa luzoqala ingqungquthela yokukhetha ubuholi obusha eGallagher Estate, eGoli.

CELANI SIKHAKHANE

UPHIKO lwentsha ye-ANC kusasa luzoqala ingqungquthela yokukhetha ubuholi obusha eGallagher Estate, eGoli.

Kusukela ngo-1987 kuthathe uMnuz Peter Mokaba lolu phiko lwaludume ngezinkulumo ezinohlevane abanye ababethi kazihlangene nemikhankaso yokuthuthukisa intsha engasebenzi nehlukunyezwa yizidakamizwa. Umengameli ozothatha izintambo ubhekwe ngabomvu ukuthi ngabe kuye umlando uzoziphinda yini noma uza nokuhlukile.

Ngo-1987 kuya ku-1993, i-ANCYL yakhetha uMnuz Peter Mokaba owazakhela udumo ngezinkulumo ezinohlevane ayehlale ezisho okubalwa eyaduma kakhulu eyayithi “Kill the farmer, Kill the boer,”.

Le nkulumo wayisho ngo-1993 enkonzweni yesikhumbuzo sikaMnuz Chris Hani eyayiseWestern Cape, lapho akubeka kwacaca ukuthi uma uDkt Nelson Mandela ebulawa, amaBhunu azoyikhotha imbenge yomile ayoqothwa wonke.

Waphinde waduma ethi igciwane lengculazi liwushevu otshalwe ngabamhlophe ukuze kubulawe abamnyama ngenhloso yokubuyisela izwe embusweni wengcindezelo.

Ngo-1994 kuya ku-1996, kwathatha uMnuz Mlungisi Lulu Johnson owasolwa ngokuzikisa i-ANCYL kwangacaca lutho ebuholini bakhe yafana nento engekho.

Ngo-1996 kuya ku-2004, uMnuz Malusi Gigaba wathatha izintambo kanti yena izinto aduma ngazo kwaba ukuvikela uMengameli Thabo Mbeki owayegxekwa yiSasco ngokwemukela iziqu zobudokotela ayehlonishwa ngazo iRand Afrikaaner University (RAU) okwakuyinyuvesi eyayisolwa ngokugcwala ubandlululo futhi kungeyabamhlophe kuphela.

UGigaba wagxekwa yinhlangano yabafundi abadlelana ne-ANC, iSasco ngoba bethi uMbeki bekungafanele amukele lezi ziqu ngenxa yokuthi uguquko nokumeleleka kwabantu abamnyama yinto engakhulunywa eRAU.

UGigaba wayekholelwa ekutheni isenzo sikaMbeki sokwamukela iziqu eRAU sizosiza ngokuletha uguquko.

Ngo-2005 kuya ku-2008, uMnuz Fikile Mbalula wakhethwa ukuhola lolu phiko kanti yena izinto aduma ngazo kwaba yinkulumo yakhe nge-University of KwaZulu-Natal (UKZN).

Wathi kulesi sikhungo ungafunga ukuthi kusedolobheni laseNdiya iBombay ngoba kugcwele abafundi bohlanga lwamaNdiya kodwa abamnyama bayidlanzana.

“Ungafunga ukuthi le nyuvesi yenzelwe amaNdiya kuphela ngendlela agcwele ngayo noma ungathi yakhiwe eBombay,” kusho uMbalula.

UMbalula wagxekwa ngisho nayi-ANC kwavela ukuthi le nyuvesi inabafundi abamnyama abangamaphesenti angu-53, amaNdiya angu-31, abamhlophe 13% bese kuthi amaKhaladi abe ngamaphesenti amathathu kuphela ngaleso sikhathi.

Okunye aduma ngakho yinkulumo yakhe ngemuva kokugudluzwa kukaMbeki esikhundleni wathi: “I-ANC iyona efake uMbeki emandleni yiyo futhi emkhiphile. Lokho kukhombisa ukuthi inamandla angakanani.”

Ezinye izinkulumo aduma ngazo kwaba ngukuthuka abaholi esidlangalaleni okubalwa kubo uMnuz Trevor Manuel.

Ngo-2009 kuze kube u-2011 uMnuz Julius Malema wangena ezintanjeni. Akuzange kuphele ngisho isikhathi eside waqala waba nezinkulumo ezazivikela uMengameli Jacob Zuma ezitheni zakhe.

Enye yazo yayithi: “Siyomfela uZuma. Siyofa lapho efa khona.”

Naye waba sematheni ngengoma eyayithi Dubul’ibhunu eyayithandwa abaningi.

Akagcinanga lapho kodwa waba sematheni ngokukhuluma noma yini ngabaholi abehlukene.

Abanye babo kwaba nguNkk Naledi Pandor ayemdelela ngendlela akhuluma ngayo isiNgisi, kwaba uMntwana waKwaPhindangene ayembiza ngokuthi ungumkhiqizo omubi we-ANCYL.

Wathi uNksz Lindiwe Mazibuko uyisimaku sikaNkk Helen Zille ethi unguTea Girl ngakho ngeke axoxe naye esiteshini sethelevishini esasibacelile.

Waduma nangezinkulumo zakhe ngohulumeni waseBotswana ethi bazowuketula ngoba uMengameli wakhona uMnuz Ian Khama uyincelebane yamaNgisi.

Wathuka abantu abamnyama abangamalungu eDA wathi yizimaku zikaMadam Zille okuthi uma zimbona zisineke ubala.

Waphinde wajikela uZuma wambiza ngomuntu ongafundile ongacabangi kodwa ozithandela abantu besifazane.

Bonke laba baholi akukho lapho abebedume khona ngezinhlelo zokuthuthukisa intsha yakuleli engasebenzi negcwele emigwaqweni edlala izidakamizwa.

Kumanje kubhekwe ukuthi umholi ozothatha ngabe yini eza nayo kanti uMnuz Collen Maine othwelwe ngeqoma ubonwa engumuntu ozophusha umkhankaso wabaholi okumele bakhethwe engqungqutheleni ye-ANC yango-2017 lapho uZuma ezobe esezibeka khona izintambo.

Lolu phiko alukaze luholwe umuntu wesifazane selokhu lwasungulwa ngo-1944.

Kulindeleke ukuthi ihanjelwe ngabantu abangaphezu kuka-20 000 ingqungquthela yezimayelana nengculazi.

INTATHELI YESOLEZWE

KULINDELEKE ukuthi ihanjelwe ngabantu abangaphezu kuka-20 000 ingqungquthela yezimayelana nengculazi ezobe iseThekwini ngonyaka ozayo.

Ohola ithimba elihlela ingqungquthela, uDkt Memory Muturiki, uthe balindele ukuthi i-21st International Aids Conference ihehe izintatheli ezingu-1 500.

Kuzoba nezithunywa ezivela emazweni awu-180 ezizobe zisizwa ngezinye izithunywa ezibalelwa ku-1 000.

UMuturiki ubekhuluma emcimbini wokwethula ingqungquthela ngokusemthethweni.

Kulindeleke ukuthi ibe phakathi kukaJulayi 17-22 ngonyaka ozayo.

Izolo uNdunankulu waKwaZulu-Natal, uSenzo Mchunu, uthe yize kukuningi osekwenziwe ekulweni nokusabalala kwegciwane lengculazi kusafanele kwenziwe okungaphezulu.

UMchunu uthe bafuna ukuveza ukuzimisela kwabo nentshisekelo yabo ekulweni nokusabalala kwegciwane lengculazi.

Uthe kusekuningi okudinga ukwenziwa ukulwa nesinembekezelo sengculazi.

“Simele ukuyinqoba le mpi, ikakhulu leyo esezingqondweni zabantu,” kusho uMchunu.

Balinganiselwa ku-3.2 million abantu abathola imishanguzo yokuthithibalisa igciwane lengculazi. Iningi labo lise-KZN, okuwuhlelo olukhulu ukudlula zonke ezisemhlabeni jikelele.

Usihlalo weNatal Civil Society Forum, uMnuz Patrick Mdletshe, uthe yize kukuningi osekuzuziwe kusukela engqungqutheleni yokugcina eyaba seThekwini ngo-2000 kodwa isekhona inselelo njengokushoda kwemishanguzo.

Okwagqamisa kakhulu ingqungquthela yango-2000 yisicelo sikaNkosi Johnson owayeneminyaka engu-11 sokuthi bangacwaswa abantu abanegciwane.

Waphothula inkulumo yakhe ngokuthi:

“Sinakekeleni nisamukele.

Sonke singabantu. Sijwayelekile. Sinezandla. Sinezinyawo.

Siyakwazi ukuhamba, ukukhuluma, sinezidingo njengawo wonke umuntu. Ningasisabi.

Siyefana sonke.”

UNkosi, owazalwa enegciwane lengculazi, washona ngonyaka olandelayo.

UNgqongqoshe wezempilo eKZN, uDkt Sibongiseni Dhlomo, uthe ukuthelelena ngegciwane okusuka konina kuya ezinganeni kwehle ngo-20% kwaba wu-1.2% ngo-2014.

“Lokhu kuyasikhuthaza. Kuyasikhuthaza ukwehla kwalezi zibalo.

Sisengafinyelela ekutheni ingabi khona ngisho neyodwa ingane etheleleka ngegciwane kusuka kunina oyizalayo,” kusho uDhlomo.

Uphunyukile umfundisi wasePhoenix ocishe waqolwa ngobezibiza uNksz Lindiwe Sisulu kuFacebook.

ZANELE MTHETHWA

UPHUNYUKILE umfundisi wasePhoenix ocishe waqolwa ngobezibiza ngoNgqongqoshe woMnyango wezokuHlaliswa kwaBantu kuzwelonke, uNksz Lindiwe Sisulu, kuFacebook.

UMfu Thando Zungu weChurch of the Holy Trinity usexwayise abanye abangabalandeli balo ngqongqoshe mbumbulu okungenzeka babe yizisulu zokuqolwa.

Uthe wangena ekhasini likaFacebook wathola i-akhawunti ebhalwe igama likangqongqoshe kwasetshenziswa nesithombe sakhe.

Utshele leli phephandaba ukuthi nguyena owafaka isicelo sokuba ngumngani ka “ngqongqoshe” esigcine samukelekile.

“Ngathumela umyalezo ngibonga ukwamukelwa njengomngani. Ube esebuza ngami ngamtshela ukuthi ngingumfundisi. Ubuze ukuthi ngingathanda yini ukwenza omunye umsebenzi njengezinhlelo zomphakathi, ngavuma ngoba vele ukusebenza nomphakathi yinto yami,” kusho uZungu.

Uthe ozibiza ngongqongqoshe umtshele ukuthi kuno-R30 billion wemali ayithole kwabe-European Union ohambisana nezinhlelo zokuthuthukisa umphakathi.

Naye umkhuthazile ukuthi akabe kulolu hlelo athe luhlanganisa nokuqeda ububha negciwane lengculazi.

“Ngiqale ukusola esethi kumele ngikhokhe u-R989 athe ngowefomu. Ngimbuze ukuthi kukhokhwa kanjani ohlelweni lukahulumeni, wathi lolu lubhekene naye ngqo. Unginike i-akhawunti okumele ngifake kuyona imali nenombolo yeselula athe ngimshayele kuyona ebusuku ngoba emini umatasa,” kuchaza umfundisi.

Uthe ngenxa yokusola ukuthi uyaqolwa akazange ayishayele inombolo futhi wangayifaka nemali ebhange.

Uthe ugcine ethola imiyalezo imshusha ngokuthi akafake imali.

Ugcine ukukhuluma nalo “ngqongqoshe” kuFacebook ngoMsombuluko ebuza ukuthi imali useyifakile yini.

Isolezwe lishayele inombolo uZungu ayinikwe kuFacebook lwabanjwa ngowesilisa okuthe uma kuqhutshekwa nenkulumo wavala ucingo unomphelo.

Leli phephandaba lithole ukuthi mabili ama-akhawunti abhalwe uLindiwe Sisulu kuFacebook angombombayi kodwa anezithombe zakhe.

Ngaphansi kwemininingwane kubhalwe kuphela usuku lokuzalwa.

Kuwona womabili kufakwe ama-video ocansi kanti abanye bayabhala kuyo becabanga ukuthi bakhuluma nongqongqoshe.

UMnuz Ndivuwo Mabaya okhulumela uNgqongqoshe Sisulu uthe bazwile ukuthi kunabasebenzisa igama lakhe kuFacebook bethembisa umphakathi amathenda.

“Siyamncoma umfundisi ngesenzo sakhe sokuxwayisa umphakathi futhi sikhuthaza nabanye ukuthi benze njengaye. Yinye kuphela i-akhawunti kangqongqoshe ebhalwe uLindiwe_Sisulu esetshenziselwa ukuxhumana nomphakathi mayelana nezindlu,” usho kanje.

UMnuz George Mashamba, ukhala ngamaqabane agcwele kuKhongolose angazi lutho ngepolitiki.

MLUNGISI GUMEDE

ISISHOSHOVU se-ANC ne-SACP esadonsa iminyaka eRobben Island uMnuz George Mashamba, sikhala ngamaqabane agcwele kuKhongolose angazi lutho ngepolitiki ajoyine umbutho ngoba efuna ukuzuza amathenda.

Ethula inkulumo yakhe eMoses Mabhida Stadium ngoLwesithathu ebusuku ngesikhathi enza isifundo ngengqalabutho ake aboshwa nayo eRobben Island uMnuz Harry Gwala, uMashamba, uthe amaqabane amaningi awazi lutho uyaphoxeka uma esemhlanganweni wegatsha lakhe eLimpopo kukhuluma uSihlalo wabo.

“Sinenkinga yabantu abagcwele ku-ANC manje abawoskhotheni abangazi lutho, abajoyine inhlangano ngoba befuna ukuzuza amathenda. Iningi lalabantu lingaze likhiphe ngisho isidumbu uma kukhona umuntu elibanga naye isikhundla,” usho kanje.

UMashamba, uthe akangabazi ukuthi uGwala akajabule lapho ekhona uma ebona izinga i-ANC ekulo njengamanje.

“OGwala bajoyina uKhongolose ngoba nakhu befuna ukulwela ingcindezelo babeka impilo yabo engcupheni njengoba bebeyizitha zikahulumeni wobandlululo bengena bephuma emajele,” usho kanje.

UMashamba uphinde wagxeka labo abahlubuka ku-ANC basungule izinhlangano zabo.

“Noma bangahamba ku-ANC kodwa bayazi ukuthi ikhaya labo iliphi, kwipolitiki ayikho into ethi lona ngubaba wami wakudala, uyihlo uhlale enguyihlo,” usho kanje.

Uthe iningi lalaba abahamba ku-ANC lisuke linganeme ngokuthile wathi ukushiya kwabo akuhlukile nokudayisa ngomzabalazo owalwelwa oGwala nabanye abaningi. UMashamba, uthe uhlale kancane noGwala kodwa wafunda okuningi kuyena.

Uchaze uGwala njengomuntu obenenkani kodwa ekhonze ukufunda.

“Ngikhumbula ngelinye ilanga kukhona uTata uNelson Mandela lapha KwaZulu-Natal ngemuva kokhetho lokuqala lentando yeningi. UMandela wathi kumele samukele ukuba i-ANC ihluliwe okhethweni yi-IFP, uGwala wasukuma wathi mhlonishwa mina ngiyaphikisana nokuthi uthi asamukele umphumela wokhetho. Nguyena yedwa owakwazi ukuphumela obala waqonda uMandela owayesatshwa kakhulu,” usho kanje.

Uthe okunye uGwala ubengavele akholwe inoma yini eshiwoyo ngaphandle kobufakazi obubambekayo.

“Yize kade engumuntu onenkani kodwa ubekwazi ukuvuma athi wonile,” usho kanje.

Obekhulumela umndeni wakwaGwala, uMnuz Bhabha Mhlongo, uthe yize sekuphele iminyaka engu-20 ashona kodwa namanje sisakhona isikhala sakhe emndenini.

Sicasuleabaholi abaphezulu beNFP isenzo sentsha yaleli qembu eGoli sokuhlaba ikhwelo lokuba kubuyiswe uMnuz Bheki Cele.

CELANI SIKHAKHANE

SICASULE abaholi abaphezulu beNFP isenzo sentsha yaleli qembu eGoli sokuhlaba ikhwelo lokuba kubuyiswe uMnuz Bheki Cele esikhundleni sokuba nguMkhuzi wamaPhoyisa ngoba kunenkolelo yokuthi nguyena ongakwazi ukulwisana nobugebengu.

UNobhala Jikelele weNFP uSolwazi Nhlanhla Khubisa, uthe kuyihlazo ukuthi kungaba nabantu abakuleli qembu abangaqhuba umkhankaso wokuba kubuyiswe uCele ekubeni kwazi wonke umuntu ukuthi waxoshwa.

“Thina siyiNFP sithi akuqokwe umuntu okhona ngaphakathi embuthweni wamaphoyisa onamagalelo amgunyaza ukuba angazithatha izintambo zokukhuza amaphoyisa.

“Indaba kaCele siyaziqhelelanisa nayo ngoba kuyaziwa ukuthi watholwa engakufanele ukuphatha amaphoyisa waze waxoshwa ngisho wuMengameli,” kusho uKhubisa.

Intsha yaleli qembu ibithi ifuna okungenani uCele ayofakwa esifundazweni iGauteng ngoba liphezulu izinga lokubulawa kwabantu namaphoyisa.

UKhubisa uthe baningi abantu emaphoyiseni asebenesikhathi beyibambile futhi abanamakhono adingekayo okuthi bakwazi ukungena esikhundleni somkhuzi wamaphoyisa.

UNobhala wentsha yeNFP eGauteng, uMnuz Sabelo Dlamini, uthe kuyacaca ukuthi abaholi babo baphila komunye umhlaba uma bezochitha indaba kaCele ekubeni isimo sisibi abantu bebulawa kabuhlungu yizigebengu.

“Okokuqala, ngiyabona ukuthi thina lapha eGauteng nabaholi bethu kuzwelonke sihola izinhlaka ezingafani ngendlela abakhuluma ngayo.

“Bekungabakuhle ukuthi basithinte noma basibize basho lokho abangakuthandi esikwenzile kunokuba baqhamuke sebesihlasela kwabezindaba.

“Ngaphandle kwalokho wonke umuntu ohlala eGauteng uyasibona isidingo sikaCele ngenxa yokuthi amaphoyisa abulawa phambi kwabantu bebuka, amalungu omphakathi adutshulwa emini kubukwa ebanjwa inkunzi yizigebengu,” kusho uDlamini.

Uthe okunye abaholi beNFP okumele bakuqonde wukuthi uCele akazange atholwe yinkantolo enecala waze waboshwa ngoba ukube kunjalo ngabe akazange aqokelwe isikhundla sokuba yiphini likaNgqongqoshe wezoLimo, amaHlathi nokuDoba kuleli.

I-EFF eKZN yenze izinguquko esiShayamthetho yakhipha ilungu layo lesifazane ebeliyimele uNkk Thembi Msane.

CELANI SIKHAKHANE

I-ECONOMIC Freedom Fighters (EFF) KwaZulu-Natal yenze izinguquko esiShayamthetho yakhipha ilungu layo lesifazane ebeliyimele uNkk Thembi Msane yafaka uSihlalo wayo wesifundazwe uMnuz Vukani Ndlovu.

Izolo uSomlomo wesiShayamthetho uNkk Lydia Johnson ufungise uNdlovu njengelungu elisha le-EFF kulesi sakhiwo.

UNkk Msane oneziqu zobunjiniyela ubaziwa ngokuba owesifazane onamagalelo anzima uma esebeka amaphuzu akhe yize ebesuke enikezwe umzuzu owodwa ngenxa yokuthi iqembu lakhe linamalungu amabili nje kuphela esiShayamthetho.

“Empeleni uThembi (Nkk Msane), akakhishwanga esiShayamthetho ngoba kunezinkinga kodwa kuthathwe isinqumo sokuthi ayosebenza ehhovisi likazwelonke ophikweni olubhekele ezokhetho.

“Okunye okubuye kwabhekwa kuye kube yikhono lakhe nokuthi ubuye abe sesigungwini sikazwelonke ngakho kuhle asebenzele ehhovisi lethu elibhekele izindaba zeqembu jikelele,” kusho uNdlovu.

UNkk Msane ungene esiShayamthetho ngonyaka odlule ngemuva kokhetho lukazwelonke lapho iqembu lakhe lithole khona izihlalo ezimbili, lilandelwa iMinority Front enesihlalo esisodwa.

Ngakolunye uhlangothi uNdlovu useyobhekana nozakwabo ayehola nabo i-ANCYL ngesikhathi esengunobhala eThekwini, okungoMnuz Mthandeni Dlungwane noSboniso Duma asebeyizimbangi zakhe manje.

UNdlovu usanda kukhethwa njengoSihlalo wesifundazwe we-EFF ehlula uMnuz Vusi Khoza kodwa sebezohola naye iqembu esiShayamthetho njengoba sekuyibo bobabili abalimele.

Ngaphandle kwalokho uNdlovu usule ezinyangeni ezintathu ezidlule emsebenzini ayeqashwe kuwona eseyi-ANCYL wohlaka olubhekele ukuthuthukisa intsha i-NYDA eThekwini.

Lo mholi wagcina esele yedwa ku-ANCYL KwaZulu-Natal kwababeseka uMnuz Julius Malema engakaxoshwa kuKhongolose.

Ngesikhathi uMalema nesigungu sakhe behlakaza ubuholi be-ANCYL KwaZulu-Natal obabukhethwe ngo 2010 engqungqutheleni eyayiseHoward College, uNdlovu wakhethwa ethimbeni lesikhashana elalihola isifundazwe.

Kuleli thimba kwakukhona abaholi abafana noMnuz Sphe Zulu oseyiMeya yaseMandeni kodwa owagcina ehoxile ngoba ebona ukuthi kuyaphela ukwesekwa kukaMalema kwasala uNdlovu.

UNdlovu ujoyine i-EFF ngemuva kwezinyanga ezimbalwa isunguliwe.

Kunezinsolo zokuthi kunosomabhizinisi baseMlazi abebephoqa umasipala ukuthi uyeke ukuqasha izinkampani zangaphandle.

CELANI SIKHAKHANE

KUnezinsolo zokuthi kunosomabhizinisi baseMlazi abebephoqa umasipala ukuthi uyeke ukuqasha izinkampani zangaphandle kodwa unikeze bona amathenda ngokusebenzisa amasosha oMkhonto weSizwe ukuphehla udweshu ngokungaqoqwa kukadoti.

Kuthiwa osomabhizinisi abangamalungu oMlazi Business Forum basolwa ngokuba sekhaleni lokuphazamisa ukusebenza kukamasipala eMlazi, okugcine kuhumusheka ngokuthi kwenziwa yilabo ababengamasosha oMkhonto.

“Bebengaqali, bazama ukuphoqa umasipala ukuthi ubanikeze amathenda eminyakeni emithathu edlule ngesikhathi kwakwakhiwa umgwaqo oxhumanisa u K, M, N no-R balwa nenkampani eyayiqashiwe bethi akuyona eyaseMlazi. Baphinde baphazamisa ukwakhiwa kukaMangosuthu Highway bethi umasipala uqashe izinkampani zamaNdiya ukuba zizosebenza endaweni yabo ekubeni bona bekhona.

“Ngonyaka odlule babevimba amaloli ayehambisa impahla yokwakha izindlu zomxhaso eMlazi kodwa bathuswa wuNkk Shaun Mpisane. Ngenxa yokuthi bayamsaba bavele badedela amaloli ayothululela yena impahla yokwakha kuphela,” kusho umthombo ocele ukungadalulwa ngenxa yokungaphephi kwawo ngenxa yobucayi bodaba.

Unobhala woMkhonto weSizwe KwaZulu-Natal, uMnuz Jazzman Mthembu, uthe nakuba engeke aphawule ngezinsolo kodwa akwaziyo wukuthi abe MK sebebekezele isikhathi eside behlupheka.

“Abanye sebeze bahluthukelwa yizinhliziyo bahluleka ukubekezela ngenxa yenhlupheko yingakho sekuba nezigameko lapho bephazamisa khona ukusebenza.

“Ngaphandle kwalokho umasipala uyazama ukulungisa isimo njengoba kube nesivumelwano esisenze naye ukuze amasosha wonke abhekelwe nemindeni yawo. Ngaphandle kwalokho besinomhlangano noNdunankulu, uMnuz Senzo Mchunu, wasitshela ukuthi uzosungula uhlaka oluzobhekana ngqo nezidingo zawo wonke amasosha omzabalazo okungewona awoMkhonto weSizwe kuphela kodwa nawezinye izinhlangano njenge-Apla,” kusho uMthembu.

Imizamo yokuthola osomabhizinisi baseMlazi ukuze baziphendulele ngezinsolo ayiphumelelanga kangangokuthi omunye otholakale ocingweni unqabile ukuphawula wathi useGoli ngakho akukho akwaziyo.

UMthembu uthe isimo besisibi kodwa selokhu kungene uMengameli Jacob Zuma ezintanjeni kuba ngcono ngoba uqhamuke nezinhlelo zokuba kubhekelwe bonke labo ababengamalungu eMK.

UMthembu, owaqeqeshwa e-Angola, uthe amasosha amaningi abhekene nobubha yilawo angazange akwazi ukungena ohlelweni lokufakwa embuthweni wezokuVikela ngo-1994 sekubuyiwe ekudingisweni.

Uthe amanye angena kodwa afica isimo sisibi ahlukunyezwa amabhunu, agcina eshiye phansi abuya. Amanye azanyelwa kwaTransnet kodwa awazange anele wonke.

Uthe kunohlelo lwezindlu oluzoqala ngonyaka ozayo abaluthenjiswe wuNgqongqoshe uLindiwe Sisulu kodwa olungezukushesha ngendlela abayidingayo.

UMthembu uthe uhlelo luzoqala ngoKhomanda asebekhulile ababizwa ngama-veteran abazohlomula esigabeni sokuqala bese kulandela laba abasebancane iningi labo elaqeqeshwa lapha ngaphakathi ngo-1993 ngoba kwakungasayiwa ekudingisweni.

Okhulumela uNgqonqoshe uNosiviwe Mapisa-Nqakula, uNkk Nonzukiso Peter, uthe udaba lwamasosha oMkhonto luyabhekisiswa. Ungqongqoshe ubebize ingqungquthela ebizobhunga kabanzi ngezinkinga zalaba bantu.

Inhlangano yabashayeli bamatekisi uQinamshayeli ithi isithanda ukubama emphinjeni indaba yokushaywa kwamalungu ayo obasi.

MLUNGISI GUMEDE

INHLANGANO yabashayeli bamatekisi KwaZulu-Natal uQinamshayeli ithi isithanda ukubama emphinjeni indaba yokushaywa kwamalungu ayo obasi, yafunga yagomela ukuthi isizoziphindiselela uma ihlukunyezwa.

Ukuphawula kwale nhlangano kulandela isigameko sangeledlule lapho umshayeli waseNanda uMnuz Siphiwe Mthethwa ehlaselwe ubasi wakhe wamshaya kanzima waphinde wamgwaza ngomtafula.

Isigameko sokushaywa kukaMthethwa senzeke ngoLwesithathu olwedlule emzini kabasi wakhe elethe imali yosuku.

UMthethwa, ozifikele mathupha emahhovisi eSolezwe ehamba nobuholi bukaQinamshayeli, uthe ubehambise imali kumqashi wakhe okhale ngokuthi incane, bahilizisana waqala wamshaya kwagcina sekungenela nomndeni womqashi.

“Ngiqale ngashaywa ubasi, kwangenelela nomndeni wakhe bagcine sebengigqema ngomsakazo wemoto ekhanda,” kusho uMthethwa.

UMthethwa uthe ubasi ubemsola ngokuthi ushaya isokisi.

“Besijwayele ukubanga indaba yemali nobasi ekhala ngokuthi ngiletha imali encane kodwa ubeqala ukuthi aze angishaye,” usho kanje.

Okhulumela amaphoyisa KwaZulu-Natal uMajor Thulani Zwane uthe likhona icala lokushaya elivulwe esiteshini samaphoyisa eMtshebheni eNanda kodwa bekungakaboshwa muntu.

IPhini likaNobhala kaQinamshayeli KwaZulu-Natal uMnuz Clement Doncabe lithe sekwanele abasafuni ukuthi baphinde bezwe kuthiwa kukhona ilungu labo elishaywe ubasi.

“Imbi le nto eyenziwa obasi ukuthi bashaye amalungu ethu, uma kukhona izinkinga kumele kuxoxiswane hhayi ukuthi kube khona oshaywayo, nathi singamadoda ukuthi siyasebenza akusho ukuthi singabafana,” usho kanje.

UDoncane uthe bahlela ukhukhulelangoqo womhlangano ozoba sepaki kuBotha eThekwini lapho bezobe bememe khona amalungu abo ngenhloso yokuphuma nesinqumo sokuthi yini okumele bayenze ngenhloso yokuqeda ukuhlukunyezwa.

“Kulo mhlangano sizobiza ngisho uNgqongqoshe wezokuThutha KwaZulu-Natal uMnuz Willies Mchunu simbikele ngokuhlukunyezwa kwethu embonini,” usho kanje.

Isolezwe selibike kaningi ngabashayeli abashaywa obasi ngoba bebasola ngezinto ezahlukene.

Muva nje, leli phephandaba libike ngomshayeli waseMlazi naye owashaywa obasi bakhe ngoba bemsola ngokuthi ubeshayela edakiwe.

UDoncabe uthe bafuna ukuthi uphele lo mkhuba, uma kungenzeki lokho bazothatha isinyathelo sokuthi bamise umsebenzi ngenhloso yokuzwakalisa ilaka labo.

IZIMO zempilo esikhathini samanje yizo ezenza izingane eziningi zikhule ngaphandle kobaba.

ZANELE MTHETHWA

IZIMO zempilo esikhathini samanje yizo ezenza izingane eziningi zikhule ngaphandle kobaba. Izibalo ezisanda kuvela zikhomba ukuthi isimo sisazoqhubeka naseminyakeni ezayo.

Umbiko okhishwe ngabakwaStatistics South Africa kuleli sonto uveza ukuthi ezinganeni ezizalwe ngonyaka odlule, ziningi ezingenabo oyise.

Ngokomthetho womnyango wezasekhaya uma kuqoqwa izibalo zezingane ezizelwe kufuneka kubhalise abazali bazo, osekuvele wukuthi kuyivelakancane ukuthi obaba babekhona.

Zingu-1.1million izingane ezizalwe ngonyaka odlule kodwa eningini lazo kabaveli oyise bazo.

Izibalo zokuzalwa kwezingane nokubhaliswa kwazo kusukela ngo-1994, ziveza ukuthi ngo-2012 zingu-66.6% izingane okungaveli amagama oyise eceleni kwamagama azo kwizitifiketi zokuzalwa.

Ngo-2013 zibe ngu-65% kwathi ngonyaka odlule zaba ngu-63.6%.

Nokho kulo mbiko akuchazwa ukuthi kungani obaba bengaveli.

UMnuz Mayihlome Tshwete, okhulumela uNgqongqoshe woMnyango wezaseKhaya, uMnuz Malusi Gigaba, uthe kunzima ukuqagela ngezibalo zokushoda kobaba. Uthe uma bebhalisa ababuzi ukuthi muphi omunye umzali ngoba bahlonipha ilungelo lomphakathi.

“Lokhu kuhlobene kakhulu nesimo sempilo yamanje, okuyiyona enomthelela yokungabonakali kobaba ezibalweni.

Uma umuntu ezobhalisa isitifiketi sengane sokuzalwa, siyamvumela ukuthi abhalise umzali oyedwa ngoba siyaziqonda izimo esiphila kuzo. Sisuke senzela khona lokho ukuthi abantu babe nelungelo lokubhalisa noma yimuphi umzali,” kusho yena.

Uthe ngeke bakwazi nokusho ukuthi obaba abangaveli ezibalweni yingoba basuke beshonile noma abasenabo ubudlelwano nengane ngoba ababuzi okuningi.

UNksz Nokuthula Zuma, onguSonhlalakahle eThekwini, uthe ukukhula kwezingane ngaphandle kobaba kuzodala inzondo nobuhlungu obungapheli ezinganeni.

“Kuningi okwenza izingane zikhule ngaphandle koyise. Inkinga enkulu esijwayele ukubhekana nayo wukuthi obaba bajwayele ukunyamalala uma sekuzelwe ingane. Kwesinye isikhathi naye unina usuke engenaso isiqiniseko sokuthi ngubani ubaba wengane.

Kukhona abanye omama okuthi noma bemazi uyise wengane kodwa bangafuni ingane imazi ngoba usuke engabambisene nonina, engakwazi nokondla,” kusho uNksz Zuma.

Kulo mbiko kubuye kwavela nokuthi senyukile isibalo sokuzalwa kwezingane zabafana.

Ngonyaka odlule kuzalwe izingane zabafana ezingu-587 592 nezamantombazane ezingu-573 567.

ASHABALELE amaphupho esitabane okuba ngunkosikazi wesibili kowesilisa oshadile abesethandane naye iminyaka eyisihlanu, esesimbambe ukuthi ubejola nomngani waso wesilisa.

ZANELE MTHETHWA

ASHABALELE amaphupho esitabane okuba ngunkosikazi wesibili kowesilisa oshadile abesethandane naye iminyaka eyisihlanu, esesimbambe ukuthi ubejola nomngani waso wesilisa.

UMnuz Sandile Mlomo (22), waseMayville, eThekwini uthi ubesanethemba lokuthi lo wesilisa odabuka eNigeria, uzomenza ‘unkosikazi’ wesibili ngendlela uthando lwabo obeluvutha ngayo.

UMlomo othi isoka lakhe belaziwa ngisho kubo, ubesehlangene nodadewabo besoka ebelithembise nokumveza kumkalo ongowesifazane.

Yize ajola naye azi ukuthi ushadile, uMlomo uthi ubengenankinga ukugana esithenjini ngoba naye ukhulele kusona. Uthando obeluvutha lushabalele ngoLwesibili ngemuva kokuba uMlomo ethole ukuthi isoka lakhe belimbhangqe nomngani wakhe naye oyisitabane.

Uthe uthuke woma ekhonjiswa ngomunye umngani wakhe izithombe zesoka lakhe, athole ukuthi belitetemuka nomngani ehhotela eligudle ulwandle eThekwini.

“Bengisamthanda impela kodwa ngiphoxekile ngalokhu akwenzile. Kuyo yonke le minyaka ngithembekile kuyena, yena ubengisebenzisa nje.

“Bengisalinde ukuthi uzongiveza kumkakhe njengesethembiso sakhe kanti sekuzovela lokhu. Ngifuna aphumele obala ngempilo yakhe, angadlali ngemizwa yabantu,” kusho yena.

UMlomo uthi wahlangana nalo somabhizinisi ozinze eZululand kodwa ojwayele ukuza eThekwini ngokomsebenzi.

Uthe ubemenzela yonke into futhi engakufihli ukuthi ushadile kodwa enesikhwele engafuni ngisho angene ezinkundleni zokuxhumana.

Uthi isoka lamazisa kodadewabo ngonyaka odlule kwenye indawo yokudla eThekwini.

Nakubo uthi bebemazi njengesoka bengenankinga ngoba bayayazi impilo yakhe.

UMnuz Wandile Mbatha (22), ongumngani kaMlomo uvumile ukuthi ubethandana nalo wesilisa kodwa engazi ukuthi nguye othandana nomngani wakhe.

Uthe bebesahlangane izinyanga eziyisihlanu futhi emazi ukuthi ushadile.

Ukhombise Isolezwe ingxoxo kaWhatsApp nalo wesilisa abagcine bexabana ngoba embuza ukuthi udlalelani ngaye nomngani wakhe ngokubabhangqa.

Kule ngxoxo lo wesilisa ukhombisa ukungabi nandaba uma uMbatha emsabisa ngokuveza amahlazo akhe kumkakhe.

Ethintwa izolo lo somabhizinisi uvumile ukuthi uyazana noMlomo kodwa waphika ukuthi bayathandana.

Uqale wavuma ukukhuluma wabuye washintsha wathi iphephandaba alibhale elikuthandayo, akukho azokusho.

Ungene enkantolo kaMantshi eThekwini enyonyoba sengathi udidekile umsolwa ozinikele emaphoyiseni ngecala lokubulala inkosikazi.

NONTUTHUKO NGUBANE

UNGENE enkantolo kaMantshi eThekwini izolo enyonyoba sengathi udidekile umsolwa ozinikele emaphoyiseni ngecala lokubulala inkosikazi yakhe ngebhomu lesandla.

UMnuz Joel Mbuso Mohoasa (44) waseManzimtoti owake waba yisosha loMkhonto weSizwe (MK), ubefake iteku elilodwa ebelingafasiwe kolunye unyawo efake isokisi kuphela, exhuga.

UMohoasa ubelokhu eqalaza, kube sengathi ingqondo ibuye ehambe.

Ubhekene namacala amathathu, elokubulala uNkk Lesego Mohoasa, elokuzama ukubulala njengoba kwakukhona izingane zakhe ezimbili endlini ngesikhathi eqhumisa ibhomu lesandla, nelokuphatha isiqhumane esingekho emthethweni.

Lesi sigameko senzeka ngempelasonto kanti uMohoasa ubekade ebhacile, efunwa amaphoyisa. Uze wazinikela ebusuku ngoLwesithathu emaphoyiseni aseManzimtoti.

Izolo kube yimizuzwana icala lisenkantolo, iMantshi uNkk Varma Armu wabe eselihlehlisela uSepthemba 11 nonyaka ukuze umsolwa ezofaka isicelo sebheyili.

Ngaphambi kokuba icala liqale iMantshi ibuze ummeli kaMohoasa, uMnuz Mpumelelo Zikalala ukuthi sikhona yini isizathu abanaso sokunqaba ukuba abezindaba bethathe izithombe.

Ummeli uveze ukuthi akukho okungabaphazamisa ecaleni uma kuvela izithombe zakhe emphakathini.

IMantshi ithe ngenxa yokuba undabuzekwayo kodaba iyakuvumela ukuba abezindaba bethwebule umsolwa.

Ngalowo mzuzu abezindaba abebebaningi ngaphezu kwabebezothamela amacala, bahlale phezu kwakhe uMohoasa.

Umsolwa ubelokhu ezifihle ubuso, esebenzisa isigqoko abesiphethe.

Umndeni womsolwa ubukhona enkantolo kodwa awufunanga ukuphawula ngalolu daba.

Umndeni kamufi awuzange ubonakale enkantolo okuvele ukuthi ulungiselela umngcwabo eBloemfontein ngempelasonto ezayo (Septhemba 12).

Akazange abuzwe ukuthi uyalivuma noma uyaliphika icala umsolwa.

Ngokwemibiko yamaphoyisa umsolwa wajikijela inkosikazi yakhe ngamabhomu amabili esandla, kwagcina kuqhume eyodwa.

Umufi waphuthunyiswa esibhedlela iKingsway lapho eshonele khona ngeSonto ekuseni.

Umyeni kamufi kuthiwa wadla phansi emuva kwesigameko eshiya izingane zabo ezimbili, eneminyaka eyisithupha neyisikhombisa.

Kuthiwa lezi zingane bezicashe ngaphansi kwengubo ekamelweni lokulala ngesikhathi kwenzeka isigameko, zaze zatholwa wumakhelwane.

Indlu yayisigcwele intuthu ngenxa yokuqhuma kwaleli bhomu.

Umsolwa kwavela ukuthi ungusomabhizinisi owayesebenzela iMK ngaphambi kokusula emsebenzini eyoqala amabhizinisi.

UNkk Mohoasa ubengumabhalane enkanjini yamasosha eBluff eThekwini.

Ngokwemibiko yamaphoyisa lo somabhizinisi wabuya ekhaya ngoMgqibelo ebusuku nenkosikazi yakhe bevela emngcwabeni, kwasuka ingxabano.

Kusolwa ukuthi ingxabano yasuswa wukubanga imali.

Kuthiwa umufi uye ekhishini eyobikela umfowabo womyeni wakhe ukuthi bayaxabana. Umfowabo womyeni kuthiwa ubone ibhomu lesandla liphethwe wumsolwa wabaleka eshiya lo wesifazane ogcine ngokushona.

Kuthiwa umyeni kamufi ujikijele amabhomu esandla amabili ekhishini maqede wavala umnyango. UNkk Mohoasa kuthiwa ulimale ebusweni nakwesingezansi emzimbeni.

Osomabhizinisi abancane abangabanikazi bamathaveni bathi bazolwa ngayo yonke indlela ukuthi ungaphasi umthetho ohlongozwa uhulumeni.

ZANELE MTHETHWA

OSOMABHIZINISI abancane abangabanikazi bamathaveni bathi bazolwa ngayo yonke indlela ukuthi ungaphasi umthetho ohlongozwa uhulumeni wokubasusa emiphakathini.

Uhulumeni kazwelonke uphakamise ukuthi ibuyekezwe imithetho elawula ukusetshenziswa kotshwala.

Uphakamisa ukuthi amathaveni abe kude nemizi nezikhungo zomphakathi.

Isiphakamiso samukeliwe ngamalungu ePhalamende sadluliselwa emalungwini omphakathi ukuthi aphawule ngaso.

Emqulwini kahulumeni obhalwe imininingwane ngalesi siphakamiso, uNgqongqoshe wezoHwebo neziMboni uMnuz Rob Davies, uthi lesi senzelwe ukunciphisa ubungozi bokusetshenziswa kotshwala.

Esiphakamisweni uthi kuzomele ithaveni iqhele ngo-500 metres emizini nasezikhungweni zomphakathi, okubalwa izikole namasonto.

UMnuz Asingoni Nzama ongumnikazi weBumnandini Tavern KwaMshayazafe, eNanda, uthi bazolamba uma kuvalwa amabhizinisi abo ngoba baphila ngawo.

UNzama oseneminyaka eyisithupha ekuleli bhizinisi, uthi akaze asebenze kodwa wondla umndeni ngayo ithaveni.

“Angiyizwa le nto eshiwo uhulumeni ngoba noma angasivala thina emalokishini, utshwala buzobe bungavaliwe. Abantu ngeke bahluleke ukuthola utshwala. Ngabe ngiyezwa ukuthi uthi akuvalwe unomphelo ukudayisa utshwala. Kusho ukuthi inhloso ukuphuca thina isinkwa, asazi ngoba nemisebenzi ayikho nohulumeni uyahluleka ukusondla,” kusho uNzama.

Uthe kwanele lokhu okwenziwe uhulumeni njengoba kumanje bekuthelela ukuba namalayisensi okudayisa utshwala.

Emuva kwalesi siphakamiso sikahulumeni sekukhona abanikazi bamathaveni abasungule ososeshini ukulwa nohulumeni.

Abanye babo yiBay Taverners Association yaseNelson Mandela By Metro.

Lo soseshini usuthumele incwadi uMnyango wezoHwebo neziMboni uphikisana nesiphakamiso.

UMnuz Tammy Nqam onguNobhala uthi kusobala ukuthi uhulumeni akabhekanga iqiniso ngokusebenza kwamathaveni kuqala.

Uthe vele iningi lawo asezindaweni zomphakathi, okusho ukuthi uma evalwa kuzowa amabhizinisi amancane abamnyama.

“Thina sisebenzela emalokishini lapho kungekho izindawo ezibekelwe kuphela amabhizinisi njengasesilungwini. Amathaveni asevule inqwaba yemisebenzi emiphakathini entulayo. Nathi siyafana nosomabhizinisi abancane, yena uhulumeni abancoma ngokuthi banesandla ekuthuthukiseni umnotho wezwe,” usho kanje.

Ezinye iziphakamiso esezibekwe uhulumeni ukulawula ukusetshenziswa kotshwala, ukuncishiswa kwezikhangisi nokwenyusa iminyaka ibe ngu-21 kwabavumeleke ukubuthenga.

Athukuthele athelwa ngamanzi amalungu e-ANC esifazane ngenkulumo yembongi uNtsiki Mazwai.

MLUNGISI GUMEDE

ATHUKUTHELE athelwa ngamanzi amalungu e-ANC esifazane ngenkulumo yembongi uNtsiki Mazwai ayenze kuTwitter ethi abantu besifazane be-ANC bayiziphukuphuku ezilalwayo ukuze bathole izikhundla.

Ukuphawula kwakhe kumdonsele amanzi ngomsele ebantwini abaningi abebemsola abanye bemthuka bembiza ngogingqwayo idosha labakhonzi.

UMazwai, osekujwayelekile ukuthi enze izinkulumo eziqubula uhlevane nezisusa umsindo, uphawule kanje ngoMgqibelo kodwa nayizolo ubengakayisusi inkulumo ekhasini lakhe kuTwitter.

UNkk Zibuyisile MaSotobe Mthiyane oyilungu le-ANCYL futhi ongusomabhizinisi uthe udumele ngenkulumo kaNtsiki.

“Ngiyibonile le nto ebhalwe uNtsiki, Uzinkulumo ezifana nalezi azidingi ukuphendulwa,” usho kanje.

Uthe uyabona ukuthi uNtsiki unenhliziyo ebuhlungu, manje ukuphatheka kabi kwakhe usekukhiphela kubona.

“Kuyacaca ukuthi kukhona umuntu omphathe kabi uNtsiki. besifisa ukwazi ukuthi ulimale kanjani kuphi futhi ulinyazwe ngubani ukuze simsize. okunye engikubonayo wukuthi mhlawumbe ukhona abemqondile kodwa inkulumo yakhe wayenza yandlaleka,” kusho uNkk Mthiyane.

UNkk Mthiyane uthe akumphathi neze kahle ukuthi kube khona umuntu othi kabahlakaniphile ngoba basebenze kanzima ukuze bafike kuleli zinga abakulo.

“Ngineziqu eziningi kubalwa i-degree kuCommunication Science ne-IT, i-MBP yase-Unisa neMBA yasenyuvesi yaseStellenbosch. ngaphezu kwalokho nginenkampani eqashe abantu abakwazi ukondla imindeni yabo,” kusho uNkk Mthiyane.

Uthe unezingane ezintathu, uma kuvela izinkulumo ezifana nale eyenziwe wuNtsiki zizodala ukuthi izingane zabo zicabange izinto ezingekho ngabo bengabazali.

USihlalo we-ANCYL esifundeni iTheku, uNksz Amanda Bani, uthe badumele ngenkulumo kaNtsiki.

“Ngizoqala ngokuthi ungumuntu oyisilima owesifazane ohlekisa ngomunye wesifazane njengoba kwenza uNtsiki,” usho kanje.

UNksz Bani uthe kuyacaca ukuthi uNtsiki akaluqondi uhlelo lokufaka abantu ezikhundleni.

“Siqokwa ezikhundleni ngoba nakho sikulungele ukwenza lowo msebenzi, hhayi ngoba nakhu singabantu besifazane,” usho kanje.

Uthe njalo uNtsiki uma efuna ukuzidumisa emphakathini ukhuluma nge-ANC.

Imizamo yokuthola uMengameli woPhiko lwabesifazane ku-ANC, uNkk Bathabile Dlamini, ayizange iphumelele izolo. imibuzo athunyelelwe yona kulowo omkhulumelayo, uNksz Lumka Oliphant, nayo akazange ayiphendule kwaze kwashaya isikhathi sokushicilela.

Sekuboshwe abasolwa abathathu ngokweba iselula kathishanhloko waseVilla Maria Primary.

LUNGI LANGA

SEKUBOSHWE abasolwa abathathu ngokweba iselula kathishanhloko waseVilla Maria Primary, eMaqongqo ngaseMgungundlovu otholakale emotweni yakhe ebulewe ngesihluku muva nje.

Abasolwa batholakale neselula yobenguthishanhloko uNkk Nokuthula Magwanyana (46) otholakale emotweni yakhe emasontweni amabili adlule ebulewe ngokuklajwa nangokugwazwa.

Okhululema amaphoyisa KwaZulu-Natal uMajor Thulani Zwane uthe abasolwa baboshwe ngokwehlukana ngeledlule, ngoLwesine nangoLwesihlanu.

“Abalisa ababoshiwe balinganiselwa eminyakeni engu-20. Sisaphenya ukuze sithole ukuthi abathinteki yini ekubulaweni kwakhe,” kusho uZwane.

Uthe kulindeleke ukuthi bavele namuhla eNkantolo yeMantshi eMgungundlovu.

UNkk Magwanyana ubulawe emuva kokuthola izinsongo, ezinye ezabhalwa ezindongeni zesikole ngababefuna asule esikhundleni sokuba nguthishanhloko.

UNgqongqoshe wezeMfundo KwaZulu-Natal, uNkk Peggy Nkonyeni uveze ukuthi uthole umbiko wokuthi kukhona abazoboshwa mayelana nokufa kukaNkk Magwanyana. Ubekhuluma eMsinga Sports Centre, e-No. 9, KwaXimba enkonzweni yomngcwabo kaNkk Magwanyana.

UNkk Nkonyeni uthe ngeke angene agamanxe odabeni lokuboshwa kwabasolwa kodwa utshelwe lokhu nguNgqongqoshe wezokuPhepha, uMnuz Willies Mchunu.

“Sithe uma sikhuluma wakuveza ukuthi sekusondele. Laba abasolwa kulokhu kuseduze ukuthi bavalelwe,” kusho uNkk Nkonyeni.

Lokhu kufakazelwe ngumqondisi wezemfundo esiyingini saseMgungundlovu, uNkk Jennifer Baiju oveze lokhu ngaphambi kokukhuluma kukaNkk Nkonyeni.

“Amaphoyisa asanda kusho ukuthi asehambe kakhulu ophenyweni. Kungaboshwa abantu noma yinini. Kusekhona nabanye abasazoboshwa emuva kwalokho,” kusho uNkk Baiju.

Ucele abantu ukuthi behlise umoya balinde uphenyo lwamaphoyisa.

Kusolakala ukuthi ushone ngenxa yombango wezikhundla okuthiwa udla lubi ezikoleni. Ngaphambi kokubulawa kwakhe uthole izinsolo zivela kwabebethi akashiye phansi isikhundla sokuba nguthishanhloko.

Ube nguthishanhloko emuva kobunzima elwiswa abathile abebengathandi ahlale kulesi hlalo.

Izolo abangani nezihlobo zikaNkk Magwanyana bababaze indlela abethanda ngayo umsebenzi wakhe, bekhala nangesihluku abulawe ngaso.

Abanye balibeke ngembaba elokuthi uma amaphoyisa engazibambi ziqine bazozenzela olwabo uphenyo ngababulali.

Ikhansela laKwaXimba uMnuz Musa Mkhize lithe kufanele engabe amaphoyisa asebathathile abasolwa ayobavalela abaphekhe ngemibuzo.

“Akukwazi ukuthi ngabe amaphoyisa awakabathathi abasolwa ayobavalela kuze kube manje. Mina bengiyoqala esikoleni kothisha,” kusho uMkhize.

Uthe ukholwa wukuthi umuntu owayazi ukuthi uNkk Magwanyana ukuphi, owayesesikoleni naye.

Uthukuthele uyaveva umndeni wakwaZulu kwa-G, eMlazi emva kokuthi indlu yawo ishayiswe yikhansela le-ANC ngemoto.

MLUNGISI GUMEDE

UTHUKUTHELE uyaveva umndeni wakwaZulu kwa-G, eMlazi emva kokuthi indlu yawo ishayiswe yikhansela le-ANC ngemoto kwaphinde kwafika abangani balo bedakiwe bagcwaneka bathi umndeni awutshele uMengameli Jacob Zuma awulungisele umuzi.

UMnuz Mthokozisi Nojiyeza oyikhansela ku-ward 80, kuMasipala weTheku kusolakala ukuthi ubephuzile ngesikhathi imoto yakhe ishayisa udonga lwendlu yakwaZulu ngoLwesihlanu.

Elandisa ngalesi sigameko, uNksz Zulu, uthe bebehleli endlini enkulu ngesikhathi bezwa umsindo wento eqhumayo.

“Ngiphumile ngiyobheka ngicabanga ukuthi imoto ishayisa umuntu emgwaqeni kanti ngizofica imoto ingene odongeni lwalapha ekhaya endlini engaphandle,” kusho uNksz Zulu.

Uthe bekungekho muntu kule ndlu eshayisekile.

“Umnikazi wemoto ngimfice esemi ngaphandle kwayo, wathi unguMthokozisi Nojiyeza ikhansela le-ANC kwa-V,” kusho uNksz Zulu.

Uthe besaxoxa nalo ikhansela kufike abangani balo bephethe utshwala bephuza bathi: “Asiliyeke bajahe ukuyoziphuzela utshwala wuLwesihlanu, bala ukulungisa indlu. Baphinde bathi kumele sitshele uMengameli Zuma kube nguyena osilungiselayo indlu.”

UNksz Zulu uthe sekungokwesibili kungena imoto endlini yabo.

“Nango-2010, yangena ishayelwa yiphoyisa eselashona, amaphoyisa ayengafuni ukusiza, udadewethu osebenza emaphoyiseni kusekhona uMnuz Bheki Cele wabikela yena wangenelela, yalungiswa.”

Uthe basola ukuthi abangani bekhansela bayasazi isinyathelo somndeni sokubiza uCele ngoba bathe manje akasekho, asitshele uZuma kube nguyena ozosilungisela umuzi.

UNksz Zulu uthe uphoxekile ngendlela uNojiyeza aziphathe ngayo wangakhombisa ukuba ngumholi.

“Usinike inombolo yocingo lwakhe olungangeni kanti nezinombolo zamazisi athi owakhe asinike zona zingu 14,” usho kanje.

Uthe ikhansela lithembise ukuthi indlu lizoyilungisa kodwa manje alisatholakali.

UNksz Zulu uphinde wakhala ngamaphoyisa ase-GG eMlazi athi anqabile ukuthi bavule icala athi kumele baxoxisane nekhansela.

“Sizimisele ngokuxoxisana nalo ikhansela kodwa kumele necala livulwe njengoba lishayise umuzi. Ngokwazi kwethu kuyicala ukushayisa umuzi womuntu ngemoto asazi yini amaphoyisa engafuni ukusivulela icala,” kusho uNksz Zulu.

Uthe amaphoyisa amtshele ukuthi uma eqhubeka necala, umsolwa uzoboshwa, agwetshwe bese eyahlawuliswa angabe esawulungisa umuzi.

“Angazi ukuthi amaphoyisa aseyizimantshi yini njengoba sekuyiwona azi ukuthi kuzokwenzekani ecaleni,” kusho uNksz Zulu.

Imizamo yokuthola ikhansela ayizange iphumelele ucingo lwalo belukhala lungabanjwa.

Umthombo weSolezwe ohlala kwa-G, uthe leli khansela lala ukububona utshwala, selisinde kaningi nasemsebenzini licishe lixoshwa ngakho ukuphuza ngokweqile.

Ukhishelwe ngaphandle kwenkundla uMengameli Zuma eMkhosini woMhlanga ngesikhathi kusuka isidumo esigodlweni izintombi zivukwa wufufunyane zihayiza.

PHUMLILE NTSELE

Ebika eseNyokeni, KwaNongoma

Ukhishelwe ngaphandle kwenkundla uMengameli Jacob Zuma eMkhosini woMhlanga ngesikhathi kusuka isidumo esigodlweni seSilo eNyokeni, KwaNongoma, izintombi zivukwa wufufunyane zihayiza.

Kube nesinyokotho izintombi ebezihayiza zidudulanela eduze kwendawo ebihlalise izipheshethwa.

Kugcine kungacacanga ukuthi lokhu kuhayiza kususwe yini kepha kubekhona abathi kususwa “yidimoni”.

Kuphoqeleke ukuba abombutho wamasosha nabaqaphi bakaZuma bamkhiphele ngaphandle kwenkundla ukumvikela esinyokothweni.

Kuso lesi siphithiphithi kubhinyilike elinye lamatshitshi elihlobene neMbube eliphume selixhakwe ngomunye wabaNtwana baseNdlunkulu ligodle ingalo ebisilimele.

ONgangezwe obesebukeka enengekile ngobekwenzeka, uzwakale ethi uyazi ukuthi kunabathile phakathi kwamatshitshi abasuka emakhaya nasezindaweni abasuka kuzo benemimoya emibi.

“Ngiyazi kukhona kinina abanemimoya emibi abalapha ukuzokona lo mkhosi,” kusho iSilo.

IMbube ithe lokhu kubuhlungu kuyona ngoba kuzokwenza ukuthi labo abangawufuni umkhosi basizakale ngenxa yezigameko ezifuze lesi.

UZuma ubuye waphindela enkundleni isimo sesithanda ukudamba yize engazange athi vu.

“Mengameli ngithi mangikusho lokhu ukuthi ngihlezi lubhojozi ezweni lami. Kunabantu abangawufuni lo mkhosi asebengithuka nangezinhlamba ezinzima ngenxa yesiko lesizwe sami. Kabasho lutho ngokuhle ngalo kodwa bahlale bebheke okubi,”kusho iSilo.

Iphazamiseke izikhawu ezintathu inkulumo yosuku eyethulwe ngoNgangezwe Lakhe ngenxa yaso isidumo sokuhayiza kwamanye amatshitshi.

Bekungaqali ukuthi zihayize izintombi. nangoLwesihlanu ebusuku kwenzeka into efanayo kwagcina ngokuthi ezinye izintombi zilimale.

Umkhosi womhlanga uqale kahle ekuseni wendlalelwa ngomkhuleko obekuxoshwa ngawo imimoya emibi kucelwa nokuvikeleka kwezintombi wase uyalethwa umhlanga kwiMbube kwaze kwashaya ihora lesihlanu zilokhu zithelekile izintombi.

Imvula beyilokhu liyidlive njalo ihambisana namakhaza abeshubisa umnkantsha.

Ngesikhathi sezinkulumo iningi lezintombi bese likhosele ematendeni nasemabhasini zingasayingeni eyezinkulumo ngenxa yamakhaza.

Isigejana besilokhu silinde ngehubo siqhuqhwa ngamakhaza nemvula.

Zincengiwe ngombhobho ukuba ziphume zizothamela imiyalezo eqondiswe kuzo kodwa zangayingena.

OkaNdaba ube esekhipha umyalelo ewubhekise emabuthweni akhe wathi mawaye ematendeni nasemabhasini kuyolandwa izintombi ngaphambi kokuba sethule inkulumo yaso.

“Ningethuki zingane zami akonakele lutho, hlalani phansi nilalele izinkulumo. Lokhu okwenzekayo kungukunesabisa ukuze nihlakazeke bese abemithombo yabezindaba behlanekezela bathi benibhikishela inkulumo yami,” kumemeza okaNdaba.

Uzinxuse kaningi izintombi ethi azinganyakaziseki.

Amaphoyisa nabebenikwe umsebenzi wokulawula olayini nesinyokotho basebenze kanzima benqanda izintombi ebezivele zibaleke ngenhloso yokuqhela eduze kwalabo abebehayiza futhi bezigwema nokugxobana obekungahle kwenzeke

UMengameli Jacob Zuma unxuse amaphoyisa ukuthi akazivikele uma ehlaselwa yizigebengu.

INTATHELI YESOLEZWE

UMENGAMELI Jacob Zuma unxuse amaphoyisa izolo ukuthi akazivikele uma ehlaselwa yizigebengu wathi ziningi nezinhlelo ezikhona zokunqanda ukubulawa kwawo.

UZuma ubekhuluma emcimbini wokukhumbula amaphoyisa ashona esemsebenzini obuseziNdlini zoMbuso obuthanyelwe yimindeni eyashonelwa amalungu ayo ayesebenza kwiSAPS. Umcimbi uba minyaka yonke.

“Ngiyalele uNgqongqoshe wamaPhoyisa uNathi Nhleko ukuthi enze konke okusemandleni ukuhlinzeka amaphoyisa ngezinsiza kusebenza azidingayo zokulwa nobugebengu ngendlela eyiyo futhi azivikele. Sekunohlelo olwenziwe lokuthi babanjwe ngokushesha ababulala amaphoyisa,’’ kusho uZuma.

“Siyaninxusa ukuthi nizivikele ngakho konke okuphambi kwenu uma nihlaselwa. Imithetho yethu iyawavumela amaphoyisa ukuthi azivikele uma esengcupheni kanjalo nomphakathi.’’

Uthe izigebengu kumele zazi ukuthi amaphoyisa awayona imifuziselo, azozivikela uma impilo yawo neyamalungu omphakathi isengcupheni. Kusukela ngoJanuwari nonyaka sekubulawe amaphoyisa angu- 58 – angu-27 abulawe esemsebenzini kwathi angu-31 abulawa engasebenzi.

“Angu-63 amaphoyisa abulawa phakathi kuka-Ephreli 2014 noMashi 2015. Ngisho noma kuthiwa kufa elilodwa lokho akwamukelekile,” kusho uZuma.

Amaphoyisa amaningi abulewe yiwona abondla emakhaya futhi ukushona kwawo kushiye isikhala esikhulu emindenini yawo. Unxuse amalungu omphakathi ukuthi kube khona akwenzayo ekutheni amaphoyisa alwe nobugebengu ngendlela.

“Izigebengu ezihlukumeza umphakathi zibulale namaphoyisa, zihlala emphakathini wethu futhi siyazazi.

Akumele zivikelwe. Kumele zibikwe emaphoyiseni ukuze zibhekane nengalo yomthetho,” kusho uZuma.

Uphinde wanxusa amalungu omphakathi, wathi akangathengi impahla eyebiwe.

“Uma abantu bethenga impahla eyebiwe, izigebengu ziyaqhubeka njalo nokuganga nokubeka izwe engcupheni. Hlukanani nokuthenga impahla eyebiwe.”