Ukungafaki izicelo kusenesikhathi kwabaqala ukuya emanyuvesi kusadala izinkinga ekuqaleni konyaka.

ZANELE MSOMI

UKUNGAFAKI izicelo kusenesikhathi kwabaqala ukuya emanyuvesi kusadala izinkinga ekuqaleni konyaka njengoba kusekhona abatheleka ngomzuzu wokugcina bezozikhalela.

Selokhu kuphume imiphumela ka-matric ngoLwesibili sekuyaqala ukugcwala ezikhungweni. Isolezwe lixoxe noMnuz Len Mzimela, onguMqondisi wezokuXhumana eMangosuthu University of Technology eMlazi, wathi basabhekene nenkinga ngabafundi abangazifaki izicelo.

Izolo abafundi babambe olayini ngaphandle kwesango abanye bephindiselwa emuva ngenxa yokungazifaki izicelo zezikhala emahhovisi eCentral Application Office (CAO).

“Siyaya ezikoleni siyochazela abafundi ngokubaluleka kokufaka izicelo kwa-CAO sibanikeze namafomu kodwa uma kuqala unyaka sibhekana nenkinga efanayo. Abafundi bazithathela amafomu bangabhalisi. Lokhu kufaka izikhungo enkingeni kwande nolayini ngabantu abangakwenzanga okufanele,” kusho yena.

UMzimela uthe ngokwenqubo yokufaka isicelo, uma sekuphume imiphumela ka-matric uMnyango wezeMfundo uthumela imininingwane yabafundi ababhalisile. Kubhekwa ukuthi zingakanani izikhala kuqhathaniswa nabafundi ababhalisele lowo mkhakha. Abamukelwayo bathunyelelwa ama-SMS ukuze bayobhalisa ezikhungweni abathathwa kuzo. UMzimela uthe bambalwa abalandela le nqubo njengoba abanye befika emanyuvesi bengakawatholi ngisho ama-SMS.

“Abaningi sibaphindisela emahhovisi akwa-CAO ngoba yilapho kumele bathole khona ukuthi izikhala zisekhona yini. Ukufaka isicelo ngoJanuwari kudla nasephakatheni ngoba ukhokha u-R400 kanti uma ubhalise kusenesikhathi u-R170. Abanye bagcina bethatha noma yimuphi umkhakha ongagcwele enyuvesi,” usho kanje.

Umnyango ucele ukuthi izikhungo zibacabangele nonyaka abafundi abafake izicelo sekwedlule isikhathi ngoba isiteleka sabasebenzi baseposini sibe nomthelela.

UMzimela uthe isikhungo sibabhekelele abanjalo ngoba belule isikhathi sokufaka izicelo ngonyaka odlule.

Nase-UNISA kuqalile ngoMsombuluko ukubhalisa kwabafundi okubalwa naseRichards Bay lapho okube nezingqinamba izolo.

UMnuz Siza Sithole obevele efunda khona uthe olayini sebeqalile kodwa azikabikwa izinkinga zabalala khona njengokujwayelekile.

“Inkinga esibe nayo wukuphela kwamaphepha anesigxivizo saphindiselwa emuva sabuya ngo-12. Noma kungakagcwali kakhulu kodwa kuyavukwa ngoba emuva kuka-2 ntambama ababe besathatha muntu ukuze kuqedwe abangaphakathi,” kusho yena.

Kulindeleke ukuthi kugcwale kakhulu ezikhungweni kusukela ngesonto elizayo njengoba ezinye zizobe ziqala ukubhalisa.

Ukubhema kubabeka engozini enkulu abantu abaphila negciwane lengculazi abathatha ama-ARVs.

INTATHELI YESOLEZWE

UKUBHEMA kubabeka engozini enkulu abantu abaphila negciwane lengculazi abathatha imishanguzo yokuthithibalisa igciwane lengculazi ama-antiretrovirals (ARVs).

Ucwaningo oluphume kumqingo wocwaningo i-AIDS luveza ukuthi abantu ababhemayo basengozini enkulu yokuthola isifo senhliziyo nomdlavuza ongahambisani negciwane lengculazi.

Luveze nokuthi iminyaka esingaphilwa umuntu wesilisa oneminyaka engu-35 onegciwane lengculazi incipha ngeminyaka eyisishiyagalombili ngenxa yokubhema.

Abacwaningi bathe umdlavuza wamaphaphu yiwo oholele ekufeni kakhulu kwabantu futhi abantu abebeshona ngenxa yomdlavuza wamaphaphu bekuyilabo ababhemayo.

Babheke imininingwane ngaba-ntu abangu-18 000 e-Europe naseNo-rth America abaqale imishanguzo phakathi kuka-1996 no-2008.

Iningi lalabo abebeyingxenye yocwaningo bebebhema.

Amathuba okufa kubantu ababhemayo abephezulu kakhulu uma kuqhathaniswa nalabo abangabhemi. Kulabo abayeke ukubhema abehla amathuba okufa.

“Imiphumela eveza ukuthi amathuba okufa kulabo abayeke ukubhema uma kuqhathaniswa nabasaqhubeka nokubhema kukhombisa ukuthi kufanele kufakwe izinhlelo zokusiza abantu ukuthi bayeke ukubhema ezinhlelweni zokunakekela abaphila negciwane lengculazi,” kusho abacwaningi.

Bathe beyicace ngokusobala imiphumela emihle yokungabhemi kulabo abathatha ama-ARVs.

Abantu abathatha imishanguzo abangabhemi bebephila isikhathi esijwayelekile nomphakathi wonkana.

Abacwaningi bathe uma abantu abaphila negciwane lengculazi benakekelwa ngendlela futhi bethatha kahle imishanguzo yabo bangaphila impilo ejwayelekile.

Noma kunjalo bakucacisile ukuthi amazinga okushona aphezulu kubantu abaphila negciwane uma kuqhathaniswa nomphakathi wonkana.

Izizathu zalokhu azicacile kodwa okubalulekile ukuthi izizathu zokufa kwabantu abaphila negciwane manje sezihlanganisa nezifo okubalwa kuzo esenhliziyo namaphaphu. Lezi yizifo ezingadalwa yigciwane.

Abacwaningi baphinde baveza ukubhema, bekuya ngokudala ezinye izinkinga ngokukhula kwalabo abebebhema bebe bethatha imishanguzo.

Baphethe ngokuthi ukubhema kubeka abaphila negciwane lengculazi engcupheni yokufa bebulawa yizifo ezihambisana nokubhema kunokuthi babulawe yigciwane lengculazi.

Lokhu kusho ukuthi kufanele kuqiniswe ezinhlelweni zokusiza abantu ukuthi bayeke ukubhema.

Sekuquleke iziguli ezine amasonto amathathu elandelana esibhedlela iKing Dinuzulu kulandela ukufa kwe-air conditioner.

PHILI MJOLI

SEKUQULEKE iziguli ezine amasonto amathathu elandelana esibhedlela iKing Dinuzulu kulandela ukufa komshini ongenisa umoya opholile i-air conditioner kusona.

Kuthiwa kunensimbi ethile efile kulo mshini eyakhiwa eGermany abaphathi abathi isa-odiwe.

Esinye seziguli esilaliswe kulesi sibhedlela esinesifo sofuba esingezweli emakhambini iMulti Drug Resistant TB (MDRTB) sithe i-air conditioner baqala ukuyibona ukuthi ayisebenzi ngoKhisimusi, batshelwa ukuthi izolunga maduzane.

“Ngalelo langa lalishisa likhipha inhlanzi emanzini umoya ungezwakali noma amafasitela neminyango kuvuliwe.

Abanye abantu babehluleka nawukuphefumula kahle ngenxa yokushisa. Okwesabisa kakhulu ukuthi isifo sofuba sisabalala kalula uma umoya ungaphumi, manje sesiyesaba njengoba sekuphele amasonto amathathu ingalungiswa. Ungayibona into eyenzeka lapha uma ilanga lishisa kakhulu sonke sisuke sesifuna ukuphumela emnyango, abahlengikazi nabo bayajuluka kunzima ukusebenza. Onina bezingane ezisanda kuzalwa, ufika beziphephetha ngamathawula bekhala bezwela ukushisa,” kuchaza yena.

Uqhube wathi sebenovalo lokuthi nemithi abanikezwa yona kungenzeka ukuthi seyonakele.

Omunye wabasebenzi bakulesi sibhedlela ongagunyaziwe ukukhuluma nabezindaba uthe njengamanje sekumisiwe ukuhlinzwa kwabantu ngoba igumbi lokuhlinzela lidinga umoya opholile.

“Eminye imithi sesisizwa ukuthi vele ihlala emafrijini, ukuze ingonakali kodwa uma isimo siqhubeka nokungalungiswa kungenzeka kube nenkinga uma kwenzeka ukushisa ngaphezulu kuka-25C njalo ngoba akuyona yonke imithi ekwazi ukuhlala efrijini,” kusho yena.

UNksz Lungile Zwane osebenza enkampanini ethaka imithi uthe eminingi ehlala emashalofini ayisheshi ukonakala yize ingasebenzi i-air conditioner kodwa akulula ukubona uma seyonakele.

“Okuyinkinga ngale mithi ukuthi njengoba isuke ibhalwe isikhathi esithile sokuthi isetshenziswe ngaphambi kwaso uma isihlale endaweni eshisayo.

Leso sikhathi asisabanjalo futhi ayikho indlela yokukubona lokhu ngaphandle kokubona isiguli singasindi sibe sisebenzisa imithi, nakho okungelula ukwazi ukuthi yimuphi umuthi ongasebenzi ngoba isuke iminingi esetshenziswayo,” kusho yena.

Uthe kuyingozi kakhulu uma amashalofu engavalwa ilanga lingena kuwo.

Isitatimende esithunyelwe nguMnyango wezeMpilo KwaZulu-Natal sithe inkampani eqokelwe ukulungisa i-air conditioner kulesi sibhedlela isiqalile ukusebenza.

“I-air conditioner ife ngosuku olwandulela uKhisimuzi izinkampani eziningi zivalile okuyikho okuholele ekutheni kungasheshi kulungiswe.

“Siyethembisa ukuthi ngesonto elizayo konke kuzobe sekusesimweni. Imithi esesibhedlela iyasebenza iziguli azingakhathazeki,” kusho isitatimende.

Abahlaziyi bezepolitiki bayibona igagamela i-ANC ngokuqala imizamo yokubuyisa isifundazwe esiphethwe yi-DA iWestern Cape.

CELANI SIKHAKHANE

ABAHLAZIYI bezepolitiki bayibona igagamela i-ANC ngokuqala imizamo yokubuyisa isifundazwe esiphethwe yi-DA iWestern Cape ukuze ikwazi ukuthola omasipala abakhulu njengoba ihambise umbuthano wayo obalulekile kulesiya sifundazwe wokugubha iminyaka engu-103 yasungulwa noweJanuwari 8 Statement.

Lokhu bakusho bephawula ngesinqumo se-ANC sokutheleka eWestern Cape nokuzama ukuhlasela i-DA ukuze banxenxe abantu ekutheni bayivotele njengoba nomengameli ebatshele kahle abantu bakhona ukuthi uma bephatha bazokhuculula kwasani balungise izinto.

Umhlaziyi wezepolitiki, uMnuz Ralph Mathekga, uthe kuyoba wumlingo ukuthi i-ANC ithole iWestern Cape ikakhulukazi njengoba bezamile ngokhetho lukazwelonke obelungoMeyi 7 kodwa bathelwa ngehlazo, imiphumela yaba mibi kakhulu.

“Empeleni bekumele bagxile eGoli okuyisifundazwe esicishe sabalahlekela ngoba akulula ukuthi bathole iWestern Cape. Kunalokho kusadingeka uma beyifuna iWestern Cape kungabi ukuthi bagcina ngalo mbuthano kuphela ozoba kusasa kodwa kufanele baqinise izinhlaka zabo ukuze baqale ukuthi bafuna ukubuyisa lesiya sifundazwe. Nakuba kunjalo kodwa ngibona kusazothatha iminyaka ukuthi basithole lesiya sifundazwe ngoba nomasipala bakhona noma bengabathola abathile ngo-2016 kodwa kuyobe benze ngomlingo uma bengathola iCape Town,” kusho uMathekga.

Uthe inkulumo kaZuma yokuthi bazokhuculula uma bethatha izintambo ifana nehlaya ngoba selokhu i-DA iphathile iminyango kahulumeni nomasipala bathola imibiko emihle engenagcobho kumcwaningi mabhuku kusuka ekuphathweni kwezimali.

USolwazi Somadoda Fikeni ongumhlaziyi uthe naye akaboni kulula ukuthi iWestern Cape ibuyele ku-ANC ngemuva kokuhluleka kwayo ukuphatha ngendlela kwaze kwaba iwela ezandleni ze-DA.

“Kusazothatha isikhathi ukuthi bayibuse iWestern Cape ngoba kuyofanele bakhombise ubumbano kuqala balwe noqhekeko olungaphakathi embuthweni ngaphambi kokuthi banxenxe abantu. Ngaphandle kwalokho ezintweni esizilindele wukubona umengameli enkulumeni yakhe ehlasela i-DA ngokusebenza kwayo abazokuchaza ngokuthi inakekela izindawo zabamhlophe kodwa ezabamnyama zisele ngaphandle.

“Okunye esingakulindela ukuthi bagxile kakhulu ezinhlelweni zomnotho njengoba bebhekene ne-EFF ezama ngakho konke ukubenza babe ngabantu abangawukhathalele umnotho ozuzisa abampofu,” kusho uFikeni.

Uthe okunye okungalindelwa ukuthi umengameli akhulume ngoqhekeko kumadlelandawonye nasebuholini bezinhlaka ze-ANC.

I-ANC yalahlekelwa yi-Western Cape ngo-2009 ngemuva kwemibango eyayikhona kubaholi bayo okungoMnuz Ibrahim Rasool owayenguNdunankulu noMnuz Mcebisi Skwatsha kwaba maqembu qembu neminyango yathola imibiko eyayinogcobho nokungaphathwa kahle kwezimali.

Namhlanje kuzoba neGala Dinner eCape Town International Convention Centre bese kusasa kuba nombuthano omkhulu walo mcimbi weminyaka engu-103 kwasungulwa uKhongolose.

Selokhu kuqale isonto abaholi be-ANC beholwa wuMnuz Jacob Zuma noMnuz Cyril Ramaphosa basabalele zonke izindawo bekhuluma nabantu.

Kuboshwe abafana ababili baseJozini ngecala lokubulala, ukudlwengula nokuthumba intombazane.

MTHOKOZISI MANQELE

Ebika eseJozini

KUBOSHWE abafana ababili baseBiva, eJozini abaneminyaka elishumi ngecala lokubulala, ukudlwengula nokuthumba intombazane (7), isidumbu sayo esitholwe singcwatshwe egcekeni lakubo ngoLwesithathu.

Omunye wabafana ababoshiwe ungumfowabo kamufi uKwanele Nhlenyama kanti omunye owakamakhelwane. Kuthiwa uduke ngoLwesibili kade eshiywe unina nengane encane nomfowabo omdala ongumsolwa.

Isolezwe lizifikele mathupha emndenini wakwaNhlenyama eBiva isimo sisibi kubatshwazwa isihluku esenziwe izingane.

Elandisa leli phephandaba unina wengane ebulewe obeseshelwe yizwi ngenxa yokukhala, uthe ushiye uKwanele nengane waya emasimini aseMjindi eyohlakula ezobuya ntambama. Uthe ngesikhathi ebuya uhlangatshezwe indodana yakhe (ewumsolwa) imjabulela nje. Uthe ube esebona ingane yakhe encane iyodwa wabuza ukuthi ukuphi uKwanele wathi akamazi. “Ngishaywe uvalo ngayombuza kwamakhelwane bamlandula ngaya nasekhaya bathi abakaze bambone ngalala inhliziyo yami ibuhlungu.

“Okungishaqisile ukuthi indodana yami lena ebulele uKwanele bengihamba nayo simcinga nasehlathini ingatshengisi ukuthi iyamazi kodwa yabaleka uma sekufika amaphoyisa,” kusho unina kamufi.

“Ngibikele induna, amaphoyisa namalungu omphakathi azogcwala ekhaya. Induna namaphoyisa abuze ukuthi likuphi ithoyilethi nendawo ewumgodi. Ngithe ngiyobatshengisa indawo ebiwumgodi ngafica isigqitshiwe kwasolakala ukuthi kukhona okushaya amanzi kuyo,” kusho yena. Uthe ngaleso sikhathi indodana yakhe ivele yaduka yabaleka kwasala omunye wakwamakhelwane ababoshwe naye.

Uyisekhulu kamufi (naye eligodliwe igama lakhe ukuvikela abasolwa abangaphansi ngeminyaka) uthe kube sekumbiwa umgodi satholakala isidumbu sikamzukulu wakhe.

“Ubengcwatshiswe okomuntu impela. Bambe umgodi bandlala icansi bafaka isidumbu, babeka amapulangwe ngaphezulu base nemgqiba ngenhlabathi,” kusho yena.

Uthe abafana bathathe umkhonto omfishane obungasebenzi bamgwaza ngawo ezimbanjeni nasekhanda. “Izindaba zikhishwe owakwamakhelwane ethi bamgwazile kwaqala lo wakithi wamdlwengula kwase kulandela owakwamakhelwane. Bambulale kabuhlungu ngoba bathi umkhonto bebewuqongqotha ekhanda ngetshe kwaqhasha ubuchopho nathi esibubonile,” kusho yena.

Okhulumela amaphoyisa aseJozini uWarrant Officer Zwelinjani Madlopha uthe baboshiwe abafana kodwa kusacutshungulwa ukuthi bazogcinwaphi ngoba basebancane. Uthe omunye ugcine eboshelwe eMadonela. Khona manjalo kuvunjululwe isidumbu sowesifazane ebese sonakele kwaGedleza khona eJozini. Sibonwe owesilisa okhangwe yingalo yomuntu ebivela endaweni ebiphandwa yizinja wahlaba umkhosi.

U-ESKOM usuxwayise abantu bakuleli ngokuthi uma bengawusebenzisi ugesi ngendlela kungenzeka liphele leli sonto ungekho kwezinye izindawo.

U-ESKOM usuxwayise abantu bakuleli ngokuthi uma bengawusebenzisi ugesi ngendlela kungenzeka liphele leli sonto ungekho kwezinye izindawo.

Kwa-Eskom bathi njengoba izinkampani namabhizinisi amaningi eqalile ukusebenza, linyukile nezinga lokusetshenziswa kukagesi.

Bathi izinga lizonyuka kakhulu ngelizayo uma sekuvulwa nezikole. Ngeledlule kwa-Eskom bathe ukukhula kwezinga lokusetshenziswa kukagesi kwenza abe makhulu amathuba okuthi kubuye inkinga yokunqamuka kwawo.

“Sizokwenza konke okusemandleni ukugwema lesi simo, yingakho sinxusa abantu ukuba behlise izinga abasebenzisa ngalo ugesi,” kusho okhulumela u-Eskom uMnuz Khulu Phasiwe.

Ngesonto eledlule ama-generator amabili ayengasebenzi okwenza ukuthi kube nezindawo ezathinteka ngesikhathi kunqamuka amandla kagesi.

KUNGENZEKA bazithole belinda iminyaka emithathu ngaphambi kokuphinde babhale abafundi baka-matric abazolahlwa amacala okukopela.

LUNGI LANGA

KUNGENZEKA bazithole belinda iminyaka emithathu ngaphambi kokuphinde babhale abafundi baka-matric abazolahlwa amacala okukopela.

Lesi ngesinye sezigwebo uMnyango wezeMfundo eyisiSekelo ocabanga ukuthi zingatholwa abafundi abatholakala benecala njengoba kuphenywa ngezinsolo zokukopela ezikhungweni zika-matric.

Inhlangano eyengamele ukuqinisekiswa kwemiphumela ka-matric Umalusi iveze ukuthi izikhungo ezingu-20 zaKwaZulu-Natal nezingu-16 zase-Eastern Cape zisolwa ngokuba kulo mkhonyovu wokukopela.

Okhulumela uMnyango wezeMfundo eyisiSekelo uMnuz Elijah Mhlanga uthe bafuna ukubeka isibonelo esizokwenza nabanye abafundi bangacabangi ukwenza okufanayo.

“Kufanele bazi ukuthi uma ukopela uzobanjwa. Ezinye zezigwebo ezingatholwa yilabo abatholakala benecala kungaba ukungavunywa kwemiphumela yabo njengesemthethweni. Sithatha isenzo sokukopela njengesibucayi kakhulu okungangokuthi bangavinjelwa iminyaka emithathu bengawubhali u-matric,” kusho uMhlanga.

Izijeziso zizohambisana neqhaza lomfundi nomfundi kulo mkhonyovu wokukopela.

Uqhube wathi kungenzeka bacabange nokubabeka amacala ngokwezomthetho abagcina betholakale benecala. Uthe ukukopela kufana nenkohlakalo.

Ukhuluma kanjena nje othishanhloko ababephethe ukugadwa kwabafundi ngesikhathi bebhala u- matric ezikhungweni ezithintekayo bebevele phambi kwethimba eliphenya ngalo mkhonyovu njengoba bekuqala ukulalelwa kobufakazi izolo.

Kulo lonke leli sonto kuzolalelwa ubufakazi babaphathi bezikhungo okwabhalelwa kuzo ezisolwa ngokukopela kanye nobalabo ababegade abafundi.

Ngesonto elizayo kuzolalelwa okwabafundi. Abazothula ubufakazi bazokhonjiswa ubufakazi obuqoqwe uMnyango wezeMfundo eyisiSekelo noMalusi bese bephendula ipheshana elizobe linemibuzo ngalo mkhonyovu. Emuva kwalokhu bazobe sebevela phambi kwekomiti lapho kuzoxoxiswana nabo ngalolu daba.

UMhlanga uthe abafundi bazofika nabazali kepha labo abafuna ukuza nabameli bangakwenza lokhu kodwa kufanele babikele umnyango ukuze wenze ezawo izinhlelo.

Uthe baphoxekile futhi bakhathazekile ngokuvezwe uphenyo lwabo kodwa okubajabulisayo ukuthi izinhlelo abazifakile zokuvikela ubugebengu ziyasebenza.

Uthe bayazi ukuthi amaphepha awazange aputshuke.

Kusolwa ukuthi abafundi babetshelwa okufanele bakubhale ngoba kokunye bebenza amaphutha afanayo. Kwesinye nje kuvele ukuthi babhala nokuthi “qhubekani”.

Ziyisikhombisa izifundo eziseqhulwini lalo mkhonyovu nokuyiMathematics, Accounting, Geography, English First Language, Physical Science, Life Sciences neHistory.

Izikhungo zasemakhaya yizona ezihamba phambili kwezibandakanywa kulokhu. Isifunda saseMzinyathi, eMsinga sibalwa kwezihamba phambili. Balinganiselwa ku-5 300 abafundi abathinteka kulo mkhonyovu ezifundazweni.

UMnuz Lucky Ditaunyane okhulumela Umalusi uthe baqale ukubona ngesikhathi kumakwa ukuthi kukhona okungahambi kahle. Uthe bekuqala ukuthi kube khona inkinga yokukopela ngalolu hlobo. Amathimba abo aphumele nakwezinye izifundazwe ukubheka ukulalelwa kobufakazi.

Izinyunyana zothisha zimenyiwe ukuthi zibe yingxenye yohlelo lokulalelwa kobufakazi.

Unobhala weSadtu e-KZN uNksz Nomarashiya Caluza uthe kubajabulisile ukuthi uhlelo lokulalelwa kobufakazi lusheshe luqale.

“Sasivele siphakamisile ukuthi kusheshe kuqalwe ngohlelo lokuphenya mayelana nalolu daba. Siyakuthakasela nokuba yingxenye yalo,” kusho uNksz Caluza.

Uthe uma umnyango ucabanga ukufaka abameli kulolu daba kungakuhle uhlinzeke abafundi ngosizo lwabameli ikakhulu njengoba iningi labo liqhamuka emindenini engeke ibe nemali yokubatholela abameli.

UNksz Caluza uthe bafuna ukuba khona ukuze baqinisekise ukuthi lolu hlelo kuba ngolungachemile.

UMnuz Allen Thompson oyiPhini likaMengameli weNatu uthe le nyunyana nayo iqhuba olwayo uphenyo mayelana nezikhungo okuthinteka kuzo amalungu ayo.

Uthe kubakhathazile ukuthi umnyango noMalusi bangabavezeli ubufakazi kuqala ngaphambi kokuthi kuqale lolu hlelo.

UThompson uthe banethemba lokuthi uphenyo lwabo bazoluphothula ngoLwesihlanu. Uthe bafuna ukuthi ukuthweswa kwamacala kwenziwe emuva kokuthi sebeluphothulile olwabo uphenyo.

UMhlanga uthe bafuna ukuluphothula ngokushesha lolu phenyo ukuze izingane ezitholakala zingenacala ziqhubeke nezinhlelo zazo zokufuna izikhala ezikhungweni zemfundo ephakeme.

Kulindeleke ukuthi Umalusi wethulelwe umbiko ngoJanuwari 27 bese ukhipha izincomo ekupheleni kwayo le nyanga.

ISIKHULU senkampani yamabhasi aseThekwini uMnuz Mandla Gcaba kuthiwa wazigixabeza ngo R30.7 million okwabe kuyimali yokubolekwa ukuze iqhube umsebenzi webhizinisi lamabhasi, nakuba inkampani idonsa kanzima

Tania Broughton

ISIKHULU senkampani yamabhasi aseThekwini uMnuz Mandla Gcaba kuthiwa wazigixabeza ngo R30.7 million okwabe kuyimali yokubolekwa ukuze iqhube umsebenzi webhizinisi lamabhasi, nakuba inkampani idonsa kanzima. Abacwaningi bamabhuku baxwayisa ngokuthi uma le mali ingabuyiselwa, ibhizinisi lamabhasi lizozithola lidonsa kanzima kwezezimali.

Abedolobha laseThekwini bathi lokho sekwenzekile njengoba sebefake isicelo esiphuthumayo eNkantolo eNkulu yaseThekwini njengengxenye yemizamo yokubuyisela emuva le mali.

UMasipala weTheku uthi le nkampani ikweleta umasipala imali engu R52m, kanti eminyakeni emibili edlule le nkampani ibidonsa kanzima okungangokuba ike yashodelwa ngisho nawudizili wokuqhuba umsebenzi wamabhasi ayo angu 450 eyawathatha okwesikhashana kumasipala weTheku. Amabhasi abhekene nomsebenzi wokuthwala abantu baseThekwini abawasebenzisayo abalinganiselwa ku 50 000.

AbeTheku bathi sekukaningi betakula le nkampani okungekaGcaba ophinde abe isikhulu esiphezulu samatekisi. Ngo-Okthoba ngonyaka odlule umbiko wesikhulu seTheku onganekelwanga umphakathi waphakamisa ukuba le nkampani yamabhasi iTansnat, zonke izinto zayo ezithinta izimali zisuswe ezandleni zayo.

Encwadini efungelwe engaphambi kweJaji uRashid Vahed, uMgcinimafa weTheku uKrish Kumar uthe umasipala wanikela amabhasi kule nkampani ngo 2009, isivumelwano sabuyekezwa ngonyaka olandelayo. Lokhu kwakusho ukuthi iTansnat kwakumele ikhokhele umasipala imali engu-R15 000 ngenyanga ngesivumelwano sokubolekana umsebenzi wokuba baphathe amabhasi.

Le nkampani yathola uxhaso kwaboMnyango wezokuThutha luka-R16 million kanti kumasipala bathola uR15 million.

UKumar uthe ngo-Okthoba iTansnat yahluleka ukukhokhela abasebenzi amaholo yahluleka nokuthenga udizili wamabhasi.

Le nkampani isinikezwe kuze kube wukuphela kwenyanga ukuba ifake enkantolo amaphepha aphikisa lokhu. Izolo ummeli kaGcaba uMnuz Sandile Khoza unqabile ukuphawula.

NYANGA yodumo yaseThekwini uZamokwakhe “Bhaka” Nzama izithintele iziqandu kubalandeli bayo ngesikhathi ifaka izithombe zayo inomculi we-afro pop uKelly Khumalo ekhasini layo kuFacebook eliqambe ngembiza yalo, Uziqu Ezintathu.

CHARLES KHUZWAYO

INYANGA yodumo yaseThekwini uZamokwakhe “Bhaka” Nzama izithintele iziqandu kubalandeli bayo ngesikhathi ifaka izithombe zayo inomculi we-afro pop uKelly Khumalo ekhasini layo kuFacebook eliqambe ngembiza yalo, Uziqu Ezintathu.

Kulezi zithombe uBhaka uhleli ngokusondelana noKelly ehhotela lomntakabani eliseGoli iSaxon Boutique Hotel and Spa, eSandton.

Ube esebhala kanje: “Awusho ngani ukuthi Bhaaaaaka? Ziyenzeka eGoli angisabuyi eDbn.”

Unele wabhala kanje kwaphawula inqwaba, iningi lakhala ngokuthi uBhaka akasaphephile njengoba esejwayelene noKelly onyamanambana kulezi zinsuku njengoba esanda kuhhahhanyezwa yizihlwele emcimbini weDurban Jazz eThekwini ngoDisemba 26.

Kuzokhumbuleka ukuthi kunabasola ukuthi lo mculi waba nesandla ekufeni kowayengukaputeni we-Orlando Pirates neBafana Bafana uSenzo Meyiwa, ngoSepthemba nyakenye.

Ebuzwa uBhaka uvele wathi abekuhlanganele noKelly kuyimfihlo ephakathi kwakhe nalo mculi.

“Bekuwumhlangano omayelana nomsebenzi.”

Akafunanga ngisho nokuchaza ukuthi ngubani obecele ukuhlangana nomunye phakathi kwabo.

Kuhluleke ngisho esebuzwa ukuthi ngabe umhlangano wabo bewumayelana nobunyanga noma nomculo njengoba ebuye abe neqembu likamaskandi EzikaBhaka.

“Leyo yimfihlo yami noKelly engadingi omunye umuntu.”

Noma esebuzwa ukuthi bayashelana yini njengoba uKelly engasenalo isoka, uvele wahleka maqede wavala ucingo.

Imizamo yokuthola ukuphawula kukaKelly ayiphumelelanga, ucingo lwakhe beluvaliwe.

Ukungena ezintangeni kukaBhaka kuqubule imibuzo eminingi engazitholanga izimpendulo.

Yize iningi belisabela ukuphepha kukaBhaka kuKelly kodwa kukhona abasole uBhaka kanti elinye belikhwela lidilika kuKelly ngezinhlamba.

UWise Mthethwa ubhale ukuthi: “Usuyabheda manje Bhaka, akuyena umuntu ongachoma ngaye lowo. Uthini nje unkosikazi makunje? Akubona ubudoda lobo. Vele udumi-le asikho isidingo sokuyengwa yilo-wo. Iba njengoHhashi Elimhlophe ustikhe kumfazi wakho omuhle...”

UMaphindi Magoso wathi: “Uthi uzobuya pho kulowo? Angiboni, bese sesilashwa ngubani thina?”

UNikiwe Hlongwa uthe: “We Bhaka usahlala nama-golddigger?”

UPinkie Purity uthe: “Ayi-ke, manje awusaphephile lapho. Uma izingwenya zikukake kanje yhooo!”

Ubephawula ngesithombe sikaBhaka ekakwe nguKelly nodadewabo uZandile Khumalo, owasoleka ekuhlanganyelweni komkaMeyiwa uMandisa Mkhize eminyakeni eyedlule.

NoKhanyisile Jeza ubabaze ukugqoka ngokufana kukaBhaka noKelly.

Abanye bazwelane kakhulu nengoduso kaBhaka bethi akangayizwisi ubuhlungu.

Yize kunjalo kodwa abantu abayanga nganxanye okwamanzi njengoba uKhosi Pearl Jili MaMngoma ethe: “UBhaka nentokazi engingave ngiyikhonzile, awiiii! Kwathi angihlanye.”

USbonelo Mapensela uvele wathi nje yena: “Mngene Bhaka!”

IKUSASA lika-Itumeleng Khune, ongunozinti nokaputeni weKaizer Chiefs, lisezandleni zakhe ngokusho kwemenenja yaleli qembu, uBobby Motaung.

MBONGISENI BUTHELEZI

EseGoli

IKUSASA lika-Itumeleng Khune, ongunozinti nokaputeni weKaizer Chiefs, lisezandleni zakhe ngokusho kwemenenja yaleli qembu, uBobby Motaung.

UMotaung usho lokhu ngesikhathi kunesithangami nabezindaba eFNB Stadium, eSoweto, izolo emini. IChiefs ilungiselela umdlalo wobungani lapho izobhekana khona neTSG 1899 Hoffenheim, edlala kuBundesliga, eGermany, ngoLwesihlanu ngo-7.30 ebusuku.

Lo mdlalo ubhekwe ukuthi usize Amakhosi azizwe amandla njengoba elungiselela ukubuya kwemidlalo yePremiership neyeCaf Champions League eqala ngoFebhuwari 14.

UMotaung uthe basazohlala phansi nemenenja kaKhune, uDaniel Olebogeng, okulindeleke ukuthi itheleke kuleli sonto kuleli ukuzodingida inkontileka yalo mdlali.

Ebuzwa ukuthi bazomsayinisa yini inkontileka entsha lo nozinti ngoba kukhona amaqembu amfunayo, uMotaung uthe ngeke bamfake ingcindezi lo mdlali kodwa ngeke bame endleleni yakhe uma bengakwazi ukumnika into ayidingayo

“Ngeke sikwazi ukunika uKhune imali edlula le esizibekele yona kuChiefs. Silindele ukuxoxisana nemenenja yakhe kuleli sonto sizwe ukuthi sibekana kuphi. Uma kuwukuthi ufuna imali eningi esingeke sikwazi ukumnika yona sizomdedela ngenhliziyo emhlophe ukuthi ahambe,” kusho uMotaung.

Uthe useke wezwa ngemibiko ematanisa uKhune nePirates kodwa akukho osekuke kwakhulunywa yizikhulu eziphezulu zala maqembu mayelana nalokho.

“Kunesivumelwano esikhona phakathi kweChiefs nePirates sokuthi kungathathelwana abadlali. Uma kunesimo esiphoqa lokho, kungamele kuxoxisane abaphathi kuqala bese kuvunyelwana ngokuthile.”

Uthe abalandeli akumele baqhathanise uBrilliant Khuzwayo noKhune.

“UKhune wathola ithuba ngesikhathi uRowen Fernandez eya phesheya walisebenzisa. NoBrill-iant uthole ithuba lakhe manje siyamakha,” kusho uMotaung.

“Siyazi ukuthi abadlali babheka imali kakhulu uma bezosayina izinkontileka ezintsha kodwa kuningi okumele ukubheke ngaphambi kokuthatha isinqumo sokuya kwelinye iqembu. Asimlahlile, usengumdlali wethu.”

UDoctor Khumalo, oyiphini likaStuart Batxer, uthe bazoyithela induku iHoffenhiem ukuze bakhombise ukuthi ibhola liyadlalwa eNingizimu Afrika.

“Sizonika abadlali abasebancane ithuba lokuzibonakalisa kulo mdlalo. Noma benabo abalandeli babo abaseNingizimu Afrika sizobafaka induku phambi kwabo,” kusho uKhumalo.

U-Alexander Rosen, oyi-technical director kuHoffenheim, uthe bajwayele ukuya kwamanye amazwe ukulungiselela isizini, kodwa banqume ukuza eMzansi kulokhu.

“Sijabulile kakhulu ngokuba seNingizimu Afrika ngoba sijwayele ukuvakashela eTurkey, Portugal naseSpain uma silungiselela isizini.

“Lo mdlalo ngeke siwuthathe kalula ngoba ubalulekile kithina. Size neqembu lethu lonke esilithembile ukukhombisa lokho. Kithina ayikho imidlalo yesihle esivele siyithathe kancane,” kusho uRosen.

Kulesi sithangami kuvele ukuthi uKhumalo uyena ozocija Amakhosi kulo mdlalo ngoba uBaxter akaphilile unomkhuhlane.

KUPHOQELEKILE ukuthi kuvalwe isikhashana indawo eyamukela abalimele esibhedlela eStanger izolo emuva kokugasela kwamadoda abehlomile okusolwa ukuthi abelandela abanye abalimale kudubulana abamatekisi eStanger Manor efuna ukuzobaqedela phakathi esibhedlela.

BAWINILE NGCOBO

KUPHOQELEKILE ukuthi kuvalwe isikhashana indawo eyamukela abalimele esibhedlela eStanger izolo emuva kokugasela kwamadoda abehlomile okusolwa ukuthi abelandela abanye abalimale kudubulana abamatekisi eStanger Manor efuna ukuzobaqedela phakathi esibhedlela.

Kusolwa ukuthi okwenzekile kuhlobene nezimpi zamatekisi. Kusale enkundleni abantu ababili kwalimala abanye ababili emuva kwalesi sigameko okuthiwa senzeke ngezithuba zawo-6.30 ekuseni izolo.

Esibhedlela kuthiwa kushube isimo, abasebenzi bagcwala ngaphakathi bebaleka neziguli. amaphoyisa abe esevala kwangangeneka emuva kokuthi kungene amadoda.

Indlela obekuqhuma ngayo inganono kufakazelwe yinqwaba yemigqa ebidwetshwa ngamaphoyisa lapho bekusele khona amagobolondo ezinhlamvu.

Okhulumela amaphoyisa KwaZulu-Natal, uColonel Jay Naicker, uthe ujenga lwezimoto zonogada ebezidlula eStanger Manor zihlaselwe ngamadoda okuthiwa abephakathi kuka-10 no 15.

Kuthiwa abahlaseli bavulele ngenhlamvu bebhekise kulezi zimoto ebezilandelana, onogada nabo kuthiwa baphendule ngezulu lezandla kwadubuleka kwashona oyedwa wabahlasele kuqala. UNaicker uthe onogada ababili balimele baphuthunyiswa esibhedlela.

Omunye wesithathu okuthiwa ungusomatekisi yena kuthiwa ushone esendleleni ephuthunyiswa esibhedlela.

Abasolwa kuthiwa babaleke endaweni yesigameko ngemoto okugcine ngokuthi itholwe isishiywe ndawanathize eDarnall.

UNaicker uthe ophenyweni lwabo bathole ukuthi kukhona indoda engeniswe kwesinye isibhedlela efike ilimele inamanxeba okudutshulwa abasola ukuthi ingomunye wabasolwa abalimale kulokhu kudubula.

“Kuvulwe amacala okuzama ukubulala nelokubulala aphenywa ngamaphoyisa aKwaDukuza. Lesi sigameko sisesisha kakhulu ukuthi sesingasho imbangela yaso. Sesibize abaqapha umthetho ezindaweni ezakhele KwaDukuza ukuthi balekelele ukudambisa lesi simo kunqandeke nezinye izigameko ezifuze lezi,” kusho uNaicker.

UKhomishane wamaphoyisa esifundazweni, uLt General Mmamonnye Ngobeni, uthe bazokwenza konke okusemandleni ukuqinisekisa ukuthi abenze lesi sigamako bayaboshwa.

Uthe uphiko loKlebe luzoqhubeka nophenyo ngalesi sigameko kanti bacela noma ngubani ongaba nolwazi olungalekelela ukuthi beze emaphoyiseni ukuze kuboshwe abasolwa.

Khonamanjalo, uNgqongqoshe wezeMpilo KwaZulu-Natal, uDkt Sibongiseni Dhlomo, ukugxekile ukugasela kwabantu abahlomile esibhedlela.

Laba bantu kuthiwa bagasele emuva kokuthi kufike abebelimale kade bedutshulwa.

Ukugasela kwabo kuthiwa kuthuse iziguli nezisebenzi kodwa kuthiwa abahlalanga bangene ngaphakathi baphinde baphuma.

UDhlomo uthe okwenzekile akwamukelekile neze.

“Isifundazwe sethu siphuma esikhathini ebesinodlame kanti sesisebenze kanzima ukuze abantu baphile ngokuthula. Kubi kakhulu uma abantu ababuthaka bengasakwazi ukuthola usizo lwezempilo ngenxa yezigameko ezinje,” kusho uDhlomo.

OWESILISA waseNanda eMachobeni onesikhwele esingajwayelekile ngentombi yakhe uyivalela endlini ubusuku nemini engafuni ibone abanye, muva nje useyivale nasekubukeni ibhola kuthelevishini ngoba ethi izobona amanye amadoda ilingeke

NOKUBONGWA PHENYANE

OWESILISA waseNanda eMachobeni onesikhwele esingajwayelekile ngentombi yakhe uyivalela endlini ubusuku nemini engafuni ibone abanye, muva nje useyivale nasekubukeni ibhola kuthelevishini ngoba ethi izobona amanye amadoda ilingeke.

UMnuz Thulani Khanyile (35), ongunogada uthi lokhu ukwenziswa wuthando oluvutha amalangabi ngesithandwa sakhe uNksz Zama Ndlovu (31). UKhanyile akafuni nokuthi intombi yakhe isebenze ngoba ethi ezindaweni zokusebenza kugcwele abesilisa. Uma kwenzekile uNksz Ndlovu wahamba ngezithuthi zomphakathi njengetekisi, uKhanyile uthi akafuni ahlale eduze kowesilisa.

“Konke lokhu ngikwenziswa uthando ngoba isithandwa sami sihlukile kwabanye abesifazane,” kusho uKhanyile emamatheka ebheka emehlweni intombi yakhe.

Sebethandane iminyaka emine bekipitile kodwa uKhanyile uthi uzimisele ngokuyocela isihlobo esihle kwaNdlovu ukuze bashade bakhe umuzi.

Ngesonto lezi zithandani zizwakale emsakazweni womphakathi Izwi Lomzansi ohlelweni lukaVictor “Maswidi” Xaba zikhuluma ngothando lwazo, uKhanyile echaza nangezizathu ezenza avalele uNksz Ndlovu endlini.

“Lukhulu kakhulu uthando enginalo ngentombi yami yingakho ngiyivikela ngaso sonke isikhathi,” kucacisa yena.

“Uyabona nje iqembu lebhola engilinqena kakhulu ngoba linamadoda angempela i-Orlando Pirates. Yena uyalithanda ibhola kodwa mina angifuni lutho sengamtshela ukuthi angabe esalibuka,” kuchaza uKhanyile.

Uthe ngeke nakancane ayivumele iphume iyosebenza ngoba ngabe usevulela umpompi kubantu besilisa bazidelise ngentombi yakhe.

Uthi ngisho esemsebenzini ucela abafowabo ukuthi bamgadele ngoba engafuni ukuhlala engazi ukuthi yenzani.

Eziphendulela emamatheka uNksz Ndlovu uthe luyammangaza uthando analo uKhanyile ngaye.

“Anginankinga nokuthandwa kodwa lokhu sekungaphezu kwamandla. Nami ngiyamthanda. Sengize ngayeka ukubuka ibhola ngoba ubevele aqhamuke athi yini esiyithandayo ngoba amadoda wodwa lawa akwithelevishini,” kuchaza uNksz Ndlovu.

Uthe ukube kuya ngesoka lakhe ngabe akayi ndawo uhlala esekhaya ngoba uma eke waphuma lihamba naye.

“Ngiyathanda ukusebenza kodwa ngeke ngikwazi ngenxa yokuthi isoka lami alifuni ngiphume nami sengize ngakwamukela ukuthi alifuni lutho ngami,” kuchaza yena.

Lezi zithandani azinayo ingane kodwa uKhanyile uthi uma bengayithola kungafezeka iphupho lakhe. UNksz Ndlovu uthi uyakuthanda ukusebenza ukuze naye abe nezinto zakhe. Uthi unekhono lokucula.

UKhongolose uhlela ukufaka isi-mangalo ku-SA Human Rights Commi-ssion noma ePhalamende ngempatho ayithola eKapa ngesikhathi uhlela umgubho ka-103 wasungulwa.

sapa

UKhongolose uhlela ukufaka isi-mangalo ku-SA Human Rights Commi-ssion noma ePhalamende ngempatho ayithola eKapa ngesikhathi uhlela umgubho ka-103 wasungulwa.

“Imigomo esayibekelwa yidolobha yayihlose ukusivova iphinde iqinisekise ukuthi umbuthano wethu awuphumeleli,’’ kusho uMnuz Zizi Kodwa okhulumela i-ANC izolo.

“Konke okungaha-mbisani nenkululeko okwakwenziwa eWeste-rn Cape kwakuhlelwe ukuthi abantu abamnyama bangalubhadi eKapa futhi bayigcine ingangcolisekile.’’

UKodwa uthe abedolobha bathi i-ANC kumele iye eComputicket ukuze izothola amathikithi okungena enkundleni iCape Town Stadium lapho kwakugujwa khona iminyaka engu-103 i-ANC yasungulwa.

“Kunzima kabi ukukwenza lokho. Iningi labantu alikwazi ukungena kwi-internet noma kumaComputicket.”

UKodwa uthe izinqwembe zombuthano we-ANC nanokubhalwa kwazo kwakumele kushintshwe ngenxa yomthetho waleli dolobha ngoba ungagculisekile.

Uthe abadayisi banqatshelwa ukuthi badayise enkundleni nanokuthi abantu babengavunyelwe ukuthi bahambe noma yikuphi.

Uphinde wathi amaphoyisa edolobha aseKapa anikwa umyalelo othi uma bebona abantu bephethe utshwala ngasenkundleni kumele ababophe khona lapho bese bebikela abezindaba ngalokho.

UKodwa uthe i-ANC ilubuka kabili lolu daba njengoba icabanga ukulifaka kwaSAHRC noma icele iPhalamende ukuthi liphenye idolobha ngale mithetho yalo.

UZara Nicholson, okhulumela imeya yaseKapa uPatricia de Lille, ulwamukele uphenyo.

BANINGI abesifazane besimanje abangakayizwa kahle indaba yokuganela esithenjini, abasakuthatha njengesiko lasemandulo.

ZANELE MSOMI

BANINGI abesifazane besimanje abangakayizwa kahle indaba yokuganela esithenjini, abasakuthatha njengesiko lasemandulo.

Abanye ngisho begcina bengenile kusona, ukuthula akubi khona kwabagane indoda eyodwa, kunalokho kwanda ukuxabana nokuqhoshelana njengoba abesifazane bethanda nokuncintisana.

Lokhu kwenza ukuthi ngisho begane ndawonye baqhelelane ukugwema ukukhuluma.

Njengoba endulo kuthiwa bekungandile ukuklwebhana kumakhosikazi asesithenjini amanye abehlala egcekeni elilodwa, kungani abesimanje beba yikati nempaka?

Laba abakwaziyo ukubekezelelana babonakale behleka ndawonye benza ngamuphi umlingo?

UNgizwe Mchunu ongumsakazi woKhozi FM osanda kushadelwa ngunkosikazi wesibili ngonyaka odlule, muva nje ujwayele ukubonakala nawo womabili amakhosikazi akhe.

Ngisho ezinkundleni zokuxhumana kukhona izithombe ezinye amakhosikazi akhe azishuthe ndawonye yena engekho.

Kunesithombe esishuthwe uMaNxumalo noMaKhuzwayo bencikene, befaniselene nangezingubo ezimhlophe.

Esinye bagqoke imibala efanayo begaxwe wumyeni wabo.

Kulezi zithombe kukhombisa ukuthi bayezwana njengoba bemamatheka.

Lo msakazi oyisangoma ngo-Okthoba washada noNkk Lindi Mchunu, uMaKhuzwayo naye oyisangoma, emshadweni omhlophe owalandelwa ngowesintu kubo eNkandla.

UNgizwe wayesevele ashada noNkk Sphelele Mchunu, uMaNxumalo ngokwesintu ngaphambi kokuthatha uMaKhuzwayo.

UNgizwe wenqabile ukuthi amakhosikazi akhe akhulume nephephandaba ngalolu daba, egcizelela ukuthi akafuni ajwayelwe ngabezindaba.

Uthe izithombe ezibonakala ezinkundleni zokuxhumana zifakazela yona impilo ephilwa kwaMchunu.

“Angifuni ukuqamba amanga, isithembu akuyona into elula futhi akuyona into kanoma ubani. Kodwa iqiniso wukuthi sihlezi kahle kakhulu nabafazi bami futhi abantu basazobabona behamba ndawonye. Nasemcimbini kamasikandi wamaNtshontsho bazosibona sihamba ndawonye nabo,” usho kanje.

Akusethusi nokubona amakhosikazi amane kaMengameli uMnuz Jacob Zuma ehamba noma ehleli ndawonye emicimbini.

Ngisho kuvulwa iPhalamende asuke ehlezi ndawonye ngokulandelana kwawo.

Emcimbini wokugubha iminyaka ewu-70 yosuku lokuzalwa lukamengameli eNkosi Albert Luthuli ICC eThekwini, amakhosikazi akhe abonakala ehleka kuvela elomhlathi ebambisene ummese esika naye ikhekhe.

Lesi sithombe sadonsa amehlo abanye besifazane bekubuka kuyinto ekude nabo ukuhlekelana nabanakwabo.

UMnuz Madoda Zungu oyisazi samasiko uthi endulo okhokho babenendlela yoku”khanda” isithembu sabo obekwenza amakhosikazi azwane.

“Kudala owesifazane ubegana azi ukuthi uyogana nomndeni wonke kwakhiwa ubuhlobo. Yingakho bekungabi yinkinga ngisho indoda ithatha isithembu. Abesimanje uma beshada akusakhiwa ubuhlobo kodwa bashada kunemibandela,” kusho yena.

I-Young Communist League ithe uNksz Zelda la Grange kumele axolise ngakubhale ku-Twitter.

NGOMGQIBELO uFasimba (Young Communist League, YCL) luthe lowo owayengumabhalane kaDkt Nelson Mandela, uNksz Zelda la Grange kumele axolise ngakubhale ku-twitter ngoba kunokucwasa ngokwebala.

“Izinto abezibhala ku-twitter azikhombisi kuphela inzondo kuMengameli wethu owakhethwa ngabantu, kodwa zilulaza bonke abaseNingizimu Afrika,’’ kusho uMnuz Khaya Xaba okhulumela uFasimba.

“Ululaze nomsizila abesedume ngawo, wokusebenzisana noTata Nelson Mandela.

“Uma ebakhathalele abantu baseNingizimu Afrika akaxolise kuMengameli Jacob Zuma nasesizweni sonke ngenkulumo yakhe enokucwasa phakathi.’’

Uthe okubhalwe wuNksz la Grange ku-twitter kumveza ukuthi akakalwamukeli ushintsho eNingizimu Afrika.

“Imibono yakhe ifana ncamashi neyabathi bagxeka ubandlululo njengoNkk Helen Zille, owakhetha ukuthuka iNingizimu Afrika nenkululeko ngokuqhakambisa ingcosana yomengameli abamhlophe ababebusa ngesikhathi sobandlululo.’’

Uthe iYCL iphoxekile wukuthi wehlulekile wukufunda kuMandela emuva kweminyaka engaka esebenzisana naye.

UXaba uthe bayazi ukuthi baningi abamhlophe “abaphile kahle’’, okubalwa abatshala imali, abenza yonke imizamo yokuthi kwakheke isizwe esibumbene.

UNksz la Grange ubhale ku-twitter wathi ubona sengathi abamhlophe abamukelekile eNingizimu Afrika.

@zeldalagrangeSA: “Nginesiqiniseko sokuthi imibono efuze le: akubona ubu-Afrika ukuba yizinja, ukwantalala yinto yezizwe, Van Riebeeck njalo njalo.”

Omunye u-twitter wakhe obulandela lona, uthe uzobiza uJan van Riebeeck, ambuze ukuthi yini ayeyicabanga ngesikhathi efika e-Afrika ngomkhumbi.

UMhleli wephephandaba iCity Press uNksz Ferial Haffajee uphendule wathi:

“@)ZeldalaGrangeSA kodwa Zeldina eNingizimu Afrika entsha kungani uhlanga oluthile futhi okuyilona oluncane kumele lukhothanyelwe uma kuwukuthi sonke siyalingana?’’

UNksz la Grange uthe uzobuza uMengameli waseFrance uMnuz Francois Hollande ukuthi uyamfuna yini ngoba “inhlangano encoma uMnuz Robert Mugabe onguMengameli waseZimbabwe igxeka lowo owayenguMengameli kuleli uMnuz FW De Klerk ukuthi asifunwa la.

“Yebo, uMnuz De Klerk waba ngumengameli wokugcina wobandlululo futhi wazidedela izintambo zombuso KODWA wayesangawagodla amandla okuphatha bese kuqubuka impi,’’ kusho uNksz la Grange ku-twitter.

“UDe Klerk wahoxa ekuphatheni izwe futhi wayesangaphatha njengoba kwenza abanye ondlovukayiphikiswa abakhohlakele kuleli lizwekazi i-Afrika.

“Ukube ngiwumtshali wemali omhlophe ngabe sengishaye ngachitha manje. Kucacile ukuthi uJacob Zuma akabafuni abamhlophe eNingizimu Afrika.’’

Emuva kwalokho ubhale iheheba lwencwadi eyisixoliso ku-twitter nakwabezindaba.

“Ngiyaxolisa kakhulu kubantu baseNingizimu Afrika ngengikubhale ku-twitter ekuseni,’’ kusho isitatimende sakhe.

“Awukho ‘ukodwa’ uma uhlukumeza abanye abantu abangahlangene nokucikeka kwakho. Ngiyaxolisa,’’ kusho uNksz la Grange.

Uthe ubengekho eNingizimu Afrika isonto lonke, usazama ukuthola ukuthi bekwenzekani ezweni.

“Izindaba ebezihamba phambili ngezigxile kwabamhlophe abachazwe njengabantu bobandlululo, uMengameli Jacob Zuma uthe zonke izinkinga ezibhekene nezwe zaqala ngesikhathi kufika uJan van Riebeeck ngo-1652,’’ usho kanje.

Kuxabene ubendle kubaholi beNFP abangamalungu esiShayamthetho saKwaZulu-Natal.

CELANI SIKHAKHANE

KUXABENE ubendle kubaholi beNFP abangamalungu esiShayamthetho saKwaZulu-Natal ngenxa yokungaboni ngaso linye ngokusetshenziswa kwemali eyabelwa leli qembu ngokumeleleka kwalo esiShayamthetho sesifundazwe okuthiwa sekuholele ekususweni kwabanye ezikhundleni kubangwa imali.

Lokhu kulandela ukukhishwa kukaNkk Happy Khuzwayo esikhundleni sokuba nguSotswebhu ngoba kunezinsolo zokuthi ukhwabanise imali yeqembu ngokuthenga ifenisha ngenani lika-R300 000 yasemahhovisi esifundazwe eqembu.

Le fenisha ihlanganisa osofa abahlanu netafula lakhona egunjini lokwamukela izivakashi, itafula elikhulu elihambisana nezihlalo zakhona eziyisishiyagalombili ezisegunjini lokubambela imihlangano bese kuba yisihlalo sesikhumba netafula okusemahhovisini amahlanu abaholi besifundazwe beNFP.

“Lokhu akubaphathanga kahle abaholi kangangokuthi kwenziwa ucwaningo ngamanani ayo kwatholakala ukuthi ayifiki ngisho ku-R70 000 imali yakhona.

“Okunye kube wukuthi le fenisha ithengwe esitolo esaziwayo ukuthi asibizi yingakho kube nomsindo kwaze kwaba nezinsolo zokuthi uHappy (Nkk Khuzwayo) kukhona ayehlise ngomlenze nokuholele ekutheni bamsuse esikhundleni kwafakwa uMnuz Ericson Zungu,” kusho omunye wabaholi ocele kugodlwe igama lakhe.

Kuthiwa ngesikhathi uNkk Khuzwayo esegudluziwe esikhundleni kuphinde kwaba nokunye ukukhathazeka ngemali ebikhishwa nguSihlalo uMnuz Vikizitha Mlotshwa osolwa ngokusebenzisa i-signature ekokotelwe owesifazane anobudlelwane naye bezothando ngoba imali ibingeke iphume uma kusayine laba baholi kuphela engekho uNkk Khuzwayo.

Umthombo udalule nezinsolo zokuthi uMlotshwa ubonakale esethenge izimoto ezimbili azisebenzisa enkamapanini yakhe.

“Lokhu kuthukuthelise uMengameli uNkk Zanele Magwaza-Msibi ngoba ubesephakamise nokuthi imali ayingene kwi-account kazwelonke ilawulwe ehhovisi elikhulu leNFP ukuze abaholi abaseSishayamthetho bezocela imvume yokuyisebenzisa.

“Okunye wukuthi ngoMsombuluko womhlaka 18 Novemba bekuzoba nomhlangano wokukhomba indlela uMlotshwa ngenxa yawo umsindo wezimali, waphazanyiswa wukuquleka kukakaMagwaza-Msibi okwenzeka ngeSonto mhlaka 17 Novemba. Bekubuye kube nezikhalo zokuthi uNkk Khuzwayo uyalova, kube nemihlangano edinga yena njengoSotswebhu ukuthi abe kuyona eSishayamthetho kodwa ubehlale engekho neqembu lingazi ukuthi lizobikelwa wubani ngezinto ezenzeke emakomitini,” kusho umthombo.

UNkk Khuzwayo ucele kuthintwe uMlotshwa ngodaba wathi banqume ukuthi kube nguye ophawula ngalo.

“Ngaphandle kwalokho mina ngisuswe esikhundleni ngoba bengingekho, ngimatasa ngezinto ebezithinta umndeni kodwa akuzange kube bikho msindo ngalokho,” kusho uNkk Khuzwayo.

UMlotshwa uthe uNkk Khuzwayo wasuswa esikhundleni ngokuvumelana nekhokhasi ngoba egula futhi engasakwazi ukusayinela ezinye zezinto zeqembu zezimali ezigcine ziphazamisa ukuthi kukhokhelwe abasebenzi emahhovisi eqembu ezifundeni ezahlukene.

“Ngisho inkampani eyakhokhelwa uNkk Khuzwayo wayejutshwe yikhokhasi ukuthi akwenze lokho kodwa okususe umsindo kube nguZimdollar (Biyela) onele wezwa ukuthi sifuna ukuthenga ifenisha wavele wagijima engacelwanga muntu wayofuna inkampani ukuthi siyikhokhele sithenge kuyo. Yikho okuqhathe abantu. Mina angisayini futhi kungamanga ukuthi kukhona owesifazane engamsebenzisa ngoba abantu abagunyaziwe ukusayina nguNkk Khuzwayo noZungu. Indaba yezimoto ngathenga ezintathu ezingamaDouble Cap ngomholo wami ka-R40 000 waseSishayamthetho kanti ngizikhokhela ngu-R8 000 ngayinye ngoba zisenkampanini yezokuvakasha zihambisa abantu kwamanye amazwe nakuleli. Imali ephumayo iyabika nakwiselula yami okwaba yisivumelwano sekhokhasi,” kusho uMlotshwa.

Uthe uKaMagwaza-Msibi wachazelwa ngalolu daba nangokusebenza kwemali wacaciselwa ukuthi njengoba ziphuma eSishayamthetho azihlangene nemisebenzi yeNFP kodwa zibhekene nemisebenzi yaseSishayamthetho.

Ukuphikile ukuthi kube nemizamo yokumxosha wathi kungamampunge lokho.

UZimdollar uthe bafuna inkampani eyodwa yena wayalwela uZungu osenguSotswebhu ukuthi athole izinkampani ezimbili ukuze zibe ntathu baqhathanise kuzo, okwavela ukuthi lezi ayezitholile zazibiza u-R60 000.

Uthe abazange besamazisa ukuthi kuqhubekani kodwa wezwa sekuthiwa sebexabene bodwa ngoba basebesebenzise inkampani eyayibiza kakhulu.

Izolo i-ANC ibihlangene nezinkumbi zabantu abebebuthene eCecil Emmet Stadium, eVryheid izogubha iminyaka engu-103 yasungulwa.

CELANI SIKHAKHANE

NGEMUVA kwenyanga i-ANC iphakamise ukuthi izoqala umkhankaso wokulanda uMntwana wakwaPhindangene ku-IFP, izolo itheleke esizindeni seqembu lakhe ebaQulusini yatshela abantu ukuthi iZululand iyona kuphela esiyintandane engaphethwe yi-ANC.

Izolo i-ANC ibihlangene nezinkumbi zabantu abebebuthene eCecil Emmet Stadium, eVryheid izogubha iminyaka engu-103 yasungulwa.

Kuqale kwathulwa imizuzwana kukhunjulwa ilungu le-ANC elingasekho uMnuz Mtholephi Mthimkhulu.

USihlalo we-ANC KwaZulu-Natal uMnuz Senzo Mchunu uthe kufanele bazithathe zonke izindawo eziphethwe yi-IFP zingene ku-ANC.

“Zonke izifunda zaKwaZulu-Natal okubalwa iTheku, Ugu, Harry Gwala ebiyaziwa ngeSisonke, uThungulu nezinye ziphethwe i-ANC kusele iZululand, maqabane ngakho siyifuna ezandleni zikaKhongolose hhayi abanye abantu,” kusho uMchunu.

Ngesonto eledlule i-IFP itshele i-ANC ukuthi noma ingayokwenza lo mcimbi ebaQulusini kodwa ayikhohlwe ukuthi iyoke iyinuke iZululand neWestern Cape ngoba abantu bakhona abakhohliswa ngezethembiso ezingekho. Bonke abaholi bamadlelandawonye kusuka kuSACP, Cosatu, Sanco, kuhlanganisa nezinhlaka zayo okuyi-ANCWL ne-ANCYL bakubeke kwacaca ukuthi iZululand ngo-2016 bayidinga iphethwe uKhongolose kusuka KwaNongoma, uLundi kuyoshaya koDumbe.

Kulo mcimbi kuphinde kwahlaselwa i-EFF kwathiwa njengoba ihlela ukuphazamisa inkulumo yesizwe kaMengameli Jacob Zuma ngenyanga ezayo kuyomele igawule ibheke.

UNkk Nomvula Mokonyane oyilungu lesigungu esiphezulu ku-ANC, uthe sekuyisikhathi sokuthi iZululand ibuyiselwe ezandleni ezifanele kwakhiwe amagatsha kaKhongolose khona.

Uthe kufanele kuqinisekiswe ukuthi negatsha elincane eselisele abantu abasabambelele kulo liyaphela ukuze kukhule amagatsha e-ANC kuthathwe nomasipala bonke abakhona.

UNkk Mokonyane ubuye wahlasela i-EFF wathi bazoyibamba bayiphakamisele phezulu bayikhombise ukuthi bangobani.

Uthe abakwazi ukulawulwa abantu abayidlanzana ekubeni bevotelwe izigidi ezingu-11 zabantu baseNingizimu Afrika.

USihlalo weSACP KwaZulu-Natal uMnuz James Nxumalo uthe kumele intsha ibhukule ilwe nesenzo se-EFF sokuxhaphaza imibala ebomvu ngoba akuyona eyokudlala kodwa imele igazi elachitheka kuzabalazwa nabasebenzi.

Uthe i-EFF idlala ngemizwa yabantu ithi imele abampofu kodwa abaholi bayo bahlala emzini kanokusho.

Uthe uZuma angeke ayikhokhe le mali efunekayo kodwa bafuna kube i-EFF ekhokha imali okwakhiwe ngayo umuzi kaMnuz Julius Malema ngo-R16 million.

Abaholi bebephume ngobuningi ukuzothamela lo mcimbi kanti baqhumise oshampeni kwabonakala uMnuz Bheki Cele egijima nebhodlela layo ethela ngalo abantu bejabula.

UMchunu ungene esiteji namabutho wagiya waqephuza maqede watshela abantu ukuthi i-ANC ayikaze iphikisane namasiko njengoba kuqala kwakubekwa sengathi ayihambisani namabutho.

Zilunywe wuholokoqo lwemfezi enqundeke umsila izingane zamantombazane ezimbili zilele ebusuku, kwashona eyodwa.

MTHOKOZISI MANQELE

ZILUNYWE wuholokoqo lwemfezi enqundeke umsila izingane zamantombazane ezimbili zilele ebusuku, kwashona eyodwa enye isabambekile esibhedlela.

Umndeni wakwaKwesaba eMacabuzela, eMdletsheni, eHluhluwe ukhungathekile ngenyoka ebisho ukuvala ngehlahla emndenini.

U-Amahle Nxumalo (10) ushonele esibhedlela Empangeni ebulawa wubuthi bale mfezi emlume entanyeni.

UKwandile Kwesaba (8), kuthiwa imlume engalweni yavuvukala kodwa uselashwa esibhedlela.

Umndeni uthi le nyoka ibonakele isondela eduze kwendlu bayijaha yabaleka bangayibona ukuthi ishona ngaphi kanti izongena endlini elala izingane. Kuthiwa bezinhlanu izingane ebezilele nonina omncane.

Uninakhulu wezingane uNkk Gabazile Kwesaba uthe izingane zivuke zingazi ukuthi zingqofwe yinyoka, kubonakale sekusile sezivuvukele.

“U-Amahle ubenwaya umzimba sicabanga ukuthi uyaqubuka ngoba ubekade edle inyama yenkomo engamphathi kahle. UKwandile ubezitshela ukuthi ukwejwe yisipikili kanti amazinyo enyoka,” kusho uninakhulu. “Sibaphuthumise emtholampilo bathi ubuthi benyoka sebusabalele emzimbeni basidlulisela esibhedlela,” kusho uNkk Kwesaba.

Uthe u-Amahle (oshonile) ufike esibhedlela engasakwazi ukuphefumula. Inyoka athi beyibonakala ukuthi seyiyindlondlo itholakale endlini yabulawa. Yize esabambekile esibhedlela uKwandile uthe isimo akusona siyethembisa.

Basinde kukubi abasebenzi bezimo eziphuthumayo abebebizelwe kwa-B, eMlazi ngesikhathi behlaselwa ngamadoda abehlome ngezibhamu.

BAWINILE NGCOBO

BASINDE kukubi abasebenzi bezimo eziphuthumayo abebebizelwe kwa-B, eMlazi ngesikhathi behlaselwa ngamadoda abehlome ngezibhamu, izolo entathakusa.

Laba basebenzi bebephuthuma ukuyosiza lapho kuthiwa kunomuntu oshayiwe khona ngenkathi bephucwa amaselula, izikhwama zemali nomshini weBP obukwi-ambulensi.

Ngemuva kokubikwa kwalesi sigameko uNgqongqoshe wezeMpilo KwaZulu-Natal, uDkt Sbongiseni Dhlomo (osesithombeni) usenxuse amalungu omphakathi ukuthi avikele abasebenzi bezimo eziphuthumayo.

Kuthiwa laba basebenzi bakwa-Emergency Medical Services babizelwe kwa-B, eMlazi ngezithuba zawo-4 ekuseni izolo.

Ngesikhathi laba basebenzi besazama ukuthola ikheli lomuzi abebebizelwe kuwo kuthiwa kuqhamuke amadoda ayisithupha, amanye awo abehlomile.

Abasebenzi kuthiwa batshelwe ukuthi mabehle kwi-ambulensi, balaliswa phansi kwathathwa amaselula abo nezikhwama zemali.

Kuphinde kwathathwa nomshini wokuhlola iBP obusemotweni.

Abasebenzi kuthiwa abalimalanga kulesi sigameko kodwa bethukile bayiswa esibhedlela babuye badedelwa.

UDhlomo uthe siyacasula kakhulu lesi sigameko sokuhlasela okungenasidingo kwabasebenzi bezimo eziphuthumayo.

“Le ndlela yokuziphatha ikhinyabeza imizamo yethu yokushesha sifike lapho sisuke sibizelwe khona ukuze siyosindisa impilo yabantu,” kusho uDhlomo.

Uthe akukwazi ukuthi kube nesimo lapho abasebenzi babo bengakwazi ukwenza umsebenzi ngokukhululeka ngenxa yokuthi bakhathazekile ngokuthi bazohlaselwa.

Kwenzeka lesi sigameko nje ngo-Okthoba kwadunwa i-ambulensi eyayinabasebenzi ababili nabantu abagulayo ababili KwaMakhutha.

Le ambulensi yayiphuma emtholampilo KwaMakhutha ihambisa abantu ababegula esibhedlela.

Omunye wabasebenzi wakwazi ukuphunyuka abaleke.

I-ambulensi yatholwa eMlazi isishiywe kanjalo.

UDhlomo uthe lezi zigameko azamukelekile, zidinga ukunqandwa.

Okhulumela amaphoyisa KwaZulu-Natal uColonel Jay Naicker uthe amaphoyisa aphenya icala lokubamba inkunzi kanti akukaboshwa muntu.

Kubulawe ingane yomfana enonyaka kuhlaselwa umuzi wemenenja yaserenki yaKwaMaphumulo.

BAWINILE NGCOBO

KUBULAWE ingane yomfana enonyaka kwalimala eneminyaka engu-12 kuhlaselwa umuzi wemenenja yaserenki yaKwaMaphumulo ngoLwesihlanu, okusolwa ukuthi kuhlobene nodlame lwamatekisi.

Kuthiwa lesi sigameko senzeke ngezithuba zawo-11 ebusuku ngoLwesihlanu eMbitane, KwaMaphumulo. Amaphoyisa afike ingane yomfana enonyaka nezinyanga ezimbili isishonile.

UMnuz Lethukuthula Hlongwa ongumfowabo wemenenja yerenki laKwaMaphumulo, uMnuz Mthobisi Hlongwa, uthe umfowabo uqale wasongelwa ngomunye usomatekisi ngodaba lwemali engu-R150 ayiqoqayo erenki.

“Uthole ucingo obeluvela kulo somatekisi ngemuva kokuthatha le mali etekisini lakhe. Yize lokhu kwenzekile kodwa ngeke ngiqinisekise ukuthi ukuhlaselwa kuhlobene nakho,” kusho uHlongwa.

Uthe ebusuku besemlindelweni babizwe sekuthiwa sekunesidumo ekhaya.

“Sithole ukuthi abantu abahlasele bafike bathela uphethiloli bashisha phambi komnyango, umama wengane kamfowethu ebona ikloba lomlilo uphume ephethe ingane yakhe enonyaka nezinyanga ezimbili, uSukoluhle, kwaphuma nomfana wami lo osesibhedlela,” kusho uHlongwa.

Uthe unina kaSukoluhle ukhumbule ukuthi kunezinye izingane endlini wabambisa umfana wakhe ingane waphindela ngaphakathi kanti kuzosala kudutshulwa.

“Abantu abadubulile babone kahle ukuthi badubula izingane ngoba bekunomlilo obukhanyisile ngaphandle,” kusho uHlongwa.

Indodana yakhe uthi isalaliswe esibhedlela ngenxa yokulimala kanti akukho okushile ngoba umlilo ugcine phambi kwesicabha.

Okhulumela amaphoyisa KwaZulu-Natal, uColonel Jay Naicker, uthe kuphenywa icala lokubulala nelokuzama ukubulala.

Uthe banxusa noma ngubani ongaba nolwazi olungasiza amaphoyisa ukuthi abophe abathintekayo ukuthi axhumane namaphoyisa aKwaMaphumulo ku-032 481 4400 noma athinte inombolo ye-Crime Stop ethi 08600 10111.

UKhomishane wamaphoyisa KwaZulu-Natal, uLt General Mmamonnye Ngobeni, usigxekile lesi senzo sokubulawa kwengane.

“Siyethemba ukuthi amaphoyisa ethu azosebenza ubusuku kanzima ukuze kuboshwe laba babulali abangenanembeza. Sicela amalungu omphakathi ukuthi alekelelane namaphoyisa ukuze kususwe lezi zigebengu emphakathini,” kusho uLt Gen Ngobeni.

Kwenzeka lesi sigameko nje ngoLwesithathu ekuseni kushone usomatekisi nomsolwa kudutsulwana eStanger Manor.

Lesi sigameko siphoqe ukuthi kuvalwe igumbi elamukela abalimele esibhedlela eStanger emuva kokuthi kugasele amadoda abehlomile okusolwa ukuthi ayelandela abebedubulekile abebengeniswe esibhedlela.

Kulesi sigameko kwashona uMnuz Mbongeni Ngiba (60) ongusomatekisi noMkhumbane Khambule (52) okuthiwa ungumsolwa.

Kuboshwe oyedwa ngalesi sigameko owangeniswa esibhedlela enamanxeba okudutshulwa.

UNaicker uthe akakazi uzovela nini enkantolo umsolwa ngoba usalaliswe esibhedlela.