UMnuz Julius Malema uzidele amathambo ePhalamende.

INTATHELI YESOLEZWE

UMHOLI we-EFF uMnuz Julius Malema uzidele amathambo ePhalamende izolo wabuza uMengameli Jacob Zuma ukuthi kungani engakhulumi neSilo nendodana yakhe uMnuz Edward Zuma ekutheni bakhuze udlame olubhekiswe kwabokufika.

UMalema ukusho lokhu ngemuva kwesikhashana kuhleli iPhalamende kodwa kungekho nelilodwa ilungu ebelibonakala liphatha igama leSilo njengoba bekugxilwe odabeni lokuzwakalisa ukukhathazeka ngokuhlukunyezwa kwabokufika.

“Mengameli ubonakala ngisho ebusweni ukuthi ukukhuza kwakho udlame olubhekiswe kwabokufika akusuki kuwe ngoba uphethe nenkulumo oyifunda phansi. Njengoba iSilo sishilo ukuthi inkulumo yaso yahlanekezelwa kungani ungaxoxi naso ngalolu daba ukuze sibize abantu sikhuze ngalokhu okwenzekayo.

“Uhlulwa ngisho ukuxoxisana nendodana yakho u-Edward ekhombise ukungabinandaba ebigqugquzela ukungezwani kwabakuleli nabokufika.

“Ngosuku owawuvikela ngalo ukwakhiwa komuzi wakho eNkandla wawubonakala ngisho ebusweni ukuthi awuyithandi le nto ekhulunywayo kodwa kulokhu awukhombisi lutho,” kusho uMalema.

Uqhube wathi uZuma angakwazi kanjani ukuphatha izwe uma esahlulwa yindodana yakhe ukuthi ayikhuze uma isinhlanhlatha.

Ukusho lokhu ngemuva kokuthi uZuma ekhulume ngodlame ekhuza ukuhlukunyezwa kwabokufika kuleli ekhala ngokuthi abantu kumele bakhumbule ukuthi ngesikhathi kukubi kuleli babebakhoselisile emazweni abo.

UMalema kufane nokuthi uyiphakile ngoba nomholi we-UDM uMnuz Bantu Holomisa uphonsele uZuma inselelo ethi nabo bakhona bakhululekile ukuthi bangamphelezela uZuma aye eSilweni bayokhuluma ngalolu daba.

UHolomisa uthe konke lokhu kudalwa wukuthi izwe liphethwe ngabaholi abangenandaba nendlala nokuhlupheka kwabantu kodwa abazicabangela ukuzicebisa bona.

“Sinxusa amalungu ephalamende ukuthi asebenzisane nathi ezinhlakeni zawo ezingaphandle kwalesi sakhiwo ukuze sikwazi ukunqanda lesi sihlava kudalwe ukubekezelelana emphakathini,” kusho uZuma.

Uthe abantu bokufika bayasiza ngoba bafika kuleli namakhono angekho eNingizimu Afrika asiza ekuthuthukisweni komnotho wezwe.

UZuma unxuse abezenkolo nosomabhizinisi ukuthi nabo basondele ukuze kuliwe nokuhlaselwa kwabokufika.

UMnuz Mmusi Maimane we-DA, uthe inkinga okumele kubhekwane nayo kulolu daba eyokuntuleka kwamathuba emisebenzi .

Umholi we-IFP, uDkt Mangosuthu Buthelezi, uthe kwenziwa yini ukuthi uma kuqubuka lezi zigameko amaphoyisa athathe isikhathi eside ukuthi abophe abenzi bobubi.

Izolo kuke kwabonakala kuphakama imimoya njengento esijwayelekile phakathi kukaMalema noSomlomo uNksz Baleka Mbete kubangwa ukuthi uZuma akadedelwe aphendule indaba yaseNkandla.

UMalema ugcine esekhala ngokuthi uma kusukuma umlungu uMnuz John Steehuisen unakwa ngokushesha kodwa uma kunguye ngoba emnyama ushaywa ngesithende wabe esesola uNksz Mbete ngokusaba abelungu.

Kuthe uma uNksz Mbete esabisa uMalema ngokumxosha kodwa kwanhlanga zimuka nomoya njengoba ethe akayi ndawo ngoba akezile ephalamende ngoba emenywe nguye wathi sebekhathele imiyalelo yakhe ehlale ichithwa yinkantolo ngoba iphambene nomthetho.

Ubekusho lokhu ngemuva kokuthi ngoLwesithathu iNkantolo yaseWestern Cape ikhiphe isinqumo sokuthi alikho iphutha ngenkulumo kaMalema yokusola i-ANC ngokuthi yabulala abantu eMarikana.

Ilungu lePhalamende le-FF Plus, uMnuz Corne Mulder, lithe akufanele ngabe kunezenzo ezinje ezenzeka kuleli.

“Kubukeka sengathi kunomoya omubi ojikeleza eNingizimu Afrika. Ishonephi inhlonipho, iqiniso nokuziphatha ngendlela? Esikhundleni salokho sibona umhobholo, ukungahloniphi nenkohlakalo.’’

Abokufika abebehambele imashi yokudala ukuthula eThekwini bathi bafuna uxolo.

baWINILE NGCOBO

ABOKUFIKA abebehambele imashi yokudala ukuthula eThekwini izolo bathi bafuna uxolo ngoba abezile ukuzothatha imisebenzi yabantu kwelakuleli, kodwa bazozivulela amabhizinisi abo.

Yize bebengebaningi abantu bamazwe angaphandle kule mashi kodwa bebekhona abebeyingxenye yayo.

UMnuz Michael Mba waseNigeria uthe ufike kwelakuleli ngoJuni 2013 kanti wayengezile ukuzothatha umsebenzi womunye umuntu.

“Ngingumsiki wengqephu mina, ngeza kwelakuleli ukuzovula ibhizinisi lami, angizanga ukuzothatha imisebenzi yabanye,” kusho uMba.

Uthe uyajabula ukuthi kube khona imashi ebikhuza udlame olubhekiswe kwabokufika ngoba ufuna ukuthi lolu dlame luphele.

Abafundi base-DUT abebeyingxenye yale mashi nabo bebekhuza umhlola bethi akungahlaselwa abantu bokufika.

ONksz Mbali Khawula (24) no-Asante Chiliza (18) abenza izifundo ze-Public Relations Management bathe ngesikhathi bezwa ngale mashi benze isikhathi sokuthi babe yingxenye yabo.

“Size lapha ngoba kunabafundi esifunda nabo abaqhamuka emazweni angaphandle.

“Kukhona nothisha abasifundisayo abaqhamuka emazweni angaphandle ngakho asikho isidingo sokuthi silwe sodwa, singosisi nobhuti.

“Singama-Afrika ngaphambi kokuthi sibe ngabaseNingizimu Afrika,” kusho uNksz Khawula.

Ukugcizelele ukuthi ayiphele le nzondo ebhekiswe kwabokufika.

INkosi yesizwe samaQadi uMqoqi Ngcobo uthe inkosi Vimbeni Shembe watshela yona imfihlo yokuthi ngubani okumele athathe ubukhosi.

MLUNGISI GUMEDE

INKOSI yesizwe samaQadi uMqoqi Ngcobo itshele iNkantolo eNkulu yaseThekwini izolo ukuthi umholi ongasekho webandla lamaNazaretha ohlangothini lwaseBuhleni uVimbeni “Thingolwenkosazane” Shembe watshela yona imfihlo yokuthi ngubani okumele athathe ubukhosi uma esekhotheme.

UNgcobo uthe uThingo lwathi umuntu okumele athathe isikhundla salo uma selukhotheme nguMD Shembe esho uNyazilwezulu.

“Ngihlangane neNkosi uThingo izikhathi eziningana lapho yangihlebela khona ukuthi uMD Shembe (uNyazi) nguyena okumele abe ngumholi webandla uma seyikhotheme.

“Siqale sahlangana ngoSephthemba 2, 2010 emzini wenkosi oseMnambithi lapho yangitshela khona ngale ndaba, saphinde sahlangana emzini wayo futhi inkosi oseBuhleni ngoJanuwari 10, 2011, yayiphinda le ndaba. Iyiphindile futhi ngoFebruwari 17, 2011 ifike ehhovisi lami,” usho kanje.

Uthe uhlale nale mfihlo ayitshelwa wuThingo efihlele ngisho unkosikazi wakhe kwaze kwafika usuku lokutshalwa kwenkosi uThingo ngo-Ephreli 3, 2011, lapho amemezela khona ukuthi ozothatha esobukhosi ngu “Mduduzi Shembe”.

Ebuzwa ngummeli woNyazi u-Advocate Rajesh Chondree SC uNgcobo ukuthi kungani le ndaba ayigcina iyimfihlo wangayixoxela muntu kwaze kwakhothama inkosi, uphendule wathi uzokwenza umzekelo ngaye njengenkosi yamaQadi.

“Uma ngingase ngitshele enye yamadodana ami ukuthi wena uzothatha izintambo uma sengikhotheme, leyo ngane ingangibulala ngoba isijahe ukuphatha,” usho kanje.

Uphinde wabuzwa uNgcobo ukuthi yena njengenkosi yamaQadi unalo yini ilungelo lokuthi abeke inkosi yamaNazaretha, uthe cha, waqhuba wathi akwenza yena kwaba ukumemezela igama lenkosi okwakumele ithathe izintambo njengoba wayeyalelwe wuThingo.

UChondree SC ufunde ubufakazi obuqoshwe phansi obathulwa wummeli uMnuz Zwelabantu Buthelezi lapho athi khona okushiwo uNgcobo uma ethi uThingo lwatshela yena ukuthi ngubani okumele ahole ibandla amanga aluhlaza ngoba uNgcobo wamfonela (uButhelezi) embuza ukuthi ngelikabani igama analo lomuntu ozothatha izintambo.

UNgcobo ubuzwe nguChondree ukuthi kungani abuza kuButhelezi igama lomuntu owayezongena kwesobukhosi uma wayemazi. Uphendule ngokuthi wayefuna ukubona ukuthi ummeli unegama elifanayo naleli alitshelwa wuThingo.

Uqhube wathi wayefuna ukuqinisekisa ukuthi banegama elilodwa ukuze bagweme ukuchitheka kwegazi.

UChondree SC uphinde wambuza uNgcobo ukuthi bunjani ubudlelwane bakhe noNyazi.

Uthe ubudlelwano babo buqale seluyiNkosi yamaNazaretha uNyazi wathi buhle ngoba umuzi walo wakhiwe endaweni yamaQadi futhi bayahloniphana nalo.

“Ngingathi nje bonke abaholi bakwaShembe kusukela kumqali wendlela u-Isiah Shembe ubudlelwano babo nobukhosi bamaQadi buhle ngoba bakhe ngaphansi kwesizwe sethu futhi siyahloniphana,” usho kanje.

Uphinde wabuzwa ukuthi uyamazi yini uVela Shembe, wathi umazi kakhulu ngoba owasemaQadini futhi bebengothisha bobabili, bebeke bahlangane uma kunezemidlalo ezikoleni.

Izolo inkantolo iqhubeke ngaphansi kwezimo ezinzima kunobuhixihixi bokunqamuka kokusebenza komshini oqopha izinkulumo okuholele ekutheni kuze kuguqe icala.

Icala liyaqhubeka.

Ihlangabezane nembibizane imashi yokudala ukuthula ebihlelwe nguhulumeni waKwaZulu-Natal.

BAWINILE NGCOBO noBONISWA MOHALE

IHLANGABEZANE nembibizane imashi yokudala ukuthula ebihlelwe nguhulumeni waKwaZulu-Natal izolo ngesikhathi kuqubuka enye imashi yabakuleli abebephikisana nayo.

Ngesikhathi izikhulumi ebeziqhamuka eminyangweni nasezinhlakeni ezehlukene zikhuluma nezinkumbi zabantu ebeziyingxenye yemashi yokudala ukuthula eCity Hall emuva kwezigameko zodlame olubhekiswe kwabokufika, kube nenye imashi kuDr Pixley kaSeme (West Street) yabebethi abokufika abaphume baphele kuleli.

Laba bantu bebethi abokufika baletha izidakamizwa kuleli futhi bathatha imisebenzi yabo.

Imvunge ebihambisana nokuphikisana nale mashi iqale eMakethe isanda kusuka eCurries Fountain lapho iqale khona ngesikhathi osomatekisi abebeserenki betshela abebeyingxenye yemashi ukuthi abahambe abokufika.

“Asibafuni osibali.” Bebetshela abesifazane abebedlula ukuthi abawafuni amadoda abo kuleli.

Nangesikhathi imashi isidlula kuDr Pixley kaSeme kukhona ebebemi eceleni komgwaqo bememeza bethi abokufika abahambe.

Amaphoyisa ophiko lodlame enze ujenga ahlehlisa abebemi eceleni komgwaqo befuna ukuhlangana agcina esebenzise amanzi ukubahlakaza.

Abaholi bakahulumeni, abamabandla, abasendimeni kaqedisizungu nomphakathi bebephume ngobuningi beyingxenye yale mashi.

IMeya yeTheku, uMnuz James Nxumalo inxuse abebekule mashi ukuthi badlulise umyalezo wokuthula kwabebesele emakhaya.

UBishop Reuben Phillip obekhulumela amabandla uthe kuyajabulisa ukubona abantu behlangene bezokhuza isihlava sodlame olubhekiswe kwabokufika.

“Sonke siyizingane zikaNkulunkulu, sadalwa nguye noma ngabe siqhamuka kuphi. Asihlanganeni sibe munye,” kusho uPhillip.

Amaciko akulesi sifundazwe uPhuzekhemisi noT’zozo badlulise umyalezo wokukhuza udlame ngengoma. UNkk Thobekile Madiba-Zuma uthe abantu kumele babuyelwe ubuntu.

“Ungakwenzi komunye ongeke uthande kwenziwe kuwe. Izikhalo zikhona futhi ziyezwakala, zizolalelwa,” kusho uNkk Zuma.

UNgqongqoshe wezobuNhloli kuzwelonke uMnuz David Mahlobo uthe lezi zigameko azinabo ubuntu.

Uthe abantu abangazibambeli umthetho noma ngabe banolwazi noma izinsolo zokuthi abantu bokufika banobugebengu.

“Ubugebengu wubugebengu noma ngabe ungowakuleli noma ungowokufika. Abantu abathathwe ngendlela efanayo,” kusho uMahlobo.

Uthe uhulumeni uyazi ukuthi kunezinkinga emakhaya nasemalokishini, abantu abasebenzi, kunobubha kodwa zikhona izinhlelo zokulwa nalokho.

Uthe bazwelana nemindeni yabashonile kulezi zigameko wafisela abalimele ukululama.

UNdunankulu waKwaZulu-Natal uMnuz Senzo Mchunu uthe isitha kubantu ububha, ukungafundi, ukungasebenzi nezifo.

“Sonke singabase-Afrika. Phansi ngodlame olubhekiswe kwabokufika,” kusho uMchunu.

Uthe abakufuni ukuphalala kwegazi kulesi sifundazwe.

Uthe lezi zigameko sezenze lesi sifundazwe sabukeka kabi.

“Asifuni abokufika abazovala imigwaqo, asilufuni udlame olubhekiswe kubo. Sonke kumele sisebenze nezinhlanka zomthetho. Sizoba nezinhlelo zokubuyisela isimo kwesejwayelekile,” kusho uMchunu.

Uthe bazoqinisa umthetho kwabazoqhubeka nalezi zigameko.

“Siyayithola imibiko ngabaqhubekayo nalo mkhuba, sizoqinisa umthetho,” kusho uMchunu.

UNksz Lindiwe Sisulu, uzonikela ngo-R10.5m eminyakeni emithathu enyuvesi ukusungula uphiko olwenza ucwaningo.

MHLENGI SHANGASE

USHANSELA waseMangosuthu University of Technology (MUT) , uNgqongqoshe wezokuHlaliswa kwaBantu, uNksz Lindiwe Sisulu, uzonikela ngo-R10.5 million eminyakeni emithathu enyuvesi ukusungula uphiko olwenza ucwaningo.

I-MUT namanye amanyuvesi ezobuchwepheshe awagxilile kwezokucwaninga.

Imali ekhishwe wuNksz Sisulu izosiza ukuthi kubhekwe ucwaningo oluthinta ukuhlaliswa kwabantu ngenxa yezikhalo ezikhona mayelana nokushoda kwezindlu.

“Ngizophonsa u-R3.5 million unyaka nonyaka kuze kube yiminyaka emithathu ukuze kusungulwe uphiko lwezocwaningo. Eminyakeni emithathu sizofaka u-R10.5 million ukuze siqinisekise ukuthi sibhekana nenselelo yokuhlaliswa kwabantu,” usho kanje.

Ukusho lokhu ngesikhathi kuthweswa abafundi imiyezane. Uphiko locwaningo luzonganyelwa yiFaculty of Management Sciences.

Okwamanje inyuvesi iNelson Mandela Metropolitan University neFort Hare yiwona kuphela aneziqu zeHuman Settlement Management.

UNksz Sisulu umemezele nokuthi uzohlinzeka ngemifundaze ewu-50 kubafundi abenza ucwaningo eminxeni ehlukene kulo mkhakha.

Khonamanjalo, iJaji eselathatha umhlalaphansi elisethimbeni elijutshwe nguNdunankulu ezintweni ezithinta ukuhlaselwa kwabokufika, UNavi Pillay, uhlonishwe ngeziqu yile nyuvesi.

IJaji Pillay, owayeyijaji le-United Nations, uthe iNingizimu Afrika isematheni kulezi zinsuku ngenxa yezehlakalo zokuhlaselwa kwabokufika osekukapakele ezweni lonke.

Uthe izehlakalo, eziqale eThekwini zabhebhetheka zaze zafinyelela nakwamanye amazwe, sezibange ukuthi abantu bakuleli baxoshwe kuwo.

Ukhulume kabanzi ngamalungelo abantu wathi yiyona nto ayeyiqinisekisa ngesikhathi esanguKhomishana we-UN General Assembly.

“Kumele ngikugcizelele ukuthi ukuvikelwa kwamalungelo esintu wumsebenzi kahulumeni. Izehlakalo ezisanda kwenzeka zokushaywa kwabokufika zisabalele kwabezindaba emhlabeni wonke,” usho kanje.

Abafundi abahlanu abaphase ngamalengiso emikhakheni ehlukene enyuvesi bahlabene ngemali evela kumphathi wenyuvesi engu-R5 000 ngamunye nama-laptop anikelwe yinkampani iProcess Litho eseRedhill, eThekwini.

USello Chicco Twala uyalele uyise kaSenzo Meyiwa, athe unomlomo omanzi, ukuthi aveze ubufakazi bakushoyo noma athule.

UMAKADEBONA endimeni yomculo ophinde abe wusomabhizinisi, uSello Chicco Twala, uyalele uyise kaSenzo Meyiwa, athe unomlomo omanzi, ukuthi aveze ubufakazi bakushoyo noma athule.

Ephephandabeni lesilungu eliphuma ngeSonto, uChicco uthe uMnuz Sam Meyiwa akeze nobufakazi obuveza ukuthi wubani owabulala indodana yakhe, uma ehluleka ukwenza lokho avale umlomo wakhe.

“Ngiyamxwayisa, akayena uNkulunkulu, akayeke ukuba nezingxoxo ezingekho nezintatheli ezifumbathiswayo.

“Into ayishoyo yokuthi uyabazi ababulali bakanozinti we-Orlando Pirates iyadukisa futhi ingaholela ekulimaleni kwabantu ababekhona ngesikhathi kubulawa uSenzo,” kusho uChicco.

Uyise kaSenzo kuthiwa utshele iDrum Magazine ukuthi ababulali bakaSenzo yilaba ayehlezi nabo ngosuku ashona ngalo.

“Lokhu ngikushiso wukuthi indodana yami (uLongwe) ingomunye wabantu ababekhona ngesikhathi kubulawa uSenzo. Ngikubona kungubudedengu ukukhuluma kukayise kaSenzo sengathi wayekhona ngesikhathi ebulawa,”kusho uChicco esitatimendeni asithumelele iSunday World.

Ephendula kokushiwo wuChicco, uSam Meyiwa uthe ngabe yindodana yakhe kuphela yini eyayikhona kubulawa uSenzo. “Ngokwazi kwami, kwakunabafana abathathu ngesikhathi lokhu kwenzeka. Yini kube wuye yedwa ozihlupha ngalokhu. Ngabe udliwa unembeza yini?”

Ukuphawula kukaMeyiwa kungenxa yomuntu othumele umyalezo kwi-Twitter wokuthi uSenzo wabulawa uLongwe Twala owayethandana noZandi Khumalo ongudadewabo kaKelly Khumalo.

ULongwe uyindodana kaChicco. Kukholakala ukuthi uSenzo wabulawa ngababephanga behlomile. – Intatheli yeSolezwe

Uhulumeni waseNingizimu Afrika usuxwayise ababhebhethekisa ukuhlaselwa kwabokufika.

Babalo Ndenze

UHULUMENI waseNingizimu Afrika usuxwayise ababhebhethekisa ukuhlaselwa kwabokufika nalabo abakhuluma okungekho nabafaka izithombe ezingelona iqiniso ezinkundleni zokuxhumana bethi zithathwe njengoba kuqhubeka udlame olubhekiswe kwabokufika KwaZulu-Natal naseGauteng.

Izolo oNgqongqoshe ababhekelele ezokuphepha batshele abezindaba ngenyathuko asebeyihambile emizamweni yabo yokunqanda lolu dlame.

Lesi sithangami nabezindaba senzeka nje uMengameli Jacob Zuma uhoxise uhambo lwakhe lwase-Indonesia ukuze azongenelela odabeni lokuhlaselwa kwabokufika KwaZulu-Natal.

Labo ngqongqoshe bamile ekutheni uhulumeni uyasilawula isimo baphinde baqinisekisa abatshali-zimali bakwamanye amazwe ukuthi alukho olubi oluzokwenzeka.

UNgqongqoshe wezaseKhaya, uMalusi Gigaba, uthe kusaboshwe abasolwa abangu-307 emacaleni okuhlaselwa kwabokufika.

“Kulezi zinsuku ezimbalwa ezedlule besikuqaphela ukuthi sekukhona abagijimela ezinkundleni zokuxhumana bafike basabise abantu ngezigameko zokuhlaselwa kwabokufika. Bathumela imiyalezo engekho nako-WhatsApp basabalalise nezithombe ezidukisa abantu. Le miyalezo ibukeka ihlose ukudala uthuthuva emphakathini njengoba kukhona asebesaba. Uhulumeni usakugcizelela ukuthi uzokwenza konke okusemandleni ukuqeda le nkanankana ezweni. Lolu lwazi oludukisa abantu olufakwa ezinkundleni zokuxhumana kumele lugxekwe njengoba iNingizimu Afrika idume ngokuba yizwe elinokuthula nothando kulabo bokufika abahlala ezweni lethu. Uhulumeni unxusa bonke abathintekayo kulezi zenzo ukuthi baziyeke,” kusho uGigaba.

Uthe izinhlaka zezokuphepha ziyasebenza futhi akukho bhasi nasitimela okuzobahlasela.

“Sifuna ukuxwayisa nalabo abavunyelwa ukusetshenziswa ukuthi badale uthuthuva emphakathini. Sizonithola bese nibhekana nengalo yomthetho,’’ kusho uGigaba.

UNgqongqoshe wezobuNhloli uDavid Mahlobo, uthe: “Inkinga ebikhona kulolu daba ithinta ukuxhumana kahle nabakuleli futhi uhulumeni usephendulile.”

Uthe izinhlaka zezokuphepha “zisebenza kanzima’’ kodwa kulele emphakathini ukuba ubampimpe abaphehli bodweshu.

USihlalo weNational Joint Operational and Intelligence Structure (Natjoints) u-Lieutenant General Elias Mawela, uthe ezobunhloli zisebenza ubusuku nemini zibheka okuqhubeka ezinkundleni zokuxhumana.

“Siyibheka yonke imilayezo ethunyelwa ezweni lonke. Uma bebona leyo milayezo abayizibi, bayayilandelela bese beyicubungula,’’ kusho uMawela.

UGigaba uthe uhulumeni usezinhlelweni zokubhekisisa kabusha imigomo yakhe ethinta abokufika ukuze athole isisombululo esizoqeda ukuhlaselwa kwabokufika.

“Uhulumeni kumele ayibhekisise kabusha imigomo ethinta abokufika. Njengoba sikhuluma nje uMnyango wezaseKhaya uyakwenza lokho,” kusho uGigaba.

Uthe sekube nemikhankaso embalwa exwayisa ngokuhlaselwa kwabokufika efundisa imiphakathi kulandelwa izivumelwano ze-ANC ezenziwa engqungqutheleni yemigomo eyayingo-2012.

Ukhalelwe ngamasongo kaSigonyela umdlali weKaizer Chiefs obentweza ngemoto emgwaqweni onguthelawayeka.

BALDWIN NDABA

UKHALELWE ngamasongo kaSigonyela umdlali weKaizer Chiefs obentweza ngemoto emgwaqweni onguthelawayeka.

Ngokusho kukaChief Superintendent Wilfred Kgasago okhulumela amaphoyisa omgwaqo ase-Ekurhuleni lo mdlali waMakhosi oneminyaka engu 21 uboshwe izolo ehamba ngesivinini sika-196km/h kunokuthi ahambe ngo-120km.

UKgasago uthe lo mdlali ubehamba kuthelawayeka uN12 phakathi kuka-R59 nomgwaqo uVoortrekker ongenela e-Alberton.

“Lo mdlali webhola akamanga njengoba eze walandelwa yizithuthuthu ezintathu ze-EMPD nemoto iBMW ezimthole eseyophuma e-Edenvale kuthelawayeka u-R21.

“Uboshwe ngo-7 ekuseni. Ubehamba ngeVW Polo GTI ethi uphuthuma ekhempini yeqembu,’’ kusho uKgasago.

Lo mdlali ugcinwe esitokisini samaphoyisa esiteshini sase-Alberton futhi amaphoyisa anqabile negama lakhe ngoba akakaveli enkantolo.

Kodwa ke yize kunjalo, iphephandaba elinguzakwabo weSolezwe, iThe Star lithole ukuthi lo mdlali nguSimphiwe Mtsweni.

Khona izolo kuboshwe abanye abane abebegijima ngezimoto ku-N12.

Kwenzeka lokhu nje umdlali wamaProeas u-Aaron Phangiso uboshwe ngezinsolo zokushayela ebukhile.

Uxwayisiwe wabe esededelwa. Uzobuyela enkantolo ngo-Agasti 14. Okhulumela i-SAPS eGauteng u Lieutenant Colonel Lungelo Dlamini uqinisekise ukuboshwa kukaPhangiso.

Ukhungathekile umndeni wakwaSibiya kulandela isigameko sokubulawa komuntu wathathwa wazoshiselwa emzini wawo.

MLUNGISI GUMEDE

UKHUNGATHEKILE umndeni wakwaSibiya eWoodglen, eMpumalanga kulandela isigameko sokubulawa komuntu wathathwa wazoshiselwa emzini wawo obekuqashe kuwo abokufika baseSomalia.

Isidumbu sikamufi okusolwa ukuthi owesilisa ongaziwa ukuthi owakuphi sitholakale izolo entathakusa.

Le ndlu ashiselwe kuyona kuthiwa ibihlala abesilisa baseSomalia abanesitolo egcekeni lakwaSibiya.

Kuthiwa laba bokufika Isolezwe elake labika ngabo ngasekuqaleni konyaka ngesikhathi besinda bedutshulwa, bese bevele bebalekile endaweni njengoba kusanda kubheduka udlame olubhekiswe kwabokufika kuleli.

Kodwa ngoMgqibelo emini bebekhona laba baseSomalia bezobheka ukuthi isimo sesihamba kanjani kwadlula iqulu labafana okuthiwa lisongile lathi “nibuyile, sizongena ebusuku”.

UMnuz Ligo Robert Sibiya, ongumnikazi wendlu okutholwe kuyo isidumbu, uthe yena ubelele ngaphakathi esitolo samaSomalia ngesikhathi ephaphama ngabo-12:45 ezintatha waphinde wazunywa ubuthongo.

“Ngiphinde ngaphaphama ngabo-1 entathakusa ngaleso sikhathi bese kucime ugesi, ngivukile ngavula umnyango ngifuna ukubheka ukuthi ugesi ucime yonke indawo, ngibone ngelangabi endlini ebiqashe abokufika. Ngigijime ngaya koxhuma ipayipi empompini ngizama ukucima, ngacima yize khona umlilo uthathe isikhathi eside ukuthi wehle kwathi uma usulothile ngabona ukuthi kunomuntu ofile endlini ngahlaba umkhosi,” usho kanje.

Uthe lo muntu ubelele ngesifuba eshe izinyawo nezingalo eze wagoqana.

“Ubeshe ngendlela yokuthi akabonakali ukuthi ungubani,” usho kanje.

USibiya uthe basola ukuthi lo muntu ubulewe ndawana thize wathathwa wazoshiselwa emzini wakhe.

“Ukube ubulawele lapha besizozwa futhi besizofica negazi kodwa indlela okubukeka ngayo ngathi ufike lapha esezoshiswa, abamshisile bafike bakhahlela isicabha ngoba ukhona umakhelwane othe uzwile kukhona into egaklaza isicabha,” usho kanje.

USibiya uthe basola ukuthi lesi sigameko senziwe abantu bendawo ngoba befuna ukusabisa abokufika bangabe besabuya esitolo.

“Emini ngoMgqibelo, ngesikhathi kukhona abokufika, iqulu labafana lidlule lakhuluma amazwi ayiziswana lathi lizobuya ebusuku nakhu ke sesithola umuntu oshisiwe endlini,” usho kanje.

Okhulumela amaphoyisa uColonel Jay Naicker uthe amaphoyisa aseMpumalanga aphenya icala lokubulala ngemuva kokuthola isidumbu somuntu ongaziwa sishisiwe.

Kulindeleke ukuthi Isilo sikhuze uZulu ukuthi ayeke udlame embizweni yaso engase yethanyelwe yizinkumbi zabantu namuhla.

ZANELE MTHETHWA

Emuva kokushona kwabantu abayisikhombisa odlameni olubhekiswe kwabokufika, kulindeleke ukuthi Isilo sikhuze uZulu ukuthi ayeke udlame embizweni yaso engase yethanyelwe yizinkumbi zabantu namuhla.

Imbizo ibizwe yiSilo nohulumeni waKwaZulu-Natal ukubhula umlilo osusabalele izwe lonke.

Bangaphezulu kuka-10 000 abantu abalindeleke ukuthi bathamele imbizo esezinkundleni zemidlalo iMoses Mabhida eThekwini.

Isitatimende esikhishwe ngokuhlanganyela wuhulumeni kanye nomasipala weTheku, sithe kuzobe kunamabhasi asuka ezindaweni ezehlukene.

“Silindele abantu abangaphezulu kuka-10 000 ukuthi bathamele imbizo kaNgangezwe Lakhe. Ibiqale yahlelwa ukuba ibe seCurrie’s Fountain kodwa yashintshwelwa eMabhida ngoba inkundla iyakwazi ukumumatha abantu abaningi,” kusho isitatimende.

Imbizo, ezoqala ngo-9 ekuseni, kumenywe amaKhosi neziNduna abazodlulisa umyalezo weNgonyama emphakathini.

UNgqongqoshe wezamaPhoyisa, uMnuz Nathi Nhleko, izolo esithangamini nabezindaba umemezele ukuthi bayisikhombisa abantu abashone odlameni kusuka ngoLwesihlanu kwaze kwaba yizolo. Lokhu kusho ukuthi isibalo sesingaphezu kuka-12 kusukela kuqale lolu dlame.

UNhleko, obezokwethula nomkhankaso wokuqeda ukuhlaselwa kwabokufika, uthe akumele udlame lumataniswe nohlanga oluthize kuthiwa yilo oluhlasela abokufika.

“Udlame luhlobene nobugebengu nenzondo kubantu, hhayi ukuthi yisizwe esithize. Lokhu kwenzondo kufakazelwa nawukuthi kulaba asebeshonile kukhona nabaseNingizimu Afrika. Nasezigamakweni ezifanayo ngo-2008 kwashona 63, u-29 kwakungabakuleli,” kuchaza yena.

Abahlaziyi bezepolitiki bathi azethusi izigameko zokuhlaselwa kwabokufika.

UDkt Somadoda Fikeni uthe ngisho nocwaningo olwenziwe yiHuman Research Council of SA emuva kwezibhedu zango-2008, lukufazekele ukuthi inkulu inzondo.

“Ukuhlaselwa kwabokufika kungasuswa yinoma yini ngoba vele abakuleli bahlezi becuphile. Kumele sikuvume nokuthi uhulumeni wakuleli akazange alusukumele lolu daba njengoba lwake lwenzeka nango-2008. Kwakumele kusukunyelwe ngaleso sikhathi kubhekwe indlela okungaliwa ngayo ukuqeda lesi sihlava.”

Uthe ukuba nezinkinga eziningi, okubalwa ezokushoda kukagesi, izidubedube zePhalamende kungezinye zezinto ezenze yangasukunyelwa indaba yabokufika.

“Ngo-2008 kwakusaphethe obunye ubuholi kuhulumeni okungenzeka ukuthi nalokho kunomthelela njengoba manje sekunobuholi obusha,” usho kanje.

Mayelana nembizo yeSilo uthe kuyoba kuhle uma sizophumela obala ukutshela abantu ukuthi babeke phansi izikhali ngoba selokhu kuqale udlame asikaze sibhekane nodaba ngqo.

Uthe Isilo kumele sisebenzise ithuba sicacise ngesitatimende saso esesiphenduke undabamlonyeni.

UMnuz Zakhele Ndlovu, umhlaziyi wasNyuvesi yaKwaZulu-Natal, ufanise abamnyama namahlamvu omile alindele ukokhelwa ngomlilo avuthe. “Abantu kabaneme ngesimo abaphila kuso ngoba abaningi kabasebenzi. Kuningi okubaxakile ngoba abanye abakaxoli ngezigameko zobandlululo. Kumele sizibuze ukuthi isho ukuthini inkululeko yomuntu omnyama ngoba amazwe amaningi e-Afrika asakhululeka kodwa abantu bayawashiya ngoba benganelisekile. Kumele ngabe abantu balungisa emazweni abo, ngale kwalokho siyohlala silwa sodwa,” kusho uNdlovu.

Kusolwa ubuthongo nokukhathala ngokwehla kwengozi okushone kuyona uMnuz Sifiso Maphumulo.

MLUNGISI GUMEDE

KUSOLWA ubuthongo nokukhathala ngokwehla kwengozi okushone kuyona uMengameli wesikhashana wenyunyana yokusansimbi iLiberated Metalworkers Union (Limusa), uMnuz Sifiso Maphumulo.

Ingozi yenzeke emgwaqweni onguthelawayeka uN3 ngaseMnambithi ngoMgqibelo ebusuku.

Abanye abaholi bale nyunyana okubalwa uNobhala jikelele, uMnuz Cedric Gina, balimele kule ngozi. Imoto abebehamba ngayo iToyota Fortuner iphaphalaze yagingqika.

Ngesikhathi Isolezwe lihambele emndenini kaMaphumulo e-Adams izolo, bekunoGina nalimale nabo engozini oMnuz Mmusi Serotse noMawonga Madolo beyobhonga emswaneni.

Umfowabo omdala kamufi, uMnuz Pat Maphumulo, uthe basola ukuthi umfowabo ubekhathele ebanjwe nawubuthongo njengoba kade engalalanga ephume ekuseni emsebenzini waphinde wangena indlela sebeya kwisithangami nabezindaba eGoli.

“Imoto uma uvale amawindi ebusuku iyazelisa angikhulumi uma ukade ungalalanga,” usho kanje.

Engxoxweni neSolezwe, uGina, uthe kwayena ubekhathele ngoba imoto ibishayelwa nguye kwathi sebeseCato Ridge bashintshana egalaji ngoba esezela wacela ukuba ishayelwe uMaphumulo.

“Ushilo ukuthi akajwayele ukushayela iFortuner kodwa ngathi akazame ngoba sengibona ukuthi ngiyazela, uthe eyithatha ngalala kodwa sekwenzeka ingozi ngiphaphamile ngayizwa imoto ihamba kungathi igcwala umgwaqo. Ngiyizwile igingqika,” usho kanje.

Uthe yena nabanye imoto ibakhiphile basakazeka emgwaqweni kodwa uMaphumulo wasala ngaphakathi.

“Sivukile samumemeza uMaphumulo kodwa wangasiphendula sazama ukumnyakazisa wanganyakaza. Kuqhamuke owesilisa woMdabu waseNdiya obeshayela iloli wama nathi naye wazama ukumthinta wathi uphefumulela phansi, ngaleso sikhathi bese kufike nabezimo eziphuthumayo basitshela ukuthi indaba yakhe isidinga amaphoyisa ngoba useshonile,” usho kanje.

UGina uthe bashayeke udume ngokushona kukaMaphumulo ngoba ubengumholi ozimisele esebenza ngokuzikhandla.

“KwaToyota lapho ebesebenza khona inyunyana yethu ibinamalungu amaningi ngenxa yokuthi ubengumholi okhaliphile,” usho kanje.

Uthe njengoba bezoya engqungqutheleni yokukhetha ubuholi benyunyana ngoJuni 27 no-28, akangabazi ukuthi uMaphumulo ubezofike akhethwe ngokugcwele njengoMengameli wabo.

“Bengingalali ebusuku njengoba siya engqungqutheleni ngicabanga ukuthi kuzokwenzekani ngoMaphumulo,” usho kanje.

Ushiye unkosikazi nezingane ezinhlanu.

Uphuthunyiswe esibhedlela wayohlolwa ingqondo owesifazane obelethe ingane maqede wayinquma uqhoqhoqho.

MTHOKOZISI MANQELE

UPHUTHUNYISWE esibhedlela wayohlolwa ingqondo owesifazane (23) obelethe ingane ebusuku ngoMgqibelo maqede wayinquma uqhoqhoqho eqeda ukuyigwaza ngommese umzimba wonke ngaphandle komuzi wakubo. Lesi sigameko sishiye inqwaba yamalungu omphakathi wasesigodini saKwaMyanduya, eMseleni, KwaMhlabuyalingana ubambe ongezansi ngoba uqala ukubona umhlola ofuze lo.

Owesifazane esiligodlile igama lakhe, ucingwe wumndeni ebusuku ngoba enyamalale nommese emenyezwa engasabeli. Kuthiwa amalungu omndeni amfice ngaphandle komuzi esegcwele igazi. Athe embuza wabhoka ngolaka wathi uthelwe yigazi ngoba esesikhathini.

Kuthiwa kuzwakale ingane ikhala esikhotheni, bazitshela ukuthi izinyane lembuzi elikhalayo kanti wusana lukhaliswa amanxeba okugwazwa nelokunqunywa uqhoqhoqho.

Umndeni kuthiwa uzamile ukulihlenga kodwa lwashonela endaweni yesigameko.

Unina walo ubizelwe amaphoyisa aseMbazwane waboshwa. Imizamo yokuxhumana namaphoyisa ayiphumelelanga njengoba silobe bonke abakhulumela amaphoyisa bese beshayisile emahhovisi ngoba kuyimpelasonto.

Isolezwe lithole ukuthi unina wosana uyiswe esibhedlela yize kungakacaci ukuthi itheni imiphumela yodokotela njengoba kuthiwa amaphoyisa abuye amthatha ayomvalela esitokisini.

INduna yaKwaMyanduya, uMnuz Mfungeni Nhlenyama isiqinisekisile lesi sigameko yasichaza njengechilo elidinga ukugxekwa.

UNhlenyama uthe selokhu abakhona akakaze ezwe ukuthi kukhona owesifazane owenza isihluku esinjengalesi.

“Ngihlale ngiyizwa ezindabeni into enjengalena ngingazitsheli ukuthi ngelinye ilanga iyoke yenzeke eceleni kwami nasendaweni yami. Ngishaqekile namanje ngisathuthumela yilesi sigameko. Bafikile abomndeni walo wesifazane bezongibikela ngaso. Bathi ufike kubo endlini ebusuku waboleka ummese banganaka ukuthi uyowenzani,” usho kanje.

Imizamo yokuxhumana nabomndeni walo wesifazane ayiphumelelanga. Leli phephandaba lipotshozelwe ngomunye wesifazane ongumakhelwane ogcine efikile endaweni yesigameko ukuthi unina wosana ubevele esolwa ngokuthi ukhulelwe kodwa avele aphike athi akanalutho.

“Unalo isoka elisemthethweni elingunogada abanengane nalo. Belihlale limfonela lithi akeze ezolanda imali yokuya emtholampilo ngoba ekhulelwe kodwa enqabe. Sisola ukuthi ubazi kahle ukuthi ingane akuyona ekanogada kodwa eyomunye umfana abejola naye esithole ukuthi ubesiphika isisu,” kusho lo mthombo.

Lo mthombo uthe: “Ngesikhathi esenyamalele nommese akekho obezitshela ukuthi uyoteta bese enquma ingane. Ngesikhathi emenyezwa engaphandle komuzi akazange asabele kodwa wabonwa ethi uzama ukugeza esegcwele igazi wabhoka ngolaka uma ebuzwa ukuthi elani igazi. Ngesikhathi esabhoka ngolaka eselingisa umuntu osephanjanelwa ingqondo izwakale ikhala ingane ingakashoni. Ibigcwele amanxeba okugwazwa ibonakala nokuthi ibisikwa.’’

Abokufika abanezitolo enkabeni yeTheku bezwe amanzi ngobhoko ngeSonto nayizolo bavula amabhizinisi abevalwe.

ZANELE MTHETHWA

ABOKUFIKA abanezitolo enkabeni yeTheku bezwe amanzi ngobhoko ngeSonto nayizolo bavula amabhizinisi abevalwe ngenxa yezigameko zokuhlaselwa kwabo.

Emuva kokushuba kwezigameko zokuhlaselwa kwabokufika, izitolo zabo eziningi bezivaliwe kusukela ngoLwesibili njengoba bebekhishwa kutatshwa nezimpahla zabo. Kubonakale umehluko ngeSonto nayizolo emgwaqweni uDr Pixley KaSeme izitolo zabo zivuliwe, yize abanikazi bazo bebeqaphe ngelokhozi okuqhamukayo.

Isolezwe lifike beyizixongololo ngaphandle kwezitolo, bebukisisa ngokuxwaya wonke umuntu osondela kubona.

Kwezinye izitolo iminyango beyivulwe uhhafu kubonakala ukuthi kulindelwe noma yini.

UMnuz Nigussies Bezuahu wase-Ethiopia uthe ubenesitolo KwaMashu wabaleka emuva kwezidubedube zokuhlaselwa. Uthe usedayisa kwesinye isitolo sikamkhaya wakhe khona eThekwini njengoba engakazimiseli ngokubuyela KwaMashu.

“Sibone kuthule namuhla edolobheni, sasebenzisa leli thuba ukuvula amabhizinisi. Kubukeka sengathi kuphephile namuhla ngoba abanye basemasontweni, abanye bamatasa nezinto zabo. Nokho sisebenza ngokwesaba ngoba sibheke noma yini,” kusho yena.

Bekuthi uma ukhuluma noyedwa wabo basondele bonke balalele, abanye bekhuluma bodwa ngolimi lwabo bexwayile. Banqabe ngisho ukuthathwa izithombe bethi lokho kungase kubaqhathe nomphakathi obahlaselayo.

UBezuahu uthe akakacabangi ukuyothatha amashansi KwaMashu ngoba omunye umngani wakhe ushiselwe isitolo ngoMgqibelo. Uthe naye usesizwa wukuncikiswa ngomkhaya bakhe abavulile bese eyoquba kubafowabo ePhoyinti.

UMnuz Melkamu Dogamy naye odabuka e-Ethiopia uthe unesitolo esidayisa yonke inhlobo yempahla enkabeni yeTheku. Naye kulezi zinsuku uthi usephephela ngokuyolala kubangani ePhoyinti ngoba akukahlaselwa khona. Mayelana nembizo yeSilo uGoodwill Zwelithini kaBhekuzulu ayibize izolo eMoses Mabhida Stadium, uthe uzwile kancane ngayo yize engenalo ulwazi oluphelele.

“Sizwile ngaleyo mbizo kodwa akekho osichazelayo ngayo ngoba okunye sibuye singakuzwa kahle ezindabeni,” usho kanje.

Uthe uyethemba ukuthi inkulumo eyethulwe yiSilo izokwehlisa ulaka kubantu ababahlaselayo.

Ngaphesheya kwezitolo bekusha inkonzo kwelinye ibandla okuthiwa ngelabokufika baseNigeria. Bekusontwa njengokujwayelekile kuduma nezinsimbi.

Yize amabhizinisi alaba bokufika abesebenza ngokujwayelekile ngeSonto kodwa izolo ezinye izitolo bezivaliwe abanye bathe bebesaba ukuthi bangahlaselwa emuva kwembizo.

Lisekwa yizinhlaka ezahlukene ikhwelo lokukhuza abasebenzisa izinkundla zokuxhumana ukusabalalisa izithombe ezihlasimulisa umzimba ezimataniswa nodlame lokuhlaselwa kwabokufika.

ZANELE MTHETHWA

LISEKWA yizinhlaka ezahlukene ikhwelo lokukhuza abasebenzisa izinkundla zokuxhumana ukusabalalisa izithombe ezihlasimulisa umzimba ezimataniswa nodlame lokuhlaselwa kwabokufika.

Ngempelasonto uMengameli Jacob Zuma ukhuze umhlola ngokusatshalaliswa kwalezi zithombe okuthiwa zingamanga njengoba ezinye zathathwa kwezinye izigameko ezingahlobene nodlame oluqhubekayo. UMengameli uhlehlise uhambo lokuya e-Indonesia wavakashela ikhempu yabokufika eChatsworth, eThekwini.

Kusukela kuqubuke udlame emasontweni amabili edlule sekushone abangaphezu kwabawu-12 njengoba uNgqongqoshe wamaPhoyisa uMnuz Nathi Nhleko ethe kusukela ngoLwesihlanu kushone abayisikhombisa okubalwa nabathathu bakuleli.

Abasebenzisa izinkundla zokuxhumana bebesabalalisa izithombe ezinyantisa igazi zezidumbu, okubalwa nezingane eziphophoza igazi. Esinye isithombe besikhombisa ingane yopha ebusweni ikhala, nesinye sendoda egencwe ikhanda ilele phezu kwegazi.

Unkosikazi kaMengameli uNkk Thobeka Zuma naye uzigxekile lezi zithombe athe zizotshala inzondo nasezinganeni.

Sekuvele ukuthi ezinye zalezi zithombe zathathwa ezigamekweni zobugebengu kanti ezinye zathathwa emaphephandabeni zihambisana nezindaba ezahlukene.

Ezinye zazo okuthunyelelwana zona naku-WhatsApp kuthiwa zathathwa ngezigameko zodlame lwabokufika olwadlula nabawu-62 ngo-2008.

I-ANC KwaZulu-Natal ithe iyakweseka okushiwo umengameli ngokunxenxa abantu ukuthi bayeke ukusabalalisa lezi zithombe. UNobhala uMnuz Sihle Zikalala uthe: “Sicela wonke umuntu abe nozwelo akhombise ubuntu, amele kahle izwe lethu elihlonipha bonke abantu ngaphandle kokucwasa ngolimi nangobuhlanga.”

UNgqongqoshe woMnyango wezaseKhaya uMnuz Malusi Gigaba ungomunye wongqongqoshe abahlabe leli khwelo. Uthe lezi zithombe zidukisa umphakathi zifake itwetwe futhi zizovusa uhlevane zidale olunye udlame.

“Lokhu kudukiswa kwabantu kumele kunqandwe yiwo wonke umuntu wakuleli othanda ukuthula. Uhulumeni ucela ukuthi abenza lo mkhuba bawuyeke,” kusho uGigaba.

UMnuz Zakhele Ndlovu ongumhlaziyi wezepolitiki e-University of KwaZulu-Natal, uthe kumele zigwenywe izigameko ezingadala uthuthuva ngoba abakuleli banentukuthelo, bahlale belinde noma yini ezobavukuza. Uthe ukuntula kwamathuba emisebenzi nomlando omubi wobandlululo wenza bangaxoli kalula.

Izolo iSilo uGoodwill Zwelithini kaBhekuzulu sicele abakuleli behlise umoya babeke phansi izikhali embizweni ebiseThekwini. Amaphoyisa athe isimo siyalawuleka njengoba sekuphele izinsuku ezintathu kungabikwanga zigameko zokuhlaselwa kwabokufika eThekwini.

Umgomo weNingizimu Afrika othinta abokufika uzobhekisiswa kabusha.

Babalo Ndenze

UMGOMO weNingizimu Afrika othinta abokufika uzobhekisiswa kabusha njengoba sekubheduke udlame olubhekiswe kubo.

UMengameli Jacob Zuma uzoba nemihlangano azobhunga kuyo ngomgomo othinta abokufika nezoqhakambisa ukuthi abokufika abangena eNingizimu Afrika bakwenza ngendlela efanele nokhwakha ubudlelwano obuhle phakathi kwezakhamuzi zakuleli nabokufika.

UZuma ngeke azishiye ngaphandle izikhalo zezakhamuzi ezithi kumele kuqiniswe imigomo elawula abokufika. Ihhovisi likaMengameli lithe uZuma uhlose ukwakha ubudlelwano obuzoqhubeka nalabo abangena ezweni ukuqinisekisa ukuthi lokhu kuhlaselwa kwabokufika akusophinde kwenzeke.

“Asikho isikhalo esingaba khona ngokubulawa kwabantu ngalolu hlobo, ukudicilelwa phansi kwezakhiwo nokuhlukunyezwa kwabantu okubalwa kubo abesifazane nezingane. Abaningi ezweni bayasigxeka lesi senzo, ngokubambisana kumele sisebenze ngokuzikhandla ukuze siqede isihlava nenzondo emphakathini wethu,’’ kusho uZuma.

Kuleli sonto uZuma uzohlangana nabezindaba nabanye abaholi bezinhlangano ezimele abokufika ababhace kuleli bebalekela izimpi emazweni abo.

Kusasa uzohlangana nabezenkolo, abamabhizinisi, ezomsebenzi, yintsha, abesifazane, abezemidlalo nabanye.

“Kodwa-ke, inselelo ethinta ukungena kwabokufika ezweni idinga isixazululo esingeke siphazamiseke ngokuhamba kwesikhathi. Ngalokho, ngibe sengisungula ikomiti longqongqoshe elizosebenza ngendlela,” kusho uZuma.

Uphinde wagcizelela nokuthi yize esizwa isikhalo sezakhamuzi kodwa lokho akuchazi ukuthi sekungaze kube khona ababulawayo, kudicilelwa phansi nezitolo zabokufika.

NgeSonto uMnuz Malusi Gigaba, uNgqongqoshe woMnyango wezaseKhaya, uthe umnyango wakhe uzokwethula isiphakamiso ngemigomo ethinta abokufika ngonyaka ozayo.

UGigaba uthe ingqungquthela yesine ye-ANC ethinta imigomo eyayingo-2012 yabhunga ngemigomo ethinta abokufika yaqhamuka nezincomo ezithi uhulumeni kumele ayisebenzise.

Yakubona ukuthi ukungabhaliswa kwabokufika kubeka engcupheni umnotho nezokuphepha ezweni.

UGigaba uthe uhulumeni kuzodingeka ukuba uyibhekisise kahle imigomo ethinta abokufika nanokuthi ziningi izinhlelo eziqhubekayo okuhloswe ngazo ukufundisa umphakathi.

“Sisazozimemezela ezinye ezihlanganise okuningi nezibanzi. Izinhlangano eziningi bezihlanganyele kuzo,” kusho uGigaba.

I-EFF ithe kudutshulwe ilungu layo elilodwa lalimala ngesikhathi ebhikishela ukubulawa koMnuz Emmanuel Sithole e-Alexandra, eGoli.

IZOLO i-Economic Freedom Fighters (EFF) ithe kudutshulwe ilungu layo elilodwa lalimala ngesikhathi ebhikishela ukubulawa koMnuz Emmanuel Sithole waseMozambique e-Alexandra, eGoli.

“Uthi uyazama ukubhikisha usuka la ulibhekise ehostela labesifazane laphaya bese amaphoyisa efuna ukukubulala. Ilungu lethu lidutshulwe ngesikhathi lizama ukudlulisela umyalezo obalulekile kwamanye amaqabane namuhla,’’ kusho uMnuz Julius Malema etshela abalandeli beqembu abebehlangene ku- 4th Avenue bezomlalela ukuthi uthini.

Uthe i-EFF iyabahlonipha labo abalwela amalungelo esintu.

Esalinde ukufika kukaMalema, amalungu e-EFF, abedlubhe amabharethi abomvu nemifaniswano yeqembu, abelokhu ehla enyuka emgwaqweni emasha esho iziqubulo ezigxeka ukuhlaselwa kwabokufika.

Ilungu le-EFF elilimalile kuthiwa lidutshulwe ngamaphoyisa onyaweni ngesikhathi kunemashi. Akucaci ukuthi yini eholele ekutheni ligcine selidubuleka.

USithole ugwazwe washona ngamadoda amane elokishini eliseGoli ngoMgqibelo. sekuboshwe abathathu ngokufa kwakhe.

Uhulumeni usekuqinisekisile ukuthi sekushone abayisikhombisa kulokhu kuhlaselwa kwabokufika KwaZulu-Natal. – ANA

Inkosi Mangosuthu Buthelezi uthe kuyichilo konke lokhu okwenzeka eNingizimu Afrika.

MLUNGISI GUMEDE

UNDUNANKULU kaZulu, inkosi Mangosuthu Buthelezi, uthe kuyichilo konke lokhu okwenzeka eNingizimu Afrika lapho abantu abamnyama behlasela abalingani babo basezwenikazi lase-Afrika.

“Kulo moya okhona wentukuthelo, indluzula nendelelo, kufanele sithokoze eNgonyameni yethu ngokuba nobuhlakani bokuba ibize imbizo. INingizimu Afrika ibambene nesimo esibucayi nesesenze amehlo omhlaba athi njo kithi. Sibuthana namhlanje esikhathini esibucayi.

Kukhona indluzula ebhebhetheka emiphakathini yakithi ibhekiswe kubafowethu nodadewethu abavela ezwenikazi i-Afrika,” usho kanje.

UButhelezi uthe kuyihlazo ukuthi abantu baseNingizimu Afrika bahlasele abantu ababakhoselisa emazweni abo ngesikhathi somzabalazo wenkululeko.

“Laba ngabantu abanezibopho zohwebo ezisixhumanisayo nesinezibopho zobuntu nabo, kawukho umqondo kulokhu okwenzekayo, kokhelwa inhlansi futhi yokheleka yadala amalangabi asabekayo.”

Uthe emehlweni omhlaba, umfanekiso wesizwe samaZulu noweNgonyama ulimele, wengeza ngokuthi kunesidingo sokuba kulungiswe lesi simo ngokushesha.

“Kodwa siyazi ukuthi ubuholi bufuna iminikelo kanti izingonyama zethu kazikaze zikugweme ukwenza umnikelo ngenxa yegama, isithunzi nobunye besizwe sakithi. Esingakwaziyo ukukwenza ngukuba sithule nje sivumele umfanekiso olimeleyo weNgonyama yethu ukuba uvule indlela eya ekunyundelweni kweNgonyama yilabo inzondo yabo abavamise ukukwazi ukuzibamba bangayivezi nakuba ilokhu ikhona,” usho kanje.

UButhelezi uthe izimbangi zabo zizosebenzisa leli thuba ukukhiphela ulaka lwazo kubona.

“Laba abaphikisana nesimiso sesihlalo seNgonyama nesimiso sobuholi bomdabu bazosihlasela manje, sidinga ukuwulungisa ngokushesha ngokungenzeka umonakalo, sivale lesi sikhala esisobondeni,” usho kanje.

Okuqaphelekile lembizweni kube wukuhhewulwa kwabaholi bezombusazwe nabefundisi bamahlelo ezenkolo ezehlukene.

UNgqongqoshe wezokuThuthukiswa koMnotho nokuVakasha KwaZulu-Natal, uMnuzi Mike Mabuyakhulu obephethe uhlelo, uphoqelekile ukuba akhuze labo abebehhewula abefundisi bezinkolo ezehlukene abebethandaza.

UMabuyakhulu uthwale kanzima ezama ukukhuza amabutho abebuye adlebeleke uma kukhuluma abathile.

Sesiphenduke inkundla yokudlalela izigebengu isikole iLangalibalele Primary.

MHLENGI SHANGASE

SESIPHENDUKE inkundla yokudlalela izigebengu isikole iLangalibalele Primary esiqanjwe ngowayenguMengameli wokuqala we-ANC uDkt John Langalibalele Dube eNanda, esigqekezwa mihla le kuthathwe izinto ezehlukene.

NgoMgqibelo kugqekezwe kwathathwa izihlalo zabafundi kwathi ngeSonto ebusuku kwathathwa izitofu zokupheka, ama-fridge, ukudla kwabafundi kanye namathini kafishi.

Izolo abafundi basheshe bagodukiswa ngenxa yokuthi amathoyilethe awasebenzi kulandela ukuhlusulwa kwamapayipi. Abazange badle njengoba kwebiwe nokudla obekuzophekwa okubalwa amasaka amarayisi, awempuphu, imifino nofishi.

Othisha banqume ukuyoqhinqa emahhovisi oMnyango wezeMfundo ngoba uhlelo lokufuna ukulungiselwa isikole luhamba ngolonwabu.

Isolezwe lifike kulesi sikole izolo, uthishanhloko enomhlangano namalungu omphakathi, amaphoyisa ukuze kutholakale isisombululo.

Izihlalo okuthiwa zithathiwe zibalelwa ku-50, kuhleshulwe isango lasekhishini okuphekelwa kulo kwase kukhahlelwa isicabha.

Kwelinye ikilasi kugotshiswe isango amadeski asele wodwa izihlalo azibonwa kanti kwamanye akukho neminyango.

Amawindi alesi sikole afile futhi kuthiwa othisha sebekhande baze bakhathala besebenzisa imali yabo.

Omunye wothisha otshengise leli phephandaba umonakalo, uthe sekuphenduke insakavukela ukugqekezwa kwalesi sikole.

“Ngishayelwe wuthishanhloko ngoMgqibelo saphuthuma sazobheka, safica kuthathwe ingxenye yezihlalo ezinye zisele. Siziqoqile ezinye sazithukusa kanti sibuye namhlanje ekuseni (izolo) sesifica kugqekezwe ekhishini kwathathwa yonke into. Kunabafundi abathembele kulokhu kudla abasuka emakhaya bengadlile ngakho umphakathi kumele ubacabangele abantwana,” usho kanje.

Uthe kunzima nokulungisa isikole ngoba imali iphathwa ngumnyango kuthatha isikhathi eside uma befaka izicelo zokulungiselwa.

“Othisha bakhipha imali yabo balungise izindlu zangasese nezicabha nabo kufike lapho sebekhathala khona. Siyacela umnyango uyisukumele eyokuthi izikole ziziphathele imali ngoba azilungiseki uma kuzomele kufakwe izicelo kuwona okuthatha isikhathi eside,” usho kanje.

Ilungu lesigungu sabazali, uMnuz Vukani Shezi, lithe sebenqume ukuphuma bengena emphakathini befuna labo abeba impahla yesikole.

“Ikhona imikhondo esiyilandelayo ngokwebiwa kwempahla yesikole ngoba izingane zethu ziyalamba uma kwebiwa nokudla.

“Asinaye unogada ngoba isikole asinamali umnyango awusiniki ngakho nalabo abake bazama ukubamba, bayeka ngoba bengaholi. Siyazwelana futhi nothisha ngoba ngeke usebenze usuku lonke ungazikhululi,” usho kanje.

Umnyango uhlezi unxusa imiphakathi ukuthi inakekele izikole ngoba kulimala imfundo yezingane uma kwebiwa noma kucekelwa impahla.

Amaphoyisa aphenya icala lokugqekeza.

Abuyele emakhaya edangele amabutho abephume ngobuningi ezothamela imbizo ebibizwe yiMbube.

MLUNGISI GUMEDE

ABUYELE emakhaya edangele amabutho abephume ngobuningi ezothamela imbizo ebibizwe yiMbube enkundleni yezemidlalo eMoses Mabhida eThekwini izolo ngemuva kokuthi iSilo samabandla uGoodwill Zwelithini sifike sawapholisa sathi ayiphele nya indaba yokuhlaselwa kwabokufika kuleli.

Ngaphambi kokuthi sifike iSilo ngabo 12 emini, amabutho abevunule econsa ehlome ngezikhali zendabuko abezungeza inkundla esabisa ngokuthi uma iMbube iqeda ukukhuluma azohamba alibangise ePhoyinti eThekwini lapho kugcwele khona abokufika abaphuma eNigeria, Ghana nakoGabon. Indawo yasePhoyinti yaziwa kakhulu ngokudayiswa kwezidakamizwa kanye nocansi kanti kulokho kusolwa kakhulu abantu bokufika. Ngesonto eledlule kusize amaphoyisa abokufika behlome ngobhushu nezizenze bethi bafuna ukuziphindiselela uma behlaselwa.

Izolo amaculo abehaywa amabutho abenohlevane amanye ezwakalisa ephimisa ukuthi awayizwa kahle indaba yokuthi bayekwe abantu bokufika. Noma bebengafuni ukuziveza nokucashunwa kodwa abanye kule mbizo bebezwakala besebenzisa amagama okucwasa abantu abamnyama bokufika kuleli. Abanye bebephethe izingqwembe ezinombhalo obukubeka kucace ukuthi abayamuleki indaba yabantu bokufika.

Omunye wabebehambele le mbizo ubephethe ibhodi elinombhalo othi sekuphele iminyaka eyisishiyagalombili engasebenzi ekhala ngokuthi umsebenzi uthathwa abantu bokufika. Kwenye ingxenye amabutho abehaya izingoma zempi njengethi: “Wathinta uZulu udakwe yini uzofa.”

Ulaka emabuthweni abehambele imbizo lubonakale nangesikhathi kwethulwa ezinye zezihambeli njengobemele ihhovisi leNxusa laseZimbabwe kuleli ovele wahhewulwa kanjalo noNdunankulu waKwaZulu-Natal uMnuz Senzo Mchunu ngesikhathi ethula inkulumo yakhe.

Amabutho abefike ngamabhasi nezitimela obekungezokuthutha ezihlelwe uhulumeni wesifundazwe.

Bangaphezu kuka-5 000, abantu abebehambele le mbizo iningi labo kungamabutho.

Kuthe iMbube isiyiqeda inkulumo yayo amabutho abukeka ebhocobele ngoba ibikhuza ukuhlaselwa kwabokufika.

Ithe amabutho nezinduna kumele kube yibona abayizindlebe zayo futhi bavikele abokufika kulo lonke elakuleli.

UMnuz Zakhele Khomo obesebuthweni lasehostela laseDalton uthe njengoba sekukhulume “umlomo ongathethi manga” akukho okuzokwenziwa kodwa kumele kubekwe phansi izikhali.

UKhomo uthe vele abokufika bebehlaselwa yidlanzana elingosomathuba ebelizifunela ukufeza izinhloso zalo. “Iningi labantu abebenza lezi zigameko yizigebengu,” usho kanje.

Umhlaziyi wezepolitiki ozimele ongumcwaningi esikhungweni iXubera Institute, uMnuz Xolani Dube, uthe akaboni ukuthi le mbizo ebibizwe yiSilo izokuqeda ukuhlaselwa kwabokufika.

UDube uthe okwasusa impi ebikhona akusiyo inkulumo eyakhulunywa iSilo kodwa ukudideka emalungwini omphakathi okudalwa izizathu eziningi okubalwa kuzona ukungasebenzi nobubha nokungalawula kwabokufika.

Uthe umbuzo osele manje ukuthi abantu bazosilalela yini iSilo njengoba besikhuza.

UDube uncome iSilo ngokukhombisa ubuholi sangakhuluma into ebilindelwe amabutho abelindele ukuthi kuzophakwa impi.

ISilo samabandla uGoodwill Zwelithini sinxuse isizwe samaZulu ukuba sisebenzise ubuningi baso sivikele abokufika.

MLUNGISI GUMEDE

ISILO samabandla uGoodwill Zwelithini izolo sinxuse isizwe samaZulu ukuba sisebenzise ubuningi baso sivikele abokufika.

Sikhuluma embizweni ebibizwe yiso yahlelwa wuhulumeni waKwaZulu-Natal enkundleni yezemidlalo eMoses Mabhida Stadium, iSilo sithe siyazi ukuthi kunesandla sesithathu esihlose ukuba siqhathe abantu abamnyama base-Afrika kodwa kusetshenziswe indlunkulu kaZulu nesizwe sayo.

Ngesikhathi iSilo sithi siphaka impi, amabutho ashaye amakhwela azwakala ecula amaculo empi kodwa sanxusa amabutho ukuba avikele abokufika.

“Angiphaki impi eniyijahile kodwa ngiphaka impi yokuthi nivikele abokufika kulabo abayizigilamkhuba ezibahlaselayo egameni lenu, igama nesithunzi sesizwe samaZulu neNdlunkulu yaso silimele emhlabeni-jikelele ngenxa yezigebengu ezibhebhethekisa udlame,” sisho kanje.

“NjengeNkosi yenu ngithi lalani ngenxeba Zulu omuhle ngoba sekuze kwaphuma izidumbu. ngifisa ukuthi nigweme umgoga enicushelwe wona yilaba ababhebhethekisa udlame besebenzisa igama lesizwe senu,” sisho kanje.

Sithe ukuhlaselwa kwabokufika kade kwaqala, kwenzeka nango-2008.

“Kuyaqapheleka ukuthi inyanga kaNdasa ijwayele ukuba yinkinga e-Afrika. naseRwanda kwabulawa isizwe samaTutsi esicela esigidini ngo-1994, manje ngayo futhi inyanga efanayo sesibona kuhlaselwa abokufika lapha eNingizimu Afrika,” sisho kanje.

Sithe kukhona abasebenzisa inzondo abanayo ngesizwe samaZulu neNdlunkulu yaso babhebhethekise lolu dlame olubhekiswe kwabokufika ngenhloso yokungcolisa uZulu.

Sithe wonke amadolobha, izindawo zasemakhaya ngokwaso, ngakho kasisazimisele ngokuthi sizwe kuthiwa kukhona lapho kubulewe noma kuhlaselwe khona abantu bokufika.

“Thina siyisizwe esikuthandayo ukuthula. kusukela namhlanje nginxusa zonke izindlu zamakhosi aseNdlunkulu kaZulu ukuba zihlele imihlangano zingakapheli izinsuku eziwu-30 zibize imiphakathi nabantu bokufika abahlala kulezo zindawo kubhungwe ngale ndaba yokuhlaselana ukuze kudalwe ukuthula,” sisho kanje.

Sithe sizophinde sijube ihhovisi likaNdunankulu waKwaZulu-Natal, uMnuz Senzo Mchunu, ukuba lihlele ukhukhulelangoqo womhlangano namaNxusa avela emazweni wonke athintekayo ukuxazulula le nkinga.

Siphethe ngokuthi sitshele ababehambele imbizo ukuba bahlukane babuyele ezindaweni zabo beyokwakha uxolo.